Noq tuʼn tchkʼel Jesús xi tqʼoʼn te chojbʼil, jaku kubʼ najsaʼn qil (Efes. 1:7). Maske ikju, in tzaj tqʼamaʼn Biblia «qa tuʼnju tpasens [Dios] at, mintiʼ kubʼ tqʼoʼn kycastiw xjal tuʼn tlaj kyil o kybʼincha ojtxi» (Rom. 3:25). A t-xilen jlu qa xi tzyet tuʼn tkubʼ tnajsaʼn Jehová kyil xjal tej naʼmxtoq txi tqʼoʼn Jesús tchwinqlal te chojbʼil. ¿Tzeʼn jaku bʼant jlu tuʼn Jehová ex tuʼn miʼn tikʼ kyibʼaj tkawbʼil?

Tej ttzaj tziyen Jehová qa kteltoq jun «tiyjil xuʼj» tuʼn kykolpet qeju in noq qeʼ kykʼuʼj tiʼj, ok jlu ik tzeʼn otoq tzaj tqʼoʼn chojbʼil (Gén. 3:15; 22:18). Qʼuqlitoq tkʼuʼj Jehová tiʼj qa kxel tqʼon tibʼ Jesús te chojbʼil aj tpon ambʼil (Gál. 4:4; Heb. 10:​7-10). Tej tten Jesús tzalu twitz Txʼotxʼ, xi qʼoʼn toklen tuʼn tkubʼ tnajsaʼn kyil qeju ok qeʼ kykʼuʼj tiʼj. Bʼant jlu tuʼn tuʼnju ojtzqiʼntoq tuʼn qa jaku kubʼ najsaʼn kyil xjal tuʼn chojbʼil kxeltoq tqʼoʼn yajxitl (Mat. 9:​2-6).