1. ¿Alkye techel kyaj tqʼoʼn Jesús kywitz t-xnaqʼtzbʼen ex tiʼ bʼant kyuʼn? (Qʼonka twitza tiʼj tilbʼilal tok tiʼj t-xkʼomil).

TEJ tten Jesús tzalu twitz Txʼotxʼ, ten t-ximbʼetz toj tumel tiʼj pakbʼabʼil, ex ax jlu taj tuʼn tbʼant kyuʼn qeju in che ok lepeʼ tiʼj (Juan 4:35, 36). Tej tten kyukʼil t-xnaqʼtzbʼen, kukx e tzalaj tiʼj pakbʼabʼil (Luc. 10:1, 5-11, 17). Pero ya mintiʼ ok tilil kyuʼn tuʼn kypakbʼan tej ttzyet Jesús kyuʼn xjal ex tej tkubʼ bʼyoʼn (Juan 16:32). Tejtzun tjaw anqʼin Jesús, xi tqʼamaʼn kye tuʼn tok kyqʼoʼn kywiʼ tiʼj pakbʼabʼil. Ex tej otoqxi meltzʼaj Jesús toj kyaʼj, kukx ok tilil kyuʼn t-xnaqʼtzbʼen tuʼn kypakbʼan, tuʼntzunju kyqʼama aj qʼoj lu kyiʼj: «Ma kybʼi kykyaqil xjal aju kyxnaqʼtzbʼile tuj tkyaqil Jerusalén» (Hech. 5:28).

2. ¿Tzeʼn o tzaj tkʼiwlaʼn Jehová pakbʼabʼil?

² Kubʼ nej Jesús twitz pakbʼabʼil toj tnejel syent abʼqʼi ex noq tuʼnju e tzaj kʼiwlaʼn okslal tuʼn Jehová, nim xjal ok kybʼiʼn tbʼanel tqanil. Jun techel, toj Pentecostés te abʼqʼi 33, jaw aʼ kywiʼ junlo oxe mil xjal (Hech. 2:41). Ex kukx chʼiy kybʼet okslal (Hech. 6:7). Noqtzun tuʼnj, ax ikx kyaj tqʼamaʼn Jesús qa nim xjal kʼokel kybʼiʼn tbʼanel tqanil kyoj bʼajsbʼil tqʼijlalil (Juan 14:12; Hech. 1:8).

3, 4. a) ¿Tiquʼn at maj kwest tuʼn qpakbʼan kyoj junjun lugar? b) ¿Tiʼ kʼelel qnikʼ tiʼj toj xnaqʼtzbʼil lu?

³ Qkyaqilx in nok tilil quʼn tuʼn tten tbʼanel qximbʼetz tiʼj pakbʼabʼil. Kyoj junjun lugar, nya kwest tuʼn tbʼant jlu kyuʼn erman tuʼnju ateʼ nim xjal kyaj tuʼn kyxnaqʼtzan tiʼj Tyol Dios. At maj, ya mintiʼ in kanin ambʼil kyiʼj erman ex il tiʼj tuʼn t-xi kyqʼamaʼn kye xjal tuʼn kyyon. Atzun kyoj junjuntl lugar, at maj kwest tuʼn kytzalaj erman tiʼj pakbʼabʼil,  tuʼnju at maj mintiʼ in che kanet xjal kyuʼn, ex qatzun ma che kanet kyuʼn, at maj nya kyaj tuʼn tok kybʼiʼn Tyol Dios.

⁴ Qa atz in qo anqʼin jatumel kwest tuʼn tok kybʼiʼn xjal Tyol Dios, che onil nabʼil tkuʼx toj xnaqʼtzbʼil lu qiʼj. Qo xnaqʼtzal tiʼjju o bʼant kyuʼn junjun erman tuʼn kyyolin kyukʼil mas xjal ex tiquʼn jaku qo tzalaj tiʼj pakbʼabʼil maske mintiʼ in qo ok bʼiʼn kyuʼn xjal.

5. ¿Alkyeqe nya bʼaʼn in che ok weʼ junjun erman twitz?

