XNAQʼTZBʼIL 21
¿In xipe qqʼoʼn chjonte te Dios kyiʼj oyaj in tzaj tqʼoʼn qe?
«Nman Dios, nimku tbʼinchbʼena tbʼanilxix ma bʼant, aju t-ximbʼetza qiʼje puro bʼaʼn, mi aʼl juntl jaku pon ik tzaʼn teya» (SAL. 40:5).
BʼITZ 5 Tbʼanelxix qe tbʼinchbʼen Dios
AJU KʼELEL QNIKʼ TIʼJ *
1, 2. a) Ik tzeʼn in tzaj tqʼamaʼn Salmo 40:5, ¿alkyeqe oyaj o tzaj tqʼoʼn Jehová qe? b) ¿Tiquʼn qo xnaqʼtzal kyiʼj oxe oyaj lu?
TGAN Jehová tuʼn tbʼinchan xtalbʼil. Qo ximen kyiʼj junjun oyaj o tzaj tqʼoʼn qe ik tzeʼn tbʼanel Txʼotxʼ, aju qcerebro ex aju Xjan Uʼj. Kyuʼn oxe oyaj lu, o tzaj tqʼoʼn Jehová jun lugar jatumel tuʼn qanqʼin, tuʼn tbʼant qximen ex tuʼn tbʼant qyolin, ex tuʼn kykanet tzaqʼwebʼil quʼn kyiʼj xjel mas nim kyoklen (kjawil uʼjit Salmo 40:5).
2 Toj xnaqʼtzbʼil lu, qo xnaqʼtzal chʼin kyiʼj qeju oxe oyaj o tzaj tqʼoʼn Jehová qe. Qa mas ma qo ximen kyiʼj oyaj lu, mas kʼokel qqʼoʼn kyoklen ex mas kbʼel qximen tuʼn ttzalaj Jehová quʼn tuʼnju kʼujlaʼn qoʼ tuʼn (Apoc. 4:11). Ax ikx, mas kbʼajel qbʼinchaʼn qten tuʼntzun qonin kyiʼj xjal in nok qeʼ kykʼuʼj tiʼj evolución, moqa in xi kynimen qa mintiʼ jun Bʼinchal qe.
AJU TBʼANEL TXʼOTXʼ JATUMEL IN QO ANQʼIN
3. ¿Tiquʼn mas tbʼanel Txʼotxʼ kywitz txqantl planeta?
3 Qa ma qo ximen tiʼj tzeʼn o bʼaj bʼinchaʼn Txʼotxʼ, kʼelel qnikʼ tiʼj qa at tnabʼil Jehová (Rom. 1:20; Heb. 3:4). Ateʼ junjuntl planeta in che qʼoʼn welt tiʼj Qʼij, pero a Txʼotxʼ mas tbʼanel tuʼnju in tzaj tqʼoʼn tkyaqilju at tajbʼen kye xjal tuʼntzun kyanqʼin twitz.
4. ¿Tzeʼn jaku tzʼel qnikʼ tiʼj tnabʼil Jehová aj qximen tiʼj tzeʼn o bʼaj bʼinchaʼn Txʼotxʼ? Qʼamantza jun techel.
4 Jaku txi qqʼamaʼn qa ik tten Txʼotxʼ ik tzeʼn jun bark nojni kyuʼn xjal ex in bʼet tibʼaj aʼ. Pero junxitl tten tzeʼn bʼinchan jun bark twitzju tzeʼn bʼinchan Txʼotxʼ. Jun techel, ¿jteʼ ambʼil jaku che anqʼin xjal toj jun bark noqwit aʼyex che kbʼel ximente jatumel tzul kyiʼn kyqʼiqʼ, kywa ex aʼ, ex noqwit mlay tzʼex kyxoʼn tzʼis tiʼjxi bark? Mlaylo che anqʼin nim ambʼil. Atzunte Txʼotxʼ, in che anqʼin nimxix millón xjal twitz ex txkup. Ax Txʼotxʼ in tzaj qʼonte kyqʼiqʼ, qwa ex aju aʼ in najbʼen quʼn. Ex mintiʼ in che bʼaj qe tiʼchaq lu. Ax ikx, ax twitz Txʼotxʼ in kubʼ xoʼn tzʼis, pero kukx in che anqʼin xjal twitz ex tbʼanel keʼyin. ¿Tiquʼn in bʼaj jlu? Tuʼnju bʼaj tbʼinchaʼn Jehová Txʼotxʼ tuʼn tbʼaj tsaqin tibʼ ex tuʼn kyok juntl maj qe tiʼchaq te akʼaj. Qo xnaqʼtzan tiʼj alkye tten in naqʼunan kyqʼiqʼ ex alkye tten in naqʼunan aʼ.
