1, 2. Qa naʼmx tbʼant ttena tuʼn tbautisarina, ¿tiquʼn mintiʼ tuʼn ttzaj bʼaj tkʼuʼja? (Qʼonka twitza kyiʼj foto tok tiʼj revista).

 IN QO tzalaje tiʼja qa o kubʼ t-ximana tuʼn tbautisarina. ¿Ope bʼant ttena tuʼn tbʼant jlu tuʼna? Qa in kubʼ t-ximana qa o bʼant ttena ex qa ax jlu in kubʼ kyximen ansyan, miʼn txi tqʼoʼna nim ambʼil te. Iktzun tten jaku tzalaja qa ma tzʼajbʼena te Jehová.

² ¿Yajtzun qa ma tzaj qʼamaʼn teya qa naʼmx tbʼant ttena tuʼn tbautisarina? ¿Moqa in kubʼ t-ximana qa naʼmx tbʼant ttena? Miʼn tzaj bʼaj tkʼuʼja ex bʼaʼn tuʼn tok tilil tuʼna tuʼn tbautisarina, qa kuʼxuna moqa ya ma tijena.

3. ¿Tiʼ xi tqanin jun xjal te Etiopía te Felipe ex alkye xjel jaku qo ximen tiʼj? (Hechos 8:36, 38).

³ (Kjawil uʼjit Hechos 8:36, 38). Xi tqanin jun xjal te Etiopía jlu te Felipe: «¿Myapelo bʼaʼn tuʼn nbʼyane?». Tuʼn jlu kubʼ tyekʼin xjal qa tajtoq tuʼn tbautisarin. Pero, ¿otoqpe bʼant tten?

4. ¿Tzeʼn kubʼ tyekʼin xjal te Etiopía qa tajtoq tuʼn tten mas tojtzqibʼil?

⁴ Otoq pon xjal te Etiopía «tuj Jerusalén kʼulul te Dios» (Hech. 8:27). Tuʼn jlu in nel qnikʼ tiʼj qa in najbʼentoq toj kyokslabʼil judiy. Ojtzqintoq plaj Tyol Dios kubʼ tzʼibʼin toj yol hebreo tuʼn ex otoq tzʼel tnikʼ tiʼj Jehová. Pero tajtoq tuʼn tel mas tnikʼ tiʼj. ¿Tiʼtoq in bʼant tuʼn tej tkanet tuʼn Felipe toj bʼe? In uʼjintoq tiʼj jun rollo kubʼ ttzʼibʼin profeta Isaías (Hech. 8:28). Kwesttoq tuʼn tel nikʼbʼaj tiʼj xnaqʼtzbʼil lu. Nya oʼkxtoq taj xjal te Etiopía tuʼn tel tnikʼ kyiʼj junjun xnaqʼtzbʼil, sino tajtoq tuʼn tten mas tojtzqibʼil.

5. ¿Tiquʼn jaku txi qqʼamaʼn qa kubʼ tbʼinchaʼn xjal te Etiopía aju el tnikʼ tiʼj?

⁵ Nimtoq toklen xjal te Etiopía tuʼnju in naqʼunantoq tukʼil reina te tnam aju. Ex «tuj tkwent taʼ aju tqʼinumabʼl xuʼj rey» (Hech. 8:27). Bʼalo attoq nim taqʼun ex mintiʼlo ambʼil tiʼj. Noqtzun tuʼnj, ok tilil tuʼn tuʼn tel tpaʼn ambʼil tuʼn tkʼulin te Jehová. Nya oʼkx el tnikʼ tiʼj axix tok, sino kubʼ tbʼinchaʼn aju el tnikʼ tiʼj. Ok tilil tuʼn tuʼn t-xiʼ tzmax toj tnam Jerusalén tuʼn tkʼulin te Jehová. Xilo tiʼn nim ambʼil ex nim pwaq tuʼn tpon, pero ok tilil tuʼn tuʼn tkʼulin te Jehová.

6, 7. ¿Tiʼ bʼant tuʼn xjal te Etiopía tuʼn tchʼiy tkʼujlabʼil tiʼj Jehová?

