1, 2. ¿Alkyeqe jaku che onin tiʼj jun xjal tuʼn tjaw aʼ twiʼ?

TQʼAMA Amy jlu, aju in nanqʼin toj tnam Fiyi: «Ngantoqe aju in neltoq nnikʼe tiʼj toj Tyol Dios». Ex tqʼamatl jlu: «Ojtzqiʼntoq wuʼne qa atzun axix tok, pero mintiʼtoq in che bʼant chʼixpubʼil wuʼne. Tejtzun tok wamiwen wibʼe kyukʼil erman, onin wiʼje tuʼn kybʼant chʼixpubʼil wuʼne ex tuʼn tjaw aʼ nwiʼye». Aju bʼaj tiʼj Amy in tzaj tyekʼin jun xnaqʼtzbʼil nim toklen qe. Jaku chʼiy jun xjal toj tokslabʼil ex jaku jaw aʼ twiʼ qa ma che onin kykyaqil erman tiʼj.

² Kykyaqilx erman jaku che onin tuʼn tchʼiy jun kʼloj okslal (Efes. 4:16). In tzaj tqʼamaʼn Leilani jlu, jun precursora in najbʼen atz Vanuatu: «Ateʼ junjun xjal in tzaj kyqʼamaʼn qa il tiʼj tuʼn tonin jun tnam tuʼn tchʼiy jun kʼwal. In kubʼ nximane qa ax jlu in bʼaj aj qonin tiʼj jun xjal tuʼn tok te t-xnaqʼtzbʼen Jesús. Chʼixmi tkyaqil maj, nim toklen tuʼn kyonin kykyaqil erman tuʼn tok jun xjal te tmajen Jehová». Tuʼn tok tnabʼil jun kʼwal, in che onin toj tja tiʼj, qe tamiw, qe aj xnaqʼtzal, tuʼnju in xi kyqʼamaʼn tbʼanel yol te ex in xi kyqʼoʼn xnaqʼtzbʼil te. Ax jlu jaku bʼant kyuʼn erman aj kyonin tiʼj jun xjal tuʼn tjaw aʼ twiʼ, jaku txi kyqʼoʼn tbʼanel tconsej, jaku txi kyqʼamaʼn tbʼanel yol te ex jaku kubʼ kyqʼoʼn tbʼanel techel twitz (Prov. 15:22).

3. ¿Tiʼ xnaqʼtzbʼil jaku tzʼel qiʼn tiʼjju in tzaj tqʼamaʼn Ana, Dorín ex Leilani?

³ Qa in xi qqʼoʼn xnaqʼtzbʼil te jun xjal, ¿tiquʼn bʼaʼn tuʼn t-xi qqʼoʼn ambʼil kye txqantl erman tuʼn kyonin tiʼj xjal? Qbʼinx tiʼ in tzaj tqʼamaʼn Ana, jun precursora especial in najbʼen Moldavia: «Aju xjal in xnaqʼtzan tiʼj Tyol Dios, taj nim onbʼil ex mlay bʼant tkyaqil tuʼn erman in qʼon xnaqʼtzbʼil te».  Ex tojx tnam aju, ax ikx in najbʼen Dorín te precursor especial ex tqʼama jlu: «Aj kyxiʼ erman qʼol xnaqʼtzbʼil qukʼil, chʼixmi tkyaqil maj in xi kyqʼamaʼn jun tbʼanel yol ex in kuʼpin toj tanmi xjal, atzun weye mintiʼ in nul toj nwiʼye». Ex in tzaj tqʼamaʼn Leilani juntl tiquʼn bʼaʼn tuʼn t-xi qqʼoʼn ambʼil kye txqantl tuʼn kyonin. Tqʼama jlu: «Jaku tzʼel tnikʼ xjal in xnaqʼtzan tiʼj Tyol Dios qa atzun ttnam Jehová jlu tuʼnju in kubʼ kyyekʼin erman kykʼujlabʼil tiʼj» (Juan 13:35).

