1, 2. ¿Alkyeqe nya bʼaʼn in che ok weʼ tmajen Jehová twitz?

XI TQʼAMAʼN apóstol Pablo te Timoteo tuʼn kukx tok tilil tuʼn tuʼn tpakbʼan, ex axju taj tuʼn tbʼant kyuʼn kykyaqil okslal (2 Tim. 4:5). Qkyaqilx in nok tilil quʼn tuʼn t-xi qbʼiʼn aju tqʼama Pablo, pero at maj kwest tuʼn tbʼant quʼn. Ateʼ nim erman in nok tilil kyuʼn tuʼn tten kyipumal tuʼn kyex pakbʼal (2 Tim. 4:2). Qo ximen kyiʼj erman in che anqʼin toj jun lugar jatumel o tzʼel qʼiʼn ambʼil qe tuʼn qpakbʼan. Aj kypakbʼan erman lu, jaku che ex qʼiʼn toj cárcel.

² In che ok weʼ tmajen Jehová twitz nim nya bʼaʼn ex jaku tzaj bʼaj kykʼuʼj tuʼn. Ateʼ nim erman in che aqʼunan nim or tuʼntzun kykʼaʼchit toj kyja. Kyaj tuʼn kypakbʼan mas ambʼil, pero aj tkubʼaj seman, ya otoq che sikt ex ya mintiʼ kyipumal. Atzun junjuntl, mintiʼ in che ajbʼen nim ambʼil te Jehová tuʼn tpaj jun yabʼil moqa tuʼnju o che tijen, axpe ikx, ateʼ junjun mintiʼ in bʼant tuʼn kyetz toj kyja. Ax ikx, ateʼ erman in nok tilil kyuʼn tuʼn miʼn tkubʼ kyximen qa mintiʼ kyajbʼen. In tzaj tqʼamaʼn jun ermana te Oriente Medio jlu, aju Mary tbʼi: * «In nok tilil wuʼne tuʼn miʼn tten nximbʼetze nya toj tumel, pero nim in chin sikte tuʼn. Tibʼajxi jlu, in kubʼ nnaʼne qa aʼyine at tpaj tuʼnju otoq tzʼel tiʼn ambʼil wiʼje ex otoq tzʼel tiʼn wipumale tuʼn npakbʼane».

3. ¿Tiʼ qo xnaqʼtzal tiʼj toj xnaqʼtzbʼil lu?

³ In tzaj tqʼoʼn Jehová qipumal tuʼntzun qex twitz alkyexku nya bʼaʼn in qo ok weʼ twitz. Tuʼn jlu, kukx jaku qo ajbʼen te maske nya nim in bʼant quʼn. Toj xnaqʼtzbʼil lu, kʼelel  qnikʼ tiʼj alkye tten in nonin Jehová qiʼj. Pero tnejel, qo xnaqʼtzan tiʼj tzeʼn onin Jehová tiʼj Pablo ex tiʼj Timoteo maske e ok weʼ twitz nya bʼaʼn.

4. ¿Tiʼ nya bʼaʼn ok weʼ Pablo twitz?

⁴ Ikʼ apóstol Pablo toj nim nya bʼaʼn. Tajtoq tuʼn tten tipumal, mas tej tok bʼyoʼn kyuʼn xjal, tej tok xoʼn abʼj tiʼj ex tej tokx qʼoʼn toj cárcel (2 Cor. 11:23-25). Mintiʼ tzaj bʼaj tkʼuʼj tej t-xi tqʼamaʼn qa at maj ok tilil tuʼn tuʼn tten tbʼanel t-ximbʼetz (Rom. 7:18, 19, 24). Ax ikx, kubʼsan twitz Jehová tuʼn tel tiʼn jun kʼixkʼoj tiʼj, aju ok tqʼoʼn «ik tzaʼn jun chʼiʼx» (2 Cor. 12:7, 8).

5. ¿Tiʼ bʼant tuʼn Pablo maske ok weʼ kywitz nya bʼaʼn?

