Ateʼ junjun profecía toj esquema lu in tzaj kyyekʼin junjun tiʼ in bʼaj toj ax ambʼil. Kykyaqil qe jlu in tzaj kyyekʼin qa in qo anqʼin toj «mankbʼil tqʼijlalil» (Dan. 12:4).

• Qe taqikʼ Tyol Dios: Apoc. 11:7; 12:13, 17; 13:1-8, 12.

  Profecía: O kawin «txkup» kyibʼaj xjal toj nim syent abʼqʼi. Toj bʼajsbʼil tqʼijlalil, ok kʼixbʼisaʼn twuqin twiʼ. Yajxitl, in bʼanix twiʼ ex «kykyaqil xjal twitz txʼotxʼ» in che ok lepeʼ tiʼj. In najbʼen txkup lu tuʼn Satanás tuʼn tqʼojin «kyiʼj chʼintl tiyjil xuʼj».

  In japun twiʼ: Tej otoqxi tzikʼ Nim Jbʼal, tzaj tzyet tuʼn kyten aj kawil ex el kyikʼun Jehová. Tej tikʼtl nim syent abʼqʼi, akux in nok Tnejel Nimaq Qʼoj twitz Tkyaqil Txʼotxʼ, kubʼ numj Tkawbʼil Gran Bretaña. Pero ten juntl maj tipumal tej tok tmojbʼaʼn tibʼ tukʼil Estados Unidos. Toj bʼajsbʼil tqʼijlalil, in najbʼen tuʼn Satanás tuʼn kyel tikʼun tmajen Jehová.

• Qe taqikʼ Tyol Dios: Dan. 11:25-45.

  Profecía: In qʼojin aj kawil te jawni tukʼil aj kawil te kubʼni.

  In japun twiʼ: Qʼojin tnam Alemania tiʼj Gran Bretaña ex Estados Unidos. Toj abʼqʼi 1945 ok Unión Soviética ex qe tukʼil te aj kawil te jawni. Toj 1991 kubʼ naj Unión Soviética. Ex tej tbʼet ambʼil, ok Rusia ex qe tukʼil te aj kawil te jawni.

• Qe taqikʼ Tyol Dios: Is. 61:1; Mal. 3:1; Luc. 4:18.

  Profecía: In tzaj tsamaʼn Jehová tsanjel tuʼn tbʼaj tbʼinchaʼn bʼe naʼmxtoq txi tzyet tuʼn tkawin Mesías. In nok jun kʼloj xjal te aj sanjel, in xi tzyet tuʼn kypakbʼan tiʼj tbʼanel tqanil kye xjal mans.

  In japun twiʼ: Tzaj tzyet tuʼn t-xnaqʼtzan Charles Russell ex qe tukʼil tiʼj Tyol Dios toj abʼqʼi 1870 tuʼntzun tel kynikʼ tiʼj axix tok. Kyoj abʼqʼi 1880, xi tzyet tuʼn tel kynikʼ tiʼj qa nim toklen tuʼn kypakbʼan tmajen Dios. I etz xnaqʼtzbʼil kyuʼn ik tzeʼn qe jlu: «Se solicitan 1.000 predicadores» ex «Ungidos para predicar».

• Qe taqikʼ Tyol Dios: Mat. 13:24-30, 36-43.

  Profecía: In kux tawaʼn jun xjal triw toj ttxʼotxʼ. Yajxitl, in nul aj qʼoj ex in kux tawaʼn nya bʼaʼn kʼul toj. In chʼiy nya bʼaʼn kʼul ex nya qʼanchaʼl triw. Aj tpon ambʼil tuʼn tjaw chmet twitz awal, in nel paʼn nya bʼaʼn kʼul tiʼj triw.

  In japun twiʼ: Atxix toj abʼqʼi 1870, mas o tzʼel nikʼbʼaj tiʼj alkyeqe axix tok okslal ex alkyeqe nya ax tok. Kyoj bʼajsbʼil tqʼijlalil, in che ok chmoʼn axix tok okslal ex in che el paʼn kyiʼj nya ax tok okslal.

• Qe taqikʼ Tyol Dios: Dan. 2:31-33, 41-43.

  Profecía: Aju qanbʼaj smoʼn tuʼn kʼuxbʼil ex xoqʼil, at toklen tukʼil tilbʼilal bʼinchaʼn maj tuʼn junxichaq kʼuxbʼil.

  In japun twiʼ: In kubʼ techlaʼn xoqʼil qe xjal ateʼ tjaqʼ tkawbʼil Gran Bretaña ex Estados Unidos ex in che ok meltzʼaj kyiʼj aj kawil. Tuʼntzunju, mintiʼ kyipumal kawbʼil lu tuʼn kykawin ik tzeʼn jun kʼuxbʼil.

• Qe taqikʼ Tyol Dios: Mat. 13:30; 24:14, 45; 28:19, 20.

  Profecía: In jaw chmet «triw» ex in xi kʼuʼt. In xi qʼoʼn toklen «majen in bʼant taqʼun [...] ex at tnabʼl» tuʼn t-xqʼuqin kyiʼj qeju ateʼ toj ja. Ex in xi tzyet tuʼn t-xi pakbʼet tbʼanel tqanil «tiʼj tkawbʼil Dios» toj «tkyaqil twitz txʼotxʼ».

  In japun twiʼ: Toj 1919 xi qʼet toklen majen at tnabʼil tuʼn t-xqʼuqin kyiʼj tmajen Dios. Atxix toj ambʼil aju, ok tilil kyuʼn Xnaqʼtzal tiʼj Tyol Dios tuʼn kypakbʼan. Toj ambʼil jaʼlo, in che pakbʼan testigos de Jehová kyoj mas te 200 nimaq tnam ex lugar, ex in netz xnaqʼtzbʼil tiʼj Tyol Dios kyuʼn kyoj mas te mil yol.

