1. Ik tzeʼn in tzaj qʼamaʼn toj Salmo 18:​2, ¿alqukʼil ok tmojbʼaʼn David Jehová?

 TOJ ambʼil jaʼlo, jurat jaku che chʼexpaj tiʼchaq toj qanqʼibʼil. Pero mintiʼ tuʼn qtzaj xobʼ tuʼnju jaku txi qqanin onbʼil te Jehová. Toj xnaqʼtzbʼil o kyaj tzaj tnaʼn qe qa itzʼ te Jehová ex qa kukx in qo tzaj tonin. Aj tonin Jehová qiʼj, in nel qnikʼ tiʼj qa «itzʼ te Qman», ik tzeʼn tqʼama David toj Salmo 18:46. Pero toj Salmo 18:2 (kjawil uʼjit) tqʼama David qa ik Jehová «ik tzaʼn jun pik». ¿Tiquʼn tqʼama David qa ik tten Jehová ik tzeʼn jun pik ex mintiʼ tchwinqlal atzun te Jehová at tchwinqlal?

2. ¿Tiʼ kʼelel qnikʼ tiʼj toj xnaqʼtzbʼil lu?

² Tzul qʼamaʼn toj xnaqʼtzbʼil lu tiquʼn in tzaj tqʼamaʼn Biblia qa ik Jehová ik tzeʼn jun pik ex tiʼ in tzaj tyekʼin techel lu qe. Ax ikx kʼelel qnikʼ tiʼj tiʼ jaku bʼant quʼn tuʼn qtzaj tonin Jehová ik tzeʼn jun pik. Ex te bʼajsbʼil, kʼelel qnikʼ tiʼj tzeʼn jaku tzʼel qkanoʼn qe tmod Jehová.

¿TIQUʼN IN TZAJ QʼAMAʼN QA IK TTEN JEHOVÁ IK TZEʼN JUN PIK?

3. ¿Alkye tten in najbʼen yol pik toj Biblia? (Ax ikx qʼonka twitza tiʼj tilbʼilal toj tnejel t-xaq).

³ Aj ttzaj tqʼamaʼn Biblia qa ik tten Jehová ik tzeʼn jun pik in nonin qiʼj tuʼn tel qnikʼ kyiʼj junjun tmod. Aj tjaw nimsaʼn Jehová kyuʼn tmajen kyoj junjun texto, in tzaj kyqʼamaʼn qa ik tten Jehová ik tzeʼn jun pik. Atz toj Deuteronomio 32:4 in tzaj qʼamaʼn tnejel maj qa ik tten Jehová «ik tzaʼn jun pik». Ax ikx tqʼama Habacuc qa ik tten Jehová ik tzeʼn jun pik (Hab. 1:​12, TNM). Ex tqʼama jun aj tzʼibʼil te Salmo qa in nok Jehová «ik tzaʼn jun pik» (Sal. 95:1). Nya oʼkxju, ax Jehová in tzaj qʼamante qa ik tten ik tzeʼn jun pik (Is. 44:​8, TNM). Qo xnaqʼtzal tiʼj oxe tmod Jehová, aʼyeju in che  onin tuʼn tok ik tzeʼn jun pik. Ax ikx kʼelel qnikʼ tiʼj tiʼ jaku bʼant quʼn tuʼn tonin Jehová qiʼj ik tzeʼn jun pik (Deut. 32:​31, TNM).

4. ¿Tiquʼn in xi qqʼamaʼn qa in nok Jehová ik tzeʼn jun kolbʼil qe? (Salmo 94:22).

⁴ In kolin Jehová qiʼj. Ik tzeʼn aj ttzaj nim jbʼal, jaku tzʼokx tklon tibʼ jun xjal toj jun jul moqa tjaqʼ jun pik. Ax ikx aj ttzaj nya bʼaʼn toj qanqʼibʼil jaku tzʼok qklon qibʼ tiʼj Jehová (kjawil uʼjit Salmo 94:22). In nonin tuʼn kukx tten qamiwbʼil tukʼil ex jaku tzʼonin qiʼj tuʼn miʼn tok bʼinchaʼn nya bʼaʼn qiʼj te jumajx. Ax ikx o tzaj ttziyen qa toj ambʼil tzul kʼelel tiʼn tkyaqilju in tzaj bʼaj qkʼuʼj tuʼn (Ezeq. 34:​25, 26).

5. ¿Tiʼ jaku bʼant quʼn tuʼn tok qklon qibʼ tiʼj Jehová?