⁵ Xi tqʼoʼn Jehová tipumal Pablo tuʼn kukx tpakbʼan maske ok weʼ kywitz nya bʼaʼn. Qo ximen tiʼj tkyaqilju bʼant tuʼn. Jun techel, akux attoq pres toj jun ja toj tnam Roma, ok tilil tuʼn tuʼn tpakbʼan kye nimku xjal. Pakbʼan kye nejenel kye aj Judiy ex bʼalo pakbʼan kye junjun xjal at kyoklen toj jun kawbʼil (Hech. 28:17; Filip. 4:21, 22). Ax ikx pakbʼan kye soldad e xqʼuqin tiʼj ex kye qeju e pon visitaril te (Hech. 28:30, 31; Filip. 1:13). Ex tojx ambʼil aju, ajbʼen Pablo tuʼn Jehová tuʼn tkubʼ ttzʼibʼin junjun carta tuʼntzun t-xi tqʼuqbʼaʼn kykʼuʼj okslal, ex aʼyex uʼj lu in che onin kyiʼj erman toj ambʼil jaʼlo. Noq tuʼn techel kubʼ tqʼoʼn apóstol Pablo, chʼiy qʼuqbʼil kykʼuʼj okslal te Roma ex mintiʼ e tzaj xobʼ tej tok «tilil kyuʼn tuʼn t-xi kymaʼn tyol Dios» (Filip. 1:14). Mintiʼ bʼant tkyaqilju tajtoq Pablo tuʼn tbʼant tuʼn, pero xi tbʼinchaʼn aju jakutoq bʼant tuʼn. Tuʼntzunju, tqʼama jlu: «Tkyaqilju ma bʼaj wiʼje ma tzʼajbʼen tuʼn tel laqʼeʼ mastl tqanil kolbʼil» (Filip. 1:12).

6. Ik tzeʼn in tzaj tqʼamaʼn 2 Corintios 12:9 ex 10, ¿tiʼ onin tiʼj Pablo tuʼn kukx tpakbʼan?

⁶ El tnikʼ Pablo tiʼj qa nya tuʼnx tipumal bʼant tkyaqil aqʼuntl tuʼn toj pakbʼabʼil, sino tuʼnju tzaj tqʼoʼn Jehová tipumal. Tuʼntzunju, kubʼ ttzʼibʼin qa tzaj qʼoʼn tipumal tuʼn Jehová tej tkubʼ tnaʼn qa mintiʼ tipun (kjawil uʼjit 2 Corintios 12:9, 10). Ajbʼen xewbʼaj xjan tuʼn Jehová tuʼn t-xi tqʼoʼn tipumal apóstol Pablo tuʼn kukx tpakbʼan tej tok weʼ twitz ikʼbʼil, tej  tokx qʼoʼn toj cárcel ex tej tok weʼ twitz junjuntl nya bʼaʼn.

7. ¿Alkyeqe nya bʼaʼn ok weʼ Timoteo twitz tej tpakbʼan?

⁷ Ax ikx, onin xewbʼaj xjan tiʼj Timoteo tuʼn kukx tpakbʼan. Jun techel, bʼet tukʼil apóstol Pablo tej tajbʼen te misionero. Ex xi samaʼn tuʼn Pablo tuʼn t-xiʼ visitaril junjun kʼloj okslal ex tuʼn t-xi tqʼuqbʼaʼn kykʼuʼj erman (1 Cor. 4:17). Kubʼlo t-ximen Timoteo qa mlayxtoq bʼant tkyaqil aqʼuntl lu tuʼn. Bʼalo tuʼn jlu xi tqʼamaʼn Pablo te: «Miʼn taqʼa ambʼil tuʼn tel ikʼuna kyuʼn okslal tuʼnju kuʼxuna» (1 Tim. 4:12). Toj ambʼil aju, ax ikx ok weʼ Timoteo twitz junjun nya bʼaʼn tuʼnju in tzaj tqʼamaʼn Tyol Dios qa nim maj tzaj yabʼil tiʼj (1 Tim. 5:23). Noqtzun tuʼnj, ojtzqiʼntoq tuʼn Timoteo qa kʼonil xewbʼaj xjan tiʼj tuʼn tten tipumal tuʼn kukx tpakbʼan ex tuʼn tonin kyiʼj erman (2 Tim. 1:7).

8. ¿Tzeʼn in tzaj tqʼoʼn Jehová qipumal toj ambʼil jaʼlo?

⁸ Toj ambʼil jaʼlo, a «Dios in tzaj qʼonte nimxix qipumal» tuʼn kukx qajbʼen te (2 Cor. 4:7). Qo xnaqʼtzan tiʼj kyaje onbʼil o tzaj tqʼoʼn Jehová qe tuʼn kukx tten qipumal ex tuʼn kukx qajbʼen te. Tnejel, aju naʼj Dios, tkabʼin, aju Xjan Uʼj, toxin, qe erman ex tkyajin, aju pakbʼabʼil.

9. ¿Tzeʼn in nonin naʼj Dios qiʼj?