5. ¿Alkye tten in naqʼunan kyqʼiqʼ ex tiʼ in tzaj tyekʼin jlu qe?
5 Aju kyqʼiqʼ, atzun gas in najbʼen kyuʼn xjal ex kyuʼn txkup tuʼn kyanqʼin. Ik tzeʼn in tzaj kyyekʼin junjun tqanil, in najbʼen nim tbʼanel kyqʼiqʼ toj jun abʼqʼi kyuʼn xjal ex kyuʼn txkup tuʼntzun kyanqʼin. Noqtzun tuʼnj, aj tetz kyxew, in nok tbʼi jlu te dióxido de carbono. Ex mintiʼ in bʼaj tkyaqil kyqʼiqʼ kyuʼn qeju in che anqʼin twitz Txʼotxʼ ex mintiʼ in noj twitz kyaʼj tuʼn kyqʼiqʼ tzʼil. ¿Tiquʼn? Tuʼnju in naqʼunan kyqʼiqʼ toj tumel. E kubʼ tbʼinchaʼn Jehová nim wiq tzeʼ, ik tzeʼn qe tal tzeʼ ateʼ toj aʼ ex qeju nimaq tzeʼ. Aʼyetzun jlu in xi jukʼunte dióxido de carbono ex in tzaj kyqʼoʼn kyqʼiqʼ. Tuʼnju alkye tten in naqʼunan kyqʼiqʼ, in nel qnikʼ tiʼj qa ax tok qe yol tkuʼx toj Hechos 17:24 ex 25, chi: «Ax [Dios] in qʼonte qchwinqlal ex qxew qkyaqil ex tkyaqilju at».
6. a) ¿Tzeʼn in naqʼunan aʼ? b) ¿Tiʼ in tzaj tyekʼin jlu qe? (Qʼonka twitza tiʼj recuadro « Jun oyaj tuʼn Jehová aju alkye tten in naqʼunan aʼ»).
6 Aju aʼ. Tuʼnju nya najchaq ex nya nqayin tok Txʼotxʼ tiʼj Qʼij, mintiʼ in nok aʼ te hielo ex mintiʼ in loqlon. Noqwit nqayin tok tiʼj Qʼij, jaku kubʼ tzqij tkyaqil. Ex noqwit najchaq tok tiʼj Qʼij, jaku tzʼok tkyaqil Txʼotxʼ te hielo. Tuʼnju kubʼ tqʼoʼn Jehová Txʼotxʼ toj jun tbʼanel lugar, in naqʼunan aʼ toj tumel ex in tzaj tqʼoʼn qchwinqlal. ¿Alkye tten in naqʼunan? In meqʼt aʼ at toj mar ex twitz Txʼotxʼ tuʼn Qʼij. Ex aju vapor in jaw tuʼn, in nok te muj. Tkyaqil abʼqʼi, mas nim aʼ in nok te vapor tuʼn Qʼij twitzju at kyoj kykyaqil qe lago at twitz Txʼotxʼ. In kyaj ten aʼ lu twitz kyaʼj toj lajaj qʼij, ex yajxitl in tzaj chitj ik tzeʼn jbʼal moqa cheʼw, ex in pon juntl maj toj mar ex kyoj aʼ. Ex ax jlu in bʼant tuʼn juntl maj. Tuʼnju mintiʼ in bʼaj aʼ at twitz Txʼotxʼ ex tuʼnju alkye tten in naqʼunan, in tzaj tyekʼin qa at tnabʼil Jehová ex at tipumal (Job 36:27, 28; Ecl. 1:7).
7. ¿Tzeʼn in kubʼ qyekʼin qa in xi qqʼoʼn chjonte tiʼj oyaj in tzaj tqʼamaʼn Salmo 115:16?
7 Tuʼn tok qqʼoʼn mas toklen Txʼotxʼ ex qeju tbʼanel tiʼchaq at twitz, nim toklen tuʼn qximen kyiʼj tbʼinchbʼen Jehová (kjawil uʼjit Salmo 115:16). Kʼonil jlu qiʼj tuʼn t-xi qqʼoʼn chjonte te tkyaqil qʼij tuʼnju in tzaj tqʼoʼn tbʼanel tiʼchaq qe. Ax ikx, kbʼel qyekʼin qa in xi qqʼoʼn chjonte te Jehová aj tok tilil quʼn tuʼn tbʼaj qsaqin lugar jatumel in qo anqʼin.