⁵ Jaku qoʼx klol qibʼ tiʼj Jehová aj qnaʼn Dios. Qa ma bʼant jlu quʼn, kʼokel tkwentin qanmi ex qximbʼetz tuʼn mujbʼabʼil tzul tqʼoʼn (Filip. 4:​6, 7). Qo ximen tiʼjju bʼaj tiʼj jun ermano Artiom tbʼi tej tten toj cárcel tuʼn tokslabʼil. Ok tilil tuʼn jun investigador tuʼn t-xi tqanin nim xjel te ex tuʼn t-xmayin tiʼj. Tqʼama ermano jlu: «Tkyaqil maj tej ttzaj qanin xjel weʼye, nimxix tzaj bʼaj nkʼuʼje. [ . . . ] Kukx in naʼne Dios ex xi nqanine te Jehová tuʼn ttzaj tqʼoʼn mujbʼabʼil toj wanmiye ex tuʼn ttzaj tqʼoʼn nnabʼile. Noq tiʼxku bʼant tuʼn investigador, kukx in tene tzʼaqli [ . . . ]. Kukx xqʼuqin Jehová wiʼje ik tzeʼn jun muro».

6. ¿Tiquʼn kukx jaku tzʼok qeʼ qkʼuʼj tiʼj Jehová? (Isaías 26:​3, 4).

⁶ Jaku tzʼok qeʼ qkʼuʼj tiʼj Jehová. Ik tzeʼn jun matij pik moqa jun witz, mintiʼ in yukch toj tlugar. Ax ikx te Jehová kukx ktel tuʼn tonin qiʼj. Jaku tzʼok qeʼ qkʼuʼj tiʼj qa ik tten Jehová «ik tzaʼn jun pik jatum tuʼn qklonte qibʼ te jumajx» (kjawil uʼjit Isaías 26:​3, 4). Kukx ktel tuʼn tjapun twi tyol, tuʼn ttzaj tbʼiʼn qnaʼj Dios ex tuʼn tonin qiʼj. Ax ikx in nok qeʼ qkʼuʼj tiʼj tuʼnju kukx in ten tzʼaqli kyukʼil qeju kukx in che ajbʼen te (2 Sam. 22:26). Mlay tzikʼ tnaʼl tuʼn aju in bʼant quʼn ex kukx qo ul tkʼiwlaʼn (Heb. 6:10; 11:6).

7. ¿Tzeʼn in nonin qiʼj aj tok qeʼ qkʼuʼj tiʼj Jehová? (Ax ikx qʼonka twitza tiʼj tilbʼilal).

⁷ Juntl tten tuʼn tok Jehová ik tzeʼn jun pik, aju tuʼn tok qeʼxix qkʼuʼj tiʼj. Ojtzqiʼn quʼn qa in tzaj tbʼanel qe aj qnimen te, maske at maj kwest tuʼn tbʼant quʼn (Is. 48:​17, 18). Ex aj tok qqʼoʼn qwitz tiʼj tzeʼn in nonin qiʼj, mas in chʼiy qʼuqbʼil qkʼuʼj. Iktzun tten jaku qo ex kywitz junjun nya bʼaʼn aju mlayx qo ex twitz tuʼn qex qipumal. At maj qo okel weʼ twitz junjun nya bʼaʼn ex mi aʼl juntl jaku tzʼonin qiʼj, pero kukx ktel Jehová qukʼil ex kʼonil qiʼj. Tzaj tqʼamaʼn jun ermano Vladímir tbʼi jlu: «In kubʼ nximane qa aju ambʼil mas nqayin o chin tene ttxlaj Dios aju tej ntene toj cárcel. Mas ok qeʼ nkʼuʼje tiʼj Jehová tuʼnju njunalxe in tene ex mlayxtoq bʼant jun tiʼ wuʼne tuʼn tchʼexpaj ambʼil aju».

8. a) ¿Tiquʼn in xi qqʼamaʼn qa mintiʼ in chʼexpaj Jehová? b) ¿Tzeʼn in nonin qiʼj aj tok Jehová ik tzeʼn jun pik? (Salmo 62:​6, 7).

