1. ¿Alkye junjun kʼiwlabʼil in che tzaj qkʼamoʼn tuʼnju atoʼ toj ttnam Jehová?

 NIMXIX in qo tzalaj tuʼnju atoʼ toj ttnam Jehová. Toj mankbʼil tqʼijlalil mas kwest in nok qanqʼibʼil, pero in xi qqʼoʼn chjonte te Jehová tuʼnju atoʼ kyxol erman in kubʼ kyyekʼin kykʼujlabʼil (Sal. 133:1). In nonin xnaqʼtzbʼil in tzaj tqʼoʼn Jehová tuʼn kytzalaj familia (Efes. 5:33–6:1). Ax ikx, in tzaj tqʼoʼn qnabʼil tuʼn tok tilil quʼn tuʼn tkubʼ kyiʼj nya bʼaʼn qximbʼetz ex tuʼn qtzalaj.

2. ¿Tiʼ il tiʼj tuʼn tbʼant quʼn ex tiquʼn?

² Maske in tzaj tqʼoʼn Jehová tkyaqil jlu qe, at maj il tiʼj tuʼn tok tilil quʼn tuʼn miʼn qsikt tuʼn kukx qajbʼen te. ¿Tiquʼn? Tuʼnju jaku kubʼ qnaʼn nya bʼaʼn kyuʼn tiʼchaq in bʼant kyuʼn txqantl ex tuʼnju in tzaj kyqʼamaʼn qe. Ax ikx, jaku tzaj bʼaj qkʼuʼj aj tkubʼ qbʼinchaʼn jun nya bʼaʼn, mas qa aʼyex tiʼchaq in che bʼant quʼn jun ex juntl maj. Kʼonil xnaqʼtzbʼil lu qiʼj tuʼn kukx qajbʼen te Jehová kyoj ambʼil ik tzeʼn jlu: Tnejel, aj ttzaj qbʼis tuʼn jun erman. Tkabʼ, aj ttzaj qbʼis tuʼn qchmil moqa tuʼn qxuʼjil. Ex toxin, aj ttzaj qbʼis quʼnx. Tiʼj teyele junjun xnaqʼtzbʼil lu, qo yolil tiʼj jun xjal in yolin Biblia tiʼj.

AJ TTZAJ QBʼIS TUʼN JUN ERMAN

3. ¿Alkyeqe nya bʼaʼn in che ok weʼ tmajen Jehová twitz?

³ Aju nya bʼaʼn. Jakulo qo jaw oqʼ kyuʼn junjun erman. Atzun junjuntl, jaku tzaj qbʼis kyuʼn aj tkubʼ kyyekʼin qa mintiʼ in che ximen qiʼj. Ax ikx kye ansyan, at maj in che el txalpaj. Tuʼn tkyaqil jlu, bʼalo ateʼ junjun jaku kubʼ kyxjelin: «¿Apetzun ttnam Dios lu?». Tuʼntzunju, bʼalo ateʼ junjun ya mintiʼ in che yolin kyukʼil qeju o tzʼok kybʼinchaʼn jun nya bʼaʼn kyiʼj moqa ya mintiʼ in cheʼx kyoj chmabʼil ex ya mintiʼ in che ajbʼen te Jehová toj mujbʼabʼil (Sof.  3:9). ¿Tbʼanelpe aju in bʼant kyuʼn? Qqʼonk qwitz tiʼj tiʼ xnaqʼtzbʼil jaku tzʼel qiʼn tiʼj jun xjal in yolin Biblia tiʼj aju ikʼ kyoj ambʼil chʼixme aʼyex ik tzeʼn jlu.

4. ¿Alkyeqe nya bʼaʼn ok weʼ apóstol Pablo twitz?