⁹ Aju naʼj Dios. Tqʼama Pablo jlu toj Efesios 6:18: «Che naʼne Dios tkyaqil qʼij». Qa ma bʼant jlu quʼn, tzul tqʼoʼn Jehová qipumal. Kubʼ tnaʼn Jonnie, aju in nanqʼin Bolivia qa onin Jehová tiʼj tej tok weʼ twitz nim nya bʼaʼn. Junx tzaj yabʼil tiʼj tman, tiʼj ttxuʼ ex tiʼj t-xuʼjil. Kwest ela toj twitz tuʼn t-xqʼuqin kyiʼj. Kyim ttxuʼ, ex xi tiʼn ambʼil tuʼn tel yabʼil tiʼj tman ex tiʼj t-xuʼjil. In tzaj tnaʼn Jonnie jlu: «Tej nsikte, nim onin wiʼje tej t-xi nqʼamaʼne te Jehová tiʼxix in kubʼ nnaʼne». Xi tqʼoʼn Jehová tipumal tuʼn tikʼx tuʼn. Tojx tnam Bolivia, in nanqʼin jun ansyan Ronald tbʼi ex ok tbʼiʼn qa attoq cáncer tiʼj ttxuʼ, ex kyim tej tikʼ jun xjaw. ¿Tiʼ onin tiʼj Ronald tuʼn tex twitz nya bʼaʼn? Tqʼama jlu: «In nonin naʼj Dios wiʼje tuʼn t-xi nqʼamaʼne tkyaqilju tkuʼx toj wanmiye te Jehová. Bʼiʼn wuʼne qa ojtzqiʼnxix qine tuʼn». At maj jaku kubʼ qnaʼn qa in qo sikt ex at maj mintiʼ ojtzqiʼn quʼn tiʼ jaku txi qqʼamaʼn te Jehová toj qnaʼj Dios. Noqtzun tuʼnj, in tzaj tqʼoʼn txokbʼil qiʼj tuʼn qyolin tukʼil maske mintiʼ ojtzqiʼn quʼn tiʼ kxel qqʼamaʼn (Rom. 8:26, 27).

10. Ik tzeʼn in tzaj tqʼamaʼn Hebreos 4:12, ¿tiquʼn nim toklen tuʼn quʼjin tiʼj Tyol Dios ex tuʼn qximen tiʼj?

¹⁰ Aju Xjan Uʼj. Ik tzeʼn bʼant tuʼn apóstol Pablo, ax ikx qe jaku jaw quʼjin Tyol Dios tuʼntzun tten qipumal (Rom. 15:4). Aj tjaw quʼjin jun txʼolbʼabʼil ex aj qximen tiʼj, jaku tzʼajbʼen xewbʼaj xjan tuʼn Jehová tuʼn tonin qiʼj (kjawil uʼjit Hebreos 4:12). In tzaj tqʼamaʼn Ronald jlu, aju ma qo yolin tiʼj toj taqikʼ ma kyaj: «In chin tzalaje tuʼnju o chin naqʼete tuʼn tjaw wuʼjine Tyol Dios tkyaqil qonikʼen. In chin ximane kyiʼj tmod Jehová ex tiʼj tkʼujlabʼil in kubʼ tyekʼin kyiʼj tmajen. In nonin jlu wiʼje tuʼn tten wipumale».

11. ¿Tzeʼn onin Tyol Dios tiʼj jun ermana tuʼn tikʼx bʼis tuʼn?

¹¹ Qa ma qo ximen tiʼjju in jaw quʼjin toj Tyol Dios, jaku tzʼonin qiʼj tuʼn tten qximbʼetz toj tumel kyiʼj nya bʼaʼn in qo ok weʼ kywitz. Qo xnaqʼtzan tiʼjju bʼaj tiʼj jun  ermana otoq kyim tchmil. Xi tqʼamaʼn jun ansyan te tuʼn tjaw tuʼjin uʼj te Job ex xi tqʼamaʼn te qa kʼoniltoq uʼj lu tiʼj. Tej tjaw tuʼjin, kubʼ t-ximen qa nya toj tumel aju otoq tqʼama Job. Ikʼ jlu toj t-ximbʼetz: «Job, oʼkx in nok tqʼoʼna twiʼya kyiʼj nya bʼaʼn in che tzaj tiʼja». Pero el tnikʼ tiʼj qa axju bʼaj tiʼj ik tzeʼn te Job. Onin jlu tiʼj tuʼn tchʼexpaj t-ximbʼetz ex tuʼn tten tipumal tuʼn tikʼx bʼis tuʼn.

12. ¿Tzeʼn in che ajbʼen erman tuʼn Jehová tuʼn tonin qiʼj?

