1. ¿Tzeʼn in che onin profecía tkuʼx toj Tyol Dios qiʼj?

¿TIʼTZUN kbʼajel kyiʼj tmajen Jehová toj ambʼil tzul? In che onin profecía ateʼ toj Tyol Dios qiʼj tuʼn tel qnikʼ kyiʼj tiʼchaq ya chʼix kybʼaj. At jun profecía in tzaj tyekʼin qe aju kbʼantel kyuʼn junjun aj kawil mas nim kyipumal twitz tkyaqil Txʼotxʼ. Atz in kanet profecía lu quʼn toj capítulo 11 toj uʼj te Daniel, ex in tzaj tchikʼbʼaʼn jun qʼoj in nok kyxol kabʼe aj kawil, aju aj kawil te jawni ex aju aj kawil te kubʼni. * Ya o japun nim tiʼchaq tiʼj profecía lu, tuʼntzunju jaku tzʼok qeʼ qkʼuʼj tiʼj qa kjapunel twiʼ tkyaqil profecía.

2. Ik tzeʼn in tzaj tqʼamaʼn Génesis 3:15 ex Apocalipsis 11:7 ex 12:17, ¿tiʼ tzul qnaʼn aj qxnaqʼtzan tiʼj profecía kyaj tqʼamaʼn Daniel?

² Tuʼn tel qnikʼ tiʼj profecía tkuʼx toj uʼj te Daniel capítulo 11, bʼaʼn tuʼn ttzaj qnaʼn qa oʼkx in yolin kyiʼj aj kawil moqa kawbʼil o tzʼok kybʼinchaʼn nya bʼaʼn kyiʼj tmajen Jehová. Nya nim kybʼet tmajen Jehová at twitz tkyaqil Txʼotxʼ, pero mas in nok bʼinchaʼn nya bʼaʼn kyiʼj. ¿Tiquʼn? Tuʼnju taj Satanás ex qeju xjal in che onin tiʼj tuʼn tkubʼ kynajsaʼn qeju in che ajbʼen te Jehová ex te Jesús (kjawil uʼjit Génesis 3:15; Apocalipsis 11:7; 12:17). Ax ikx, kʼokel qmojbʼaʼn profecía tkuʼx toj uʼj te Daniel  kyukʼil junjuntl profecía tkuʼx toj Tyol Dios. Nim toklen tuʼn qxnaqʼtzan kyiʼj junjuntl taqikʼ Tyol Dios tuʼntzun telxix qnikʼ tiʼj profecía kyaj tqʼamaʼn Daniel.

3. ¿Tiʼ kbʼel qxnaqʼtzaʼn toj xnaqʼtzbʼil lu ex toj juntl xnaqʼtzbʼil?

³ Toj xnaqʼtzbʼil lu qo xnaqʼtzal tiʼjju in tzaj tqʼamaʼn Daniel 11:25 a 39. Ktzajel qnaʼn alkyeqe e ok te aj kawil te jawni ex te aj kawil te kubʼni kyoj abʼqʼi 1870 a 1991, ex kʼelel qnikʼ tiʼj tiquʼn toj tumel tuʼn tkubʼ qchʼexpuʼn jun xnaqʼtzbʼil tiʼj profecía lu. Atzun toj juntl xnaqʼtzbʼil, qo xnaqʼtzal tiʼj Daniel 11:40 a 12:1, ex kxel qchikʼbʼaʼn aju in tzaj tqʼamaʼn profecía lu tiʼj ambʼil tej ttzaj tzyet abʼqʼi 1991 ex kpol bʼaj toj qʼoj Armagedón. Aj qxnaqʼtzan kyiʼj kabʼe xnaqʼtzbʼil lu, bʼaʼn tuʼn tok qqʼoʼn qwiʼ tiʼj esquema tok tbʼi: «Kabʼe aj kawil kyajqʼoj kyibʼ toj bʼajsbʼil tqʼijlalil». Noqtzun tuʼnj, tnejel qo xnaqʼtzal tiʼj alkyeqe kabʼe aj kawil in yolin profecía lu tiʼj.