⁴ Aju xjal in yolin Biblia tiʼj. El tnikʼ apóstol Pablo tiʼj qa aj il qe erman. Jun techel, tej tpon toj congregación te Jerusalén nim kye mintiʼ ok qeʼ kykʼuʼj tiʼj ex e tzaj xobʼ (Hech. 9:26). Yajxitl, ateʼ junjun e yolin nya bʼaʼn tiʼj (2 Cor. 10:10). Toj jun ambʼil, ok tqʼoʼn Pablo twitz tiʼj jun tiʼ nya toj tumel bʼant tuʼn jun erman otoq chʼiy toj tokslabʼil ex jakutoq tzʼok te jun tolsabʼil kye mas erman (Gál. 2:​11, 12). Ax ikx tzaj tbʼis tuʼn Marcos, jun kyxol qe tukʼil mas nim toklen (Hech. 15:​37, 38). Jakutoq kubʼ t-ximen Pablo qa at nim tiquʼn tuʼn tel tpan tibʼ kyiʼj erman otoq tzʼok kybʼinchaʼn jun nya bʼaʼn tiʼj. Pero mintiʼ xi tqʼoʼn ambʼil te tkyaqil jlu tuʼn tel laqʼeʼ ttxlaj Jehová, sino ten tbʼanel t-ximbʼetz kyiʼj erman ex kukx ajbʼen te Jehová. ¿Tiʼ onin tiʼj?

5. ¿Tiʼ onin tiʼj Pablo tuʼn miʼn tel tpan tibʼ kyiʼj terman? (Colosenses 3:​13, 14; ax ikx qʼonka twitza tiʼj dibujo).

⁵ Ok tkʼujlaʼnxix Pablo qe erman, tuʼntzunju ok tqʼoʼn twitz tiʼj tbʼanel kymod ex nya tiʼj kypaltil. Ax ikx onin tkʼujlabʼil tuʼn tkubʼ tnajsaʼn kyil txqantl ik tzeʼn in tzaj tqʼamaʼn Colosenses 3:13 ex 14 (uʼjinktza). Jun techel, ¿xipe tbʼinchaʼn Pablo tiʼj nya bʼaʼn tzaj kyxol tukʼil Marcos? Ikju, maske kyaj kolin Pablo tuʼn Marcos toj tnejel tviaje te misionero, mintiʼ xi tkʼuʼn qʼoj tiʼj. Yajxitl, xi ttzʼibʼin jun tbʼanel carta te congregación te Colosas jatumel tqʼama qa nimtoq toklen Marcos. Tqʼama jlu tiʼj: «Nim ma qʼuqbʼanjtz nkʼuʼje» tuʼn (Col. 4:​10, 11). Ex tej tten pres atz Roma, xi tqanin tuʼn tpon Marcos onil tiʼj (2 Tim. 4:11). In tzaj tyekʼin jlu qa ximen Pablo kyiʼj terman. ¿Tiʼ xnaqʼtzbʼil jaku tzʼel qiʼn tiʼj Pablo?

6, 7. ¿Tiʼ jaku tzʼonin qiʼj tuʼn kukx tkubʼ qyekʼin qkʼujlabʼil kyiʼj erman maske at kypaltil? (1 Juan 4:7).

⁶ Aju xnaqʼtzbʼil. Taj Jehová tuʼn kukx tkubʼ qyekʼin qkʼujlabʼil kyiʼj erman (kjawil uʼjit 1 Juan 4:7). Qa ma kubʼ tyekʼin jun erman toj congregación nya bʼaʼn tmod qukʼil, tbʼanel tuʼn tkubʼ qximen qa nya taj tuʼn tok tbʼinchaʼn nya bʼaʼn qiʼj ex qa in nok tilil tuʼn tuʼn tkubʼ tbʼinchaʼn aju bʼaʼn (Prov. 12:18). Nim kʼujlan qoʼ tuʼn  Jehová, mintiʼ in tzaj tqʼoj qiʼj ex kukx in qo ok tqʼoʼn te tamiw maske in qo el txalpaj (Sal. 103:9). Tbʼanel tuʼn tel qkanoʼn tiʼj Qman Jehová ex qnajsanku kyil txqantl (Efes. 4:32–5:1).

