1. ¿Tiʼ il tiʼj tuʼn tbʼant quʼn tuʼn qkyaj anqʼin aj tul tqʼij Jehová?

 AJ TYOLIN Biblia tiʼj tqʼij Jehová, atz in yolin tiʼj ambʼil aj tkubʼ tnajsaʼn qe aj qʼoj tiʼj ex aj tklet ttnam tuʼn. Ya o bʼaj jlu toj ambʼil ojtxe tej tkubʼ tqʼoʼn Jehová kysentens junjun nasyon (Is. 13:1, 6; Ezeq. 13:5; Sof. 1:8). Aju tqʼij Jehová chʼix tul, kxel tzyet aj tkubʼ xiten Nintz tnam Babilonia ex kbʼel bʼaj toj Armagedón. Qa qaj tuʼn qkyaj anqʼin aj tpon qʼij lu, nim toklen tuʼn tbʼaj qbʼinchaʼn qten jaʼlo. Nya oʼkxju, ax ikx kyaj tqʼamaʼn Jesús tuʼn tbʼant jlu quʼn naʼmxtoq tul nimxix yajbʼil: «Noq bʼanin kytene» (Luc. 12:40; Mat. 24:21). Kyuʼn tyol Jesús lu, in nel qnikʼ tiʼj qa nim toklen tuʼn kukx tbʼaj qbʼinchaʼn qten.

2. ¿Tiquʼn tbʼanel qa ma qo xnaqʼtzan tiʼj tnejel carta xi samaʼn kye okslal te Tesalónica?

² Toj tnejel carta xi tsamaʼn apóstol Pablo kye okslal te Tesalónica, yolin kyiʼj junjun techel tuʼntzun tonin kyiʼj okslal tuʼn tbʼaj kybʼinchaʼn kyten tiʼj tqʼij Jehová. El tnikʼ Pablo tiʼj qa atxtoq ambʼil tuʼn tbʼaj jlu (2 Tes. 2:1-3). Pero xi tqʼamaʼn kye okslal qa iltoq tiʼj tuʼn tbʼaj kybʼinchaʼn kyten ik tzeʼn ya chʼixtoq tul qʼij lu. Onin consej lu kyiʼj okslal toj ambʼil ojtxe ex jaku tzʼonin qiʼj toj ambʼil jaʼlo. Qo xnaqʼtzan tnejel tiʼjju tqʼama Pablo tiʼj ambʼil tuʼn tul tqʼij Jehová. Yajxitl, qo yolin kyiʼj qeju mlay che kyaj anqʼin ex te mankbʼil tiʼjju il tiʼj tuʼn tbʼant quʼn tuʼn tbʼaj qbʼinchaʼn qten.

3. ¿Tiquʼn in xi qqʼamaʼn qa kʼokel tqʼij Jehová ik tzeʼn aj tul jun eleqʼ te qonikʼen? (Ax ikx qʼonka twitza kyiʼj dibujo).

³ «Ik tzaʼn jun eleqʼ nnuʼl qonikʼan» (1 Tes. 5:2). In yolin Pablo tiʼj oxe techel tuʼn ttzaj tqʼamaʼn tzeʼn kʼokel ambʼil aj tul tqʼij Jehová ex atzun jlu tnejel. Chʼixme tkyaqil maj, in che okx eleqʼ kyoj ja te qonikʼen tuʼnju at qlolj ex in che jtan xjal.  Ax jlu kbʼajel aj tul tqʼij Jehová, jun rat tzul ex che jawil sekʼpaj chʼixme kykyaqil xjal aj tok kyqʼoʼn kywitz tiʼj. Axlo ikx qe, qo jawil sekʼpaj aj tok qkeʼyin qa jun rat kbʼajel tkyaqil. Pero qo kjel anqʼin, atzun kye xjal in che bʼinchaʼn nya bʼaʼn che kbʼel najsaʼn.

4. ¿Tiquʼn in xi qqʼamaʼn qa kʼokel tqʼij Jehová ik tzeʼn aj tul itzʼj tal jun xuʼj?