4. ¿Tiʼ kʼelel qnikʼ tiʼj toj xnaqʼtzbʼil lu?

⁴ Bʼalo jaku kubʼ qxjelin jlu: «¿Tzeʼn jaku chin onine tiʼj jun xjal in xnaqʼtzan tiʼj Tyol Dios, pero junxitl erman in qʼon xnaqʼtzbʼil te?». Toj xnaqʼtzbʼil lu, kʼelel qnikʼ tiʼj tiʼ jaku bʼant quʼn aj qxiʼ qʼol xnaqʼtzbʼil tukʼil juntl erman ex tiʼ jaku bʼant quʼn aj tpon xjal toj chmabʼil. Ax ikx, kʼelel qnikʼ tiʼj tzeʼn jaku che onin ansyan tiʼj jun xjal in xnaqʼtzan tiʼj Tyol Dios tuʼn tjaw aʼ twiʼ.

5. ¿Tiʼ in bʼant quʼn aj qxiʼ tukʼil jun erman qʼol xnaqʼtzbʼil?

⁵ Aju at mas toklen tuʼn tonin tiʼj xjal tuʼn tel tnikʼ tiʼj Tyol Dios, a erman in qʼon xnaqʼtzbʼil te. Qa ma tzaj tqʼoʼn erman txokbʼil qiʼj tuʼn qxiʼ tukʼil qʼol xnaqʼtzbʼil, bʼaʼn tuʼn ttzaj qnaʼn qa oʼkx jaku qo onin tiʼj (Ecl. 4:9, 10). Qa ikju, ¿tiʼtzun kbʼantel quʼn tuʼn t-xi qqʼoʼn jun tbʼanel onbʼil?

6. ¿Tzeʼn jaku txi qbʼiʼn nabʼil in tzaj tqʼoʼn Proverbios 20:18 aj qxiʼ tukʼil jun erman qʼol xnaqʼtzbʼil?

⁶ Bʼaʼn tuʼn tkubʼ qbʼinchaʼn qten tiʼj xnaqʼtzbʼil. Tnejel, jaku txi qqanin junjun tqanil tiʼj xjal te erman in qʼon xnaqʼtzbʼil te (kjawil uʼjit Proverbios 20:18). Jaku txi qqanin te tiʼ in nikʼ toj tanqʼibʼil xjal, alkye xnaqʼtzbʼil che yolil tiʼj ex alkye xnaqʼtzbʼil taj erman tuʼn tel tnikʼ xjal tiʼj. Ax ikx jaku txi qqanin te erman qa at jun tiʼ mintiʼ tuʼn t-xi qqʼamaʼn moqa mintiʼ tuʼn tbʼant quʼn. Ex jaku txi qqanin te tzeʼn jaku qo onin tiʼj xjal tuʼn tchʼiy toj tokslabʼil. Ax tok, mlay tzaj tqʼamaʼn erman tkyaqil tqanil tiʼj xjal, pero qqʼonk qwiʼ tiʼjju tzul tqʼamaʼn. Atzun jlu in bʼant tuʼn jun misionera Joy tbʼi aj t-xiʼ jun erman qʼol xnaqʼtzbʼil tukʼil. Tqʼama jlu: «In nonin jlu tiʼj erman in xiʼ qʼol xnaqʼtzbʼil wukʼile ex ojtzqiʼn tuʼn tiʼ tuʼn t-xi tqʼamaʼn».

7. ¿Tiquʼn nim toklen tuʼn tbʼaj qbʼinchaʼn qten?