⁷ Ax ikx, miʼn tzikʼ tnaʼl quʼn qa in qo anqʼin toj mankbʼil tqʼijlalil. Tuʼntzunju, nim toklen tuʼn qten junx kyukʼil erman. Axpe ikx jaku qo ok weʼ twitz mas nya bʼaʼn ex jaku qo okx qʼoʼn toj cárcel. Kyoj ambʼil lu, mas il tiʼj tuʼn qten junx kyukʼil erman (Prov. 17:17). Chʼixme ax jlu bʼaj tiʼj jun ansyan te España aju Joseph tbʼi. a Tuʼnju mintiʼ xiʼ kyxol soldad, okx qʼoʼn toj cárcel junx kyukʼil junjun erman. Tqʼama jlu: «Mas fácil jakutoq tzaj jun nya bʼaʼn qxole kyukʼil erman tuʼnju junx o tene. Tuʼntzunju, iltoq tiʼj tuʼn tikʼx quʼne aj ttzaj jun nya bʼaʼn qxolxe ex tuʼn tkubʼ qnajsaʼne qile. Onin jlu qiʼje tuʼn qtene junx ex tuʼn tok qxqʼuqin qibʼe kyiʼj pres nya Testigo. Naʼnx wuʼne, tej tkʼixbʼi nqʼabʼe jun maj, ok potzin ex mintiʼtoq in yukch. Tuʼnju mlaytoq bʼant jun tiʼ wuʼne, onin jun erman wiʼje tuʼn tjatz ttxʼajoʼn nxbʼalune ex xi tbʼinchaʼn junjuntl tiʼchaq. Ok nqʼoʼne nwitze tiʼj kʼujlabʼil axix tok toj ambʼil mas wajtoqe onbʼil». In tzaj tyekʼin jlu, qa nim toklen tuʼn tkubʼ naj jun problem in tzaj qxol kyukʼil erman.

AJ TTZAJ QBʼIS TUʼN QCHMIL MOQA TUʼN QXUʼJIL

8. ¿Alkyeqe nya bʼaʼn in che tzaj kyxol mejebʼleʼn?

⁸ Aju nya bʼaʼn. Kykyaqil mejebʼleʼn tzul yajbʼil toj kychwinqlal ik tzeʼn in tzaj tqʼamaʼn Biblia: «Tzul yajbʼil kye tuj kychwinqlal» (1 Cor. 7:28). ¿Tiquʼn? Tuʼnju aj il chmilbʼaj ex xuʼjilbʼaj, junxitl kymod, aju kygan, aju kyyajil ex aju alkye tten e jaw chʼiy. Aj tikʼ ambʼil, in nel toj qʼanchaʼl junjun kypaltil aju mintiʼ ok kyqʼoʼn kywitz tiʼj tej kynovio kyibʼ. Tuʼn tkyaqil jlu, jaku tzaj mas nya bʼaʼn kyxol. At maj in nok kyqʼoʼn kypaj ex mintiʼ in nel kynikʼ tiʼj qa kykabʼil in che el tzpet ex mintiʼ in che aqʼunan junx tuʼn t-xi kybʼinchaʼn kyiʼj nya bʼaʼn in tzaj kyxol. Axpe ikx, in kubʼ kyximen qa jaku txi kybʼinchaʼn tiʼj nya bʼaʼn aj tel kysepararin kyibʼ moqa aj kydivorsiarin. ¿Ape jlu mas bʼaʼn? b Qo yolin tiʼj jun xjal in yolin Biblia tiʼj, aju mintiʼ el tpan tibʼ tiʼj tukʼil maske tzaj nim nya bʼaʼn toj tmejebʼleʼn.

9. ¿Alkye nya bʼaʼn ok weʼ Abigaíl twitz?

⁹ Aju xjal in yolin Biblia tiʼj. Kubʼ mojeʼ Abigaíl tukʼil Nabal, jun xjal puro nya bʼaʼn tmod ex tbʼinchbʼen (1 Sam. 25:3). Ax tok, kwest tuʼn qanqʼin tukʼil jun xjal ik tzeʼn jlu. Pon jun qʼij, jakutoq tzʼel tpan tibʼ Abigaíl tiʼj tchmil. Tajtoq David aju kʼokeltoq te rey kyiʼj Israel tuʼn tkubʼ tbʼyoʼn Nabal tuʼnju mintiʼ kubʼ tyekʼin tbʼanel tmod tukʼil ex kyukʼil t-xjalil (1 Sam. 25:​9-13). Jakutoq tzʼel oq Abigaíl ex jaku txi tqʼoʼn ambʼil te David tuʼn tjapun twi t-ximbʼetz, pero kubʼsan twitz David tuʼn tkubʼ tnajsaʼn til Nabal (1 Sam. 25:​23-27). ¿Tiʼ onin tiʼj?

10. ¿Tiʼ onin tiʼj Abigaíl tuʼn miʼn tkyaj tkolin tchmil maske attoq nim nya bʼaʼn toj tmejebʼleʼn?