⁴ «Ik tzaʼn jun xuʼj at tuj kʼixkʼoj ok nnuʼl itzʼj tal» (1 Tes. 5:3). Mintiʼ ojtzqiʼn tuʼn jun xuʼj toj alkye ambʼil tuʼn tul itzʼj tal. Pero qʼuqli tkʼuʼj tiʼj qa noq minabʼen kpol qʼij lu ex in kubʼ tnaʼn nim kʼixkʼoj. Ax jlu in bʼaj tukʼil tqʼij Jehová. Mintiʼ ojtzqiʼn or ex qʼij quʼn, pero qʼuqli qkʼuʼj tiʼj qa tzul. Ex ojtzqiʼn quʼn qa noq minabʼen kbʼel tqʼoʼn kykastiw qeju in che bʼinchaʼn nya bʼaʼn.

5. ¿Tiquʼn in xi qqʼamaʼn qa kʼokel tqʼij Jehová ik tzeʼn aj qspikʼe?

⁵ Ik tzeʼn aj qspikʼe. In yolin Pablo juntl maj kyiʼj eleqʼ toj toxin techel ajbʼen tuʼn, pero tuʼn ttzaj tyekʼin junxitl xnaqʼtzbʼil qe. Toj techel lu, bʼalo in nok tmojbʼaʼn tqʼij Jehová tukʼil ambʼil aj qspikʼe (1 Tes. 5:4). Jakulo tzʼok kyqʼoʼn eleqʼ kywiʼ kyiʼj tiʼchaq jaku tzʼex kyiʼn ex mintiʼ in nok kyqʼoʼn kywitz tiʼj or. Tuʼn jlu, bʼalo ya mintiʼ in nok kyqʼoʼn kywitz tiʼj qa chʼix qspikʼe ex qa jaku tzʼok kyqʼoʼn txqantl kywitz tiʼjju in bʼant kyuʼn. Chʼixme ax jlu kbʼajel toj ambʼil te nimxix yajbʼil. Kykyaqil qe xjal in che bʼinchaʼn nya bʼaʼn, ya mlay kubʼ kyewin aju in bʼant kyuʼn. Tuʼntzunju, mintiʼ tuʼn qok ik tzeʼn kye xjal lu ex tuʼn tbʼaj qbʼinchaʼn qten naʼmxtoq tul tqʼij Jehová. ¿Tzeʼn jaku bʼant jlu quʼn? Jaku bʼant quʼn aj tel qikʼun qe tiʼchaq nya bʼaʼn in nela toj twitz Jehová ex aj «qbʼinchante bʼaʼn, ex tuʼn qbʼet tuj tumelxix, ex tuʼn qyolin axix tok» (Efes. 5:8-12). Yajxitl, in tzaj tqʼamaʼn Pablo juntl kabʼe techel in yolin kyiʼj qeju mlay che kyaj anqʼin toj tqʼijlalil Jehová.

6. ¿Tiʼ in bʼant kyuʼn nim xjal? (1 Tesalonicenses 5:6, 7).

⁶ «Aqeju in che tan» (kjawil uʼjit 1 Tesalonicenses 5:6, 7). Tzaj tqʼamaʼn Pablo qa mlay che kyaj anqʼin xjal mintiʼ in che xqʼuqin moqa in che jtan aj tul tqʼij Jehová. Aj tikʼ jtan jun xjal, mintiʼ in nok tqʼoʼn twitz tiʼj ambʼil ex tiʼjju in bʼaj ttxlaj. Ax ikx, mintiʼ naʼn tuʼn qa nim kyoklen junjun tiʼchaq ex mlay tzʼel tnikʼ tiʼj tiʼ tuʼn t-xi tbʼinchaʼn. Chʼixme ax jlu in bʼaj kyiʼj xjal toj ambʼil jaʼlo tuʼnju mintiʼ in nok kyqʼoʼn toklen kyamiwbʼil tukʼil Dios (Rom. 11:8). Mintiʼ in xi kynimen qa in qo anqʼin kyoj «mankbʼil tqʼijlalil» ex qa ya chʼix tul nimxix yajbʼil. Ateʼ junjun xjal in nok kyqʼoʼn toklen tbʼanel tqanil tiʼj Tkawbʼil Dios aj tok kykeʼyin junjun matij chʼixpubʼil in bʼaj twitz Txʼotxʼ. Pero aj tikʼ ambʼil, chʼixme kykyaqil ya mintiʼ in nok kyqʼoʼn toklen tbʼanel tqanil lu. Ax ikx, ateʼ junjun in nok qeʼ kykʼuʼj tiʼj qa che okel xjal toj xjel tuʼn Dios. Noqtzun tuʼnj, in kubʼ kyximen qa atx nim ambʼil tuʼn tbʼaj jlu (2 Ped. 3:3, 4). Atzun qe, nim toklen toj qwitz tuʼn kukx qxqʼuqin ex tuʼn miʼn qikʼ jtan.