¹² Qe erman. Ax ikx in che ajbʼen erman tuʼn Jehová tuʼn ttzaj tqʼoʼn qipumal. Kubʼ ttzʼibʼin Pablo qa tajtoq tuʼn tok tkeʼyin qe erman tuʼntzun tbʼaj kyqʼuqbʼaʼn kykʼuʼj kyxolx (Rom. 1:11, 12). Tgan Mary, aju ma qo yolin tiʼj toj taqikʼ 2, tuʼn tten kyukʼil txqantl erman. Tqʼama jlu: «O che ajbʼen erman tuʼn Jehová tuʼn tonin wiʼje maske mintiʼ ojtzqiʼn kyuʼn tiʼ in bʼajtoq wiʼje. Tzaj kyqʼamaʼn tbʼanel yol weye moqa tzaj kysamaʼn jun tarjeta weye ex atzun onbʼil lu wajtoqe. Ax ikx, o tzʼonin wiʼje aj nyoline kyukʼil ermana ax nya bʼaʼn o tzikʼ kyiʼj ik tzeʼn weye. Ex kukx in che onin ansyan wiʼje tuʼn tkubʼ nnaʼne qa at woklene toj kʼloj okslal».

13. ¿Alkye tten jaku bʼaj qqʼuqbʼaʼn qkʼuʼj kyoj chmabʼil?

¹³ Jaku bʼaj qqʼuqbʼaʼn qkʼuʼj kyoj chmabʼil. Aj qten kyoj chmabʼil, jaku txi qqʼoʼn chjonte tiʼj aqʼuntl in bʼant kyuʼn erman ex jaku txi qqʼamaʼn kye qa kʼujlaʼn qe quʼn. Jun techel, tej naʼmxtoq t-xi tzyet chmabʼil, xi tqʼamaʼn jun ansyan Peter tbʼi jlu te jun ermana mintiʼ in najbʼen tchmil te Jehová: «Mintiʼ bʼiʼn tuʼna tzeʼn in nonin qiʼje aj tok qqʼoʼn qwitze tiʼja ata tzalu toj chmabʼil. Kukx in che ul tiʼna qeju qaq tala tukʼila ex bʼinchaʼn kyten tuʼn t-xi kyqʼoʼn jun kyyol». Jaw oqʼ ermana tej t-xi qʼamaʼn jlu te ex xi ttzaqʼweʼn jlu: «Atzun jlu wajtoqe tuʼn tok nbʼiʼne».

14. ¿Tzeʼn in nonin pakbʼabʼil qiʼj?

¹⁴ Aju pakbʼabʼil. In nonin pakbʼabʼil qiʼj tuʼn qtzalaj ex tuʼn tchewix qkʼuʼj maske mintiʼ in qo ok bʼiʼn kyuʼn xjal (Prov. 11:25). Atzun jlu el tnikʼ jun ermana tiʼj, aju Stacy tbʼi. Tzaj nim tbʼis tej tex lajoʼn jun toj tja toj ttnam Jehová. Kukx ximen tiʼj qa at jun tiʼ mintiʼ otoq bʼant tuʼn tuʼn tonin tiʼj. Kwest ok tqʼoʼn twiʼ kyiʼj junjuntl tiʼchaq. ¿Tiʼ onin tiʼj tuʼn tex twitz nya bʼaʼn lu? Onin pakbʼabʼil tiʼj. Tej tex pakbʼal, ok tqʼoʼn twiʼ kyiʼj xjal kyajtoq onbʼil. Tqʼama jlu: «Toj ambʼil aju, onin Jehová wiʼje tuʼn tkanet jun xjal tajtoq tuʼn t-xnaqʼtzan wukʼile tiʼj Tyol Dios ex jun rat chʼiy toj tokslabʼil. Nimxix onin jlu wiʼje. Aj in chin exe pakbʼal, atzun jlu mas in nonin wiʼje».

15. ¿Tiʼ xnaqʼtzbʼil jaku tzʼel qiʼn tiʼjju tqʼama Mary?

