1, 2. ¿Tiʼ qo xnaqʼtzal tiʼj toj xnaqʼtzbʼil lu?

TOJ ambʼil jaʼlo, mas in nel nikʼbʼaj tiʼj qa in qo anqʼin toj bʼajsbʼil tqʼijlalil. Toj chʼintl ambʼil, kbʼel t-xiten Jehová ex Jesucristo kykyaqil qe aj kawil in che ok meltzʼaj tiʼj Tkawbʼil. Akux in pon ambʼil lu, kukx ktel qʼoj kyxol aj kawil te jawni tukʼil aj kawil te kubʼni ex kukx che qʼojil kyiʼj tmajen Jehová.

² Toj xnaqʼtzbʼil lu, qo xnaqʼtzal tiʼj profecía in kanet quʼn toj Daniel 11:40 a 12:1. Kʼelel qnikʼ tiʼj alkye in nok te aj kawil te jawni toj ambʼil jaʼlo ex tiquʼn mintiʼ tuʼn qtzaj xobʼ aj qok weʼ twitz nya bʼaʼn toj ambʼil tzul.

3, 4. ¿Alkye o tzʼok te aj kawil te jawni ex tiquʼn in xi qqʼamaʼn jlu?

³ Tej tkubʼ naj Unión Soviética toj abʼqʼi 1991, xi qʼoʼn «chʼin onbʼil» kye tmajen Jehová ateʼtoq kyoj lugar lu, tuʼn jlu e ten toj mujbʼabʼil toj chʼin ambʼil (Dan. 11:34). Aju tzaj tuʼn jlu, xi qʼoʼn ambʼil kye tuʼn kypakbʼan, ex tej tikʼ chʼin ambʼil, chʼiy kybʼet nim mil pakbʼal kyoj tnam e ten toj ojtxe Unión Soviética. Noqtzun tuʼnj, chebʼe chebʼe o tzʼok Rusia ex qe tukʼil te aj kawil te jawni. Ik tzeʼn el qnikʼ tiʼj toj xnaqʼtzbʼil o kyaj, tuʼn tok qʼoʼn toklen jun kawbʼil te aj kawil te jawni ex aj kawil te kubʼni, il tiʼj tuʼn tbʼant oxe tiʼ tuʼn. Tnejel, in nok tbʼinchaʼn nya bʼaʼn kyiʼj tmajen Jehová. Tkabʼ, in kubʼ tyekʼin tukʼil tbʼinchbʼen qa in nok te aj qʼoj tiʼj Jehová ex kyiʼj tmajen. Ex toxin, in che qʼojin kyxolx.

 ⁴ Qo xnaqʼtzan tiʼj tiquʼn in xi qqʼamaʼn qa in nok Rusia ex qe tukʼil te aj kawil te jawni. Tnejel, tuʼnju in nok tbʼinchaʼn nya bʼaʼn kyiʼj nim mil erman in che anqʼin kyoj lugar ateʼ tjaqʼ tkawbʼil ex o tzʼel tiʼn ambʼil kye tuʼn kypakbʼan. Tkabʼ, tuʼn tbʼinchbʼen in kubʼ tyekʼin qa in nel tikʼun Jehová ex qe tmajen. Ex toxin, tuʼnju kukx in qʼojin tukʼil aj kawil te kubʼni, aju tipumal tkawbʼil Gran Bretaña ex Estados Unidos. Qo xnaqʼtzan tiʼj tiʼ o bʼant tuʼn Rusia ex qe tukʼil tuʼntzun kyok te aj kawil te jawni.

5. ¿Alkye ambʼil yolin Daniel tiʼj toj Daniel 11:40 a 43, ex tiʼ tuʼn tbʼaj?

⁵ (Kjawil uʼjit Daniel 11:40-43). Atz in yolin plaj profecía lu tiʼj tkyaqilju kbʼajel kyoj mankbʼil tqʼijlalil. Mas in che yolin versículo lu tiʼj qʼoj in nok kyxol aj kawil te jawni ex te kubʼni. Kyaj tqʼamaʼn Daniel qa aj «tpon mankbʼil tqʼijlalil», «kʼokel tzoqpaj» aj kawil te kubʼni tiʼj aj kawil te jawni, moqa kʼokel jun qʼoj kyxol (Dan. 11:40).

