1. ¿Alkye mas tbʼanel in nela toj kywitz xjal aj kypon tnejel maj toj jun chmabʼil? (Ax ikx qʼonka twitza tiʼj foto).

 QO XIMEN tiʼj jun mejebʼleʼn in pon tnejel maj toj jun chmabʼil. In kubʼ kynaʼn tzalajbʼil tuʼnju in kubʼ kyyekʼin erman tbʼanel kymod kyukʼil ex in nok kykeʼyin qa ax tok at kʼujlabʼil kyxol. Ajtzun kymeltzʼaj kyja, in xi tqʼamaʼn xuʼjilbʼaj te tchmil: «Tbʼanelxix kymod testigo de Jehová ex ngane».

2. ¿Tiquʼn ateʼ junjun in kyaj kytzaqpiʼn tuʼn kyajbʼen te Jehová?

² Tbʼanelxix kʼujlabʼil at toj ttnam Jehová. Pero nya tzʼaqli qe testigo de Jehová (1 Juan 1:8). Tuʼntzunju, qa mas ma che ok qojtzqiʼn qe erman, maslo kʼelel qnikʼ tiʼj alkye kypaltil (Rom. 3:23). Bʼisbʼajil tuʼnju ateʼ junjun erman ya mintiʼ in che ajbʼen te Jehová noq tuʼnju in che el txalpaj txqantl.

3. ¿Tzeʼn jaku tzʼel qnikʼ kyiʼj axix tok t-xnaqʼtzbʼen Jesús? (Juan 13:34, 35).

³ Qbʼinx aju in tzaj tqʼamaʼn texto jatumel ma jatz xnaqʼtzbʼil lu (kjawil uʼjit Juan 13:34, 35). ¿Tzeʼn jaku tzʼel qnikʼ kyiʼj axix tok okslal? Kʼelel qnikʼ kyiʼj qa at kykʼujlabʼil ex nya tuʼnju in che el txalpaj. Ex mintiʼ tqʼama Jesús jlu: «Tuʼntzun jlu kʼelel kynikʼe tiʼj qa nxnaqʼtzbʼen qeye», sino tqʼama jlu: «Tuʼntzun jlu kʼelel kynikʼ kykyaqil xjal kyiʼje qa nxnaqʼtzbʼen qeye». Kyuʼn yol lu, tqʼama Jesús qa kʼelel kynikʼ t-xnaqʼtzbʼen tiʼj ex qe txqantl xjal alkyeqe axix tok okslal tuʼn kʼujlabʼil in kubʼ kyyekʼin kyxolx.

4. ¿Alkyeqe xjel jaku che ximen junjun tiʼj?

⁴ In kubʼ kyxjelin junjun xjal naʼmx kyok te testigo de Jehová jlu: «¿Tiquʼn in nel nikʼbʼaj kyiʼj axix tok okslal tuʼn kʼujlabʼil? ¿Tzeʼn kubʼ tyekʼin Jesús kʼujlabʼil lu kyiʼj t-apóstol? ¿Ex tzeʼn jaku tzʼel qkanoʼn tiʼj Jesús?». Qa ya in qo ajbʼen te Jehová, ax ikx bʼaʼn tuʼn qximen kyiʼj xjel lu. Qa ma bʼant jlu quʼn, kʼonil qiʼj tuʼn tkubʼ qyekʼin qkʼujlabʼil, mas aj kyel txalpaj txqantl (Efes. 5:2).

5. ¿Alkye kʼujlabʼil in yolintoq Jesús tiʼj toj Juan 15:12 ex 13?

⁵ Kyuʼn yol tqʼama Jesús, tqʼama qa tbʼanel kʼujlabʼil ktel kyxol t-xnaqʼtzbʼen (kjawil uʼjit Juan 15:12, 13). Qo ximen tiʼjju mandamyent xi tqʼoʼn kye. Tqʼama jlu: «Tuʼn kykʼujlante kyibʼe kyxolxe, ik tzaʼn weye ma che nkʼujlaye». ¿Alkye kʼujlabʼil in yolintoq tiʼj? Ax Jesús kyaj qʼamante qa atz in yolin tiʼj kʼujlabʼil in nonin tiʼj jun okslal tuʼn t-xi tqʼon tibʼ tuʼn tkyim te t-xel jun terman. b

6. ¿Alkye tten in tzaj tqʼamaʼn Tyol Dios qa nim toklen kʼujlabʼil?

