1. ¿Tiʼ jaku kubʼ kyximen junjun tmajen Jehová?

 TBʼANEL aj tel qnikʼ tiʼj qa «in tzalaj Qman [Jehová] tiʼj ju tnam etzan tuʼn» (Sal. 149:4). Pero ateʼlo junjun qe jaku kubʼ t-ximen: «Ax tok, in tzalaj Jehová tiʼj ttnam, pero ¿in tzalajpe wiʼje?». Ax ikx e ten tmajen Jehová toj ambʼil ojtxe kwest ela kye tuʼn t-xi kynimen qa in tzalaj Jehová kyiʼj (1 Sam. 1:​6-10; Job 29:​2, 4; Sal. 51:11).

2. ¿Alkyeqe in tzalaj Jehová tiʼj?

² In tzaj tqʼamaʼn Tyol Dios qa jaku tzalaj Jehová qiʼj maske aj il qoʼ. ¿Tiʼtzun il tiʼj tuʼn tbʼant quʼn? Bʼaʼn tuʼn tok qeʼ qkʼuʼj tiʼj Jesús ex tuʼn qbautisarin (Juan 3:16). Iktzun tten kbʼel qyekʼin kywitz txqantl qa otoq tzʼajtz tiʼj qanmi kyiʼj il otoq che bʼant quʼn ex qa otoq txi qtziyen te Dios qa qaj tuʼn t-xi qbʼinchaʼn aju tajbʼil (Hech. 2:38; 3:19). In kubʼ tnaʼn Jehová nim tzalajbʼil aj tbʼant jlu quʼn tuʼnju in kubʼ qyekʼin qa qaj tuʼn qok te tamiw. Qa ma tzʼok tilil quʼn tuʼn tjapun twi qyol otoq txi qtziyen te, ktzalajel qiʼj ex qo okel te tamiw (Sal. 25:14).

3. ¿Alkyeqe xjel kxel qqʼoʼn tzaqʼwebʼil kyiʼj toj xnaqʼtzbʼil lu?

³ ¿Tiquʼn ateʼ junjun in kubʼ kyximen qa mintiʼ in tzalaj Jehová kyiʼj? ¿Tzeʼn in tzaj tyekʼin Jehová qa in tzalaj qiʼj? ¿Ex tiʼ jaku tzʼonin qiʼj tuʼn tok qeʼ qkʼuʼj tiʼj qa in tzalaj qiʼj?

¿TIQUʼN ATEʼ JUNJUN IN KUBʼ KYXIMEN QA MINTIʼ IN TZALAJ JEHOVÁ KYIʼJ?

4, 5. ¿Tiʼ jaku tzʼok qeʼ qkʼuʼj tiʼj maske in kubʼ qximen qa mintiʼ qoklen?

⁴ Tej atxix kʼwal qoʼ, ateʼ nim qe kubʼ tnaʼn qa mintiʼ qoklen (Sal. 88:15). Tqʼama jun ermano Adrián tbʼi jlu: «Kukx  in kubʼ nximane qa mintiʼ woklene. Tej kʼwalx qine, xi nqanine te Jehová tuʼn kyanqʼin toj njaye toj Paraíso, pero kubʼ nnaʼne qa mintiʼ woklene tuʼn ntene kyukʼil». Ax ikx te Tony in tzaj tqʼamaʼn tzeʼn jaw chʼiy kyuʼn tman nya testigo de Jehová: «Mintiʼ tzaj kyqʼamaʼn weye qa in che tzalaj wiʼje ex qa kʼujlaʼn qine kyuʼn, sino kubʼ nnaʼne qa mlayx bʼant jun tiʼ tbʼanel wuʼne».

⁵ Qa in kubʼ qnaʼn qa mintiʼ qoklen, bʼaʼn tuʼn ttzaj qnaʼn qa a Jehová o tzaj qʼinte qe toj ttnam (Juan 6:44). In nok tqʼoʼn twitz kyiʼj tbʼanel qmod maske mintiʼ in nok qqʼoʼn qwitz tiʼj ex ojtzqiʼnxix qoʼ tuʼn (1 Sam. 16:7; 2 Crón. 6:30). Tuʼntzunju, jaku tzʼok qeʼ qkʼuʼj tiʼj aj ttzaj tqʼamaʼn qa nim qoklen toj twitz (1 Juan 3:​19, 20).