⁷ Qa ma tzaj tqʼoʼn jun erman txokbʼil qiʼj tuʼn qxiʼ qʼol xnaqʼtzbʼil tukʼil, tbʼanel qa ma bʼaj qbʼinchaʼn qten tiʼj xnaqʼtzbʼil (Esd. 7:10). In tzaj tqʼamaʼn Dorín jlu, aju ma qo yolin tiʼj toj taqikʼ oxe: «In chin tzalaje tiʼj wukʼile qa otoq bʼaj tbʼinchaʼn tten tiʼj xnaqʼtzbʼil tuʼnju jaku tzʼonin wiʼje». Qa kykabʼil in bʼaj kybʼinchaʼn kyten  tiʼj xnaqʼtzbʼil, jaku kubʼ kyqʼoʼn jun tbʼanel techel twitz xjal in xnaqʼtzan tiʼj Tyol Dios. Qatzun mintiʼ ma ten ambʼil qiʼj tuʼn tbʼaj qbʼinchaʼnxix qten tiʼj xnaqʼtzbʼil, qpaʼmil chʼin ambʼil tuʼn tel qnikʼ tiʼj alkyeqe xnaqʼtzbʼil mas nim kyoklen.

8. Aj qxiʼ tukʼil jun erman qʼol xnaqʼtzbʼil, ¿tiʼ kʼonil qiʼj tuʼn tel qnikʼ tiʼj tiʼ kxel qqʼamaʼn toj qnaʼj Dios?

⁸ Nim toklen naʼj Dios aj qqʼon xnaqʼtzbʼil te jun xjal. Tuʼntzunju, bʼaʼn tuʼn qximen tiʼj tiʼ kxel qqʼamaʼn qa ma tzaj qanin qe tuʼn tok qqʼoʼn naʼj Dios, iktzun tten ya ojtzqiʼn quʼn tiʼ kxel qqʼamaʼn (Sal. 141:2). Kukx in tzaj tnaʼn Hanae te Japón qe tnaʼj Dios jun ermana pon junjun maj tukʼil ermana in qʼontoq xnaqʼtzbʼil te. Tqʼama jlu: «Ok nkeʼyine qa attoq jun tbʼanel tamiwbʼil ermana tukʼil Jehová, ex wajtoqe tuʼn woke ik tzeʼn te. Ex tej t-xi tqʼamaʼn nbʼiye toj naʼj Dios, kubʼ nnaʼne qa kʼujlaʼn qine tuʼn».

9. Ik tzeʼn in tzaj tqʼamaʼn Santiago 1:19, ¿tzeʼn jaku qo onin tiʼj erman in qʼon xnaqʼtzbʼil?

⁹ Qo onin tiʼj erman in qʼon xnaqʼtzbʼil. In tzaj tqʼamaʼn Omamuyovbi jlu, jun precursora especial in najbʼen atz Nigeria: «Nim toklen tuʼn tok qqʼoʼn qwiʼ tiʼj erman in qʼon xnaqʼtzbʼil. Ax ikx jaku txi qqʼoʼn jun qyol, pero mintiʼ tuʼn qyolin nim. Ojtzqiʼn quʼn qa mintiʼ qoklen tuʼn t-xi qchikʼbʼaʼn xnaqʼtzbʼil, sino a erman in qʼon xnaqʼtzbʼil». Qa ikju, ¿toj alkye ambʼil bʼaʼn tuʼn qyolin ex tiʼ kxel qqʼamaʼn? (Prov. 25:11). Qqʼonk qwiʼ tiʼjju in yolin xjal tiʼj tukʼil erman in qʼon xnaqʼtzbʼil (kjawil uʼjit Santiago 1:19). Iktzun tten jaku txi qqʼoʼn jun onbʼil qa ma tzaj qanin qe. Pero mintiʼ tuʼn qjaw yolin akux in xi tchikʼbʼaʼn erman xnaqʼtzbʼil, mintiʼ tuʼn qyolin nim ex mintiʼ tuʼn t-xi qqʼamaʼn junxitl xnaqʼtzbʼil. Aj t-xi qqʼoʼn jun qyol, jaku tzʼajbʼen jun techel quʼn moqa jaku txi qqanin jun xjel te xjal tuʼntzun tel tnikʼ tiʼj xnaqʼtzbʼil nim toklen. At maj jaku kubʼ qximen qa mintiʼ jun tiʼ tuʼn t-xi qqʼamaʼn, pero jaku qo onin tiʼj xjal tuʼn tchʼiy toj tokslabʼil qa ma kubʼ qyekʼin qkʼujlabʼil tiʼj ex qa ma txi qqʼamaʼn tbʼanel yol te.

