1, 2. ¿Tiquʼn in xi qqʼamaʼn qa tbʼanel in nok tanqʼibʼil jun xjal aj tbautisarin?

 IN KUBʼ qnaʼn tzalajbʼil aj tbautisarin jun xjal ex in ten kyxol qe toj tja Jehová. Tbʼanelxix tuʼnju at jun qamiwbʼil tukʼil Jehová ex jaku txi qqʼamaʼn chʼixme aʼyex yol ik tzeʼn te salmista David tej tqʼama jlu: «At nim tzalajbʼil teju xjal in jaw t-skʼoʼna [Jehová] ex in pon tiʼna tukʼila tuʼn tten niqayin ttxlaja, ex tuʼn tten tuj tjaya» (Sal. 65:4).

² Nya noq alkyexku xjal jaku ten kyxol qe toj tja Jehová. Ik tzeʼn el qnikʼ tiʼj toj xnaqʼtzbʼil xkyaj, in xi laqʼeʼ Jehová kytxlaj qeju in kubʼ kyyekʼin qa kyaj tuʼn kyok te tamiw (Sant. 4:8). Aj t-xi kyqʼoʼn kychwinqlal te Jehová ex aj kybautisarin, in ten jun tbʼanel kyamiwbʼil tukʼil ex in tzaj ttziyen jlu kye: «[Kxel] nqʼoʼne nimxix nxtalbʼile kyeye» (Mal. 3:10; Jer. 17:​7, 8).

3. ¿Tiʼ il tiʼj tuʼn tbʼant quʼn otoqxi qo bautisarin? (Eclesiastés 5:​4, 5).

³ Atz in xi tzyet tuʼn qajbʼen te Jehová aj qbautisarin. Tibʼajxi jlu, qkyaqilx in nok tilil quʼn tuʼn tjapun twi qyol o txi qtziyen te Jehová ex tuʼn qten tzʼaqli twitz, maske in qo ok weʼ twitz tentación ex nya bʼaʼn (kjawil uʼjit Eclesiastés 5:​4, 5). Ax ikx nim toklen tuʼn qok lepeʼ tiʼj techel kyaj tqʼoʼn Jesús ex tuʼn t-xi qbʼiʼn qe tkawbʼil (Mat. 28:​19, 20; 1 Ped. 2:21). Kʼonil xnaqʼtzbʼil lu qiʼj tuʼn tbʼant jlu quʼn.

 «KUKX [QO] LEPEʼK» TIʼJ JESÚS MASKE IN QO OK WEʼ KYWITZ PROBLEM EX TENTACIÓN

4. ¿Tiquʼn in xi qqʼamaʼn qa qʼiʼn jun tzeʼ kyuʼn t-xnaqʼtzbʼen Jesús? (Lucas 9:23).

⁴ Otoqxi bautisarina, miʼn kubʼ t-ximana qa mlayx tzʼok weʼya twitz nya bʼaʼn. Axpe ikx tqʼama Jesús qa teyele junjun t-xnaqʼtzbʼen il tiʼj tuʼn t-xi tiʼn ttzeʼ «tkyaqil qʼij» (kjawil uʼjit Mateo 16:​24, TNM; Luc. 9:23). ¿Tqʼamape Jesús qa kukx ktzajel nya bʼaʼn kyiʼj t-xnaqʼtzbʼen? Miʼn. Tqʼama qa nya oʼkx ktzajel kykʼamoʼn tmajen Jehová kʼiwlabʼil, sino ax ikx che okel weʼ kywitz nya bʼaʼn ex ambʼil kwest (2 Tim. 3:12).

