1, 2. Ik tzeʼn in tzaj tqʼamaʼn Deuteronomio 10:20, ¿tiʼ il tiʼj tuʼn tbʼant quʼn tuʼn tten jun tbʼanel qamiwbʼil tukʼil Jehová?

 ¿ALKYEQE qmod nim toklen tuʼn tten tuʼn qok te jun tbʼanel amiw? Jakulo kubʼ t-ximana qa nim toklen tuʼn tten qkʼujlabʼil ex tuʼn tbʼaj qonin qibʼ qxolx. Pero mlaylo kubʼ t-ximana qa il tiʼj tuʼn tten tchiylal juntl xjal qiʼj. Noqtzun tuʼnj, in tzaj tqʼamaʼn texto jatumel ma jatz tbʼi xnaqʼtzbʼil lu qa il tiʼj tuʼn tten tchiylal Jehová qiʼj tuʼntzun tten jun tbʼanel qamiwbʼil tukʼil (kjawil uʼjit Deuteronomio 10:20).

² Noq jniʼxku ambʼil qʼiʼn quʼn in qo ajbʼen te Jehová, nim toklen tuʼn tten tchiylal qiʼj. Pero, ¿tiʼ t-xilen tuʼn tten tchiylal Dios qiʼj? ¿Tiʼ jaku tzʼonin qiʼj tuʼn tbʼant jlu quʼn? ¿Ex tiʼ xnaqʼtzbʼil jaku tzʼel qiʼn tiʼjju tuʼn tten tchiylal Dios qiʼj aj qxnaqʼtzan tiʼj tanqʼibʼil jun majen Abdías tbʼi, tiʼj tnejel pal Jehoiadá ex tiʼj rey Jehoás?

3. ¿Tzeʼn in nonin qiʼj aj qtzaj xobʼ tuʼn t-xi qbʼinchaʼn junjun tiʼchaq?

³ Jaku qo xobʼ twitz jun tiʼ qa in nel qnikʼ tiʼj qa jaku tzaj tiʼn nya bʼaʼn qiʼj. Ex tbʼanel jlu tuʼnju jaku tzʼonin qiʼj tuʼn qximen tiʼjju kxel qbʼinchaʼn. Qo xnaqʼtzan kyiʼj junjun techel. Mlaylo qo ex laqʼeʼ ttxaʼn xaq tuʼnju in qo xobʼ tuʼn qex tzʼaq. Ax ikx, mlaylo qo ok laqʼeʼ kytxlaj junjun tiʼchaq jaku tzaj jun aksident qiʼj kyuʼn tuʼnju nya qaj tuʼn qkʼixbʼi. Ex qa kʼujlaʼn jun qamiw quʼn, kʼokel tilil quʼn tuʼn miʼn ttzaj tbʼis ex tuʼn miʼn tok qbʼinchaʼn jun nya bʼaʼn tiʼj.

4. ¿Tiʼ taj Satanás tuʼn tkubʼ qximen tiʼj Jehová?

⁴ Taj Satanás tuʼn kytzaj xobʼ xjal twitz Jehová. Ax ikx, taj tuʼn t-xi qnimen qe tyol Elifaz xi tqʼamaʼn te Job. Taj tuʼn tkubʼ qximen qa mintiʼ in tzalaj Jehová qiʼj, qa at nim tqʼoj ex qa in naj tqʼoʼn t-xel nya bʼaʼn (Job 4:18, 19). ¿Tiquʼn in bʼant jlu tuʼn? Tuʼnju taj tuʼn tkyaj qtzaqpiʼn tuʼn qajbʼen te Jehová.  Pero mlay txi qqʼoʼn ambʼil te tuʼn tkubʼ qiʼj tuʼn. Tuʼntzunju, nim toklen tuʼn tel qnikʼ tiʼj tzeʼn tuʼn qrespetarin te Jehová ex tiʼ jaku bʼant quʼn tuʼn miʼn ttzaj tbʼis quʼn.

5. ¿Tiʼ t-xilen tuʼn tten tchiylal Dios qiʼj?

