1. ¿Tiʼ onin tiʼj Job tuʼn tok tojtzqiʼn mas Jehová?

 TIʼJ tkyaqilju yolin Job tiʼj toj tanqʼibʼil, jaku txi qqʼamaʼn qa maslo tzaj tnaʼn aju ambʼil tej tyolin tukʼil Jehová. Xi tqʼamaʼn Jehová te Job tuʼn tok tkeʼyin junjun tiʼchaq otoq bʼant tuʼn. ¿Tiquʼn? Tuʼnju jakutoq tzʼonin tiʼj tuʼn tel tnikʼ tiʼj qa at tnabʼil Jehová ex tuʼn tok qeʼ tkʼuʼj tiʼj qa in xqʼuqin Jehová kyiʼj tmajen. Jun techel, tej tok tkeʼyin Job qa in xqʼuqin Jehová kyiʼj txkup, onin jlu tiʼj tuʼn tel tnikʼ tiʼj qa ax jlu jaku bʼant tuʼn Jehová tiʼj (Job 38:39-41; 39:1, 5, 13-16). Ex tej t-ximen Job kyiʼj tbʼinchbʼen Jehová, onin jlu tiʼj tuʼn tel tnikʼ kyiʼj tbʼanel tmod.

2. ¿Tiquʼn at maj kwest tuʼn qximen kyiʼj tbʼinchbʼen Jehová?

² Ax ikx qe, mas jaku tzʼok qojtzqiʼn Jehová qa ma tzʼok qkeʼyin qe tbʼinchbʼen. Pero atlo maj kwest tuʼn tbʼant jlu quʼn. Qa atz in qo anqʼin toj jun matij tnam, nyalo tkyaqil qʼij in nok qkeʼyin qe tbʼanel tbʼinchbʼen Jehová. Qatzun in qo anqʼin toj jun aldea, jakulo kubʼ qximen qa mintiʼ ambʼil qiʼj tuʼn qximen tiʼj tkyaqilju o bʼant tuʼn Jehová. Tuʼntzunju, qo xnaqʼtzan tiʼj tiquʼn tbʼanel tuʼn tel qpaʼn ambʼil tuʼn qximen tiʼj tkyaqilju in nok qkeʼyin. Ax ikx, kʼelel qnikʼ tiʼj tzeʼn ajbʼen tbʼinchbʼen Jehová tuʼn tukʼil Jesús tuʼntzun ttzaj kyqʼoʼn xnaqʼtzbʼil qe ex tiʼ jaku bʼant quʼn tuʼntzun tel mas qnikʼ kyiʼj.

3. ¿Tzeʼn in nel qnikʼ tiʼj qa tajtoq Jehová tuʼn ttzalaj Adán tiʼj tbʼinchbʼen?

³ Tajtoq Jehová tuʼn ttzalaj tnejel xjal tiʼj tkyaqilju otoq bʼant tuʼn. Tuʼntzunju, kubʼ tqʼoʼn Jehová Adán toj jun tbʼanel Paraíso tuʼntzun tbʼaj t-xnaqʼtzaʼn ex tuʼn tonin tuʼn tok tkyaqil  Txʼotxʼ te jun tbʼanel najbʼil (Gén. 2:8, 9, 15). Ximana tiʼj tiʼ kubʼ tnaʼn Adán tej tok tkeʼyin qa in che jaw chʼiy iyaj ex qa in che el poqʼch qe kyxmakal awaʼl. Xi tqʼoʼn jun tbʼanel aqʼuntl te Adán tej t-xi tqʼamaʼn te tuʼn tok t-xqʼuqin Jardín te Edén. Ax ikx, xi tqʼamaʼn Jehová te Adán tuʼn tok tqʼoʼn kybʼi qe txkup (Gén. 2:19, 20). Jakutoq bʼant aqʼuntl lu tuʼn Jehová, pero xi tqʼamaʼn te Adán tuʼn t-xi tbʼinchaʼn. Tej naʼmxtoq tok tqʼoʼn Adán kybʼi qe txkup, jaku txi qqʼamaʼn qa tnejel ok tqʼoʼn twitz kyiʼj, tiʼ in bʼant kyuʼn ex tzeʼntoq kymod. Kubʼlo tnaʼn Adán nim tzalajbʼil tiʼj taqʼun tuʼnju ajbʼen jlu tuʼn tuʼn tel tnikʼ tiʼj tnabʼil Jehová, tiʼj t-ximbʼetz ex tiʼj tbʼanel aqʼuntl in bʼanttoq tuʼn.

