1. ¿Tiquʼn xi tqanin Jesús te Jehová tuʼn tok t-xqʼuqin qe t-xnaqʼtzbʼen?

TEJ chʼixtoq tkubʼ bʼyoʼn Jesús, ximen kyiʼj nya bʼaʼn che okel weʼ t-xnaqʼtzbʼen twitz. Tuʼnju kʼujlaʼn qetoq tuʼn, xi tqanin te Jehová tuʼn kyok t-xqʼuqin tiʼj Tajaw il (Juan 17:14, 15). Ex ojtzqiʼntoq tuʼn qa aj tmeltzʼaj toj kyaʼj, kukx kʼokel tilil tuʼn Tajaw il tuʼn tok tbʼinchaʼn nya bʼaʼn kyiʼj qeju kyaj tuʼn kyajbʼen te Jehová. Tuʼn jlu in nel qnikʼ tiʼj qa il tiʼj tuʼn t-xqʼuqin Jehová kyiʼj tmajen.

2. ¿Tiquʼn qʼuqli qkʼuʼj tiʼj qa tzul ttzaqʼweʼn Jehová qnaʼj Dios?

² Tzaj ttzaqʼweʼn Jehová tnaʼj Dios Jesús tuʼnju kʼujlaʼn tuʼn. Ax ikx qe, qa ma tzʼok tilil quʼn tuʼn qajbʼen te Jehová, qo okel kʼujlaʼn tuʼn ex tzul ttzaqʼweʼn qnaʼj Dios aj t-xi qqanin te tuʼn tonin qiʼj ex tuʼn qok t-xqʼuqin. Tuʼnju in nok Jehová ik tzeʼn jun tbʼanel mambʼaj, in xqʼuqin kyiʼj qe tkʼwal. Qa mintiʼ ma bʼant jlu tuʼn, mlay jaw tnimsaʼn tbʼi.

3. ¿Tiquʼn nim toklen tuʼn t-xqʼuqin Jehová qiʼj?

³ Toj ambʼil jaʼlo, mas nim toklen tuʼn t-xqʼuqin Jehová qiʼj. ¿Tiquʼn? In tzaj tqʼamaʼn Tyol Dios jlu: «Porke ma kuʼpun tajaw il kyxole tukʼil nim tqʼoj» (Apoc. 12:12). O kubʼ tmoẍsaʼn qe xjal tuʼn tkubʼ kyximen «qa te Dios in che ajbʼen» aj tok kybʼinchaʼn nya bʼaʼn qiʼj (Juan 16:2). Atzun qeju mintiʼ in xi kynimen qa at Dios, in qo el kyikʼun tuʼnju mintiʼ in qo ok lepeʼ tiʼj kyximbʼetz xjal. Pero mintiʼ in qo tzaj xobʼ tuʼnju in tzaj tqʼamaʼn Tyol Dios jlu: «Ate  Qajaw in japunxix tyol, ex bʼaʼn tuʼn tqeʼ qkʼuʼj tiʼj, ok che kyuwsanjtzele tuʼn, ex che okel kwentine tuʼn, tuʼn miʼn tkubʼ kyiʼje tuʼn tajaw il» (2 Tes. 3:3). Qo xnaqʼtzan tiʼj kabʼe tten tzeʼn in xqʼuqin Jehová qiʼj.

4. Ik tzeʼn in tzaj tqʼamaʼn Efesios 6:13 a 17, ¿tiʼ in tzaj tqʼoʼn Jehová qe tuʼn t-xqʼuqin qiʼj?

⁴ In tzaj tqʼoʼn Jehová tkyaqil onbʼil at tajbʼen qe tuʼn miʼn tok tbʼinchaʼn Tajaw il nya bʼaʼn qiʼj (kjawil uʼjit Efesios 6:13-17). Tbʼanel qe onbʼil lu ex at kyipumal, pero oʼkx jaku che kolin qiʼj qa ma che ajbʼen quʼn. Qo xnaqʼtzan tiʼj alkyeqe onbʼil lu.

5. ¿Tiʼ aju sinch tiʼj axix tok ex tiquʼn nim toklen tuʼn tok qkʼaloʼn qkʼuʼj tuʼn?

