XNAQʼTZBʼIL 23
BʼITZ 28 Tzeʼn jaku qo ok te tamiw Jehová
In txokin Jehová qiʼj tuʼn qnajan tja
«Chin najale kyukʼil, aqine chin okel te Kydios» (EZEQ. 37:27).
¿TIʼ KʼELEL QNIKʼ TIʼJ?
Ok kʼonil xnaqʼtzbʼil lu qiʼj tuʼn t-xi qqʼoʼn toklen aju txokbʼil in tzaj tqʼoʼn Jehová qe tuʼn qnajan tja, ex kʼonil qiʼj tuʼn tel qnikʼ tiʼj tzeʼn in qo ok t-xqʼuqin.
1, 2. ¿Tiʼ txokbʼil in tzaj tqʼoʼn Jehová qe?
QA MA txi qanin teya tzeʼn in nela Jehová toj twitza, jakulo txi tqʼamaʼna qa jun tbʼanel amiw te, qa jun tbʼanel mambʼaj te ex qa jun tbʼanel Dios te. Ex jakulo che ajbʼen junjuntl título tuʼna tiʼj, ¿pero jakupe txi tqʼamaʼna qa jun tbʼanel tajaw ja te?
2 Tzaj tqʼamaʼn rey David qa aju tamiwbʼil Jehová in ten kyukʼil tmajen, ik tten ik tzeʼn tamiwbʼil jun tajaw ja kyukʼil qeju o chex ttxkoʼn tja. Xi tqanin jlu: «Nman Dios: ¿Alkye jaku najan tuj tjaya? ¿Alkye jaku najan twi witz xjan aju etzan tuʼna?» (Sal. 15:1). In tzaj tyekʼin jlu qa jaku qo najan toj tja Jehová, toj juntl yol, jaku qo ok te tamiw. ¡Tbʼanelxix qoklen jlu!
IN TZAJ TQʼOʼN JEHOVÁ TXOKBʼIL QIʼJ
3. ¿Alkye tnejel xjal xi tqʼoʼn Jehová txokbʼil tiʼj ex tiʼ kubʼ kynaʼn tuʼn jlu?
3 Tej naʼmxtoq tkubʼ tbʼinchaʼn Jehová tnejel tbʼinchbʼen, tjunalxtoq at. Tuʼntzunju, aju tnejel tkʼwal kubʼ tbʼinchaʼn, ok te tnejel xjal xi ttxkoʼn tuʼn tanqʼin tja. Nimlo tzalaj Jehová tej tbʼant jlu tuʼn. In tzaj tqʼamaʼn Biblia qa «tkyaqil qʼij o tzalaj» tiʼj Tkʼwal ex qa ax ikx te Tkʼwal, kukx o tzalaj twitz tuʼnju xi qʼoʼn txokbʼil tiʼj (Prov. 8:30).
4. ¿Alkye junjuntl xi tqʼoʼn Jehová txokbʼil kyiʼj?
4 Tej tikʼ ambʼil, e kubʼ tbʼinchaʼn Jehová «kykyaqil qe anjel» aʼyeju ax ikx e ok te tkʼwal. Ex xi tqʼoʼn txokbʼil kyiʼj tuʼn kyok te toj tja, toj juntl yol, tuʼn kyok te tamiw. In tzaj tqʼamaʼn Biblia qa kubʼ kynaʼn nimxix tzalajbʼil ttxlaj Jehová (Job 38:7; Dan. 7:10). Toj nim ambʼil, oʼkx qe jlu e ok te tamiw Jehová. Pero tej tbʼet ambʼil, xi tqʼoʼn txokbʼil kye junjun tbʼanel xjal, kyxol qe jlu e ten Enoc, Noé, Abrahán ex Job. In tzaj tqʼamaʼn tiʼj teyele junjun qa ok te tamiw Dios ex «o bʼet tukʼil Dios» (Gén. 5:24; 6:9; Job 29:4; Is. 41:8).