5. Ik tzeʼn tqʼama Jesús, ¿alkyeqe kʼiwlabʼil che ktzajel qkʼamoʼn qa ma txi qnajsaʼn junjun tiʼchaq?

⁵ Bʼalo ya o tzʼel ikʼuna kyuʼn toj tjaya moqa o kyaj ttzaqpiʼna junjun tiʼ noq tuʼn tkubʼ tqʼoʼna tnejel aju Tkawbʼil Dios toj tanqʼibʼila (Mat. 6:33). Qa a jlu o bʼaj tiʼja, jaku tzʼok qeʼ tkʼuʼja tiʼj qa ojtzqiʼn tuʼn Jehová tkyaqilju o bʼant tuʼna (Heb. 6:10). Bʼalo o tzʼok tqʼoʼna twitza tiʼj qa ax tok qe yol lu tqʼama Jesús: «Alkye jun xjal ma kyaj tqʼoʼn tja, ex qa ttzik, ex qa titzʼin, ex qa tman, ex qa ttxuʼ, ex qa t-xuʼjil, ex qa tkʼwaʼl, ex qa ttxʼotxʼ tuʼn nlaje, ex tuʼn tlaj tqanil kolbʼil; tkyaqilju ma kyaj tqʼoʼn, ok tkʼmaʼ jun syent maj t-xel tuj tqʼijlalil jaʼlo: Nimku tja che tzajel qʼoʼn, nimku che okel te ttzik, nimku che okel te titzʼin, nimku che okel te ttxuʼ, nimku che okel te tkʼwaʼl, ex nim ttxʼotxʼ ktzajel qʼoʼn; ax ikx kʼikʼex nim yajbʼil tuʼn, ex ktel tchwinqlal te jumajx tuj tqʼijlalil tzul» (Mar. 10:​29, 30). Jaku txi tqʼamaʼna qa mas nim kʼiwlabʼil o che tzaj tkʼamoʼna twitz qe tiʼchaq o che kyaj tqʼoʼna (Sal. 37:4).

6. ¿Tiquʼn kukx kʼokel tilil quʼn tuʼn tkubʼ tiʼj «tajbʼil qchibʼjal»?

⁶ Tej otoqxi qo bautisarin, ax ikx il tiʼj tuʼn tok tilil quʼn tuʼn tkubʼ tiʼjju «tajbʼil qchibʼjal» (1 Juan 2:16). Maske ikju, kukx aj il qoʼ ex jaku kubʼ qnaʼn ik tzeʼn te apóstol Pablo tej tqʼama jlu: «Porke in chin tzalaje tiʼj Dios tuj wanmiye; pero in nnaʼne juntl ley tuj nximlale in qʼojin tiʼj tley nnabʼle, ex in chin okx presine tuʼn tjaqʼ tley il aju at tuj nximlale» (Rom. 7:​22, 23). Bʼalo in tzaj bʼaj qkʼuʼj tuʼnju il tiʼj tuʼn tkubʼ tiʼj tajbʼil qchibʼjal quʼn. Pero aj qximen tiʼjju o txi qtziyen te Jehová tej t-xi qqʼoʼn qchwinqlal te, in nonin qiʼj tuʼn miʼn tkubʼ qiʼj kyuʼn tentación. ¿Tiquʼn in xi qqʼamaʼn jlu?

7. Qa ma ximana tiʼj ambʼil tej t-xi tqʼoʼna tanqʼibʼila te Jehová, ¿tzeʼn kʼonil tiʼja tuʼn kukx ttena tzʼaqli?

⁷ Aj t-xi tqʼoʼn jun xjal tanqʼibʼil te Jehová, ya mintiʼ in xi tbʼinchaʼn tex tajbʼil ex qe tiʼchaq in pon tkʼuʼj tiʼj, aʼyeju nya bʼaʼn in che ela tuj twitz Jehová (Mat. 16:24). Tuʼntzunju, aj qok weʼ twitz jun prueba, mintiʼ tuʼn qximen tiʼj tiʼ kxel qbʼinchaʼn noq oʼkx qaj tuʼn qten tzʼaqli twitz Jehová. Tej t-xi qqʼoʼn qchwinqlal te, kubʼ qximen tuʼn ttzalaj quʼn. Iktzun tten jaku tzʼel qkanoʼn tiʼj Job, maske ok weʼ kywitz ambʼil kwest tqʼama jlu tuʼn tkyaqil tanmi: «Kukx kxel nmaʼne mintiʼ wile» (Job 27:5).

