1, 2. Ik tzeʼn in tzaj tyekʼin Hechos 8:27 a 31, ex 35 a 38, ¿tiquʼn kubʼ t-ximen xjal te Etiopía tuʼn tjaw aʼ twiʼ?

¿TAJ teya tuʼn tjaw aʼ twiʼya ex taja tuʼn toka te t-xnaqʼtzbʼen Jesús? Ateʼ nim erman o jaw aʼ kywiʼ ex bʼant jlu kyuʼn tuʼnju at kykʼujlabʼil tiʼj Jehová ex kyaj tuʼn t-xi kyqʼoʼn chjonte te. Ex ximana tiʼjju bʼant tuʼn jun xjal nim toklen, aju in naqʼunantoq tukʼil reina te Etiopía.

² Tej tel tnikʼ xjal lu tiʼj qa il tiʼj tuʼn tjaw aʼ twiʼ, jun rat bʼant tuʼn (kjawil uʼjit Hechos 8:27-31, 35-38). In nel qnikʼ tiʼj qa kʼujlaʼntoq Tyol Dios tuʼn tuʼnju tej in bʼettoq t-xiʼ, in nuʼjintoq tiʼj uʼj te Isaías. Ex tej t-xi tchikʼbʼaʼn Felipe te aju otoq bʼant tuʼn Jesús tiʼj, kubʼ t-ximen tuʼn t-xi tqʼoʼn chjonte te. Ax ikx ojtzqiʼn quʼn qa kʼujlaʼntoq Jehová tuʼn tuʼnju otoq meltzʼaj kʼulil te toj tnam Jerusalén. Tuʼn jlu jaku txi qqʼamaʼn qa otoq kyaj ttzaqpiʼn ojtxe tokslabʼil ex kubʼ t-ximen tuʼn tten toj ttnam Dios tuʼn tkʼulin te. Ex aju tkʼujlabʼil at tiʼj Jehová, onin tiʼj tuʼn tjaw aʼ twiʼ ex tuʼn tok te t-xnaqʼtzbʼen Jesús (Mat. 28:19).

3. ¿Tiʼ jaku tzʼel qʼinte ambʼil teya tuʼn tjaw aʼ twiʼya? (Qʼonka twitza tiʼj recuadro « ¿Tzeʼn teya tanmi?»).

³ Qa kʼujlaʼn Jehová tuʼna, jaku tzʼonin jlu tiʼja tuʼn tjaw aʼ twiʼya. Pero qa kʼujlaʼn junjuntl tiʼchaq tuʼna, jaku tzʼel kyiʼn ambʼil teya tuʼn tjaw aʼ twiʼya. Jun techel, bʼalo kʼujlaʼn qe toj tjaya tuʼna ex qe tamiwa mintiʼ in che ajbʼen te Jehová, ex in kubʼ t-ximana qa ya mlay tzʼok kʼujlaʼna kyuʼn qa ma jaw aʼ twiʼya (Mat. 10:37). Moqa naqʼliya kyiʼj junjun tiʼchaq ikʼun tuʼn Jehová ex kwest tuʼn tkyaj  ttzaqpiʼna (Sal. 97:10). Ax ikx, bʼalo o naqʼeta tuʼn tkubʼ tikʼsaʼna junjun ninqʼij at kyoklen kyukʼil okslabʼil nya ax tok ex in che tzaj tnaʼna qe tbʼanel ambʼil kyiʼj. Maske ojtzqiʼn tuʼna qa ikʼun qe jlu tuʼn Jehová, kwest in nela toj twitza tuʼn kykyaj ttzaqpiʼna (1 Cor. 10:20, 21). Tuʼntzunju, nim toklen tuʼn t-ximana tiʼj alkye mas kʼokel tkʼujlaʼna.

4. ¿Tiʼxix in nonin tiʼj jun xjal tuʼn tjaw aʼ twiʼ?