⁸ Mintiʼ in chʼexpaj Jehová. Ik tzeʼn jun  pik moqa jun witz kukx at mintiʼ in yukch, ax ikx te Jehová kukx at tuʼn tonin qiʼj. Mintiʼ in chʼexpaj tmod ex aju in kubʼ t-ximen tuʼn tbʼant tuʼn (Mal. 3:6). Tej tel tpan tibʼ Adán ex Eva tiʼj Jehová mintiʼ chʼexpaj t-ximbʼetz at kyiʼj xjal. Tqʼama apóstol Pablo qa «mlay bʼaj tchʼexpuʼn [Jehová] tyol» (2 Tim. 2:13). In tzaj tyekʼin jlu qa noq tiʼxku jaku bʼaj moqa noq tiʼxku jaku bʼant kyuʼn txqantl, mlayx kubʼ tchʼexpuʼn Jehová tmod nix qe tkawbʼil, ex kukx kjapunel twi tyol. Aj tel qnikʼ tiʼj tkyaqil jlu, in nonin qiʼj tuʼn tok qeʼ qkʼuʼj tiʼj qa kukx qo tzajel tonin aj qok weʼ twitz nya bʼaʼn ex qa kjapunel tkyaqil tyol o tzaj ttziyen (kjawil uʼjit Salmo 62:​6, 7).

9. ¿Tiʼ xnaqʼtzbʼil jaku tzʼel qiʼn tiʼjju bʼaj tiʼj Tatiana?

⁹ Juntl tiʼ jaku tzʼonin qiʼj tuʼn tok Jehová ik tzeʼn jun pik qe, aju qa kukx ma qo ximen kyiʼj tbʼanel tmod, tiʼj t-ximbʼetz at tiʼj Txʼotxʼ ex kyiʼj xjal. Jaku tzʼonin qiʼj tuʼn miʼn ttzaj bʼajxix qkʼuʼj aj qok we twitz nya bʼaʼn (Sal. 16:8). Atzun jlu bʼaj tiʼj jun ermana Tatiana tbʼi, aju el qʼiʼn ambʼil te tuʼn tajbʼen te Dios. Tqʼama jlu: «In nok obligarine tuʼn ntene njunalxe. [ . . . ] Tnejel, kwest ela toj nwitze ex nim maj tzaj bʼajxix nkʼuʼje». Pero nimxix onin tej t-ximen tiʼj qa tkyaqilju in bʼajtoq tiʼj at toklen tukʼil tamiwbʼil tukʼil Jehová ex tukʼil t-ximbʼetz. Ex tqʼamatl: «Onin jlu wiʼje tuʼn ttzaj nnaʼne qa bʼaj jlu wiʼje tuʼnju kʼujlaʼn Jehová wuʼne ex tuʼnju waje tuʼn tkubʼ nbʼinchaʼne aju tajbʼil. Onin wiʼje tuʼn miʼn nximane oʼkx tiʼjju in bʼaj wiʼje».

10. Tuʼn kukx tkolin Jehová tiʼja, ¿tiʼ jaku bʼant tuʼna jaʼlo?

¹⁰ Toj chʼintl ambʼil, qo okel we twitz junjuntl tiʼchaq mas kwest ex il tiʼj tuʼn tok qeʼxix qkʼuʼj tiʼj Jehová. Tuʼntzunju, nim toklen tuʼn tok qeʼ qkʼuʼj tiʼj qa kukx ktzajel tqʼoʼn Jehová aju at tajbʼen qe tuʼn tikʼx quʼn ex tuʼn qten tzʼaqli twitz. ¿Tiʼ kʼonil qiʼj? Bʼaʼn tuʼn tjaw quʼjin junjun txʼolbʼabʼil toj Tyol Dios ex junjuntl tiʼ o tzikʼ toj kyanqʼibʼil erman toj ambʼil jaʼlo. Bʼaʼn tuʼn qximen kyiʼj ex tuʼn tok qqʼoʼn qwiʼ tiʼj tzeʼn o tzʼonin Jehová kyiʼj. Jaku tzʼonin jlu tiʼja tuʼn tok tklon tibʼa tiʼj Jehová, ik tzeʼn aj tok tklon tibʼa tiʼj jun pik.

BʼAʼN TUʼN TEL QKANOʼN QE TBʼANEL TMOD JEHOVÁ

11. ¿Tiquʼn bʼaʼn tuʼn tel qkanoʼn qe tmod Jehová? (Ax ikx qʼonka twitza tiʼj recuadro « Aju jaku bʼant kyuʼn kuʼxun»).