AJU QCEREBRO
8. ¿Tiquʼn jaku txi qqʼamaʼn qa tbʼanelxix tzeʼn kubʼ bʼinchaʼn qcerebro?
8 Tbʼanelxix tzeʼn kubʼ bʼinchaʼn qcerebro. Tej qten toj talbʼil qtxuʼ, xi tzyet tuʼn tbʼaj bʼinchaʼn qcerebro ik tzeʼn kubʼ t-ximen Jehová. Ex tej tikʼ junjun minut, e bʼant nim mil akʼaj célula toj. In tzaj kyqʼamaʼn xjal in che jyon tqanil qa at junlo 100 mil millón nueronas toj tcerebro jun xjal ma chʼiy. Aqeju neurona, jun kʼloj célula qe jlu. Kyuʼn kykyaqil célula lu in bʼant qcerebro ex oʼkx 3.3 libra talil. Qo xnaqʼtzan kyiʼj junjun tiʼ in bʼant tuʼn qcerebro.
9. Tuʼnju in bʼant qyolin, ¿tiquʼn jaku txi qqʼamaʼn qa jun oyaj jlu tuʼn Jehová?
9 Jun milagr tuʼnju in bʼant qyolin. Qo ximen chʼin tiʼj tkyaqil aqʼuntl in bʼant tuʼn qxmilal aj qyolin. Tuʼn t-xi qqʼamaʼn jun yol, in xi tqʼamaʼn qcerebro kye junlo 100 músculo tuʼn kyyukch, aʼyeju ateʼ toj qaqʼ, toj qqul, toj qtziʼ ex toj qxuʼk. Toj ttxolil in xi kyyukin kyibʼ tuʼntzun tel nikʼbʼaj kyiʼj qyol. Tzaj tqʼamaʼn jun tqanil te 2019 qa aj in che ul itzʼj tal neʼ, ya in nel kynikʼ kyiʼj yol, tuʼntzunju jaku bʼant qyolin toj junxichaq yol. Aju tqanil lu in tzaj tyekʼin qa ax tok aju o tzʼel kynikʼ xjal tiʼj. In tzaj kyqʼamaʼn qa aj qul itzʼj, jaku tzʼel qnikʼ kyiʼj yol ex jaku bʼant qyolin toj juntl yol. Tuʼnju in bʼant qyolin, jaku txi qqʼamaʼn qa jun oyaj jlu tuʼn Jehová (Éx. 4:11).
10. ¿Tzeʼn jaku kubʼ qyekʼin qa in xi qqʼoʼn chjonte tuʼnju in bʼant qyolin?
10 Aj t-xi qqʼamaʼn qa a Dios Bʼinchal tkyaqil kye qeju in kubʼ kyximen qa atz tzajni qoʼ kyiʼj mono, atzun jun tten tuʼn tkubʼ qyekʼin qa in xi qqʼoʼn chjonte tuʼnju in bʼant qyolin (Sal. 9:1; 1 Ped. 3:15). Kyaj aj xnaqʼtzal tiʼj evolución tuʼn tkubʼ qximen qa mintiʼ kubʼ bʼinchaʼn Txʼotxʼ ex qa noq kukx ul qchwinqlal. Jaku tzʼajbʼen Xjan Uʼj quʼn ex junjun nabʼil toj xnaqʼtzbʼil lu tuʼntzun qkolin tiʼj Qtat at toj kyaʼj, ex tuʼn t-xi qchikʼbʼaʼn kye qeju kyaj tuʼn tok kybʼiʼn tiquʼn qʼuqli qkʼuʼj tiʼj qa a Jehová kubʼ bʼinchante kyaʼj ex Txʼotxʼ (Sal. 102:25; Is. 40:25, 26).
11. ¿Alkye juntl tiquʼn jaku txi qqʼamaʼn qa tbʼanel bʼinchaʼn maj qcerebro?
11 Tbʼanel tuʼnju jaku tzaj qnaʼn qe tiʼchaq. Toj ambʼil ojtxe, el tnikʼ jun científico tiʼj qa jaku tzaj tnaʼn qcerebro aju tqanil tkuʼx toj 20 millón libro. Pero toj ambʼil jaʼlo, in kubʼ kyximen xjal qa jaku txi tkʼuʼn qcerebro mas tqanil twitz jlu. Ex tuʼn jlu, jaku bʼant jun tbʼanel tiʼ quʼn, ¿alkye? Qo xnaqʼtzan tiʼj.