10. ¿Tzeʼn jaku tzʼonin aju o tzikʼ qiʼj tiʼj jun xjal in xnaqʼtzan tiʼj Tyol Dios?

¹⁰ Qqʼamanx te xjal aju o tzikʼ toj qanqʼibʼil. Qa jaku bʼant, jaku txi qqʼamaʼn te xjal tzeʼn el qnikʼ tiʼj axix tok, tzeʼn o qo ex twitz jun nya bʼaʼn ex tzeʼn o tzʼonin Jehová qiʼj (Sal. 78:4, 7). Bʼalo a jlu taj xjal tuʼn tok tbʼiʼn. Ex jaku tzʼonin tiʼj tuʼn tchʼiy qʼuqbʼil tkʼuʼj, tuʼn tkubʼ t-ximen tuʼn tjaw aʼ twiʼ ex tuʼn tex twitz nya bʼaʼn (1 Ped. 5:9). In tzaj tnaʼn ermano Gabriel, jun precursor in nanqʼin atz Brasil, tiʼ onin tiʼj tej t-xi qʼoʼn xnaqʼtzbʼil te. Tqʼama jlu: «Tej ttzaj kyqʼamaʼn erman weye tiʼ nya bʼaʼn e ok weʼ twitz, el nnikʼe tiʼj qa ojtzqiʼn tuʼn Jehová  alkyeqe nya bʼaʼn in qo ok weʼ twitz. Qa i ex erman kywitz nya bʼaʼn, ax ikx weye jakutoq chin exe kywitz».

11, 12. ¿Tiquʼn nim toklen tuʼn tkubʼ qyekʼin tbʼanel qmod kyiʼj xjal in che pon kyoj chmabʼil?

¹¹ Tuʼn tkubʼ t-ximen jun xjal tuʼn tjaw aʼ twiʼ, il tiʼj tuʼn tbʼet kyoj chmabʼil ex tuʼn tok tbʼiʼn xnaqʼtzbʼil (Heb. 10:24, 25). Bʼalo in pon jun xjal tnejel maj toj chmabʼil tuʼnju in xi qʼoʼn txokbʼil tiʼj tuʼn erman in qʼon xnaqʼtzbʼil te. Pero qkyaqilx jaku txi qqʼoʼn txokbʼil tiʼj tuʼn kukx tpon, ¿tzeʼn jaku bʼant quʼn?

¹² Qyekʼinx te xjal qa kʼujlaʼn quʼn (Rom. 15:7). Qa ma kubʼ qyekʼin tbʼanel qmod tukʼil xjal aj tpon toj Ja te Chmabʼil, bʼalo jaku tzʼonin jlu tiʼj tuʼn kukx tpon. Bʼaʼn tuʼn tkubʼ qyekʼin qkʼujlabʼil tiʼj ex qqʼamanx kye txqantl erman qa in xnaqʼtzan tiʼj Tyol Dios, pero mintiʼ tuʼn ttzaj choʼn twiʼ quʼn. Miʼn kubʼ qximen qa ya at jun erman in nonin tiʼj. Bʼalo naʼmx tpon erman in qʼon xnaqʼtzbʼil te moqa in bʼant junjuntl tiʼchaq tuʼn. Qqʼonk qwiʼ tiʼjju in tzaj tqʼamaʼn ex qyekʼinx te qa in qo ximen tiʼj. ¿Tzeʼn jaku tzʼonin jlu tiʼj? Qqʼonk qwiʼ tiʼjju in tzaj tqʼamaʼn Dimitri, aju kʼitzqeku tjawlen aʼ twiʼ ex ya o tzʼok te onil kye ansyan. In tzaj tqʼamaʼn tiʼ bʼaj tej tpon tnejel maj kyoj chmabʼil: «In kyaj weʼye tiʼjxi Ja te Chmabʼil ex in chin xobʼtoqe. Pero til jun erman qine ex junx in nokxe tukʼil toj Ja te Chmabʼil. In jaw labʼine tuʼnju nim erman e pon qʼolbʼel weye. Tuʼn jlu nim in jaw tzalaje ex wajtoqe tuʼn tok chmabʼil tkyaqil qʼij. Naʼmxtoq tkubʼ nnaʼne jlu jun maj».