⁵ Ateʼ nim erman kwest tuʼn kyyolin kyukʼil xjal toj kyja. ¿Tiquʼn? Tuʼnju ateʼ junjun xjal in che anqʼin kyoj edificio ex mintiʼ in bʼant tuʼn kyokx erman kyoj. Ax ikx, ateʼ junjun ja jatumel in che kubʼ ten xjal xqʼuqil ttzi pwert ex mintiʼ in xi kyqʼoʼn ambʼil tuʼn tokx alkyexku xjal. Atzun kyoj junjuntl lugar, jaku che pakbʼan erman ttzi kyja xjal, pero mintiʼ in che kanet nim xjal kyuʼn. Ex ateʼ nim erman in che pakbʼan kyoj aldea jatumel nya nim ja at. Bʼalo il tiʼj tuʼn t-xi kybʼetin nim tuʼn kypon toj jun ja, ajtzun in che pon, mintiʼ in che kanet xjal kyuʼn. Qa a jlu in bʼaj qiʼj, ¿tiʼ jaku bʼant quʼn tuʼn kukx qpakbʼan ex tuʼn kukx qjyon tumel tuʼn qyolin kyukʼil mas xjal?

6. ¿Tiquʼn chʼixme ik qpakbʼabʼil ik tzeʼn jun xjal in naqʼunan tuʼn kytzyet pescad?

⁶ Ok tmojbʼaʼn Jesús pakbʼabʼil tukʼil aqʼuntl te tzyul pescad (Mar. 1:17). Atlo maj mlay tzyet jun pescad tuʼn jun xjal, pero mintiʼ in kyaj ttzaqpiʼn taqʼun, sino kukx in nok tilil tuʼn. At maj in ximen tiʼj jatumel jaku che tzyet pescad tuʼn, alkye or ex tzeʼn jaku bʼant tuʼn. Ax jlu jaku bʼant quʼn toj pakbʼabʼil. Qo xnaqʼtzan kyiʼj junjun nabʼil.

7. ¿Tiʼ jaku bʼaj qa ma kubʼ qchʼixpuʼn or tuʼn qpakbʼan?

⁷ Qo ximen tiʼj alkye or jaku che kanet xjal quʼn. Jaku qo yolin kyukʼil mas xjal qa ma qo pakbʼan toj jun or jatumel jaku che kanet quʼn toj kyja. Bʼiʼn quʼn qa kykyaqil xjal in che meltzʼaj kyja. Ateʼ nim erman in che pakbʼan te qale moqa te qonikʼen tuʼnju mas in che kanet xjal kyuʼn. Ax ikx, bʼalo mas kyaj xjal tuʼn kyyolin tuʼnju otoq tzʼex bʼaj kyqʼij. Moqa jaku txi qbʼinchaʼn ik tzeʼn in bʼant tuʼn jun ansyan, aju David tbʼi. Aj tikʼ chʼin ambʼil t-xilen tzyet tuʼn kypakbʼan, in che meltzʼaj juntl maj kyoj ja jatumel mintiʼ otoq che etz xjal. Tqʼama ermano jlu: «In chin jaw labʼine tuʼnju nim xjal in che etz aj qmeltzʼaje juntl maj ttzi kyja». *

8. ¿Alkye tten jaku txi qbʼiʼn aju in tzaj tqʼamaʼn Eclesiastés 11:6 aj qpakbʼan?

⁸ Aju taqikʼ Tyol Dios jatumel xjatz xnaqʼtzbʼil lu, in tzaj tyekʼin qe qa nim toklen tuʼn kukx qjyon kyiʼj xjal (kjawil uʼjit Eclesiastés 11:6). Atzun jlu bʼant tuʼn ermano David, aju ma qo yolin tiʼj toj taqikʼ ma kyaj. Pon ambʼil tuʼn tkanet jun xjal tuʼn toj tja tej otoqxi tzʼok tilil tuʼn tuʼn tjyon kyiʼj. Tajtoq xjal tuʼn tel tnikʼ tiʼj Tyol Dios ex tqʼama jlu: «Ma tzikʼ junlo wajxaq abʼqʼi in chin anqʼine tzalu, ex tzma tnejel maj in nok nkeʼyine jun testigo de Jehová ttzi njaye». Tzaj tchikʼbʼaʼn ermano David jlu: «O tzʼel nnikʼe tiʼj qa nim xjal kyaj tuʼn tok kybʼiʼn tbʼanel tqanil aj in che kanet quʼn toj kyja».