⁶ Xi tchikʼbʼaʼn Felipe te xjal te Etiopía junjun xnaqʼtzbʼil nim toklen. ¿Tiquʼn? Tuʼnju ateʼ junjun mintiʼtoq ojtzqiʼn tuʼn ik tzeʼn qa a Jesús Mesías (Hech. 8:34, 35). Tej tok tbʼiʼn xjal te Etiopía aju otoq bʼant tuʼn Jesús tiʼj, jaku txi qqʼamaʼn qa kuʼpin toj tanmi. ¿Tiʼtoq jaku bʼant tuʼn? Jakutoq kubʼ t-ximen tuʼn miʼn tbʼant jun tiʼ tuʼn ex tuʼn kukx tok qʼoʼn toklen kyuʼn xjal Judiy. Pero otoq chʼiy tkʼujlabʼil tiʼj Jehová ex tiʼj Jesús ex atzun jlu onin tiʼj tuʼn tbautisarin tuʼntzun tok lepeʼ tiʼj Jesús. Ok tkeʼyin Felipe qa otoq bʼant tten, tuʼntzunju kux tqʼoʼn toj aʼ tuʼn tbautisarin.

⁷ Jaku tzʼonin techel kyaj tqʼoʼn xjal te Etiopía tiʼja tuʼn tbautisarina. Ax ikx teya jaku txi tqʼamaʼna jlu tuʼn tkyaqil tkʼuʼja: «¿Myapelo bʼaʼn tuʼn nbʼyane?». Qo xnaqʼtzan tiʼj tiʼ jaku bʼant tuʼna tuʼntzun tel tkanoʼna aju bʼant tuʼn. Jun, tuʼn kukx t-xnaqʼtzana, tkabʼin, tuʼn t-xi tbʼinchaʼna aju in nel tnikʼa tiʼj ex toxin, tuʼn kukx tchʼiy tkʼujlabʼila tiʼj Jehová.

8. Ik tzeʼn in tzaj tqʼamaʼn Juan 17:3, ¿tiʼ il tiʼj tuʼn tbʼant quʼn?

⁸ (Kjawil uʼjit Juan 17:3). ¿E oninpe qe tyol Jesús lu tiʼja tuʼn tkubʼ t-ximana tuʼn t-xnaqʼtzana tiʼj Biblia? Atzun jlu o bʼaj kyiʼj nimku xjal. Ex in che onin yol lu qiʼj tuʼn kukx qxnaqʼtzan. Kukx kʼokel tilil quʼn tuʼn qxnaqʼtzan tuʼn tok qojtzqiʼn aju «Dios axix tok» tuʼnju mintiʼ bʼajsbʼil te (Ecl. 3:11). Ex kukx qo xnaqʼtzal tiʼj Jehová te jumajx. Mas qo okel laqʼeʼ ttxlaj Jehová qa mas ma tzʼok qojtzqiʼn (Sal. 73:28).

9. ¿Tiʼ mas kbʼantel quʼn aj tel qnikʼ kyiʼj tnejel xnaqʼtzbʼil toj Tyol Dios?

⁹ Aj t-xi tzyet tuʼn tel qnikʼ tiʼj Jehová, tnejel in qo xnaqʼtzan kyiʼj «tnejel xnaqʼtzbʼil tiʼj tyol Dios» ik tzeʼn tqʼama apóstol Pablo toj carta xi ttzʼibʼin kye okslal  hebreo. Nya tuʼn jlu el tiʼn kyoklen «tnejel xnaqʼtzbʼil tiʼj tyol Dios», sino tqʼama qa iktoq kyten ik tzeʼn lech in xi qʼet kye tal neʼ (Heb. 5:12; 6:1). Tuʼntzunju, xi tqʼamaʼn kye okslal tuʼn tel mas kynikʼ tiʼj Tyol Dios ex tuʼn tok kyojtzqiʼn junjun xnaqʼtzbʼil kwest tuʼn tel qnikʼ kyiʼj. ¿Tajpe teya tuʼn tel tnikʼa kyiʼj xnaqʼtzbʼil lu? ¿Tajpeya tuʼn kukx tchʼiy tojtzqibʼila tiʼj Jehová ex tuʼn kukx tel tnikʼa tiʼj t-ximbʼetz?