4. a) ¿Alkye jun tiquʼn bʼaʼn tuʼn tel qpaʼn ambʼil tuʼn qximen tiʼj tbʼinchbʼen Jehová? b) Tiʼj tkyaqilju o bʼant tuʼn Jehová, ¿alkye mas tgana?

⁴ ¿Tiquʼn tbʼanel tuʼn tel qpaʼn ambʼil tuʼn qximen tiʼj tkyaqilju o bʼant tuʼn Jehová? Jun, tuʼnju taj tuʼn tbʼant jlu quʼn. In tzaj tqʼamaʼn jlu qe: «Kyiʼn jaw kywitze twitz kyaʼj ex kykeʼyinxe». Tibʼajxi jlu, in tzaj tqanin jlu: «¿Alkye o bʼinchante tkyaqil jlu?». Ojtzqiʼn quʼn alkye tzaqʼwebʼil kyiʼj xjel lu (Is. 40:26). Nya oʼkx bʼaj tbʼinchaʼn Jehová qe tbʼanel tiʼchaq twitz kyaʼj, sino ax ikx tzalu twitz Txʼotxʼ ex toj mar, ex jaku tzʼel qiʼn nim xnaqʼtzbʼil kyiʼj (Sal. 104:24, 25). Ax ikx, bʼaʼn tuʼn qximen tiʼj tzeʼn o qo kubʼ tbʼinchaʼn Jehová. Ex o tzaj tqʼoʼn ambʼil qe tuʼn tok qkeʼyin tbʼanel tbʼinchbʼen. Ex ok tilil tuʼn Jehová tuʼn qtzalaj tiʼj tkyaqilju o bʼant tuʼn tej ttzaj tqʼoʼn qwitz, qẍkyin, qaqʼ, qtxaʼn ex qqʼabʼ.

5. Ik tzeʼn in tzaj tqʼamaʼn Romanos 1:20, ¿tiquʼn tbʼanel tuʼn qximen tiʼj tbʼinchbʼen Jehová?

⁵ In tzaj tqʼamaʼn Biblia juntl tiquʼn nim toklen tuʼn tel qpaʼn ambʼil tuʼn qximen tiʼj tbʼinchbʼen Jehová. In nonin qiʼj tuʼn tok qojtzqiʼn qe tbʼanel tmod (kjawil uʼjit Romanos 1:20). Jun techel, aj qximen tiʼj tzeʼn bʼinchabʼin kyten qe tiʼchaq, in nel qnikʼ tiʼj qa at tnabʼil Jehová. Ex in nel qnikʼ tiʼj qa kʼujlaʼn qoʼ tuʼn tuʼnju in tzaj tqʼoʼn ambʼil qe tuʼn qtzalaj kyiʼj junxichaq clase wabʼj. Aj tok qojtzqiʼn tkyaqil tmod Jehová tiʼj tbʼinchbʼen, in nonin qiʼj tuʼn tel mas qnikʼ tiʼj ex tuʼn qok laqʼeʼ mas ttxlaj. Atzun jaʼlo, qo xnaqʼtzan tiʼj tzeʼn in najbʼen tbʼinchbʼen Jehová tuʼn tuʼn qtzaj t-xnaqʼtzaʼn.

6. ¿Tiʼ xnaqʼtzbʼil jaku tzʼel qiʼn kyiʼj cigüeña?