9. ¿Tiʼ in bʼant kyuʼn junjun erman tuʼn kyyolin kyukʼil xjal mintiʼ in che kanet kyuʼn toj kyja?

 ⁹ Qo ximen tiʼj jatumel jaku qo pakbʼan. Ateʼ nim erman o tzʼok tilil kyuʼn tuʼn kypakbʼan kyoj junxichaq lugar tuʼntzun kyyolin kyukʼil xjal mintiʼ in che kanet kyuʼn toj kyja. Jun techel, in che pakbʼan erman kyoj kay ex kyukʼil yekʼbʼil uʼj tuʼntzun kyyolin kyukʼil xjal in che anqʼin kyoj edificio. Ex tbʼanel o tzʼok jlu tuʼnju mintiʼtoq in bʼant tuʼn kyyolin erman kyukʼil xjal lu. Ex o tzʼok kyqʼoʼn erman kywitz tiʼj qa mas in nok kybʼiʼn xjal tbʼanel tqanil ex mas in kyaj kyiʼn uʼj aj kypakbʼan kyoj parque, kyoj merkad ex kyoj kʼaẍjel. In tzaj tqʼamaʼn Floiran jlu, jun ansyan in bʼet kyojele Ja te Chmabʼil atz Bolivia: «In qoʼxe pakbʼal kyoj merkad ex kyoj kʼaẍjel a eso te la 1 moqa te las 3 te qale tuʼnju mas at ambʼil kyiʼj xjal. Chʼixmi tkyaqil maj in qo ok bʼiʼne kyuʼn xjal ex at maj in xi tzyet tuʼn qqʼone xnaqʼtzbʼil kye».

10. ¿Alkye junjuntl tumel jaku che ajbʼen quʼn tuʼn qpakbʼan kye kykyaqil xjal?

¹⁰ Qjyonx junjuntl tumel tzeʼn tuʼn qpakbʼan. Qo ximen tiʼj qa o tzʼok tilil quʼn tuʼn qyolin tukʼil jun xjal jun ex juntl maj. O qo ikʼ tja kyoj junxichaq or, pero mintiʼ in kanet quʼn. ¿Tiʼ jaku bʼant quʼn? In tzaj tqʼamaʼn jun ermana jlu, aju Katarína tbʼi: «In kubʼ ntzʼibʼine carta kye xjal mintiʼ in che kanet wuʼne kyja ex in kubʼ ntzʼibʼine aju jaku txi nqʼamaʼne kye ttzi kyja». ¿Tiʼ in tzaj t-xnaqʼtzaʼn jlu qe? Qa bʼaʼn tuʼn t-xi qjyoʼn junjuntl tumel tzeʼn tuʼn qpakbʼan kye kykyaqil xjal.

11. ¿Tiquʼn nya kyaj junjun xjal tuʼn tok kybʼiʼn tbʼanel tqanil?

¹¹ Ateʼ junjun xjal nya kyaj tuʼn tok kybʼiʼn tbʼanel tqanil. In kubʼ kyximen qa nya il tiʼj tuʼn tel kynikʼ tiʼj Dios nix tiʼj Tyol. Bʼalo mintiʼ in nok qeʼ kykʼuʼj tiʼj Dios tuʼnju at nim yajbʼil moqa mintiʼ in nok qeʼ kykʼuʼj tiʼj Tyol tuʼnju mintiʼ in xi kybʼinchaʼn nejenel kye okslabʼil aju in tzaj kyxnaqʼtzaʼn. Atzun junjuntl, mintiʼ in nel kynikʼ tiʼj qa jaku tzʼonin Tyol Dios kyiʼj tuʼnju oʼkx tok kywiʼ tiʼj kyaqʼun, kyiʼj toj kyja ex kyiʼj nya bʼaʼn in che ok weʼ twitz. ¿Tzeʼn jaku qo tzalaj tiʼj pakbʼabʼil maske mintiʼ in nok kyqʼoʼn xjal toklen tbʼanel tqanil?