7. ¿Tiquʼn in che ok mojbʼaʼn xjal mlay che kyaj anqʼin kyukʼil kʼal qʼeʼn?

⁷ «Aqeju in che kʼan qʼeʼn». Ok tmojbʼaʼn apóstol Pablo qe xjal mlay che kyaj anqʼin kyukʼil qeju kʼal qʼeʼn. Aj t-xi tkʼaʼn jun xjal qʼeʼn, mintiʼ in ximen toj tumel ex mintiʼ in jaw tjyoʼn aju mas bʼaʼn. Chʼixme ax jlu in bʼaj kyiʼj xjal in che bʼinchaʼn nya bʼaʼn. Mintiʼ in xi kybʼiʼn tyol Dios ex in xi kybʼinchaʼn aju kyex kyajbʼil maske jaku tzaj nya bʼaʼn kyiʼj. Nya qaj tuʼn qok ik tzeʼn kye xjal kʼal qʼeʼn, tuʼntzunju nim toklen tuʼn tten qnabʼil ik tzeʼn tqʼama Pablo (1 Tes. 5:6). In tzaj tqʼamaʼn jun xjal in xnaqʼtzan tiʼj Biblia qe yol lu tiʼj jun xjal at tnabʼil: «Nya jun rat in tzaj tqʼoj, in ximen tiʼjju kxel tbʼinchaʼn ex in nonin jlu tiʼj tuʼn tjaw tskʼoʼn aju mas bʼaʼn». Pero, ¿tiquʼn nim toklen tuʼn tten qnabʼil? Tuʼnju jun rat jaku kubʼ qkʼuʼj kyuʼn xjal tuʼn tokx qqʼon qibʼ toj política ex tuʼn qonin kyiʼj. Ex mas kʼokel tilil kyuʼn tuʼn tkubʼ qkʼuʼj kyuʼn akux in nul laqʼeʼ tqʼijlalil Jehová. Pero mintiʼ tuʼn ttzaj bʼaj qkʼuʼj tuʼnju kʼonil xewbʼaj xjan qiʼj tuʼn miʼn qtzaj xobʼ ex tuʼn tel qnikʼ tiʼj alkye mas bʼaʼn (Luc. 12:11, 12).

8. Ik tzeʼn in tzaj tqʼamaʼn 1 Tesalonicenses 5:8, ¿tiʼ il tiʼj tuʼn tbʼant quʼn tuʼn tkubʼ qyekʼin qa in qo xqʼuqin ex qa at qnabʼil? (Ax ikx qʼonka twitza tiʼj dibujo).

⁸ Qqʼonk «chikyet kʼuxbʼil» ex «tpasbʼil kʼuxbʼil» moqa casco. In che ok tmojbʼaʼn apóstol Pablo qe okslal kyukʼil soldad bʼinchaʼn maj kyten tuʼn kyxiʼ toj qʼoj ex kukx in che xqʼuqin (kjawil uʼjit 1 Tesalonicenses 5:8). Aj t-xi tzyet qʼoj, nim toklen tuʼn tbʼaj kybʼinchaʼn kyten soldad. Ax jlu tuʼn tbʼant quʼn toj ambʼil jaʼlo. In kubʼ qyekʼin qa in bʼaj qbʼinchaʼn qten naʼmxtoq tul tqʼij Jehová aj tok qqʼoʼn «chikyet kʼuxbʼil» qiʼj, toj juntl yol aj tkubʼ qyekʼin qa at qokslabʼil ex qkʼujlabʼil. Ax ikx aj tjax qqʼoʼn casco toj qwiʼ, toj juntl yol aj tten qʼuqbʼil qkʼuʼj. Nim toklen tuʼn kyten tbʼanel qmod lu.

9. ¿Tzeʼn in xqʼuqin qʼuqbʼil qkʼuʼj qiʼj?

