1, 2. ¿Tiʼ il tiʼj tuʼn tbʼant quʼn naʼmxtoq qbautisarin?

 KYOJ qe mankbʼil jweʼ abʼqʼi o che kyaj, mas te jun millón xjal e bautisarin kyxol testigo de Jehová. Ateʼ nim kye, ok kyojtzqiʼn axix tok tej kʼwalx qe ik tzeʼn te Timoteo (2 Tim. 3:​14, 15). Atzun junjuntl, ok kyojtzqiʼn Jehová tej kychʼiy moqa tej otoq che tijen. Tzma in nikʼ chʼin ambʼil, tbautisarin jun xuʼj in xnaqʼtzan kyukʼil testigo de Jehová te 97 abʼqʼi.

² ¿In xnaqʼtzanpe teya tiʼj Tyol Dios? ¿Moqa testigo de Jehová qe tmana ex in tzaj xnaqʼtzaʼn axix tok teya kyuʼn? Noq tzeʼnxku, bʼalo in ximana tiʼj tuʼn tbautisarina. Tbʼanelxix jlu, pero naʼmxtoq tbautisarina tbʼanel tuʼn t-xi tqʼamaʼna te Jehová qa taja tuʼn tajbʼena te. Tzul qʼamaʼn toj xnaqʼtzbʼil lu tiʼ t-xilen aj tbʼant jlu tuʼna. Ax ikx tzul qʼamaʼn tiquʼn mintiʼ tuʼn ttzaj xobʼa tuʼn tbʼant jlu tuʼna ex tuʼn tbautisarina qa ya o bʼant ttena.

¿TIʼ T-XILEN TUʼN T-XI TQʼOʼNA TANQʼIBʼILA TE JEHOVÁ?

3. Qʼamantza alkye junjun xjal e ajbʼen te Jehová toj junxitl tten.

³ In tzaj tqʼamaʼn Biblia qa aj t-xi tqʼoʼn jun xjal tchwinqlal te Jehová, in nel tpaʼn tuʼn tajbʼen oʼkx te. El paʼn tnam Israel tuʼn tajbʼen oʼkx te Jehová, pero e ten junjun israelita xi qʼoʼn junjuntl kyoklen. Jun techel, xi tqʼoʼn Jehová toklen Aarón te tnejel pal, tuʼntzunju ok qʼoʼn jun placa te oro te kʼalbʼil twiʼ Aarón «te jun techal qa otoq tzʼok toklen te pal» (Lev. 8:9). Ax ikx kye nazareo e ajbʼen toj junxitl tten te Jehová. Aju yol nazareo tzajni tiʼj yol hebreo nazír ex a t-xilen «paʼmaj» moqa «o txi tqʼoʼn tibʼ».  Tzaj qʼamaʼn toj Ley tzaj qʼoʼn te Moisés alkye junjun tiʼchaq iltoq tiʼj tuʼn tbʼant kyuʼn (Núm. 6:​2-8).

4. a) ¿Tiʼ t-xilen tuʼn t-xi qqʼoʼn qchwinqlal te Jehová? b) ¿Tiʼ t-xilen tuʼn tkubʼ qxkʼayin qibʼ teju qex qajbʼil? (Qʼonka twitza tiʼj dibujo).

⁴ Atzun qe, aj t-xi qqʼoʼn qchwinqlal te Jehová in qo ok te t-xnaqʼtzbʼen Jesús ex in kubʼ qqʼoʼn tajbʼil Jehová tnejel toj qanqʼibʼil. ¿Tiʼtzun t-xilen jlu? Tqʼama Jesús: «Qa at jun xjal taj tuʼn tok lpeʼ wiʼje, xkʼayink tibʼ teju tex tajbʼil» (Mat. 16:24). Aju txol yol griego kubʼ traducirin «xkʼayink tibʼ teju tex tajbʼil», ax ikx jaku kubʼ traducirit ik tzeʼn «kytzoqpinkje qe tiʼchaq kyaje» moqa tuʼn t-xi qqʼamaʼn miʼn teju qex qajbʼil. Tuʼntzunju, aj t-xi tqʼoʼna tchwinqlala te Jehová, kxel tqʼamaʼna miʼn kye qe tiʼchaq in nel tikʼun (2 Cor. 5:​14, 15). Kyxol qe jlu, at aju «tajbʼil kychibʼjal» xjal ik tzeʼn aju yaẍbʼil (Gál. 5:​19-21; 1 Cor. 6:18). ¿Kwestpe tuʼn tbʼant jlu? Qa kʼujlaʼn Jehová tuʼna ex qa qʼuqli tkʼuʼja tiʼj qa che onil qe tkawbʼil tiʼja nya kwest kʼelel teya (Sal. 119:97; Is. 48:​17, 18). Tqʼama jun ermano Nicholas tbʼi jlu: «Jaku tzʼok qmojbʼaʼn qe tkawbʼil Jehová ik tzeʼn jun reja te cárcel, aju mintiʼ in tzaj tqʼoʼn ambʼil qe tuʼn tkubʼ qbʼinchaʼn aju qajbʼil. Moqa jaku kubʼ qximen qa in che ok ik tzeʼn reja ateʼ toj jun zoológico in che onin tuʼn miʼn tok tzoqpaj jun león qiʼj».