6. ¿Alkye yekʼbʼil at tiʼj qa kukx in qʼojin aj kawil te kubʼni tukʼil aj kawil te jawni?

⁶ Kukx in jyon aj kawil te jawni ex te kubʼni tumel tuʼn kykawin tibʼaj tkyaqil twitz Txʼotxʼ. Jun techel, qo ximen tiʼjju ikʼ tej tbʼaj Tkabʼ Nimaq Qʼoj twitz Tkyaqil Txʼotxʼ, xi tzyet tuʼn tkawin Unión Soviética ex qe tukʼil kyoj nim tnam te Europa. Tuʼntzunju, kubʼ t-ximen aj kawil te kubʼni tuʼn tten jun kʼloj tsoldad twitz tkyaqil Txʼotxʼ ex ok qʼoʼn tsigla te OTAN. In bʼaj kynajsaʼn aj kawil lu nim pwaq tuʼnju kyaj tuʼn kyten mas ky-arma twitz alkyexku juntl. Ax ikx, in bʼaj kyikʼen kywitz tuʼnju teyele junjun in nonin tiʼj jun tnam aj tok qʼoj kyuʼn ik tzeʼn África, Asia ex América Latina. Kyoj qe abʼqʼi tzma in che ikʼ, o kanet tumel tuʼn Rusia ex qe tukʼil tuʼn tok kymojbʼan kyibʼ kyukʼil mas tnam twitz tkyaqil Txʼotxʼ. Ax ikx, in che ajbʼen programa toj computadora tuʼn aj kawil te jawni ex tuʼn aj kawil te kubʼni tuʼntzun kyqʼojin kyxolx. Pero aj t-xi tqanin jun te juntl tiquʼn in bʼant jlu kyuʼn, mintiʼ in jatz kyqʼamaʼn tuʼnju kyaj tuʼn tok kybʼinchaʼn nya bʼaʼn tiʼj kypwaq ex tiʼj kykawbʼil. Ex ik tzeʼn kyaj tqʼamaʼn Daniel, kukx in qʼojin aj kawil te jawni kyiʼj tmajen Jehová (Dan. 11:41).

7. ¿Alkye in nok te «Txʼotxʼ Tbʼanilxix»?

⁷ In tzaj tqʼamaʼn Daniel 11:41 qa kʼokex aj kawil te jawni toj «Txʼotxʼ Tbʼanilxix». ¿Alkye in nok te Txʼotxʼ lu? Toj ambʼil ojtxe, ok qʼoʼn tnam Israel te «txʼotxʼ [...] mas tbʼanilxix kywitz kykyaqil mastl txʼotxʼ» (Ezeq. 20:6). In noktoq qʼoʼn tnam Israel te tbʼanel txʼotxʼ tuʼnju atztoq in che kʼulin xjal te Jehová. Pero atxix toj abʼqʼi 33 te Pentecostés te ambʼil qʼiʼn quʼn jaʼlo, ya mintiʼ ok qʼoʼn tbʼanel txʼotxʼ te jun lugar. Ex mlay yolin jlu tiʼj jun tnam tuʼnju ateʼ tmajen Jehová twitz tkyaqil Txʼotxʼ. Qa ikju, ¿tiʼtzun in kubʼ techlaʼn «Txʼotxʼ Tbʼanilxix» toj ambʼil jaʼlo? Atz in yolin jlu tiʼj aqʼuntl in bʼant kyuʼn tmajen Jehová, in tzeʼn qpakbʼabʼil ex qe qchmabʼil in che ok tuʼn qkʼulin te Jehová.

8. ¿Alkye tten o tzʼokx aj kawil te jawni toj «Txʼotxʼ Tbʼanilxix»?

⁸ Kyoj bʼajsbʼil tqʼijlalil, o tzʼokx aj kawil te jawni jun ex juntl maj toj «Txʼotxʼ Tbʼanilxix». Jun techel, tej tok Alemania nazi  te aj kawil te jawni, mas kyoj qe abʼqʼi tej tok Tkabʼ Nimaq Qʼoj twitz Tkyaqil Txʼotxʼ, okx toj «Txʼotxʼ Tbʼanilxix» tuʼnju i el tikʼun ex e kubʼ tbʼyoʼn qe tmajen Jehová. Tejtzun tbʼaj Tkabʼ Nimaq Qʼoj twitz Tkyaqil Txʼotxʼ, ok Unión Soviética te aj kawil te jawni ex okx toj tbʼanel txʼotxʼ tej tok ten qʼojil kyiʼj qeju in che kʼulin te Jehová ex i eʼx tsamaʼn toj juntl lugar tuʼn tkubʼ qʼoʼn kykastiw.

