1. Ik tzeʼn in tzaj tqʼamaʼn uʼj te Apocalipsis, ¿tiʼ in bʼant tuʼn Satanás kyiʼj tmajen Dios?

 IN TZAJ tyekʼin uʼj te Apocalipsis qa ya in kawin Tkawbʼil Dios toj kyaʼj ex qa o kutz xoʼn Tajaw il twitz Txʼotxʼ (Apoc. 12:1-9). Tej tbʼaj jlu, e tzalaj qeju in che anqʼin toj kyaʼj, atzun kye xjal twitz Txʼotxʼ, tzaj mas nya bʼaʼn kyiʼj. ¿Tiquʼn? Tuʼnju tzaj tqʼoj Satanás ex in nok tbʼinchaʼn nya bʼaʼn kyiʼj tmajen Dios in che anqʼin tzalu twitz Txʼotxʼ (Apoc. 12:12, 15, 17).

2. ¿Tiʼ jaku bʼant quʼn tuʼn kukx qajbʼen te Jehová?

² ¿Tiʼ jaku bʼant quʼn tuʼn kukx qajbʼen te Jehová maske in nok tzoqpaj Satanás qiʼj? (Apoc. 13:10). Jun tiʼ jaku tzʼonin qiʼj, aju qa ma tzʼel qnikʼ tiʼjju kbʼajel toj ambʼil tzul. Jun techel, in tzaj tqʼamaʼn apóstol Juan toj uʼj te Apocalipsis alkye junjun kʼiwlabʼil che ul qkʼamoʼn. Kyxol qe kʼiwlabʼil lu, che kbʼel najsaʼn qe aj qʼoj tiʼj Dios. Qo xnaqʼtzan tiʼjju in tzaj tqʼamaʼn uʼj te Apocalipsis kyiʼj ex tiʼjju kbʼajel kyiʼj.

3. ¿Alkye junjun techel in yolin uʼj te Apocalipsis tiʼj?

³ In tzaj tqʼamaʼn tnejel versículo te Apocalipsis qa in yolin uʼj lu kyiʼj techel (Apoc. 1:1, TNM). Aj tyolin uʼj lu kyiʼj aj qʼoj tiʼj Dios, in najbʼen junjun techel kyiʼj txkup tuʼn. Jun techel, in tzaj tqʼamaʼn qa «jatz jun txkup tuj mar at wuq twiʼ ex laj tcach» (Apoc. 13:1). Ax ikx, in tzaj tqʼamaʼn qa jatz «juntl txkup [...] twitz txʼotxʼ». In yolintoq ik  tzeʼn jun dragón ex «in kuʼtz qʼaqʼ tuʼn twitz kyaʼj» (Apoc. 13:11-13). Ex in tzaj tqʼamaʼntl qa at juntl «txkup kyaq tiʼj» ex in jax qeʼ jun prostituta tibʼaj. Aqeju oxe txkup lu, in kubʼ kyechlaʼn qe aj qʼoj tiʼj Jehová ex in nel kyikʼun Tkawbʼil. Tuʼntzunju, nim toklen tuʼn tel qnikʼ kyiʼj (Apoc. 17:1, 3).

4, 5. ¿Tzeʼn in nonin Daniel 7:15 a 17 qiʼj tuʼn tel qnikʼ kyiʼj techel in yolin uʼj te Apocalipsis tiʼj?

⁴ Naʼmxtoq qyolin kyiʼj aj qʼoj tiʼj Dios, nim toklen tuʼn tel qnikʼ kyiʼj techel lu. Tuʼntzunju, bʼaʼn tuʼn t-xi qqʼoʼn ambʼil te Tyol Dios tuʼn ttzaj tchikʼbʼaʼn qe. Chʼixme kykyaqil techel in yolin uʼj te Apocalipsis tiʼj, ya in tzaj qʼamaʼn kyoj junjuntl plaj Tyol Dios. Jun techel, tqʼama profeta Daniel jlu tej otoq tzʼok tkeʼyin jun witzikʼ: «Minabʼen o wile kyaje nintz txkup [...] e jatz tuj mar» (Dan. 7:1-3). Ex in tzaj tqʼamaʼn Daniel qa in kubʼ kyechlaʼn txkup lu kyaje aj kawil moqa tnam (kjawil uʼjit Daniel 7:15-17). Tuʼn jlu, jaku tzʼel qnikʼ tiʼj qa ax ikx in yolin uʼj te Apocalipsis kyiʼj aj kawil aj tyolin kyiʼj txkup.