⁶ At jun t-orario Jehová. Aj chʼixtoq tkubʼaj xjaw febrero ex aj tpon mij xjaw te mayo, kykyaqil abʼqʼi ok kykeʼyin israelita qa in cheʼxtoq cigüeña atz jawni. Xi tqʼamaʼn Jehová jlu kye israelita: «Qe xulen bʼaʼn kyuʼn jtoj tuʼn kyxiʼ tuj juntl lugar ex jtoj tuʼn  kyajtz meltzʼaj» (Jer. 8:7). Kubʼ t-ximen Jehová tuʼn tten jun ky-orario qe ave lu, ax ikx o kubʼ tqʼoʼn jun or tuʼn t-xi tbʼinchaʼn kyiʼj tiʼchaq. Aj tok qkeʼyin qa at jun ambʼil jatumel in che ul moqa in che ikʼ bʼet qe ave, in tzaj tnaʼn jlu qe qa ax ikx o kubʼ t-ximen Jehová alkye or tzul tiʼn xitbʼil tiʼj tkyaqil nya bʼaʼn ex jaku tzʼok qeʼ qkʼuʼj tiʼj qa kbʼantel tuʼn (Hab. 2:3).

7. ¿Tiʼ xnaqʼtzbʼil jaku tzʼel qiʼn tiʼjju alkye tten in che lipen águila? (Isaías 40:31).

⁷ In tzaj tqʼoʼn Jehová kyipumal qe tmajen. Ajbʼen profeta Isaías tuʼn Jehová tuʼn ttzaj ttziyen qa aj tkubʼ kynaʼn tmajen qa mintiʼ kyipun moqa aj ttzaj bʼaj kykʼuʼj, tzul tqʼoʼn kyipumal tuʼntzun kylipen «mer ik tzaʼn tʼiw» moqa qe águila (kjawil uʼjit Isaías 40:31). Naqʼlitoq qe xjal te Israel tuʼn tok kykeʼyin qa in najbʼen kyqʼiqʼ kyuʼn águila tuʼntzun kylipen twitz kyaʼj ex in nonin jlu kyiʼj tuʼn miʼn tbʼaj kyipumal. Aj qximen tiʼj qa in nonin Jehová kyiʼj águila, in nonin qiʼj tuʼn ttzaj qnaʼn qa ax ikx jaku tzaj tqʼoʼn kyipumal tmajen ex jaku tzʼonin kyiʼj aj kyok weʼ twitz nya bʼaʼn. Tuʼntzunju, aj tok tkeʼyina jun áquila in lipen twitz kyaʼj ex chʼixmi mintiʼ in che yukch qe t-xikʼ, bʼaʼn tuʼn ttzaj tnaʼna qa ax ikx tzul tqʼoʼn Jehová tipumala tuʼntzun texa kywitz nya bʼaʼn.

8. a) ¿Tiʼ xnaqʼtzbʼil el tiʼn Job kyiʼj tbʼinchbʼen Jehová? b) Yajtzun qe, ¿tiʼ xnaqʼtzbʼil jaku tzʼel qiʼn tiʼj?

⁸ Jaku tzʼok qeʼ qkʼuʼj tiʼj Jehová. Tej tyolin Jehová tukʼil Job, onin tiʼj tuʼn tok qeʼ mas tkʼuʼj tiʼj (Job 32:2; 40:6-8). Yolin kyiʼj nim tbʼinchbʼen ik tzeʼn kyiʼj estrella, tiʼj muj ex kyiʼj qʼankyoq moqa kyiʼj rayo. Ax ikx, yolin kyiʼj wakẍ ex chej te tjaqʼ kʼul (Job 38:32-35; 39:9, 19, 20). E onin techel lu tiʼj Job tuʼn tel tnikʼ tiʼj qa at tipumal Jehová, nya oʼkxju, ax ikx el tnikʼ tiʼj qa at tkʼujlabʼil ex tnabʼil. Ex onin jlu tiʼj tuʼn tchʼiy mas qʼuqbʼil tkʼuʼj tiʼj Jehová (Job 42:1-6). Chʼixmi axju jaku bʼant quʼn, aj qxnaqʼtzan tiʼj tkyaqilju in nok qkeʼyin, bʼaʼn tuʼn ttzaj qnaʼn qa mas nim tipumal ex tnabʼil Jehová ik tzeʼn qe. Ax ikx, jaku tzʼel tiʼn Jehová tkyaqil nya bʼaʼn in qo ok weʼ twitz ex atzun jlu kbʼantel tuʼn. Aj qximen tiʼj jlu, in nonin qiʼj tuʼn tok qeʼ mas qkʼuʼj tiʼj.