8. ¿Tzeʼn kʼonil qiʼj tuʼn qex twitz jun tentación qa ma qo ximen tiʼj qa o txi qtziyen te Jehová tuʼn tbʼant aju tajbʼil quʼn?

⁸ Aj qximen tiʼj qa o txi qtziyen te Jehová tuʼn tbʼant aju tajbʼil quʼn, kʼonil qiʼj tuʼn qex twitz alkyexku tentación. Jun techel, ¿qo okel ten coquetearil tukʼil jun xjal o kubʼ mojeʼ? ¡Mlayx bʼant jlu quʼn! ¿Tiquʼn? Tuʼnju ya o txi qtziyen tuʼn  qajbʼen oʼkx te Jehová. Qa bʼix ma tzʼok tilil quʼn tnejel tuʼn miʼn tten nya bʼaʼn qajbʼil, mas nya kwest kʼelel qe tuʼn tkubʼ tiʼj yajxitl. Ex mlay qo ok lepeʼ «tiʼj kybʼinchbʼen xjal mya bʼaʼn» (Prov. 4:​14, 15).

9. Qa ma ximana tiʼj ambʼil tej t-xi tqʼoʼna tanqʼibʼila te Jehová, ¿tzeʼn kʼonil tiʼja tuʼn tkubʼ tqʼoʼna tnejel tajbʼebʼila te Jehová?

⁹ ¿Tiʼ jaku bʼant quʼn qa ma tzaj qʼoʼn jun aqʼuntl qe aju mlay tzaj tqʼoʼn ambʼil tuʼn qxiʼ kyoj chmabʼil? Ya ojtzqiʼn quʼn tiʼ kbʼantel quʼn tuʼnju otoq kubʼ qximen tuʼn miʼn txi qkʼamoʼn jun aqʼuntl ik tzeʼn jlu. Qa ma txi qkʼamoʼn, mlayx tzaj tqʼoʼn ambʼil qiʼj tuʼn tkubʼ qqʼoʼn qajbʼebʼil te Jehová tnejel toj qanqʼibʼil. Jaku tzʼonin qiʼj aju tbʼanel techel kyaj tqʼoʼn Jesús tej tkubʼ t-ximen tuʼn ttzalaj Tman tuʼn. Ik tzeʼn te, tbʼanel tuʼn tel qikʼun tkyaqilju nya bʼaʼn in nela toj twitz Jehová (Mat. 4:10; Juan 8:29).

10. ¿Tzeʼn kʼonil Jehová tiʼja tuʼn kukx tok lepeya tiʼj Jesús?

¹⁰ Aj qok weʼ twitz nya bʼaʼn ex kywitz tentación, in tzaj kyqʼoʼn ambʼil qe tuʼn tkubʼ qyekʼin qa kukx qaj tuʼn qok lepeʼ tiʼj Jesús. Ex kukx qʼuqli qkʼuʼj tiʼj qa kʼonil Jehová qiʼj tuʼnju in tzaj tqʼamaʼn jlu toj Tyol: «Mlay che kyaj qʼoʼne tuʼn Dios tuʼn kyoke tuj joybʼil kyiʼje nimxix, aju mlay tzikʼx kyuʼne, ok kyoke tuj joybʼil kyiʼje, ktzajel tyekʼun Dios jun tumel tzeʼn tuʼn kyexe tuj, tuʼntzun tikʼx kyuʼne» (1 Cor. 10:13).

¿TIʼ JAKU BʼANT QUʼN TUʼN KUKX QOK LEPEʼ TIʼJ JESÚS?

11. ¿Alkye jun kyxol qe tiʼ jaku bʼant quʼn tuʼn kukx qok lepeʼ tiʼj Jesús? (Ax ikx qʼonka twitza kyiʼj foto).

