Tuʼn ttzalaj Jehová qiʼj il tiʼj tuʼn tten qʼuqbʼil qkʼuʼj. Noqtzun tuʼnj, in tzaj tqʼamaʼn Biblia qa «mya kykyaqil xjal at kyokslabʼl» (2 Tes. 3:2). Tej tkubʼ ttzʼibʼin apóstol Pablo qe yol lu atz yolin kyiʼj «qe xjal mibʼan che bʼin ex mya bʼaʼn qe», toj juntl yol, aqeju aj qʼoj tiʼj. Pero ax ikx jaku yolin kyiʼj junjuntl xjal ik tzeʼn qeju mintiʼ in xi kynimen qa at jun Dios kubʼ bʼinchante tkyaqil tiʼchaq (Rom. 1:20). Ex ateʼ junjuntl xjal in nok qeʼ kykʼuʼj tiʼj qa at Dios ex in che nimen kywitz junjuntl tiʼchaq. Pero nya oʼkx jlu tajbʼil Jehová tuʼn tbʼant quʼn.

Tuʼn ttzalaj Jehová qiʼj il tiʼj tuʼn t-xi qnimen qa at ex qa in che tzaj tkʼiwlaʼn qeju kyuw qʼuqbʼil kykʼuʼj (Heb. 11:6). Pero tuʼn tten qʼuqbʼil qkʼuʼj, il tiʼj tuʼn t-xi qqanin te Jehová toj naʼj Dios tuʼnju atzun jun kyxol qe mod in tqʼoʼn xewbʼaj xjan (Luc. 11:​9, 10, 13). Ax ikx jaku tzaj qkʼamoʼn xewbʼaj xjan aj tjaw quʼjin Biblia tuʼnju ajbʼen xewbʼaj xjan tej tkubʼ tzʼibʼit. Tuʼntzunju, bʼaʼn tuʼn qximen tiʼj aj tjaw quʼjin ex bʼaʼn tuʼn tkubʼ qbʼinchaʼn aju in nel qnikʼ tiʼj. Qa ma bʼant jlu quʼn kxel qqʼoʼn ambʼil te xewbʼaj xjan tuʼn tonin qiʼj ex tuʼn tten qʼuqbʼil qkʼuʼj.