1. ¿Alkyeqe nya bʼaʼn in che ok weʼ tmajen Jehová twitz?

¿ATPE jun nya bʼaʼn in qo ok weʼ twitz toj ambʼil jaʼlo? Bʼalo o tzʼok bʼinchaʼn jun nya bʼaʼn qiʼj tuʼn jun erman (Sant. 3:2). Ex bʼalo in che xmayin qukʼil toj tja xnaqʼtzbʼil moqa toj aqʼuntl qiʼj tuʼnju in qo ajbʼen te Jehová (1 Ped. 4:3, 4). Ax ikx, jaku tzʼok ten jun toj qja qʼamalte qe tuʼn ya miʼn qxiʼ kyoj chmabʼil moqa tuʼn ya miʼn qpakbʼan (Mat. 10:35, 36). Qa in qo ikʼ kyoj nya bʼaʼn ik tzeʼn jlu, jaku tzaj bʼaj qkʼuʼj ex jaku kubʼ qximen tuʼn ya miʼn tok tilil quʼn. Pero jaku tzʼok qeʼ qkʼuʼj tiʼj qa tzul tqʼoʼn Jehová qnabʼil ex qipumal tuʼn qex twitz alkyexku nya bʼaʼn.

2. Ik tzeʼn in tzaj tqʼamaʼn Romanos 15:4, ¿tzeʼn jaku tzʼonin qiʼj qa ma jaw quʼjin Tyol Dios?

² Tzaj tqʼoʼn Jehová ambʼil tuʼn tkyaj tzʼibʼin toj Tyol tzeʼn i ex junjun xjal kywitz nya bʼaʼn. Bʼant jlu tuʼn tuʼntzun tel qiʼn jun xnaqʼtzbʼil kyiʼj. Atzun jlu kyaj ttzʼibʼin apóstol Pablo toj Romanos 15:4 (uʼjinktza). Qa ma che jaw quʼjin txʼolbʼabʼil lu, jaku chewix qanmi kyuʼn ex jaku tzaj kyqʼuqbʼaʼn qkʼuʼj. Pero nya oʼkx tuʼn tjaw quʼjin Tyol Dios, sino bʼaʼn tuʼn t-xi qqʼoʼn ambʼil te tuʼn tchʼexpaj qximbʼetz tuʼn ex tuʼn tpon toj qanmi. Qa qaj onbʼil tuʼn qex twitz jun nya bʼaʼn, jaku bʼant jlu quʼn: Tnejel, qo naʼn Dios, tkabʼin, qo ximen tiʼjju bʼaj, toxin, qo ximen tiʼj tzeʼn jaku tzʼonin qiʼj ex tkyajin, bʼaʼn tuʼn t-xi qbʼinchaʼn. Toj xnaqʼtzbʼil lu, kʼelel qnikʼ tiʼj tiʼ kyxilen kyaje tiʼchaq lu. * Yajxitl, che ajbʼel quʼn tuʼn tel qnikʼ tiʼj kabʼe txʼolbʼabʼil. Jun tiʼj aj kawil David ex juntl tiʼj apóstol Pablo.

3. Naʼmxtoq tjaw quʼjin Tyol Dios, ¿tiʼ kbʼantel quʼn ex tiquʼn?

 ³ Tnejel, qo naʼn Dios. Naʼmxtoq tjaw quʼjin Tyol Dios, qqaninx te Jehová tuʼn tonin qiʼj tuʼn tel qnikʼ tiʼj Tyol. Jun techel, qa in qo jyon tumel tzeʼn tuʼn qex twitz jun nya bʼaʼn, qqaninx te tuʼn tonin qiʼj tuʼn kykanet nabʼil quʼn toj Tyol, aqeju jaku che onin qiʼj (Filip. 4:6, 7; Sant. 1:5).

4. ¿Tiʼ jaku bʼant quʼn tuʼn tonin jun txʼolbʼabʼil qiʼj?

⁴ Tkabʼin, qo ximen tiʼjju bʼaj. Aj tajbʼen qximbʼetz quʼn tuʼn tel qnikʼ tiʼj jun tiʼ, jun oyaj jlu tuʼn Jehová. Tuʼn tonin jun txʼolbʼabʼil qiʼj, qo ximen tiʼjju bʼaj ex qo ximen tiʼj qa qiʼj in bʼaj aju ikʼ tiʼj xjal in yolin Tyol Dios tiʼj. Ex qo ximen tiʼjju ok tkeʼyin ex tiʼjju kubʼ tnaʼn.

