1. Ik tzeʼn in tzaj tqʼamaʼn Mateo 24:9, ¿tiquʼn mintiʼ in qo jaw labʼin aj qel ikʼun kyuʼn xjal?

KUBʼ tbʼinchaʼn Jehová qoʼ tuʼn tkubʼ qyekʼin qkʼujlabʼil ex tuʼn qok kʼujlaʼn. Tuʼntzunju, in tzaj qbʼis ex jakulo qo tzaj xobʼ aj qel ikʼun tuʼn jun xjal. Jun techel, in tzaj tqʼamaʼn ermana Georgina jlu, aju in nanqʼin atz Europa: «In nel ikʼune tuʼn ntxuʼye tuʼnju in chin ajbʼene te Jehová. Qʼiʼntoq 14 abʼqʼi wuʼne, kubʼ nnaʼne qa mintiʼtoq in chin ok kʼujlaʼne ex kubʼ nxjeline qa nya bʼaʼn xjal qine». * Kubʼ ttzʼibʼin ermano Danilo jlu: «Tej wok bʼyoʼne kyuʼn soldad, tej kyok ten yasil wiʼje ex tej kyqʼama qa tzul nim nya bʼaʼn wiʼje tuʼnju testigo de Jehová qine, in tzaj xobʼe ex kubʼ nnaʼne qa mintiʼ ok qʼoʼn woklene». Maske in kux choʼn toj qanmi aj qel ikʼun, mintiʼ in qo jaw labʼin tiʼj jlu tuʼnju tqʼama Jesús qa atzun jlu tuʼn tbʼaj qiʼj (kjawil uʼjit Mateo 24:9).

2, 3. ¿Tiquʼn in qo el ikʼun kyuʼn xjal?

² In qo el ikʼun kyuʼn xjal ik tzeʼn bʼaj tiʼj Jesús «porke mya te twitz txʼotxʼ» qoʼ (Juan 15:17-19). Maske in nok qqʼoʼn kyoklen aj kawil, mintiʼ in nokx qqʼon qibʼ kyxol, mintiʼ in qo bʼitzin tiʼj himno nacional ex mintiʼ in qo qʼolbʼen te bandera. ¿Tiquʼn? Tuʼnju oʼkx in qo kʼulin te Jehová. In qo kolin tiʼj toklen Jehová tuʼn tkawin kyibʼaj xjal, atzunte Satanás in nel tikʼun jlu junx kyukʼil qeju in che onin tiʼj (Gén. 3:1-5, 15). In xi qqʼamaʼn kye xjal qa oʼkx Tkawbʼil Dios kʼelel qʼinte tkyaqil nya bʼaʼn ex qa toj chʼintl ambʼil kbʼel tnajsaʼn qe xjal nya bʼaʼn (Dan. 2:44; Apoc. 19: 19-21). Jun tbʼanel tqanil jlu kye xjal mans, atzun kye xjal in che bʼinchan il, nya bʼaʼn in nela toj kywitz (Sal. 37:10, 11).

³ Ax ikx in qo el ikʼun kyuʼn xjal tuʼnju in bʼant tajbʼil Jehová quʼn. Toj ambʼil ojtxe, kubʼ t-xiten Dios tnam Sodoma ex Gomorra tuʼnju in che tzalajtoq xjal tiʼj yaẍbʼil. Ax jlu in bʼant kyuʼn xjal toj ambʼil jaʼlo (Jud. 7). Tuʼnju in chex qbʼiʼn qe tkawbʼil Jehová, nim xjal in che xmayin qiʼj ex in tzaj kyqʼamaʼn qa in qo yolin nya bʼaʼn tiʼj kybʼinchbʼen (1 Ped. 4:3, 4).

4. ¿Alkyeqe mod jaku che onin qiʼj tuʼn tikʼx ikʼbʼil quʼn?