⁶ In tzaj tyekʼin Biblia qa nim toklen kʼujlabʼil. In tzaj kyqʼamaʼn junjun qa kygan qeju versículo lu: «Ate Dios at tkʼujlalil» (1 Juan 4:8). «Kykʼujlame qe kyukʼile ik tzaʼnx kyeye in kykʼujlan kyibʼe» (Mat. 22:39). «Qa at kykʼujlalile, knajsetel nimku kyil txqantl kyuʼne» (1 Ped. 4:8). Ex «aju kʼujlalil mlay bʼaj» (1 Cor. 13:8). In tzaj kyyekʼin versículo lu qa nim toklen tuʼn tten qkʼujlabʼil ex tuʼn tkubʼ qyekʼin kyiʼj txqantl.

7. ¿Tiquʼn mlayx tzʼonin Satanás tuʼn tten mujbʼabʼil ex kʼujlabʼil kyxol xjal?

 ⁷ Ateʼ nim xjal in kubʼ kyxjelin jlu: «¿Tzeʼn jaku tzʼel nnikʼe tiʼj alkye axix tok okslabʼil? Kykyaqilx in tzaj kyqʼamaʼn qa in tzaj kyxnaqʼtzaʼn axix tok, pero junxitl xnaqʼtzbʼil in tzaj kyqʼoʼn tiʼj Dios». In nonin Satanás tuʼn kyten nim okslabʼil nya ax tok, tuʼntzunju in che el tzpet xjal. Pero mintiʼ in nonin tuʼn tten mujbʼabʼil ex kʼujlabʼil kyxol xjal te junxichaq tnam. Mlayx bʼant jlu tuʼn. Oʼkx Jehová in nonin qiʼj tuʼn tten kʼujlabʼil qxol tuʼnju atz tzajni kʼujlabʼil tukʼil. Ex oʼkx jaku kubʼ kyyekʼin xjal kʼujlabʼil axix tok qa in tzaj kykʼamoʼn xewbʼaj xjan ex qa kʼiwlaʼn qe tuʼn Jehová (1 Juan 4:7). Tuʼntzunju, tqʼama Jesús qa kʼelel nikʼbʼaj tiʼj alkyeqe t-xnaqʼtzbʼen qa ma kubʼ kyyekʼin axix tok kʼujlabʼil kyxolx.

8, 9. Tuʼnju at kʼujlabʼil kyxol testigo de Jehová, ¿tzeʼn o tzʼonin jlu kyiʼj mas xjal?

⁸ Ik tzeʼn kyaj tqʼamaʼn Jesús, ateʼ nim xjal o tzʼel kynikʼ tiʼj alkyeqe axix tok okslal noq tuʼnju in kubʼ kyyekʼin kykʼujlabʼil kyxolx. Jun techel, kukx in tzaj tnaʼn jun ermano Yan tbʼi tzeʼn ok ambʼil tej t-xi toj tnejel asamblea, aju ok toj jun estadio nqayin tiʼj tja. Tqʼama jlu: «Junxitl ok ambʼil lu. Kubʼ kyyekʼin testigo de Jehová tbʼanel kymod, tok tbʼanel kyxbʼalun ex mintiʼtoq in che molestarin kykʼwal». Ex tqʼamatl jlu: «Pero mas tbʼanel ela toj nwitze tej tok nkeʼyine qa kykyaqilx in che tzalaj, at mujbʼabʼil kyxol ex atzun jlu in chin jyontoqe tiʼj. Mintiʼ naʼn jun discurso wuʼne, oʼkx in ntzaj nnaʼne aju tbʼanel kymod testigo de Jehová». c Aju ok tkeʼyin Yan, atzun kʼujlabʼil axix tok at qxol. Tuʼnju kʼujlaʼnxix qe erman quʼn, in kubʼ qyekʼin tbʼanel qmod kyukʼil ex in qo respetarin kye.

⁹ Ax jlu bʼaj tiʼj jun ermano John tbʼi tej t-xiʼ tnejel maj toj jun Ja te Chmabʼil. Jaw labʼin tiʼj tbʼanel kymod kykyaqilx ex tiʼjju in bʼant kyuʼn, tuʼntzunju tqʼama jlu: «El nnikʼe tiʼj qa aʼye in che ok te okslal axix tok tuʼnju kʼujlabʼil at kyxol». d Noqtzun tuʼnj, at mas experiencia jatumel in tzaj kyyekʼin qa aʼye testigo de Jehová in che ok te okslal axix tok.