⁵ Aju kʼalbʼil qkʼuʼj moqa sinch tiʼj axix tok. Atz in yolin jlu tiʼj axix tok tkuʼx toj Tyol Dios. ¿Tiquʼn nim toklen tuʼn tok qqʼoʼn sinch lu? Porke a Tajaw il mambʼaj tiʼj «nikʼaj yol» (Juan 8:44). O tzikʼ nim ambʼil in yolin tiʼj yol nya ax tok ex «in sbʼun kyiʼj kykyaqil xjal twitz txʼotxʼ» (Apoc. 12:9). Pero in qo ok xqʼuqin kyuʼn axix tok tkuʼx toj Tyol Dios kyiʼj tsbʼubʼil Satanás. ¿Alkye tten in nok qkʼaloʼn sinch lu tiʼj qkʼuʼj? Aj tel qnikʼ tiʼj Jehová, aj qkʼulin te tuʼn tkyaqil qanmi ex tukʼil axix tok ex aj t-xi qbʼinchaʼn «aju bʼaʼn tuj tkyaqil» (Juan 4:24; Efes. 4:25; Heb. 13:18).

6. ¿Tiʼ aju chikyet kʼuxbʼil tzʼaqli ex tiquʼn il tiʼj tuʼn tajbʼen quʼn?

⁶ Aju «chikyet kʼuxbʼil» tzʼaqli. Atz in yolin jlu kyiʼj tbʼanel tkawbʼil Jehová. ¿Tiquʼn nim toklen tuʼn tajbʼen quʼn? Qo ximen tiʼj jun techel, in nonin jun chikyet tiʼj soldad tuʼn miʼn tkʼixbʼi tanmi tuʼn jun espada moqa tuʼn jun plech. Ax jlu in bʼant kyuʼn tkawbʼil Jehová, in nok kyxqʼuqin qanmi ex qximbʼetz (Prov. 4:23). In tzaj tqʼamaʼn Jehová qe tuʼn tok qkʼujlaʼn tuʼn tkyaqil qanmi ex tuʼn qajbʼen te (Mat. 22:36, 37). Pero taj Satanás tuʼn tkubʼ tpaʼn qanmi aj tok tilil tuʼn tuʼn tok qkʼujlaʼn qe tiʼchaq te twitz txʼotxʼ (Sant. 4:4; 1 Juan 2:15, 16). Qatzun mintiʼ in kubʼ qkʼuʼj tuʼn, kxel tjyoʼn tumel tzeʼn tuʼn qel ikʼun.

7. ¿Alkye tten in nok qqʼoʼn chikyet tzʼaqli qiʼj?

⁷ In nok qqʼoʼn chikyet tzʼaqli aj qanqʼin ik tzeʼn in tzaj tqʼamaʼn Jehová ex aj tel qikʼun nya bʼaʼn (Sal. 97:10). Jakulo kubʼ kyximen junjun xjal qa in nel qʼiʼn tzaqpibʼil qe aj t-xi qnimen qe tkawbʼil Jehová. Pero qa mintiʼ ma chex qnimen tkawbʼil Jehová, qo okel ik tzeʼn jun soldad in nel tiʼn tchikyet akux in nok qʼoj tuʼnju in kubʼ t-ximen qa al. Qa ma bʼant jlu quʼn kbʼel qyekʼin qa mintiʼ qnabʼil. Mintiʼ in kubʼ kyximen tmajen Jehová qa jun iqtz qe tkawbʼil, sino jun kolbʼil te kye (1 Juan 5:3).

8. ¿Tiʼ t-xilen tuʼn tok qqʼoʼn qxjabʼ tuʼn qex pakbʼal tiʼj tbʼanel tqanil?