⁴ ¿Alkyeqe mod jaku che onin qiʼj tuʼn tikʼx ikʼbʼil quʼn ex aj kyxmayin xjal qiʼj? Nim toklen tuʼn tok qeʼxix qkʼuʼj tiʼj qa kʼonil Jehová qiʼj. In nok qʼuqbʼil qkʼuʼj «ik tzaʼn jun maqbʼil» tuʼntzun tkubʼ yupj «tkyaqil plech in kʼant in tzaj t-xoʼn tajaw il» (Efes. 6:16). Noqtzun tuʼnj, ax ikx nim toklen tuʼn tten qkʼujlabʼil. ¿Tiquʼn? Tuʼnju qa at tkʼujlabʼil jun xjal, «mya txʼuʼj twiʼ» ex in nikʼx tuʼn tkyaqil nya bʼaʼn in nok bʼinchaʼn tiʼj (1 Cor. 13:4-7, 13). Qo xnaqʼtzan tiʼj tzeʼn jaku tzikʼx ikʼbʼil quʼn tuʼnju at qkʼujlabʼil tiʼj Jehová, kyiʼj erman ex kyiʼj aj qʼoj.

5. ¿Tiʼ bʼant tuʼn Jesús tuʼnju kʼujlaʼntoq Jehová tuʼn?

⁵ Tej chʼixtoq tkubʼ bʼyoʼn Jesús kyuʼn aj qʼoj tiʼj, xi tqʼamaʼn jlu kye t-xnaqʼtzbʼen: «Il tiʼj tuʼn tel kynikʼ kykyaqil xjal tiʼj qa kʼujlaʼn Nmane wuʼne, ex in nbʼinchaʼne ik tzaʼnx tzaj tmaʼn Nmane weye» (Juan 14:31). Tuʼnju kʼujlaʼntoq Jehová tuʼn Jesús, ten tipumal tuʼn tikʼx nya bʼaʼn tuʼn. Ax ikx qe, jaku ten qipumal tuʼn tikʼx nya bʼaʼn quʼn qa ma tzʼok qkʼujlaʼn Jehová.

6. Ik tzeʼn in tzaj tqʼamaʼn Romanos 5:3 a 5, ¿tiʼ in kubʼ qnaʼn aj qel ikʼun?

⁶ Tuʼnju kʼujlaʼn Jehová kyuʼn tmajen, o tzʼonin jlu kyiʼj tuʼn tikʼx ikʼbʼil kyuʼn. Jun techel, tej kyxi qʼiʼn apóstol kywitz aj sanjelal kye aj Judiy ex tej t-xi qʼamaʼn kye tuʼn miʼn kypakbʼan, onin kykʼujlabʼil at tiʼj Dios tuʼn t-xi kyqʼamaʼn jlu: «Tnejel ilxix tiʼj tuʼn t-xi qnimane Dios, ex mya qe xjal» (Hech. 5:29; 1 Juan 5:3). Ax ikx, in nonin kykʼujlabʼil erman at tiʼj Jehová toj ambʼil jaʼlo tuʼn kukx kyajbʼen te aj kyel ikʼun kyuʼn aj kawil ex aj tok bʼinchaʼn nya bʼaʼn kyiʼj. Aj qel ikʼun kyuʼn xjal, mintiʼ in tzaj bʼaj qkʼuʼj, sino in qo tzalaj (Hech. 5:41; kjawil uʼjit Romanos 5:3-5).

7. ¿Tiʼ qmod kbʼel qyekʼin aj qel ikʼun kyuʼn toj qja?

⁷ Aj qel ikʼun kyuʼn toj qja, bʼalo mas kwest jaku tzikʼx jlu quʼn. Aj tok kykeʼyin qa qaj tuʼn tel qnikʼ tiʼj Jehová, jaku kubʼ kyximen qa otoq qo kubʼ sbʼuʼn moqa otoq qo el locx (mojbʼanka tukʼil Marcos 3:21). Axpe ikx jaku tzʼok kybʼinchaʼn nya bʼaʼn qiʼj. Pero mintiʼ in qo jaw labʼin tiʼj jlu tuʼnju tqʼama Jesús jlu: «Qe aj qʼoj tiʼj xjal, ax qeju ateʼ tuj tja» (Mat. 10:36). Noq tiʼxku kyximbʼetz toj qja at qiʼj, mintiʼ in che el qikʼun. ¿Tiquʼn? Tuʼnju qa mas in nel qnikʼ tiʼj Jehová, mas in che ok qkʼujlaʼn txqantl (Mat. 22:37-39). Noqtzun tuʼnj, mlayx txi qqʼoʼn ambʼil tuʼn miʼn t-xi qnimen qe tkawbʼil Jehová noq tuʼn ttzalaj jun xjal quʼn.