13. ¿Tzeʼn jaku tzʼonin qmod kyiʼj xjal in che xnaqʼtzan tiʼj Tyol Dios?

¹³ Qqʼonku jun tbʼanel techel kywitz. Jaku tzʼonin qmod tiʼj jun xjal tuʼn tel tnikʼ tiʼj qa o kanet axix tok tuʼn (Mat. 5:16). In tzaj tqʼamaʼn Vitali jlu, jun precursor in nanqʼin atz Moldavia: «El nnikʼe tiʼj qa aʼye testigo de Jehová axix tok okslal tej tok nkeʼyine tbʼanel kyanqʼibʼil ex tbʼanel kymod in kubʼ kyyekʼin kyxolx».

14. ¿Tzeʼn jaku tzʼonin techel in kubʼ qqʼoʼn tiʼj jun xjal tuʼn tchʼiy toj tokslabʼil?

¹⁴ Qa taj jun xjal tuʼn tjaw aʼ twiʼ, nim toklen tuʼn tkubʼ tanqʼin aju in nel tnikʼ tiʼj. Noqtzun tuʼnj, at maj kwest tuʼn tbʼant jlu tuʼn. Pero aj tel tnikʼ tiʼj qa in che onin nabʼil ateʼ toj Tyol Dios qiʼj, jakulo kubʼ t-ximen tuʼn t-xi tbʼinchaʼn ik tzeʼn qe (1 Cor. 11:1). In tzaj tqʼamaʼn Hanae jlu aju ma qo yolin tiʼj toj taqikʼ 8: «In kubʼtoq kyanqʼin erman qe xnaqʼtzbʼil in nel nnikʼe tiʼj toj Tyol Dios. Tej tok nkeʼyine aju in bʼanttoq kyuʼn, el nnikʼe tiʼj tzeʼn tuʼn wonine kyiʼj txqantl, tzeʼn tuʼn tkubʼ nyekʼine nkʼujlabʼile kyiʼj ex tzeʼn jaku kubʼ nnajsaʼne  kyil. Attoq tbʼanel kyximbʼetz kyiʼj kykyaqil ex wajtoqe tuʼn woke ik tzeʼn kye».

15. Ik tzeʼn in tzaj tqʼamaʼn Proverbios 27:17, ¿tiquʼn bʼaʼn tuʼn tok qamiwen qibʼ kyukʼil xjal in che xnaqʼtzan tiʼj Tyol Dios ex in che pon kyoj chmabʼil?

¹⁵ Bʼaʼn tuʼn tok qamiwen qibʼ tukʼil xjal in xnaqʼtzan tiʼj Tyol Dios. Aj tpon xjal kyoj chmabʼil, bʼaʼn tuʼn tok tilil quʼn tuʼn tkubʼ qyekʼin qa in qo ximen tiʼj (Filip. 2:4). Tuʼn miʼn tkubʼ tnaʼn xjal nya bʼaʼn, jaku qo yolin tukʼil tiʼj aqʼuntl, kyiʼj toj tja moqa tiʼj tzeʼn in nela xnaqʼtzbʼil toj twitz. Qkyaqilx jaku txi qqʼamaʼn jun tbʼanel yol te aj tbʼant jun chʼixpubʼil tuʼn. Iktzun tten jaku qo ok te tamiw ex jaku qo onin tiʼj tuʼn tchʼiy toj tokslabʼil ex tuʼn tjaw aʼ twiʼ (kjawil uʼjit Proverbios 27:17). Ya o tzʼok Hanae te precursora regular ex in tzaj tqʼamaʼn tiʼ kubʼ tnaʼn tej t-xi tzyet tuʼn tbʼet kyoj chmabʼil. Tqʼama jlu: «Tej kykanet wamiwe toj kʼloj okslal, mas wajtoqe tuʼn nxiʼye kyoj chmabʼil. Kukx in chinxe maske otoq chin sikte. Kubʼ nnaʼne tzalajbʼil tej ntene kyukʼil akʼaj wamiwe otoq che kanet ex onin jlu wiʼje tuʼn tel npan wibʼe kyiʼj xjal mintiʼ in che ajbʼen te Jehová. Tuʼnju wajtoqe tuʼn tten jun tbʼanel wamiwbʼile tukʼil Jehová ex kyukʼil erman, kubʼ nximane tuʼn tjaw aʼ nwiʼye».