6. ¿Tiʼ kubʼ tnaʼn Pablo tej t-ximen kyiʼj il otoq kubʼ tbʼinchaʼn?

⁶ Bʼalo ateʼ junjun qe kukx in kubʼ qnaʼn nya bʼaʼn kyuʼn tiʼchaq kubʼ qbʼinchaʼn tej naʼmxtoq tok qojtzqiʼn axix tok (1 Ped. 4:3). Atzun junjuntl, o tzikʼ ambʼil kukx in che ajbʼen te Jehová, pero in nok tilil kyuʼn tuʼn tkubʼ tiʼjju nya bʼaʼn kyajbʼil. ¿Yajtzun teya? ¿In kubʼ tnaʼna qa mlay kubʼ najsaʼn tila tuʼn Jehová? Qa ikju, jaku chewix tanmiya aj tel tnikʼa tiʼj qa ateʼ tmajen Jehová ax jlu kubʼ kynaʼn. Jun techel, tzaj tbʼis apóstol Pablo tuʼnju el txalpaj (Rom. 7:24). Maske otoq tzʼajtz tiʼj tanmi kyiʼj il bʼant tuʼn ex otoq bautisarin, kukx kubʼ tnaʼn qa «tal chʼin [ . . . ] kywitz qe txqantl apóstol» ex qa «mas aj ilxix kywitz kykyaqil» (1 Cor. 15:9; 1 Tim. 1:15).

7. ¿Tiʼ jaku tzʼok qeʼ qkʼuʼj tiʼj qa ax tok ma tzʼajtz tiʼj qanmi?

⁷ In tzaj ttziyen Qman Jehová qa in kubʼ tnajsaʼn qil qa ma tzʼajtz tiʼj qanmi (Sal. 86:5). Tuʼntzunju, qa ma tzaj qbʼis kyiʼj il o che bʼant quʼn, jaku tzʼok qeʼ qkʼuʼj tiʼj qa ax tok kbʼel tnajsaʼn Jehová qil (Col. 2:13).

8, 9. ¿Tiʼ jaku tzʼonin qiʼj tuʼn miʼn tkubʼ qximen qa mlay tzalaj Jehová tiʼjju in bʼant quʼn?

⁸ Qkyaqilx qaj tuʼn t-xi qqʼoʼn aju mas tbʼanel te Jehová. Pero ateʼ junjun jaku kubʼ kynaʼn qa mlay tzalaj Jehová kyiʼj tuʼn tkyaqilju in bʼant kyuʼn. Tqʼama jun ermana Amanda tbʼi jlu: «In kubʼ nximane qa il tiʼj tuʼn t-xi nbʼinchaʼne mas tiʼ tuʼntzun t-xi nqʼoʼne aju mas tbʼanel te Jehová. Tuʼntzunju, nim maj in xi nbʼinchaʼne qe tiʼchaq mlay che bʼant wuʼne. Qa mintiʼ in che bʼant wuʼne, in kubʼ nximane qa in tzaj tbʼis Jehová wiʼje ik tzeʼn weye in tzaj nbʼise wiʼjxe».