⁵ Qa at tchiylal Dios tiʼj jun xjal moqa in respetarin te, in kubʼ tyekʼin tkʼujlabʼil tiʼj ex mintiʼ in xi tbʼinchaʼn jun tiʼ jaku tzaj tiʼn nya bʼaʼn tiʼj tamiwbʼil tukʼil. Kyaj tqʼoʼn Jesús jun tbʼanel techel qwitz tuʼnju nimen te Dios moqa ten tchiylal tiʼj (Heb. 5:7). Mintiʼ xobʼ Jesús twitz Jehová (Is. 11:2, 3). Sino ok tkʼujlaʼn ex tajtoq tuʼn tnimen te (Juan 14:21, 31). Ax ikx qe, in qo respetarin te Jehová ex in qo ajbʼen te tuʼnju at nim tkʼujlabʼil, tnabʼil, tipumal ex tuʼnju in nok te tzʼaqli. Ex ojtzqiʼn quʼn qa kʼujlaʼn qoʼ tuʼn ex qa in tzaj tbʼis qa mintiʼ in qo nimen te. Pero in tzalaj qiʼj qa in qo ajbʼen te tuʼn tkyaqil qanmi (Sal. 78:41; Prov. 27:11).

6. ¿Tiʼ jun tiʼ jaku tzʼonin qiʼj tuʼn tten tchiylal Jehová qiʼj? (Salmo 34:11).

⁶ Nim toklen tuʼn tten tchiylal Jehová qiʼj ex mintiʼ in qo ul itzʼj tukʼil jlu (kjawil uʼjit Salmo 34:11). Tuʼn tbʼant quʼn, tbʼanel qa ma qo ximen kyiʼj tbʼinchbʼen. Mas kʼokel qkʼujlaʼn Jehová ex mas qo respetaril te aj tel qnikʼ tiʼj qa at tnabʼil, tipumal ex qa kʼujlaʼn qoʼ tuʼn (Rom. 1:20). Tqʼama jun ermana jlu, aju Adrienne tbʼi: «Aj tok nqʼoʼne nwitze tiʼj tkyaqilju o bʼant tuʼn Jehová ex aj tel nnikʼe tiʼj qa at nim tnabʼil, mas in nok nqʼoʼne toklen ex in nok qeʼ nkʼuʼje tiʼj qa ojtzqiʼn tuʼn alkye mas tbʼanel te weye». Tuʼnju kukx bʼant jlu tuʼn ermana, tqʼamatl jlu: «Mlayx txi nbʼinchaʼne jun tiʼ jaku chin el paʼne tuʼn tiʼj Jehová, aju qʼol nchwinqlale». Tuʼntzunju, tbʼanel qa ma tzʼel tpaʼna ambʼil toj seman lu tuʼn tok tqʼoʼn twitza kyiʼj tbʼinchbʼen Jehová. Qa ma bʼant jlu tuʼna, mas kʼokel tqʼoʼna toklen ex mas kʼokel tkʼujlaʼna (Sal. 111:2, 3).

7. ¿Tzeʼn in nonin naʼj Dios qiʼj tuʼn tten tchiylal Jehová qiʼj?

⁷ Ax ikx jaku ten tchiylal Jehová qiʼj qa kukx ma qo naʼn Dios te. Qa ma bʼant jlu quʼn, mas kʼokel qojtzqiʼn. Aj t-xi qqanin te Jehová tuʼn tonin qiʼj tuʼn qex twitz jun nya bʼaʼn, in tzaj qnaʼn qa at nimxix tipumal. Ex aj t-xi qqʼoʼn chjonte te tuʼnju tzaj tsamaʼn Tkʼwal tuʼn tchjet qil, in tzaj qnaʼn qa kʼujlaʼn qoʼ tuʼn. Te mankbʼil, aj t-xi qqanin te tuʼn ttzaj tqʼoʼn qnabʼil aj qok weʼ twitz jun nya bʼaʼn, in tzaj qnaʼn qa at nimxix tnabʼil. Aj tbʼant jlu quʼn, mas qo respetaril te Jehová, mas kʼokel qkʼujlaʼn ex kʼonil qiʼj tuʼn miʼn tkubʼ qbʼinchaʼn jun tiʼ jaku tzaj tiʼn nya bʼaʼn tiʼj qamiwbʼil tukʼil.

8. ¿Tiʼ il tiʼj tuʼn tbʼant quʼn tuʼn kukx tten tchiylal Jehová qiʼj?