4. ¿Tiʼ oxe tiʼ in nonin qiʼj tuʼn tel qnikʼ tiʼj alkye aj kawil te jawni ex te kubʼni?

⁴ Xi qʼamaʼn «aj kawil te jawni» ex «aj kawil te kubʼni» kyiʼj aj kawil e kawin toj tembʼil te jawni ex te kubʼni toj ojtxe tnam Israel. ¿Tiquʼn in xi qqʼamaʼn jlu? Tuʼnju xi tqʼamaʼn anjel jlu te Daniel: «Ma chin tzaje tukʼila tuʼn t-xi nmaʼne teya aju kbʼajel kyiʼj t-xjalila te tibʼajxi» (Dan. 10:14). Kukx e ok aj Israel te tmajen Jehová tzmaxi tej tjapun bʼaj abʼqʼi 33 te Pentecostés. Ex tojx abʼqʼi aju, tzaj tchikʼbʼaʼn Jehová qa che okel tqʼoʼn qe xjal in che ok lepeʼ tiʼj Jesús te tmajen. Tuʼntzunju, chʼixme tkyaqilju in tzaj qʼamaʼn toj profecía te Daniel capítulo 11, ya mintiʼ in yolin tiʼj ojtxe tnam Israel, sino atz in yolin kyiʼj xjal in che ok lepeʼ tiʼj Jesús (Hech. 2:1-4; Rom. 9:6-8; Gál. 6:15, 16). Ax ikx, o che ok junxichaq kawbʼil te aj kawil te jawni ex te kubʼni. Pero at oxe tiʼ in bʼant kyuʼn aj kawil lu. Tnejel, in nok kybʼinchaʼn nya bʼaʼn kyiʼj tmajen Jehová. Tkabʼ, in kubʼ kyyekʼin tukʼil kybʼinchbʼen qa in che ok te aj qʼoj tiʼj Jehová ex kyiʼj tmajen. Ex toxin, in che qʼojin kyxolx.

5. ¿Atpe jun ok te aj kawil te jawni ex te kubʼni kyoj abʼqʼi 100 a 1870? Chikʼbʼantza.

⁵ Tej tikʼ chʼin ambʼil tibʼajxi tnejel syent abʼqʼi, chmet kybʼaj xjal e ok lepeʼ kyiʼj xnaqʼtzbʼil nya ax tok ex e oktz toj ttnam Jehová, ex ya mintiʼ xi kyxnaqʼtzaʼn axix tok tiʼj Xjan Uʼj. Atxix toj ambʼil aju ex tej chʼixtoq tkubʼaj siglo 19, mintiʼ ten jun kʼloj tmajen Dios tzalu twitz Txʼotxʼ. Chʼiy kybʼet nya ax tok okslal ik tzeʼn nya bʼaʼn kʼul ex tuʼn jlu ya mintiʼ el nikʼbʼaj kyiʼj axix tok okslal (Mat. 13:36-43). ¿Tiquʼn nim toklen tuʼn ttzaj qnaʼn jlu? Tuʼnju in nonin qiʼj tuʼn tel qnikʼ tiʼj qa aj tyolin uʼj te Daniel tiʼj aj kawil te jawni ex tiʼj aj kawil te kubʼni, mlay txi qʼamet qa atz in yolin jlu kyiʼj aj kawil e ten kyoj abʼqʼi 100 a 1870. Toj tkyaqil ambʼil aju mintiʼ ten jun kʼloj tmajen Dios tuʼn kyok tzoqpaj aj kawil kyiʼj. * Noqtzun tuʼnj, el toj qʼanchaʼl juntl maj alkye ok te aj kawil te jawni ex te kubʼni tej chʼixtoq tkubʼaj siglo 19. ¿Tiquʼn?

6. ¿Alkye abʼqʼi tzaj tzyet tuʼn tten ttnam Dios juntl maj ex tzeʼn el qnikʼ tiʼj?

