1, 2. a) ¿Jtoje, jatumel ex tiquʼn xi ttzʼibʼin Pablo carta kye okslal te Éfeso? b) ¿Alkyeqe xjel kxel qqʼoʼn tzaqʼwebʼil tiʼj toj xnaqʼtzbʼil lu?

 TAJTOQ Pablo tuʼn t-xi tqʼuqbʼaʼn kykʼuʼj erman tej attoq pres toj tnam Roma. Tuʼnju mlaytoq bʼant tuʼn t-xiʼ visitaril kye, kubʼ ttzʼibʼin nim carta. Jun kyxol qe jlu, xi tsamaʼn kye okslal te tnam Éfeso nqayin tiʼj abʼqʼi 60 moqa 61 (Efes. 1:1; 4:1).

² Otoq tzikʼ 10 abʼqʼi in pakbʼan Pablo toj tnam Éfeso ex xi tqʼoʼn xnaqʼtzbʼil tiʼj tbʼanel tqanil (Hech. 19:​1, 8-10; 20:​20, 21). Kʼujlaʼn qetoq erman tuʼn Pablo ex onin kyiʼj tuʼn kukx kyten tzʼaqli twitz Jehová. Pero, ¿tiquʼn xi ttzʼibʼin kye okslal skʼoʼn maj tiʼj spikʼun ex tiʼj qlolj? ¿Ex tiʼ xnaqʼtzbʼil jaku tzʼel qiʼn tiʼjju kubʼ ttzʼibʼin? Toj xnaqʼtzbʼil lu, kxel qqʼoʼn tzaqʼwebʼil kyiʼj kabʼe xjel lu.

I ETZ TOJ QLOLJ TUʼN KYTEN TOJ SPIKʼUN

3. ¿Alkyeqe techel yolin apóstol Pablo tiʼj toj Efesios capítulo 5?

³ Xi tqʼamaʼn Pablo jlu kye okslal te Éfeso: «Porke ojtxi ateʼye tuj qlolj, atzun jaʼlo ateʼye tuj spikʼun» (Efes. 5:8). Ajbʼen techel tiʼj spikʼun ex qlolj tuʼn Pablo tuʼn tyolin tiʼj matij chʼixpubʼil bʼant kyuʼn okslal te Éfeso. Tnejel, qo yolin tiʼj tiquʼn tqʼama qa e ten toj qlolj.

4. ¿Tiquʼn in xi qqʼamaʼn qa ateʼtoq xjal te Éfeso toj qlolj tuʼn tpaj nya ax tok okslabʼil?

⁴ E ten toj qlolj tuʼn tpaj nya ax tok okslabʼil. Tej naʼmxtoq tel kynikʼ xjal te Éfeso tiʼj axix tok, xi kynimen aju tzaj kyxnaqʼtzaʼn nya ax tok okslabʼil ex junjuntl tiʼchaq. Toj tnam Éfeso, bʼaj bʼinchaʼn jun templo te diosa Ártemis ex toj ambʼil aju, kubʼ kyximen xjal qa atzun jun  kyxol qe wuq tiʼ mas tbʼanel bʼant twitz tkyaqil Txʼotxʼ. Ateʼ nim xjal e pon kʼulil kywitz tilbʼilal toj lugar aju. Ex e kambʼan xjal nim pwaq tuʼnju kubʼ kybʼinchaʼn ex xi kykʼayin tilbʼilal tiʼj templo te Ártemis (Hech. 19:​23-27). Nya oʼkxju, ax ikx ajbʼen magia kyuʼn (Hech. 19:19).

5. ¿Tiquʼn in xi qqʼamaʼn qa ateʼtoq xjal te Éfeso toj qlolj tuʼnju e yaẍin?

⁵ E ten toj qlolj tuʼnju e yaẍin. In che yaẍintoq xjal te Éfeso ex mintiʼ tzaj kychʼixwi tiʼjju bʼant kyuʼn. Oʼkxtoq in che ximen tiʼj yaẍbʼil toj tkyaqilju bʼant kyuʼn, axpe ikx tej kykʼulin kywitz kydios (Efes. 5:3). Ex mintiʼ el «kynikʼ tiʼj alkyeju bʼaʼn ex alkyeju mya bʼaʼn» ex ok kyanmi te kyuw (Efes. 4:​17-19). Toj juntl yol, mintiʼ kubʼ kynaʼn nya bʼaʼn tej tbʼant jlu kyuʼn ex mintiʼ e ximen tiʼjju kubʼ tnaʼn Jehová tuʼn kybʼinchbʼen. Tuʼnju mintiʼ el kynikʼ tiʼjju bʼaʼn ex aju nya bʼaʼn, tqʼama Pablo qa «tuj qlolj taʼ kynabʼl, ex kypaʼn kyibʼ tiʼj ju chwinqlal in tqʼoʼn Dios».