⁸ Aj qxnaqʼtzan tiʼj Tyol Dios, tbʼanel qa ma tzeʼl qiʼn junjun xnaqʼtzbʼil kyiʼj xjal kubʼ kyqʼoʼn jun tbʼanel techel ex kyiʼj qeju mintiʼ bʼant jlu kyuʼn. Qa ma bʼant jlu quʼn, kukx ktel tchiylal Jehová qiʼj. Tuʼntzunju, qo xnaqʼtzan tiʼj kyanqʼibʼil kabʼe xjal kubʼ kyqʼoʼn jun tbʼanel techel qwitz. Qo yolin tnejel tiʼj Abdías, jun xjal xqʼuqin kyiʼj toj tja rey Acab. Yajxitl, qo yolil tiʼjju bʼant tuʼn tnejel pal Jehoiadá. Te mankbʼil, qo yolil tiʼj jun xjal kubʼ tqʼoʼn jun nya bʼaʼn techel qwitz, qo yolil tiʼj rey Jehoás te Judá. Kubʼ tyekʼin rey lu qa ok qeʼ tkʼuʼj tiʼj Jehová, pero yajxitl el tpan tibʼ tiʼj.

9. ¿Tzeʼn onin tiʼj Abdías tuʼnju ten tchiylal Jehová tiʼj? (1 Reyes 18:3, 12).

⁹ Aj tyolin Biblia tnejel maj tiʼj Abdías in tzaj tqʼamaʼn jlu: b «Ate Abdías nimanxix  Qman tuʼn ex in xobʼ twitz» (kjawil uʼjit 1 Reyes 18:3, 12). Tuʼnju bʼant jlu tuʼn, ok qeʼ kykʼuʼj txqantl tiʼj ex kubʼ tbʼinchaʼn aju bʼaʼn. Ax ikx, xi tqʼoʼn rey toklen tuʼn t-xqʼuqin kyiʼj toj tja (mojbʼankuya tukʼil Nehemías 7:2). Ex tuʼnju ten tchiylal Dios tiʼj, mintiʼ tzaj xobʼ tej tok weʼ kywitz nya bʼaʼn. Nimxix onin jlu tiʼj tuʼnju anqʼin toj tqʼijlalil rey Acab, aju in tzaj tqʼamaʼn Biblia jlu tiʼj: «Aju tbʼinchbʼen Acab mya bʼaʼn ela tuj twitz Qman, ex masxix mya bʼaʼn o tbʼincha kywitz qe txqantl rey, aqeju otoq che ten nej twitz» (1 Rey. 16:30). Kubʼ mojeʼ Acab tukʼil Jezabel, jun xuʼj kʼulin twitz Baal ex el tikʼun Jehová. Nya oʼkxju, ax ikx tajtoq Jezabel tuʼn miʼn tkʼulin ni jun xjal kye lajaj tribu te Israel twitz Jehová ex e kubʼ tbʼyoʼn nim qe profeta (1 Rey. 18:4). Kwest ok ambʼil aju tuʼn tajbʼen Abdías te Jehová.

10. ¿Tzeʼn kubʼ tyekʼin Abdías qa mintiʼ tzaj xobʼ?

¹⁰ ¿Tzeʼn kubʼ tyekʼin Abdías qa mintiʼ tzaj xobʼ? Toj jun ambʼil, ok tilil tuʼn Jezabel tuʼn tkubʼ tbʼyoʼn qe tprofeta Jehová. Tej tbʼaj jlu, tqʼama Abdías tiʼ bʼant tuʼn: «Aqine inx ewante jun syent t-sanjel Qman, mey syent junjun kʼloj e okx wewane tuj kabʼe toyʼ pik, ex e ok nkʼaʼchane» (1 Rey. 18:13, 14). Noqwit ok tbʼiʼn Jezabel jlu, kubʼwitlo tbʼyoʼn Abdías. Tzajlo xobʼ Abdías ex nyatoq taj tuʼn tkyim. Pero mas kʼujlaʼntoq Jehová tuʼn ex qe tprofeta twitz tex tchwinqlal.

11. ¿Alkye tten in nel kykanoʼn nim erman tiʼj techel kyaj tqʼoʼn Abdías? (Ax ikx qʼonka twitza tiʼj foto).