¹⁰ Kʼujlaʼntoq Jehová tuʼn Abigaíl ex nimtoq toklen toj twitz aju t-ximbʼetz Jehová at tiʼj mejebʼleʼn. Jaku txi qqʼamaʼn qa ojtzqiʼntoq tuʼn aju tqʼama Jehová tiʼj  Adán ex Eva tej kymojeʼ (Gén. 2:24). Ax ikx, ojtzqiʼntoq tuʼn Abigaíl qa xjan mejebʼleʼn toj twitz Jehová. Xi tbʼinchaʼn jun tiʼ tiʼj tchmil ex kyiʼj toj tja tuʼnju kʼujlaʼn Dios tuʼn. Tuʼntzunju, maske mintiʼ til, jurat xi tbʼinchaʼn jun tiʼ ex xi tqanin najsam te David tuʼntzun miʼn tkubʼ bʼyoʼn Nabal. Nimxixlo ok tkʼujlaʼn Jehová Abigaíl tuʼnju ten tipumal ex ok tilil tuʼn. ¿Tiʼ xnaqʼtzbʼil jaku tzʼel kyiʼn chmilbʼaj ex xuʼjilbʼaj tiʼj Abigaíl? Qo yolin tiʼj.

11. a) ¿Tiʼ taj Jehová tuʼn tbʼant kyuʼn qeju o che kubʼ mojeʼ? (Efesios 5:33). b) ¿Tiʼ xnaqʼtzbʼil jaku tzʼel tiʼna tiʼj Carmen? (Ax ikx qʼonka twitza kyiʼj tilbʼilal).

¹¹ Aju xnaqʼtzbʼil. Taj Jehová tuʼn tok kyqʼoʼn xjal toklen kymejebʼleʼn, axpe ikx qa nyaxix bʼaʼn tmod chmilbʼaj moqa xuʼjilbʼaj. Nimxix in tzalaj Jehová kyiʼj mejebʼleʼn in nok tilil kyuʼn tuʼn t-xi kybʼinchaʼn kyiʼj nya bʼaʼn, tuʼn tok kykʼujlan kyibʼ ex tuʼn kynimen kyxolx (kjawil uʼjit Efesios 5:33). Qo yolin tiʼjju bʼaj tiʼj Carmen. Qʼiʼn qaq abʼqʼi tkubʼlen mojeʼ, tej t-xi tzyet tuʼn t-xnaqʼtzan tiʼj Biblia kyukʼil testigo de Jehová ex bautisarin. Tqʼama jlu: «Nya bʼaʼn ela jlu toj twitz nchmile. Tuʼntzunju, tzaj tqʼoj ex tqʼama weye qa kʼelex oq toj ja». Maske tzaj tkyaqil jlu tiʼj Carmen, kukx ok tilil tuʼn. Toj 50 abʼqʼi, kukx nimen te tchmil ex ok tkʼujlaʼn. Tqʼamatl jlu: «Kyoj abʼqʼi lu, mas o tzʼel nnikʼe tiʼj nchmile ex tukʼil kʼujlabʼil in chin yoline tukʼil. Ojtzqiʼntoq wuʼne qa xjan aju mejebʼleʼn toj twitz Jehová. Tuʼntzunju, xi nbʼinchaʼne tkyaqilju jakutoq bʼant wuʼne tuʼn miʼn tnaj qmejebʼleʼne. Onin nkʼujlabʼile tiʼj Jehová tuʼn miʼn nsikte». c Qa ma che tzaj nya bʼaʼn toj tmejebʼleʼna, jaku tzʼok qeʼ tkʼuʼja tiʼj qa kʼonil Jehová tiʼja tuʼn texa kywitz.

AJ TTZAJ QBʼIS QUʼNX

12. ¿Tiʼ jaku kubʼ qnaʼn qa ma kubʼ qbʼinchaʼn jun il?