9, 10. ¿Tiʼ xnaqʼtzbʼil in tzaj tqʼoʼn tqan Qʼij ex jbʼal qe tiʼj Jehová?

⁹ Ojtzqiʼntoq qe tbʼinchbʼen Jehová tuʼn Jesús. Tuʼnju ten tukʼil Jehová tej «tkubʼ ximet alkye tuʼn tbʼant», onin tiʼj tuʼn tbʼant tkyaqilju at twitz kyaʼj ex twitz Txʼotxʼ (Prov. 8:30). Ex tej tten Jesús tzalu twitz Txʼotxʼ, ajbʼen qe tbʼinchbʼen Jehová tuʼn tuʼntzun t-xi tyekʼin alkyeqe tbʼanel tmod Tman at. Qo xnaqʼtzan kyiʼj junjun.

¹⁰ In kubʼ tyekʼin Jehová tkʼujlabʼil kyiʼj kykyaqil xjal. Tej tex tqʼoʼn Jesús tchikʼbʼabʼil twi jun witz, yolin kyiʼj kabʼe tbʼinchbʼen Jehová ex ateʼ nim xjal mintiʼ in che ximen tiʼj. ¿Alkyeqe jlu? Aju tqan Qʼij ex aju jbʼal. Il tiʼj tuʼn kyten kabʼe tiʼ lu tuʼntzun qanqʼin. Nya oʼkx in tzaj tqʼoʼn Jehová Qʼij ex jbʼal kye qeju in che ajbʼen te, sino in tzaj tqʼoʼn kye kykyaqil xjal tuʼnju kʼujlaʼn qe tuʼn (Mat. 5:43-45). Ajbʼen techel lu tuʼn Jesús tuʼn t-xi t-xnaqʼtzaʼn kye qeju e ok lepeʼ tiʼj qa taj Jehová tuʼn t-xi qyekʼin qkʼujlabʼil kyiʼj kykyaqil xjal. Aj tok qkeʼyin tqan Qʼij in kux bʼaj moqa aj qtzalaj tiʼj xmuʼs tuʼnju at nim kyaq, bʼaʼn tuʼn ttzaj qnaʼn tkʼujlabʼil Jehová at kyiʼj kykyaqil xjal. Jaku tzʼonin techel in kubʼ tqʼoʼn qwitz tuʼn kyok qkʼujlaʼn xjal aj qpakbʼan kye kykyaqil.

11. ¿Tzeʼn jaku tzʼonin qiʼj aj tok qkeʼyin qe tal pájaro twitz kyaʼj?

¹¹ In tzaj tqʼoʼn tkyaqilju at tajbʼen qe tuʼn qanqʼin. Ax ikx tqʼama Jesús jlu toj Sermón del Monte: «Kykeʼyinxe qe chyuʼj; mintiʼ in che awan ex mintiʼ in che chmon twitz awal, ex mintiʼ kytxʼutxʼ te chmobʼl kywa;  ex ate Kymane aju at tuj kyaʼj nnoʼk kʼaʼchante kye». Bʼalo in che keʼyin xjal qa ateʼ junjun pájaro in che lipen twitz kyaʼj tej t-xi tqʼamaʼn Jesús jlu kye: «¿Myapetzun mas maʼ kyxilene kywitz qe chyuʼj?» (Mat. 6:26). Tukʼil kʼujlabʼil tqʼama Jesús qa tzul tqʼoʼn Jehová tkyaqilju at tajbʼen qe tuʼn qanqʼin (Mat. 6:31, 32). Ex kukx in nonin xnaqʼtzbʼil lu kyiʼj tmajen Jehová toj ambʼil jaʼlo. Otoq tzaj bʼaj tkʼuʼj jun precursora te España tuʼnju mintiʼtoq in kanet jun tbʼanel ja tuʼn jatumel tuʼn tanqʼin. Pero tej tok tkeʼyin ermana junjun pájaro in che wan tiʼj junjun semilla ex kyiʼj junjun fruta, ya mintiʼ bʼisun. Tqʼama precursora jlu: «Tuʼn jlu tzaj nnaʼne qa ax ikx kxqʼuqil Jehová wiʼje ik tzeʼn in xqʼuqin kyiʼj tal pájaro lu». Tej tikʼ chʼin ambʼil, kanet jun ja tuʼn ermana jatumel tuʼn tanqʼin.