 ⁶ Atxix toj abʼqʼi 1870 tzaj tzyet tuʼn tten juntl maj ttnam Dios. Toj abʼqʼi aju, ok tchmon tibʼ Charles Russell ex qe tukʼil tuʼn kyxnaqʼtzan tiʼj Tyol Dios. Ik tzeʼn otoq kyaj qʼamaʼn toj Xjan Uʼj, bʼaj tbʼinchaʼn tal kʼloj xjal lu bʼe tej naʼmxtoq txi tzyet tuʼn Tkawin Mesías (Mal. 3:1). Iktzun tten el nikʼbʼaj tiʼj alkye ttnam Jehová. Toj ambʼil aju, ¿atpe jun aj kawil nim toklen twitz tkyaqil Txʼotxʼ jakutoq tzʼok tbʼinchaʼn nya bʼaʼn kyiʼj tmajen Jehová? Qo xnaqʼtzan tiʼj.

7. ¿Alkye ok te aj kawil te kubʼni tej otoqxi txi tzyet Tnejel Nimaq Qʼoj twitz Tkyaqil Txʼotxʼ?

⁷ Otoq chmet nimxix tsoldad Gran Bretaña toj abʼqʼi 1870 ex otoq tzʼok tipumal tkawbʼil twitz tkyaqil Txʼotxʼ. Tqʼama Daniel qa iktoq tten kawbʼil lu ik tzeʼn jun tal kach ex kubʼ kyiʼj juntl oxe tuʼn. Ojtzqiʼn quʼn qa kubʼ tiʼj tnam Francia, España ex qe Países Bajos tuʼn (Dan. 7:7, 8). Ok Gran Bretaña te aj kawil te kubʼni tej otoqxi tzaj tzyet Tnejel Nimaq Qʼoj twitz Tkyaqil Txʼotxʼ. Toj ambʼil aju, mas nimtoq tpwaq Estados Unidos de América at twitz alkyexku juntl tnam ex otoq txi tzyet tuʼn tok tmojbʼan tibʼ tukʼil Gran Bretaña.

8. ¿Alkye o tzʼok te aj kawil te kubʼni toj ambʼil jaʼlo?

⁸ Tej tok Tnejel Nimaq Qʼoj twitz Tkyaqil Txʼotxʼ, chmet nim tsoldad Estados Unidos ex Gran Bretaña. Iktzun tten tzaj tzyet tuʼn tten jun kawbʼil nim toklen twitz tkyaqil Txʼotxʼ ex bʼant jlu tuʼn Gran Bretaña ex Estados Unidos. Ik tzeʼn kyaj tqʼamaʼn Daniel, ok tchmoʼn kawbʼil lu «nimku t-soldad nimxix kyipun» (Dan.  11:25). Ex kyoj bʼajsbʼil tqʼijlalil jaʼlo, ax Gran Bretaña ex Estados Unidos in nok te aj kawil te kubʼni. * Pero, ¿alkyetzun in nok te aj kawil te jawni?

9. a) ¿Jtoje tzaj tzyet tuʼn tten juntl maj aj kawil te jawni? b) ¿Tzeʼn japun twi yol tkuʼx toj Daniel 11:25?

⁹ Tzaj tzyet tuʼn tten juntl maj aj kawil te jawni toj abʼqʼi 1871, ex bʼaj jlu tej otoq tzikʼ jun abʼqʼi ttzajlen tzyet tuʼn t-xnaqʼtzan ermano Russell tiʼj Tyol Dios ex junjuntl tukʼil. ¿Alkye ok te aj kawil te jawni? A Alemania. Toj abʼqʼi aju ok tilil tuʼn Otto von Bismarck tuʼn tten tipumal Tkawbʼil Alemania. Ok qʼoʼn rey Guillermo I te Prusia te aj kawil toj tnam ex ok tqʼoʼn toklen Bismarck te nejenel toj tkawbʼil. * Oʼkx tej tikʼ junjun abʼqʼi, ya otoq ten tipumal Tkawbʼil Alemania tibʼaj África ex Pacífico. Nya oʼkxju, ax ikx ok ten qʼojel tiʼj tkawbʼil Gran Bretaña (kjawil uʼjit Daniel 11:25). Tuʼnj jlu chmet nimxix tajlal tsoldad tnam Alemania ex bʼaj tbʼinchaʼn tkabʼ bark mas matij te qʼojbʼil. Ajbʼen tkyaqil jlu tuʼn Alemania tuʼntzun tok tzoqpaj kyiʼj aj qʼoj tiʼj toj Tnejel Nimaq Qʼoj twitz Tkyaqil Txʼotxʼ.