¹¹ Kukx ajbʼen Jesús te Jehová tukʼil tkyaqil tanmi ex tuʼnju kukx naʼn Dios te onin tiʼj tuʼn tok laqʼeʼ ttxlaj (Luc. 6:12). Junxitl qe tiʼ jaku che onin qiʼj tuʼn qok lepeʼ  tiʼj Jesús tej otoqxi qo bautisarin. Jun kyxol qe tiʼ, aju qa ma txi qbʼinchaʼn qe tiʼchaq jaku che onin qiʼj tuʼn qok laqʼeʼ ttxlaj Jehová. In tzaj tqʼamaʼn Biblia jlu: «Aju ma tzʼel qnikʼ tiʼj, axtzunju tuʼn qximan tiʼj ex tuʼn qbʼinchante» (Filip. 3:16). Bʼalo kʼokel kybʼiʼne ky-experiencia erman kubʼ kyximen tuʼn kyajbʼen mas te Jehová. Bʼalo o cheʼx toj Xnaqʼtzbʼil kye Pakbʼal tiʼj Tkawbʼil Dios moqa o cheʼx anqʼil toj juntl lugar jatumel kyaj erman onbʼil toj pakbʼabʼil. ¿Jakupe bʼant jlu tuʼna? Qa ikju, jaku txi tbʼinchaʼna. Kukx in nok tilil kyuʼn tmajen Jehová tuʼn t-xi kyjyoʼn tumel tzeʼn tuʼn kyajbʼen mas te (Hech. 16:9). Qa mlay bʼant jlu tuʼna jaʼlo, miʼn kubʼ t-ximana qa mas nya nim toklena kywitz qeju in bʼant jlu kyuʼn, sino mas nim toklen tuʼn kukx tikʼx tuʼna (Mat. 10:22). Miʼn tzikʼ tnaʼl tuʼna qa jaku jaw tzalaj Jehová aj tok tilil tuʼna tuʼn t-xi tbʼinchaʼna tkyaqil jaku bʼant tuʼna toj tajbʼebʼila te. Iktzun tten kukx jaku tzʼok lepeʼye tiʼj Jesús tej otoqxi bautisarina (Sal. 26:1).

12, 13. ¿Tiʼ jaku bʼant tuʼna qa in kubʼ tnaʼna qa ya mintiʼ in tzalaja toj tajbʼebʼila te Jehová jaʼlo? (1 Corintios 9:​16, 17; ax ikx qʼonka twitz tiʼj recuadro « ¿Tiʼ jaku bʼant quʼn tuʼn kukx qojqelan?»).

¹² ¿Yajtzun qa mintiʼ ma naʼna Dios tukʼil tkyaqil tanmiya moqa mintiʼ in tzalaja aj tpakbʼana ex aj tuʼjina tiʼj Biblia? Qa a jlu in bʼaj tiʼja otoqxi bautisarina, miʼn kubʼ t-ximana qa ya mintiʼ in tzaj tkʼamoʼna xewbʼaj xjan. Tuʼnju aj il qoʼ at maj jaku tzaj bʼaj qkʼuʼj. Qa in nok tqʼoʼna twitza tiʼj qa mintiʼ in tzalaja, jaku ximana tiʼj techel kyaj tqʼoʼn apóstol Pablo. Maske ok tilil tuʼn tuʼn tel tkanoʼn tiʼj Jesús, pero at maj mintiʼ ten tgan tuʼn t-xi tbʼinchaʼn qe tiʼchaq il tiʼj tuʼn tbʼant tuʼn (kjawil uʼjit 1 Corintios 9:​16, 17). Tqʼama jlu:  «Qatzun mya tuʼn wexe wajbʼil ma nbʼinchaye, qa ikju at juntl ma qʼamante weye tuʼn waqʼnane tiʼj». Toj juntl yol, tajtoq Pablo tuʼn tjapun toklen tuʼn maske nya tgan tuʼn t-xi tbʼinchaʼn junjun maj.