16. ¿Tiʼ mas jaku bʼant quʼn tuʼn ttzalaj jun xjal in xnaqʼtzan tiʼj Tyol Dios aj tten kyukʼil erman?

¹⁶ Akux in chʼiy xjal toj tokslabʼil, il tiʼj tuʼn tok tilil quʼn tuʼn tkubʼ tnaʼn qa nim toklen toj kʼloj okslal. Jaku bʼant jlu quʼn aj t-xi qqʼoʼn txokbʼil tiʼj tuʼn tpon qja (Heb. 13:2). In tzaj tnaʼn Denís, jun ermano in najbʼen atz Moldavia tiʼ bʼaj tiʼj tej t-xnaqʼtzan tiʼj Tyol Dios. Tqʼama jlu: «Nimku maj tzaj kyqʼoʼn erman txokbʼil wiʼje tukʼil nxuʼjile tuʼn qtene kyukʼil. Tej ttzaj kyqʼamaʼn qeye tzeʼn o tzʼonin Jehová kyiʼj, nim onin jlu qiʼje. Tuʼn jlu, kubʼ qximane tuʼn qajbʼene te Jehová ex el qnikʼe tiʼj qa oktoq qo tzalajele toj qanqʼibʼile qa ma qo ajbʼene te». Aj tok jun xjal te pakbʼal, bʼaʼn tuʼn t-xi qqʼoʼn txokbʼil tiʼj tuʼn tex pakbʼal qukʼil. In tzaj tqʼamaʼn Diego jlu, jun ermano te Brasil: «Tzaj kyqʼoʼn erman txokbʼil wiʼje tuʼn wexe pakbʼal kyukʼil. Onin jlu wiʼje tuʼn kyok wojtzqiʼne. Tuʼn onbʼil tzaj kyqʼoʼn weye, el nnikʼe kyiʼj nim xnaqʼtzbʼil ex tuʼn jlu, mas o chin ok laqʼeʼye ttxlaj Jehová ex Jesús».

17. ¿Tzeʼn jaku che onin ansyan kyiʼj xjal in che xnaqʼtzan tiʼj Tyol Dios?

¹⁷ Tuʼn tel kypaʼn ansyan ambʼil tuʼn kyonin kyiʼj xjal. Aqeye ansyan, qa ma kubʼ kyyekʼine kykʼujlabʼile kyiʼj xjal in che xnaqʼtzan tiʼj Tyol Dios, jaku tzʼonin jlu kyiʼj tuʼn tkubʼ kyximen tuʼn tjaw aʼ kywiʼ. ¿Jakupe tzʼel kypaʼne chʼin ambʼil tuʼn kyyoline kyukʼil aj kypon kyoj chmabʼil?  Kʼelel kynikʼ xjal tiʼj qa in che ximane kyiʼj qa kukx ma tzaj kynaʼne kybʼi ex mas aj in xi kyqʼoʼn jun kyyol kyoj chmabʼil. ¿Jakupe tzʼel kypaʼne ambʼil tuʼn kyxiʼye qʼol xnaqʼtzbʼil tukʼil jun erman? Jaku tzʼonin jlu tiʼj jun xjal, mas twitzju in kubʼ kyximane. In tzaj tqʼamaʼn Jackie jlu, jun precursora in nanqʼin atz Nigeria: «Nim qe xjal in che jaw labʼin aj tok kybʼiʼn qa jun ansyan otoq pon wukʼile qʼol xnaqʼtzbʼil. Tqʼama jun xjal in xnaqʼtzan wukʼile jlu: ‹Mlayx bʼant jlu tuʼn jun pastor toj iglesia tuʼnju oʼkx in cheʼx kyja xjal qʼinun ex qa ma txi chjoʼn twi kykʼuʼj›». Ya in bʼet xjal lu kyoj chmabʼil.