10. ¿Tzeʼn japun twi Daniel 11:25b ex 26?

¹⁰ Yajxitl, tqʼama Daniel tiʼ tuʼn tbʼaj tiʼj Tkawbʼil Alemania ex kyiʼj tsoldad. Tqʼama qa mlaytoq ten tipumal aj kawil te jawni te jumajx. ¿Tiquʼn? In tzaj tqʼamaʼn profecía jlu: «Noq minabʼen kbʼel tiʼj tuʼn sbʼubʼl ex mlay xkyeʼ kyiʼj aj qʼoj. Ax qeju otoq che tzaj ttxkoʼn tuʼn kywaʼn tukʼil, kbʼantel tiʼj kyuʼn tuʼn tnaj tkawbʼil» (Dan. 11:25b, 26a). Toj tqʼijlalil Daniel, oʼkx qeju at kyoklen toj tkawbʼil rey xi qʼoʼn kywa «ik tzaʼnx te rey twa» (Dan. 1:5). ¿Alqiʼj yolin profecía lu? Atz yolin kyiʼj xjal nim kyoklen toj Tkawbʼil Alemania ik tzeʼn qe general ex qeju xi qʼoʼn kyoklen kyxol soldad, ex tej tikʼ ambʼil, aʼyex xjal lu e onin tuʼn tkubʼ tiʼj tnam Alemania. * Nya oʼkx tqʼama profecía qa tuʼn tkubʼ tiʼj kawbʼil lu, sino ax ikx tqʼama tiʼtoq tuʼn tbʼaj tiʼj aj tqʼojin tukʼil aj kawil te kubʼni. Tej tyolin Daniel tiʼj aj kawil te jawni tqʼama jlu: «Qe t-soldad kbʼel kyiʼj ex nimku che najel» (Dan. 11:26b). Ik tzeʼn kyaj qʼamaʼn toj Tyol Dios, kubʼ kyiʼj tsoldad Alemania toj Tnejel Nimaq Qʼoj twitz Tkyaqil Txʼotxʼ ex nim kybʼet e kyim. Nimxix kyajlal xjal kyim toj qʼoj aju ex bʼajxtoq bʼaj jlu jun maj.

11. Ik tzeʼn kyaj qʼamaʼn toj Daniel 11:27 a 30, ¿tiʼ bʼant tuʼn aj kawil te jawni ex tuʼn aj kawil te kubʼni?

¹¹ Tuʼn tel qnikʼ tiʼj tiʼ bʼant tuʼn aj kawil te jawni ex te kubʼni tej naʼmxtoq t-xi tzyet Tnejel Nimaq Qʼoj twitz Tkyaqil Txʼotxʼ, in tzaj tqʼamaʼn Daniel 11:27 ex 28 jlu: «Che bʼel qeʼ tiʼj jun mes tuʼn kyyolin ex kykabʼil che nikʼal yol». Ax ikx kyaj qʼamaʼn qa kteltoq nim tqʼinumabʼil ex atzun jlu bʼaj. Ok tchmon tibʼ Alemania tukʼil Gran Bretaña tuʼntzun kyyolin tiʼj tuʼn tten mujbʼabʼil kyuʼn, pero nya ax tok jlu tuʼnju xi tzyet nimaq qʼoj toj 1914. Tjaqʼxi ambʼil aju, ok tilil tuʼn Alemania tuʼn tchmet nim tqʼinumabʼil ex tuʼn jlu ok te tkabʼin tnam mas qʼinun twitz tkyaqil Txʼotxʼ. Ex ik tzeʼn kyaj qʼamaʼn toj Daniel 11:29 ex kyoj tnejel yol toj versículo 30,  kubʼ t-ximen Alemania tuʼn tqʼojin tiʼj aj kawil te kubʼni, pero mintiʼ kambʼan.

12. ¿Tiʼ bʼant tuʼn aj kawil te jawni ex te kubʼni toj Tnejel Nimaq Qʼoj twitz Tkyaqil Txʼotxʼ?