⁴ Ax ikx, jaku txi qqʼamaʼn qa kʼujlaʼn junjun tbʼanel tiʼchaq tuʼna ex in nok tqʼoʼna kyoklen. Jun techel, bʼalo ya kʼujlaʼntoq Tyol Dios tuʼna tej naʼmxtoq t-xi tzyet tuʼn t-xnaqʼtzana kyukʼil testigo de Jehová. Axlo ikx, ya kʼujlaʼntoq Jesús tuʼna. Atzun jaʼlo, ya ojtzqiʼn qe testigo de Jehová tuʼna ex in tzalaja aj ttena kyukʼil. Pero nya oʼkx tuʼn jlu jaku kubʼ t-ximana tuʼn t-xi tqʼamaʼna te Jehová tuʼn tajbʼena te ex tuʼn tjaw aʼ twiʼya. ¿Tiquʼn? Tuʼnju oʼkx jaku jaw aʼ qwiʼ qa axix tok kʼujlaʼn Jehová quʼn. Ex qa mas ma tzʼok tkʼujlaʼna twitz alkyexku juntl, ni jun jaku tzʼel qʼinte ambʼil teya tuʼn tajbʼena te. Ex nya oʼkx in nonin qkʼujlabʼil tiʼj Jehová tuʼn tjaw aʼ qwiʼ, sino ax ikx in nonin qiʼj tuʼn kukx qbʼet toj tbʼe.

5. ¿Tiʼ kʼelel qnikʼ tiʼj toj xnaqʼtzbʼil lu?

⁵ Tqʼama Jesús qa il tiʼj tuʼn tok qkʼujlaʼn Jehová tuʼn tkyaqil qanmi, qkʼuʼj, qximbʼetz ex qipumal (Mar. 12:30). ¿Tzeʼn jaku tzʼok tkʼujlaʼna Jehová ik tzeʼn jlu ex tuʼn tok tqʼoʼna toklen? Jaku bʼant jlu tuʼna aj t-ximana tiʼj tkʼujlabʼil at tiʼja (1 Juan 4:19). Ateʼ junjun nabʼil toj xnaqʼtzbʼil lu ex jaku che onin tiʼja tuʼn tbʼant jlu tuʼna. Ax ikx tzul tqʼamaʼn alkye junjuntl tiʼ jaku bʼant tuʼna aj tchʼiy tkʼujlabʼila tiʼj Jehová. *

6. Ik tzeʼn in tzaj tyekʼin Romano 1:20, ¿tiʼ jaku tzʼonin qiʼj tuʼn tok qojtzqiʼn Jehová?

⁶ Ojtzqiʼnka Jehová aj t-ximana kyiʼj tbʼinchbʼen (kjawil uʼjit Romanos 1:20; Apoc. 4:11). Qʼanchaʼl tnabʼil Jehová aj qximen tiʼjju tzeʼn bʼinchan qe tzeʼ ex qe txkup. Ax ikx bʼaʼn tuʼn tjyona tqanil tiʼj tzeʼn bʼinchaʼn maj qxmilal (Sal. 139:14, TNM). Ex ximana tiʼj tkyaqil ipumalj okx tqʼoʼn Jehová toj Qʼij, ex miʼn tzikʼ tnaʼl tuʼna qa ateʼ txqantl millón cheʼw (Is. 40:26). * Aj tbʼant jlu tuʼna, mas kʼokel tqʼoʼna toklen Jehová. Noqtzun tuʼnj, aj tel tnikʼa tiʼj qa at tnabʼil Jehová ex qa at tipumal, jaku tzʼonin jlu tiʼja tuʼn tchʼiy tamiwbʼila tukʼil. Pero qa taja tuʼn tok tkʼujlaʼna Jehová tuʼn tkyaqil tkʼuʼja, nim toklen tuʼn tten mas tojtzqibʼila tiʼj.

7. ¿Tiʼ kbʼantel tuʼna tuʼn tok tkʼujlaʼna Jehová tuʼn tkyaqil tanmiya?

⁷ Nim toklen tuʼn tok qeʼ tkʼuʼja tiʼj qa in ximen Jehová tiʼja. ¿Kwestpe tuʼn t-xi tnimana qa in keʼyin Bʼinchal kyaʼj ex Txʼotxʼ tiʼja ex qa in ximen tiʼja? Qa ikju, bʼaʼn tuʼn ttzaj tnaʼna qa «mya najchaq taʼ [Dios] ttxlaj junjun qe» (Hech. 17:26-28). Ex ik tzeʼn xi tqʼamaʼn David te Salomón, «in bʼaj tkeʼyin [Qman] tuj kyanmi xjal». Ax ikx in tzaj ttziyen Jehová qa kkanetel tuʼna qa ma jyona tiʼj (1 Crón. 28:9). Nya oʼkxju, qa in xnaqʼtzana tiʼj Tyol Jehová, in bʼant jlu tuʼna tuʼnju a o txi tqʼoʼn txokbʼil tiʼja ik tzeʼn in tzaj tqʼamaʼn Jeremías  31:3. Qa mas ma tzʼok tojtzqiʼna aju o bʼant tuʼn Jehová tiʼja, mas kʼokel tkʼujlaʼna.