18. ¿Tzeʼn jaku txi kybʼiʼn ansyan nabʼil in tzaj qʼamaʼn toj Hechos 20:28?

¹⁸ Jaku tzʼel kypaʼn ambʼil tuʼn kyonin kyiʼj erman in che qʼon xnaqʼtzbʼil. Aqeye ansyan, o txi qʼoʼn kyoklene tuʼn kyonine kyiʼj erman tuʼn tbʼant-xix kypakbʼan ex kyqʼon xnaqʼtzbʼil (kjawil uʼjit Hechos 20:28). Qa in tzaj salin tiʼj jun erman aj kyxiʼye qʼol xnaqʼtzbʼil tukʼil, kyqʼamanxe te qa jaku txi kyqʼoʼne xnaqʼtzbʼil te xjal. In tzaj tqʼamaʼn Jackie jlu aju ma qo yolin tiʼj toj taqikʼ ma kyaj: «Kukx in tzaj kyqanin ansyan weye kyiʼj xjal in che xnaqʼtzan wukʼile tiʼj Tyol Dios. Aj in chin ok weʼye twitz jun nya bʼaʼn, in tzaj kyqʼoʼn tbʼanel consej weye». Jaku txi kyqʼoʼn ansyan tbʼanel onbʼil kye erman tuʼn kukx kyqʼon xnaqʼtzbʼil ex tuʼn miʼn ttzaj bʼaj kykʼuʼj (1 Tes. 5:11). Tqʼamatl Jackie jlu: «Ngane aj ttzaj kyqʼuqbʼaʼn ansyan nkʼuʼje ex aj ttzaj kyqʼamaʼn weye qa in nok kyqʼoʼn toklen aju in bʼant wuʼne. In nok kyyol ik tzeʼn jun vas cheʼw aʼ tuʼnju in chewix wanmiye tuʼn. In qeʼ nkʼuʼje tuʼn kyyol ex mas in chin tzalaje aj nqʼone xnaqʼtzbʼil» (Prov. 25:25).

19. Maske mintiʼ in qo qʼon xnaqʼtzbʼil te jun xjal, ¿tiquʼn jaku qo tzalaj qkyaqilx?

¹⁹ Maske mintiʼ jun xjal in xnaqʼtzan tiʼj Tyol Dios qukʼil toj ambʼil jaʼlo, jaku qo onin tiʼj jun xjal tuʼn tchʼiy toj tokslabʼil. Nya il tiʼj tuʼn t-xi qqʼamaʼn nim yol, jaku qo onin tiʼj erman in qʼon xnaqʼtzbʼil aj t-xi qqʼamaʼn tbʼanel yol te xjal in xnaqʼtzan. Bʼaʼn tuʼn tok qamiwen qibʼ kyukʼil qeju in che pon kyoj chmabʼil ex qqʼonku jun tbʼanel techel kywitz. Ex jaku che onin ansyan kyiʼj xjal in che xnaqʼtzan tiʼj Tyol Dios qa ma tzʼel kypaʼn ambʼil tuʼn kyyolin kyukʼil. Ax ikx, jaku che onin qa ma txi kyyekʼin kye erman tzeʼn jaku bʼant kyqʼon xnaqʼtzbʼil ex qa ma t-xi kyqʼamaʼn tbʼanel yol kye. In kubʼ qnaʼn nimxix tzalajbʼil aj qonin tiʼj jun xjal tuʼn tok tkʼujlaʼn Jehová ex tuʼn tajbʼen te.