1. ¿Tiʼ il tiʼj tuʼn tbʼant tuʼn jun xjal naʼmxtoq tjaw tbʼinchaʼn tja?

XIMANA tiʼj qa at jun xjal taj tuʼn tkubʼ tbʼinchaʼn jun tja ex ya ojtzqiʼn tuʼn tzeʼn kjawil bʼinchet. Noqtzun tuʼnj, ¿jun ratpe kxel loqʼel qe material tuʼn tjaw tbʼinchaʼn tja? Miʼn. ¿Tiquʼn? Tuʼnju tnejel kximel tiʼj qa kkanil tpwaq tuʼn kylaqʼet qe tiʼchaq kʼajbʼel tuʼn. Iktzun tten jaku bʼant tja.

2. Ik tzeʼn in tzaj tqʼamaʼn Lucas 14:27 a 30, ¿tiʼ il tiʼj tuʼn tbʼant tuʼna naʼmxtoq tjaw aʼ twiʼya?

² ¿Atpe nim tkʼujlabʼila tiʼj Jehová ex tuʼn jlu taja tuʼn tjaw aʼ twiʼya? Qa ikju, chʼixme axju in bʼaj tiʼja ik tzeʼn te xjal taj tuʼn tjaw tbʼinchaʼn tja. ¿Tiquʼn in xi qqʼamaʼn jlu? Bʼaʼn tuʼn t-ximana kyiʼj tyol Jesús tkuʼx toj Lucas 14:27 a 30 (uʼjinktza). Tzalu yolin Jesús tiʼj tiʼ t-xilen tuʼn qok te t-xnaqʼtzbʼen. Tajtoq tuʼn tel qnikʼ tiʼj qa kxel tiʼn jlu nim «pwaq», toj juntl yol, qa qo okel weʼ twitz junjun nya bʼaʼn ex qa il tiʼj tuʼn tbʼant junjun chʼixpubʼil quʼn (Luc. 9:23-26; 12:51-53). Tuʼntzunju, naʼmxtoq tjaw aʼ twiʼya, nim toklen tuʼn t-ximana tiʼj tiʼ t-xilen tuʼn qok te t-xnaqʼtzbʼen Jesús. Iktzun tten, kbʼajel tbʼinchaʼn ttena tuʼn tajbʼena te Jehová te jumajx.

3. ¿Tiʼ kʼelel qnikʼ tiʼj toj xnaqʼtzbʼil lu?

³ In nel qnikʼ tiʼj qa at nim tiʼchaq tuʼn tbʼant tuʼna tuʼn tjaw aʼ twiʼya, ¿pero tbʼanelpe tuʼn tbʼant tuʼna? Ikju, qa ma jaw aʼ twiʼya, ktzalajela kyiʼj nim kʼiwlabʼil jaʼlo ex toj ambʼil tzul. Toj xnaqʼtzbʼil lu, qo xnaqʼtzal kyiʼj junjun xjel nim kyoklen tiʼjju tuʼn tjaw aʼ qwiʼ. Kʼonil jlu tiʼja tuʼn tel tnikʼa tiʼj qa ya ma bʼant ttena.

4. a) ¿Tiʼ aju tuʼn t-xi ttziyena te Dios tuʼn tajbʼena te? b) Ik tzeʼn in tzaj tqʼamaʼn Mateo 16:24, ¿tiʼ t-xilen aju tuʼn tkubʼ qxkʼayin qibʼ?

⁴ ¿Tiʼ aju tuʼn t-xi ttziyena te Dios tuʼn tajbʼena te? Atz in yolin jlu tiʼj jun naʼj Dios kbʼantel tuʼna tuʼn tkyaqil tkʼuʼja tuʼn t-xi tqʼamaʼna te Jehová tuʼn t-xi tqʼoʼna tchwinqlala te. Nim toklen tuʼn tbʼant jlu tuʼna naʼmxtoq tjaw aʼ twiʼya. Aj t-xi tqʼoʼna tchwinqlala te Jehová, in kubʼ t-xkʼayin tibʼa tiʼjju texa tajbʼil (kjawil uʼjit Mateo 16:24). Toj ambʼil lu, in nok Jehová te tajaw tchwinqlala (Rom. 14:8, TNM). Aj t-xi tqʼamaʼna te Jehová tuʼn tajbʼen te, in xi tqʼamaʼna te qa tnejel kbʼel tbʼinchaʼna tajbʼil toj tanqʼibʼila. Ax ikx, in kyaj bʼant tiʼj jun tyola tukʼil. Mintiʼ in qo ok tchqʼoʼn Jehová tuʼn tbʼant jlu quʼn. Pero qa ma kubʼ qximen tuʼn tbʼant quʼn, taj Jehová tuʼn tjapun twi qyol (Sal. 116:12, 14).