6. ¿Tiquʼn xi tqʼamaʼn Pablo kye xjal te Éfeso «atzun jaʼlo ateʼye tuj spikʼun»?

⁶ Ateʼ junjun xjal te Éfeso otoq che etz toj qlolj, tuʼntzunju tqʼama Pablo jlu kye: «Atzun jaʼlo ateʼye tuj spikʼun tuʼnju okslal qeye tiʼj Qajaw» (Efes. 5:8). Otoq txi tzyet tuʼn kyanqʼin ik tzeʼn tzaj tqʼamaʼn Tyol Jehová ex ok ik tzeʼn jun spikʼun xi tyekʼin kybʼe (Sal. 119:105). Ya mintiʼ xi kybʼinchaʼn qe tiʼchaq bʼant kyuʼn okslabʼil nya ax tok ex ya mintiʼ e yaẍin. Sino el kykanoʼn tiʼj Dios ex ok tilil kyuʼn tuʼn kykʼulin te ex tuʼn ttzalaj kyuʼn (Efes. 5:1).

7. ¿Tiquʼn in xi qqʼamaʼn qa chʼixmi axju in bʼaj qiʼj ik tzeʼn kye okslal te Éfeso?

⁷ Chʼixme ax jlu in bʼaj qiʼj, tej naʼmxtoq tok qojtzqiʼn axix tok, o ten toj qlolj tuʼn tpaj okslabʼil nya ax tok ex tuʼn yaẍbʼil. Ateʼ junjun qe kubʼ qikʼsaʼn qe fiesta at toklen tukʼil okslabʼil nya ax tok ex junjuntl e yaẍin. Pero tej tok qojtzqiʼn Jehová, xi qbʼiʼn qe tkawbʼil tiʼj bʼaʼn ex tiʼj nya bʼaʼn. Tej tbʼant jlu quʼn, nim onin qiʼj  (Is. 48:17). Maske ikju, at maj kwest tuʼn miʼn qten toj qlolj ex tuʼn kukx qbʼet «tuj spikʼun». Qo xnaqʼtzan tiʼj tiʼ jaku tzʼonin qiʼj tuʼn kukx tbʼant jlu quʼn.

MIʼN QO TEN TOJ QLOLJ

8. Ik tzeʼn in tzaj tqʼamaʼn Efesios 5:3 a 5, ¿alkyeqe tiʼchaq mintiʼtoq tuʼn tbʼant kyuʼn okslal te Éfeso?

⁸ (Kjawil uʼjit Efesios 5:​3-5). ¿Tiʼ iltoq tiʼj tuʼn tbʼant kyuʼn okslal te Éfeso tuʼn ya miʼn kyten toj qlolj? Iltoq tiʼj tuʼn kukx tel kyikʼun qe tiʼchaq nya bʼaʼn in nela toj twitz Jehová. Nya oʼkx at toklen jlu tukʼil yaẍbʼil, sino ax ikx tuʼn miʼn kyyolin tiʼj yol tzʼil. Xi tnaʼn Pablo kye tuʼn tel kyikʼun qe tiʼchaq lu qa kyaj tuʼn kyten toj «tkawbʼil Crist, aju ax tkawbʼil Dios».

9. ¿Tiquʼn il tiʼj tuʼn tel qikʼun qe tiʼchaq at toklen tukʼil yaẍbʼil?

⁹ Ax ikx qe bʼaʼn tuʼn tok qxqʼuqin qibʼ ex tuʼn t-xi qbʼiʼn nabʼil lu: «Miʼn tzʼok kyqʼon kyibʼe tiʼj ju in bʼinchanjtz tuj qlolj mintiʼ jun bʼaʼn in tqʼoʼn» (Efes. 5:11). Qa kukx in nok tqʼoʼn jun xjal twitz tiʼj yaẍbʼil, in nok tbʼiʼn ex in yolin tiʼj, jakulo kubʼ tbʼinchaʼn jun il (Gén. 3:6; Sant. 1:​14, 15). Jun techel, toj jun tnam nim ermano ex ermana kubʼ kybʼinchaʼn jun grupo toj jun red social tuʼn t-xi kysamaʼn mensaje. Tnejel, oʼkx e yolin kyiʼj tiʼchaq at toklen tukʼil kyajbʼebʼil te Jehová, pero chebʼe chebʼe e yolin tiʼj juntl tiʼ. Yajxitl, chʼixme tkyaqil maj oʼkx e yolin tiʼjju tuʼn tkubʼ ten jun xjal tukʼil juntl. Tej tikʼ ambʼil, nim kye tzaj kyqʼamaʼn qa tuʼnju e yolin tiʼj jlu, e kubʼ tzʼaq toj yaẍbʼil.

