1, 2. a) ¿Tiʼ in bʼaj toj qʼij aj tbautisarin jun pakbʼal? b) ¿Tiʼ kʼelel qnikʼ tiʼj toj xnaqʼtzbʼil lu?

 ¿OPE tzʼok tkeʼyina qeju ya bʼantni kyten tuʼn kybautisarin toj jun asamblea? Aj in xi kyqʼoʼn tzaqʼwebʼil kyiʼj kabʼe xjel in xi tqanin discursante kye, in xi kytzaqʼweʼn tuʼn tkyaqil tqʼajqʼajel kywiʼ. Toj ambʼil lu, in che tzalaj qe kyfamilia ex qe kyamiw. Ajtzun kyjatz qeju in che bautisarin toj aʼ, qʼanchaʼl qa in che tzalaj ex in che aplaudirin kykyaqil erman. Ex chʼixme tkyaqil seman, in che bautisarin mas te mil xjal tuʼn kyok te testigo de Jehová.

² Qa in ximen teya tuʼn tbautisarina, a t-xilen jlu qa in jyona tiʼj Jehová ex tuʼn jlu in nok qʼoʼn toklena tuʼn (Sal. 14:1, 2). Qa tzma kuʼxuna moqa ya ma tijena, pero ma bʼaj bʼinchaʼn xnaqʼtzbʼil lu teya. Qo xnaqʼtzal tiʼj oxe tiquʼn bʼaʼn tuʼn qajbʼen te Jehová. ¿Yajtzun qa o qo bautisarin? Ax ikx, kʼonil xnaqʼtzbʼil lu qiʼj tuʼn kukx qajbʼen te Jehová te jumajx.

3. ¿Tiquʼn in nok kykʼujlaʼn tmajen Jehová aju axix tok ex aju tzʼaqli? (Salmo 119:128, 163).

³ Xi tqʼamaʼn Jehová kye tmajen tuʼn tok kykʼujlaʼn axix tok moqa tuʼn kytzalaj tiʼj (Zac. 8:19). Ax ikx tqʼama Jesús qa nim toklen tuʼn qjyon tiʼjju tzʼaqli (Mat. 5:6). Atz in yolin jlu tiʼjju tuʼn qjyon tiʼjju bʼaʼn ex tiʼjju saq toj twitz Dios. In noklo tkʼujlaʼn teya aju axix tok ex aju tzʼaqli. Tuʼntzunju, in nel tikʼuna nya ax tok yol, aju nya tzʼaqli ex aju nya bʼaʼn (kjawil uʼjit Salmo 119:128, 163). Qa at jun xjal in yolin tiʼj nya ax tok yol, in nel tkanoʼn tmod Satanás aju in kawin kyibʼaj kykyaqil xjal (Juan 8:44; 12:31). Mas in nok tilil tuʼn Satanás tuʼn tbʼaj ttzʼilsaʼn tbʼi Jehová. Atxix tej tel kypan kyibʼ xjal tiʼj  Jehová toj jardín te Edén, kukx in nok tilil tuʼn Satanás tuʼn ttzaj tqʼamaʼn qa nya bʼaʼn aj kawil Jehová. ¿Tiquʼn? Tuʼnju tqʼama qa oʼkx in ximen Jehová tiʼjx ex qa nya taj tuʼn qtzalaj kyiʼj tbʼanel tiʼchaq (Gén. 3:1, 4, 5). Kyuʼn nya ax tok yol in tqʼamaʼn, in ten kyximbʼetz xjal nya toj tumel tiʼj Jehová. Qa nya kyaj xjal tuʼn tok kykʼujlaʼn axix tok, in jaw kyjoʼn nya bʼaʼn bʼe ex in kubʼ kybʼinchaʼn nim nya bʼaʼn (Rom. 1:25-31).

4. ¿Tzeʼn o kubʼ tyekʼin Jehová qa a in nok te «Dios axix tok»? (Ax ikx qʼonka twitza tiʼj dibujo).