5. ¿Tiʼ aju tuʼn qximen ex tiʼ kʼonil qiʼj tuʼn tbʼant quʼn?

⁵ Toxin, qo ximen tiʼj tzeʼn jaku tzʼonin qiʼj. Atz in yolin jlu tiʼjju tuʼn tel qpaʼn ambʼil tuʼn qximen tiʼjju in jaw quʼjin ex tiʼ xnaqʼtzbʼil jaku tzʼel qiʼn tiʼj. In nonin qiʼj tuʼn tel qnikʼ tiʼj tiʼ toklen jun xnaqʼtzbʼil at tukʼil juntl ex tuʼn jlu mas jaku tzʼel qnikʼ tiʼj. Qa ma jaw quʼjin Tyol Dios ex mintiʼ ma qo ximen tiʼj, kʼokel ik tzeʼn aj tok qkeʼyin jun rompecabeza naʼmx tkubʼ bʼinchet. Pero qa ma qo ximen tiʼjju in jaw quʼjin, kʼokel jlu ik tzeʼn aj tbʼaj bʼinchet rompecabeza tuʼnju kʼelel qnikʼ tiʼj. Jun tiʼ jaku tzʼonin qiʼj tuʼn qximen, aju qa ma txi qjyoʼn tzaqʼwebʼil kyiʼj xjel ik tzeʼn jlu: «¿Tiʼ bʼant tuʼn xjal lu tuʼn tex twitz nya bʼaʼn? ¿Tzeʼn onin Jehová tiʼj? ¿Tzeʼn jaku che onin xnaqʼtzbʼil ma tzʼel nnikʼe tiʼj tuʼn kyikʼx nya bʼaʼn wuʼne?».

6. ¿Tiquʼn nim toklen tuʼn tkubʼ qbʼinchaʼn aju in nel qnikʼ tiʼj?

⁶ Tkyajin, bʼaʼn tuʼn t-xi qbʼinchaʼn. Tqʼama Jesús qa in qo ok ik tzeʼn jun xjal in jaw tbʼinchaʼn tja tibʼaj arena qa mintiʼ ma kubʼ qbʼinchaʼn aju in nel qnikʼ tiʼj. Nimxix in naqʼunan xjal, pero mintiʼx tajbʼen. ¿Tiquʼn? Tuʼnju kbʼel xitj tja aj ttzaj jun kyqʼiqʼ jbʼal (Mat. 7:24-27). Chʼixmi axju jaku bʼaj qiʼj aj quʼjin tiʼj Xjan Uʼj, maske in qo naʼn Dios, in qo ximen tiʼjju bʼaj ex in qo ximen tiʼj tzeʼn jaku tzʼonin qiʼj, mlay tzʼajbʼen jlu qa mintiʼ ma kubʼ qbʼinchaʼn. ¿Tiquʼn? Tuʼnju aj kyul nya bʼaʼn, mlay ten qokslabʼil kyuw. Pero qa ma kubʼ qbʼinchaʼn aju in nel qnikʼ tiʼj toj Tyol Dios, kʼonil qiʼj tuʼn qtzalaj, tuʼn tchʼiy qʼuqbʼil qkʼuʼj ex tuʼn tjaw qjyoʼn aju mas bʼaʼn (Is. 48:17, 18). Qbʼinchanku qe kyaje tiʼchaq ma qo yolin tiʼj tuʼntzun tel qnikʼ tiʼj tiʼ xnaqʼtzbʼil jaku tzʼel qiʼn tiʼjju bʼaj tiʼj David.

7. ¿Alkye txʼolbʼabʼil qo yolil tiʼj?

⁷ ¿Ope qo kubʼ sbʼuʼn tuʼn jun toj qja moqa tuʼn jun qamiw? Qa ikju, tbʼanel qa ma qo xnaqʼtzan tiʼj txʼolbʼabʼil in yolin tiʼj Absalón, aju tkʼwal aj kawil David. ¿Tiʼ bʼant tuʼn? Kubʼ tsbʼuʼn tman ex ok tilil tuʼn tuʼn tel tiʼn toklen te aj kawil (2 Sam. 15:5-14, 31; 18:6-14).