⁹ ¿Tiʼ jaku tzʼonin qiʼj tuʼn miʼn tkubʼ qximen qa mlayx tzalaj Jehová tiʼjju in bʼant quʼn? Bʼaʼn tuʼn ttzaj qnaʼn qa mintiʼ in tzaj tqanin Jehová jun tiʼ qe aju mlay bʼant quʼn. In nok tqʼoʼn toklen aju jaku bʼant quʼn, ya sea matij moqa chʼin. Qo ximen kyiʼj tmajen Jehová e ajbʼen te tuʼn tkyaqil kyanmi. Jun techel, ok tilil tuʼn Pablo tuʼn taqʼunan. Toj nimku ambʼil, xi tbʼetin nim ex onin tuʼn kyxi tzyet akʼaj congregación. Noqtzun tuʼnj, chʼexpaj tanqʼibʼil ex mlaytoq bʼant tuʼn tpakbʼan ik tzeʼn tnejel. ¿Tuʼnpe jlu ya mintiʼ tzalaj Jehová tiʼj? Miʼn, kukx xi tbʼinchaʼn Pablo aju jakutoq bʼant tuʼn ex tzaj kʼiwlaʼn tuʼn Jehová (Hech. 28:​30, 31). Ax ikx qe, mlay bʼant aʼyex tiʼchaq quʼn toj qajbʼebʼil te Jehová ik tzeʼn kye txqantl. Pero aju mas nim toklen, aju tiquʼn in che bʼant quʼn. Atzun jaʼlo, qo yolin kyiʼj junjun tiʼchaq in tzaj kyyekʼin qa in tzalaj Jehová qiʼj.

 ¿ALKYE TTEN IN TZAJ TYEKʼIN JEHOVÁ QA IN TZALAJ QIʼJ?

10. ¿Tzeʼn in tzaj tqʼamaʼn Jehová qe qa in tzalaj qiʼj? (Juan 16:27).

¹⁰ In najbʼen Tyol tuʼn. Tgan Jehová tuʼn t-xi tyekʼin kye tmajen qa kʼujlaʼn qe tuʼn ex qa in tzalaj kyiʼj. In tzaj qʼamaʼn toj Biblia qa toj kabʼe ambʼil tqʼama Jehová te Jesús qa kʼujlaʼn tuʼn ex qa in tzalaj tiʼj (Mat. 3:17; 17:5). ¿Taja tuʼn ttzaj tqʼamaʼn Jehová teya qa in tzalaj tiʼja? Ax tok, mlay tzaj yolin Jehová qukʼil tzmax toj kyaʼj, pero in najbʼen Tyol tuʼn. Aj tjaw quʼjin qe tbʼanel yol xi tqʼamaʼn Jesús kye t-xnaqʼtzbʼen, in kubʼ qnaʼn ik tzeʼn qe in tzaj yolin Jehová (kjawil uʼjit Juan 16:27). Toj jun tten tzʼaqli el tkanoʼn Jesús tiʼj Tman. Tuʼntzunju, tej t-xi tqʼamaʼn kye t-xnaqʼtzbʼen qa kʼujlaʼn qe tuʼn maske i el txalpaj, jaku qo ximen tiʼj qa aʼyex yol lu in tzaj tqʼamaʼn Jehová qe (Juan 15:​9, 15).

11. ¿Tiquʼn mintiʼ tuʼn tkubʼ qximen qa ya mintiʼ in tzalaj Jehová qiʼj aj qikʼ kyoj nya bʼaʼn? (Santiago 1:12).

¹¹ In kubʼ tyekʼin tukʼil tbʼinchbʼen. Taj Jehová tuʼn tonin qiʼj. Jun techel, in tzaj tqʼoʼn aju at tajbʼen qe. Noqtzun tuʼnj, at maj in tzaj tqʼoʼn ambʼil tuʼn qikʼ toj nya bʼaʼn ik tzeʼn bʼaj tiʼj Job (Job 1:​8-11). Pero aj qikʼ kyoj nya bʼaʼn, miʼn kubʼ qximen qa ya mintiʼ in tzalaj Jehová qiʼj. Sino atz toj ambʼil lu bʼaʼn tuʼn tkubʼ qyekʼin qa kʼujlaʼnxix quʼn ex qa in nok qeʼ qkʼuʼj tiʼj (kjawil uʼjit Santiago 1:12). Kyoj ambʼil lu, kʼokel qqʼoʼn qwitz tiʼj tzeʼn kʼonil Jehová qiʼj ex tzeʼn kbʼel tyekʼin qa kʼujlaʼn qoʼ tuʼn tuʼntzun kukx tikʼx quʼn.