⁴ A Jehová in nok te «Dios axix tok» ex in xi tyekʼin axix tok kye qeju in che jyon tiʼj (Sal. 31:5). Iktzun tten in nonin kyiʼj xjal tuʼn tel kynikʼ tiʼj axix tok ex tuʼn kytzaqpaj kyiʼj nya ax tok yol in tzaj tqʼamaʼn Satanás. Ax ikx, in xi t-xnaqʼtzaʼn Jehová kye tmajen tuʼn miʼn kysbʼun ex tuʼn t-xi kybʼinchaʼn qe tiʼchaq toj tumel. Aj tbʼant jlu kyuʼn, in tzalaj kyiʼj ex ax ikx kye in che tzalaj (Prov. 13:5, 6). ¿Ope tzʼok tqʼoʼn twitza tiʼj jlu atxix tej t-xi tzyet tuʼn t-xnaqʼtzana tiʼj Biblia? Olo tzʼel tnikʼa tiʼj qa oʼkx Jehová in tzaj yekʼin tbʼanel bʼe qe (Sal. 77:13). Tuʼntzunju, taja tuʼn tok lepeʼya kyiʼj tkawbʼil (Mat. 6:33). Ex taja tuʼn tkolina tiʼj axix tok, toj juntl yol, taja tuʼn tkubʼ tyekʼina qa nya ax tok qe yol o tqʼama Satanás tiʼj Jehová. ¿Tzeʼn jaku bʼant jlu tuʼna?

5. ¿Tiʼ jaku bʼant tuʼna tuʼn tkolina tiʼj axix tok ex tiʼjju tzʼaqli?

⁵ Qa ma tzʼok tkʼujlaʼna axix tok ex aju tzʼaqli, jaku kubʼ tyekʼina qa in nel tikʼuna qe yol nya ax tok in tzaj tqʼamaʼn Satanás, qa in kolina tiʼj axix tok, qa taja tuʼn tkawin Jehová tibʼaja ex qa taja tuʼn t-xi tbʼiʼna qe tley. Tuʼn tkubʼ tyekʼina jlu, il tiʼj tuʼn t-xi ttziyena te Jehová toj jun naʼj Dios qa taja tuʼn tajbʼena te te jumajx. Tibʼajxi jlu, il tiʼj tuʼn tbautisarina tuʼntzun tkubʼ tyekʼina kywitz txqantl qa o xi tqʼamaʼna te Jehová tuʼn tajbʼena te. Tuʼn jlu in nel qnikʼ tiʼj qa jaku tzʼonin tkʼujlabʼila tiʼj axix tok ex tiʼjju tzʼaqli tuʼn tbautisarina.

6. Ik tzeʼn in tzaj tqʼamaʼn Salmo 45:4, ¿tiquʼn in nok qkʼujlaʼn Jesús?

⁶ ¿Tiquʼn kʼujlaʼn Jesús tuʼna? In kanet tzaqʼwebʼil tiʼj xjel lu quʼn toj Salmo 45:4 (uʼjinktza). Ok tkʼujlaʼn Jesús axix tok ex aju tzʼaqli, kubʼ tin tibʼ ex kolin tiʼj tkyaqil jlu. Qa kʼujlaʼn axix tok tuʼna ex aju tzʼaqli, ax ikx in nok tkʼujlaʼna Jesús. Jun techel, jaku ximana tiʼj Jesús tej mintiʼ tzaj xobʼ tuʼn tkolin  tiʼj axix tok ex tiʼjju tzʼaqli (Juan 18:37). ¿Tzeʼn kubʼ tyekʼin Jesús qa kubʼ tin tibʼ?

7. ¿Tiquʼn tbʼanel in nela toj twitza tuʼnju in kubʼ tin tibʼ Jesús?

