In tzaj tqʼamaʼn jun ermana jlu, aju Sara tbʼi: * «In chin tzaj xobʼe ex mintiʼ in nok qeʼxix nkʼuʼje wiʼjxe. Tuʼntzunju nya ngane tuʼn ntene kyukʼil xjal jun rat in tzaj kyqʼoj ex txʼuʼj kywiʼ. Pero in chin tzalaje aj ntene tukʼil jun xjal mintiʼ in jaw tnimsan tibʼ ex mans. Tuʼn jlu nya kwest tuʼn nyoline tukʼil jun xjal ik tzeʼn jlu, ex tuʼn t-xi nqʼamaʼne te aju in kubʼ nnaʼne ex qeju nya bʼaʼn in chin ok weʼye twitz. Ex atzun tbʼanel kymod wamiwe in kubʼ kyyekʼin».

Aju in tzaj tqʼamaʼn Sara in tzaj tyekʼin qa in che ok laqʼeʼ txqantl qtxlaj qa mans qoʼ. Ax ikx tgan Jehová tuʼn kyok xjal te mans. Ex in tzaj tqʼamaʼn Jehová jlu qe toj Tyol: «Che oke mans» (Col. 3:12). ¿Tiʼtzun aju tuʼn qok te mans? ¿Tzeʼn kubʼ tyekʼin Jesús mod lu? ¿Ex tzeʼn jaku tzʼonin qiʼj tuʼn qtzalaj?

Aju tuʼn qok te mans atzun jun mod in kubʼ tyekʼin jun xjal in tzalaj tanmi. Aʼyeju xjal in kubʼ kyyekʼin mod lu, in kubʼ kyyekʼin tbʼanel kymod kyukʼil txqantl, in che ex kywitz nya bʼaʼn in che tzaj kyiʼj ex in bʼant kyjakʼunte kyibʼ.

Aju xjal mans kyuw tkʼuʼj. Tej tkubʼ traducirin yol «mans» toj yol griego, atztoq in yolin tiʼj jun chej txʼuʼj twiʼ ex otoq tzʼok te mans. Kukx in ten tipumal jun chej otoq tzʼok te mans, pero in bʼaj xnaqʼtzaʼn tukʼil pasens tuʼntzun tok t-xqʼuqin tipumal. Axju in bʼaj tukʼil jun xjal in nok te mans, in nok t-xqʼuqin tibʼ qa txʼuʼj twiʼ ex in ten tbʼanel tmod aj in ten kyukʼil txqantl.

Bʼalo in kubʼ qximen qa nya mans qoʼ aj in qo ul itzʼj. Ex at maj kwest tuʼn qok te mans tuʼnju in qo anqʼin kyxol xjal mintiʼ kypasens ex txʼuʼj kywiʼ (Rom. 7:19). Tuʼntzunju, kʼokel tilil quʼn tuʼn qok te mans, pero kʼonil xewbʼaj xjan qiʼj tuʼn miʼn qsikt (Gál. 5:22, 23). ¿Tiquʼn il tiʼj tuʼn tok tilil quʼn tuʼn qok te mans?

Qa mans qoʼ, kygan txqantl tuʼn kyten qukʼil. Ik tzeʼn tqʼama Sara aju ma qo yolin tiʼj, qgan tuʼn qten kyukʼil xjal mans. El kynikʼ xjal tiʼj qa mans te Jesús ex qa ten tbʼanel tmod (2 Cor. 10:1). Maske mintiʼxix ojtzqiʼn twitz kyuʼn kʼwal, kygantoq tuʼn kyten tukʼil (Mar. 10:13-16).

Qa mans qoʼ, in nonin qiʼj ex kyiʼj txqantl. Tuʼn jlu mintiʼ in tzaj bʼaj qkʼuʼj ex mintiʼ in tzaj naj qqʼoj kyiʼj txqantl (Prov. 16:32). Qa ma bʼant jlu quʼn, kʼonil qiʼj tuʼn miʼn tok qbʼinchaʼn  nya bʼaʼn tiʼj jun xjal kʼujlaʼn quʼn ex tuʼn miʼn tkubʼ qnaʼn nya bʼaʼn. Ax ikx kʼonil jlu kyiʼj txqantl. Qa nya jun rat in tzaj qqʼoj, ni jun ktzajel nya bʼaʼn tiʼj.