⁸ Kyqʼonke kyxjabʼe tuʼn tbʼant kytene tuʼn kyxiʼye pakbʼal tbʼanel tqanil. Atz in yolin jlu tiʼj qa nim toklen tuʼn tbʼaj qbʼinchaʼn qten tuʼn qpakbʼan tiʼj tbʼanel tqanil. In chʼiy qʼuqbʼil qkʼuʼj aj qyolin tiʼj Tyol Dios kyukʼil txqantl. In kubʼ qnaʼn nim tzalajbʼil aj tok qkeʼyin qa in nok tilil kyuʼn nim erman tuʼn kypakbʼan tukʼil tzalajbʼil tiʼj tbʼanel tqanil. Jun techel, in che pakbʼan toj tja xnaqʼtzbʼil, toj aqʼuntl, kyoj kʼaẍjel, kytziyele ja, aj kyxiʼ loqʼel, aj kyxiʼ visitaril toj kyja, aj kypakbʼan kye xjal ojtzqiʼn kywitz kyuʼn, axpe ikx qa mintiʼ in bʼant tuʼn kyetz toj kyja. Qa ma kyaj qtzaqpiʼn tuʼn qpakbʼan noq tuʼnju in  qo xobʼ, jaku tzaj nya bʼaʼn qiʼj. Qa ma bʼant jlu quʼn, qo okel ik tzeʼn jun soldad in nel tiʼn qe t-xjabʼ toj qʼoj. Jurat jaku tzaj nya bʼaʼn tiʼj, kwest jaku tzʼok t-xqʼuqin tibʼ ex mlay txi tbʼiʼn naj aju in tzaj tqʼamaʼn nejenel kye soldad.

9. ¿Tiquʼn il tiʼj tuʼn t-xi qiʼn maqbʼil tiʼj qʼuqbʼil qkʼuʼj?

⁹ Aju maqbʼil tiʼj qʼuqbʼil qkʼuʼj. Atz in yolin jlu tiʼj qʼuqbʼil qkʼuʼj at tiʼj Jehová ex kyiʼj ttziybʼil. In nonin qʼuqbʼil qkʼuʼj qiʼj «tuʼn tyupit tkyaqil plech in kʼant in tzaj t-xoʼn tajaw il». Il tiʼj tuʼn t-xi qiʼn maqbʼil lu tuʼnju in xqʼuqin qiʼj kyiʼj nya ax tok kyyol apóstata, tiʼj kyxmaybʼil xjal ex kyiʼj nya ax tok yol in tzaj kyqʼamaʼn qiʼj. Qa mintiʼ ma ten qʼuqbʼil qkʼuʼj, mlay ten qipumal tuʼn t-xi qnimen qe tkawbʼil Jehová aj ttzaj kyqʼamaʼn txqantl qe tuʼn tkubʼ qbʼinchaʼn nya bʼaʼn. Pero qa ma qo kolin tiʼjju nimen quʼn toj aqʼuntl moqa toj tja xnaqʼtzbʼil, kxqʼuqil qʼuqbʼil qkʼuʼj qiʼj (1 Ped. 3:15). Ax ikx, in xqʼuqin qʼuqbʼil qkʼuʼj qiʼj aj tel qikʼun jun aqʼuntl mintiʼ in tzaj tqʼoʼn ambʼil qe tuʼn qajbʼen te Jehová, maske jaku tzaj chjoʼn nim twiʼ qkʼuʼj (Heb. 13:5, 6). Ex qa kukx in qo ajbʼen te Jehová aj qel ikʼun, ax ikx in nonin qʼuqbʼil qkʼuʼj qiʼj (1 Tes. 2:2).

10. ¿Tiʼ aju casco te kolbʼil qe ex tiquʼn il tiʼj tuʼn tjax qqʼoʼn toj qwiʼ?

 ¹⁰ Aju casco te kolbʼil qe. Atz in yolin jlu tiʼj qʼuqbʼil qkʼuʼj o tzaj tqʼoʼn Jehová tuʼn kyjaw anqʼin kyimni ex tiʼj oyaj kxel tqʼoʼn kye qeju in che nimen te (1 Tes. 5:8; 1 Tim. 4:10; Tito 1:1, 2). In nok t-xqʼuqin jun casco twiʼ jun soldad, ax jlu in bʼant tuʼn qʼuqbʼil qkʼuʼj, in nok t-xqʼuqin qximbʼetz. ¿Alkye tten? Aj tonin qiʼj tuʼn tok qqʼoʼn qwiʼ kyiʼj ttziybʼil Jehová ex aj tten qximbʼetz toj tumel kyiʼj nya bʼaʼn in che ikʼ qiʼj. ¿Tzeʼn in kubʼ qyekʼin qa tjax qcasco? Aj tok tilil quʼn tuʼn tten qximbʼetz ik tzeʼn te Jehová. Jun techel, mintiʼ in nok qeʼ qkʼuʼj tiʼj «qʼinumabʼl porke mya segur te jlu», sino atz in nok qeʼ qkʼuʼj tiʼj Dios (Sal. 26:2; 104:34; 1 Tim. 6:17).