10. ¿Toj alkye ambʼil jaku tzʼok qkʼujlabʼil toj prueba? (Ax ikx qʼonka twitza tiʼj tqanil).

¹⁰ Ik tzeʼn ma txi qqʼamaʼn kyoj tnejel párrafo, qkyaqilx aj il qoʼ. Kpol ambʼil jatumel jaku tzaj tqʼamaʼn moqa jaku kubʼ tbʼinchaʼn jun erman jun tiʼ jaku tzaj qbʼis tuʼn (Sant. 3:2). e Toj ambʼil lu, kʼokel qkʼujlabʼil toj prueba. ¿Tiʼ kʼonil qiʼj tuʼn tkubʼ qyekʼin tbʼanel qmod ex qkʼujlabʼil? Qo xnaqʼtzan tiʼj techel kyaj tqʼoʼn Jesús qwitz (Juan 13:15).

11. Jun maj, ¿tiʼ kubʼ kyyekʼin apóstol Santiago ex Juan? (Ax ikx qʼonka twitza kyiʼj dibujo).

¹¹ Mintiʼ kubʼ t-ximen Jesús qa tzʼaqli qe t-xnaqʼtzbʼen. Tej kyel txalpaj, onin Jesús kyiʼj tukʼil kʼujlabʼil tuʼntzun tok tilil kyuʼn tuʼn ttzalaj Jehová kyiʼj. Jun maj, kyajtoq apóstol Santiago ex Juan tuʼn ttzaj qʼoʼn aju qʼuqbʼil mas tbʼanel kye toj Tkawbʼil Dios. Tuʼntzunju, xi kyqʼamaʼn te kytxuʼ tuʼn t-xi tqʼamaʼn jlu te Jesús (Mat. 20:20, 21). Kubʼ kyyekʼin kabʼe  apóstol lu qa jaw kynimsan kyibʼ ex qa kyajtoq tuʼn tok qʼoʼn mas kyoklen (Prov. 16:18).

12. ¿Tiquʼn ojtzqiʼn quʼn qa nya oʼkx apóstol Santiago ex Juan ten jun nya bʼaʼn kymod?

¹² Toj ambʼil aju, nya oʼkx apóstol Santiago ex Juan kubʼ kyyekʼin nya bʼaʼn kymod. Qbʼinx tiʼ bʼant kyuʼn mas apóstol tej tok kybʼiʼn jlu: «Tej kybʼinte qeju lajtl t-xnaqʼtzbʼen, tzaj kyqʼoj kyiʼj qeju kabʼe kyitzʼin kyibʼ» (Mat. 20:24). Tuʼn jlu in kubʼ qximen qa tzaj qʼoj kyxol apóstol. Bʼalo xi kyqʼamaʼn txqantl apóstol jlu te Santiago ex Juan: «¿Tiʼtzun kyoklene at tuʼn t-xi kyqanine aju qʼuqbʼil mas tbʼanel toj Tkawbʼil Dios? Nya oʼkx kyeye in nok tilil kyuʼne tuʼn kyaqʼunane tukʼil Jesús. Ax ikx qeye, qaje tuʼn ttzaj qʼoʼn qʼuqbʼil mas tbʼanel qeye toj Tkawbʼil Dios». Noq tiʼxku bʼaj, pero ya mintiʼ kubʼ kyyekʼin apóstol kʼujlabʼil kyxolx toj ambʼil aju.

13. ¿Tiʼ tmod Jesús kubʼ tyekʼin kyukʼil t-apóstol maske i el txalpaj? (Mateo 20:25-28).

¹³ ¿Tiʼ tmod Jesús kubʼ tyekʼin kyiʼj apóstol toj ambʼil aju? Mintiʼ tzaj tqʼoj, mintiʼ xi tqʼamaʼn qa tzul tjyoʼn qe xjal mintiʼ in jaw kynimsan kyibʼ te kyxel ex in kubʼ kyyekʼin kykʼujlabʼil kyxolx toj tkyaqil ambʼil, ex qa tuʼn t-xi tjyoʼn junjuntl xjal jaku che ok te tbʼanel apóstol. Sino ten tpasens kyiʼj tuʼnju el tnikʼ tiʼj qa attoq jun tbʼanel kyanmi (kjawil  uʼjit Mateo 20:25-28). Maske nya a tnejel maj nix mankbʼil maj kubʼ kyyekʼin apóstol qa in che jyon tiʼj alkye mas nim toklen, kukx kubʼ tyekʼin Jesús tkʼujlabʼil kyiʼj (Mar. 9:34; Luc. 22:24).