10. ¿Tiʼ taj Satanás tuʼn tkubʼ qximen? (Efesios 5:6).

¹⁰ In sbʼun Satanás kyiʼj xjal tuʼn miʼn tel kynikʼ tiʼj alkye bʼaʼn ex alkye nya bʼaʼn (Is. 5:20; 2 Cor. 4:4). Tuʼntzunju, mintiʼ in qo jaw labʼin tiʼj aj tok tilil kyuʼn xjal tuʼn tkubʼ qximen qa bʼaʼn qe tiʼchaq tzʼil toj twitz Jehová ex aju yaẍbʼil (2 Ped. 2:19). Kukx in netz yekʼin kyximbʼetz xjal mintiʼ in nok kyqʼoʼn toklen tkawbʼil Jehová kyoj película, kyoj programa te televisión ex kyoj sitio te internet. Nya oʼkx taj Satanás tuʼn tkubʼ qximen qa bʼaʼn kybʼinchbʼen xjal ex aju alkye tten in che anqʼin toj ambʼil jaʼlo. Sino ax ikx taj tuʼn tkubʼ qximen qa jaku qo tzalaj tuʼn ex qa mlay tzaj tiʼn nya bʼaʼn qiʼj (kjawil uʼjit Efesios 5:6).

11. Ik tzeʼn bʼaj tiʼj Angela, ¿tiquʼn nim toklen tuʼn t-xi qbʼiʼn nabʼil tkuʼx toj Efesios 5:7? (Ax ikx qʼonka twitza kyiʼj foto).

¹¹ Taj Satanás tuʼn tok qmojbʼan qibʼ kyukʼil xjal mintiʼ in che onin qiʼj tuʼn t-xi qbʼiʼn qe tkawbʼil Jehová. Tuʼntzunju, xi tqʼamaʼn Pablo kye okslal te Éfeso tuʼn miʼn kyten kyukʼil xjal in kubʼ kybʼinchaʼn nya bʼaʼn. Tqʼama kye: «Miʼn tzʼok kymojbʼan kyibʼe kyukʼil» (Efes. 5:7). Ax ikx qe nim toklen tuʼn tok qxqʼuqin qibʼ ik tzeʼn kye okslal te Éfeso. ¿Tiquʼn? Tuʼnju nya oʼkx jaku tzʼok qchmon qibʼ kyukʼil xjal toj ambʼil jaʼlo, sino ax ikx jaku qo yolin kyukʼil kyoj redes sociales. Tzaj tqʼamaʼn jun ermana te Asia, aju Angela tbʼi tzeʼn el tnikʼ tiʼj qa jaku tzaj nya bʼaʼn qiʼj kyuʼn redes sociales. a Tqʼama jlu: «Chebʼe chebʼe jaku chʼexpaj qximbʼetz. Atzun jlu bʼaj wiʼje. Ya mintiʼ kubʼ nnaʼne nya bʼaʼn tej kyten wamiwe mintiʼ ok kyqʼoʼn kyoklen kawbʼil tkuʼx toj Tyol Dios. Tej tikʼ ambʼil, kubʼ nximane qa jaku txi nbʼinchaʼne junjun tiʼchaq in nel tikʼun Jehová». ¡Tbʼanel  tuʼnju e onin ansyan tukʼil kʼujlabʼil tiʼj Angela tuʼn kybʼant chʼixpubʼil tuʼn! Tqʼamatl jlu: «Atzun jaʼlo, in chin ximane kyiʼj tiʼchaq at toklen tukʼil wajbʼebʼile te Jehová ex nya kyiʼj tiʼchaq ateʼ kyoj redes sociales».

12. ¿Tiʼ il tiʼj tuʼn tbʼant quʼn qa qaj tuʼn t-xi qnimen qe tkawbʼil Jehová?