5. ¿Tiquʼn junxitl aju tuʼn t-xi qtziyen te Dios tuʼn qajbʼen te twitzju tuʼn tjaw aʼ qwiʼ?

⁵ ¿Tiquʼn junxitl aju tuʼn t-xi qtziyen te Dios tuʼn qajbʼen te twitzju tuʼn tjaw aʼ qwiʼ? Aj t-xi ttziyen jun xjal tuʼn tajbʼen te Jehová, tjunalx in xi tqʼamaʼn jlu te. Pero aj tjaw aʼ twiʼ jun xjal, in bʼant jlu tuʼn kywitz txqantl, ex chʼixme tkyaqil maj in bʼant jlu toj jun nimaq chmabʼil. Aj tjaw aʼ twiʼya, in kubʼ tyekʼina kywitz txqantl qa o txi ttziyena te Jehová tuʼn tajbʼena te. * Toj juntl yol, in xi tyekʼina kye txqantl qa kʼujlaʼn Jehová tuʼna tuʼn tkyaqil tanmiya, tuʼn tkyaqil tkʼuʼja, tuʼn tkyaqil tnabʼila, tuʼn tkyaqil tipumala ex qa ma kubʼ t-ximana tuʼn tajbʼena te te jumajx (Mar. 12:30).

6, 7. Ik tzeʼn in tzaj tqʼamaʼn 1 Pedro 3:20 a 22, ¿tiquʼn nim toklen tuʼn tjaw aʼ qwiʼ?

⁶ ¿Nimpe toklen tuʼn tjaw aʼ twiʼya? Ximana kyiʼj yol tkuʼx toj 1 Pedro 3:20 a 22 (uʼjinktza). Tuʼnju jaw tbʼinchaʼn Noé ark, kubʼ tyekʼin qa attoq qʼuqbʼil tkʼuʼj. Ax ikx teya, aj tjaw aʼ twiʼya, kbʼel tyekʼina qa o txi ttziyena te Jehová tuʼn tajbʼena te. Pero, ¿ilpe tiʼj tuʼn tjaw aʼ twiʼya? Il tiʼj, tuʼnju tqʼama apóstol Pedro qa jaku qo klet tuʼn. Tuʼntzunju, jaku qo klet aj tjaw aʼ qwiʼ qa in kubʼ qyekʼin kyukʼil qbʼinchbʼen qa qʼuqli qkʼuʼj tiʼj Jesús, qa in xi qokslaʼn qa kyim tuʼn qpaj, qa jaw anqʼin ex qa xiʼ toj kyaʼj, ex qa toj ambʼil jaʼlo at toj tbʼanqʼabʼ Dios.

⁷ Ex aj tjaw aʼ qwiʼ, in nonin qiʼj tuʼn tten jun tbʼanel qximbʼetz. Aj t-xi qqʼoʼn qchwinqlal te Jehová ex aj tjaw aʼ qwiʼ, in xi tzyet tuʼn tten jun tbʼanel qamiwbʼil tukʼil. Tuʼnju o tzʼajtz tiʼj qanmi ex in nok qeʼ qkʼuʼj tiʼj chojbʼil bʼant tuʼn Jesús, in kubʼ tnajsaʼn Jehová qil. Iktzun tten jaku ten jun tbʼanel qximbʼetz twitz.

8. ¿Tiʼ jaku tzʼonin tiʼj jun xjal tuʼn tjaw aʼ twiʼ?

⁸ ¿Tiʼ jaku tzʼonin tiʼj jun xjal tuʼn tjaw aʼ twiʼ? Ax tok, tuʼnju o xnaqʼtzana tiʼj Xjan Uʼj, o tzʼok tojtzqiʼna nim tiʼchaq tiʼj Jehová, ik tzeʼn qe tmod ex qe t-ximbʼetz. Tkyaqil jlu o kuʼpin toj tanmiya ex o tzʼonin tiʼja tuʼn tok tkʼujlaʼna Jehová tuʼn tkyaqil tkʼuʼja. Aj tkubʼ t-ximana tuʼn tjaw aʼ twiʼya, nim toklen tuʼn tbʼant jlu tuʼna tuʼnju kʼujlaʼn Jehová tuʼna.