⁵ Qo xnaqʼtzan kyiʼj junjun techel in yolin uʼj te Apocalipsis tiʼj. Tuʼn tel qnikʼ kyiʼj techel lu, kʼonil Tyol Dios qiʼj. Tnejel, qo xnaqʼtzal kyiʼj qeju txkup ex kʼelel qnikʼ tiʼj tiʼ in kubʼ kyechlaʼn. Yajxitl, qo yolil tiʼjju kbʼajel kyiʼj txkup lu. Te bʼajsbʼil, qo yolil kyiʼj junjun xnaqʼtzbʼil jaku tzʼel qnikʼ tiʼj.

6. ¿Alkye in kubʼ techlaʼn txkup at wuq twiʼ in yolin Apocalipsis 13:1 a 4 tiʼj?

⁶ ¿Alkye in kubʼ techlaʼn txkup at wuq twiʼ? (Kjawil uʼjit Apocalipsis 13:1-4). In tzaj tqʼamaʼn Tyol Dios qa ik keʼyin txkup lu ik tzeʼn jun leopardo, qa in che ok tqan ik tzeʼn tqan jun oso, qa ik ttziʼ ik tzeʼn te jun león ex qa at lajaj tkach. Noq oʼkx jun txkup in yolin uʼj te Apocalipsis tiʼj, pero chʼixme ik keʼyin ik tzeʼn qe kyaje txkup in yolin capítulo 7 te Daniel tiʼj. Mintiʼ in kubʼ techlaʼn txkup lu jun aj kawil moqa oʼkx jun tnam. Ex in tzaj tqʼamaʼn uʼj te Apocalipsis qa «xi qʼoʼn toklen tuʼn tkawin kyibʼaj kykyaqil kyiyjil xjal, ex kykyaqil tnam, ex kykyaqil kʼloj xjal junxilchaq kyyol, ex kykyaqil nasyon». Tuʼn jlu, in nel qnikʼ tiʼj qa mas nim tipumal twitz tkawbʼil jun tnam (Apoc. 13:7). Tuʼntzunju, in nel qnikʼ tiʼj qa in kubʼ techlaʼn txkup lu kykyaqil gobierni o che kawin kyibʼaj xjal atxix ojtxe (Ecl. 8:9). *

7. ¿Tiʼ in kubʼ kyechlaʼn qeju wuq twiʼ txkup?

⁷ ¿Tiʼ in kubʼ techlaʼn wuq twiʼ txkup? Jaku tzʼonin capítulo 17 te Apocalipsis qiʼj tuʼn tel qnikʼ tiʼj tuʼnju in yolin tiʼj tilbʼilal txkup in tzaj qʼamaʼn toj capítulo 13. In tzaj tqʼamaʼn Apocalipsis 17:10 jlu: «Ax wuq rey qeju wuq twiʼ txkup. Jweʼ rey o che el, jun atx jaʼlo, atzun juntl naʼnx tul; oktzun tul, ilxix tiʼj tuʼn tten, pero mya nim qʼij». Kyxol kykyaqil gobierni o che ajbʼen tuʼn Satanás, at wuq in che ok ik tzeʼn qe wibʼaj jlu tuʼnju o ten nim kyipumal twitz tkyaqil Txʼotxʼ ex o tzʼok kybʼinchaʼn nya bʼaʼn kyiʼj tmajen Dios. Toj tqʼijlalil apóstol Juan, ya otoq che kawin jweʼ tnam lu: Egipto, Asiria, Babilonia, Medopersia ex Grecia. Ex tzmatoq in kawin Roma tej tok tkeʼyin Juan witzikʼ lu ex atzun ok te tqaqin wibʼaj. ¿Alkyetzun tuʼn tok te twuqin wibʼaj?

8. ¿Alkye in nok te twuqin twiʼ txkup?

 ⁸ Ik tzeʼn kʼelel qnikʼ tiʼj, che onil profecía tkuʼx toj libro te Daniel qiʼj tuʼn tel qnikʼ tiʼj alkye twuqin ex mankbʼil twiʼ txkup. ¿Alkye tnam at mas nim tipumal toj bʼajsbʼil tqʼijlalil moqa «tuj tqʼij Qajaw»? (Apoc. 1:10). Aju tnam te Reino Unido ex Estados Unidos. Tuʼn jlu, jaku txi qqʼamaʼn qa in nok te twuqin twiʼ txkup in yolin Apocalipsis 13:1 a 4 tiʼj.

9. ¿Alkye in nok te txkup «at kabʼe tcach ik tzaʼn tcach jun tal ẍneʼl»?