10. ¿Tiquʼn at maj kwest in nela kye junjun tuʼn kyxnaqʼtzan?

¹⁰ Bʼalo kwest jaku tzʼela toj kywitz junjun tuʼn kyxnaqʼtzan. ¿Yajtzun teya? ¿Tzajpe qʼamaʼn teya toj escuela tuʼn tleerina ex tuʼn t-xnaqʼtzana? ¿Tganpe teya tej tbʼant jlu tuʼna? ¿Moqa kubʼ t-ximana qa nyaxix tgana? Qa ikju, nya oʼkx tiʼja bʼaj jlu. Pero jaku tzʼonin Jehová tiʼja, tuʼnju tzʼaqli ex atzun mas tbʼanel xnaqʼtzal qe.

11. ¿Tiquʼn in nok Jehová te jun tbʼanel «xnaqʼtzal» qe?

¹¹ In tzaj tqʼamaʼn Biblia jlu tiʼj Jehová: «Mlay txi tewan mastl tibʼ kywitze aju xnaqʼtzal kyeye» (Is. 30:20, 21). At tpasens Jehová aj tqʼon xnaqʼtzbʼil, in nel tnikʼ qiʼj, at tbʼanel tmod ex in nok tqʼoʼn twitz kyiʼj tbʼanel tiʼchaq in bʼant quʼn (Sal. 130:3). Mintiʼ in tzaj tqanin mas twitzju jaku bʼant quʼn. Miʼn tzikʼ tnaʼl quʼn qa a Jehová kubʼ bʼinchante qcerebro ex tzaj tqʼoʼn te jun oyaj qe (Sal. 139:14). Ax ikx kyaj tqʼoʼn toj qanmi tuʼn kukx qxnaqʼtzan ex taj tuʼn kukx tbʼant jlu quʼn te jumajx ex tuʼn qtzalaj tiʼj. Tuʼntzunju, bʼaʼn tuʼn tok tilil quʼn tuʼn tpon qkʼuʼj kyiʼj xnaqʼtzbʼil tkuʼx toj Tyol Dios (1 Ped. 2:2). ¿Tiʼ jaku tzʼonin tiʼja? Ximana tiʼj alkye junjun tiʼchaq jaku bʼant tuʼna ex bʼaʼn tuʼn tuʼjina ex tuʼn t-xnaqʼtzana tiʼj Tyol Dios tkyaqil qʼij (Jos. 1:8). Tuʼn tonbʼil Jehová, mas jaku tzalaja aj tuʼjina ex aj t-xnaqʼtzana tiʼj.

12. ¿Tiquʼn nim toklen tuʼn qxnaqʼtzan tiʼj tanqʼibʼil Jesús ex tiʼj tpakbʼabʼil?

¹² Paʼmila ambʼil tuʼn kukx t-ximana tiʼj tanqʼibʼil Jesús ex tiʼj tpakbʼabʼil. Tuʼn qajbʼen te Jehová, nim toklen tuʼn qok lepeʼ tiʼj techel kyaj tqʼoʼn Jesús tuʼnju mas kwest ambʼil jaʼlo (1 Ped. 2:21). Xi tchikʼbʼaʼn Jesús kye t-xnaqʼtzbʼen alkyeqe nya bʼaʼn che okel weʼ twitz (Luc. 14:27, 28). Pero ojtzqiʼntoq tuʼn qa kukx che ajbʼel te Jehová ik tzeʼn te (Juan 16:33). Bʼaʼn tuʼn t-xnaqʼtzana tiʼj tanqʼibʼil Jesús ex bʼaʼn tuʼn tok tilil tuʼna tuʼn tel tkanoʼna tiʼj tkyaqil qʼij.

13. ¿Tiʼ kukx kxel tqanina te Jehová ex tiquʼn?

