Tej tok Tkabʼ Nimaq Qʼoj twitz Tkyaqil Txʼotxʼ, e ikʼ bʼet nmane toj tnam Estonia ex e xi anqʼil atz Alemania. Ex atz in nul itzʼje toj tnam lu. Tej tikʼ chʼin ambʼil, o xiʼye anqʼil atz Canadá. Atz o anqʼine nqayin tiʼj jun tnam Ottawa tbʼi ex toj jun lugar jatumel ten kyja ekʼ. Nyatoq nim qpwaqe at, pero ten qchʼiye jos.

Jun qʼij, jaw kyuʼjin testigos de Jehová Apocalipsis 21:3 ex 4 te ntxuʼye. Aju el tnikʼ tiʼj, pon toj tanmi ex jaw oqʼ tuʼn. Kukx xnaqʼtzan nmane ex ntxuʼye tiʼj Tyol Dios ex tej tikʼ chʼin ambʼil e bautisarin.

Maske mintiʼxix in neltoq kynikʼ nmane tiʼj yol inglés, kubʼ kyyekʼin qa ok kyqʼoʼn toklen axix tok. Kykyaqil sábado, in chin extoq qʼiʼne pakbʼal tuʼn nmane junx tukʼil wanabʼe Sylvia, axpe ikx bʼant jlu tuʼn maske otoq tzʼex qonikʼen in naqʼunan toj jun fábrica te níquel atz Sudbury toj tnam Ontario. Ex tkyaqil seman kubʼ qxnaqʼtzane uʼj Aju Xqʼuqil kyukʼil toj njaye. Tuʼnju e onin nmane wiʼje tuʼn tok nkʼujlaʼne Jehová, kubʼ nximane tuʼn t-xi nqʼamaʼne te qa oktoq chin ajbʼele te ex in bautisarine tej qʼiʼntoq 10 abʼqʼi wuʼne toj 1956. Aj nximane tiʼj qa kʼujlaʼn Jehová kyuʼn nmane, in nonin jlu wiʼje tuʼn kukx wajbʼene te.

Tej tetz bʼaj jun carrera wuʼne toj escuela, ya mintiʼ ok nqʼoʼne nwiʼye tiʼjju mas nim toklen. Kubʼ nximane qa mlayxtoq japun twi nximbʼetze tuʼn nviajarine toj avión qa ma chin oke te precursor. Xi tzyet tuʼn waqʼunane toj jun estación te radio jatumel in qo anqʼine ex in tzalaje tiʼjju bʼant wuʼne tej kyok nqʼoʼne bʼitz. Tuʼnju in chin aqʼunantoqe te qale ex qonikʼen, ya mintiʼ in chinxtoqe kyoj chmabʼil ex in tene nim ambʼil kyukʼil xjal nya kʼujlaʼn Jehová kyuʼn. Pero kubʼ nximane tuʼn kybʼant chʼixpubʼil wuʼne tuʼnju kukx tzaj nnaʼne aju otoq tzʼel nnikʼe tiʼj toj Tyol Dios.

In xiʼye anqʼil atz Oshawa toj tnam Ontario. Toj lugar lu, ok wojtzqiʼne Ray Norman ex Lesli, aju tanabʼ. Ax ikx e ok wojtzqiʼne junjuntl precursor. Kykyaqilx kubʼ kyyekʼin tbʼanel kymod wukʼile. Tej tok nkeʼyine qa in che tzalaj, onin wiʼje tuʼn tchʼexpaj nximbʼetze. Tzaj kyqʼamaʼn weye tuʼn t-xi tzyet tuʼn wajbʼene te precursor. Ex atzun jlu bʼant wuʼne toj septiembre te 1966. Nimtoq in chin tzalaje tiʼjju in bʼant wuʼne. Pero chʼixtoq kybʼaj junjun tiʼchaq chʼexpaj wanqʼibʼile kyuʼn.