8, 9. ¿Tiʼ onin tiʼj jun ermana tuʼn tikʼx ikʼbʼil tuʼn?

⁸ Mintiʼ kubʼ numj Georgina, aju ma qo yolin tiʼj toj tnejel taqikʼ, maske el ikʼun tuʼn ttxuʼ. Tqʼama jlu: «Qkabʼile xi tzyet tuʼn qxnaqʼtzane tiʼj Tyol Dios kyukʼil testigos de Jehová. Pero tej tikʼ qaq xjaw, kubʼ nximane tuʼn nxiʼye kyoj chmabʼil, atzunte ntxuʼye chʼexpaj tmod. El nnikʼe  tiʼj qa in yolintoq kyukʼil apóstata ex ajbʼen kyximbʼetz tuʼn tej tyolin wukʼile. Ax ikx ok ten yasil wiʼje, bʼaj tlachʼuʼn nwiʼye, kubʼ tjatzʼoʼn nqule ex i ex t-xoʼn qe wuʼje toj tzʼis. Tej njapune twi 15 abʼqʼi, jaw aʼ nwiʼye. Ok tilil tuʼn ntxuʼye tuʼn miʼn wajbʼene te Jehová, tuʼntzunju in xi tsamaʼne toj jun tja xnaqʼtzbʼil jatumel in xi qʼoʼn onbʼil kye kuʼxun tuʼn tchʼexpaj kyximbʼetz. Tej npone atz, ateʼ junjun kuʼxun in najbʼen droga kyuʼn ex in kubʼtoq kybʼinchaʼn junjuntl nya bʼaʼn. Mas kwest tuʼn tikʼx ikʼbʼil quʼn qa atz tzajni tukʼil jun toj qja».

⁹ Tzaj tqʼamaʼn Georgina tiʼ onin tiʼj tuʼn tikʼx ikʼbʼil tuʼn: «Tej tok meltzʼaj ntxuʼye wiʼje, atzun qʼij kubʼaj tuʼn wuʼjine tiʼj tkyaqil Tyol Dios. Otoq tzʼok qeʼ nkʼuʼje tiʼj qa otoq kanet axix tok wuʼne ex kubʼ nnaʼne qa atine ttxlaj Jehová. Kukx in naʼne Dios te ex tzaj tbʼiʼn aju xi nqanine te. Tej wokx jupuʼne toj tja xnaqʼtzbʼil, tzaj tqʼoʼn jun ermana txokbʼil wiʼje tuʼn nxiʼye tja, ex jaw quʼjine Tyol Dios. Tej wok weʼye twitz nya bʼaʼn lu, kukx tzaj qʼuqbʼaʼn nkʼuʼje kyuʼn erman ex in ok qʼoʼne kyuʼn ik tzeʼn qe toj kyja. El nnikʼe tiʼj qa mas nim tipumal Jehová at twitz alkyexku aj qʼoj».

10. ¿Tiʼ jaku tzʼok qeʼ qkʼuʼj tiʼj?

¹⁰ Kubʼ ttzʼibʼin apóstol Pablo jlu: «Mi aʼl jun bʼaʼn tel paʼnte qe tiʼj tkʼujlalil Dios; [...] aju ma tzaj qʼoʼn qe tuʼn Jesucrist aju Qajaw» (Rom. 8:38, 39). Maske jaku tzʼok bʼinchan nya bʼaʼn qiʼj, mlayx qo kyaj tzaqpiʼn tuʼn Jehová. Kukx tzul tqʼoʼn qipumal ex qʼuqbʼil qkʼuʼj. Ex ik tzeʼn bʼaj tiʼj Georgina, kʼonil qiʼj aj kyajbʼen erman tuʼn.

11. Tej tkubʼ kyyekʼin t-xnaqʼtzbʼen Jesús kykʼujlabʼil kyxolx ik tzeʼn in tzaj qʼamaʼn toj Juan 15:12 ex 13, ¿tzeʼn onin jlu kyiʼj? Qʼamantza jun techel.