5. ¿Tiʼ in tzaj tyekʼin profecía te Ezequiel 37:26 ex 27?
5 Maske o tzikʼ nim syent abʼqʼi, kukx in tzaj tqʼoʼn Jehová txokbʼil kye tamiw tuʼn kynajan tja. Qo ximen tiʼj profecía kyaj qʼamaʼn toj Ezequiel 37:26 ex 27 (kjawil uʼjit). In tzaj tyekʼin profecía lu qa tajxix Qman Dios tuʼn kyok tmajen te tamiw. Xi ttziyen Jehová jlu kye: «Kyjel bʼant tiʼj jun nyole kyukʼil tuʼn kyanqʼin tuj txubʼtxaj». Ok kjapunel kywiʼ yol lu aj kyok qeju che xeʼl toj kyaʼj ex qeju che anqʼil tzalu twitz Txʼotxʼ te «jun peʼnx ẍneʼl» toj tja Jehová (Juan 10:16). Ex ya in japun twiʼ jlu toj ambʼil jaʼlo.
IN XQʼUQIN JEHOVÁ QIʼJ JAXKU TUMEL ATOʼ
6. ¿Toj alkye ambʼil in qo okx toj tja Jehová ex jatumel taʼ?
6 Toj ambʼil ojtxe, aj ttzaj jbʼal moqa junjuntl nya bʼaʼn, in nonin jun ja xbʼalun te kolbʼil kye xjal. Ex ajtoq tpon jun xjal toj jun ja ik tzeʼn jlu, jakutoq tzʼok qeʼ tkʼuʼj tiʼj qa tzul qʼoʼn twa ex junjuntl tiʼchaq te. Ax ikx qe, aj qbautisarin in qo okx toj tja Jehová (Sal. 61:4). Aj qokx toj tja Jehová, in tzaj qʼoʼn nim qwa moqa nim xnaqʼtzbʼil in tzaj qʼoʼn qe junx kyukʼil junjuntl o txi qʼoʼn txokbʼil kye tuʼn kyten toj. Pero ¿jatumel taʼ tja Jehová? Nya oʼkx taʼ toj jun lugar. Sino atz taʼ jatumel ateʼqe tmajen Jehová in che nimen te. Atzun jlu in tzaj kyqʼamaʼn junjun erman o cheʼx toj juntl país. Olo cheʼx toj jun asamblea nim toklen, ex ok tzʼok kyojtzqiʼn junjuntl erman o che oktz toj tja Dios (Apoc. 21:3).
7. ¿Tiquʼn jaku txi qqʼamaʼn qa aqeju tmajen Dios o che kyim kukx ateʼ toj tja? (Ax ikx qʼonka twitza tiʼj tilbʼilal).
7 Yajtzun qe tmajen Jehová o che kyim, ¿kukxpe ateʼ toj tja Jehová? Ikju, kukx. ¿Tiquʼn in xi qqʼamaʼn jlu? Tuʼnju in tzaj tqʼamaʼn Biblia qa kukx itzʼ qe toj t-ximbʼetz Jehová. Tzaj tchikʼbʼaʼn Jesús jlu: «Tiʼj tuʼn kyjatz anqʼin qe kyimni, ax Moisés kyaj qʼonte jun xnaqʼtzbʼil tzʼibʼan tuj Tuʼjil jatum in tmaʼn tiʼj chʼiʼx in kʼant tuʼn qʼaqʼ tej tyolin tiʼj Dios kyjaʼ: Ate Qman, Tdios Abraham, Tdios Isaac ex Tdios Jacob. Ex ate Dios mya Kydios kyimni; noq oʼkx Kydios itzʼ, ex kykyaqil itzʼ qe twitz Dios» (Luc. 20:37, 38).
Jaku txi qqʼamaʼn qa aqeju tmajen Jehová o che kyim kukx ateʼ toj tja (Qʼonka twitza tiʼj párrafo 7).
¿TIʼ TBʼANEL JAKU TZAJ QE EX TIʼ IL TIʼJ TUʼN TBʼANT QUʼN?