8. ¿Alkye tten jaku kubʼ tyekʼina qa in xi tqʼoʼna chjonte tiʼj tkʼujlabʼil Jehová?

⁸ Qa ma naʼna Dios, atzun jun tumel tuʼn tkubʼ tyekʼina qa in xi tqʼoʼna chjonte tiʼj tkʼujlabʼil Jehová. Kchʼiyil tkʼujlabʼila tiʼj Jehová qa ma txi tqʼamaʼna te tkyaqilju in bʼaj tkʼuʼja tiʼj ex qa ma txi tqʼoʼna chjonte te tiʼjju in bʼant tuʼn tiʼja. Ex mas kchʼiyil tamiwbʼila tukʼil aj tok tkeʼyina qa in tzaj ttzaqʼweʼn qe tnaʼj Diosa (Sal. 116:1). Tuʼn jlu kʼelel tnikʼa tiʼj qa ojtzqiʼna tuʼn Jehová. Pero tuʼn tok laqʼeʼya mas ttxlaj, nim toklen tuʼn tel tnikʼa tiʼj tiʼ t-ximbʼetz at ex tiʼ taj tuʼn tbʼant tuʼna. Ex oʼkx jaku tzʼel tnikʼa tiʼj jlu qa ma xnaqʼtzana tiʼj Tyol.

9. ¿Tzeʼn jaku kubʼ tyekʼina qa in nok tqʼoʼna toklen Tyol Dios?

⁹ Xnaqʼtzam tibʼa tuʼn tok tqʼoʼna toklen Tyol Dios. Oʼkx Xjan Uʼj in tzaj qʼamante axix tok tiʼj Jehová ex tiʼjju taj tuʼn ttzaj tqʼoʼn teya. ¿Tzeʼn jaku kubʼ tyekʼina qa in nok tqʼoʼna toklen Tyol? Kbʼel tyekʼina qa ma jaw tuʼjina tkyaqil qʼij, qa ma bʼaj tbʼinchaʼna ttena kyiʼj xnaqʼtzbʼil in xi qʼoʼn teya ex qa ma kubʼ tbʼinchaʼna aju in nel tnikʼa tiʼj (Sal. 119:97, 99; Juan 17:17). ¿Atpe jun teya tprograma tuʼn tjaw tuʼjina Tyol Dios tkyaqil qʼij ex in nokpe lepeʼya tiʼj?

10. ¿Alkye jun kyxol qe tiʼchaq tbʼanel tkuʼx toj Tyol Dios?

¹⁰ Jun kyxol qe tiʼchaq tbʼanel tkuʼx toj Tyol Dios, aqeju txʼolbʼabʼil kyaj kytzʼibʼin xjal ok kyqʼoʼn kywitz tiʼj Jesús. Ex oʼkx toj uʼj lu jaku kanet tqanil tuʼna tiʼjju bʼant tuʼn Jesús tiʼja. Aj tel tnikʼa tiʼjju bʼant tuʼn ex tiʼjju tqʼama, kbʼel tnaʼna qa taja tuʼn toka te tamiw.

11. ¿Tiʼ kʼonil tiʼja tuʼn tchʼiy mas tkʼujlabʼila tiʼj Jehová?

¹¹ Xnaqʼtzam tibʼa tuʼn tok tkʼujlaʼna Jesús. Aj tbʼant jlu tuʼna, kʼonil tiʼja tuʼn tchʼiy tkʼujlabʼila tiʼj Jehová. ¿Tiquʼn? Tuʼnju kubʼ tyekʼin Jesús toj jun tten  tzʼaqli qe tbʼanelxix tmod Ttat (Juan 14:9). Tuʼntzunju, qa mas ma tzʼok tojtzqiʼna Jesús, mas kʼelel tnikʼa tiʼj Jehová ex mas kʼokel tkʼujlaʼna. Ximana tiʼj qʼaqʼbʼil tkʼuʼj Jesús kubʼ tyekʼin kyiʼj xjal i el ikʼun, ik tzeʼn qeju prow, qeju yabʼ ex qeju mintiʼ jun kolil kye. Ax ikx, ximana kyiʼj tbʼanel consej in xi tqʼoʼn teya ex tzeʼn in nonin jlu tiʼja toj tanqʼibʼila qa ma chex tnimana (Mat. 5:1-11; 7:24-27).