12. ¿Alkye tten jaku kubʼ qqʼoʼn toj xnaqʼtzbʼil aju in tzaj tqʼamaʼn Filipenses 2:4 aj qpakbʼan?

¹² Bʼaʼn tuʼn tkubʼ qyekʼin kye xjal qa in qo ximen kyiʼj. Ateʼ nim xjal nya kyajtoq tuʼn tok kybʼiʼn tbʼanel tqanil. Noqtzun tuʼnj, ok kybʼiʼn tbʼanel tqanil tej tel kynikʼ tiʼj qa ax tok in che ximen erman kyiʼj (kjawil uʼjit Filipenses 2:4). Jun techel, in tzaj tqʼamaʼn ermano David jlu, aju ma qo yolin tiʼj: «Qa ma tzaj tqʼamaʼn jun xjal qa nya taj tuʼn tok tbʼiʼn tbʼanel tqanil, in kux qkʼuʼne Tyol Dios ex qe uʼj juntl maj, ex in nok tilil quʼne tuʼn tel qnikʼe tiʼj tiquʼn in tzaj tqʼamaʼn ikju». In nel kynikʼ xjal tiʼj qa ax tok in qo ximen kyiʼj. Bʼalo jaku tzikʼ tnaʼl kyuʼn tiʼ otoq txi qqʼamaʼn kye, pero mlayx tzikʼ tnaʼl kyuʼn aju qmod otoq kubʼ qyekʼin kyiʼj. Axpe ikx, qa mintiʼ ma tzaj kyqʼoʼn ambʼil tuʼn qyolin kyukʼil, jaku kubʼ qyekʼin qa in qo ximen kyiʼj tukʼilju alkye tten in xi qkeʼyin toj kywitz.

13. ¿Tiʼ jaku bʼant quʼn tuʼn qok bʼiʼn kyuʼn xjal?

¹³ Aj qyolin tiʼjju kyaj xjal tuʼn tok kybʼiʼn, atzun juntl tumel tuʼn tkubʼ qyekʼin qa in qo ximen kyiʼj. Jun techel, ¿in nokpe qqʼoʼn qwitz tiʼj qa ateʼ tkʼwal xjal? Bʼalo kyaj mambʼaj tuʼn tok kybʼiʼn consej jaku che onin kyiʼj kykʼwal moqa tzeʼn jaku che tzalaj kyukʼil toj kyja. ¿Yajtzun qa ma tzʼok qqʼoʼn qwitz tiʼj qa in najbʼen nim candado kyuʼn xjal? Jaku qo yolin kyukʼil qa in qo anqʼin toj jun ambʼil kwest tuʼnju ateʼ nim eleqʼ ex jaku txi qqʼamaʼn kye qa kpol ambʼil tuʼn tel tiʼn Dios tkyaqil nya bʼaʼn. Qa ma qo ok bʼiʼn kyuʼn xjal, qqʼonk tilil tuʼn tel kynikʼ tiʼj tzeʼn jaku tzʼonin Tyol Dios kyiʼj. In tzaj tqʼamaʼn Katarína jlu, aju ma qo yolin tiʼj toj taqikʼ lajaj: «In chin ximane tiʼj tzeʼn o tzʼonin axix tok wiʼje». Atzun jlu in nonin  tiʼj ermana tuʼn tpakbʼan tuʼn tkyaqil tkʼuʼj ex in nok kyqʼoʼn xjal kywitz tiʼj.