¹³ Ax ikx qe mintiʼ tuʼn tkubʼ qximen tuʼn tbʼant jun tiʼ quʼn noq tuʼnju in kubʼ qnaʼn, sino bʼaʼn tuʼn t-xi qbʼinchaʼn aju bʼaʼn maske nya qaj tuʼn tbʼant quʼn. Qa kukx ma kubʼ tbʼinchaʼna aju bʼaʼn, jaku chʼexpaj aju in kubʼ tnaʼna aj tikʼ ambʼil. Qa kukx ma xnaqʼtzana, ma naʼna Dios, ma txiʼya toj chmabʼil ex ma pakbʼana, kʼonil tiʼja tuʼn kukx tok lepeʼya tiʼj Jesús otoqxi bautisarina. Ax ikx kxel tqʼuqbʼaʼna kykʼuʼj erman akux in nok tilil tuʼna tuʼn tajbʼena te Jehová (1 Tes. 5:11).

«CHE XIMANE KYIʼJXE»

14. ¿Tiʼ bʼaʼn tuʼn qximen tiʼj junjun maj ex tiquʼn? (2 Corintios 13:5).

¹⁴ Tej otoqxi bautisarina, bʼaʼn tuʼn t-ximana junjun maj tiʼjju in bʼant tuʼna (kjawil uʼjit 2 Corintios 13:5). Jun techel, ximana tiʼj qa in naʼna Dios tkyaqil qʼij, qa in uʼjina ex qa in xnaqʼtzana tiʼj Biblia, qa in xiʼya kyoj chmabʼil ex qa in pakbʼana. Jyonxa tumel tzeʼn jaku tzalaja kyiʼj tiʼchaq lu ex tzeʼn jaku che onin tiʼja. Jaku kubʼ t-xjelina: «¿Jakupe bʼant tuʼn t-xi nchikʼbʼaʼne qe xnaqʼtzbʼil ateʼ toj Biblia? ¿Atpe jun tiʼ jaku bʼant wuʼne tuʼntzun ntzalaje mas toj pakbʼabʼil? ¿Oʼkxpe in chin naʼne Dios tiʼj jun tiʼ ex in tzaj tyekʼin qa in noq qeʼ nkʼuʼje tiʼj Jehová? ¿In nokpe tilil wuʼne tuʼn nxiʼye kyoj kykyaqil chmabʼil? ¿Tiʼ jaku bʼant wuʼne tuʼn tok nqʼoʼne nwiʼye kyiʼj chmabʼil ex tuʼn t-xi nqʼoʼne tbʼanel nyole?».

15, 16. ¿Tiʼ xnaqʼtzbʼil jaku tzʼel tiʼna tiʼj jun erman ok weʼ twitz jun tentación?

¹⁵ Ax ikx ximana tiʼj alkyeqe nya bʼaʼn tajbʼila jaku kubʼ tiʼja tuʼn. Qo yolin tiʼj jun techel in tzaj tyekʼin qa nim toklen tuʼn tbʼant jlu quʼn. Tqʼama jun ermano Robert tbʼi jlu: «Tej qʼiʼntoq 20 abʼqʼi wuʼne, mintiʼ in aqʼunane toj tkyaqil ambʼil. Toj jun qʼij tej in bʼaj aqʼunane, tzaj tqʼoʼn jun wukʼile txokbʼil wiʼje tuʼn nxiʼye tja. Tqʼama qa jakutoq qo tene jun rat junx tuʼnju mi al jun at tja. Tnejel xi nmaʼne junjun tiʼ te, yajxitl xi nmane miʼn ex xi nchikʼbʼaʼne te tiquʼn». Tbʼanel tuʼnju mintiʼ kubʼ tiʼj Robert toj ambʼil lu. Yajxitl, ximen tiʼj aju otoq bʼaj ex el tnikʼ tiʼj qa jakutoq txi tbʼinchaʼn juntl tiʼ toj ambʼil  aju. Tqʼamatl jlu: «Nya jun rat naj xi nqʼamaʼne qa miʼn ik tzeʼn te José tukʼil t-xuʼjil Potifar (Gén. 39:​7-9). Mintiʼ kubʼ nximane qa kwest tuʼn t-xi nqʼamaʼne qa miʼn. Tej tbʼaj jlu, el nnikʼe tiʼj qa iltoq tiʼj tuʼn tchʼiy mas wamiwbʼile tukʼil Jehová».