8. ¿Tiʼ jaku txi qqanin te Jehová?

⁸ Tnejel, qo naʼn Dios. Naʼmxtoq tjaw quʼjin txʼolbʼabʼil, qqʼamanx te Jehová tiʼxix in kubʼ qnaʼn tuʼnju ma tzʼok bʼinchaʼn nya bʼaʼn qiʼj (Sal. 6:6-9). Tibʼajxi jlu, qqaninx te tuʼn tonin qiʼj tuʼn tel qnikʼ kyiʼj nabʼil jaku che onin qiʼj.

9. ¿Alkye tten jaku tzaj tchikʼbʼaʼna aju bʼaj tiʼj David ex Absalón?

⁹ Tkabʼin, qo ximen tiʼjju bʼaj. Qo ximen tiʼjju in tzaj tqʼamaʼn txʼolbʼabʼil ex qo ximen tiʼj tiʼ kubʼ tnaʼn David tuʼn jlu. Toj  nimku abʼqʼi, ok tilil tuʼn Absalón tuʼn tok kʼujlaʼn kyuʼn xjal (2 Sam. 15:7). Tuʼn tok qʼoʼn Absalón te aj kawil, xi tsamaʼn qe xjal toj tnam Israel tuʼntzun tkubʼ kykʼuʼj xjal kyuʼn. Ax ikx kubʼ tkʼuʼj Ahitofel tuʼn Absalón, aju tamiw David ex qʼol tnabʼil. Ok tqʼon tibʼ Absalón te aj kawil ex xi tqʼamaʼn kye xjal. Ax ikx, ok tilil tuʼn tuʼn ttzyet David ex tuʼn tkubʼ tbʼyoʼn. Bʼalo yabʼtoq taʼ David tej tbʼaj tkyaqil jlu (Sal. 41:1-9). Tej tok tbʼiʼn aju otoq bʼant tuʼn Absalón, ex oq toj tnam Jerusalén. Yajxitl, ok qʼoj kyuʼn tsoldad Absalón kyukʼil qe xjal kukx e ten tukʼil David. Kubʼ kyiʼj soldad e ok meltzʼaj tiʼj David, atzunte Absalón kubʼ bʼyoʼn.

10. ¿Tiʼ jakutoq kubʼ t-ximen aj kawil David?

¹⁰ Atzun jaʼlo, qo ximen tiʼj tiʼ kubʼ tnaʼn David. Kʼujlaʼntoq Absalón tuʼn ex qʼuqlitoq tkʼuʼj tiʼj Ahitofel. Maske ikju, kykabʼil e sbʼun tiʼj. Tzaj nim tbʼis David kyuʼn, axpe ikx, kyajtoq tuʼn tkyim. Jakutoq kubʼ t-ximen David qa ax ikx qe txqantl tamiw otoq tzʼok kymojbʼan kyibʼ tukʼil Absalón ex qa mlaytoq tzʼok qeʼ tkʼuʼj kyiʼj. Ax ikx, jakutoq tzʼok tqʼoʼn twiʼ tiʼj nya bʼaʼn bʼaj ex tuʼn tex oq tjunalx. Tuʼn tkyaqil jlu, jakutoq kubʼ t-ximen tuʼn ya miʼn tok tilil tuʼn. Pero mintiʼ bʼant jlu tuʼn, sino ok tilil tuʼn tuʼn tex twitz nya bʼaʼn. ¿Tiʼ bʼant tuʼn tuʼn tex twitz nya bʼaʼn?

11. ¿Tiʼ bʼant tuʼn David tej tok weʼ twitz nya bʼaʼn?

¹¹ Toxin, qo ximen tiʼj tzeʼn jaku tzʼonin qiʼj. ¿Tiʼ xnaqʼtzbʼil jaku tzʼel qiʼn tiʼj txʼolbʼabʼil lu? Jaku kubʼ qxjelin jlu: «¿Tiʼ bʼant tuʼn David tuʼn tonin tiʼjx?». Mintiʼ xi tqʼoʼn ambʼil tuʼn ttzaj xobʼ nix tuʼn tkubʼ tbʼinchaʼn jun tiʼ nya toj tumel. Aju bʼant tuʼn, naʼn Dios tuʼntzun t-xi tqanin onbʼil te Jehová. Ax ikx xi tqanin onbʼil kye tamiw. Ex tej tkubʼ t-ximen tuʼn tbʼant jun tiʼ tuʼn toj tumel, jun rat naj xi tbʼinchaʼn. Maske tzaj tbʼis, mintiʼ tzaj tqʼoj ex kukx ok qeʼ tkʼuʼj tiʼj Jehová ex kyiʼj tamiw.