9. Kyoj qe abʼqʼi tzma in che ikʼ, ¿alkye tten o tzʼokx Rusia ex qe tukʼil toj «Txʼotxʼ Tbʼanilxix»?

⁹ Ex kyoj abʼqʼi tzma in che ikʼ, ax ikx o tzʼokx Rusia ex qe tukʼil toj «Txʼotxʼ Tbʼanilxix». ¿Toj alkye tten? Toj abʼqʼi 2017, el tiʼn aj kawil te jawni ambʼil kye testigos de Jehová tuʼn kypakbʼan ex e okx qʼoʼn junjun erman toj cárcel. Ax ikx, el tiʼn ambʼil kye erman tuʼn kyajbʼen quʼj kyuʼn, ik tzeʼn Traducción del Nuevo Mundo. Nya oʼkxju, ax ikx o tzʼel tiʼn Rusia ex qe tukʼil ninja qʼil twitz aqʼuntl at toj tnam aju ex qe Ja te Chmabʼil ex qe Ja te Nimaq Chmabʼil. Tej tbʼaj jlu, el tnikʼ Kʼloj Xjal Qʼil Twitz Aqʼuntl tiʼj toj 2018 qa a Rusia ex qe tukʼil in che ok te aj kawil te jawni. Pero mintiʼ in che qʼojin tmajen Jehová tuʼn tkubʼ tiʼj jun aj kawil kyuʼn ex mintiʼ in kubʼ kyximen tuʼn tkubʼ kychʼexpuʼn, axpe ikx kyoj ambʼil aj kyel ikʼun kyuʼn. Sino in nok tilil quʼn tuʼn qnaʼn Dios «kyiʼj kykyaqil qeju at kyoklen tuj kawbʼil». Ex mas in bʼant jlu quʼn aj tkubʼ kyximen jun tiʼ at toklen tukʼil qajbʼebʼil te Jehová (1 Tim. 2:1, 2).

10. ¿Kbʼelpe xiten aj kawil te kubʼni tuʼn aj kawil te jawni?

¹⁰ Mas in yolin profecía tkuʼx toj Daniel 11:40 a 45 tiʼj aj kawil te jawni. ¿Ape t-xilen jlu qa kbʼel t-xiten aj kawil te kubʼni? Miʼn. Tuʼnju atx aj kawil te kubʼni aj tpon ambʼil tuʼn tkubʼ t-xiten Jehová ex Jesús kykyaqil aj kawil toj Armagedón (Apoc. 19:20). ¿Tzeʼn in nel qnikʼ tiʼj? Qo xnaqʼtzan tiʼjju in tzaj kyqʼamaʼn profecía tkuʼx toj uʼj te Daniel ex Apocalipsis.

11. ¿Tiʼ in tzaj tyekʼin profecía tkuʼx toj Daniel 2:43 a 45? (Qʼonka twitza tiʼj tilbʼilal tok tiʼj t-xkʼomil).

¹¹ (Kjawil uʼjit Daniel 2:43-45). Yolin profeta Daniel tiʼj jun tilbʼilal bʼinchan maj kyuʼn junxichaq kʼuxbʼil. Teyele junjun plaj tilbʼilal in nok qʼoʼn te techel kykawbʼil xjal ex in nok kybʼinchaʼn nya bʼaʼn kyiʼj tmajen Jehová. Aju tqan tilbʼilal bʼinchan maj tuʼn kʼuxbʼil smoʼn tukʼil xoqʼil, in nok qʼoʼn jlu te techel mankbʼil aj kawil. Bʼaj jlu tej tok tmojbʼan tibʼ Gran Bretaña tukʼil Estados Unidos. In tzaj tyekʼin profecía qa atx kyipumal aj kawil lu aj tkubʼ t-xiten Tkawbʼil Dios kykyaqil kykawbʼil xjal.