8. ¿Tiʼ tbʼanel in tzaj qe aj qten toj tja Jehová?
8 Ik tzeʼn jun qja in najbʼen tuʼn qojlan ex in qo ok t-xqʼuqin aj ttzaj jun nya bʼaʼn, ax ikx te Jehová tja in nok t-xqʼuqin qamiwbʼil tukʼil ex in tzaj tqʼoʼn jun qʼuqbʼil qkʼuʼj. Ax tok, jaku tzʼok tbʼinchaʼn Satanás jun nya bʼaʼn qiʼj, pero qa mintiʼ sel qpaʼn qibʼ tiʼj Jehová kukx kʼonil qiʼj tuʼn qex twitz (Sal. 31:23; 1 Juan 3:8). Ax ikx toj akʼaj twitz Txʼotxʼ kukx kʼokel t-xqʼuqin Jehová tamiwbʼil at kyukʼil tmajen. Nya oʼkxju, ax ikx, ok che okel t-xqʼuqin tiʼj kyimen (Apoc. 21:4).
9. ¿Alkye kymod qeju in che ten toj tja Jehová il tiʼj tuʼn tten?
9 Tbʼanelxix qoklen in tzaj tqʼoʼn Jehová aj ttzaj tqʼoʼn ambʼil qe tuʼn qten toj tja ex aj qok te tamiw te jumajx. Pero tuʼn kukx qten toj tja Jehová, il tiʼj tuʼn tbʼant junjun tiʼ quʼn. Ik tten ik tzeʼn qa ma qox ttxkoʼn jun xjal toj tja. Il-lo tiʼj tuʼn t-xi qbʼinchaʼn junjun tiʼchaq aju bʼaʼn in nel toj twitz. Jun techel, qa ma tzaj tqʼamaʼn qe tuʼn tel qsuʼn tiʼj qxajabʼ naʼmxtoq qokx toj tja, oklo kʼokel tilil quʼn tuʼn t-xi qbʼinchaʼn. Ax ikx tuʼn qten toj tja Jehová, il tiʼj tuʼn tok qojtzqiʼn tiʼ tajbʼil tuʼn tbʼant quʼn tuʼntzun kukx qten toj tja. Ex tuʼnju kʼujlaʼnxix Jehová quʼn, in nok tilil quʼn tuʼn tkubʼ qbʼinchaʼn tkyaqilju bʼaʼn in nela toj twitz (Col. 1:10). Ax tok, in nok Jehová te qamiw, pero ax ikx, in nok te Qdios ex te Qman. Tuʼntzunju, il tiʼj tuʼn qrespetarin te (Sal. 25:14). Bʼaʼn tuʼn kukx ttzaj qnaʼn alkye te Jehová. Qa in qo respetarin te, ok kʼonil qiʼj tuʼn miʼn tkubʼ qbʼinchaʼn jun nya bʼaʼn ex tuʼn tkubʼ qmansin qibʼ aj qajbʼen te (Miq. 6:8).
KUBʼ TYEKʼIN JEHOVÁ TBʼANEL TMOD KYUKʼIL KYKYAQIL AJ ISRAEL TOJ DESIERTO
10, 11. ¿Alkye techel in tzaj tyekʼin qa ax tmod Jehová in kubʼ tyekʼin kyukʼil kykyaqil tmajen?
10 In kubʼ tyekʼin Jehová tbʼanel tmod kyukʼil kykyaqil qeju in chex ttxkoʼn toj tja (Rom. 2:11). Qo xnaqʼtzan tiʼj tmod kubʼ tyekʼin kyukʼil aj Israel e ten toj desierto te Sinaí.