9. Ik tzeʼn in tzaj tqʼamaʼn Mateo 28:19 ex 20, ¿tiʼ t-xilen tuʼn tjaw aʼ qwiʼ toj tbʼi Mambʼaj, toj tbʼi Kʼwalbʼaj ex toj tbʼi xewbʼaj xjan?

⁹ Qa o tzʼel tnikʼa tiʼj Tyol Dios ex qa o txi tokslaʼna, ax ikx kʼonil jlu tiʼja tuʼn tjaw aʼ twiʼya. Ximana tiʼj kawbʼil kyaj tqʼamaʼn Jesús tuʼn kyok xjal te t-xnaqʼtzbʼen  quʼn (kjawil uʼjit Mateo 28:19, 20). Ik tzeʼn kyaj tqʼamaʼn, aqeju in che ok te t-xnaqʼtzbʼen, il tiʼj tuʼn tbʼant kyuʼn toj tbʼi Mambʼaj, toj tbʼi Kʼwalbʼaj ex toj tbʼi xewbʼaj xjan. Atz in yolin jlu tiʼj tuʼn t-xi qokslaʼn tuʼn tkyaqil qanmi aju in tzaj t-xnaqʼtzaʼn Xjan Uʼj tiʼj Jehová, tiʼj Tkʼwal ex tiʼj xewbʼaj xjan. Nim kyoklen axix tok lu ex jaku che pon toj qanmi (Heb. 4:12). Qo xnaqʼtzan kyiʼj junjun yekʼbʼil.

10, 11. ¿Alkyeqe axix tok xnaqʼtzbʼil o tzʼok tojtzqiʼna tiʼj Mambʼaj ex o che kuʼpin toj tanmiya?

¹⁰ ¿Naʼnx tuʼna toj alkye ambʼil el tnikʼa kyiʼj axix tok xnaqʼtzbʼil tiʼj Mambʼaj? El tnikʼa tiʼj qa Jehová tbʼi ex qa a «Maʼxix Toklen tibʼaj tkyaqil twitz txʼotxʼ», ex qa oʼkx te aju Dios axix tok (Sal. 83:18; Is. 37:16). Ax ikx a Bʼinchal qe ex a in kolin qiʼj (Sal. 3:8; 36:9). Nya oʼkxju, ax ikx o bʼant nim tiʼchaq tuʼn tuʼntzun qklet tiʼj il ex tiʼj kyimen, ex o tzaj tqʼoʼn jun qʼuqbʼil qkʼuʼj tuʼn qanqʼin te jumajx (Juan 17:3). Aj t-xi tqʼamaʼna te Jehová tuʼn tajbʼena te ex aj tjaw twiʼya, kbʼel tyekʼina kywitz txqantl qa ya ma tzʼoka te testigo de Jehová (Is. 43:10-12). Ax ikx ktela kyxol qe tmajen ateʼ twitz tkyaqil Txʼotxʼ, aqeju in che tzalaj tuʼnju tok tbʼi kyiʼj ex in che pakbʼan tiʼj tbʼi kye txqantl (Sal. 86:12).

¹¹ Jun tbʼanelxix qoklen aj tel qnikʼ tiʼjju in tzaj tqʼamaʼn Xjan Uʼj tiʼj Qman Jehová. Aj tel tnikʼa kyiʼj axix tok lu, kbʼel t-ximana tuʼn t-xi tqʼamaʼna te Jehová tuʼn tajbʼena te ex tuʼn tjaw aʼ twiʼya.

12, 13. ¿Alkyeqe axix tok xnaqʼtzbʼil o tzʼel tnikʼa tiʼj Jesús ex o che kuʼpin toj tanmiya?