5. a) ¿Tzeʼn in xi tqʼoʼn jun xjal tchwinqlal te Jehová? b) ¿Tiquʼn junxitl aj t-xi qtziyen te Jehová tuʼn qajbʼen oʼkx te ex aju bautismo? (Ax ikx qʼonka twitza kyiʼj tilbʼilal).

⁵ ¿Tzeʼn in xi tqʼoʼn jun xjal tchwinqlal te Jehová? In bʼant tuʼn toj jun naʼj Dios aj t-xi ttziyen te Jehová qa oʼkx te kʼajbʼel ex qa kbʼel tqʼoʼn tajbʼil tnejel toj tanqʼibʼil. Toj juntl yol, in xi ttziyen te  Jehová qa kʼokel tkʼujlaʼn tuʼn tkyaqil tanmi, tuʼn tkyaqil tnabʼil ex tuʼn tkyaqil tipumal (Mar. 12:30). In bʼant naʼj Dios lu quʼn qjunalx tukʼil Jehová. Atzunte bautismo, in bʼant kywitz txqantl, iktzun tten kʼelel kynikʼ tiʼj qa otoq txi qqʼamaʼn te Jehová tuʼn qajbʼen oʼkx te. Nim toklen qyol kxel qtziyen te ex tbʼanel qa ma japun quʼn tuʼnju atzun jlu in nayon Jehová tiʼj (Ecl. 5:​4, 5).

¿TIʼ KʼONIL TIʼJA TUʼN T-XI TQʼOʼNA TCHWINQLALA TE JEHOVÁ?

6. ¿Tiʼ in nonin tiʼj jun xjal tuʼn t-xi tqʼoʼn tchwinqlal te Jehová?

⁶ In kubʼ t-ximana tuʼn t-xi tqʼoʼna tchwinqlala te Jehová tuʼnju kʼujlaʼn tuʼna. Nya toj chʼin ambʼil o kubʼ tnaʼna kʼujlabʼil lu, sino chebʼe chebʼe o chʼiy akux in nok tojtzqiʼna Jehová. Iktzun tten kjapunel kywi yol lu: «Tuʼn kyojtzqinteye tkyaqilju» ex tuʼn telxix kynikʼe tiʼj tkyaqil (Col. 1:9). O tzʼok qeʼ tkʼuʼja tiʼj qa ax tok at Jehová, qa tyol tkuʼx toj Biblia ex qa in najbʼen ttnam tuʼn tbʼant aju tajbʼil.

7. ¿Tiʼ in bʼant tuʼn jun xjal aj t-xi tqʼoʼn tchwinqlal te Jehová?

⁷ Aj t-xi tqʼoʼn jun xjal tchwinqlal te Jehová, ya ojtzqiʼn qe xnaqʼtzbʼil ateʼ toj Biblia tuʼn, in xi tnimin qe tkawbʼil Jehová ex in nok tilil tuʼn tuʼn tyolin kyukʼil txqantl tiʼjju nimin tuʼn (Mat. 28:​19, 20). Ax ikx, in kubʼ tnaʼn nim kʼujlabʼil tiʼj Jehová ex taj tuʼn tkʼulin oʼkx te tuʼn tkyaqil tanmi. ¿In kubʼ tnaʼn teya jlu? Qa kʼujlaʼn Jehová tuʼna tuʼn tkyaqil tanmiya, mlay txi ttziyena tyola te ex mlay bautisarina noq oʼkx tuʼn ttzalaj xjal in qʼon xnaqʼtzbʼil teya. Qa kuʼxuna, mlay bʼant jlu tuʼna  noq tuʼn kytzalaj qe tmana moqa tuʼnju in che bautisarin qe tamiwa.

