Kyxjel qeju in che uʼjin
¿Alqiʼj in yolin Salmo 12:7?
In tzaj qʼamaʼn toj Salmo 12:1 a 4 qa «mintiʼtl in che bʼet xjal tuj tumelxix». Qo xnaqʼtzan kyiʼj versículo at kyoklen tukʼil xjel lu. In tzaj tqʼamaʼn Salmo 12:5 a 7 jlu:
«Ex atzun yol lu ma tma Qman:
Aqine chin jawil weʼ ex che kletel wuʼne
qe xjal in che bʼaj yajlaʼn ex qe xjal mebʼa.
Che kletel wuʼne ik tzaʼn kye kyajbʼil.
Qe yol in tzaj ttziyan Qman tbʼanilxix qe;
ik kyten ik tzaʼn saq pwaq tbʼanilxix ex
qtzʼuminxix twitz tetzlenxi wuq maj tuj jorni.
Tuʼna Nman qo okel tkwentina;
kukx qo kletele tuʼna kywitz qe xjal mya bʼaʼn qe».
In tzaj tqʼamaʼn versículo 5 qa aqeju «xjal in che bʼaj yajlaʼn», che kletel tuʼn Dios.
Atzun toj versículo 6 in tzaj qʼamaʼn qa aqe «yol in tzaj ttziyan Qman tbʼanilxix qe; ik kyten ik tzaʼn saq pwaq tbʼanilxix ex qtzʼuminxix twitz». In tzaj tyekʼin jlu aju in qnaʼn tiʼj Tyol Dios (Sal. 18:30; 119:140).
In kubʼ traducirin Salmo 12:7 kyoj junjun Biblia ik tzeʼn jlu: «Kkwentila kyiʼj».
Tuʼnju toj versículo 6 in tzaj tqʼamaʼn «qe yol in tzaj ttziyan Qman», ateʼ junjun xjal in kubʼ kyximen qa atz in yolin versículo 7 tiʼj qa in nok t-xqʼuqin Jehová qe tyol. Ex ojtzqiʼn quʼn qa o tzʼok t-xqʼuqin Jehová Biblia maske o tzʼok tilil kyuʼn aj qʼoj tuʼn tkubʼ najset ex tuʼn miʼn tjaw kyuʼjin xjal (Isa. 40:8; 1 Pedro 1:25).
Noqtzun tuʼnj, ax ikx ax tok qe yol in tzaj qʼamaʼn toj versículo 5. O tzʼonin Jehová kyiʼj «qe xjal in che bʼaj yajlaʼn» ex o che klet tuʼn, ex kukx kbʼantel jlu tuʼn (Job 36:15; Sal. 6:4; 31:1, 2; 54:7; 145:20).
Qa ikju, ik tzeʼn in tzaj qʼamaʼn toj versículo 7, ¿alkye in nok t-xqʼuqin Jehová: Aqe xjal moqa aqe tyol?
Aj qxnaqʼtzan mas tiʼj Salmo lu, in nel qnikʼ tiʼj qa atz in yolin kyiʼj xjal.
In tzaj tqʼamaʼn Salmo 12:1 ex 2 qa e ten nim xjal xi kyqʼamaʼn nya ax tok yol kye tmajen Jehová. Ex toj versículo 3 in tzaj qʼamaʼn qa kbʼel tqʼoʼn Jehová kykastiw qeju in che yolin nya ax tok yol. In tzaj tqʼamaʼn Salmo lu qe qa kʼonil Jehová tiʼj ttnam tuʼnju ax tok qe tyol.
In tzaj tyekʼin jlu qe qa aju in tzaj qʼamaʼn toj versículo 7 atz yolin tiʼj qa in che ok t-xqʼuqin Jehová qeju tmajen in nok bʼinchaʼn nya bʼaʼn kyiʼj kyuʼn nya bʼaʼn xjal.
¿Tiquʼn in kubʼ kyqʼoʼn junjun Biblia versículo 7 ik tzeʼn jlu: «Kkwentila kyiʼj»? Tuʼnju ik tkubʼ kyoj junjun copia e kubʼ tzʼibʼin toj yol hebreo. Pero toj Septuaginta kubʼ traducirin toj yol griego in tzaj qʼamaʼn jlu: «Kkwentil qiʼj» ex «Kxqʼuqil qiʼj». Atzlo in yolin jlu kyiʼj qeju tmajen Jehová in nok bʼinchaʼn nya bʼaʼn kyiʼj ex che okel t-xqʼuqin kyiʼj «qe xjal mya bʼaʼn» (Sal. 12:7, 8). Toj jun traducción, kubʼ qʼoʼn versículo 7 toj yol arameo ik tzeʼn jlu: «Aya TAT, kyxqʼuqila kyiʼj qeju tzʼaqli, kukx che kletel tuʼna kyiʼj qe xjal nya bʼaʼn». In tzaj tyekʼin jlu qa mintiʼ in yolin Salmo 12:7 kyiʼj tyol Jehová, sino kyiʼj xjal.
In tzaj qʼuqbʼaʼn kykʼuʼj qeju «in che bʼet [ . . . ] tuj tumelxix» tuʼn versículo lu, tuʼnju in tzaj tziyen kye qa kxqʼuqil Jehová kyiʼj.