12. Aj tel tnikʼa tiʼjju bʼant tuʼn Jesús, ¿alkye tten jaku tzʼonin jlu tiʼja?

¹² Mas jaku chʼiy tkʼujlabʼila tiʼj Jesús qa ma ximana tiʼj chojbʼil bʼant tuʼn tuʼntzun kykubʼ najset qil (Mat. 20:28). Aj tel tnikʼa tiʼj qa kyim Jesús tiʼja, jaku tzʼonin jlu tiʼja tuʼn tajtz tiʼj tanmiya ex tuʼn t-xi tqanina najsam te Jehová (Hech. 3:19, 20; 1 Juan 1:9). Ex qa mas ma tzʼok tkʼujlaʼna Jehová ex Jesús, mas ktzalajela tuʼn ttena kyukʼil qeju ax kyximbʼetz at ik tzeʼn teya.

13. ¿Tiʼ o tzaj tqʼoʼn Jehová teya?

¹³ Xnaqʼtzam tibʼa tuʼn kyok tkʼujlaʼna qe toj tja Jehová. Ateʼ junjun mlay tzʼel kynikʼ tiʼj tiquʼn taja tuʼn tajbʼena te Dios, ik tzeʼn qeju at kyxilen tukʼila ex qeju tamiwa e ten ojtxe, axpe ikx jaku tzaj kyqʼoj tiʼja. Pero kʼonil Jehová tiʼja tuʼn kykanet ttzika ex titzʼina toj ttnam. Qa kukx ma tena kyukʼil, kʼokel kʼujlaʼna kyuʼn ex che onil tiʼja (Mar. 10:29, 30; Heb. 10:24, 25). Ex jakulo pon jun qʼij tuʼn tkubʼ kyximen toj tjaya tuʼn kyajbʼen te Jehová ex tuʼn kyok lepeʼ kyiʼj tkawbʼil (1 Ped. 2:12).

14. Ik tzeʼn in tzaj tyekʼin 1 Juan 5:3, ¿tzeʼn in che ela tkawbʼil Jehová toj twitza?

¹⁴ Xnaqʼtzam tibʼa tuʼn kyxi tnimana tkawbʼil Jehová ex qʼonka kyoklen. Tej naʼmxtoq tok tojtzqiʼna Jehová, bʼalo in noktoq lepeʼya tiʼj texa t-ximbʼetz, atzun jaʼlo in nel tnikʼa tiʼj qa mas tbʼanel qe tkawbʼil Jehová (Sal. 1:1-3; kjawil uʼjit 1 Juan 5:3). Ximana kyiʼj tbʼanel consej in tzaj tqʼoʼn Tyol Dios kye chmilbʼaj, kye xuʼjilbʼaj, kye tatbʼaj ex kye kʼwalbʼaj (Efes. 5:22–6:4). ¿Ope tzʼok tkeʼyina qa mas in che tzalaj qe toj tjaya tuʼnju in xi kybʼiʼn aju in tzaj tqʼamaʼn Tyol Dios? ¿Maspe tbʼanel xjal teya tuʼnju in xi tbʼiʼna nabʼil tiʼjju alkyeqe tamiwa tuʼn tten? ¿Maspe in tzalaja toj ambʼil jaʼlo? (Prov. 13:20; 1 Cor. 15:33). Bʼalo in nel tnikʼa tiʼj qa mas tbʼanel tanqʼibʼila at.

15. ¿Tiʼ jaku bʼant tuʼna tuʼn t-xi tbʼiʼna qe nabʼil ateʼkux toj Tyol Dios?

¹⁵ Bʼalo at maj mintiʼ ojtzqiʼn tuʼna tzeʼn jaku txi tbʼiʼna qe nabʼil ateʼ toj Tyol Dios. Tuʼntzunju, in najbʼen ttnam Jehová tuʼn tuʼntzun ttzaj tqʼoʼn xnaqʼtzbʼil teya ex kʼonil jlu tiʼja tuʼn tel tnikʼa tiʼj alkye bʼaʼn ex alkye nya bʼaʼn (Heb. 5:13, 14). Ex aj tjaw tuʼjina ex aj tkubʼ t-xnaqʼtzaʼna tqanil lu, kʼelel tnikʼa tiʼj qa jaku tzʼonin tiʼja toj tanqʼibʼila, ex tuʼn jlu kbʼel t-ximana tuʼn ttena toj ttnam Jehová.

16. ¿Alkye tten o bʼaj tnukʼuʼn Jehová ttnam?