¹¹ Toj ambʼil jaʼlo, ateʼ nim erman in che anqʼin kyoj lugar jatumel mintiʼ in tzaj qʼoʼn ambʼil qe tuʼn qajbʼen te Jehová. In nok kyqʼoʼn kyoklen gobierno ik tzeʼn te Abdías, pero oʼkx in che kʼulin te Jehová (Mat. 22:21). In kubʼ kyyekʼin qa at tchiylal Dios kyiʼj aj kynimen te ex nya kye xjal (Hech. 5:29). Tuʼntzunju, kukx in nok tilil kyuʼn tuʼn kypakbʼan ex tuʼn tok kychmon kyibʼ, pero in ten kynabʼil aj tbʼant jlu kyuʼn (Mat. 10:16, 28). Ax ikx, in nok tilil kyuʼn tuʼn tpon xnaqʼtzbʼil kyukʼil txqantl erman tuʼntzun tten jun tbʼanel kyamiwbʼil tukʼil Jehová. Qo xnaqʼtzan tiʼjju bʼaj tiʼj Henri, jun erman in nanqʼin toj jun lugar te África jatumel mintiʼtoq in tzaj qʼoʼn ambʼil kye erman tuʼn kyajbʼen te Jehová. Toj ambʼil lu, onin Henri tuʼn t-xi tiʼn junjun uʼj kye erman.  Kubʼ ttzʼibʼin jlu: «Kwest in nela toj nwitze tuʼn nyoline kyukʼil txqantl. Tuʼntzunju, qʼuqli nkʼuʼje tiʼj qa ten wipumale tuʼnju ok nqʼoʼne toklen Jehová». Ax ikx teya, jaku ten tipumala ik tzeʼn te Henri qa ma ten tchiylal Dios tiʼja.

12. ¿Tzeʼn kubʼ tyekʼin Jehoiadá tukʼil t-xuʼjil qa e ten tzʼaqli twitz Jehová?

¹² Tuʼnju ten tchiylal Jehová tiʼj tnejel pal Jehoiadá, ten tzʼaqli twitz Jehová ex onin kyiʼj txqantl tuʼn kykʼulin te. Ul itzʼj jun tal Jezabel ex ok tqʼoʼn tbʼi te Atalía. Tej tikʼ ambʼil, ok tilil tuʼn xuʼj lu tuʼn tkawin toj Judá ex tuʼn kyxobʼ xjal twitz. Tajtoq tuʼn tten tipumal, tuʼntzunju, e kubʼ tbʼyoʼn chʼixme kykyaqil tchman noq tuʼn tkawin. Tuʼn jlu, in nel qnikʼ tiʼj qa anqʼin Jehoiadá toj ambʼil kwest, pero kubʼ tyekʼin qa ten tchiylal Dios tiʼj (2 Crón. 22:10, 11). Kubʼ tyekʼin tukʼil Jehosabeat, aju t-xuʼjil qa e ten tzʼaqli twitz Jehová tej kykolin tiʼj jun tal kʼwal Jehoás tbʼi. E xqʼuqin tiʼj ex jaw kychʼiysaʼn, iktzun tten e onin tuʼn kukx kykawin rey e tzaj tiʼj tyajil David. Mintiʼ tzaj xobʼ Jehoiadá twitz Atalía ex kukx xi tbʼinchaʼn aju bʼaʼn toj twitz Jehová (Prov. 29:25).

13. ¿Tzeʼn kubʼ tyekʼin Jehoiadá juntl maj qa ten tzʼaqli twitz Jehová?

¹³ Tej qʼiʼntoq junlo wuq abʼqʼi tuʼn Jehoás, kubʼ tyekʼin Jehoiadá juntl maj qa ten tzʼaqli twitz Jehová. Kubʼ t-ximen tuʼn tkubʼ tbʼinchaʼn jun tiʼ jakutoq tzaj tiʼn nya bʼaʼn tiʼj. Qa tbʼanel ma tzʼela tkyaqil, jakutoq kawin Jehoás, jun kyxol qe tyajil David. Pero qa mintiʼtoq ma japun twi t-ximbʼetz Jehoiadá, jakutoq kubʼ bʼyoʼn. Tuʼn tkʼiwlabʼil Jehová, bʼaʼn ela tkyaqil. Tuʼn kyonbʼil wibʼaj kyoj junjun ja ex qe levita, xi tqʼoʼn Jehoiadá toklen Jehoás te rey ex xi tqʼamaʼn tuʼn tkubʼ bʼyoʼn Atalía (2 Crón. 23:1-5, 11, 12, 15; 24:1). «Te tibʼajxi, xi tkyuwsaʼn Joiada te rey ex kye tnam xjal tuʼn kyok te jun tnam etzan tuʼn Qman» (2 Rey. 11:17). «Ax ikx e kubʼ tqʼoʼn qe xjal xqʼuqil ttzi tja Qman, tuʼntzun mi jun xjal tuʼn tokx qa otoq tzikʼ tibʼaj tley Moisés» (2 Crón. 23:19).