¹² ¿Naʼnx tuʼna tiʼ kubʼ tnaʼna tej tel tnikʼa kyiʼj axix tok xnaqʼtzbʼil tiʼj Kʼwalbʼaj? A Jesús tkabʼ xjal mas nimxix toklen twitz tkyaqil Txʼotxʼ. Ex tuʼnju xi tqʼoʼn tchwinqlal tuʼn tchjet qil, a Kolil qe. Aj tkubʼ qyekʼin tukʼil qbʼinchbʼen qa in nok qeʼ qkʼuʼj tiʼj chojbʼil bʼant tuʼn, jaku kubʼ tnajsaʼn Jehová qil, jaku ten jun tbʼanel qamiwbʼil tukʼil ex jaku ten qchwinqlal te jumajx (Juan 3:16). Ax ikx, a Jesús Tnejel Pal ex taj tuʼn ttzaj qkʼamoʼn kʼiwlabʼil tuʼn chojbʼil bʼant tuʼn ex tuʼn qpon laqʼeʼ mas ttxlaj Jehová (Heb. 4:15; 7:24, 25). Ex tuʼnju o jaw tskʼoʼn Jehová te aj Kawil toj Tkawbʼil, kʼajbʼel tuʼn tuʼn tok tbʼi te saq, tuʼn tel tiʼn tkyaqil nya bʼaʼn ex tuʼn qtzaj tkʼiwlaʼn te jumajx toj akʼaj twitz Txʼotxʼ (Mat. 6:9, 10; Apoc. 11:15). Nya oʼkxju, ax ikx o kyaj tqʼoʼn Jesús jun tbʼanel techel qwitz (1 Ped. 2:21). Kubʼ tbʼinchaʼn tajbʼil Jehová toj tkyaqil tanqʼibʼil ex taj tuʼn tel qkanoʼn tiʼj (Juan 4:34).

¹³ Aj tel tnikʼa tiʼjju in tzaj t-xnaqʼtzaʼn Xjan Uʼj tiʼj Jesús, kchʼiyil tkʼujlabʼila tiʼj. Atzun jlu kʼonil tiʼja tuʼn tkubʼ tbʼinchaʼna tajbʼil Jehová ik tzeʼn bʼant tuʼn Jesús. Aju tbʼanel tzul tuʼn jlu, kbʼel t-ximana tuʼn t-xi tqʼamaʼna te Jehová tuʼn tajbʼena te ex tuʼn tjaw aʼ twiʼya.

14, 15. ¿Alkyeqe axix tok xnaqʼtzbʼil o tzʼel tnikʼa tiʼj xewbʼaj xjan ex o che kuʼpin toj tanmiya?

¹⁴ ¿Tiʼ kubʼ t-ximana tej tel tnikʼa tiʼj axix tok xnaqʼtzbʼil tiʼj xewbʼaj xjan? El tnikʼa tiʼj qa nya jun xjal jlu, sino tipumal Dios. Ajbʼen tuʼn Jehová tuʼn tonin kyiʼj xjal e kubʼ tzʼibʼinte Tyol, ex ax jlu in nonin qiʼj tuʼn tel qnikʼ tiʼjju in jaw quʼjin toj ex tuʼn tkubʼ qbʼinchaʼn (Juan 14:26; 2 Ped. 1:21). In najbʼen xewbʼaj xjan tuʼn Jehová tuʼn ttzaj tqʼoʼn «nimxix qipumal» (2 Cor. 4:7). Ax ikx in nonin xewbʼaj xjan qiʼj tuʼn tten qipumal tuʼn qyolin tiʼj tbʼanel tqanil, tuʼn tkubʼ kyiʼj joybʼil quʼn, tuʼn qex twitz bʼis, twitz nya bʼaʼn ex tuʼn kyten tbʼanel qmod (Gál. 5:22). In tzaj tqʼoʼn  Jehová xewbʼaj xjan kye qeju in nok qeʼ kykʼuʼj tiʼj ex kye qeju in xi kyqanin te (Luc. 11:13).

¹⁵ Nim in tzaj tqʼuqbʼaʼn qkʼuʼj aj tel qnikʼ tiʼj qa jaku tzʼonin xewbʼaj xjan qiʼj tuʼn kukx qajbʼen te Jehová. Aj tok tojtzqiʼna qe axix tok xnaqʼtzbʼil tiʼj xewbʼaj xjan, kbʼel t-ximana tuʼn t-xi tqʼamaʼn te Jehová tuʼn tajbʼena te ex tuʼn tjaw aʼ twiʼya.

16. ¿Tiʼ ma tzʼel qnikʼ tiʼj kyoj taqikʼ ma che kyaj?