8. Aj t-xi qqʼoʼn chjonte te Jehová, ¿tzeʼn in nonin jlu qiʼj tuʼn t-xi qqʼoʼn qchwinqlal te? (Salmo 116:​12-14).

⁸ Aj t-ximana tiʼj tkyaqil o bʼant tuʼn Jehová tiʼja, taja tuʼn t-xi tqʼoʼna chjonte te ex kʼonil tiʼja tuʼn tkubʼ t-ximana tuʼn tajbʼena oʼkx te (kjawil uʼjit Salmo 116:​12-14). In tzaj tqʼamaʼn Biblia qa «tkyaqil oyaj bʼaʼn ex tkyaqil oyaj tbʼanilxix», atzun in tzaj tukʼil Jehová (Sant. 1:17). Aju oyaj mas tbʼanel o tzaj tqʼoʼn qe, aju chojbʼil bʼant tuʼn Jesús. Noq tuʼn oyaj lu, jaku tzʼoka te tamiw Jehová ex jaku tzʼanqʼina te jumajx (1 Juan 4:​9, 10, 19). Aj t-xi tqʼoʼna tchwinqlala te Jehová, atzun jun tten jaku txi tqʼoʼna chjonte tiʼj tkʼujlabʼil ex tiʼj tkyaqilju o bʼant tuʼn tiʼja (Deut. 16:17; 2 Cor. 5:15). Atzun jlu in yolin xnaqʼtzbʼil 46, punto 4 tiʼj toj libro Tzalaja tiʼj tanqʼibʼila. Ex kkanetel jun video tuʼna te oxe minut tok tbʼi: Aju jaku txi qqʼoʼn te Dios.

¿OPE BʼANT TTENA TUʼN T-XI TQʼOʼNA TCHWINQLALA TE JEHOVÁ EX TUʼN TBAUTISARINA?

9. ¿Tiquʼn mintiʼ tuʼn tok q-obligarin jun xjal tuʼn t-xi tqʼamaʼn te Jehová tuʼn tajbʼen te?

⁹ Bʼalo in kubʼ tnaʼna qa naʼmx tbʼant ttena tuʼn t-xi tqʼoʼna tchwinqlala te Jehová ex tuʼn tbautisarina. Bʼalo il tiʼj tuʼn tbʼant junjuntl chʼixpubʼil tuʼna toj tanqʼibʼila tuʼntzun t-xi tbʼiʼna qe tkawbʼil Jehová moqa taja tuʼn tchʼiy mas qʼuqbʼil tkʼuʼja (Col. 2:​6, 7). Naʼntza, nya ax ambʼil in chʼiy kykʼujlabʼil qeju in che xnaqʼtzan tiʼj Tyol Dios ex qeju kuʼxun toj kyokslabʼil. Tuʼntzunju, ximana kyiʼj chʼixpubʼil il tiʼj tuʼn tbʼant tuʼna ex bʼinchama, pero miʼn tzʼok tmojbʼan tibʼa kyukʼil txqantl (Gál. 6:​4, 5).

10. ¿Tiʼ jaku bʼant tuʼna qa naʼmx tbʼant ttena tuʼn t-xi tqʼoʼna tchwinqlala te Jehová ex naʼmx tbautisarina? (Ax ikx qʼonka twitza tiʼj recuadro « Qa testigo de Jehová qe tmana»).

¹⁰ Qa naʼmx tbʼant ttena tuʼn t-xi tqʼoʼna tchwinqlala te Jehová, kukx tzʼok tilil tuʼna tuʼn tjapun twi t-ximbʼetza. Qaninxa te Jehová tuʼn tonin tiʼja tuʼn kybʼant chʼixpubʼil tuʼna (Filip. 2:13; 3:16). Jaku tzʼok qeʼ tkʼuʼja tiʼj qa tzul tbʼiʼn Jehová qe tnaʼj Diosa ex tzul tzaqʼwena tuʼn (1 Juan 5:14).

¿TIQUʼN ATEʼ JUNJUN NAʼMX TBʼANT KYUʼN?

11. ¿Tiʼ kbʼantel tuʼn Jehová tuʼn kyten tmajen tzʼaqli twitz?