⁹ Jakutoq kolin «chikyet kʼuxbʼil» tiʼj tanmi jun soldad. Ax jlu in bʼant tuʼn qʼuqbʼil qkʼuʼj ex qkʼujlabʼil. In che onin qiʼj tuʼn kukx qajbʼen te Jehová ex tuʼn qok lepeʼ tiʼj Jesús. Tuʼnju at qʼuqbʼil qkʼuʼj, ojtzqiʼn quʼn qa tzul tkʼiwlaʼn Jehová qeju kukx in che jyon tiʼj (Heb. 11:6). Nya oʼkxju, ax ikx in nonin qʼuqbʼil qkʼuʼj qiʼj tuʼn kukx qten tzʼaqli twitz Jesús maske at nim nya bʼaʼn in qo ok weʼ twitz. Qa qaj tuʼn tchʼiy qʼuqbʼil qkʼuʼj ex tuʼn tten qipumal aj qok weʼ kywitz nya bʼaʼn,  tbʼanel qa ma qo xnaqʼtzan tiʼj kyanqʼibʼil erman kukx o che ten tzʼaqli twitz Jehová maske mintiʼ kypwaq moqa in che ok weʼ twitz ikʼbʼil. ¿Yajtzun qa qaj tuʼn t-xi qbʼiʼn consej tuʼn miʼn kyten nim tiʼchaq qe? Tbʼanel qa ma qo xnaqʼtzan tiʼj ky-experiencia erman in kubʼ kyqʼoʼn Tkawbʼil Dios tnejel toj kyanqʼibʼil ex in che anqʼin kyukʼil nya nim tiʼchaq. b

10. ¿Tzeʼn in nonin qiʼj aju qkʼujlabʼil at tiʼj Dios ex kyiʼj xjal?

¹⁰ Tuʼn kukx qxqʼuqin ex tuʼn tten qnabʼil, nim toklen tuʼn tten qkʼujlabʼil (Mat. 22:37-39). Jun techel, in nonin qkʼujlabʼil at tiʼj Dios tuʼn kukx qpakbʼan maske jaku qo ok weʼ kywitz nya bʼaʼn (2 Tim. 1:7, 8). Ex tuʼnju kʼujlaʼn qe xjal quʼn, in xi qjyoʼn alkyexku tumel tuʼn t-xi qqʼamaʼn tbʼanel tqanil kye, axpe ikx toj teléfono moqa toj carta. Mintiʼ in kubʼ qximen qa mlayx chʼexpaj kymod xjal, sino qʼuqli qkʼuʼj tiʼj qa kpol jun qʼij kxel kybʼinchaʼn tajbʼil Jehová (Ezeq. 18:27, 28).

11. Qa kʼujlaʼn qe erman quʼn, ¿tzeʼn in nonin qiʼj? (1 Tesalonicenses 5:11).

¹¹ Ax ikx in kubʼ qyekʼin qa kʼujlaʼn qe erman quʼn aj t-xi qbʼiʼn consej jlu: «Kyqʼom kynabʼle kyxolxe ex kykyuwsam kynabʼle kyxolxe» (kjawil uʼjit 1 Tesalonicenses 5:11). Aj kyxiʼ soldad toj qʼoj, in bʼaj kyonin kyibʼ kyxolx. Pero aj t-xi tzyet qʼoj, jakulo tzʼok kykʼixbʼisaʼn jun kyukʼil maske nya ximen kyuʼn. Ax ikx qe, tbʼanel tuʼn miʼn tkubʼ qximen tuʼn tok qbʼinchaʼn nya bʼaʼn tiʼj jun erman moqa tuʼn taj qqʼoʼn t-xel jun nya bʼaʼn in nok tbʼinchaʼn qiʼj (1 Tes. 5:13, 15). Juntl tumel tzeʼn in kubʼ qyekʼin qa kʼujlaʼn qe erman quʼn, aju qa ma tzʼok qqʼoʼn kyoklen qeju qʼil twitz aqʼuntl toj congregación (1 Tes. 5:12). Qo ximen tiʼj congregación te Tesalónica. Naʼmxtoq tikʼ jun abʼqʼi tkubʼlen bʼinchaʼn tej t-xi ttzʼibʼin Pablo carta lu kye. Bʼalo nyatoq nim kyojtzqibʼil ansyan at ex i el txalpaj, pero iltoq tiʼj tuʼn kyok respetarin. Akux in nul laqʼeʼ nimxix yajbʼil, mintiʼ ojtzqiʼn quʼn qa kukx che ul tqanil tzul tsamaʼn kytxuylal ninja  qʼil twitz aqʼuntl ex qe sucursal. Tuʼntzunju, il tiʼj tuʼn tok qeʼ mas qkʼuʼj kyiʼj ansyan toj ambʼil tzul. Qa ma che ok qkʼujlaʼn ansyan ateʼ toj qcongregación toj ambʼil jaʼlo ex qa ma qo respetarin kye, mas nya kwest kʼelel jlu toj qwitz. Noq tiʼxku jaku bʼaj, tbʼanel qa ma ten qximbʼetz toj tumel ex miʼn tzʼok qqʼoʼn qwitz tiʼj kypaltil. Ex miʼn tzikʼ tnaʼl quʼn qa in najbʼen Jesús tuʼn Jehová tuʼn tkubʼ nej kywitz erman lu.