¹² Aju nya bʼaʼn. Bʼalo jaku kubʼ qnaʼn nim bʼis qa ma kubʼ qbʼinchaʼn jun il. In tzaj tqʼamaʼn Biblia qa ma kubʼ tbʼinchaʼn jun xjal jun il in «tzaj tbʼis» (Sal. 51:17). Atzun jlu bʼaj tiʼj Robert, jun erman ok tilil tuʼn toj nim abʼqʼi tuʼn ttzaj qʼoʼn toklen te siervo ministerial. Kubʼ tbʼinchaʼn jun il ex el tnikʼ tiʼj qa otoq tzaj tbʼis Jehová tuʼn. Tqʼama jlu: «Tzaj nimxix nbʼise ex ok ik tzeʼn tzaj tilj nim ladriy wibʼaje. Kubʼ nnaʼne nya bʼaʼn, in ok tene oqʼel ex in ok tene naʼl Dios te Jehová. Kukx kubʼ nximane qa mlay chin tzaj bʼiʼne tuʼn Dios tuʼnju  tzaj tbʼis wuʼne». Qa ma kubʼ qbʼinchaʼn jun il, jaku tzaj qbʼis ex jaku kubʼ qximen qa otoq qo kyaj kolin tuʼn Jehová ex qa nya il tiʼj tuʼn qajbʼen te (Sal. 38:4). ¿O kubʼ tnaʼna jlu jun maj? Qa ikju, kʼonil tiʼja aju techel kyaj tqʼoʼn jun tmajen Jehová ten tzʼaqli twitz maske el txalpaj ex kubʼ tbʼinchaʼn jun matij il.

13. ¿Alkye matij il kubʼ tbʼinchaʼn Pedro ex tiquʼn bʼant tuʼn?

¹³ Aju xjal in nyolin Biblia tiʼj. Toj qonikʼen tej naʼmxtoq tkyim Jesús, kubʼ tbʼinchaʼn Pedro junjun nya bʼaʼn aju tzaj nimxix tbʼis tuʼn. Tnejel, xi ttziyen qa kteltoq ttxlaj Jesús maske jaku kyaj kolin kyuʼn txqantl apóstol (Mar. 14:​27-29). Yajxitl, ikʼ jtan jun ex juntl maj toj jardín te Getsemaní (Mar. 14:​32, 37-41). Toj juntl ambʼil, kyaj tkolin Jesús tej ttzyet tuʼn tkubʼ bʼyoʼn (Mar. 14:50). Te mankbʼil, kubʼ tewin oxe maj ex xi tqʼamaʼn qa mintiʼtoq ojtzqiʼn tuʼn (Mar. 14:​66-71). ¿Tiʼ kubʼ tnaʼn Pedro tej tel tnikʼ tiʼj qa otoq kubʼ tbʼinchaʼn jun ma tiʼj il? Tzaj bʼajxix tkʼuʼj, kubʼ tnaʼn nim nya bʼaʼn ex jaw oqʼ (Mar. 14:72). ¿Jakupe ximana tiʼj tiʼ kubʼ tnaʼn tej tok tqʼoʼn twitz tiʼj tej tjaw qʼoʼn Jesús twitz tzeʼ? Bʼalo kubʼ tnaʼn qa mintiʼxix toklen.

14. ¿Tiʼ onin tiʼj Pedro tuʼn kukx tajbʼen te Jehová? (Ax ikx qʼonka twitza tiʼj dibujo).

¹⁴ Kukx ajbʼen Pedro te Jehová. ¿Tiʼ onin tiʼj? Mintiʼ el tpan tibʼ, sino ten kyukʼil erman aqeju e onin tiʼj (Luc. 24:33). Ax ik tej tjaw anqʼin Jesús, kubʼ tyekʼin tibʼ twitz Pedro. Bʼalo tuʼn t-xi tqʼuqbʼaʼn tkʼuʼj (Luc. 24:34; 1 Cor. 15:5). Yajxitl mintiʼ xi tqanin te Pedro tiquʼn otoq kyaj tkolin, sino xi tqʼamaʼn te qa tzultoq qʼoʼn mas toklen (Juan 21:​15-17). Ojtzqiʼntoq tuʼn Pedro qa otoq kubʼ tbʼinchaʼn jun matij il, pero kukx ok tilil tuʼn tuʼn tkubʼ tbʼinchaʼn aju bʼaʼn. ¿Tiquʼn? Tuʼnju qʼuqlitoq tkʼuʼj tiʼj qa mintiʼ otoq tzʼel ikʼun tuʼn Jesús ex kʼujlaʼntoq kyuʼn terman. Qo yolin tiʼj tiʼ xnaqʼtzbʼil jaku tzʼel qiʼn tiʼj.