12. ¿Tiʼ in tzaj tyekʼin qe aju bʼaj tiʼj Dimitri?

¹² Qo ximen tiʼ bʼaj tiʼj jun ermano te Asia, aju Dimitri tbʼi. El qʼiʼn taqʼun ex toj nimku ambʼil mintiʼ kanet juntl. Tej tbʼaj jlu, kubʼ t-ximen tuʼn tpakbʼan mas ambʼil tuʼn tkubʼ tyekʼin qa qʼuqli tkʼuʼj tiʼj Jehová. Pero e ikʼ nim xjaw ex mintiʼ kanet jun taqʼun. Yajxitl, tzaj jun yabʼil tiʼj ex iltoq tiʼj tuʼn tten twitz watbʼil. Tibʼajxi jlu, kubʼ t-ximen qa nya jun tbʼanel mambʼaj, chmilbʼaj ex qa otoq tzaj tbʼis Jehová tuʼn. Pero toj jun qonikʼen, etz t-imprimirin tmeʼjel jun uʼj kyukʼil qe yol in tqʼamaʼn toj Isaías 30:15: «Qa ma che kubʼ txuleye ex qa ma qeʼ kykʼuʼje wiʼje,  oktzun kykʼmaʼye kyipumale». Xi tiʼn txin uʼj te tman ex xi tqʼamaʼn te: «Papi, naʼntza texto lu aj ttzaj tbʼisa». Toj ambʼil lu, el tnikʼ Dimitri tiʼj qa mintiʼ otoq kyaj kolin tuʼn Jehová tuʼnju attoq kyxbʼalun, kywa ex kyja. Tqʼama: «Mintiʼ tuʼn ttzaj nbʼise ex il tiʼj tuʼn kux tok qeʼ nkʼuʼje tiʼj Jehová». Qa in nikʼa toj jun ambʼil ik tzeʼn jlu, jaku tzʼok qeʼ tkʼuʼja tiʼj qa in ximen Jehová tiʼja ex qa ktzajel tqʼoʼn tipumala tuʼn tikʼx tuʼna.

13. ¿Alkye juntl tumel in tzaj tyekʼin Jehová qa in tzalaj qiʼj?

¹³ In che ajbʼen erman tuʼn. In che ajbʼen tmajen Jehová tuʼn tuʼn ttzaj tqʼuqbʼaʼn qkʼuʼj toj ambʼil atxix tajbʼen qe. Atzun jlu bʼaj tiʼj jun ermana te Asia. El qʼiʼn taqʼun ex tzaj yabʼil tiʼj. Yajxitl, kubʼ tbʼinchaʼn tchmil jun matij il ex el qʼiʼn toklen te ansyan. Tzaj nim estrés tiʼj ermana tuʼn jlu ex tqʼama: «Mintiʼ el nnikʼe tiʼj tiquʼn bʼaj jlu wiʼje. Kubʼ nximane qa otoq kubʼ nbʼinchaʼne jun nya bʼaʼn ex qa mintiʼ in tzalaj Jehová wiʼje». Tuʼntzunju, xi tqanin te Jehová tuʼn ttzaj tyekʼin te qa kukx kʼujlaʼn tuʼn ex tzaj ttzaqʼweʼn tnaʼj Dios. ¿Tzeʼn? In tzaj tqʼamaʼntl jlu: «E yolin ansyan wukʼile ex tzaj kyyekʼin weye qa kukx kʼujlaʼn qine tuʼn Jehová». Tej tikʼ ambʼil, xi tqanin ermana te Jehová tuʼn tonin tiʼj. Tqʼama jlu: «Toj ax qʼij aju, tzaj nkʼamoʼne jun tbʼanel carta tzaj kysamaʼn erman weye. Tej tjaw wuʼjine, kubʼ nnaʼne qa otoq tzaj tbʼiʼn Jehová nnaʼj Diose». In tzaj tyekʼin jlu qe qa in tzalaj Jehová qiʼj aj tzaj kyqʼamaʼn txqantl tbʼanel yol qe (Sal. 10:17).