⁷ Kubʼ tyekʼin Jesús qa kubʼ tin tibʼ tukʼil tyol ex tukʼilju bʼant tuʼn. Jun techel, toj tkyaqil ambʼil jaw tnimsaʼn Jesús Jehová ex mintiʼ jyon tumel tuʼn tok qʼoʼn toklen kyuʼn xjal (Mar. 10:17, 18; Juan 5:19). ¿Tiʼ teya in kubʼ t-ximen tiʼj Jesús tuʼnju kubʼ tin tibʼ? ¿Mintiʼpe in nonin jlu tiʼja tuʼn tok tkʼujlaʼna ex tuʼn tok lepeʼya tiʼj? Jaku txi qqʼamaʼn qa in nonin tiʼja. ¿Tiquʼn in kubʼ tin tibʼ Jesús toj tkyaqil ambʼil? Tuʼnju ax ikx te Jehová in kubʼ tin tibʼ. Kʼujlaʼn Jehová tuʼn Jesús ex in nel tkanoʼn qe tbʼanel tmod toj jun tten tzʼaqli (Sal. 18:35; Heb. 1:3). Qa ma ximana tiʼj jlu, jaku tzʼonin tiʼja tuʼn tok tkʼujlaʼna Jesús.

8. ¿Tiquʼn in qo tzalaj tuʼnju a Jesús Qrey?

⁸ In qo tzalaj qa a Jesús kkawil qibʼaj tuʼnju atzun mas tbʼanel aj kawil at. A Jehová xi qʼonte xnaqʼtzbʼil te ex ok tqʼoʼn toklen te Rey (Is. 50:4, 5). Ax ikx, ximana tiʼj tkʼujlabʼil Jesús kubʼ tyekʼin qiʼj (Juan 13:1). Tuʼnju a Jesús Qrey, at toklen tuʼn tok qkʼujlaʼn. Qa at jun xjal in tqʼamaʼn qa kʼujlaʼn Jesús tuʼn, in kubʼ tyekʼin jlu aj t-xi tbʼiʼn qe tmandamyent ex iktzun tten in nok te tamiw (Juan 14:15; 15:14, 15). Jun tbʼanel qoklen tuʼnju in qo ok te tamiw Tkʼwal Jehová.

9. ¿Tiquʼn chʼixme axju tbautismo Jesús twitzju kybautismo t-xnaqʼtzbʼen?

⁹ Jun kyxol qe mandamyent tqʼama Jesús, at aju tuʼn qbautisarin (Mat. 28:19, 20). Ax kyaj qʼonte techel qwitz. Junxitl chʼin ok tbautismo Jesús kywitz qe t-xnaqʼtzbʼen, pero ateʼ junjun tiʼchaq chʼixmi aʼyex e bʼaj. (Qʼonka twitza tiʼj recuadro « ¿Tiquʼn junxitl ok tbautismo Jesús kywitz qe t-xnaqʼtzbʼen?»). Jun techel, tej tbautisarin Jesús, bʼant jlu tuʼn tuʼntzun tkubʼ tyekʼin qa in bʼant tajbʼil Jehová tuʼn (Heb. 10:7). Chʼixmi ax jlu in bʼant kyuʼn t-xnaqʼtzbʼen. Aj in che bautisarin, in kubʼ kykeʼyin kywitz txqantl qa o txi kytziyen te Jehová tuʼn tbʼant tajbʼil kyuʼn ex qa mas nim toklen jlu toj kywitz twitzju kyex kyajbʼil. Aj tbʼant jlu kyuʼn, in kubʼ kyyekʼin qa in che ok lepeʼ tiʼj techel kyaj tqʼoʼn Jesús kywitz.

10. ¿Tiquʼn kʼujlaʼn Jesús tuʼna ex tzeʼn jaku kubʼ tyekʼina jlu?