¹¹ Tej chʼixtoq tkubʼ bʼyoʼn Jesús, xi tnaʼn kye t-xnaqʼtzbʼen tuʼn kukx tok kykʼujlan kyibʼ (kjawil uʼjit Juan 15:12, 13). Ojtzqiʼntoq tuʼn Jesús qa kʼoniltoq jlu kyiʼj tuʼn kukx kyten junx ex tuʼn tikʼx ikʼbʼil kyuʼn. Qo ximen tiʼjju bʼaj kyiʼj okslal te Tesalónica, i el ikʼun atxix tej t-xi tzyet tuʼn tten kʼloj okslal. Pero kubʼ kyqʼoʼn jun tbʼanel techel kywitz txqantl tej tkubʼ kyyekʼin kykʼujlabʼil kyxolx ex ikʼx ikʼbʼil kyuʼn (1 Tes. 1:3, 6, 7). Maske ikju, xi tqʼamaʼn Pablo qe yol lu kye: «Qo kubʼsale kywitze, erman, kukx tuʼn tchʼiy kykʼujlalile»  (1 Tes. 4:9, 10). Kʼoniltoq kʼujlabʼil kyiʼj tuʼn kyonin ex tuʼn t-xi kyqʼuqbʼaʼn kykʼuʼj qeju mintiʼ kyipumal (1 Tes. 5:14). Xi kybʼiʼn okslal te Tesalónica aju xi tqʼamaʼn Pablo kye. Ex tej tikʼ jun abʼqʼi, xi ttzʼibʼin Pablo jlu kye toj tkabʼin tuʼj: «Kykyaqile kukx tchʼiy tkʼujlalil teyle junjun kyxolxe» (2 Tes. 1:3-5). Onin kʼujlabʼil kubʼ kyyekʼin kyxolx tuʼn tikʼx nya bʼaʼn ex ikʼbʼil kyuʼn.

12. ¿Tzeʼn kubʼ kyyekʼin erman kʼujlabʼil kyxolx tej ttzaj qʼoj toj jun tnam?

¹² Qo xnaqʼtzan tiʼjju bʼaj tiʼj Danilo, aju ma qo yolin tiʼj toj tnejel taqikʼ, tukʼil t-xuʼjil. Tej ttzaj nya bʼaʼn toj tnam jatumel in che anqʼintoq tuʼn tpaj qʼoj, kukx ok tilil kyuʼn tuʼn kyxiʼ kyoj chmabʼil, tuʼn kypakbʼan ex tuʼn t-xi kyqʼoʼn chʼin kywa erman. Jun qʼij, e pon soldad tja Danilo ex qʼiʼntoq pistola kyuʼn. Tqʼama Danilo jlu: «Tzaj kyqʼamaʼn weye tuʼn tkyaj nkoline wokslabʼile. Tuʼnju mintiʼ bʼant jlu wuʼne, in nok bʼyoʼne kyuʼn. Ax ikx tzaj kydispararin, pero noq ex bala tibʼaj nwiʼye. Bʼant jlu kyuʼn noq tuʼn ntzaj xobʼe. Tej naʼmxtoq kyikʼ bʼet, kyqʼama qa tuʼn kymeltzʼaj tuʼn ttzaj kyviolarin nxuʼjile. Tej tbʼaj jlu, jun rat o xi samaʼne toj tren kyuʼn erman toj juntl tnam. Mlayx tzikʼ tnaʼl wuʼne tej tkubʼ kyyekʼin erman kykʼujlabʼil qiʼje. Tej qpone toj juntl tnam, tzaj kyqʼoʼn erman qwaye, e onin wiʼje tuʼn tkanet jun waqʼune ex jun qjaye. Noq tuʼn jlu, bʼant tuʼn qonine kyiʼj junjuntl erman e pon klol kyibʼ tuʼn tpaj qʼoj». Aj tok qbʼiʼn jlu, in tzaj tyekʼin qa jaku tzikʼx ikʼbʼil quʼn noq tuʼnju kʼujlabʼil in kubʼ qyekʼin qxolx.

13. ¿Tzeʼn in nonin xewbʼaj xjan qiʼj tuʼn kukx qajbʼen te Jehová maske in qo el ikʼun?