14. ¿Alkye juntl tumel in che ajbʼen erman tuʼn Jehová tuʼn ttzaj tyekʼin qa in tzalaj qiʼj?

¹⁴ Ax ikx in tzaj tyekʼin Jehová qa in tzalaj qiʼj aj ttzaj kyqʼoʼn erman consej at  tajbʼen qe. Jun techel, toj tnejel syent abʼqʼi ajbʼen apóstol Pablo tuʼn Jehová tuʼn tkubʼ ttzʼibʼin 14 carta. Kyoj carta lu xi ttzʼibʼin qe consej kyuw, pero tukʼil kʼujlabʼil. ¿Tiquʼn ajbʼen Pablo tuʼn Jehová tuʼn tkubʼ ttzʼibʼin qe consej lu? Tuʼnju jun tbʼanel mambʼaj Jehová ex in qo tzaj tkawin «ik tzaʼn jun mambʼaj in che kubʼ tkawin tkʼwaʼl kʼujlaʼnxix tuʼn» (Prov. 3:​11, 12). Tuʼntzunju, qa ma tzaj qʼoʼn jun consej qe tukʼil Tyol Dios, miʼn kubʼ qximen qa ya mintiʼ in tzalaj Jehová qiʼj. Sino jun yekʼbʼil tiʼj qa kukx kʼujlaʼn qoʼ tuʼn (Heb. 12:6). ¿Alkye juntl tten in tzaj tyekʼin Jehová qa kukx in tzalaj qiʼj?

JUNJUNTL YEKʼBʼIL QA IN TZALAJ JEHOVÁ QIʼJ

15. ¿Alkyeqe in xi tqʼoʼn Jehová xewbʼaj xjan kye ex tiʼ jaku tzʼok qeʼ qkʼuʼj tiʼj?

¹⁵ In tzaj tqʼoʼn Jehová xewbʼaj xjan kye qeju in tzalaj kyiʼj (Mat. 12:18). Jaku kubʼ qxjelin jlu: «¿In kubʼpe nyekʼine toj wanqʼibʼile qe mod in tqʼoʼn xewbʼaj xjan?». Jun techel, ¿maspe at tpasensa jaʼlo ik tzeʼn tej naʼmxtoq tok tojtzqiʼna Jehová? Qa mas in kubʼ tyekʼina qe mod in tqʼoʼn xewbʼaj xjan, mas jaku tzʼok qeʼ tkʼuʼja tiʼj qa in tzalaj Jehová tiʼja. (Qʼonka twitza tiʼj recuadro « Qe mod in tqʼoʼn xewbʼaj xjan. . .»).

16. Ik tzeʼn in tzaj tqʼamaʼn 1 Tesalonicenses 2:​4, ¿alkyeqe in che ajbʼen tuʼn Jehová tuʼn kypakbʼaʼn tbʼanel tqanil ex tiʼ in kubʼ tnaʼna tuʼn jlu?

¹⁶ O txi tqʼoʼn Jehová kyoklen xjal in tzalaj kyiʼj tuʼn kypakbʼaʼn kyiʼj tbʼanel tqanil (kjawil uʼjit 1 Tesalonicenses 2:4). Qo xnaqʼtzan tiʼj tzeʼn el tnikʼ jun ermana tiʼj jlu, aju Jocelyn tbʼi. Toj jun qʼij, tej tjaw weʼ kubʼ tnaʼn qa otoq tzaj bʼaj tkʼuʼj. Tqʼama: «Kubʼ nnaʼne qa mintiʼ ten wipumale tuʼn t-xi nbʼinchaʼne jun tiʼ. Pero in chin ajbʼentoqe te precursora ex toj qʼij aju, iltoq tiʼj tuʼn qxiʼye pakbʼal. Tuʼntzunju, in naʼne Dios te Jehová ex in xiʼye». Te prim aju, yolin Jocelyn tukʼil Mary, jun xuʼj kubʼ tyekʼin tbʼanel tmod ex xi tkʼamoʼn xnaqʼtzbʼil tiʼj Tyol Dios. Tej tikʼ junjun xjaw, xi tqʼamaʼn Mary te Jocelyn qa otoq txi tqanin te Dios tuʼn tonin tiʼj toj qʼij tej tpakbʼan Jocelyn te. ¿Tiʼ tzaj tyekʼin jlu te Jocelyn? Tqʼama jlu: «Kubʼ nnaʼne ik tzeʼn tzaj tqʼamaʼn Jehová weye: ‹In chin tzalaje tiʼja›». Ax tok, nya  kykyaqil xjal kʼokel kybʼiʼn tbʼanel tqanil in qo pakbʼan tiʼj, pero jaku tzʼok qeʼ qkʼuʼj tiʼj qa in tzalaj Jehová qiʼj aj tok tilil quʼn tuʼn qyolin kyukʼil.