¹² Maske in tzaj kyqʼamaʼn xjal qa bʼaʼn aj kyyaẍin, miʼn kubʼ qsbʼun qibʼ. Ojtzqiʼn quʼn qa nya ax tok (Efes. 4:​19, 20). Xjelinkuya jlu: «¿In nokpe tilil wuʼne tuʼn miʼn tten wamiwbʼile kyukʼil wukʼile toj escuela, toj aqʼuntl moqa kyukʼil qeju mintiʼ in nok kyqʼoʼn kyoklen tkawbʼil Jehová? ¿In ten wipumale ex in chin koline kyiʼj nabʼil ateʼ toj Tyol Dios maske in tzaj kyqʼamaʼn xjal qa mintiʼ nnabʼile?». Ex ik tzeʼn in tzaj tqʼamaʼn 2 Timoteo 2:20 a 22, nim toklen tuʼn tok qxqʼuqin qibʼ aj tjaw qjyoʼn qe qamiw toj congregación. Bʼaʼn tuʼn ttzaj qnaʼn qa ateʼ junjun erman mlay che onin qiʼj tuʼn qten tzʼaqli twitz Jehová.

KUKX QO TEN «TUJ SPIKʼUN»

13. ¿Tiʼ t-xilen tuʼn kukx qten toj spikʼun? (Efesios 5:​7-9).

¹³ Tej otoq txi tqʼoʼn Pablo consej kye Éfeso tuʼn miʼn kyten toj qlolj, tqʼama jlu kye: «Che anqʼintzune tuj spikʼun porke te spikʼun qeye» (kjawil uʼjit Efesios 5:​7-9). ¿Tiʼ t-xilen jlu? Atz in yolin tiʼj qa il tiʼj tuʼn tkubʼ qyekʼin qa axix tok okslal qoʼ toj tkyaqil ambʼil. Tuʼn tbʼant jlu quʼn, il tiʼj tuʼn t-xi qbʼinchaʼn nim tiʼchaq ik tzeʼn tuʼn quʼjin ex tuʼn qxnaqʼtzan tiʼj Tyol Dios ex qe uʼj in che etz tuʼn ttnam Jehová. Aj tbʼant jlu quʼn, bʼaʼn tuʼn tok qqʼoʼn qwiʼ kyiʼj techel ex xnaqʼtzbʼil kyaj tyekʼin Jesús, aju ok ik tzeʼn «spikʼun kye xjal» (Juan 8:12; Prov. 6:23).

14. ¿Tzeʼn jaku tzʼonin xewbʼaj xjan qiʼj?

¹⁴ Tuʼn kukx qten «tuj spikʼun», nim toklen tuʼn ttzaj qkʼamoʼn onbʼil in tzaj tqʼoʼn xewbʼaj xjan. ¿Tiquʼn? Tuʼnju kwest tuʼn qten saq toj ambʼil jaʼlo tuʼn nim nya bʼaʼn at twitz Txʼotxʼ (1 Tes. 4:​3-5, 7, 8). Ax ikx, jaku tzʼonin xewbʼaj  xjan qiʼj tuʼn miʼn tok qqʼoʼn qwiʼ tiʼj kyximbʼetz xjal, aʼyeju mintiʼ kyoklen tukʼil tajbʼil Jehová. Ex jaku tzʼonin «tuʼn qbʼinchante bʼaʼn, ex tuʼn qbʼet tuj tumelxix, ex tuʼn qyolin axix tok» (Efes. 5:9).

15. ¿Tiʼ jaku bʼant quʼn tuʼn ttzaj qkʼamoʼn xewbʼaj xjan? (Efesios 5:​19, 20).

¹⁵ Tqʼama Jesús qa ktzajel «tqʼoʼn [Jehová] aju Xewbʼaj Xjan kye qeju in che qanin te» (Luc. 11:13). Jaku tzaj qkʼamoʼn xewbʼaj xjan qa ma t-xi qqanin te Jehová toj naʼj Dios. Ax ikx, jaku tzaj qkʼamoʼn aj tjaw qnimsaʼn kyoj chmabʼil junx kyukʼil erman (kjawil uʼjit Efesios 5:​19, 20). Tuʼn tonbʼil xewbʼaj xjan, jaku qo anqʼin ik tzeʼn taj Jehová.

16. ¿Tiʼ jaku tzʼonin qiʼj tuʼn tjaw qjyoʼn aju mas tbʼanel? (Efesios 5:​10, 17).