12. ¿Tzeʼn onin Jehová tiʼj David?

¹² ¿Tzeʼn onin Jehová tiʼj David? Qa ma qo jyon chʼintl tqanil, kʼelel qnikʼ tiʼj qa tzaj tqʼoʼn Jehová tipumal David tuʼn tikʼx nya bʼaʼn tuʼn (Sal. 3:1-8; qe yol tkubʼ twi capítulo). Tzaj tkʼiwlaʼn Jehová aju bʼant tuʼn David ex onin kyiʼj tamiw tej tok tilil kyuʼn tuʼn kyxqʼuqin tiʼj.

13. ¿Tzeʼn jaku tzʼel qkanoʼn techel kyaj tqʼoʼn David aj tok bʼinchaʼn jun nya bʼaʼn qiʼj? (Mateo 18:15 a 17).

¹³ Tkyajin, bʼaʼn tuʼn t-xi qbʼinchaʼn. Bʼaʼn tuʼn tkubʼ qxjelin jlu: «¿Tzeʼn jaku tzʼel nkanoʼne tiʼj techel kyaj tqʼoʼn David?». Jaku bʼant quʼn qa mintiʼ ma qo ayon nim ambʼil tuʼn tkyaj jun nya bʼaʼn toj ttxolil. Qa jaku bʼant, jaku txi qbʼinchaʼn aju in tzaj tqʼamaʼn Mateo capítulo 18 (kjawil uʼjit Mateo 18:15-17). Pero miʼn txi qbʼinchaʼn jun tiʼ qa naʼmxtoq qximen tiʼj moqa tuʼn qok lepeʼ tiʼjju in kubʼ qnaʼn. Qqaninx te Jehová tuʼn tchewix qkʼuʼj ex tuʼn ttzaj tqʼoʼn qnabʼil tuʼntzun qex twitz nya bʼaʼn. Kukx qeʼk qkʼuʼj kyiʼj qamiw ex miʼn tzʼel qikʼen onbʼil in tzaj kyqʼoʼn qe (Prov. 17:17). Ex aju mas nim toklen, qo lepeʼk kyiʼj nabʼil in tzaj tqʼoʼn Jehová qe toj Tyol (Prov. 3:5, 6).

14. ¿Toj alkye ambʼil jaku tzʼonin qiʼj qa ma jaw quʼjin 2 Timoteo 1:12 a 16 ex 4:6 a 11, ex 17 a 22?

¹⁴ ¿Mintiʼpe in che tzalaj toj qja tuʼnju in qo ajbʼen te Jehová? ¿Moqa in qo anqʼin toj jun tnam jatumel o tzʼel qʼiʼn ambʼil qe tuʼn qajbʼen te Jehová? Qa ikju, jaku tzʼonin qiʼj qa ma jaw quʼjin 2 Timoteo 1:12 a  16 ex 4:6 a 11, ex 17 a 22. * Kubʼ ttzʼibʼin Pablo qe yol lu akux attoq toj cárcel.

15. ¿Tiʼ jaku txi qqanin te Jehová?

¹⁵ Tnejel, qo naʼn Dios. Naʼmxtoq kyjaw quʼjin qe texto lu, qqʼamanx te Jehová tiʼ nya bʼaʼn in qo ok weʼ twitz ex tiʼxix in kubʼ qnaʼn. Qqaninx te Jehová tuʼn tonin qiʼj tuʼn kykanet nabʼil quʼn tiʼjju ikʼ tiʼj apóstol Pablo tuʼntzun tel qnikʼ tiʼj tiʼ jaku bʼant quʼn.

16. ¿Tiʼtoq in bʼaj tiʼj apóstol Pablo?