¹⁶ Qo ximen tiʼj qa in nok weʼya twitz jun tentación ex in xi tqʼamaʼna qa miʼn. Maske ikju, xjelinkuya jlu ik tzeʼn te Robert: «¿Kwestpe ela toj nwitze tuʼn t-xi nqʼamaʼne miʼn?». Qa in nel tnikʼa tiʼj qa il tiʼj tuʼn tbʼant chʼixpubʼil tuʼna, miʼn tzaj bʼaj tkʼuʼja ex tbʼanel tuʼnju o tzʼel tnikʼa tiʼj jlu. Qʼamanxa te Jehová ex bʼinchanxa junjun tiʼchaq tuʼn tnimana te tuʼn tkyaqil tanmiya (Sal. 139:​23, 24).

17. Ik tzeʼn bʼaj tiʼj Robert, ¿tzeʼn in nonin tiʼj tbʼi Jehová aj qten tzʼaqli twitz?

¹⁷ At juntl xnaqʼtzbʼil jaku tzʼel qiʼn tiʼjju bʼaj tiʼj Robert. Tqʼama jlu: «Tej t-xi nqʼamaʼne miʼn te wukʼile toj aqʼuntl, tzaj tqʼamaʼn weʼye ‹Ma tzʼexa twitz prueba›. Xi nqanine te tiʼ tajtoq tuʼn tzaj tqʼamaʼn. Tzaj tchikʼbʼaʼn weye qa otoq tqʼama jun tamiw te, aju ok te testigo de Jehová toj ambʼil ojtxe, qa kykyaqil kuʼxun Testigo in xi kybʼinchaʼn nya bʼaʼn toj ewaj. Ex tqʼama qa aj kyok weʼ twitz jun tentación, jaku txi kybʼinchaʼn. Tuʼntzunju, xi tqʼamaʼn txin te tamiw qa kʼokeltoq tqʼoʼn qine toj prueba. ¡In kubʼ nnaʼne nim tzalajbʼil tuʼnju mintiʼ bʼaj ntzʼilsane tbʼi Jehová!».

18. ¿Tiʼ kukx jaku bʼant tuʼna otoqxi bautisarina? (Ax ikx qʼonka twitza tiʼj recuadro « Kabʼe xnaqʼtzbʼil jaku che onin tiʼja»).

¹⁸ Aj t-xi tqʼoʼna tchwinqlala te Jehová ex aj tbautisarina, in kubʼ tyekʼina qa taja tuʼn tbʼaj tsaqina tbʼi maske ma tzʼok weʼya twitz alkyexku tiʼ. Ex jaku tzʼok qeʼ tkʼuʼja tiʼj qa in nok tqʼoʼn Jehová twitz kyiʼj problem in nok weʼya twitz ex qe tentación. Ax ikx in nok tqʼoʼn twitz tiʼj qa in nok tilil tuʼna tuʼn ttena tzʼaqli twitz ex tzul kʼiwlaʼna tuʼn. Kʼajbʼel xewbʼaj xjan tuʼn tuʼn ttzaj qʼoʼn tipumala tuʼn tkubʼ tbʼinchana aju bʼaʼn (Luc. 11:​11-13). Tuʼn tonbʼil Jehová kukx jaku tzʼok lepeʼya tiʼj Jesús otoqxi bautisarina.