14. Ik tzeʼn in tzaj tqʼamaʼn Proverbios 27:17, ¿tzeʼn in nonin qiʼj aj qpakbʼan tukʼil juntl erman?

¹⁴ Bʼaʼn tuʼn ttzaj qkʼamoʼn onbʼil in tzaj kyqʼoʼn txqantl qe. Toj tnejel syent abʼqʼi, xi tqʼamaʼn apóstol Pablo te Timoteo tzeʼn onin kyiʼj xjal toj pakbʼabʼil ex tej t-xi tqʼoʼn xnaqʼtzbʼil kye, ex xi tqʼamaʼn te Timoteo tuʼn tbʼant axju tuʼn tuʼntzun tonin kyiʼj txqantl (1 Cor. 4:17). Ik tzeʼn bʼant tuʼn Timoteo, ax ikx qe jaku tzʼel qkanoʼn alkye tten in che pakbʼan txqantl erman (kjawil uʼjit Proverbios 27:17). Qo yolin tiʼjju bʼant tuʼn jun ermano Shawn tbʼi. Toj jun ambʼil, ajbʼen te precursor toj jun aldea jatumel in che tzalaj xjal tiʼj kyokslabʼil. ¿Tiʼ onin tiʼj tuʼn miʼn ttzaj bʼaj tkʼuʼj? In tzaj tqʼamaʼn jlu: «Qa jakutoq bʼant, in xiʼ juntl erman pakbʼal wukʼile. Akux in qo bʼete tuʼn qpone toj juntl ja, o yoline tiʼj tiʼ mas jaku bʼant quʼne tuʼn tbʼant-xix qpakbʼane. Jun techel, in tzaj qnaʼne aju otoq qo yoline tiʼj tukʼil jun xjal ex o ximane tiʼj tiʼ jaku txi qqʼamaʼne te juntl xjal qa ax jlu ma bʼaj qiʼje».

15. ¿Tiquʼn nim toklen tuʼn qnaʼn Dios naʼmxtoq qex pakbʼal?

¹⁵ Qqaninx onbʼil te Jehová. Qqaninx onbʼil te Jehová tkyaqil maj aj qex pakbʼal. Mlayx bʼant jun tiʼ quʼn qa mintiʼ ma tzʼonin xewbʼaj xjan qiʼj (Sal. 127:1; Luc. 11:13). Aj t-xi qqanin onbʼil te Jehová, qqʼamanx te tiʼxix onbʼil qaj. Jun techel, jaku txi qqanin te tuʼn tonin qiʼj tuʼn kykanet xjal at jun tbʼanel kyanmi ex kyaj tuʼn tok kybʼiʼn tbʼanel tqanil. Yajxitl, qqʼonk tilil tuʼn qpakbʼan kye kykyaqil xjal.

16. ¿Tiquʼn nim toklen tuʼn qxnaqʼtzan qjunalx tuʼntzun qtzalaj tiʼj pakbʼabʼil?

¹⁶ Qpaʼmil ambʼil tuʼn qxnaqʼtzan qjunalx. In tzaj tqʼamaʼn Tyol Dios jlu «[Bʼaʼn tuʼn tok kyojtzqiʼne] alkye tajbʼil Dios, tuʼn tel kynikʼe tiʼj alkye bʼaʼn, ex alkye in tzalaj Dios tiʼj ex alkye ju tzʼaqlxix» (Rom. 12:2). Qa ma tzʼok qeʼ qkʼuʼj tiʼj axix tok, ok qo yolil tiʼj tuʼn tkyaqil qanmi toj pakbʼabʼil. In tzaj tqʼamaʼn Katarína jlu: «El nnikʼe tiʼj qa iltoq tiʼj tuʼn tok qeʼ nkʼuʼje kyiʼj junjun xnaqʼtzbʼil nim kyoklen toj Tyol Dios. Tuʼntzunju, el npaʼne ambʼil tuʼn nxnaqʼtzane tiʼj tiquʼn in xi nnimane qa at jun bʼinchalte tkyaqil, qa te Dios t-xim tkuʼx toj Xjan Uʼj ex qa at jun kʼloj xjal in che kʼulin te». Tzaj tqʼamaʼn Katarína qa onin jlu tiʼj tuʼn tchʼiy qʼuqbʼil tkʼuʼj ex tuʼn ttzalaj mas tiʼj pakbʼabʼil.

17. ¿Tiquʼn ten tbʼanel t-ximbʼetz Jesús tiʼj pakbʼabʼil?

¹⁷ Kukx ten tbʼanel t-ximbʼetz Jesús tiʼj pakbʼabʼil ex kukx yolin kyukʼil xjal, maske ateʼ junjun mintiʼ ok kybʼiʼn tbʼanel tqanil. ¿Tiquʼn bʼant jlu tuʼn? Tuʼnju el tnikʼ tiʼj qa nim toklen tuʼn tok kyojtzqiʼn xjal axix tok ex tajtoq tuʼn tonin kyiʼj. Ex ojtzqiʼntoq tuʼn qa kʼokel kybʼiʼn junjun xjal tbʼanel tqanil, maske otoq tzʼel kyikʼen. Atzun jlu bʼaj kyiʼj toj tja. Ni jun titzʼin ok te t-xnaqʼtzbʼen tej tpakbʼan kyoj qeju oxe abʼqʼi tukʼil mij (Juan 7:5). Pero xi kyokslaʼn Jesús tej tjaw anqʼin (Hech. 1:14).