¹⁶ Tkabʼin, qo ximen tiʼjju bʼaj. Qo ximen tiʼj qa qiʼj bʼaj aju ikʼ tiʼj apóstol Pablo. Tokxtoq toj cárcel toj tnam Roma. Maske otoq ten toj cárcel, toj ambʼil aju ojtzqiʼntoq tuʼn qa kbʼel bʼyoʼn. Otoq kyaj kolin kyuʼn junjun tukʼil ex otoq sikt (2 Tim. 1:15).

17. ¿Tiʼ jakutoq kubʼ t-ximen Pablo?

¹⁷ Jakutoq ximen Pablo tiʼj tanqʼibʼil, axpe ikx, jakutoq kubʼ t-ximen qa noqwit xi tbʼinchaʼn junjuntl tiʼchaq, mintiʼwtlo okx qʼoʼn toj cárcel. Ax ikx, jakutoq tzaj tqʼoj kyiʼj xjal te Asia tuʼnju otoq kyaj kolin kyuʼn. Ex jakutoq kubʼ t-ximen qa ya mlay tzʼok qeʼ tkʼuʼj kyiʼj txqantl tamiw. Pero mintiʼ bʼant jlu tuʼn. ¿Tiʼ onin tiʼj tuʼn kukx tok qeʼ tkʼuʼj tiʼj Jehová ex kyiʼj tamiw?

18. ¿Tiʼ bʼant tuʼn Pablo tej tok weʼ kywitz nya bʼaʼn?

¹⁸ Toxin, qo ximen tiʼj tzeʼn jaku tzʼonin qiʼj. Jaku kubʼ qxjelin jlu: «¿Tiʼ bʼant tuʼn Pablo tuʼn tonin tiʼjx?». Maske ojtzqiʼntoq tuʼn qa chʼixtoq tkubʼ bʼyoʼn, kukx ximen tiʼj qa mas nim toklen tuʼn tjaw nimset Jehová. Ax ikx, ok tilil tuʼn tuʼn t-xi tqʼuqbʼaʼn kykʼuʼj txqantl ex kukx naʼn Dios te Jehová (2 Tim. 1:3). Mintiʼ ok tqʼoʼn twiʼ tiʼj qa otoq kyaj kolin kyuʼn junjun, sino xi tqʼoʼn chjonte kye tamiw kukx e ten tukʼil ex kubʼ kyyekʼin kykʼujlabʼil tiʼj. Ax ikx, kukx xnaqʼtzan tiʼj Tyol Dios (2 Tim. 3:16, 17; 4:13). Ex aju mas nim toklen, ok qeʼ tkʼuʼj tiʼj qa kukx kʼujlaʼntoq tuʼn Jehová ex tuʼn Jesús, qa mintiʼ otoq kyaj kolin kyuʼn ex qa tzultoq kyqʼoʼn oyaj te tuʼnju mintiʼ el tpan tibʼ kyiʼj.

19. ¿Tzeʼn onin Jehová tiʼj apóstol Pablo?

¹⁹ Otoq tqʼama Jehová te Pablo qa kʼelel ikʼun tuʼnju otoq tzʼok lepeʼ tiʼj Jesús (Hech. 21:11-13). ¿Tzeʼn onin Jehová tiʼj Pablo? Onin tiʼj tej ttzaj ttzaqʼweʼn qe tnaʼj Dios ex tej ttzaj tqʼoʼn tipumal (2 Tim. 4:17). Ax ikx, xi tziyen te apóstol Pablo qa tzul tkʼamoʼn oyaj tuʼnju otoq tzʼok tilil tuʼn. Ex ajbʼen qe tamiw Pablo tuʼn Jehová tuʼn kyonin tiʼj.

20. ¿Tzeʼn jaku tzʼel qkanoʼn qʼuqbʼil tkʼuʼj apóstol Pablo, aju kyaj ttzʼibʼin toj Romanos 8:38 ex 39?