¹³ Aj qxnaqʼtzan, nya oʼkx qaj tuʼn tten mas qojtzqibʼil, sino qaj tuʼn tel mas qnikʼ tiʼj Jehová, tuʼn tchʼiy qkʼujlabʼil ex qʼuqbʼil qkʼuʼj tiʼj (1 Cor. 8:1-3). Kukx chʼiysama tojtzqibʼila tiʼj Jehová ex kukx qaninxa onbʼil te tuʼn tchʼiy qʼuqbʼil tkʼuʼja (Luc. 17:5). Ktzajel tqʼoʼn aju in xi tqanina te tuʼn tkyaqil tkʼuʼj. Qa ma chʼiy qʼuqbʼil tkʼuʼja tuʼnju at tojtzqibʼila tiʼj Jehová, kukx kchʼiyil tamiwbʼila tukʼil (Sant. 2:26).

14. ¿Alkye tten tzaj tqʼamaʼn apóstol Pedro qa nim toklen tuʼn t-xi qbʼinchaʼn aju in nel qnikʼ tiʼj? (Ax ikx qʼonka twitza tiʼj dibujo).

¹⁴ Xi tqʼamaʼn apóstol Pedro qa nim toklen tuʼn t-xi kybʼinchaʼn aju in neltoq kynikʼ tiʼj. Tej t-xi tqʼamaʼn jlu, yolin tiʼjju bʼant tuʼn Noé. Xi tqʼamaʼn Jehová te Noé qa tzultoq tiʼn nim jbʼal tuʼn tkubʼ tnajsaʼn  qe nya bʼaʼn xjal toj ambʼil aju. Pero nya oʼkx tuʼn tok kybʼiʼn aju kbʼajeltoq. Iltoq tiʼj tuʼn tbʼant jun tiʼ tuʼn Noé kyukʼil toj tja tuʼntzun kyklet. Ajbʼen txol yol akux «in bʼant aju matij barc» tuʼn apóstol Pedro tuʼntzun tyolin tiʼj ambʼil tej chʼixtoq ttzaj nim jbʼal (1 Ped. 3:20). Xi tbʼinchaʼn Noé ex qe toj tja aju tzaj tqʼamaʼn Jehová kye ex kubʼ kybʼinchaʼn jun matij bark (Heb. 11:7). Tibʼajxi jlu ok tmojbʼaʼn Pedro aju bʼant tuʼn Noé tukʼil bautismo. Tqʼama jlu: «Aju aʼ lu o yekʼunjtz naj te jun yekʼbʼil tiʼj ju bʼyabʼl, aju ma qo klet tuʼn jaʼlo» (1 Ped. 3:21). Akux in bʼaj tbʼinchaʼna ttena tuʼn tbautisarina, chʼixme axju in bʼant tuʼna ik tzeʼn bʼant tuʼn Noé kyukʼil toj tja tej tjaw kybʼinchaʼn ark. Qa ikju, ¿tiʼtzun kbʼantel tuʼna tuʼn tbʼaj tbʼinchaʼna ttena tiʼj bautismo?

15. ¿Tiʼ t-xilen tuʼn tajtz tiʼj qanmi?

¹⁵ Jun tiʼ il tiʼj tuʼn tbʼant quʼn, aju tuʼn tajtz tiʼj qanmi tiʼjju il otoq bʼant quʼn (Hech. 2:37, 38). Qa in xi qqʼamaʼn qa in najtz tiʼj qanmi, il tiʼj tuʼn tkubʼ qyekʼin tukʼil qbʼinchbʼen aj kybʼant junjun chʼixpubʼil quʼn. ¿Ope kyaj ttzaqpiʼna junjun tiʼchaq ik tzeʼn yaẍbʼil, sichʼ, qe mal yol ex qe yol nya toj tumel? (1 Cor. 6:9, 10; 2 Cor. 7:1; Efes. 4:29). Qa naʼmx tbʼant jlu tuʼna, kukx qʼonka tilil. Jaku yolina tukʼil erman in qʼon xnaqʼtzbʼil teya ex kyukʼil ansyan qa taja onbʼil moqa consej. Qatzun tzma kuʼxuna ex kukx in nanqʼina kyukʼil tmana, jaku txi tqanina onbʼil kye tuʼntzun tkubʼ tiʼj alkyexku nya bʼaʼn tuʼna tuʼn tbautisarina.

16. ¿Alkye junjun tiʼchaq nim toklen tuʼn tbʼant quʼn tuʼn tten jun tbʼanel qamiwbʼil tukʼil Jehová?