14. ¿Tzeʼntoq kymod xjal toj ambʼil tej kyjaw chʼiy t-apóstol Jesús?

¹⁴ Jaku txi qqʼamaʼn qa ximen Jesús tiʼjju kymod xjal ten toj ambʼil tej kyjaw chʼiy apóstol (Juan 2:24, 25). Toj ambʼil aju, xi kyjyoʼn nejenel kye okslabʼil tumel tzeʼn tuʼn tok qʼoʼn kyoklen kyuʼn xjal ex tuʼn kykawin kyibʼaj txqantl (Mat. 23:6; mojbʼankuya tukʼil video Asientos del frente en la sinagoga toj nota de estudio te Mateo 23:6). Axpe ikx, kubʼ kyximen nejenel kye okslabʼil qa mas nimtoq kyoklen kywitz txqantl (Luc. 18:9-12). f Ojtzqiʼntoq tuʼn Jesús qa ax kyximbʼetz apóstol jaku ten kyiʼjx ex kyiʼj txqantl (Prov. 19:11). Mintiʼ kubʼ t-ximen qa mlaytoq che el txalpaj t-xnaqʼtzbʼen ex mintiʼ tzaj tqʼoj kyiʼj. El tnikʼ tiʼj qa attoq jun tbʼanel kyanmi. Tuʼntzunju, onin kyiʼj tukʼil pasens tuʼn miʼn tjaw kynimsan kyibʼ ex tuʼn tkubʼ kyyekʼin kykʼujlabʼil.

15. ¿Tiʼ xnaqʼtzbʼil jaku tzʼel qiʼn tiʼjju bʼaj tiʼj Santiago ex Juan?

¹⁵ Jaku tzʼel qiʼn nim xnaqʼtzbʼil tiʼjju bʼaj tiʼj Santiago ex Juan. Nya toj tumel bʼant kyuʼn tej t-xi kyqanin tuʼn ttzaj qʼoʼn qʼuqbʼil mas tbʼanel kye toj Tkawbʼil Dios. Ex nya tbʼanel aju bʼant kyuʼn txqantl apóstol tuʼnju xi kyqʼoʼn ambʼil te jlu tuʼn tel tiʼn mujbʼabʼil kyxol. Atzunte Jesús, kubʼ tyekʼin tbʼanel tmod ex tkʼujlabʼil kyiʼj qeju 12 t-apóstol. ¿Tiʼ jaku tzʼel qkanoʼn tiʼj? Nya oʼkx tuʼn qximen tiʼj nya bʼaʼn in bʼant kyuʼn txqantl, sino ax ikx qo ximel tiʼj tiʼ qmod in kubʼ qyekʼin aj kyel txalpaj. Tuʼntzunju, aj tkubʼ qnaʼn nya bʼaʼn tuʼn jun tiʼ in bʼant tuʼn juntl erman, bʼaʼn tuʼn tkubʼ qxjelin jlu: «¿Tiquʼn ma tzaj nqʼoje tiʼjju ma bʼant tuʼn erman? ¿Ilpe tiʼj tuʼn tkubʼ nchʼexpuʼne nmode? ¿Atpe jun nya bʼaʼn in bʼaj tiʼj erman? ¿Nyapelo mas bʼaʼn tuʼn tkubʼ nyekʼine nkʼujlabʼile ex tuʼn tikʼ tnaʼl wuʼne maske in kubʼ nximane qa nya toj tumel aju ma bʼant tuʼn?». Qa kukx ma kubʼ qyekʼin qkʼujlabʼil kyiʼj erman, in kubʼ qyekʼin qa axix tok okslal qoʼ.

16. ¿Alkye juntl xnaqʼtzbʼil jaku tzʼel qiʼn tiʼj techel kyaj tqʼoʼn Jesús?