Tej tkubʼaj weye ncarrera, xi nsamaʼne jun solicitud tuʼn nxiʼye ajbʼel toj Betel atz Toronto, Canadá.  Ex tej in chin ajbʼentoqe te precursor, tzaj qʼoʼn txokbʼil wiʼje tuʼn nxiʼye ajbʼel kyaje abʼqʼi toj Betel. Pero tuʼnju ngantoqe Lesli, tzaj nxobʼile tuʼn t-xi nkʼamoʼne txokbʼil tuʼnju kubʼ nximane qa ya mlaytoq tzʼok nkeʼyine. Tej otoqxi chin naʼne Dios, xi nkʼamoʼne txokbʼil tuʼn nxiʼye toj Betel ex tzaj nbʼise tej tkyaj ndespedirine Lesli.

Toj Betel, in naqʼunane toj lavandería ex te secretario. Toj ambʼil aju, ax ikx xi qʼoʼn toklen Lesli te precursora especial toj tnam Gatineau atz Quebec. Kukxtoq in chin ximane tiʼj Lesli ex mintiʼ ok qeʼ nkʼuʼje tiʼj qa otoq jaw nskʼoʼne aju mas bʼaʼn. Pero in jaw labʼine tej t-xi qʼoʼn txokbʼil tiʼj Ray, aju t-xibʼin Lesli, tuʼn tajbʼen toj Betel ex o anqʼine junx toj jun kwart. Iktzun tten kukx ten jun tbʼanel qamiwbʼile tukʼil Lesli. O kubʼ mojeʼye tukʼil Lesli toj 27 te febrero te 1971, toj mankbʼil qʼij tuʼn tkubʼaj txokbʼil tzaj qʼoʼn wiʼje tuʼn wajbʼene toj Betel.

O xi samaʼne tuʼn qajbʼene toj jun congregación atz Quebec jatumel in che yolin xjal toj francés. Tej tikʼ junjun abʼqʼi, in jaw labʼine tuʼnju tzaj qʼoʼn txokbʼil wiʼje tuʼn wajbʼene te superintendente de circuito. Tzmatoq qʼiʼn 28 abʼqʼi wuʼne, tuʼntzunju kubʼ nximane qa mintiʼtoq wojtzqibʼile. Pero e onin yol tkuʼx toj Jeremías 1:7 ex 8 wiʼje. Kwesttoq tuʼn tjtan Lesli tuʼnju otoq aksidentarin junjun maj kyukʼil kar. Tuʼntzunju, tzaj bʼaj nkʼuʼje tiʼj tzeʼn qo okele toj circuito. Pero tzaj tqʼamaʼn Lesli jlu weye: «Qa ma tzaj tqʼoʼn Jehová txokbʼil qiʼj, qqʼonk tilil tuʼn t-xi qbʼinchaʼn». Xi qkʼamoʼne txokbʼil ex o ajbʼene 17 abʼqʼi toj circuito.

Attoq nim aqʼuntl tuʼn tbʼant wuʼne tej wajbʼene toj circuito, tuʼntzunju, kwesttoq tuʼn tel npaʼne ambʼil tuʼn ntene tukʼil Lesli. Pero el nnikʼe tiʼj jun xnaqʼtzbʼil nim toklen. Jun lunes te prim, pon jun xjal tokaril timbre. Tej toktz njaqoʼne pwert, ni jun xjal at, oʼkx jun chiʼl tkuʼx jun mantel toj, qe fruta, queso, pan, jun botella vino, qe copa ex jun nota in tqʼamaʼn jlu: «Qʼinxa t-xuʼjila te pícnic moqa pasialil». Tbʼanelxix qʼij aju tuʼnju mintiʼ muj twitz kyaʼj. Pero iltoq tiʼj tuʼn tbʼaj nbʼinchaʼne ntene kyiʼj junjun chikʼbʼabʼil, tuʼntzunju xi nqʼamaʼne te Lesli qa mlaytoq bʼant tuʼn qxiʼye. El tnikʼ tiʼj, noqtzun tuʼnj tzaj chʼin tbʼis. Tej nxiʼye bʼinchal ntene kyiʼj chikʼbʼabʼil, kwest ela toj nwitze tuʼn tok nqʼoʼn nwiʼye tiʼj xnaqʼtzbʼil ex tzaj nnaʼne aju in tzaj tqʼamaʼn Efesios 5:25 ex 28. Kubʼ nximane qa ajbʼen texto lu tuʼn Jehová tuʼn ttzaj tnaʼn weye qa il tiʼj tuʼn nximane tiʼj nxuʼjile. In naʼne Dios ex xi nqʼamaʼne jlu te Lesli: «Qoʼ». Jaw tzalaj Lesli tej tok tbʼiʼn jlu. Xi qiʼne kar jatumel at jun río, kubʼ qqʼoʼne mantel... ex atzun jun qʼij mas tbʼanel o tzikʼ toj qanqʼibʼile. Ex tej qmeltzʼaje, ten ambʼil wiʼje tuʼn tbʼaj nbʼinchaʼne qe chikʼbʼabʼil.