¹⁶ Ax ikx nim toklen tuʼn kukx t-xnaqʼtzana, tuʼn t-xiʼya kyoj chmabʼil ex tuʼn t-xi tqʼoʼna tyola kyoj (Heb. 10:24, 25). Ex qa ma tzaj qʼoʼn toklena tuʼn texa pakbʼal, kukx qʼonka tilil tuʼn tpakbʼana. Qa mas ma bʼant jlu tuʼna, mas ktzalajela tiʼj (2 Tim. 4:5). Qa kuʼxun teya ex kukx in nanqʼina kyukʼil tmana, xjelinkuya jlu: «¿Kukxpe in tzaj kyqʼamaʼn nmane weye qa il tiʼj tuʼn nxiʼye kyoj chmabʼil ex tuʼn nxiʼye pakbʼal? ¿Moqa in bʼant wuʼne tuʼnju ngane?». Qa in xi tbʼinchaʼna qe tiʼchaq  tuʼnju tgana, in kubʼ tyekʼina qa at qʼuqbʼil tkʼuʼja, qa kʼujlaʼn Jehová tuʼna ex qa in xi tqʼoʼna chjonte te. Qa ma tzʼok tilil tuʼna tuʼn tbʼant tkyaqilju at tajbʼen tuʼn tten jun tbʼanel tamiwbʼila tukʼil Jehová, in kubʼ tyekʼina qa in nimana te ex in nok jlu ik tzeʼn in xi tqʼoʼna jun oyaj te (2 Ped. 3:11; Heb. 13:15). Tbʼanel in nela toj twitz qa in xi qqʼoʼn jun oyaj te tuʼn tkyaqil qkʼuʼj ex nya tuʼnju in qo ok obligarin (mojbʼankuya tukʼil 2 Corintios 9:7). Ax ikx qe in kubʼ qnaʼn nim tzalajbʼil aj t-xi qqʼoʼn aju mas tbʼanel te Jehová.

17, 18. ¿Tiʼ jaku tzʼonin tiʼja tuʼn tbautisarina ex tiquʼn? (Proverbios 3:3-6).

¹⁷ Aj tkubʼ t-ximana tuʼn tbautisarina, kʼokel weʼya twitz junjun nya bʼaʼn. Atlo junjun che xmayil tiʼja moqa kʼelel ikʼuna kyuʼn tuʼnju okslala (2 Tim. 3:12). Moqa in nok tilil tuʼna tuʼn tkyaj ttzaqpiʼna jun tiʼ o naqʼeta tiʼj, pero jakulo kubʼ tzʼaqa toj juntl maj. Moqa jaku kubʼ t-ximana qa mlayxlo pon ambʼil tuʼn tbautisarina ex tuʼn jlu jaku tzaj tbʼisa. ¿Tiʼ jaku bʼant tuʼna tuʼn miʼn tkubʼ numja? Oʼkx jaku tzʼonin tkʼujlabʼila at tiʼj Jehová.

¹⁸ Aju tkʼujlabʼila at tiʼj Jehová, atzun mas tbʼanel at teya (kjawil uʼjit Proverbios 3:3-6). Qa ma tzʼok tkʼujlaʼna Jehová tuʼn tkyaqil tkʼuʼja, kʼonil jlu tiʼja tuʼn texa twitz alkyexku nya bʼaʼn. Nimku maj in tzaj tqʼamaʼn Biblia qa tzʼaqli tkʼujlabʼil Jehová at kyiʼj tmajen. A t-xilen jlu qa mintiʼ in qo kyaj ttzaqpiʼn Jehová ex kukx in qo ok tkʼujlaʼn (Sal. 100:5). Bʼaʼn tuʼn ttzaj tnaʼna qa o kubʼ bʼinchaʼna ik tzeʼn te Jehová (Gén. 1:26). Qa ikju, ¿tzeʼn jaku tzʼel tkanoʼna tkʼujlabʼil Jehová?

19. ¿Tiʼ jaku bʼant tuʼna tuʼn t-xi tqʼoʼna chjonte te Jehová tiʼjju in bʼant tuʼn tiʼja? (Gálatas 2:20).