¹¹ Ateʼ junjun o bʼant kyten tuʼn t-xi kyqʼoʼn kychwinqlal te Jehová ex tuʼn kybautisarin, pero mintiʼ in xi kybʼinchaʼn jlu. Bʼalo tuʼnju in che tzaj xobʼ tuʼn tkubʼ kybʼinchaʼn jun il ex jaku che ex expulsarin. Pero in tzaj tqʼamaʼn Biblia qa ktzajel tqʼoʼn Jehová aju at tajbʼen kye tmajen tuʼntzun kybʼet «bʼaʼnxix ik tzaʼn tajbʼil» «ex tuʼn ttzalaj» kyuʼn toj tkyaqil (Col. 1:10). Tuʼntzunju, qa in tzaj xobʼa jaku tzʼok qeʼ tkʼuʼja tiʼj qa tzul tqʼoʼn Jehová tipumala tuʼn t-xi tbʼinchaʼna aju bʼaʼn. Atzun jlu o bʼant tuʼn kyukʼil nimku tmajen (1 Cor. 10:13). Ex o tzʼonin jlu tuʼn miʼn kyex expulsarin nim tmajen Jehová. Tuʼn tonbʼil, jaku che ten tzʼaqli twitz.

12. ¿Tiʼ kʼonil qiʼj tuʼn miʼn tkubʼ qbʼinchaʼn jun matij il?

¹² Tuʼnju aj il qoʼ jaku ten qajbʼil tuʼn tkubʼ qbʼinchaʼn nya bʼaʼn (Sant. 1:14). Noqtzun tuʼnj, aj tok weʼya twitz jun tentación, aya kbʼel ximente tiʼ kbʼantel tuʼna toj tanqʼibʼila. Ateʼ junjun xjal in tzaj kyqʼamaʼn qa mlay bʼant tuʼn qjakʼunte qibʼ, pero nya ax tok jlu. Jaku bʼant tuʼn  qjakʼunte aju in kubʼ qnaʼn ex aju in bʼant quʼn. Jaku tzʼonin qiʼj aj qnaʼn Dios, aj qxnaqʼtzan qjunalx, aj qxiʼ kyoj chmabʼil ex aj qpakbʼan. Qa kukx ma bʼant jlu quʼn, ktel qipumal tuʼn tjapun twi qyol o txi qtziyen te Jehová ex miʼn tzikʼ tnaʼl quʼn qa kʼonil qiʼj (Gál. 5:16).

13. ¿Alkye tbʼanel techel kyaj tqʼoʼn José?

¹³ Mas fácil jaku qo ten tzʼaqli twitz Jehová qa ma qo ximen tiʼj tiʼ jaku bʼant quʼn naʼmxtoq qok weʼ twitz jun tentación. In che kanet techel quʼn toj Biblia kyiʼj qe xjal e ten tzʼaqli twitz Jehová maske aj il qe ik tzeʼn qoʼ. Jun kyxol qe jlu ten José. Xi tqʼamaʼn t-xuʼjil Potifar nimku maj te José tuʼn tkubʼ ten tukʼil, pero ojtzqiʼntoq tuʼn José tiʼtoq tuʼn tbʼant tuʼn. In tzaj tqʼamaʼn Biblia qa mintiʼtoq in xi tbʼiʼn tyol t-xuʼjil Potifar ex xi tqʼamaʼn jlu te: «¿Tzaʼntzun tten tuʼn nbʼinchanteye matij il lu ex tuʼn nbʼinchanteye il twitz Dios?» (Gén. 39:​8-10). In tzaj tyekʼin jlu qa ya ojtzqiʼntoq tuʼn José tiʼtoq tuʼn tbʼant tuʼn, axpe ikx tej naʼmxtoq tok weʼ twitz tentación tuʼn t-xuʼjil Potifar. Ex onin jlu tiʼj tuʼn t-xi tqʼamaʼn miʼn.

14. ¿Tiʼ jaku bʼant quʼn tuʼn tel qikʼun aju in nel tiquʼn Jehová?

¹⁴ ¿Tzeʼn jaku qo ten tzʼaqli ik tzeʼn te José? Bʼaʼn tuʼn qximen tiʼj jaʼlo tiʼ jaku bʼant quʼn naʼmxtoq qok weʼ twitz jun tentación. Il tiʼj tuʼn tel qikʼen jun rat aju in nel tikʼun Jehová ex tuʼn miʼn qximen tiʼj (Sal. 97:10; 119:165). Qa ma bʼant jlu quʼn, kʼonil qiʼj tuʼn miʼn tkubʼ qbʼinchaʼn jun matij il ex ya ojtzqiʼn quʼn tiʼ tuʼn tbʼant quʼn aj qok weʼ twitz jun tentación.