• Qe taqikʼ Tyol Dios: Dan. 12:11; Apoc. 13:11, 14, 15.

  Profecía: In nok tilil tuʼn txkup at kabʼe tkach tuʼn tbʼant «jun tilbʼilal txkup» ex in xi tqʼoʼn t-xew tuʼn tanqʼin.

  In japun twiʼ: Kubʼ t-ximen tkawbʼil Gran Bretaña ex Estados Unidos tuʼn tten Sociedad de Naciones. Ex ateʼ junjuntl tnam ok kymojbʼan kyibʼ tukʼil. Tej tbʼet ambʼil, ax ikx ten aj kawil te jawni kyxol Sociedad de Naciones, pero oʼkx kyoj abʼqʼi 1926 a 1933. Kubʼ kyximen xjal qa ktel mujbʼabʼil twitz tkyaqil Txʼotxʼ tuʼn Sociedad de Naciones, aju oʼkx jaku bʼant tuʼn Tkawbʼil Dios. Ax jlu in kubʼ kyximen xjal tuʼn tbʼant tuʼn Naciones Unidas (ONU).

• Qe taqikʼ Tyol Dios: Dan. 8:23, 24.

  Profecía: In tzaj nim xitbʼil tuʼn jun aj kawil txʼuʼj twitz.

  In japun twiʼ: Tzaj nim xitbʼil tuʼn tipumal tkawbʼil Gran Bretaña ex Estados Unidos. Jun techel, toj Tkabʼ Nimaq Qʼoj twitz Tkyaqil Txʼotxʼ, tzaj nim xitbʼil tuʼn Estados Unidos tej tkutz t-xoʼn kabʼe bomba atómica tibʼaj jun tnam aj qʼoj kyiʼj.

• Qe taqikʼ Tyol Dios: Dan. 11:31; Apoc. 17:3, 7-11.

  Profecía: In jatz «jun txkup kyaq tiʼj» at lajaj tkach toj jun jul, ex in nok te twajxaqin aj kawil. Toj uʼj te Daniel in nok qʼoʼn tbʼi aj kawil lu te «jun tilbʼilal ikʼbʼilxix».

  In japun twiʼ: Ya mintiʼ ten tipumal Sociedad de Naciones tej tok Tkabʼ Nimaq Qʼoj twitz Tkyaqil Txʼotxʼ. Tej tkubʼaj nimaq qʼoj, xi tzyet tuʼn tten ONU. Ik tzeʼn bʼaj tukʼil Sociedad de Naciones, in kubʼ kyximen xjal qa ktel mujbʼabʼil twitz tkyaqil Txʼotxʼ tuʼn ONU, aju oʼkx jaku bʼant tuʼn Tkawbʼil Dios. Che okel tzoqpaj aj kawil in che onin tiʼj ONU kyiʼj okslabʼil.

• Qe taqikʼ Tyol Dios: 1 Tes. 5:3; Apoc. 17:16.

  Profecía: Tzul kyqʼamaʼn nimaq tnam qa «mintiʼ bʼis, [ex qa] bʼaʼn taʼ tkyaqil». Yajxitl, aju «laj tkach txkup» ex aju txkup che okel tzoqpaj tiʼj «xuʼj jawni twitz kyukʼil xinaq» ex kbʼel kynajsaʼn. Tibʼajxi jlu, che kbʼel najsaʼn tnam.

  In japun twiʼ: Tzul kyqʼamaʼn tnam qa ma kanet mujbʼabʼil kyuʼn twitz tkyaqil Txʼotxʼ. Yajxitl, aʼyeju tnam in che onin tiʼj ONU kbʼel kynajsaʼn okslabʼil nya ax tok. Iktzun tten kxel tzyet nimxix yajbʼil. Kbʼel bʼaj nimxix yajbʼil aj tkubʼ t-xiten Jesús tkyaqilju tokx tjaqʼ tkawbʼil Satanás toj qʼoj Armagedón.

• Qe taqikʼ Tyol Dios: Ezeq. 38:11, 14-17; Mat. 24:31.

  Profecía: In nokx Gog toj kytxʼotxʼ tmajen Dios. Yajxitl, in che ok chmoʼn skʼoʼn maj kyuʼn anjel.

  In japun twiʼ: In nok tzoqpaj aj kawil te jawni kyiʼj tmajen Dios ex in che onin junjuntl aj kawil tiʼj. Otoqxi tzikʼ chʼin ambʼil tbʼajlen jlu, che okel chmoʼn skʼoʼn maj ateʼx tzalu twitz Txʼotxʼ toj kyaʼj.

• Qe taqikʼ Tyol Dios: Ezeq. 38:18-23; Dan. 2:34, 35, 44, 45; Apoc. 6:2; 16:14, 16; 17:14; 19:20.

  Profecía: Kbʼel «tiʼj tkyaqil tuʼn» xjal tjax tibʼaj «chej saq tiʼj» aj tkubʼ tnajsaʼn Gog kyukʼix qe tsoldad. Kbʼelex xoʼn «txkup» toj «najabʼ in kʼant tuʼn qʼaqʼ» ex kbʼel bʼuchit matij tilbʼilal qʼan pwaq ttxʼotxʼil.

  In japun twiʼ: In kolin Jesús kyiʼj tmajen Jehová, aju aj kawil toj Tkawbʼil Dios. Junx kyukʼil 144,000 skʼoʼn maj ex qe anjel, kbʼel tnajsaʼn Jesús qe kʼloj tnam in che ok lipen kyiʼj tmajen Dios. Iktzun tten kbʼel najsaʼn tkyaqilju tokx tjaqʼ tkawbʼil Satanás.