¹⁹ Tnejel, bʼaʼn tuʼn t-xi tqʼoʼna chjonte (1 Tes. 5:18). Xjelinkuya jlu tkyaqil qʼij: «Toj qʼij jaʼlo, ¿tzeʼn saj tyekʼin Jehová weye qa kʼujlaʼn qine tuʼn?». Tibʼajxi jlu, qʼonxa chjonte te toj tnaʼj Diosa. Aj tel tnikʼa tiʼj tkʼujlabʼil Jehová, ximana tiʼj qa oʼkx tiʼja in bʼant jlu tuʼn ik tzeʼn bʼant tuʼn apóstol Pablo (kjawil uʼjit Gálatas 2:20). Ex bʼaʼn tuʼn tkubʼ t-xjelina jlu: «¿Wajpeye tuʼn tkubʼ nyekʼine te Jehová qa kʼujlaʼn wuʼne?». Qa kʼujlaʼn Jehová tuʼna, kʼonil tiʼja tuʼn tkubʼ tiʼj nya bʼaʼn  tuʼna, tuʼn texa kywitz problem ex tuʼn kukx tchʼiy tamiwbʼila tukʼil. Iktzun tten kbʼel tyekʼina tkyaqil qʼij qa kʼujlaʼn Jehová tuʼna.

20. ¿Tiʼ in bʼant quʼn aj t-xi qqʼamaʼn te Jehová qa qo ajbʼel te?

²⁰ Aj tbʼet ambʼil, kʼonil tkʼujlabʼila at tiʼj Jehová tuʼn tbʼant jun naʼj Dios nim toklen tuʼna tuʼn t-xi tqʼamaʼna qa taja tuʼn tajbʼena te. Ex aj tbʼant jlu tuʼna, ktel jun tbʼanel toklena tuʼn toka te tekuxix te jumajx. Aj t-xi tqʼamaʼna te Jehová tuʼn tajbʼena te, in xi ttziyena te qa kʼajbʼela te toj ambʼil bʼaʼn ex toj ambʼil nya bʼaʼn. Oʼkx jun maj in bʼant jlu quʼn toj qanqʼibʼil. Nim toklen jlu, pero bʼaʼn tuʼn ttzaj tnaʼna qa kyxol kykyaqil qe tiʼchaq jaku jaw tjyoʼna, atzun jlu mas tbʼanel jaku bʼant tuʼna (Sal. 50:14). Kʼokel tilil tuʼn Satanás tuʼn tnaj tkʼujlabʼila at tiʼj Jehová tuʼntzun miʼn tajbʼena te. Pero miʼn txi tqʼoʼna ambʼil tuʼn tkambʼan tiʼja (Job 27:5). Qa at nim tkʼujlabʼila tiʼj Jehová, kʼonil tiʼja tuʼn tjapun twiʼ tyola xi ttziyena te ex mas kʼokel laqʼeʼya ttxlaj.

21. ¿Tiquʼn in xi qqʼamaʼn qa atzun in xi tzyet qajbʼebʼil te Jehová aj qbautisarin?

²¹ Aj t-xi tqʼamaʼna te Jehová qa kʼajbʼela te, bʼaʼn tuʼn t-xi tqʼamaʼna kye ansyan qa taja tuʼn tbautisarina. Pero bʼaʼn tuʼn ttzaj tnaʼna qa nya atz in pon bʼaj tkyaqil aj tbautisarina, sino atz in xi tzyet ambʼil tuʼn qajbʼen te Jehová te jumajx. Tuʼntzunju, qʼonka tilil tuʼn tchʼiy tkʼujlabʼila tiʼj Jehová ex bʼinchama junjun tiʼchaq tuʼntzun kukx tchʼiy tkʼujlabʼila tkyaqil qʼij. Atzun jlu kʼonil tiʼja tuʼn tbautisarina. Mlay tzikʼ tnaʼl qʼij lu tuʼna. Ex naʼntza qa atzun kxel tzyet tajbʼebʼila te Jehová. Kukxwit chʼiy tkʼujlabʼila tiʼj Jehová ex tiʼj Tkʼwal.