O tzalaje tej qtene kyoj circuito jatumel o visitarine, o tene toj Columbia Británica tuʼn tpon atz Terranova. Kubʼ nnaʼne tzalajbʼil tuʼnju japun twi nximbʼetze tuʼn nviajarine. Otoq kubʼ nximane tuʼn qxiʼye toj Xnaqʼtzbʼil te Galaad, pero nyatoq waje tuʼn  wajbʼene te misionero toj juntl tnam. Kubʼ nximane qa nimtoq kyoklen misionero ex qa mlayxtoq ten woklene ik tzeʼn kye. Ax ikx, nyatoq waje tuʼn nxi samaʼne atz África jatumel attoq qʼoj ex nim yabʼil. Kubʼ nnaʼne tzalajbʼil toj lugar jatumel in qo ajbʼene te Jehová.

Toj 1992, xi qʼoʼn ambʼil juntl maj kye testigos de Jehová tuʼn kypakbʼan kyoj junjun tnam e ten tjaqʼ tkawbʼil Unión Soviética. Tuʼntzunju, tzaj qanin qeye qa bʼaʼn toj qwitze tuʼn qajbʼene te misionero toj tnam Estonia. Tuʼnju mintiʼtoq ayon jlu quʼne, o naʼne Dios te Jehová. Kubʼ qximane juntl maj: «Qa ma tzaj tqʼoʼn Jehová txokbʼil qiʼj, qqʼonk tilil tuʼn t-xi qbʼinchaʼn». Xi qkʼamoʼne oklenj ex kubʼ nximane jlu: «Por lo menos mintiʼ ma qox samaʼn atz África».

Tej qpone Estonia, xi tzyet tuʼn qxnaqʼtzane tiʼj kyyol xjal. Tej tikʼ junjun xjaw qponlene, tzaj qʼoʼn txokbʼil qiʼje tuʼn qajbʼene toj circuito. Iltoq tiʼj tuʼn qxiʼye visitaril 46 congregación ex junjuntl grupo kyoj oxe tnam ate nqayin tiʼj mar Báltico ex toj Kaliningrado atz Rusia. Tuʼntzunju, o xnaqʼtzane kyiʼj junjuntl yol ik tzeʼn letón, lituano ex ruso. Kwest ela jlu toj qwitze, pero tzaj kyqʼoʼn erman chjonte qeye tuʼnju ok tilil quʼne ex e onin qiʼje. Toj 1999, bʼant jun akʼaj sucursal atz Estonia ex tzaj qʼoʼn oklenj weye tuʼn wajbʼene toj comité junx tukʼil Toomas Edur, Lembit Reile ex Tommi Kauko.

E ok qojtzqiʼne nim erman i eʼx deportarin atz Siberia. Kukx e tzalaj erman lu maske e ok weʼ twitz nim nya bʼaʼn toj cárcel ex i el paʼn kyiʼj toj kyja. Ax ikx, kukx ok tilil kyuʼn tuʼn kypakbʼan. Tuʼn jlu, el qnikʼe tiʼj qa jaku qo tzalaj ex jaku tzikʼx quʼn maske jaku qo ok weʼ twitz nya bʼaʼn.