¹³ Tqʼama Jesús qa il tiʼj tuʼn tkubʼ qyekʼin qkʼujlabʼil kyiʼj aj qʼoj (Mat. 5:44, 45). Kwest tuʼn tbʼant jlu quʼn, pero jaku bʼant noq tuʼn tonbʼil xewbʼaj xjan. Ateʼ junjun mod in tqʼoʼn xewbʼaj xjan jaku che onin qiʼj tuʼn tikʼx ikʼbʼil quʼn, ik tzeʼn kʼujlabʼil, tbʼanel qmod, qpasens, tuʼn qok te mans ex tuʼn qjakʼunte qibʼ (Gál. 5:22, 23). Ateʼ junjun xjal o chʼexpaj kymod noq tuʼnju kubʼ tyekʼin kyxuʼjil, kychmil, kykʼwal moqa jun kyvesin qe tbʼanel mod lu. Axpe ikx ateʼ junjun o che ok te testigo de Jehová. Tuʼntzunju, qa in qo el  ikʼun kyuʼn xjal noq tuʼnju nimen quʼn ex kwest tuʼn kyok qkʼujlaʼn, qqaninx xewbʼaj xjan te Jehová (Luc. 11:13). Qʼuqli qkʼuʼj tiʼj qa mas tbʼanel tuʼn t-xi qbʼinchaʼn qe tiʼchaq ik tzeʼn taj Jehová (Prov. 3:5-7).

14, 15. ¿Tzeʼn onin Romanos 12:17 a 21 tiʼj jun ermana tuʼn tkubʼ tyekʼin tkʼujlabʼil tiʼj tchmil maske ok tbʼinchaʼn nya bʼaʼn tiʼj?

¹⁴ Qbʼinx aju ikʼ tiʼj Yasmín, aju in nanqʼin atz Oriente Medio. Tej tok te testigo de Jehová, kubʼ t-ximen tchmil qa otoq sbʼun tiʼj ex ok tilil tuʼn tuʼn tkyaj tkolin Yasmín tokslabʼil. Ok ten yasil tiʼj ex xi tqʼamaʼn kye toj tja, te jun nejenel kye okslabʼil ex te jun chman tuʼntzun t-xi kyqʼamaʼn qa tajtoq Yasmín tuʼn ttzaj nya bʼaʼn toj kyja. Axpe ikx pon tchmil Yasmín toj jun chmabʼil ex ok ten qʼamalte nya bʼaʼn yol kye erman. Nim maj oqʼ Yasmín tuʼnju ok bʼinchaʼn nya bʼaʼn tiʼj tuʼn tchmil.

¹⁵ Xi qʼuqbʼaʼn tkʼuʼj Yasmín kyuʼn erman kyoj chmabʼil. Ax ikx xi kyqʼamaʼn ansyan te qa bʼaʼn tuʼn tok lepeʼ kyiʼj nabʼil in tzaj qʼamaʼn toj Romanos 12:17 a 21 (uʼjinktza). Tqʼama Yasmín jlu: «Kwest xi nbʼinchaʼne aju in tzaj tqʼamaʼn Tyol Dios, pero xi nqanine onbʼil te Jehová ex ok tilil wuʼne. Tej tbʼaj ttzʼilsaʼn nchmile piso toj cocin, in bʼajtoq nsaqsaʼne, tej tok ten yasil wiʼje, mintiʼ tzaj nqʼoje ex tej ttzaj yabʼil tiʼj, ok nxqʼuqine».

16, 17. ¿Tiʼ xnaqʼtzbʼil jaku tzʼel qiʼn tiʼjju bʼaj tiʼj Yasmín?

¹⁶ Tqʼama Yasmín qa onin tkʼujlabʼil kubʼ tyekʼin tiʼj tchmil. Tqʼama jlu: «Ok qeʼ tkʼuʼj nchmile wiʼje tuʼnju mintiʼ in xi nqʼamaʼne jun nya ax tok yol. Ok tqʼoʼn twiʼ tiʼj nyole tej qyoline tiʼj okslabʼil ex kubʼ t-ximen tuʼn tten mujbʼabʼil toj qjaye. Axpe ikx in tzaj tqʼamaʼn weʼye qa bʼaʼn tuʼn nxiʼye kyoj chmabʼil. Mas at mujbʼabʼil qxole ex in qo tzalaje tuʼn jlu. In kubʼ nximane qa kpol jun qʼij tuʼn tok te ajbʼel te Jehová ex junx jaku qo tzalaje tukʼil».