12. ¿Tzeʼn in nonin qʼuqbʼil qkʼuʼj tiʼj qximbʼetz?

¹² Onin casco kyiʼj soldad toj ambʼil ojtxe tuʼn tok kyxqʼuqin kywiʼ. Toj ambʼil jaʼlo, in nonin qʼuqbʼil qkʼuʼj qiʼj tuʼn qximen toj tumel. Tuʼnju kukx in qo ximen tiʼj qʼuqbʼil qkʼuʼj, in nel qnikʼ tiʼj qa mintiʼ kyajbʼen tiʼchaq te twitz txʼotxʼ (Filip. 3:8). Ax ikx, in nonin qiʼj tuʼn miʼn qtzaj xobʼ ex tuʼn tkubʼ qnaʼn bʼaʼn. Atzun jlu bʼaj tiʼj Wallace ex Laurinda, jun mejebʼleʼn in najbʼen atz África. Tej naʼmxtoq tikʼ oxe seman, teyele te junjun kyim jun tman. Ex mintiʼ bʼant tuʼn kymeltzʼaj kyukʼil toj kyja tuʼn tpaj pandemia te COVID-19. Kubʼ ttzʼibʼin Wallace jlu: «Aj nximane tiʼj qa che kjawil anqʼin kyimni juntl maj, in nonin wiʼje. Mintiʼ in chin ximane tiʼj ambʼil tej chʼixtoq kykyim, sino tiʼjju kbʼel kynaʼn aj kyjaw anqʼin. Tuʼnju at jun qʼuqbʼil nkʼuʼje, mas nya kwest in nela toj nwitze tuʼn tikʼx bʼis wuʼne».

13. ¿Tiʼ il tiʼj tuʼn tbʼant quʼn tuʼntzun ttzaj tqʼoʼn Jehová xewbʼaj xjan qe?

¹³ «Miʼn kubʼ kyyuptzʼaʼne ju Xewbʼaj Xjan» (1 Tes. 5:19). Ok tmojbʼaʼn Pablo xewbʼaj xjan ik tzeʼn jun tqan qʼaqʼ in kʼant toj qanmi. Qa ma txi qqʼoʼn ambʼil te tuʼn tonin qiʼj, mas kʼokel qkʼujlaʼn aju bʼaʼn ex ktel qipumal tuʼn qajbʼen te Jehová (Rom. 12:11). ¿Tiʼ il tiʼj tuʼn tbʼant quʼn tuʼntzun ttzaj tqʼoʼn Jehová xewbʼaj xjan qe? Il tiʼj tuʼn t-xi qqanin te, tuʼn qxnaqʼtzan tiʼj Biblia ex tuʼn qokx toj ttnam. Qa ma bʼant jlu quʼn, che tel tbʼanel qmod in tzaj tqʼoʼn xewbʼaj xjan (Gál. 5:22, 23).

14. ¿Tiʼ mintiʼ tuʼn tbʼant quʼn tuʼntzun kukx ttzaj qʼoʼn xewbʼaj xjan qe? (Ax ikx qʼonka twitza kyiʼj foto).