18. ¿Tiquʼn kukx in qo pakbʼan?

¹⁸ Mintiʼ ojtzqiʼn quʼn alkyeqe xjal jaku tzʼok kybʼiʼn tbʼanel tqanil. Ateʼ junjun xjal in xi tiʼn ambʼil tuʼn tok kybʼiʼn axix tok. Axpe ikx, jaku tzʼok kyqʼoʼn xjal kywitz tiʼj tbʼanel qmod ex tiʼj tbʼanel qximbʼetz maske nya kyaj tuʼn tok kybʼiʼn  tbʼanel tqanil. Aj tbʼet ambʼil, jaku jaw «kynimsaʼn tbʼi Dios» (1 Ped. 2:12).

19. Ik tzeʼn in tzaj tqʼamaʼn 1 Corintios 3:6 ex 7, ¿tiʼ bʼaʼn tuʼn ttzaj qnaʼn?

¹⁹ In qo onin tuʼn tkux awet axix tok toj kyanmi xjal ex in xi qqʼoʼn xnaqʼtzbʼil kye, pero bʼaʼn tuʼn ttzaj qnaʼn qa a Dios in chʼiysante (kjawil uʼjit 1 Corintios 3:6, 7). In tzaj tqʼamaʼn jun ermano te Etiopía jlu, aju Getahun tbʼi: «Kyoj mas te 20 abʼqʼi, oʼkx qine ok te testigo de Jehová toj jun lugar jatumel noq junjun maj in che pon erman pakbʼal. Atzun jaʼlo, at 14 pakbʼal, o jaw aʼ kywiʼ 13, kyxol jlu at nxuʼjile ex qe oxe qkʼwale. Atzun kyoj chmabʼil in che ten junlo 32 xjal». In tzalaj ermano Getahun tuʼnju kukx ok tilil tuʼn tuʼn tpakbʼan ex tuʼnju ayon tukʼil pasens tuʼn ttzaj tiʼn Jehová qe xjal toj ttnam (Juan 6:44).

20. ¿Tiquʼn in qo ok ik tzeʼn jun kʼloj xjal in cheʼx onil aj ttzaj qotxʼ?

²⁰ Nim toklen kychwinqlal kykyaqil xjal toj twitz Jehová. In tzaj tqʼoʼn qoklen tuʼn qonin tukʼil Tkʼwal tuʼn kyok xjal te junxichaq nasyon te tmajen naʼmxku tul xitbʼil (Ageo 2:7). Aj in qo pakbʼan, in qo ok ik tzeʼn jun kʼloj xjal in che onin tuʼn kyetz xjal otoq che kyaj tjaqʼ qotxʼ. Maske oʼkx junjun xjal in che klet kyuʼn qeju in che pon onil, nim toklen kyaqʼun in bʼant. Ax jlu in bʼaj toj pakbʼabʼil. Mintiʼ ojtzqiʼn quʼn jteʼ xjal jaku che etz tjaqʼ tkawbʼil Satanás. Noqtzun tuʼnj, jaku tzʼajbʼen alkyexku erman tuʼn Jehová tuʼn tonin kyiʼj. In tzaj tqʼamaʼn Andreas jlu, aju in nanqʼin atz Bolivia: «Aj tel tnikʼ jun xjal tiʼj axix tok ex aj tjaw aʼ twiʼ, ojtzqiʼn wuʼne qa otoq bʼant jlu noq tuʼnju otoq che onin nim erman». Tuʼntzunju, tzʼok tilil quʼn tuʼn tten tbʼanel qximbʼetz tiʼj pakbʼabʼil. Qa ma bʼant jlu quʼn, qo tzajel tkʼiwlaʼn Jehová ex qo tzalajel tiʼj pakbʼabʼil.