¹⁶ Xnaqʼtzam tibʼa tuʼn tok tkʼujlaʼna Jehová ex tuʼn tonina tiʼj ttnam. O bʼaj tnukʼun Jehová ttnam, tuʼntzunju ateʼ kʼloj okslal ex a Jesús nejni kywitz (Efes. 1:22; 5:23). Atzunte Jesús, o txi tqʼoʼn kyoklen skʼoʼn maj tuʼn kykubʼ nej twitz aqʼuntl taj tuʼn tbʼant toj ambʼil jaʼlo. Aqeju okslal lu, aqeju ok tqʼoʼn Jesús kybʼi te «majen in bʼant taqʼun [...] ex at tnabʼl», in nokxix tilil kyuʼn tuʼn t-xi kyqʼoʼn xnaqʼtzbʼil teya ex tuʼn tok kyxqʼuqin tamiwbʼila tukʼil Jehová (Mat. 24:45-47). Ex jun tumel tzeʼn in xqʼuqin majen in bʼant taqʼun tiʼja, aju aj tok tilil tuʼn tuʼn kyten ansyan toj kʼloj okslal (Is. 32:1, 2; Heb. 13:17; 1 Ped. 5: 2, 3). Kyaj erman lu tuʼn kyxqʼuqin tiʼja, tuʼn t-xi kyqʼuqbʼaʼn tkʼuʼja ex kyaj tuʼn kyonin tiʼja tuʼn tchʼiy tamiwbʼila tukʼil Jehová. Ex jun kyxol qe tiʼchaq nim toklen jaku bʼant kyuʼn tiʼja, aju aj kyonin tiʼja tuʼn t-xi tqʼoʼna xnaqʼtzbʼil tiʼj Jehová kye xjal (Efes. 4:11-13).

17. Ik tzeʼn in tzaj tqʼamaʼn Romanos 10:10, 13 ex 14, ¿tiquʼn in qo yolin tiʼj Jehová kyukʼil xjal?

¹⁷ Tzʼonina kyiʼj txqantl tuʼn tok kykʼujlaʼn Jehová. Xi tqʼamaʼn Jesús kye t-xnaqʼtzbʼen tuʼn t-xi kyqʼoʼn xnaqʼtzbʼil tiʼj Dios kye xjal (Mat. 28:19, 20). Jakulo kubʼ qximen tuʼn t-xi qbʼiʼn kawbʼil lu tuʼnju il tiʼj tuʼn tbʼant quʼn, pero qa ma chʼiy tkʼujlabʼila tiʼj Jehová, jaku kubʼ tnaʼna ik tzeʼn te apóstol Pedro ex Juan tej kyqʼama jlu: «Mlay bʼant tuʼn t-xi qkoline tuʼn t-xi qmaʼne aju ma qile ex ma qbʼiye» (Hech. 4:20). Qa ma qo onin tiʼj jun xjal tuʼn tok tkʼujlaʼn Jehová, nim qo tzalajel. ¿Jakupe kubʼ tnaʼna tzalajbʼil kubʼ tnaʼn Felipe tej tonin tiʼj xjal te Etiopía tuʼn tel tnikʼ tiʼj Tyol Dios ex tuʼn tjaw aʼ twiʼ? Aj tel tkanoʼna tiʼj Felipe ex aj t-xi tbʼiʼna kawbʼil kyaj tqʼamaʼn Jesús tuʼn qpakbʼan, kbʼel tyekʼina qa taja tuʼn toka te testigo de Jehová (kjawil uʼjit Romanos 10:10, 13, 14). Qa ma bʼant jlu tuʼna, bʼalo jaku kubʼ t-xjelina ik tzeʼn xjal te Etiopía tej tqʼama jlu: «¿Myapelo bʼaʼn tuʼn nbʼyane?» (Hech. 8:36).

18. ¿Tiʼ kʼelel qnikʼ tiʼj toj juntl xnaqʼtzbʼil?

¹⁸ Aj tkubʼ t-ximana tuʼn tjaw aʼ twiʼya, atzun jlu mas nim toklen jaku bʼant tuʼna toj tanqʼibʼila. Tuʼnju nya jun saqchbʼil jlu, nim toklen tuʼn t-ximana tiʼj. Noqtzun tuʼnj, ¿tiʼ t-xilen aju tuʼn tjaw aʼ qwiʼ? ¿Ex tiʼ kbʼantel tuʼna naʼmxtoq tjaw aʼ twiʼya ex otoqxi jaw aʼ twiʼya? Qo yolil tiʼj jlu toj juntl xnaqʼtzbʼil.