Maske attoq nim taqʼun Jesús tuʼn tbʼant ex mintiʼxixtoq ambʼil tiʼj, kukx ok te mans. E ok weʼ xjal twitz nim nya bʼaʼn ex kwesttoq kyanqʼibʼil, ex kyajtoq qʼuqbʼil kykʼuʼj. Jaku txi qqʼamaʼn qa chewix kykʼuʼj kyuʼn tyol Jesús lu: «Kytzaje wukʼile kykyaqile, [...] porke mans qine ex mans wanmiye» (Mat. 11:28, 29).

¿Tzeʼn jaku qo ok te mans ik tzeʼn te Jesús? Tnejel, bʼaʼn tuʼn qxnaqʼtzan tiʼj Xjan Uʼj tuʼntzun tel qnikʼ tiʼj tiʼ tmod Jesús kubʼ tyekʼin kyukʼil xjal ex tiʼ tmod kubʼ tyekʼin tej tok weʼ twitz nya bʼaʼn. Yajxitl, bʼaʼn tuʼn tok tilil quʼn tuʼn tel qkanoʼn tiʼj Jesús tuʼntzun qok te mans kyoj ambʼil kwest (1 Ped. 2:21). Qo xnaqʼtzan tiʼj oxe tiʼ onin tiʼj Jesús tuʼn tok te mans.

Mintiʼ jaw tnimsan tibʼ Jesús. Ax Jesús qʼamante qa ok te mans ex qa kubʼ tin tibʼ (Mat. 11:29). Junx in tzaj tqʼamaʼn Xjan Uʼj yol mans tukʼilju tuʼn tkubʼ qin qibʼ, ex at toklen jun tukʼil juntl (Efes. 4:1-3, TNM). ¿Tiquʼn?

Qa in kubʼ qin qibʼ, mintiʼ in kubʼ qximen qa mas nim qoklen kywitz txqantl nix in kubʼ qnaʼn nya bʼaʼn tuʼn alkyexku tiʼ. ¿Tiʼ tmod Jesús kubʼ tyekʼin tej t-xi kyqʼamaʼn xjal te qa nim in waʼn ex qa nim in kʼan vin? Tuʼn tbʼinchbʼen el nikʼbʼaj tiʼj qa nya ax tok aju kyqʼama ex tukʼil tbʼanel tmod xi tqʼamaʼn jlu kye: «Kʼelel qnikʼ tiʼj jun xjal qa at tnabʼl, tuʼn tbʼinchbʼen» (Mat. 11:19).

Qa at jun ma tzʼok ten yolil tiʼj qyajil, tiʼj qtnam ex qiʼj, bʼaʼn tuʼn tok tilil quʼn tuʼn t-xi qtzaqʼweʼn toj tumel. In tzaj tqʼamaʼn Peter jlu, jun ansyan te Sudáfrica: «Aj ttzaj tqʼamaʼn jun xjal jun tiʼ nya toj tumel weye, in chin ximane tiʼj tiʼwtlo bʼant tuʼn Jesús». Ex tqʼamatl: «O txi nxnaqʼtzan wibʼe tuʼn miʼn tok nqʼoʼne nim woklene».

El tnikʼ Jesús tiʼj qa nya tzʼaqli qe xjal. Kyajtoq t-xnaqʼtzbʼen Jesús tuʼn t-xi kybʼinchaʼn aju bʼaʼn, pero at maj i el txalpaj tuʼnju aj il qe. Toj qonikʼen tej naʼmxtoq tkyim Jesús, xi tqanin te Pedro, Santiago ex Juan tuʼn t-xi kyqʼuqbʼaʼn tkʼuʼj, pero mintiʼ bʼant kyuʼn. Tuʼntzunju, xi tqʼamaʼn Jesús jlu kye: «Ax tok taj kyanmiye tuʼn kyxqʼuqine, atzun kyximlale mintiʼ tipun» (Mat. 26:40, 41). Noqtzun tuʼnj, mintiʼ tzaj tqʼoj Jesús kyiʼj tuʼnju el tnikʼ tiʼj qa aj il qe.