15. ¿Tzeʼn jaku kubʼ tyekʼina qa in jyona tiʼj Jehová? (Hebreos 11:6).

¹⁵ Bʼalo in nel tnikʼa tiʼj qa o kanet axix tok tuʼna ex tajbʼila tuʼn tajbʼena te Jehová tuʼn tkyaqil tanmiya. Pero, ¿atpe jun tiʼ in nel tiʼn ambʼil teya tuʼn t-xi tqʼoʼna tchwinqlala te Jehová ex tuʼn tbautisarina? Qa ikju, jaku tzʼel tkanoʼna tiʼj rey David ex jaku txi tqʼamaʼna jlu te Jehová: «Nman Dios, chin tchʼixpunbʼaja ex ojtzqima wanmiye; e tikʼ twitza wiʼje ex ojtzqima tuj nnabʼle; ex keʼyintza qa in chin bʼete tuj bʼe mya bʼaʼn, ex chin t-ẍaqluma tuj bʼe te jumajx» (Sal. 139:​23, 24). Qa in nok tilil tuʼna tuʼn tjapun twi t-ximbʼetza  tuʼn t-xi tqʼoʼna tchwinqlala te Jehová ex tuʼn tbautisarina, in kubʼ tyekʼina qa in jyona tiʼj. In tzaj tqʼamaʼn Tyol Dios qa in tzaj tkʼiwlaʼn Jehová qeju in bʼant jlu kyuʼn (kjawil uʼjit Hebreos 11:6).

KUKX TZʼOK LAQʼEʼYA TTXLAJ JEHOVÁ

16, 17. ¿Tzeʼn in nonin Jehová kyiʼj kykʼwal testigo de Jehová tuʼn kyten toj congregación? (Juan 6:44).

¹⁶ Kyaj tqʼamaʼn Jesús qa a Jehová in tzaj qʼin kye xjal toj ttnam (kjawil uʼjit Juan 6:44). ¡Tbʼanelxix lu! ¿Ope ximen teya tiʼj jlu jun maj? In nok tqʼoʼn Jehová twitz tiʼj jun tbʼanel tiʼ kyiʼj xjal in tzaj tiʼn toj ttnam. Teyele junjun tmajen «tekuxix» (Deut. 7:6). Ex at teya kyxol jlu.

¹⁷ Aya kuʼxun, qa in xi qʼoʼn xnaqʼtzbʼil teya tiʼj axix tok kyuʼn qe tmana, bʼalo in kubʼ tnaʼna qa nya a Jehová o tzaj qʼinte teya sino aʼye qe tmana. Pero in tzaj tqʼamaʼn Tyol Dios jlu: «Che laqʼexe ttxlaj Dios, ax ikx te ktzajel laqʼeʼ kyukʼile» (Sant. 4:8; 1 Crón. 28:9). In tzaj tyekʼin jlu qa aj t-xi laqʼeʼya ttxlaj Jehová ktzajel laqʼeʼ ttxlaja. Nim toklena toj ttnam Jehová. Kykyaqil xjal ateʼ kyoj congregación, a Jehová o tzaj qʼinte teyele junjun kye. Kyxol qe jlu, ateʼ qe kykʼwal testigo de Jehová. Aj tok laqʼeʼ jun xjal ttxlaj Jehová, ax ikx te in tzaj laqʼeʼ ttxlaj ik tzeʼn in tzaj tqʼamaʼn Santiago 4:8 (mojbʼankuya tukʼil 2 Tesalonicenses 2:13).

18. ¿Tiʼ kʼelel qnikʼ tiʼj toj juntl xnaqʼtzbʼil? (Salmo 40:8).

¹⁸ Tej tbautisarin Jesús, xi tqʼoʼn tchwinqlal te Jehová tuʼn t-xi tbʼinchaʼn noq tiʼxku tzaj tqʼamaʼn te (kjawil uʼjit Salmo 40:8; Heb. 10:7). Kʼelel tkanoʼna tiʼj Jesús aj t-xi tqʼoʼna tchwinqlala te Jehová ex aj tbautisarina. Kʼonil juntl xnaqʼtzbʼil tiʼja tuʼn kukx ttena tzʼaqli twitz Jehová otoqxi bautisarina.