¹⁵ Bʼalo jaku kubʼ qnaʼn qa mlay qo pakbʼan nim ambʼil tuʼn tpaj junjun tiʼchaq in qo ikʼ toj. Pero bʼaʼn tuʼn ttzaj qnaʼn qa in tzalaj Jehová tiʼjju in bʼant quʼn. Tej t-xiʼ Mary toj juntl kʼloj okslal, aju ma qo yolin tiʼj, kubʼ tnaʼn qa mintiʼxix in nonin kyiʼj erman tuʼnju in che yolin toj juntl yol. Tqʼama jlu: «Toj jun ambʼil, mintiʼtoq in bʼant nyoline toj kyyol xjal, tuʼntzunju, oʼkx xi nqʼoʼne jun tratado kye, xi nqʼamaʼne junjun nyole kye moqa oʼkx jaw wuʼjine jun taqikʼ Tyol Dios kye». Kubʼ tnaʼn Mary qa mintiʼtoq in nonin tuʼnju mintiʼtoq in bʼant tyolin toj kyyol xjal. Noqtzun tuʼnj, kubʼ tchʼexpuʼn t-ximbʼetz tej tel tnikʼ tiʼj qa jaku tzʼajbʼen tuʼn Jehová maske mintiʼxix in bʼant yol tuʼn. In tzaj tqʼamaʼn jlu: «Tbʼanelxix aju in tzaj  t-xnaqʼtzaʼn Tyol Dios ex nya kwest tuʼn tel kynikʼ xjal tiʼj. Ax ikx, jaku chʼexpaj kyanqʼibʼil tuʼn».

16. ¿Tiʼ jaku tzʼonin kyiʼj erman mintiʼ in che etz toj kyja?

¹⁶ Qa mintiʼ in bʼant tuʼn qex toj qja ex qaj tuʼn qpakbʼan, in keʼyin Jehová tiʼj jlu ex in nok tqʼoʼn toklen. Jaku tzʼonin qiʼj tuʼn qpakbʼan kye qeju in che xqʼuqin qiʼj moqa kye doctor. Jakulo tzaj qbʼis qa ma tzʼok qmojbʼaʼn aju in bʼant quʼn jaʼlo tukʼilju bʼant quʼn ojtxe. Pero qa ma qo ximen tiʼj tzeʼn in nonin Jehová qiʼj jaʼlo, kukx jaku qo tzalaj ex jaku tzikʼx alkyexku nya bʼaʼn quʼn.

17. Ik tzeʼn in tzaj tqʼamaʼn Eclesiastés 11:6, ¿tiquʼn kukx qo pakbʼal maske yaj in nok qqʼoʼn qwitz tiʼj qaqʼunbʼen?

¹⁷ Mintiʼ ojtzqiʼn quʼn tzeʼn jaku chʼiy axix tok toj kyanmi xjal (kjawil uʼjit Eclesiastés 11:6). Jun techel, jun ermana qʼiʼn mas te 80 abʼqʼi tuʼn, aju Barbara tbʼi, in pakbʼan toj teléfono ex kyoj carta. Tej t-xi tsamaʼn jun carta, ax ikx kux tqʼoʼn uʼj La Atalaya te 1 te marzo te 2014 toj. Toj uʼj lu, tkuʼx jun xnaqʼtzbʼil tok tbʼi «¿Qué ha hecho Dios por usted?». Mintiʼtoq ojtzqiʼn tuʼn ermana qa atz tuʼn tpon tukʼil jun mejebʼleʼn otoq chewix toj tokslabʼil. Jaw tuʼjin mejebʼleʼn revista jun ex juntl maj. Kubʼ tnaʼn chmilbʼaj qa a Jehová in yolin tukʼil. Xi tzyet tuʼn kybʼet juntl maj kyoj chmabʼil, ex tej tikʼ ambʼil xi tzyet tuʼn kyajbʼen juntl maj te Jehová maske e chewix 27 abʼqʼi toj kyokslabʼil. Jaku txi qqʼamaʼn qa kubʼ tnaʼn Barbara nim tzalajbʼil tiʼjju otoq bʼant tuʼn. Bʼaj tkyaqil jlu noq tuʼn jun carta xi tsamaʼn.

18. ¿Tiʼ jaku bʼant quʼn tuʼn ttzaj tqʼoʼn Jehová qipumal?

¹⁸ Ik tzeʼn ma tzʼel qnikʼ tiʼj, at nim tumel tzeʼn in nonin Jehová qiʼj tuʼn ttzaj tqʼoʼn qipumal. Che ajbʼenx tbʼanel onbʼil o tzaj tqʼoʼn qe, ik tzeʼn naʼj Dios, Xjan Uʼj, qe erman ex pakbʼabʼil. Qa ma bʼant jlu quʼn, kbʼel qyekʼin qa qʼuqli qkʼuʼj tiʼj qa taj Jehová tuʼn tonin qiʼj ex qa at tipumal tuʼn tbʼant tuʼn. Qo jyon onbʼil tukʼil Jehová tuʼnju in tzaj «tqʼoʼn kyipun qeju axix tok nnoʼk qeʼ kykʼuʼj tiʼj» (2 Crón. 16:9).