12. In tzeʼn in tzaj tqʼamaʼn Mateo 10:29 a 31, ¿tiʼ in tzaj kyyekʼin gorrión qe tiʼj Jehová?

¹² In nok tqʼoʼn Jehová toklen teyele junjun qe. Tej naʼmxtoq t-xi tsamaʼn Jesús qe t-apóstol pakbʼal, onin kyiʼj tuʼn miʼn kytzaj xobʼ te ikʼbʼil (kjawil uʼjit Mateo 10:29-31). Bʼant jlu tuʼn tej tyolin tiʼj jun tal pájaro ojtzqiʼntoq kyuʼn israelita. ¿Alkye? Aju gorrión. Toj ambʼil aju, nyatoq nim kywiʼ qe gorrión. Noqtzun tuʼnj, xi tqʼamaʼn Jesús jlu kye: «Pero mintiʼ jun tal chyuʼj in kubʼ tzʼaq twitz txʼotxʼ mintiʼwt bʼiʼn tuʼn Kymane». Ex tqʼamatl jlu: «Mas maʼ kyxilene kywitz nimku tal chyuʼj [moqa gorrión]». Iktzun tten xi tqʼamaʼn kye qa in nok tqʼoʼn Jehová toklen teyele junjun kye. Ex atzun jlu onin kyiʼj tuʼn miʼn kytzaj xobʼ te ikʼbʼil. Jaku txi qqʼamaʼn qa tzaj kynaʼn t-xnaqʼtzbʼen Jesús qe yol lu tej tok kykeʼyin qe gorrión akux in che pakbʼan kyoj tnam ex kyoj aldea. Ax ikx teya, aj tok tkeʼyina jun pájaro, bʼaʼn tuʼn ttzaj tnaʼna qa kʼujlaʼna tuʼn Jehová tuʼnju mas in nok tqʼoʼn toklena «kywitz nimku tal chyuʼj» moqa gorrión. Tuʼn tonbʼil Jehová, jaku kubʼ tiʼj ikʼbʼil tuʼna (Sal. 118:6).

13. ¿Tiʼ jaku bʼant quʼn tuʼn kukx tel qiʼn tbʼanel xnaqʼtzbʼil kyiʼj tbʼinchbʼen Jehová?

¹³ Kukx jaku tzʼel qnikʼ tiʼj Jehová qa ma tzʼok qqʼoʼn qwitz kyiʼj tbʼinchbʼen. Tuʼntzunju, tbʼanel tuʼn tel qpaʼn ambʼil tuʼn tok qkeʼyin aju tok qtxlaj ex tuʼn qximen tiʼj tiʼ in tzaj tyekʼin qe tiʼj Jehová. Atlo maj kwest jaku bʼant jlu quʼn. Tqʼama ermana Géraldine jlu aju te tnam Camerún: «Iltoq tiʼj tuʼn tok tilil wuʼne tuʼn tok nkeʼyine qe tbʼinchbʼen Jehová tuʼnju atz in jaw chʼiye toj jun tnam ex nya toj jun aldea». Atzunte jun ansyan Alfonso tbʼi, tqʼama jlu: «Aj tel npaʼne ambʼil tuʼn ntene njunalxe tuʼn tok nkeʼyine qe tbʼinchbʼen Jehová ex tuʼn nximane tiʼjju in tzaj tyekʼin weye tiʼj, atzun jlu mas in nonin wiʼje».

14. ¿Tiʼ xnaqʼtzbʼil el tiʼn David kyiʼj tbʼinchbʼen Jehová tej t-ximen kyiʼj?