Ok tilil quʼne tuʼn qaqʼunane kyoj nimku abʼqʼi ex mintiʼtoq in nel qpaʼne nim ambʼil tuʼn qojlane. Tej tikʼ ambʼil, kwest ela toj twitz Lesli tuʼn t-xewin ex mintiʼ el qnikʼe tiʼj qa attoq fibromialgia tiʼj. Tuʼntzunju, kubʼ qximane tuʼn qmeltzʼaje Canadá. Tzaj qʼoʼn txokbʼil qiʼje tuʼn qxiʼye atz Patterson Nueva York toj jun xnaqʼtzbʼil kye erman in che ajbʼen kyoj Comité de Sucursal. Noqtzun tuʼnj, kubʼ nximane qa mlaytoq bʼant tuʼn qxiʼye. Pero o naʼne Dios te Jehová ex xi qkʼamoʼne txokbʼil. Ex o tzaj kʼiwlaʼne tuʼn Jehová tuʼnju bʼant jlu quʼne. Tej qtene toj xnaqʼtzbʼil lu, xiʼ Lesli tukʼil doctor tuʼntzun ttzaj qʼoʼn tqʼanbʼil. Tej tbʼanix, ya jakutoq qo aqʼunane juntl maj.

Toj jun qonikʼen toj 2008, tej ya otoq qo meltzʼaje Estonia, e tzaj llamarin junjun erman te central mundial qiʼje tuʼn ttzaj kyqanin qeye qa jakutoq qoʼxe ajbʼel atz República Democrática del Congo. In jaw labʼine tuʼn jlu ex mas tuʼnju iltoq tiʼj tuʼn t-xi qqʼoʼne jun tzaqʼwebʼil toj juntl qʼij. Mintiʼ xi nqʼamaʼne jlu te Lesli tuʼntzun tjtan. Toj qonikʼen aju, in naʼne Dios te Jehová tiʼjju otoq tzaj qʼamaʼn qeye tuʼn qxiʼye África.

Toj juntl qʼij tej t-xi nqʼamaʼne te Lesli, kubʼ qximane jlu: «A Jehová in tzaj qʼonte txokbʼil qiʼj tuʼn qxiʼ África, ¿tzeʼn jaku tzʼel qnikʼ tiʼj qa mlay bʼant quʼn ex qa mlay qo tzalaj qa mintiʼ ma txi qbʼinchaʼn?».  Tuʼntzunju, o xiʼye atz Kinsasa toj República Democrática del Congo tej otoq tzikʼ 16 abʼqʼi in qo ajbʼene atz Estonia. Attoq jun tbʼanel tjardín sucursal ex mintiʼtoq bulla. Kyxol qe tnejel tiʼchaq kubʼ tqʼoʼn Lesli toj qkwarte, kubʼ tqʼoʼn jun tarjeta tzaj tiʼn atz Canadá. In tqʼamaʼntoq jlu: «Tzalaja noq jaxku tumel taʼya». El qnikʼe tiʼj qa jakutoq kubʼ qnaʼne nim tzalajbʼil tej kyok qojtzqiʼne erman, tej qqʼone xnaqʼtzbʼil tiʼj Tyol Dios ex tej qajbʼene te misionero. Tej tikʼ ambʼil, tzaj qʼoʼn oklenj qeye tuʼn qxiʼye visitaril junjuntl sucursal kyoj 13 tnam te África. El qnikʼe kyiʼj nim xnaqʼtzbʼil tej tok qkeʼyine aju in bʼant kyuʼn junjuntl xjal. Ya mintiʼ in tzaj xobʼe ik tzeʼn tnejel ex xi qqʼoʼne chjonte te Jehová tuʼnju o xi tsamaʼne atz África.