¹¹ Ma qo xnaqʼtzan kyiʼj junjun tmod Jehová, aʼyeju in tzaj kyyekʼin tiquʼn in nok ik tzeʼn jun pik. Atzun jaʼlo, qo yolil tiʼj tzeʼn jaku tzʼel qkanoʼn qe tmod. Qa ma tzʼok tilil quʼn tuʼn qok ik tzeʼn te, mas jaku qo onin kyiʼj erman toj congregación. Ok tqʼoʼn Jesús tbʼi Simón te Cefas ex aju t-xilen yol lu a Pedro ex qa abʼj (Juan 1:42). Tuʼn jlu kubʼ tyekʼin Jesús qa kʼoniltoq Pedro tuʼn t-xi qʼuqbʼet kykʼuʼj erman  ex tuʼn kykyuwset toj kyokslabʼil. In tzaj tqʼamaʼn Biblia qa che okel ansyan «ik tzaʼn t-xlekumal jun nintz pik», jatumel jaku che pon erman klol kyibʼ (Is. 32:2). Qkyaqilx jaku bʼaj qqʼuqbʼaʼn qkʼuʼj qxolx qa ma tzʼel qkanoʼn qe tbʼanel tmod Jehová (Efes. 5:1).

12. ¿Tiʼ jaku bʼant quʼn tuʼn qonin kyiʼj erman?

¹² Tzʼonina kyiʼj erman kyoj ambʼil kwest. Bʼalo jaku txi qqʼoʼn kyposad erman qja qa ma tzaj jun nya bʼaʼn kyiʼj tuʼn jun xitbʼil tuʼnx twitz txʼotxʼ, tuʼn nya bʼaʼn in tzaj kyxol xjal moqa tuʼn jun qʼoj. Toj «mankbʼil tqʼijlalil» tzul mas nya bʼaʼn. In tzaj tqʼoʼn jlu ambʼil qe tuʼn qonin kyiʼj erman qa at tajbʼen jun tiʼ kye (2 Tim. 3:1). Ax ikx, jaku qo onin tuʼn t-xi qʼuqbʼet kykʼuʼj ex tuʼn kyok qkʼujlaʼn. Jun techel, jaku qo yolin kyukʼil aj kypon kyoj chmabʼil, iktzun tten jaku qo onin tuʼn tkubʼ kynaʼn bʼaʼn ex qa kʼujlaʼn qe quʼn. In qo anqʼin kyxol xjal mintiʼ in kubʼ kyyekʼin kʼujlabʼil kyxolx, tuʼntzunju qaj tuʼn t-xi qqʼuqbʼaʼn kykʼuʼj erman ex tuʼn kyok qkʼujlaʼn aj kypon kyoj chmabʼil.

13. ¿Tzeʼn jaku che onin ansyan kyiʼj erman kyoj ambʼil kwest? (Ax ikx qʼonka twitza tiʼj tilbʼilal).

¹³ Aj kyok weʼ erman twitz jun nya bʼaʼn, ik tzeʼn aj ttzaj jun xitbʼil moqa jun yabʼil, jurat in che onin ansyan kyiʼj. Ax ikx in xi kyqʼuqbʼaʼn kykʼuʼj tukʼil Tyol Dios. Jurat jaku txi kyqanin erman onbʼil te jun ansyan qa tbʼanel tmod, qa in che ok tbʼiʼn ex qa in nel tnikʼ tiʼjju in bʼaj kyiʼj. Kyuʼn tbʼanel mod lu, in kubʼ kynaʼn erman kʼujlabʼil ex nya kwest in nela toj kywitz tuʼn t-xi kynimen consej in xi kyqʼoʼn ansyan kye tukʼil Tyol Dios (1 Tes. 2:​7, 8, 11).

14. ¿Tzeʼn jaku tzʼok qeʼ kykʼuʼj txqantl qiʼj?

¹⁴ Bʼaʼn tuʼn tok qeʼ kykʼuʼj txqantl tiʼja. Qaj tuʼn tel kynikʼ txqantl tiʼj qa qo onil  kyiʼj aj kyok weʼ twitz nya bʼaʼn (Prov. 17:17). Pero ¿tzeʼn jaku tzʼok qeʼ kykʼuʼj qiʼj? Bʼaʼn tuʼn tok tilil quʼn tuʼn tel qkanoʼn qe tmod Jehová tkyaqil qʼij. Ik tzeʼn tuʼn tjapun twi qyol in xi qtziyen ex tuʼn qok te puntual (Mat. 5:37). Ex qa at jun erman taj onbʼil, jaku qo onin tiʼj. Ax ik qa ma tzaj qʼoʼn jun qoklen toj congregación, qqʼonk tilil tuʼn t-xi qbʼinchaʼn ik tzeʼnx in tzaj qʼamaʼn qe.