 ¹⁴ El tpaʼn rey David nim ambʼil tuʼn t-ximen kyiʼj tbʼinchbʼen Jehová. Xi tqʼamaʼn jlu te Jehová: «Ok in xi nkeʼyine aju twitz kyaʼj bʼant tuʼna, aju xjaw ex qe cheʼw ateʼk tuʼna twitz, in kubʼ nximane: ¿Ti kyxilen qe xjal? ¿Tiquʼn kukx in che tzaj tnaʼna [...]?» (Sal. 8:3, 4). Nya oʼkx ok tqʼoʼn David twitz kyiʼj qe cheʼw twitz kyaʼj, sino ax ikx ximen tiʼj tiʼ xnaqʼtzbʼil in tzaj kyqʼoʼn te tiʼj Jehová. El tnikʼ tiʼj qa at nim tipumal Jehová. Kyoj junjuntl ambʼil, ax ikx ximen David tiʼj tzeʼn chʼiy t-xmilal toj tkʼuʼj ttxuʼ. Tej t-ximen tiʼj tkyaqil jlu, mas chʼiy tojtzqibʼil tiʼj tnabʼil Jehová (Sal. 139:14-17).

15. ¿Ope tzʼel tnikʼa kyiʼj tbʼanel tmod Jehová aj tok tkeʼyina qe tbʼinchbʼen? Qʼamantza junjun techel (Salmo 148:7-10).

¹⁵ Ik tzeʼn bʼaj tiʼj David, nya il tiʼj tuʼn qxiʼ najchaq tuʼntzun tkanet jun tbʼinchbʼen Jehová quʼn tuʼntzun qximen tiʼj. Qa ma tzʼok qqʼoʼn qwitz tiʼjju tok qtxlaj, bʼaʼn tuʼn qximen kyiʼj ex kʼelel qnikʼ kyiʼj qe tbʼanel tmod Jehová. Jun techel, ¿jakupe tzʼel tnikʼa tiʼj qa at tipumal Jehová aj tkubʼ tnaʼna qa in pon tqan Qʼij tiʼj tqʼabʼa? (Jer. 31:35). ¿Jakupe ximana tiʼj tnabʼil Jehová aj tok tkeʼyina qe pájaro akux in che bʼinchan kyja? Aj tok tkeʼyina qa in tzalaj jun txʼyan akux in yukin tjeʼ, ¿jakupe ximana tiʼj qa ax ikx te Jehová tgan tuʼn ttzalaj? ¿Ex jakupe txi tqʼoʼna chjonte tiʼj tkʼujlabʼil Jehová aj tok tkeʼyina jun txubʼaj in tzalaj tiʼj tal? Jaku kanet nim tumel quʼn tuʼn tel mas qnikʼ tiʼj Qman Jehová aj tok qqʼoʼn qwitz kyiʼj tbʼinchbʼen. ¿Tiquʼn? Tuʼnju kykyaqil tbʼinchbʼen in jaw kynimsaʼn te ya sea chʼin qe ex qa matij qe, moqa nqayin ex qa najchaq ateʼ (kjawil uʼjit Salmo 148:7-10).

16. ¿Tiʼ bʼaʼn tuʼn tkubʼ qximen tuʼn tbʼant quʼn?

¹⁶ Mintiʼ juntl xjal mas at tnabʼil, mas at tkʼujlabʼil, mas tbʼanel bʼinchan qe tiʼchaq ex mas at tipumal ik tzeʼn te Jehová. Jaku tzʼel qnikʼ kyiʼj tbʼanel tmod Jehová lu ex kyiʼj junjuntl qa ma tzʼel qpaʼn ambʼil tuʼn qximen kyiʼj tbʼinchbʼen. Tuʼntzunju, qo ximen tiʼj tuʼn tel qpaʼn ambʼil tuʼn qtzalaj tiʼj tkyaqilju o bʼant tuʼn Jehová ex qo ximen tiʼj tiʼ xnaqʼtzbʼil in tzaj kyqʼoʼn qe tiʼj. Qa ma bʼant jlu quʼn, mas qo okel laqʼeʼ ttxlaj (Sant. 4:8). Toj juntl xnaqʼtzbʼil, kʼelel qnikʼ tiʼj tzeʼn jaku tzʼajbʼen tbʼinchbʼen Jehová kyuʼn mambʼaj tuʼntzun kyonin kyiʼj kykʼwal tuʼn kyok laqʼeʼ ttxlaj.