12. Noq tuʼnju jaku tzʼel qiʼn tbʼanel xnaqʼtzbʼil tiʼjju in nikʼ qiʼj, ¿tiʼ jaku bʼant quʼn?
12 Oʼkx qe xjal jaku tzʼel kyiʼn jun tbʼanel xnaqʼtzbʼil tiʼjju o tzikʼ toj kyanqʼibʼil. Aj ttzaj qnaʼn ex aj qximen tiʼjju o tzikʼ toj qanqʼibʼil, in nonin qiʼj tuʼn qok lepeʼ kyiʼj nabʼil mas tbʼanel ex tuʼn t-xi qjikumaʼn tiʼj qximbʼetz ex tiʼj qbʼinchbʼen (1 Cor. 6:9-11; Col. 3:9, 10). Axpe ikx, jaku txi qxnaqʼtzaʼn qximbʼetz tuʼn tel qnikʼ tiʼj alkye bʼaʼn ex alkye nya bʼaʼn (Heb. 5:14). Ax ikx jaku kubʼ qyekʼin qkʼujlabʼil, qʼaqʼbʼil qkʼuʼj ex tuʼn tten qximbʼetz toj tumel tiʼjju tzʼaqli.
13. Ik tzeʼn in tzaj tqʼamaʼn Salmo 77:11 ex 12, ¿alkyeqe tiʼchaq bʼaʼn tuʼn ttzaj qnaʼn?
13 Jun tumel tuʼn tkubʼ qyekʼin qa in xi qqʼoʼn chjonte te Jehová tuʼnju jaku che tzaj qnaʼn qe tiʼchaq, aju qa ma tzaj qnaʼn tzeʼn o tzʼonin qiʼj ex tzeʼn o tzaj tqʼuqbʼaʼn qkʼuʼj. Kʼonil jlu qiʼj tuʼn tok qeʼ qkʼuʼj tiʼj qa qo tzajel tonin toj ambʼil tzul (kjawil uʼjit Salmo 77:11, 12; 78:4, 7). Ex aj ttzaj qnaʼn qe tbʼanel tiʼchaq o bʼant kyuʼn txqantl qiʼj ex aj t-xi qqʼoʼn chjonte kye, atzun juntl tten tuʼn tkubʼ qyekʼin qa in xi qqʼoʼn chjonte tiʼjju oyaj lu. In tzaj kyqʼamaʼn qeju in che jyon tqanil qa mas in che tzalaj qeju bʼaʼn che qʼon chjonte. Aj ttzaj qnaʼn junjun tiʼchaq, bʼaʼn tuʼn tel qkanoʼn tiʼj Jehová. ¿Tiquʼn? Tuʼnju at maj in kubʼ t-ximen tuʼn tikʼ tnaʼl junjun tiʼchaq tuʼn. Jun techel, maske tzʼaqli t-ximbʼetz, in kubʼ t-ximen tuʼn tkubʼ tnajsaʼn qil ex tuʼn tikʼ tnaʼl tuʼn qa ma tzʼajtz tiʼj qanmi (Sal. 25:7; 130:3, 4). Ex ax jlu taj tuʼn tbʼant quʼn kyukʼil qeju in nok kybʼinchaʼn nya bʼaʼn qiʼj (Mat. 6:14; Luc. 17:3, 4).
In kubʼ qyekʼin qa in xi qqʼoʼn chjonte tiʼj qcerebro aj tajbʼen quʼn tuʼn tjaw qnimsaʼn Jehová. (Qʼonka twitza tiʼj taqikʼ 14) *
14. ¿Tzeʼn jaku kubʼ qyekʼin qa in xi qqʼoʼn chjonte tiʼj qcerebro?
14 Jaku kubʼ qyekʼin qa in xi qqʼoʼn chjonte tiʼj qcerebro aj tajbʼen quʼn tuʼn tjaw qnimsaʼn Jehová. Ateʼ junjun xjal mintiʼ in najbʼen kyuʼn toj tumel, tuʼnju aʼyex in che kubʼ ximente alkye bʼaʼn ex alkye nya bʼaʼn. Pero tuʼnju a Jehová Bʼinchal qe, mas tbʼanel qe tkawbʼil ateʼ twitz alkyexku juntl (Rom. 12:1, 2). Aj qanqʼin ik tzeʼn in tzaj kyqʼamaʼn tkawbʼil, in qo tzalaj (Is. 48:17, 18). Ex in nel qnikʼ tiʼj qa o qo kubʼ bʼinchaʼn tuʼn tjaw qnimsaʼn tbʼi Qtat ex Bʼinchal qe, ex tuʼn ttzalaj quʼn (Prov. 27:11).