Kubʼ qximane qa mlaytoq txi qwaʼne junjun txkup ik tzeʼn qe insecto, pero atzun jlu tzaj qʼoʼn qeye kyuʼn xjal atz Kinsasa. Xi qwaʼne tkyaqilju tzaj qʼoʼn qeye tej tok qqʼoʼne qwitze tiʼj qa in xi kywan erman ex mintiʼ tzaj qbʼise tuʼnju bʼant jlu quʼne.

Toj este te tnam, e ok tzoqpaj guerrilla kyiʼj tnam ex ok kybʼinchaʼn nya bʼaʼn kyiʼj xuʼj ex qe kʼwal. Tuʼntzunju, tzaj qʼoʼn oklenj qeye tuʼn qxiʼye qʼuqbʼal kykʼuʼj erman ex tuʼn t-xi qqʼoʼne onbʼil kye. Nyatoq nim tiʼchaq at kye erman. Pero o jaw labʼine tej tok qkeʼyine qa ok qeʼ kykʼuʼj tiʼj qa che kjawil anqʼin kyimni, qa kʼujlaʼn Jehová kyuʼn ex qa in nok qeʼ kykʼuʼj tiʼj ttnam. Tuʼn tbʼanel techel kubʼ kyqʼoʼn erman, o ximane tiʼj qajbʼebʼile te Jehová ex mas ok qeʼ qkʼuʼje tiʼj. Ateʼ junjun erman otoq kubʼ xitj kyja ex otoq naj kyawal. Tzaj tnaʼn jlu weye qa jaku che naj tiʼchaq at qe ex qa mas nim toklen qamiwbʼil tukʼil Jehová. Maske otoq che ok weʼ twitz nya bʼaʼn, kukxtoq in che tzalaj. Onin tbʼanel kymod qiʼje tuʼn tten qipumale tej qok weʼye twitz nya bʼaʼn ex tej ttzaj yabʼil qiʼje.

O jaw labʼine tej ttzaj qʼoʼn txokbʼil qiʼje tuʼn qxiʼye ajbʼel toj sucursal te Hong Kong. Mintiʼ kubʼ qximane qa oktoq qo anqʼile atz Asia. Toj ambʼil lu, mintiʼ jawje qkʼuʼje tiʼj Jehová tuʼnju otoq tzʼok qqʼoʼne qwitze tiʼj tzeʼn onin qiʼje kyoj junjuntl q-asignacione. Toj abʼqʼi 2013, tzaj nim qbʼise tej qikʼ bʼete atz África ex tej qdespedirine kyiʼj qamiwe.

 Junxitl qanqʼibʼile ten Hong Kong tuʼnju ateʼ nim xjal te junxichaq tnam. Ax ikx, kwest ela toj qwitze tuʼn qxnaqʼtzane tiʼj yol chino cantonés. Pero kubʼ kyyekʼin erman kykʼujlabʼil qiʼje ex o tzalaje tiʼj wabʼj kubʼ kybʼinchaʼn. Xi tzyet tuʼn t-xi bʼinchet mas aqʼuntl toj sucursal ex iltoq tiʼj tuʼn tten mas espacio. Pero mastoq in jax twi txʼotxʼ tej tbʼet ambʼil. Tuʼntzunju, kubʼ t-ximen Kʼloj Xjal Qʼil Twitz Aqʼuntl tuʼn t-xi tkʼayin chʼixme tkyaqil txʼotxʼ te sucursal ex tuʼn tten toj juntl tnam. Tej tikʼ chʼin ambʼil, toj 2015, o xiʼye anqʼil tukʼil Lesli toj Corea del Sur ex atz toj tnam lu in qo ajbʼene jaʼlo. Kwest tuʼn tbʼant yol coreano quʼne, pero in qo tzalaje tuʼnju in tzaj kyqʼamaʼn erman qeye qa ya in nel kynikʼ tiʼjju in xi qqʼamaʼne maske nyaxix nim yol ojtzqiʼn quʼne.