¹⁶ Ax ikx in nonin techel kyaj tqʼoʼn Jesús qwitz tuʼn tel qnikʼ tiʼjju in bʼaj kyiʼj erman (Prov. 20:5). In neltoq tnikʼ Jesús tiʼjju tkuʼx toj kyanmi xjal, atzun qe mintiʼ. Pero at jun tiʼ jaku bʼant quʼn aj kyel txalpaj erman, jaku ten qpasens kyiʼj (Efes. 4:1, 2; 1 Ped. 3:8). Jun tiʼ jaku tzʼonin qiʼj, aju qa ma tzʼel qpaʼn ambʼil tuʼn kyok qojtzqiʼn. Qo xnaqʼtzan tiʼj jun techel.

17. ¿Tiʼ bʼaj tej tok tilil tuʼn jun ansyan in bʼet kyojele Ja te Chmabʼil tuʼn tok tojtzqiʼn jun ermano?

¹⁷ Ajbʼen jun ermano te ansyan in bʼet kyojele Ja te Chmabʼil atz África oriental. Tej tten atz, ok tojtzqiʼn jun erman ex kubʼ t-ximen qa kwest chʼin tmod. ¿Tiʼ bʼant tuʼn ansyan in bʼet kyojele Ja te Chmabʼil? ¿Xipe tqʼoʼn ambʼil tuʼn kukx tten t-ximbʼetz ik tzeʼn jlu? Tqʼama jlu:  «Kubʼ nximane tuʼn tok wojtzqiʼne twitzju tuʼn wel oqe tiʼj». Iktzun tten el tnikʼ tikʼ tiʼj tiquʼn junxitl tmod erman. Tqʼamatl jlu: «Tej tel nnikʼe tiʼj qa otoq tzʼok tilil tuʼn tuʼn tkyaj ttzaqpiʼn aju ojtxe tten tanqʼibʼil ex qa otoq chʼiy toj tokslabʼil, in jaw tzalaje tiʼj. Ok qamiwen qibʼe». Qa ma tzʼok tilil quʼn tuʼn kyok qojtzqiʼn qe erman ex tuʼn tel qnikʼ kyiʼj, mas nya kwest kʼelel toj qwitz tuʼn tkubʼ qyekʼin qkʼujlabʼil kyiʼj.

18. ¿Alkyeqe xjel jaku qo ximen tiʼj qa ma tzaj qbʼis tuʼn jun erman? (Proverbios 26:20).

¹⁸ Atlo maj jaku kubʼ qximen qa il tiʼj tuʼn qyolin tukʼil jun erman otoq tzʼok tbʼinchaʼn jun nya bʼaʼn qiʼj. Pero naʼmxtoq tbʼant jlu quʼn, bʼaʼn tuʼn tkubʼ qxjelin jlu: «¿Ojtzqiʼnpe wuʼne tkyaqilju in bʼaj?» (Prov. 18:13). «¿Mape kubʼ t-ximen erman tuʼn tbʼant jlu tuʼn?» (Ecl. 7:20). «Yajtzun weye, ¿ope bʼant jlu wuʼne jun maj?» (Ecl. 7:21, 22). «Qa ma chin yoline tukʼil erman, ¿maspe tzul tiʼn nya bʼaʼn?» (kjawil uʼjit Proverbios 26:20). Qa ma tzʼel qpaʼn ambʼil tuʼn qximen kyiʼj xjel ik tzeʼn jlu, bʼalo jaku tzʼel qnikʼ tiʼj qa mas bʼaʼn tuʼn tkubʼ qyekʼin qkʼujlabʼil ex tuʼn tikʼ tnaʼl qe tiʼchaq quʼn.

19. ¿Tiʼ qaj tuʼn tbʼant quʼn?

¹⁹ Qa ma qo yolin kyiʼj kykyaqil testigo de Jehová, in nel nikʼbʼaj tiʼj qa aʼye in che ok te axix tok t-xnaqʼtzbʼen Jesús. ¿Ex tiʼ jaku bʼant tuʼn teyele junjun qe? Bʼaʼn tuʼn tkubʼ qyekʼin qkʼujlabʼil kyiʼj kykyaqil erman maske in che el txalpaj. Qa ma bʼant jlu quʼn, jaku tzʼonin kyiʼj txqantl xjal tuʼn tel kynikʼ tiʼj alkye okslabʼil axix tok ex jaku che kʼulin junx qukʼil te Jehová, aju Dios te kʼujlabʼil. Tuʼntzunju, bʼaʼn tuʼn tok tilil quʼn tuʼn tkubʼ qyekʼin axix tok kʼujlabʼil qxolx, aju in nonin tuʼn tel nikʼbʼaj qiʼj qa axix tok okslal qoʼ.