¹⁶ Aj tkubʼ t-ximana tuʼn t-xi tqʼamaʼna te Dios tuʼn tajbʼena te ex tuʼn tjaw aʼ twiʼya, atzun jlu mas nim toklen tuʼn tbʼant tuʼna. Ik tzeʼn ma tzʼel qnikʼ tiʼj, nim toklen tuʼn kybʼant junjun tiʼchaq tuʼna. Noqtzun tuʼnj, tzul tkʼamoʼna mas kʼiwlabʼil twitz alkyexku nya bʼaʼn kʼokel weʼya twitz. Qa ma jaw aʼ twiʼya, jaku kleta tuʼn ex jaku ten jun tbʼanel t-ximbʼetza twitz Dios. Naʼntza qa kbʼantel jlu tuʼna tuʼnju at tkʼujlabʼila tiʼj Jehová. Ax ikx, nim toklen tuʼn tok qeʼ tkʼuʼja kyiʼj axix tok xnaqʼtzbʼil o tzʼok tojtzqiʼna tiʼj Mambʼaj, tiʼj Kʼwalbʼaj ex tiʼj xewbʼaj xjan. Ik tzeʼn ma tzʼel qnikʼ tiʼj, ¿jakupe tzaj tqʼamaʼna qa ma bʼant ttena tuʼn tjaw aʼ twiʼya?

17. ¿Tiʼ il tiʼj tuʼn tbʼant tuʼna tuʼntzun tjaw aʼ twiʼya?

¹⁷ Qa in kubʼ t-ximana qa ma bʼant ttena tuʼn tjaw aʼ twiʼya, qʼuqli qkʼuʼje tiʼj qa o bʼant junjun tiʼchaq tuʼna tuʼn tten jun tbʼanel tamiwbʼila tukʼil Jehová. * O tzʼok tojtzqiʼna nim tiʼchaq tiʼj Jehová ex tiʼj Jesús tuʼnju in nel tpaʼna ambʼil tuʼn t-xnaqʼtzana tiʼj Xjan Uʼj, ex tuʼn jlu o chʼiy qʼuqbʼil tkʼuʼja (Heb. 11:6). Ax ikx qʼuqli tkʼuʼja tiʼj qa che japunel twi tyol Jehová in tzaj qʼamaʼn toj Xjan Uʼj, ex ojtzqiʼn tuʼna qa jaku kleta tiʼj il ex tiʼj kamik qa ma tzʼok qeʼ tkʼuʼja tiʼj chojbʼil bʼant tuʼn Jesús. O tzʼajtz tiʼj tanmiya, toj juntl yol, o che kyaj tkolina qe il bʼant tuʼna ojtxe ex o txi tqanina najsam te Jehová. Ex o bʼaj tchʼexpuʼna tkyaqil tanqʼibʼila tuʼntzun tkubʼ tbʼinchaʼna aju in tzalaj Jehová tiʼj (Hech. 3:19). Ax ikx, o kubʼ t-ximana tuʼn tyolina tiʼj Jehová kyukʼil txqantl. Tuʼn jlu o bʼant ttena tuʼn texa pakbʼal junx kyukʼil erman (Mat. 24:14). Nimxix in tzalaj Jehová tiʼja tuʼnju o bʼant tkyaqil jlu tuʼna (Prov. 27:11).

18. ¿Tiʼ mas kbʼantel tuʼna naʼmxtoq tjaw aʼ twiʼya?

¹⁸ Il tiʼj tuʼn tbʼant junjuntl tiʼchaq tuʼna naʼmxtoq tjaw aʼ twiʼya. Ik tzeʼn ma tzʼel qnikʼ tiʼj, nim toklen tuʼn t-xi tqʼamaʼna te Jehová tuʼn tajbʼena te, toj juntl yol, tuʼn tyolina tukʼil toj jun naʼj Dios tuʼntzun t-xi tqʼoʼna tchwinqlala te (1 Ped. 4:2). Yajxitl, qʼamanxa te qʼol kyaqʼun ansyan qa taja tuʼn tjaw aʼ twiʼya. Atzunte ansyan lu, kxel tqʼamaʼn kye junjuntl ansyan tuʼn kyyolin  tukʼila. Pero mintiʼ tuʼn ttzaj bʼaj tkʼuʼja, tuʼnju ya ojtzqiʼna kyuʼn erman lu ex kʼujlaʼna kyuʼn. Che yolil erman lu tukʼila kyiʼj junjun xnaqʼtzbʼil nim kyoklen o tzʼel tnikʼa tiʼj. Iktzun tten kʼokel kyqʼoʼn kywitz tiʼj qa axix tok o tzʼel tnikʼa kyiʼj xnaqʼtzbʼil ex qa ya ojtzqiʼn tuʼna tiʼ t-xilen aju tuʼn t-xi tqʼamaʼna te Jehová tuʼn tajbʼena te ex tuʼn tjaw aʼ twiʼya. Aj tel kynikʼ erman lu tiʼj qa ma bʼant ttena, kxel kyqʼamaʼn teya qa jaku bʼant tuʼn tjaw aʼ twiʼya toj juntl nimaq chmabʼil.