Qo yolin tiʼjju bʼaj tiʼj ermana Mandy. Ojtxe tgantoq tuʼn t-xi tqʼamaʼn kye txqantl tzeʼnxix tuʼn kybʼant qe tiʼchaq, atzun jaʼlo in nok tilil tuʼn tel tkanoʼn tiʼj Jesús tuʼn tok te mans. In tzaj tchikʼbʼaʼn jlu: «In nok tilil wuʼne tuʼn ttzaj nnaʼne qa qkyaqilx aj il qoʼ ex in nok nqʼoʼne nwitze kyiʼj tbʼanel tiʼchaq in bʼant kyuʼn txqantl ik tzeʼn te Jehová». Ok tilil tuʼn Mandy tuʼn ttzaj qʼaqʼin tkʼuʼj kyiʼj txqantl ik tzeʼn bʼant tuʼn Jesús. Qa ax jlu ma bʼant quʼn, mas nya kwest tuʼn qok te mans kyukʼil txqantl.

Kyaj tqʼoʼn Jesús qe tiʼchaq toj tqʼabʼ Dios. Tej tten twitz Txʼotxʼ, ok bʼinchaʼn nya bʼaʼn tiʼj, pero ikʼx tuʼn. Mintiʼ el kynikʼ xjal tiʼj, el ikʼun kyuʼn ex ok kykʼixbʼisaʼn. Maske ikju, kukx ok te mans ex «xi tqʼon tibʼ tuj tkwent Dios aju bʼinchalte tiʼj xtis tuj tumelxix» (1 Ped. 2:23). Ojtzqiʼntoq tuʼn Jesús qa kxqʼuqil Jehová tiʼj ex qa kbʼeltoq tqʼoʼn kykastiw qeju e ok bʼinchante nya bʼaʼn tiʼj toj jun ambʼil mas bʼaʼn.

Qa ma tzaj qqʼoj aj tok bʼinchaʼn jun nya bʼaʼn qiʼj, jaku kubʼ qbʼinchaʼn junjun tiʼchaq nya toj tumel ex jaku tzaj mas nya bʼaʼn. Tuʼntzunju in tzaj tqʼamaʼn Tyol Dios jlu qe: «Aju xjal jurat in jaw qʼojl, mintiʼ in tbʼinchaʼn aju tzʼaqlxix tuj twitz Dios» (Sant. 1:20). Axpe ikx qa at jun tiquʼn tuʼn ttzaj qqʼoj, jaku kubʼ qbʼinchaʼn jun tiʼ nya toj tumel tuʼnju aj il qoʼ.

Kubʼ t-ximen ermana Cathy te Alemania qa iltoq tiʼj tuʼn tok tilil tuʼn tuʼn tkolin tiʼjju at toklen tiʼj, tuʼnju qa mintiʼ ma bʼant tuʼn, mlay bʼant jlu tuʼn juntl te t-xel. Pero chʼexpaj tmod tej tok qeʼ tkʼuʼj tiʼj Jehová. Tqʼama jlu: «Ya nya il tiʼj tuʼn njaw qʼojine, jaʼlo mas nya kwest tuʼn woke te mans tuʼnju ojtzqiʼn wuʼne qa in keʼyin Jehová tiʼj tkyaqilju in bʼaj». Qa ma tzʼok bʼinchaʼn  jun nya bʼaʼn qiʼj, qeʼk qkʼuʼj tiʼj Jehová ik tzeʼn bʼant tuʼn Jesús ex atzun jlu kʼonil qiʼj tuʼn qok te mans.  

Tqʼama Jesús qa nim toklen tuʼn qok te mans tuʼntzun qtzalaj. Tqʼama jlu: «At tzalajbʼil kye qeju mans» (Mat. 5:5). Qo xnaqʼtzan tiʼj tzeʼn in nonin mod lu qiʼj toj qanqʼibʼil.