¹⁶ Aj tkubʼ qximen tuʼn tbʼant jun tiʼ quʼn, bʼaʼn tuʼn qjyon tqanil «tiʼj alkyeju tajbʼil» Jehová ex tuʼn t-xi qbʼinchaʼn (kjawil uʼjit Efesios 5:​10, 17). Qa ma qo jyon kyiʼj nabʼil toj Tyol Dios tiʼjju in bʼaj qiʼj, in kubʼ qyekʼin qa in nok tilil quʼn tuʼn tel qnikʼ tiʼj alkye t-ximbʼetz Jehová. Ex qa ma che kubʼ qqʼoʼn toj xnaqʼtzbʼil, jaku jaw qjyoʼn aju mas tbʼanel.

17. ¿Tzeʼn jaku tzʼajbʼen ambʼil quʼn toj tumel? (Efesios 5:​15, 16; ax ikx qʼonka twitza tiʼj dibujo).

¹⁷ Ax ikx xi tqʼamaʼn Pablo kye okslal te Éfeso tuʼn tajbʼen ambʼil kyuʼn toj tumel (kjawil uʼjit Efesios 5:​15, 16). Taj «tajaw il» moqa Satanás tuʼn tok qqʼoʼn qwiʼ kyiʼj junjuntl tiʼchaq tuʼntzun miʼn tel qpaʼn ambʼil tuʼn qajbʼen te Jehová (1 Juan 5:19). Mas fácil tuʼn tok qqʼoʼn qwiʼ tiʼj pwaq, tiʼj xnaqʼtzbʼil ex tiʼj aqʼuntl twitzju tuʼn t-xi qjyoʼn junjuntl tumel tzeʼn tuʼn qajbʼen te Jehová. Qa ma bʼaj jlu qiʼj, jun yekʼbʼil tiʼj qa in qo ok lepeʼ tiʼj kyximbʼetz xjal. Ax tok, nya jun il tuʼn kybʼant qe tiʼchaq lu quʼn, pero  mintiʼ tuʼn tkubʼ qqʼoʼn tnejel toj qanqʼibʼil. Tuʼn kukx qten toj spikʼun, «il tiʼj tuʼn tajbʼen ambʼil quʼn toj tumel» moqa tuʼn tok qqʼoʼn qwiʼ kyiʼj tiʼchaq mas nim kyoklen.

18. ¿Tiʼ bʼant tuʼn Donald tuʼn tajbʼen ambʼil toj tumel tuʼn?

¹⁸ Bʼaʼn tuʼn t-xi qjyoʼn tumel tzeʼn tuʼn qajbʼen mas te Jehová. Atzun jlu bʼant tuʼn Donald, jun erman in nanqʼin atz Sudáfrica. Tqʼama jlu: «In ximane tiʼj wanqʼibʼile ex xi nqanine te Jehová tuʼn ttzaj tonin qine tuʼn wajbʼene mas te. Xi nqanine te tuʼn tkanet jun waqʼune jaku tzaj tqʼoʼn ambʼil wiʼje tuʼn npakbʼane mas. Ex tuʼn tonbʼil, kanet jun waqʼune. Iktzun tten, junx tukʼil nxuʼjile xi ttzyet tuʼn qajbʼene toj tkyaqil ambʼil».

19. ¿Tiʼ il tiʼj tuʼn tbʼant quʼn tuʼn kukx qten toj spikʼun?

¹⁹ Onin carta xi ttzʼibʼin Pablo kye okslal te Éfeso tuʼn kukx kyten tzʼaqli twitz Jehová ex jaku tzʼonin qiʼj jaʼlo. Ik tzeʼn ma tzʼel qnikʼ tiʼj, jaku tzʼonin qiʼj tuʼn qjaw qjyoʼn qe saqchbʼil toj tumel ex qe qamiw. Ax ikx, in nonin qiʼj tuʼn qok te jun tbʼanel xnaqʼtzal tiʼj Tyol Dios tuʼntzun ttzaj yekʼin qbʼe tuʼn axix tok. Nya oʼkxju, ax ikx ma tzaj tnaʼn qe qa nim toklen tuʼn tonin xewbʼaj xjan qiʼj tuʼn kyten tbʼanel qmod. Qa ma txi qbʼiʼn qe consej tqʼama Pablo, jaku jaw qjyoʼn aju mas tbʼanel ex jaku tzalaj Jehová quʼn. Iktzun tten, kukx qo ktel toj spikʼun ex nya toj qlolj.