15. Qa in nok qeʼ kykʼuʼj erman kyiʼj ansyan, ¿tzeʼn in nonin jlu tiʼj congregación?

¹⁵ Aj tok tilil kyuʼn ansyan tuʼn tjapun twi jun oklenj in xi qʼoʼn kye, in nonin kyiʼj erman. Qa in nok qeʼ kykʼuʼj erman kyiʼj ansyan, jurat in chex llamarin kyiʼj qa kyaj onbʼil. In nonin jlu tuʼn tkubʼ kynaʼn bʼaʼn ex tuʼn miʼn ttzaj bʼajxix kykʼuʼj. Ex mas kʼokel qeʼ kykʼuʼj erman kyiʼj ansyan qa ma tzʼajbʼen Biblia ex qe quʼj kyuʼn tuʼn t-xi kyqʼoʼn jun consej kye, ex nya kyex kyximbʼetz. Ax ikx, kukx in nok qeʼ kykʼuʼj erman kyiʼj ansyan qa mintiʼ in xi kyqʼamaʼn junjun tqanil aju mintiʼ kyoklen txqantl tiʼj ex qa in japun twi kyyol.

16. ¿Tzeʼn in nonin qiʼj ex kyiʼj txqantl aj tkubʼ qbʼinchaʼn aju bʼaʼn in nel toj twitz Jehová?

¹⁶ Kukx qbʼincham aju bʼaʼn in nela toj  twitz Jehová. Kbʼel qqʼoʼn jun tbʼanel techel kywitz txqantl qa kukx ma qo nimen te Jehová toj tkyaqil ambʼil ex qa kukx ma qo ximen kyiʼj nabʼil ateʼkux toj Biblia naʼmxtoq t-xi qbʼinchaʼn jun tiʼ. Qa ma tzʼok tilil quʼn tuʼn quʼjin tiʼj Biblia ex tuʼn tchʼiy qʼuqbʼil qkʼuʼj, kʼonil qiʼj tuʼn kukx qten tzʼaqli twitz Jehová ex tuʼn t-xi qnimen qe tkawbʼil. Ax ikx, kʼonil qiʼj tuʼn tel qikʼun qe tqanil ex xnaqʼtzbʼil nya ax tok, ex mlay chex qnimen (Efes. 4:14; Sant. 1:​6-8). Ex qa in nok qeʼ qkʼuʼj tiʼj Jehová ex kyiʼj tpromesa, kʼonil tuʼn miʼn ttzaj bʼaj qkʼuʼj aj tok qbʼiʼn jun nya bʼaʼn tqanil (Sal. 112:​7, 8). Nya oʼkxju, ax ikx jaku qo onin kyiʼj txqantl in che ikʼ toj nya bʼaʼn (1 Tes. 3:​2, 3).

17. ¿Tiʼ in nonin kyiʼj ansyan tuʼn kukx kyxqʼuqin tiʼj congregación?

¹⁷ Nim toklen tuʼn tten kynabʼil ansyan, tuʼn t-xi kybʼinchaʼn qe tiʼchaq toj tumel ex toj ttxolil. Ax ikx, in che onin kyiʼj txqantl tuʼn tkubʼ kynaʼn bʼaʼn ex tuʼn tchʼiy qʼuqbʼil kykʼuʼj tiʼj Jehová (Tito 1:9; 1 Tim. 3:​1-3). Aj tkubʼ kyqʼoʼn ansyan jun tbʼanel techel ex aj kyxqʼuqin kyiʼj erman, in che onin kyiʼj tuʼn kukx kybʼet kyoj chmabʼil, tuʼn kukx kypakbʼan ex tuʼn kukx kyxnaqʼtzan tiʼj Tyol Dios kyjunalx. Aj ttzaj jun nya bʼaʼn kyiʼj erman ex in tzaj bʼaj kykʼuʼj, in xi kynaʼn ansyan kye tuʼn tok qeʼ kykʼuʼj tiʼj Jehová ex kyiʼj ttziybʼil.

18. ¿Tiquʼn qaj tuʼn tjaw qnimsaʼn Jehová ex tuʼn qok laqʼeʼ mas ttxlaj? (Ax ikx qʼonka twitza tiʼj recuadro « Jun tten tuʼn qok laqʼeʼ ttxlaj Jehová»).

¹⁸ Toj xnaqʼtzbʼil lu ma tzʼel qnikʼ kyiʼj qe tbʼanel tmod Jehová ex in kubʼ qnaʼn aju tqʼama David: «Nimanxwit tbʼi Qman aju kolol wiʼje» (Sal. 144:1). Kukx kʼokel qeʼ qkʼuʼj tiʼj Jehová toj tkyaqil ambʼil. Axpe ikx aj qtijen, kukx kʼonil qiʼj tuʼn qten ttxlaj. Iktzun tten jaku qqʼama qe yol lu: «Tzʼaqlxixte Qman aju klol weye» (Sal. 92:​14, 15).