In nonin qiʼj tuʼn miʼn ttzaj nya bʼaʼn toj qmejebʼleʼn. Tqʼama ermano Robert te Australia jlu: «O txi nqʼamaʼne nim yol nya toj tumel te nxuʼjile ex nya ximen wuʼne. Pero aj t-xi nqʼamaʼne jlu tukʼil qʼoj, ya mlay bʼant jun tiʼ wuʼne. In kubʼtoq nnaʼne nim nya bʼaʼn aj tel nnikʼe tiʼj qa in tzaj tbʼis nxuʼjile tuʼnju otoq txi nqʼamaʼne».

Aj qyolin, nimku maj in qo el tzpet. Ex qa mintiʼ ma qo ximen tiʼj qyol aj t-xi qqʼamaʼn, jaku tzaj tiʼn jlu nim nya bʼaʼn toj qmejebʼleʼn (Sant. 3:2). Kyoj ambʼil lu, mas tbʼanel qa ma qo ok te mans tuʼnju kʼonil qiʼj tuʼn miʼn ttzaj qqʼoj ex tuʼn tok qxqʼuqin aju in xi qqʼamaʼn (Prov. 17:27).

Ok tilil tuʼn Robert tuʼn miʼn ttzaj tqʼoj ex tuʼn tjakʼunte tibʼ. ¿Oninpe jlu tiʼj? In tzaj tqʼamaʼn jlu: «Aj ttzaj jun nya bʼaʼn qxole tukʼil nxuʼjile, in nok tilil wuʼne tuʼn tok nqʼoʼn nwiʼye tiʼj tyol, tuʼn woke te mans ex tuʼn miʼn t-xi nqʼoʼne ambʼil tuʼn nkubʼe tuʼn qʼoj. Atzun jlu in nonin wiʼje tuʼn tten mas tbʼanel qxole».

In nonin qiʼj tuʼn tten mujbʼabʼil qxol kyukʼil txqantl. Kwest tuʼn kykanet kyamiw qeju jun rat in tzaj kyqʼoj. Atzun qeju mans, kukx in ten mujbʼabʼil kyxol (Efes. 4:2, 3). In tzaj tqʼamaʼntl Cathy jlu: «Noq tuʼnju in chin oke te mans, mas in chin tzalaje aj in tene kyukʼil txqantl xjal, axpe ikx kyukʼil qeju nyaxix bʼaʼn kymod».

In nonin qiʼj tuʼn tkubʼ qnaʼn bʼaʼn. In nok tmojbʼaʼn Xjan Uʼj aju «tnabʼl xjal at aju in tzaj tqʼoʼn Dios» tukʼilju tuʼn qok te mans ex tuʼn qten toj mujbʼabʼil (Sant. 3:13, 17). Qa mans jun xjal, ax ikx cheʼw twiʼ (Prov. 14:30). Tqʼama Martin jlu, aju ok tilil tuʼn tuʼn tok te mans: «Jaʼlo, ya mintiʼ in chin ok tene qʼamalte tuʼn t-xi kybʼinchaʼn txqantl aju wajbʼile ex mintiʼxix in tzaj nqʼoje. In nonin jlu wiʼje tuʼn tkubʼ nnaʼne bʼaʼn ex tuʼn ntzalaje».

Il-lo tiʼj tuʼn tok tilil quʼn tuʼn qok te mans. Tqʼama jun erman jlu: «Axpe ikx jaʼlo, at maj in tzaj pulin nchkʼele kyiʼj txqantl». Pero kʼonil Jehová qiʼj tuʼn qok te mans (Is. 41:10; 1 Tim. 6:11). A kbʼajel xnaqʼtzante qe ex tzul tqʼoʼn qipumal (1 Ped. 5:10). Iktzun tten jaku tzʼel qkanoʼn tiʼj Jesús tuʼn qok te mans ex te tbʼanel xjal ik tzeʼn bʼant tuʼn apóstol Pablo (2 Cor. 10:1).