11 Tej tetz ttzaqpiʼn Jehová ttnam te majen toj tnam Egipto, xi tqʼoʼn kyoklen junjun tuʼn kyok te pal ex tuʼn kyajbʼen toj tabernáculo. Ax ikx, xi tqʼoʼn kyoklen junjun aj Leví tuʼn tbʼant junjuntl aqʼuntl kyuʼn aju at toklen tukʼil tabernáculo. Pero ¿maspe e ok t-xqʼuqin Jehová qeju in che ajbʼentoq toj tabernáculo kywitz qeju ateʼtoq tiʼjxi? Miʼn, sino xqʼuqin Jehová kyiʼj kykyaqil.
12. ¿Tzeʼn tmod Jehová kubʼ tyekʼin kyukʼil aj Israel toj desierto? (Éxodo 40:38; ax ikx qʼonka twitza kyiʼj tilbʼilal).
12 Noq alkyexku kyoklen aj Israel xi qʼoʼn, qa nqayin moqa nya nqayin in che anqʼin tiʼj tabernáculo, kykyaqil jakutoq che ok te tamiw Jehová. Jun techel, ok tilil tuʼn Jehová tuʼn tqʼanchaʼlix muj ex tqan qʼaqʼ tibʼaj tabernáculo kywitz kykyaqil aj Israel (kjawil uʼjit Éxodo 40:38). Tuʼntzunju, kykyaqil aj Israel, axpe ikx qeju nya nqayin ateʼ tiʼj tabernáculo, jakutoq tzʼok kyqʼoʼn kywitz tiʼj aj tikʼ bʼet muj ex jakutoq jaw kyiʼn qe tiʼchaq at kye tuʼn kyok lepeʼ tiʼj tuʼntzun kyxiʼ toj juntl lugar (Núm. 9:15-23). Nya oʼkxju, ax ikx kykyaqil jakutoq txi kybʼiʼn aj tok qʼajtzaʼn kabʼe trompeta bʼinchaʼn tiʼj plata (Núm. 10:2). In tzaj tyekʼin jlu, qa nya oʼkx qeju e anqʼin nqayin tiʼj tabernáculo e ok te jun tbʼanel tamiw Jehová. Sino kykyaqil aj Israel jakutoq che ok te tamiw Jehová, jakutoq che tzaj onin ex jakutoq che ok xqʼuqin tuʼn. Axju in bʼaj toj ambʼil jaʼlo, jaxku tumel in qo anqʼin, in qo ok tkʼujlaʼn Jehová, in kolin qiʼj ex in qo ok t-xqʼuqin.
Kubʼ tyekʼin Jehová tbʼanel tmod kyukʼil aj Israel tej tkubʼ tqʼoʼn tabernáculo kyxol. (Qʼonka twitza tiʼj párrafo 12).
IN KUBʼ TYEKʼIN JEHOVÁ TBʼANEL TMOD KYUKʼIL KYKYAQIL XJAL
13. ¿Tzeʼn in kubʼ tyekʼin Jehová tbʼanel tmod kyiʼj kykyaqil tmajen?
13 Ateʼ junjun erman in che anqʼin ttxlaj kytxuylal ninja qʼil twitz aqʼuntl kye testigo de Jehová moqa ttxlaj jun sucursal. Pero ateʼ junjuntl in che anqʼin kyoj ja lu. In nonin jlu kyiʼj tuʼn kyonin kyiʼj erman qʼil twitz aqʼuntl. Ax ikx, ateʼ junjuntl ermano in che ajbʼen te ansyan in che bʼet kyojele ja te chmabʼil moqa toj junjuntl tten ajbʼebʼil toj tkyaqil ambʼil. Noqtzun tuʼnj, chʼixmi kykyaqil erman mintiʼ jun kyoklen ik tzeʼn jlu. Qa ax ikx teya mintiʼ jun toklena ik tzeʼn jlu, jaku tzʼok qeʼ tkʼuʼja tiʼj qa kukx kʼujlaʼna tuʼn Jehová, qa taj tuʼn kukx ttena toj tja ex qa kxqʼuqil tiʼja (1 Ped. 5:7). Ikju, in xi tqʼoʼn Jehová kywa kykyaqil tmajen, toj juntl yol, in xi tqʼoʼn kyxnaqʼtzbʼil, in chex tonin ex in che ok t-xqʼuqin.