¹⁰ Ojtzqiʼn tuʼna qa a Jesús in nok te oʼkxku jun Tkʼwal Jehová ex qa a o jaw skʼoʼn tuʼn tok te Rey kyibʼaj xjal. Ax ikx, o tzʼel tnikʼa tiʼj qa in kubʼ tin tibʼ ex qa in nel tkanoʼn tkyaqil tbʼanel tmod Jehová. Ex o xnaqʼtzana tiʼj qa xi tqʼoʼn kywa xjal at waʼyij kyiʼj, qa xi tqʼuqbʼaʼn kykʼuʼj qeju in che bʼisun ex qa e kubʼ tqʼanin qe yabʼ (Mat. 14:14-21). Ax ikx, o tzʼok tkeʼyina qa a in kubʼ nej twitz ttnam Jehová toj ambʼil jaʼlo (Mat. 23:10). Ex o tzʼok tbʼiʼna qa tuʼnju a kkawil toj Tkawbʼil Dios, kbʼantel tbʼanel tiʼchaq tuʼn kyiʼj xjal toj ambʼil tzul. ¿Tzeʼn jaku kubʼ tyekʼina tkʼujlabʼila tiʼj Jesús? Kbʼel tyekʼina aj tok lepeʼya tiʼj techel kyaj tqʼoʼn (Juan 14:21). Jun tiʼ jaku bʼant tuʼna, aju qa ma txi tqʼamaʼna te Jehová tuʼn tajbʼena te ex tuʼn tbautisarina.

11. ¿Alkye jun tiquʼn mas nim toklen tuʼn qbautisarin ex tiquʼn?

¹¹ ¿Alkye jun tiquʼn mas nim toklen tuʼn qbautisarin? In kanet tzaqʼwebʼil tiʼj jlu quʼn toj mandamyent mas nim toklen kyaj tqʼamaʼn Jesús: «Kykʼujlamtzune Qman Dios tuʼn tkyaqil kyanmiye, tuʼn tkyaqil kykʼuʼje, tuʼn tkyaqil kynabʼle, ex tuʼn tkyaqil kyipumale» (Mar. 12:30). ¿Axpe jlu in kubʼ tnaʼna tiʼj Jehová?

12. ¿Tiquʼn kʼujlaʼn Jehová tuʼna? (Ax ikx qʼonka twitza kyiʼj foto).

¹² At nim tiquʼn tuʼn tok qkʼujlaʼn Jehová. Jun techel, o tzʼel tnikʼa tiʼj qa atz tukʼil «taʼ aju twi aʼ in tqʼoʼn chwinqlal» ex qa a in tzaj qʼonte «tkyaqil oyaj bʼaʼn ex tkyaqil oyaj tbʼanilxix» (Sal. 36:9; Sant. 1:17). Tkyaqil tbʼanel tiʼchaq at teya, a Jehová in tzaj qʼonte tuʼnju bʼaʼn qʼon oyaj ex kʼujlaʼn qoʼ tuʼn.

13. ¿Tiquʼn jun tbʼanel oyaj aju chojbʼil?

¹³ ¿Tiquʼn jaku txi qqʼamaʼn qa jun tbʼanel oyaj chojbʼil o tzaj tqʼoʼn Jehová qe? Qo ximen tiʼj jniʼ kʼujlabʼil at t-xol Jehová tukʼil Tkʼwal. Tqʼama Jesús jlu: «In chin kʼujlanjtze tuʼn Nmane» ex «kʼujlaʼn Nmane wuʼne» (Juan 10:17; 14:31). Ex mas chʼiy kʼujlabʼil kyxol tej tikʼ nim millón abʼqʼi (Prov. 8:22, 23, 30). Atzun jaʼlo, qo ximen tiʼj jniʼ bʼis kubʼ tnaʼn Jehová tej tikʼ Tkʼwal toj yajbʼil ex tej ttzaj tqʼoʼn ambʼil tuʼn tkyim. Pero tuʼnju kʼujlaʼn teyele junjun xjal tuʼn Jehová, tzaj tqʼoʼn ambʼil tuʼn tkyim Jesús tuʼntzun tkanet qchwinqlal te jumajx (Juan 3:16; Gál. 2:20). Tuʼn tkyaqil jlu, in nel qnikʼ tiʼj qa tbʼanel tuʼn tok qkʼujlaʼn Jehová.

14. ¿Alkye mas tbʼanel jaku bʼant tuʼna toj tanqʼibʼila?