¹² Atxix toj 1914, mas tzaj qʼoj kyxol kabʼe kawbʼil lu ex mas o che qʼojin kyiʼj tmajen Jehová. Jun techel, toj Tnejel Nimaq Qʼoj twitz Tkyaqil Txʼotxʼ ok tbʼinchaʼn aj kawil te Alemania ex Gran Bretaña nya bʼaʼn kyiʼj erman mintiʼ okx kyqʼon kyibʼ toj qʼoj. Ex tuʼn tjapun twi profecía tkuʼx toj Apocalipsis 11:7 a 10, e okx qʼoʼn qe erman e kubʼ nej twitz pakbʼabʼil toj cárcel tuʼn aj kawil te Estados Unidos.

13. ¿Tiʼ bʼant tuʼn aj kawil te jawni kyoj abʼqʼi 1930 ex tej tok Tkabʼ Nimaq Qʼoj twitz Tkyaqil Txʼotxʼ?

¹³ Tej tbʼet ambʼil, kyoj abʼqʼi 1930 ex mas tej tok Tkabʼ Nimaq Qʼoj twitz Tkyaqil Txʼotxʼ, mintiʼ tzaj qʼaqʼin tkʼuʼj aj kawil te jawni kyiʼj tmajen Jehová tuʼnju ok tbʼinchaʼn nimxix nya bʼaʼn kyiʼj. Tej tjapun partido nazi toj kawbʼil, ya mintiʼ xi tqʼoʼn Hitler ex qeju e onin tiʼj ambʼil kye erman tuʼn kyajbʼen te Jehová. Kubʼ kybʼyoʼn xjal lu nim syent erman ex xi kysamaʼn nim mil kyoj kojbʼil tuʼn kyaqʼunan. Otoqxi yolin Daniel tiʼj jlu. Tqʼama qa kbʼajeltoq «kytzʼilsaʼn tuj tja Dios tuʼn mya bʼaʼn» «ex kmayetel kyuʼn tuʼn miʼn» t-xi kyqʼoʼn oyaj in xi kyqʼoʼn tkyaqil qʼij te Dios, toj juntl yol, el qʼiʼn ambʼil kye tuʼn kypakbʼan (Dan. 11:30b, 31a). Axpe ikx, tqʼama Hitler qa kbʼeltoq tnajsaʼn kykyaqil tmajen Jehová toj ttnam Alemania.

14. Tej tbʼaj Tkabʼ Nimaq Qʼoj twitz Tkyaqil Txʼotxʼ, ¿alkye ok te aj kawil te jawni ex tzeʼn ojtzqiʼn quʼn?

¹⁴ Tej otoqxi bʼaj Tkabʼ Nimaq Qʼoj twitz Tkyaqil Txʼotxʼ, xi tzyet tuʼn tten toklen Unión Soviética tibʼaj tkyaqil tnam otoq tzʼel tiʼn te Alemania. Axju bʼant tuʼn Unión Soviética ex qe tukʼil ik tzeʼn te Hitler, el tikʼun alkyexku xjal jyon tumel tuʼn tkʼulin te Dios twitzju tuʼn tnimen te ttnam. Iktzun tten e ok te aj kawil te jawni.

15. ¿Tiʼ bʼant tuʼn aj kawil te jawni tej tkubʼaj Tkabʼ Nimaq Qʼoj twitz Tkyaqil Txʼotxʼ?

¹⁵ Tej otoq tzikʼ chʼin ambʼil tej tkubʼaj Tkabʼ Nimaq Qʼoj twitz Tkyaqil Txʼotxʼ, i el ikʼun tmajen Jehová tuʼn akʼaj aj kawil te jawni, aju Unión Soviética ex qe tukʼil. In nok tmojbʼaʼn Apocalipsis 12:15 a 17 ikʼbʼil lu ik tzeʼn jun nim aʼ. Ik tzeʼn in tzaj tqʼamaʼn profecía lu, ya mintiʼ xi tqʼoʼn aj kawil te jawni ambʼil kye tmajen Dios tuʼn kypakbʼan ex i ex tsamaʼn nim mil atz Siberia. Ex kyoj qeju bʼajsbʼil tqʼijlalil, mas o tzʼok lipen aj kawil te jawni kyiʼj tmajen Dios, noqtzun tuʼnj, kukx in che pakbʼan. *

16. ¿Alkye tten e japun kywi yol tkuʼx toj Daniel 11:37 a 39 tiʼj Unión Soviética?