11. ¿Tiʼ aju espada in tzaj tqʼoʼn xewbʼaj xjan ex tiquʼn il tiʼj tuʼn tajbʼen quʼn?

¹¹ Aju espada in tzaj tqʼoʼn xewbʼaj xjan. Atz in yolin jlu tiʼj Tyol Dios. At tipumal spad lu ex in nonin kyiʼj xjal tuʼn miʼn kykubʼ sbʼuʼn kyuʼn nya ax tok xnaqʼtzbʼil ex tuʼn tchʼexpaj kyanqʼibʼil (2 Cor. 10:4, 5; 2 Tim. 3:16, 17; Heb. 4:12). In najbʼen spad lu quʼn toj tumel aj qxnaqʼtzan qjunalx tiʼj Tyol Dios ex aj ttzaj qkʼamoʼn xnaqʼtzbʼil in tzaj tqʼoʼn ttnam Jehová (2 Tim. 2:15). Noqtzun tuʼnj, nya oʼkx qe onbʼil lu in tzaj tqʼoʼn Jehová qe. Qo xnaqʼtzan tiʼj juntl.

12. ¿Alkye mas onbʼil qaj ex tiquʼn?

¹² Ojtzqiʼn tuʼn jun soldad qa mlayx kubʼ kyiʼj aj qʼoj tuʼn tjunalx, il tiʼj tuʼn kyonin tukʼil tiʼj. Chʼixme ax jlu in bʼaj qiʼj, mlayx kubʼ tiʼj Satanás quʼn qjunalx, il tiʼj tuʼn kyonin erman qiʼj. Tuʼntzunju, o tzaj tqʼoʼn Jehová ambʼil tuʼn kyten qerman twitz tkyaqil Txʼotxʼ tuʼn kyonin qiʼj (1 Ped. 2:17).

13. Ik tzeʼn in tzaj tqʼamaʼn Hebreos 10:24 ex 25, ¿tzeʼn in che onin chmabʼil qiʼj?

¹³ In tzaj qkʼamoʼn onbʼil in tzaj kyqʼoʼn erman aj qxiʼ kyoj kykyaqil chmabʼil (kjawil uʼjit Hebreos 10:24, 25). Qkyaqilx in tzaj bʼaj qkʼuʼj junjun maj, pero aj qxiʼ kyoj chmabʼil in qo tzalaj. In tzaj qʼuqbʼan qkʼuʼj tuʼn kyyol erman in xi kyqʼoʼn toj chmabʼil. Ax ikx, in che onin yekʼbʼil ex qe chikʼbʼabʼil in nex kyqʼoʼn erman qiʼj tuʼn kukx qajbʼen te Jehová. Ex in chewix qanmi aj qyolin kyukʼil naʼmxtoq txi tzyet chmabʼil ex aj tel bʼaj (1 Tes. 5:14). Ax ikx, in tzaj kyqʼoʼn chmabʼil ambʼil qe tuʼn qonin kyiʼj txqantl ex tuʼn jlu in qo tzalaj (Hech. 20:35; Rom. 1:11, 12). Nya oʼkxju, ax ikx in che onin chmabʼil qiʼj tuʼn tbʼant-xix qpakbʼan ex qqʼon xnaqʼtzbʼil. Jun techel, in tzaj yekʼin qe tzeʼn tuʼn kyajbʼen uʼj ex qe video quʼn, aqeju ateʼ toj onbʼil tuʼn qqʼon xnaqʼtzbʼil. Tuʼntzunju, qbʼinchanku qten kyiʼj chmabʼil, qqʼonk qwiʼ tiʼjju in netz qʼamaʼn ex qbʼincham aju in nel qnikʼ tiʼj. Qa ma bʼant tkyaqil jlu quʼn, mlayx kubʼ qiʼj tuʼn Tajaw il ex qo okel te jun tbʼanel tsoldad Jesús (2 Tim. 2:3).

14. ¿Alkye juntl onbʼil in tzaj tqʼoʼn Jehová qe?