14. ¿Alkye juntl tumel in kubʼ tyekʼin Jehová tbʼanel tmod kyukʼil kykyaqil?
14 Juntl tumel tiʼjju alkye tten in kubʼ tyekʼin Jehová tbʼanel tmod kyukʼil kykyaqil, aju aj t-xi tqʼoʼn Tuʼjil Tyol kye kykyaqil xjal twitz tkyaqil Txʼotxʼ. Kubʼ tzʼibʼin Biblia toj yol hebreo, arameo ex griego. ¿Pero oʼkxpe qe xjal in jaw kyuʼjin Tyol Dios kyoj qe yol lu jaku ten jun tbʼanel kyamiwbʼil tukʼil Dios? Nya ikju (Mat. 11:25).
15. ¿Alkye juntl yekʼbʼil at qa in kubʼ tyekʼin Jehová tbʼanel tmod kyukʼil kykyaqil? (Ax ikx qʼonka twitza kyiʼj tilbʼilal).
15 Nya oʼkx jaku tzalaj Dios kyiʼj qeju xjal o tzʼetz jun kyxnaqʼtzbʼil kyiʼj yol jatumel kubʼ tzʼibʼin Biblia. Nya oʼkx in xi tqʼoʼn Jehová ojtzqibʼil kye qeju o tzʼetz jun kyxnaqʼtzbʼil. Sino ax ikx in xi tqʼoʼn kye qeju nya nimxix kyxnaqʼtzbʼil o tzʼetz. O tzʼetz Tuʼjil Tyol kyoj nimku mil yol. Tuʼn jlu, kykyaqil xjal ex kyoj kykyaqil país, jaku che xnaqʼtzan tiʼj Dios ex jaku che ok te tamiw (2 Tim. 3:16, 17).
In kubʼ tyekʼin Jehová tbʼanel tmod kyukʼil kykyaqil xjal tuʼnju o tzʼetz Biblia kyoj nimku mil yol. (Qʼonka twitza tiʼj párrafo 15).
KUKX QO TEN TOJ TJA JEHOVÁ
16. ¿Alkyeqe in xi tqʼoʼn Jehová txokbʼil kyiʼj tuʼn kyokx toj tja? (Hechos 10:34, 35).
16 Jun tbʼanelxix qoklen aj qten toj tja Jehová. Mi aʼl juntl xjal ik mod ik tzeʼn te Jehová tuʼnju in xi tyekʼin tkʼujlabʼil ex in xi tqʼoʼn tkyaqilju in che pon ttxkoʼn tja. In nok te kyamiw kykyaqil xjal noq te jaxku tumel qeʼ, jniʼxku kyxnaqʼtzbʼil o tzʼetz, alkyexku kytnam, alkyexku kykostumbr, alkyexku kyyajil, alkyexku kyabʼqʼi, qa xinaq moqa ichan qeʼ, ex qa xuʼj qeʼ. Pero taj tuʼn kynimen kykyaqil qeju in che okx toj tja kyiʼj tkawbʼil (kjawil uʼjit Hechos 10:34, 35).
17. ¿Tiʼ tzul qʼamaʼn qe toj juntl xnaqʼtzbʼil?
17 Xi tqanin rey David junjun xjel te Jehová toj Salmo 15:1 tej tqʼama jlu: «Nman Dios: ¿Alkye jaku najan tuj tjaya? ¿Alkye jaku najan twi witz xjan aju etzan tuʼna?». Tukʼil onbʼil tzaj tqʼoʼn Jehová te David, ax tzaj qʼonte tzaqʼwebʼil. Ex toj juntl xnaqʼtzbʼil tzul, ok tzul qʼamaʼn alkyeqe junjuntl tiʼchaq il tiʼj tuʼn tbʼant quʼn tuʼn kukx qten toj tja Qman Jehová.
BʼITZ 32 ¡Ax tenkja ttxlaj Jehová!