AJU TYOL DIOS, JUN TBʼANEL OYAJ
15. ¿Alkye tten in nel qnikʼ tiʼj toj Xjan Uʼj qa kʼujlaʼn qoʼ tuʼn Jehová?
15 In nel qnikʼ tiʼj toj Xjan Uʼj qa kʼujlaʼn qoʼ tuʼn Jehová. E ajbʼen xjal tuʼn Jehová tuʼntzun tkubʼ kytzʼibʼin Tyol. ¿Tiquʼn? Tuʼnju in ximen kyiʼj qe tkʼwal at tzalu twitz Txʼotxʼ. Toj Xjan Uʼj, in tzaj tqʼoʼn Jehová tzaqʼwebʼil kyiʼj xjel mas nim kyoklen ik tzeʼn qe jlu: ¿Jatumel tzaj tzyet qchwinqlal? ¿Tiquʼn o qo kubʼ bʼinchaʼn? ¿Ex tiʼ kbʼajel toj ambʼil tzul? Tuʼnju taj Jehová tuʼn tok kybʼiʼn tkʼwal qe tzaqʼwebʼil kyiʼj xjel lu, o tzʼonin tuʼn tkubʼ traducirit Xjan Uʼj kyoj nim yol kyoj qe abʼqʼi o che ikʼ. Toj ambʼil jaʼlo, at jun plaj moqa tkyaqil Xjan Uʼj kyoj mas te oxe mil yol. Atzun uʼj lu mas o kubʼ traducirin ex mas o txi sipen. Noq jaxku tumel in che anqʼin xjal, chʼixmi kykyaqil jaku tzʼok kyojtzqiʼn tbʼanel tqanil tkuʼx Tyol Dios toj kyex kyyol. (Qʼonka twitza tiʼj recuadro « In che kubʼ traducirin Tyol Dios kyoj yol te África»).
16. Ik tzeʼn in tzaj tqʼamaʼn Mateo 28:19 ex 20, ¿tzeʼn jaku kubʼ qyekʼin qa in xi qqʼoʼn chjonte tuʼnju at Tyol Dios qukʼil?
16 ¿Tzeʼn jaku kubʼ qyekʼin qa in xi qqʼoʼn chjonte tuʼnju at Tyol Dios qukʼil? Kbʼel qyekʼin aj tjaw quʼjin tkyaqil qʼij, aj qximen tiʼjju in tzaj t-xnaqʼtzaʼn ex aj tok tilil quʼn tuʼn tkubʼ qbʼinchaʼn aju in nel qnikʼ tiʼj. Ax ikx, in kubʼ qyekʼin qa in xi qqʼoʼn chjonte te Jehová tiʼj Xjan Uʼj aj tok tilil quʼn tuʼn t-xi qqʼamaʼn tbʼanel tqanil tkuʼx toj kye txqantl (Sal. 1:1-3; Mat. 24:14; kjawil uʼjit Mateo 28:19, 20).
17. ¿Alkyeqe oyaj ma qo yolin kyiʼj toj xnaqʼtzbʼil lu, ex tiʼ kʼelel qnikʼ tiʼj toj juntl xnaqʼtzbʼil?
17 Toj xnaqʼtzbʼil lu, ma qo yolin kyiʼj oxe oyaj o tzaj tqʼoʼn Jehová qe: aju Txʼotxʼ, aju qcerebro ex aju Xjan Uʼj. Pero ax ikx o tzaj tqʼoʼn Jehová junjuntl oyaj mintiʼ qʼanchaʼl. Toj juntl xnaqʼtzbʼil, qo xnaqʼtzal kyiʼj junjun oyaj lu.
BʼITZ 12 Nimxix toklena Jehová
^ taqik' 5 Kʼonil xnaqʼtzbʼil lu qiʼj tuʼn t-xi qqʼoʼn chjonte te Jehová ex tuʼn tok qqʼoʼn toklen oxe oyaj in tzaj tqʼoʼn qe. Ax ikx tzul tqʼoʼn junjun tbʼanel nabʼil qe tiʼj tzeʼn jaku qo yolin kyukʼil qeju mintiʼxix in nok qeʼ kykʼuʼj tiʼj qa at Dios.
^ taqik' 64 TQANIL TIʼJ TILBʼILAL: In xnaqʼtzan jun ermana tiʼj juntl yol tuʼntzun t-xi tyekʼin axix tok tiʼj Tyol Dios kye xjal in che tzaj toj juntl tnam.