¹⁴ Olo chʼiy tkʼujlabʼila tiʼj Jehová akux in nel mas tnikʼa tiʼj. Jaku txi qqʼamaʼn qa taja tuʼn kukx tchʼiy tamiwbʼila tukʼil Jehová toj ambʼil jaʼlo ex te jumajx. Jaku  tzalaj tanmi Jehová tuʼna tukʼil tyola ex tukʼil tbʼinchbʼena. Ex tukʼil kʼujlabʼil in tzaj tqʼamaʼn tuʼn tbʼant jlu tuʼna (Prov. 23:15, 16). Qa ma jaw tjyoʼna aju mas tbʼanel, kbʼel tyekʼina qa ax tok in nok tkʼujlaʼna Jehová (1 Juan 5:3). Qa ma kubʼ tbʼinchaʼna aju in tzalaj tiʼj, atzun mas tbʼanel jaku bʼant tuʼna.

15. ¿Tzeʼn jaku kubʼ tyekʼina qa kʼujlaʼn Jehová tuʼna?

¹⁵ ¿Tzeʼn jaku kubʼ tyekʼina qa kʼujlaʼn Jehová tuʼna? Tnejel, bʼinchama jun naʼj Dios jatumel kxel tqʼamaʼna te qa kʼajbʼela te (Sal. 40:8). Tibʼajxi jlu, il tiʼj tuʼn tbautisarina tuʼntzun tkubʼ tyekʼina aju xi tqʼamaʼna te Jehová toj tnaʼj Diosa. Ik tzeʼn ma txi qqʼamaʼn kyoj tnejel párrafo, in tzalaj jun pakbʼal aj tbautisarin ex atzun qʼij mas nim toklen toj tanqʼibʼil. Atxix toj qʼij aju, kxel tbʼinchaʼna tajbʼil Jehová ex nya aju teya tajbʼil (Rom. 14:8; 1 Ped. 4:1, 2). Atzun jlu mas tbʼanel jaku bʼant tuʼna tuʼnju in tzaj tqʼoʼn ambʼil teya tuʼn ttzalaja tiʼj tanqʼibʼila. Qo xnaqʼtzan tiʼj tiquʼn.

16. Ik tzeʼn in tzaj tqʼamaʼn Salmo 41:12, ¿tiʼ kʼiwlabʼil tzul kykʼamoʼn qeju in kubʼ kyximen tuʼn kyajbʼen te?

¹⁶ A Jehová mas tbʼanel qʼon oyaj. Tuʼntzunju, noq jniʼxku jaku txi tqʼoʼna te, tzul tqʼoʼn mas twitzju otoq txi tqʼoʼna te (Mar. 10:29, 30). Axpe ikx toj ambʼil jaʼlo, tzul tqʼoʼn jun tbʼanel tanqʼibʼila jatumel kbʼel tnaʼna nim tzalajbʼil maske at nim nya bʼaʼn. Atzun in xi tzyet tajbʼebʼila te Jehová ex kukx jaku ten te jumajx. Kukx jaku chʼiy kʼujlabʼil kyxole tukʼil Jehová ex jaku tzʼanqʼina te jumajx ik tzeʼn te (kjawil uʼjit Salmo 41:12).

17. ¿Alkye jun tiʼ nim toklen jaku txi tqʼoʼna te Jehová?

¹⁷ A Jehová in tzaj qʼonte tkyaqil tbʼanel tiʼchaq at teya ex qe tbʼanel ambʼil in tzalaja tiʼj. Pero qa ma txi tqʼamaʼna te Jehová tuʼn tajbʼena te ex qa ma bautisarina, jaku txi tqʼoʼna jun tiʼ nim toklen te. ¿Alkye? Aju tuʼn ttena tzʼaqli twitz ex tuʼn tajbʼena te (Job 1:8; 41:11; Prov. 27:11). Mintiʼ juntl tiʼ mas tbʼanel jaku bʼant tuʼna toj  tanqʼibʼila. Qʼuqli qkʼuʼj tiʼj qa kbautisarila tuʼnju kʼujlaʼn Jehová tuʼna.

18. ¿Alkyeqe xjel bʼaʼn tuʼn t-ximana tiʼj?