¹⁷ Aju bʼaj tiʼj Yasmín in tzaj tyekʼin qa «tkyaqil nnikʼx tuʼn» kʼujlabʼil, qa «tkyaqil ayoʼn tuʼn, ex at tpasens tuj tkyaqil» (1 Cor. 13:4, 7). At tipumal ikʼbʼil, pero mas nim tipumal kʼujlabʼil at. Jaku tzaj qbʼis aj qel ikʼun, atzunte kʼujlabʼil jaku chʼexpaj tanmi jun xjal tuʼn. In tzalaj Jehová aj tkubʼ qyekʼin qkʼujlabʼil. Maske kukx in qo el ikʼun kyuʼn xjal, atzun qe kukx in qo tzalaj. Qo xnaqʼtzan tiʼj tiquʼn.

18. ¿Tiquʼn jaku qo tzalaj maske in qo el ikʼun?

¹⁸ Tqʼama Jesús jlu: «At tzalajbʼil kyeye ok kyel ikʼune kyuʼn xjal» (Luc. 6:22). Mintiʼ in qo jyon tumel tuʼn qel ikʼun kyuʼn xjal moqa tuʼn tok bʼinchaʼn nya bʼaʼn qiʼj. Qa ikju, ¿tiquʼn jaku qo tzalaj aj qel ikʼun? Qo xnaqʼtzan tiʼj oxe tiquʼn. Tnejel, tuʼnju qa ma tzikʼx ikʼbʼil quʼn in tzalaj Jehová qiʼj (1 Ped. 4:13, 14). Tkabʼin, mas in chʼiy qʼuqbʼil qkʼuʼj (1 Ped. 1:7). Ex toxin, in nikʼx ikʼbʼil quʼn tuʼnju tzul tqʼoʼn Jehová qchwinqlal te jumajx (Rom. 2:6, 7).

19. ¿Tiquʼn kukx e tzalaj apóstol maske e bʼaj kʼixbʼisaʼn?

¹⁹ Tej otoq jaw anqʼin Jesús, kubʼ kynaʼn t-apóstol aju tzalajbʼil otoq yolin tiʼj kyukʼil. Maske otoq che bʼaj kʼixbʼisaʼn ex otoq txi qʼamaʼn kye tuʼn miʼn kypakbʼan, kubʼ kynaʼn tzalajbʼil «tuʼnju bʼaʼn ela tuj twitz Dios tuʼn tkubʼ kychʼixwi kywitz xjal, noq tuʼn tlaj okslal qe tiʼj Jesús» (Hech. 5:40-42). Mas ok kykʼujlaʼn Jesús twitzju tuʼn kytzaj xobʼ kyuʼn aj qʼoj. Ex kubʼ kyyekʼin kʼujlabʼil lu tuʼnju «mintiʼ xi kykolin tuʼn t-xi kyqʼoʼn xnaqʼtzbʼil» kye xjal. Toj ambʼil jaʼlo, nim erman in nok tilil kyuʼn tuʼn kyajbʼen te Jehová maske in che el ikʼun. Ojtzqiʼn kyuʼn qa mlay tzikʼ tnaʼl kyaqʼunbʼen tuʼn Jehová ex aju kykʼujlabʼil in kubʼ kyyekʼin tiʼj tbʼi (Heb. 6:10).

20. ¿Tiʼ kʼelel qnikʼ tiʼj toj juntl xnaqʼtzbʼil?

²⁰ Kukx qo elel ikʼun kyuʼn xjal tzmaxi aj tul Tkawbʼil Jehová (Juan 15:19). Pero mintiʼ tuʼn qtzaj xobʼ. Toj juntl xnaqʼtzbʼil, kʼelel qnikʼ tiʼj qa in tzaj tqʼoʼn Jehová kyipumal tmajen ex in xqʼuqin kyiʼj (2 Tes. 3:3). Tuʼntzunju, kukx qkʼujlam Jehová, qe erman, axpe ikx qeju aj qʼoj qiʼj. Qa ma bʼant jlu quʼn, ktel mujbʼabʼil qxol, kchʼiyel qokslabʼil, kjawil qnimsaʼn Jehová ex kbʼel qyekʼin qa mas nim tipumal kʼujlabʼil at twitz ikʼbʼil.