15. ¿Tiʼ tajbʼil Jehová tuʼn tok qeʼ qkʼuʼj tiʼj? (Salmo 86:5; Romanos 8:​38, 39; ax ikx qʼonka twitza tiʼj foto).

¹⁵ Aju xnaqʼtzbʼil. Taj Jehová tuʼn tok qeʼ qkʼuʼj tiʼj qa kʼujlaʼn qoʼ tuʼn ex qa taj tuʼn tkubʼ tnajsaʼn qil (kjawil uʼjit Salmo 86:5; Romanos 8:​38, 39). Ax tok, jaku kubʼ qnaʼn nya bʼaʼn aj tkubʼ qbʼinchaʼn jun il. Noqtzun tuʼnj, miʼn kubʼ qximen qa ya nya kʼujlaʼn qoʼ tuʼn Jehová moqa mlay kubʼ tnajsaʼn qil. Sino mas bʼaʼn tuʼn t-xi qjyoʼn onbʼil. In tzaj tqʼamaʼn Robert jlu,  aju ma qo yolin tiʼj toj párrafo 12: «Kubʼ nbʼinchane il tuʼnju ok qeʼ nkʼuʼje tiʼj qa mlaytoq kubʼ wiʼje tuʼn nya bʼaʼn ex qa nyatoq waje onbʼil». El tnikʼ Robert tiʼj qa iltoq tiʼj tuʼn tyolin kyukʼil ansyan. In tzaj tqʼamaʼntl jlu: «Tej tbʼant jlu wuʼne, tzaj kyyekʼin weye qa kukx kʼujlaʼn qine tuʼn Jehová. Mintiʼ kubʼ kyximen ansyan qa ya mintiʼ wajbʼene, sino tzaj kyyekʼin weʼye qa mintiʼ otoq chin kyaj koline tuʼn Jehová». Ik tzeʼn te Robert, jaku tzʼok qeʼ qkʼuʼj tiʼj qa nim kʼujlaʼn qoʼ tuʼn Jehová ex qa taj tuʼn tkubʼ tnajsaʼn qil qa ma tzʼajtz tiʼj qanmi, qa ma qo jyoʼn onbʼil ex qa ma tzʼok tilil quʼn tuʼn miʼn tkubʼ qbʼinchaʼn juntl maj il (1 Juan 1:​8, 9). Qa ma qo ximen tiʼj qa kukx kʼujlaʼn qoʼ tuʼn Jehová, kʼonil qiʼj tuʼn miʼn qsikt qa ma qo el txalpaj.

16. ¿Tiquʼn kukx taja tuʼn tajbʼena te Jehová ex tuʼn miʼn tsikta?

¹⁶ In nok tqʼoʼn Jehová toklen tkyaqilju in bʼant quʼn tuʼn qajbʼen te toj mankbʼil tqʼijlalil. Kʼonil qiʼj tuʼn miʼn ttzaj bʼaj qkʼuʼj ex tuʼn miʼn qel laqʼeʼ tiʼj maske in qo ok weʼ kywitz ambʼil kwest. Jaku tzʼok tilil quʼn tuʼn tchʼiy qkʼujlabʼil kyiʼj qerman ex tuʼn tkubʼ qnajsaʼn kyil qa ma tzʼok kybʼinchaʼn jun nya bʼaʼn qiʼj. Jaku txi qyekʼin te Jehová qa kʼujlaʼn quʼn ex qa in nok qqʼoʼn toklen mejebʼleʼn aj tok tilil quʼn tuʼn t-xi qbʼinchaʼn tiʼj jun nya bʼaʼn in tzaj tukʼil qchmil moqa qxuʼjil. Ex qa ma kubʼ qbʼinchaʼn jun matij il, jaku qo jyon onbʼil tukʼil Jehová. Miʼn tzikʼ tnaʼl quʼn qa kʼujlaʼn qoʼ tuʼn, qa jaku kubʼ tnajsaʼn qil ex qa jaku qoʼ ajbʼen te. «Kyjaʼtzun miʼn qo sikt tuʼn qbʼinchante aju bʼaʼn» tuʼnju ojtzqiʼn quʼn qa tzul tkʼiwlaʼn Jehová nimxix qoʼ (Gál. 6:9).