17. ¿Tiʼ in tzaj tyekʼin teya tiʼj chojbʼil aju tqʼama Vicky? (Salmo 5:12).

¹⁷ O tzaj tqʼoʼn Jehová chojbʼil kye qeju in tzalaj kyiʼj (1 Tim. 2:​5, 6). ¿Yajtzun qa kwest in nela toj qwitz tuʼn t-xi qnimen qa in tzalaj Jehová qiʼj maske qʼuqli qkʼuʼj tiʼj chojbʼil ex o qo bautisarin? Bʼaʼn tuʼn ttzaj qnaʼn qa mlay tzʼok qeʼ qkʼuʼj tiʼj qanmi, pero jaku tzʼok qeʼ qkʼuʼj tiʼj Jehová. Toj twitz, tzʼaqli kykyaqil qeju in nok qeʼ kykʼuʼj tiʼj chojbʼil ex in tzaj ttziyen tuʼn kytzaj tkʼiwlaʼn (kjawil uʼjit Salmo 5:12; Rom. 3:26). Nim onin tiʼj jun ermana Vicky tbʼi tej t-ximen tiʼj chojbʼil maske kwest ela te tuʼn t-xi tnimen qa kʼujlaʼn tuʼn Jehová. Tqʼama jlu: «Otoq ten nim tpasens Jehová wukʼile toj nim ambʼil [ . . . ]. Maske ikju, ok ik tzeʼn xi nqʼamaʼne jlu te: ‹Mlayx chin ok tkʼujlaʼna. Mlayx che kubʼ najsaʼn wile tuʼn chojbʼil bʼant tuʼn Tkʼwala›». Ik tzeʼn te Vicky, ax ikx qe jaku kubʼ qnaʼn qa kʼujlaʼn qoʼ tuʼn Jehová ex jaku tzʼok qeʼ qkʼuʼj tiʼj qa in tzalaj qiʼj aj qximen tiʼj chojbʼil.

18. ¿Tiʼ jaku tzʼok qeʼ qkʼuʼj tiʼj qa kukx in nok qkʼujlaʼn Jehová?

¹⁸ Jaku tzʼok tilil quʼn tuʼn tkubʼ qqʼoʼn toj xnaqʼtzbʼil aju ma tzʼel qnikʼ tiʼj, pero atlo maj jaku tzaj bʼaj qkʼuʼj ex jaku kubʼ qximen qa mintiʼ in tzalaj Jehová qiʼj. Qa ma bʼaj jlu tiʼja, bʼaʼn tuʼn ttzaj tnaʼna qa in tzalaj Jehová kyiʼj «qeju in che kʼujlan te» (Sant. 1:12). Tuʼntzunju, kukx tzʼok laqʼeʼya ttxlaj Jehová ex tzʼok tilil tuʼna tuʼn tel tnikʼa tiʼj tzeʼn in tzaj tyekʼin qa in tzalaj tiʼja. Ex miʼn tzikʼ tnaʼl tuʼna qa «ate Dios mya najchaq taʼ ttxlaj junjun qe» (Hech. 17:27).