12. ¿Tiʼ in kubʼ techlaʼn twuqin twiʼ txkup ex tiquʼn nim toklen tqanil lu?

¹² Ax ikx yolin apóstol Juan tiʼj jun kʼloj kawbʼil aʼyeju ktel nim kyipumal kyibʼaj txqantl tnam ex in nok kybʼinchaʼn nya bʼaʼn kyiʼj tmajen Jehová. Toj profecía yolin tiʼj, e ok qʼoʼn kawbʼil lu ik tzeʼn jun matij txkup ex at wuq twiʼ. Aju twuqin twiʼ txkup, atzun in nok te techel tipumal tkawbʼil Gran Bretaña ex Estados Unidos. Nim toklen tqanil lu tuʼnju ya mintiʼ juntl wibʼaj tibʼajxi jlu. Kukx ktel tipumal tkawbʼil twuqin wibʼaj aj tkubʼ xiten junx kyukʼil txqantl kawbʼil tuʼn Jesucristo ex qe anjel (Apoc. 13:1, 2; 17:13, 14). *

13, 14. ¿Alkye in nok te Gog ex Magog, ex tiquʼnlo kbʼel t-ximen tuʼn tok tzoqpaj kyiʼj tmajen Jehová?

¹³ In nonin jun profecía kyaj qʼamaʼn toj uʼj te Ezequiel qiʼj tuʼn tel qnikʼ tiʼjju jaku bʼaj kyoj bʼajsbʼil tqʼijlalil tiʼj aj kawil te jawni ex te kubʼni. Jaku txi qqʼamaʼn qa aju profecía tkuʼx toj Ezequiel 38:10 a 23; Daniel 2:43 a 45; 11:44 a 12:1 ex Apocalipsis 16:13 a 16 ex 21, in che yolin tiʼj ax ambʼil ex kyiʼj aʼyex tiʼchaq che bʼajel. Qa ikju, jaku qo ayon tuʼn kybʼaj qe tiʼchaq in tzaj qʼamaʼn kyoj qe taqikʼ che ul.

¹⁴ Aj tikʼ chʼin ambʼil t-xilen tzyet nimxix yajbʼil, aʼyeju «rey ateʼ tuj tkyaqil twitz txʼotxʼ» kʼokel kychmon kyibʼ tuʼn kyok te jun kʼloj tnam (Apoc. 16:13, 14; 19:19). In nok tqʼoʼn Tyol Dios tbʼi kʼloj tnam lu te Gog ex Magog (Ezeq. 38:2). Aju kʼloj tnam lu, kʼokel tzoqpaj mankbʼil maj kyiʼj tmajen Jehová ex kʼokel tilil kyuʼn tuʼn kykyim. ¿Tiʼtzun tzul tibʼajxi jlu? Kyaj tqʼamaʼn apóstol Juan qa tzul tzʼaq nim saqbʼaqun kyibʼaj aj qʼoj tiʼj Dios ex nimxix kyalil. Bʼalo in nok jlu te techel tqanil te kastiw kxel kyqʼamaʼn tmajen Jehová kye xjal. Ex tuʼnlo jlu kbʼel t-ximen Gog ex Magog tuʼn tok tzoqpaj kyiʼj tmajen Jehová (Apoc. 16:21).

15, 16. a) ¿Alkyelo tqanil in tzaj tqʼamaʼn Daniel 11:44 ex 45? b) ¿Tiʼ kbʼajel tiʼj aj kawil te jawni ex tiʼj kʼloj tnam in nok te Gog ex Magog?

¹⁵ Aju tqanil te kastiw lu ex aju mankbʼil qʼoj kʼokel kyuʼn aj qʼoj tiʼj Dios, axlo jlu in tzaj qʼamaʼn toj Daniel 11:44 ex 45 (uʼjinktza). Kyoj taqikʼ Tyol Dios lu in tzaj qʼamaʼn qa «ktzajel t-xobʼil [aj kawil te jawni] tuʼn jun tqanil ktzajel tuj tjawitz qʼij ex tuj txʼotxʼ tuj tbʼanqʼabʼ qʼij, [ex] kʼajel meltzʼaj tukʼil nim ttxʼuʼjil ex che bʼel tbʼyoʼn nimku xjal». Aj ttzaj tqʼamaʼn «nimku xjal», bʼalo atz in yolin kyiʼj tmajen Jehová. * Ax ikx, atzlo yolin Daniel tiʼj mankbʼil qʼoj kʼokel kyuʼn aj qʼoj kyiʼj tmajen Dios.