¹⁴ Ax ikx in che onin nim millón anjel qiʼj. Qa ya ojtzqiʼn quʼn jniʼ tipumal jun anjel at, ¿jakupe kubʼ qximen jniʼ jaku bʼant kyuʼn nimku anjel? (Is. 37:36). Ni jun xjal ex ni jun taqʼunal Tajaw il jaku pon tipumal ik tzeʼn kye t-anjel Jehová. Jun maj, etz qʼamaʼn qa maske qjunalx atoʼ, qa at Jehová qukʼil ni jun jaku kambʼan qiʼj (Juec. 6:16). ¡Ax tok qe yol lu! Bʼaʼn tuʼn qximen kyiʼj aj ttzaj qbʼis tuʼn  jun qukʼil toj aqʼuntl, toj tja xnaqʼtzbʼil moqa tuʼn jun toj qja mintiʼ in najbʼen te Jehová. Bʼaʼn tuʼn ttzaj qnaʼn qa nya qjunalx in nok tilil quʼn, at Jehová qukʼil.

15. Ik tzeʼn in tzaj tqʼamaʼn Isaías 54:15 ex 17, ¿tiquʼn ni jun jaku tzʼel qʼinte ambʼil kye tmajen Jehová tuʼn kukx kypakbʼan?

¹⁵ At tiquʼn tuʼn qel ikʼun kyuʼn xjal ateʼ tjaqʼ tkawbʼil Satanás. Mintiʼ in nokx qqʼon qibʼ kyxol aj kawil ex mintiʼ in qoʼx toj qʼoj. ¿Tiʼtzun in bʼant quʼn? In xi qqʼamaʼn tbʼi Dios kye xjal, in xi qqʼamaʼn qa oʼkx Tkawbʼil Dios tzul qʼinte tzalajbʼil twitz Txʼotxʼ ex in xi qbʼiʼn aju in tzaj tqʼamaʼn Xjan Uʼj. Ax ikx, in xi qqʼamaʼn qa taj Satanás tuʼn kykyim xjal tuʼnju in sbʼun kyiʼj (Juan 8:44). Ex in xi qqʼamaʼn kye xjal qa chʼix tel qʼiʼn tkyaqil nya bʼaʼn. Mlayx tzʼel tiʼn Satanás ambʼil qe tuʼn qpakbʼan. Kukx kʼokel tilil quʼn tuʼn qjyon tumel tzeʼn tuʼn tjaw qnimsaʼn Jehová. Maske at nim tipumal Satanás, mintiʼ o tzʼel tiʼn ambʼil tuʼn tpon tbʼanel tqanil kyukʼil nim xjal. In bʼant tkyaqil jlu quʼn noq tuʼnju in xqʼuqin Jehová qiʼj (kjawil uʼjit Isaías 54:15, 17).

16. ¿Tzeʼn kkolil Jehová kyiʼj tmajen toj nimxix yajbʼil?

¹⁶ ¿Tiʼ kbʼajel toj ambʼil tzul? Toj nimxix yajbʼil, kkolil Jehová qiʼj toj kabʼe tten. Tnejel, kʼokel t-xqʼuqin qe tmajen aj tkubʼ kyxiten aj kawil Nintz tnam Babilonia, toj juntl yol, qe okslabʼil nya ax tok (Apoc. 17:16-18; 18:2, 4). Tkabʼin, ax ikx kkolil kyiʼj tmajen aj tkubʼ t-xiten tkyaqilju tokx tjaqʼ tkawbʼil Satanás toj Armagedón (Apoc. 7:9, 10; 16:14, 16).

17. ¿Tiquʼn mas bʼaʼn tuʼn qkyaj ten ttxlaj Jehová?

¹⁷ Qa kukx at Jehová qukʼil, mlayx tzʼok tbʼinchaʼn Satanás jun nya bʼaʼn qiʼj te jumajx. Sino ate kbʼel najsaʼn te jumajx (Rom. 16:20). Tuʼntzunju, che ajbʼenx onbʼil in tzaj tqʼoʼn Jehová qe toj qokslabʼil ex miʼn che kyaj qtzaqpiʼn. Miʼn tzʼok tilil quʼn qjunalx, qo jyon onbʼil kyukʼil erman ex qo lepeʼk kyiʼj tkawbʼil Jehová. Qa ma bʼant jlu quʼn, jaku tzʼok qeʼ qkʼuʼj tiʼj qa ktzajel tqʼoʼn Jehová qipumal ex kxqʼuqil qiʼj (Is. 41:10).