²⁰ Tkyajin, bʼaʼn tuʼn t-xi qbʼinchaʼn. Bʼaʼn tuʼn tkubʼ qxjelin jlu: «¿Tzeʼn jaku tzʼel nkanoʼne tiʼj apóstol Pablo?». Ik tzeʼn bʼaj tiʼj Pablo, ax ikx qe qo elel ikʼun tuʼnju in qo ajbʼen te Jehová (Mar. 10:29, 30). Tuʼn kukx qajbʼen te Jehová aj qok weʼ kywitz nya bʼaʼn, nim toklen tuʼn qnaʼn Dios ex tuʼn kukx qxnaqʼtzan. Ex miʼn tzikʼ tnaʼl quʼn qa aju mas nim toklen tuʼn tbʼant quʼn, aju tuʼn tjaw qnimsaʼn Jehová. Jaku tzʼok qeʼ qkʼuʼj tiʼj qa mlayx qo kyaj tkolin Jehová ex qa mintiʼ jun tiʼ jaku tzʼel qʼinte ambʼil te tuʼn kukx qok tkʼujlaʼn (kjawil uʼjit Romanos 8:38, 39; Heb. 13:5, 6).

21. ¿Tiʼ onin tiʼj Ayoko ex tiʼj Hector tuʼn kyex twitz nya bʼaʼn?

²¹ Noq alkyexku nya bʼaʼn in qo ok weʼ twitz, jaku ten qipumal aj qxnaqʼtzan kyiʼj  techel in yolin Tyol Dios tiʼj. Jun techel, in tzaj tqʼamaʼn Ayoko, * aju in najbʼen te precursora toj tnam Japón qa onin txʼolbʼabʼil tiʼj Jonás tiʼj tuʼn miʼn ttzaj xobʼ aj tpakbʼan jatumel ateʼ nim xjal. Atzunte Hector, jun kuʼxun te tnam Indonesia, tjunalx in najbʼen te Jehová. Pero in tzaj tqʼamaʼn qa in nonin txʼolbʼabʼil in yolin tiʼj tanqʼibʼil Rut tiʼj tuʼn tok tkʼujlaʼn Jehová ex tuʼn kukx tajbʼen te.

22. ¿Tzeʼn jaku che onin video qiʼj, qe audio ex qe xnaqʼtzbʼil «Qkanoʼmil qʼuqbʼil kykʼuʼj»?

²² ¿Jatumel jaku che kanet txʼolbʼabʼil tiʼj kyanqʼibʼil xjal quʼn, aqeju jaku che onin qiʼj? Jaku che kanet quʼn kyoj video, kyoj audio ex toj xnaqʼtzbʼil «Qkanoʼmil qʼuqbʼil kykʼuʼj». * Tbʼanel qe txʼolbʼabʼil lu. Naʼmxtoq tok qkeʼyin, tok qbʼiʼn moqa tuʼn tjaw quʼjin qe tbʼanel txʼolbʼabʼil lu, qqaninx te Jehová tuʼn tonin qiʼj tuʼn tel qiʼn jun xnaqʼtzbʼil tiʼj. Qo ximen tiʼj qa qiʼj in bʼaj aju in nikʼ tiʼj xjal in yolin Tyol Dios tiʼj. Ax ikx, qo ximen tiʼjju bʼant tuʼn ex tzeʼn onin Jehová tiʼj tuʼn tex kywitz nya bʼaʼn. Ajtzun tel qiʼn jun xnaqʼtzbʼil tiʼj, bʼaʼn tuʼn tkubʼ qbʼinchaʼn. Ex te bʼajsbʼil, qqʼonx chjonte te Jehová tuʼn onbʼil otoq tzaj tqʼoʼn qe. Jaku kubʼ qyekʼin qa in xi qqʼoʼn chjonte te Jehová aj qonin kyiʼj txqantl ex aj t-xi qqʼuqbʼaʼn kykʼuʼj.

23. ¿Tiʼ in tzaj ttziyen Jehová qe toj Isaías 41:10 ex 13?

²³ Akux in kawin Satanás kyibʼaj xjal, kwest qanqʼibʼil ex at maj mlay tzʼel qnikʼ tiʼj tiʼ tuʼn bʼant quʼn (2 Tim. 3:1). Pero mintiʼ tuʼn qtzaj xobʼ nix tuʼn ttzaj bʼaj qkʼuʼj. Ojtzqiʼn tuʼn Jehová tiʼ in bʼaj qiʼj. Qa qaj onbʼil, in tzaj ttziyen qa kʼonil qiʼj (kjawil uʼjit Isaías 41:10, 13). Qʼuqli qkʼuʼj tiʼj qa kʼonil Jehová qiʼj ex qa ktel qipumal tuʼn qex kywitz nya bʼaʼn aj quʼjin tiʼj Xjan Uʼj.