¹⁸ Tuʼn tkyaqilju ma qo xnaqʼtzan tiʼj, ¿in kubʼpe t-ximana tuʼn tbautisarina? Aya ojtzqilte tzaqʼwebʼil. Jun tiʼ jaku tzʼonin tiʼja aju qa ma kubʼ t-xjelina jlu: «¿Mape bʼant ntene tuʼn nbautisarine?» (Hech. 8:36). Ma tzʼel qnikʼ tiʼj oxe tiquʼn tuʼn qbautisarin ex bʼaʼn tuʼn kytzaj qnaʼn. Tnejel, aju qkʼujlabʼil tiʼj axix tok ex tiʼjju tzʼaqli. Xjelinkuya jlu: «¿Wajpeye tuʼn tpon ambʼil jatumel kykyaqil xjal che yolil tiʼj yol axix tok ex kxel kybʼinchaʼn qe tiʼchaq toj tumel?». Tkabʼin, aju qkʼujlabʼil tiʼj Jesús. Xjelinkuya jlu: «¿Wajpeye tuʼn tkawin Jesús wibʼaje ex tuʼn wok lepeʼye tiʼj?». Ex aju toxin ex mas nim toklen, aju qkʼujlabʼil tiʼj Jehová. Xjelinkuya jlu: «¿Wajpeye tuʼn wajbʼene te Jehová ex tuʼn ttzalaj tanmi wuʼne?». Qa taj teya tuʼn tbʼant tkyaqil jlu, tbʼanel qa ma kubʼ t-ximana tuʼn tbautisarina (Hech. 16:33).

19. ¿Tiquʼn mintiʼ tuʼn tkubʼ t-ximana kabʼe maj tuʼn tbautisarina? Qʼamantza jun techel (Juan 4:34).

¹⁹ Qa mintiʼ ojtzqiʼn tuʼna qa kbautisarila, bʼaʼn tuʼn t-ximana tiʼj jun techel yolin Jesús tiʼj (kjawil uʼjit Juan 4:34). Tqʼama Jesús qa ok ik tzeʼn twa tej t-xi tbʼinchaʼn tajbʼil Jehová. ¿Tiquʼn? Tuʼnju in nonin wabʼj qiʼj tuʼn qten bʼaʼn. Ojtzqiʼntoq tuʼn Jesús qa tbʼanel tkyaqilju in tzaj tqanin Jehová qe. Mintiʼ in tzaj tqanin Jehová tuʼn t-xi qbʼinchaʼn jun tiʼ jaku tzaj tiʼn nya bʼaʼn qiʼj. Tuʼntzunju, taj Jehová tuʼn tbautisarina (Hech. 2:38). Ex jaku tzʼok qeʼ tkʼuʼja tiʼj qa ktel tbʼanel tanqʼibʼila qa ma bautisarina. Qa ma tzaj qʼoʼn wabʼj mas tbʼanel teya, mlaylo kubʼ t-ximana kabʼe maj tuʼn t-xi twaʼna. Qa ikju, ax ikx miʼn kubʼ t-ximana kabʼe maj tuʼn tbautisarina.

20. ¿Tiʼ kʼelel qnikʼ tiʼj toj juntl xnaqʼtzbʼil?

²⁰ ¿Tiquʼn ateʼ junjun mintiʼ in che bautisarin? Bʼalo tuʼnju in kubʼ kyximen qa naʼmx tbʼant kyten. Aj t-xi tqʼamaʼna te Jehová tuʼn tajbʼena te ex tuʼn tbautisarina, atzun jlu mas nim toklen kbʼantel tuʼna toj tanqʼibʼila. Tuʼntzunju, bʼaʼn tuʼn tel tpaʼna ambʼil tuʼn t-ximana tiʼj ex tuʼn tokxix tilil tuʼna tuʼn tbʼant ttena. Pero qa taja tuʼn tbautisarina, ¿tiʼ jaku tzʼonin tiʼja tuʼn tbʼant jlu tuʼna? Atzun jlu kʼelel qnikʼ tiʼj toj juntl xnaqʼtzbʼil.