14. ¿Tzeʼn ok qʼoʼn toklen Jehoiadá tuʼnju jaw tnimsaʼn Jehová?

¹⁴ Otoq tqʼama Jehová jlu: «Oʼkx che jawil nnimsaʼne qeju in che niman weye» (1 Sam. 2:30). Ex atzun jlu bʼaj tiʼj Jehoiadá. Jun techel, xi tqʼoʼn Jehová ambʼil tuʼn tkyaj tzʼibʼin aju bʼant tuʼn tuʼntzun tonin qiʼj toj ambʼil jaʼlo (Rom. 15:4). Ex tej tkyim Jehoiadá, ok qʼoʼn toklen tuʼnju in tzaj tqʼamaʼn Biblia jlu: «Kuʼxtzun kymaquʼn tuj tnam tok tbʼi Ttanmi David, junx kyxol qe rey otoq che kyim, porke bʼaʼn otoq tbʼincha kyukʼil aj Israel ex otoq tzʼajbʼen tuj taqʼun Dios ax ikx tiʼj tja Dios» (2 Crón. 24:15, 16).

15. ¿Tiʼ xnaqʼtzbʼil jaku tzʼel qiʼn tiʼj Jehoiadá? (Ax ikx qʼonka twitza kyiʼj foto).

¹⁵ In nonin techel kyaj tqʼoʼn Jehoiadá qiʼj tuʼn tten mas tchiylal Dios qiʼj. Jaku tzʼel kykanoʼn ansyan tiʼj tbʼanel techel kyaj tqʼoʼn Jehoiadá aj tok tilil kyuʼn tuʼn t-xi kyjyoʼn tumel tzeʼn tuʼn kyxqʼuqin tiʼj congregación (Hech. 20:28). Atzun kye erman ma che tijen, jaku tzʼok qeʼ kykʼuʼj tiʼj qa kukx che ajbʼel tuʼn Jehová tuʼn tjapun twi t-ximbʼetz. Pero nim toklen tuʼn kukx kyten tzʼaqli twitz ex tuʼn tten tchiylal kyiʼj. Atzun kye kuʼxun, jaku tzʼel kykanoʼn tiʼj tbʼanel tmod Jehová kubʼ tyekʼin tukʼil Jehoiadá. Jaku bʼant jlu kyuʼn aj kyrespetarin kye erman ma che tijen ex aj tok kyqʼoʼn kyoklen, mas qeju erman o tzikʼ ambʼil in che ajbʼen te Jehová (Prov. 16:31). Ex te mankbʼil, jaku tzʼel qiʼn jun  xnaqʼtzbʼil kyiʼj wibʼaj toj ja ex kyiʼj levita. In tzaj kyyekʼin qe qa nim toklen tuʼn qonin ex tuʼn qnimen kye qeju in che kubʼ nej twitz aqʼuntl (Heb. 13:17).

16. ¿Tzeʼn kubʼ tyekʼin Jehoás qa mintiʼtoq jun tbʼanel tamiwbʼil tukʼil Jehová?

¹⁶ Tej tzmatoq kuʼxun rey Jehoás, ajbʼen te Jehová tuʼnju onin Jehoiadá tiʼj (2 Rey. 12:2). Pero tej tkyim Jehoiadá, xi tbʼiʼn kyyol junjun nejenel otoq kyaj kytzaqpiʼn tuʼn kyajbʼen te Jehová. Tuʼn jlu, ok ten Jehoás ex qe xjal toj tnam «kʼulul kywitz qe tilbʼilal xuʼj dios Asera ex kywitz txqantl tilbʼilal» (2 Crón. 24:4, 17, 18). Maske tzaj nim tbʼis Jehová tuʼn jlu, «tzaj t-samaʼn [...] qe t-sanjel kyukʼil, tuʼn kyaj meltzʼaj juntl maj». Pero «mintiʼ xi kybʼiʼn [xjal] aju yol xi qʼmaʼn kye». Axpe ikx mintiʼ xi kybʼiʼn tyol Zacarías, aju tkʼwal Jehoiadá maske ajbʼen te profeta ex te pal ex atoq tprim Jehoás. Nya oʼkxju, ax ikx xi tqʼamaʼn Jehoás tuʼn tkubʼ bʼyoʼn Zacarías maske otoq che onin toj tja tiʼj. Kubʼ tyekʼin Jehoás nya bʼaʼn tmod (2 Crón. 22:11; 24:19-22).