¹⁶ Aj tok tzoqpaj aj kawil te jawni ex qe txqantl aj kawil kyiʼj tmajen Dios,  tzul tqʼoj Jehová ex kxel tzyet qʼoj Armagedón (Apoc. 16:14, 16). Toj ambʼil aju, «kpol or tuʼn tkyim [aj kawil te jawni] ex mi aʼl jun kʼonil tiʼj» (Dan. 11:45). Ax jlu kbʼajel tiʼj kʼloj tnam in nok te Gog ex Magog.

17. Ik tzeʼn in tzaj tqʼamaʼn Daniel 12:1, ¿alkye in nok te Miguel aju in nok qʼoʼn te «anjel maʼ toklen», ex tiʼ in bʼant tuʼn?

¹⁷ Toj juntl versículo tkuʼx toj profecía te Daniel, in tzaj qʼoʼn mas tqanil tiʼj tzeʼn kbʼel xiten aj kawil te jawni ex qe tukʼil, ex tzeʼn qo kletel (kjawil uʼjit Daniel 12:1). ¿Tiʼ kyxilen qe yol kykuʼx toj versículo lu? In nok qʼoʼn juntl tbʼi Jesús te Miguel, aju aj Kawil qibʼaj. Ex tej t-xi qʼoʼn toklen toj Tkawbʼil Dios toj 1914, kukx in kolin kyiʼj tmajen Jehová. Toj chʼintl ambʼil, che kbʼel tnajsaʼn kykyaqil aj qʼoj tiʼj toj qʼoj Armagedón. Atzun mankbʼil qʼoj lu kʼokel, aju ok tqʼoʼn Daniel tbʼi te ambʼil «te nim kʼixkʼoj ex bʼis». Ex toj profecía kyaj tqʼamaʼn apóstol Juan toj uʼj te Apocalipsis, aju ambʼil in ten ajxi tul Armagedón in nok qʼoʼn tbʼi te «nimxix yajbʼil» (Apoc. 6:2; 7:14).

18. ¿Tiquʼn mintiʼ tuʼn qtzaj xobʼ tiʼjju kbʼajel toj ambʼil tzul?

¹⁸ In tzaj tqʼamaʼn Daniel ex apóstol Juan qa che kjel anqʼin qeju in che ajbʼen te Jehová aj tul nimxix yajbʼil. Tuʼntzunju, mintiʼ tuʼn qxobʼ tiʼjju kbʼajel toj ambʼil tzul. Kyaj tqʼamaʼn Daniel qa che kletel qeju «tzʼibʼan kybʼi tuj libro» (Dan. 12:1). ¿Tiʼ kbʼantel quʼn tuʼntzun tkux tzʼibʼin qbʼi toj libro? Il tiʼj tuʼn tkubʼ qyekʼin qa at qʼuqbʼil qkʼuʼj tiʼj Jesús, aju «Tal T-ẍneʼl Dios» (Juan 1:29). Ax ikx, il tiʼj tuʼn t-xi qqʼamaʼn te Jehová tuʼn qajbʼen te ex tuʼn tjaw aʼ qwiʼ (1 Ped. 3:21). Ex nim toklen tuʼn qonin tiʼj Tkawbʼil Dios aj qpakbʼan kye txqantl tuʼntzun tel kynikʼ tiʼj Jehová.

19. ¿Tiʼ il tiʼj tuʼn tbʼant quʼn toj ambʼil jaʼlo ex tiquʼn?

¹⁹ Nim toklen tuʼn tchʼiy qʼuqbʼil qkʼuʼj tiʼj Jehová toj ambʼil jaʼlo ex kyiʼj tmajen. Ex nim toklen tuʼn qonin tiʼj Tkawbʼil Dios toj ambʼil jaʼlo. Qa ma bʼant jlu quʼn, qo kjel anqʼin aj tkubʼ t-xiten Tkawbʼil Dios aju aj kawil te jawni tukʼix aj kawil te kubʼni.