¹⁴ In tzaj tqʼoʼn Jehová xewbʼaj xjan qe, pero il tiʼj tuʼn tok qxqʼuqin qibʼ tuʼntzun  miʼn tkubʼ yupj quʼn. Tuʼn ttzaj tqʼoʼn Jehová xewbʼaj xjan qe, nim toklen tuʼn kyten tbʼanel qmod ex tuʼn tten qximbʼetz saq. Pero ya mlay tzaj tqʼoʼn Jehová qe qa ma che ten nya bʼaʼn qximbʼetz ex qa ma kubʼ qbʼinchaʼn il (1 Tes. 4:7, 8). ¿Tiʼ mas il tiʼj tuʼn tbʼant quʼn? Tqʼama Pablo jlu: «Miʼn tzʼel kyikʼune kyyol qe t-sanjel Dios» moqa aqeju profecía (1 Tes. 5:20). In tzaj tyekʼin versículo lu qa ajbʼen xewbʼaj xjan tuʼn Jehová tuʼn ttzaj tqʼamaʼn junjun tqanil. Kyxol qe jlu, ax ikx in tzaj qʼamaʼn qa chʼix tpon ambʼil tuʼn tul tqʼij Jehová. Mintiʼ in kubʼ qximen qa mlayx tzul qʼij lu ex qa mlay tzʼok qkeʼyin Armagedón. Sino kukx in qo ximen tiʼj qa chʼix tpon ambʼil tuʼn tul. Tuʼntzunju, in nok tilil quʼn tuʼn kyten tbʼanel qmod ex in qo niman te Dios tkyaqil qʼij (2 Ped. 3:11, 12).

15. ¿Tiʼ il tiʼj tuʼn tbʼant quʼn tuʼn miʼn qkubʼ sbʼuʼn? (1 Tesalonicenses 5:21).

¹⁵ Toj chʼintl ambʼil, kxel kyqʼamaʼn aj qʼoj tiʼj Dios qe yol lu: «Mintiʼ bʼis, bʼaʼn taʼ tkyaqil» (1 Tes. 5:3). Tzul kyqʼamaʼn demonio nya ax tok tqanil ex che kbʼel sbʼuʼn nimku xjal (Apoc. 16:13, 14). Tuʼn miʼn qkubʼ sbʼuʼn, nim toklen tuʼn t-xi qbʼiʼn consej jlu: «Kykeʼyin bʼaje tkyaqil» (kjawil uʼjit 1 Tesalonicenses 5:21). Aju yol griego in kubʼ traducirin te «kykeʼyin», in najbʼentoq kyuʼn xjal tej tok kyqʼoʼn kywitz tiʼj qa ax tok xi qʼoʼn oro moqa plata kye. Ax jlu tuʼn tbʼant quʼn, nim toklen tuʼn qximen tiʼj qa ax tok aju in jaw quʼjin moqa in nok qbʼiʼn. Nimtoq toklen tuʼn tbʼant jlu kyuʼn okslal te Tesalónica, pero mas nim toklen tuʼn tbʼant quʼn toj ambʼil jaʼlo akux in nul laqʼeʼ nimxix yajbʼil. Naʼmxtoq txi qokslaʼn jun tiʼ, in kubʼ qyekʼin qa at qnabʼil qa ma tzʼok qmojbʼaʼn aju in jaw quʼjin ex in nok qbʼiʼn tukʼilju in tzaj tqʼamaʼn Biblia ex ttnam Jehová. Qa ma bʼant jlu quʼn, mlay qo kubʼ sbʼuʼn kyuʼn tqanil tzul kyqʼamaʼn demonio (Prov. 14:15; 1 Tim. 4:1).

16. ¿Alkye qʼuqbʼil qkʼuʼj at ex tiʼ il tiʼj tuʼn tbʼant quʼn jaʼlo?

¹⁶ Ojtzqiʼn quʼn qa che kjel anqʼin tmajen Jehová aj tkubʼaj nimxix yajbʼil. Pero mintiʼ ojtzqiʼn quʼn toj alkye ambʼil jaku qo kyim (Sant. 4:14). Tzul tqʼoʼn Jehová qchwinqlal te jumajx qa ma qo ten tzʼaqli twitz aj qkyim moqa aj tkubʼaj nimxix yajbʼil. Che anqʼil skʼoʼn maj tukʼil Jesús toj kyaʼj, atzun kye txqantl ẍneʼl che anqʼil tzalu twitz Txʼotxʼ toj jun Paraíso. Akux in pon qʼij lu, bʼaʼn tuʼn tok qqʼoʼn qwiʼ tiʼj qʼuqbʼil qkʼuʼj ex tuʼn tbʼaj qbʼinchaʼn qten tiʼj tqʼij Jehová.