17. ¿Tiʼ bʼaj tiʼj Jehoás?

¹⁷ Ya mintiʼ ten tchiylal Jehová tiʼj Jehoás ex tzaj nim nya bʼaʼn tiʼj tuʼn jlu. Otoq tqʼama Jehová jlu: «Atzun qeju in che ikʼun weye, ax ikx kye che elel wikʼune» (1 Sam. 2:30). Tej tikʼ ambʼil, kubʼ kyiʼj tsoldad Jehoás kyuʼn xjal te Siria maske mas nimtoq kybʼaj. Atzunte kʼixbʼi toj qʼoj. Tej kyikʼ bʼet xjal te Siria, kubʼ bʼyoʼn Jehoás kyuʼn tmajen tuʼnju otoq kubʼ tbʼyoʼn Zacarías. Ex tuʼnju kubʼ tbʼinchaʼn nim  nya bʼaʼn, «mintiʼ okx qʼoʼn tuj kypantyón qe rey» (2 Crón. 24:23-25). c

18. Ik tzeʼn in tzaj tqʼamaʼn Jeremías 17:7 ex 8, ¿tiʼ il tiʼj tuʼn tbʼant quʼn tuʼn miʼn qok ik tzeʼn te Jehoás?

¹⁸ ¿Tiʼ xnaqʼtzbʼil jaku tzʼel qiʼn tiʼjju bʼaj tiʼj Jehoás? Jaku txi qqʼamaʼn qa ok Jehoás ik tzeʼn jun tzeʼ mintiʼ xi tlokʼ toj txʼotxʼ tuʼnju iltoq tiʼj tuʼn tonin juntl xjal tiʼj. Ex atzun jlu bʼant tuʼn tnejel pal Jehoiadá, el tpaʼn ambʼil tuʼn tonin tiʼj. Pero tej tkyim Jehoiadá, xi tbʼiʼn Jehoás kyyol nejenel te Judá otoq tzʼel kypan kyibʼ tiʼj Jehová. Tuʼn jlu, in nel qnikʼ tiʼj qa mintiʼ tuʼn tten tchiylal Jehová qiʼj noq tuʼnju atzun jlu in bʼant kyuʼn erman ex qe qfamiliar moqa noq tuʼnju in che onin qiʼj. Tuʼn tten jun tbʼanel qamiwbʼil tukʼil Jehová, nim toklen tuʼn tok qkʼujlaʼn ex tuʼn qrespetarin te. Ex jaku bʼant jlu quʼn qa ma tzʼel qpaʼn ambʼil tuʼn qxnaqʼtzan, tuʼn qximen tiʼjju in jaw quʼjin ex tuʼn qnaʼn Dios (kjawil uʼjit Jeremías 17:7, 8; Col. 2:6, 7).

19. ¿Tiʼ taj Jehová tuʼn tbʼant quʼn?

¹⁹ Mintiʼ in tzaj tqanin Jehová qe tuʼn t-xi qbʼinchaʼn jun tiʼ mlay bʼant quʼn. Tkyaqilju taj tuʼn t-xi qbʼinchaʼn, jaku tzʼel qnikʼ tiʼj kyukʼil yol tkuʼx toj Eclesiastés 12:13. In tzaj tqʼamaʼn jlu: «Nimana te Dios ex japunx qe tmandamyent tuʼna, ex atzun bʼaʼn tuʼn tbʼant kyuʼn xjal». Qa ma ten tchiylal Jehová qiʼj, jaku qo ex twitz alkyexku nya bʼaʼn qo okel weʼ twitz ex jaku qo ten tzʼaqli twitz ik tzeʼn te Abdías ex Jehoiadá. Ex mintiʼ jun tiʼ jaku tzʼel qʼinte ambʼil qe tuʼn tten jun tbʼanel qamiwbʼil tukʼil Jehová.