¹⁶ (Kjawil uʼjit Daniel 11:37-39). Ik tzeʼn in tzaj tqʼamaʼn profecía lu, mintiʼ ok tqʼoʼn aj kawil te jawni toklen «kydios qe t-xeʼchel». ¿Toj alkye tten? Ok tilil tuʼn Unión Soviética tuʼn miʼn kyten okslabʼil tuʼntzun ya miʼn tten kyipumal kyibʼaj xjal. Tuʼntzunju, toj 1918 tqʼama aj kawil te Unión Soviética tuʼn t-xi xnaqʼtzaʼn kye kʼwal toj tja xnaqʼtzbʼil tuʼn miʼn tok qeʼ kykʼuʼj tiʼj qa at jun Dios. Ex ¿alkye tten ok «ten kʼulul twitz jun dios» aju kubʼ t-ximen qa tuʼntoq tklet tuʼn? Bʼaj tnajsaʼn nim pwaq tuʼntzun kyten nim  tsoldad ex bʼant nim arma tuʼn tuʼntzun tten tipumal. Tej tbʼet ambʼil, bʼaj tchmoʼn aj kawil te jawni ex te kubʼni nim tiʼchaq tuʼn tajbʼen kyuʼn toj qʼoj tuʼntzun kykyim nim millón xjal.

17. ¿Alkye aju «tilbʼilal ikʼbʼilxix»?

¹⁷ O tzʼok tilil tuʼn aj kawil te jawni ex te kubʼni tuʼn tbʼant jun tiʼ kyuʼn junx: tuʼn tok kyqʼoʼn toklen «tilbʼilal ikʼbʼilxix» (Dan. 11:31). Aju «tilbʼilal ikʼbʼilxix» in nok te techel Organización de las Naciones Unidas.

18. ¿Tiquʼn in xi qʼamet qa in nok Naciones Unidas te «tilbʼilal ikʼbʼilxix»?

¹⁸ In tzaj tqʼamaʼn profecía qa in nok Organización de las Naciones Unidas te «tilbʼilal ikʼbʼilxix». ¿Tiquʼn? Tuʼnju in tzaj ttziyen jun tiʼ aju oʼkx jaku bʼant tuʼn Tkawbʼil Dios: tuʼn tten mujbʼabʼil twitz tkyaqil Txʼotxʼ. Ex in nok qʼoʼn te «ikʼbʼilxix» tuʼnju kʼajbʼel tuʼn kykubʼ najset kykyaqil nya ax tok okslabʼil (qʼonka twitza tiʼj esquema «Kabʼe aj kawil kyajqʼoj kyibʼ toj bʼajsbʼil tqʼijlalil»).

19, 20. a) ¿Tiquʼn nim toklen tuʼn tok qojtzqiʼn tkyaqil tqanil lu? b) ¿Alkye xjel kxel qtzaqʼweʼn toj juntl xnaqʼtzbʼil?

¹⁹ Tbʼanel tuʼn tok qojtzqiʼn tkyaqilju o bʼaj, tuʼnju in tzaj tyekʼin qe alkye plaj tiʼj profecía tkuʼx toj uʼj te Daniel tiʼj aj kawil te jawni ex te kubʼni japun twiʼ kyoj abʼqʼi 1870 a 1991. Tuʼntzunju, jaku tzʼok qeʼ qkʼuʼj tiʼj qa kjapunel twiʼ juntl plaj yol tiʼj profecía lu.

²⁰ Kubʼ naj Unión Soviética toj 1991. Tuʼntzunju, ¿alkye aj kawil te jawni toj ambʼil jaʼlo? Toj juntl xnaqʼtzbʼil kxel qqʼoʼn tzaqʼwebʼil tiʼj xjel lu.