Kwest tuʼn kyten akʼaj qamiw. Pero qa ma qo yolin kyukʼil erman ex qa ma txi qqʼoʼn txokbʼil kyiʼj tuʼn kypon qukʼil, mas nya kwest kʼelel toj qwitz tuʼn kyok qojtzqiʼn. O tzʼel qnikʼe tiʼj qa junx qoʼ toj twitz Jehová ex qa o qo kubʼ tbʼinchaʼn tuʼn tkubʼ qyekʼin qkʼujlabʼil kyiʼj xjal te junxichaq lugar ex tuʼn kyten akʼaj qamiw (2 Cor. 6:11).

O tzʼel qnikʼe tiʼj qa kʼujlaʼn qoʼ tuʼn Jehová, qa in tzaj tyekʼin qbʼe toj qanqʼibʼil ex qa il tiʼj tuʼn tok qqʼoʼn kyoklen kykyaqil xjal ik tzeʼn in bʼant tuʼn. Tej tkubʼ qnaʼne bʼis moqa tej tkubʼ qximane qa in kubʼ qyekʼine tbʼanel qmode kyukʼil txqantl, ok tilil quʼne tuʼn tjaw quʼjine juntl maj qe tarjeta ex qe carta tzaj kysamaʼn qamiwe qeye. Ex o tzʼel qnikʼe tiʼj qa in tzaj ttzaqʼweʼn Jehová qnaʼj Diose, in tzaj tqʼuqbʼaʼn qkʼuʼje ex qa in tzaj tqʼoʼn qipumale.

Tej kyikʼ abʼqʼi, el qnikʼe tiʼj tukʼil Lesli qa il tiʼj tuʼn tel qpaʼne ambʼil tuʼn qtene junx maske at nim aqʼuntl tuʼn t-xi qbʼinchaʼne. Ax ikx, o tzʼel qnikʼe tiʼj qa il tiʼj tuʼn qtzeʼn aj qel txalpaj ex mas aj qxnaqʼtzan tiʼj jun akʼaj yol. Ex tkyaqil qonikʼen in xi qqʼoʼne chjonte te Jehová tiʼj jun tiʼ tbʼanel o tzʼela toj qwitze.

Mintiʼ kubʼ nximane tuʼn wajbʼene te misionero moqa tuʼn wanqʼine toj juntl tnam. Noqtzun tuʼnj, o tzʼel nnikʼe tiʼj qa jaku bʼant tkyaqil tuʼn Jehová ex in chin tzalaje tuʼn jlu. Ax nximbʼetze ik tzeʼn te profeta Jeremías tej tqʼama jlu: «Aya Nman, ma chin kubʼ t-sbʼuʼna» (Jer. 20:7). O tzaj tqʼoʼn Jehová ambʼil tuʼn kybʼant nim tiʼchaq quʼne ex o qo tzaj kʼiwlaʼne tuʼn. Axpe ikx o tzaj tqʼoʼn ambʼil weye tuʼn nviajarine toj avión. O qoʼxe kyoj nimku lugar, mas twitzju kubʼ nximane tej kʼwalx qiʼne. O qoʼxe visitaril junjun sucursal kyoj jweʼ continente. Ex in xi nqʼoʼne nim chjonte te Lesli tuʼnju o kubʼ tyekʼin jun tbʼanel tmod ex o tzʼonin wiʼje kyoj qe asignación o che tzaj qʼoʼn qeye.

Kukx in tzaj qnaʼne qa in xi qbʼinchaʼne tkyaqil tiʼchaq tuʼnju kʼujlaʼn Jehová quʼne. Kykyaqil tbʼanel tiʼchaq in qo tzalaj tiʼj toj ambʼil jaʼlo in tzaj kyyekʼin qe qa tbʼanel kʼokel ambʼil aj qanqʼin te jumajx. Chʼix tpon ambʼil tuʼn tbʼant jlu tuʼn Jehová: «Tkyaqil in xi tqʼoʼna kye ax tuʼn t-xtalbʼila, ex in che noj kykyaqil qe tchʼisbʼena» (Sal. 145:16).