19, 20. ¿Tiʼ kbʼantel tuʼna otoqxi jaw aʼ twiʼya ex tiʼ kʼonil tiʼja?

¹⁹ ¿Tiʼ kbʼantel tuʼna otoqxi jaw aʼ twiʼya? * Bʼaʼn tuʼn ttzaj tnaʼna qa in kyaj bʼant tiʼj jun tyola tukʼil Jehová aj t-xi ttziyena te tuʼn tajbʼena te ex taj tuʼn tjapun tuʼna. Tuʼntzunju, otoqxi jaw aʼ twiʼya, bʼaʼn tuʼn tok tilil tuʼna tuʼn tanqʼina ik tzeʼn taj Jehová. ¿Tiʼ kʼonil tiʼja?

²⁰ Miʼn tzʼel tpan tibʼa kyiʼj erman. Aj tjaw aʼ twiʼya, ktela kyxol kykyaqil tmajen Jehová (1 Ped. 2:17). Che okel erman te toj tjaya. Qa kukx ma bʼeta kyoj chmabʼil, kchʼiyel tamiwbʼila kyukʼil. Bʼaʼn tuʼn tel tpaʼna ambʼil tkyaqil qʼij tuʼn tuʼjina tiʼj Tyol Dios ex tuʼn t-ximana tiʼj (Sal. 1:1, 2). Toj juntl yol, aj tbʼaj tuʼjina jun taqikʼ Tyol Dios, bʼaʼn tuʼn tkyaj weʼya ex ximana tiʼjju in jaw tuʼjina. Iktzun tten kpol tqanil toj tanmiya. Ax ikx, bʼaʼn t-xi tbʼiʼna aju tqʼama Jesús: «Che xqʼuqine ex che naʼne Dios» (Mat. 26:41). Qa ma txi tqʼamaʼna aju tkuʼx toj tanmiya toj tnaʼj Diosa, mas kʼokel laqʼeʼya ttxlaj Jehová. Ax ikx, kukx jyona «tnejelxix [tiʼj] tkawbʼil Dios» (Mat. 6:33). ¿Alkye tten? Aj tkubʼ tqʼoʼna pakbʼabʼil tnejel toj tanqʼibʼila. Qa kukx ma pakbʼana, kʼonil tiʼja tuʼn tchʼiy qʼuqbʼil tkʼuʼja ex jaku tzʼonina kyiʼj txqantl tuʼn kyoktz toj bʼe te chwinqlal (1 Tim. 4:16).

21. ¿Tiʼ tzul tkʼamoʼna qa ma jaw aʼ twiʼya?

²¹ Aj tkubʼ ximana tuʼn t-xi tqʼamaʼna te Jehová tuʼn tajbʼena te ex tuʼn tjaw aʼ twiʼya, atzun jlu mas nim toklen toj tanqʼibʼila. Ax tok, il tiʼj tuʼn t-xi tbʼinchaʼna junjun tiʼ. Pero qʼuqli qkʼuʼje tiʼj qa tzul tkʼamoʼna nim kʼiwlabʼil. Aqeju nya bʼaʼn kʼokel weʼya twitz toj ambʼil jaʼlo, mlay che ten te jumajx (2 Cor. 4:17). Pero qa ma jaw aʼ twiʼya, mas ktzalajela jaʼlo ex ktel tchwinqlala axix tok toj ambʼil tzul (1 Tim. 6:19). Tuʼntzunju, bʼaʼn tuʼn t-ximana tiʼj, naʼna Dios te Jehová ex tzaqʼwenxa xjel lu: «¿Mape bʼant ntene tuʼn tjaw aʼ nwiʼye».