⁹ Yajxitl, in tzaj tqʼamaʼn capítulo 13 te Apocalipsis tzeʼn in naqʼunan twuqin twiʼ txkup moqa aju tnam te Reino Unido ex Estados Unidos. In nok qʼoʼn jlu te juntl txkup ex in tzaj qʼamaʼn jlu tiʼj: «At kabʼe tcach ik tzaʼn tcach jun tal ẍneʼl, ex o yolin ik tzaʼn jil dragón». «In tbʼinchaʼn qe techal maʼxix kyxilen; ax ikx in kuʼtz qʼaqʼ tuʼn twitz kyaʼj in kubʼil twitz txʼotxʼ kywitz xjal» (Apoc. 13:11-15). In nok tqʼoʼn capítulo 16 ex 19 te Apocalipsis tbʼi txkup lu te «pakbʼal nikʼal yol» (Apoc. 16:13; 19:20). Chʼixme axju tqʼama Daniel tiʼj tnam te Reino Unido ex Estados Unidos tej tqʼama jlu: «Nimku kbʼajel t-xitun» (Dan. 8:19, 23, 24). Ex atzun jlu bʼaj tej tok Tkabʼ Nimaq Qʼoj twitz Tkyaqil Txʼotxʼ. Kubʼaj nimaq qʼoj lu kyuʼn kabʼe bomba atómica otoq kubʼ kybʼinchaʼn científico te Gran Bretaña ex Estados Unidos. Iktzun tten «kuʼtz qʼaqʼ [...] twitz kyaʼj» tuʼn tkawbʼil Reino Unido ex Estados Unidos.

10. ¿Alkye in kubʼ techlaʼn «tilbʼilal txkup»? (Apocalipsis 13:14, 15; 17:3, 8, 11).

¹⁰ Atzun jaʼlo, qo yolin tiʼj juntl txkup. Chʼixme ik keʼyin ik tzeʼn txkup at wuq twiʼ, pero kyaq keʼyin. In nok tqʼoʼn uʼj te Apocalipsis tbʼi te «tilbʼilal tnejel txkup» ex in tzaj tqʼamaʼn qa in nok te «twajxaqin rey» (kjawil uʼjit Apocalipsis 13:14, 15; 17:3, 8, 11). * In tzaj tqʼamaʼn Apocalipsis qa kawin rey lu jun maj, qa kubʼ naj ex qa yajxitl kawin juntl maj. Atzun jlu bʼaj tiʼj Organización de las Naciones Unidas, aju in nonin kyiʼj kykyaqil aj kawil twitz Txʼotxʼ. Tej tkubʼ bʼinchaʼn tnejel maj, ok qʼoʼn tbʼi te Sociedad de Naciones. Pero kubʼ naj tej tok Tkabʼ Nimaq Qʼoj twitz Tkyaqil Txʼotxʼ. Ex kubʼ bʼinchaʼn juntl maj ex ok qʼoʼn tbʼi te Organización de las Naciones Unidas.

11. ¿Tiʼ kbʼantel kyuʼn txkup ex tiquʼn mintiʼ tuʼn qtzaj xobʼ?

¹¹ Tuʼnju in bʼant kyuʼn aj kawil lu, che onil kyiʼj xjal tuʼn kyqʼojin tiʼj Dios ex tiʼj ttnam. Toj juntl yol, jaku txi qqʼamaʼn qa che pol «kyukʼil rey tuj tkyaqil twitz txʼotxʼ tuʼn kyok kychmoʼn, tuʼntzun kyqʼojin tiʼj Dios tuj jun qʼij maʼ toklen, aju Dios at tipumal tuʼn tbʼant tkyaqil tuʼn» (Apoc. 16:13, 14, 16). Pero mintiʼ tuʼn qtzaj xobʼ tuʼnju kkolil Jehová kyiʼj qeju in che onin tiʼj Tkawbʼil (Ezeq. 38:21-23).

12. ¿Tiʼ kbʼajel kyiʼj kykyaqil txkup?

¹² ¿Tiʼ kbʼajel kyiʼj kykyaqil txkup? In tzaj tqʼoʼn Apocalipsis 19:20 tzaqʼwebʼil tiʼj jlu: «Tzyettzun ju txkup tukʼix ju pakbʼal nikʼal yol, aju otoq tbʼincha qe señ twitz txkup, ex tuʼnju señ e sbʼunjtz qe xjal aqeju ok techal txkup kyiʼj ex otoq che kʼulun twitz ju tilbʼilal. Aqeju kabʼe lu e kuʼx xoʼn itzʼx qe tuj jun najabʼ in kʼant tuʼn qʼaqʼ ex tuʼn azufre». Tuʼntzunju,  akux in che kawin xjal in che qʼojin tiʼj Dios, che kbʼel najsaʼn te jumajx.

13. ¿Alkyeqe nya bʼaʼn in che ok weʼ okslal twitz tuʼn kypaj aj kawil?

¹³ Qe xnaqʼtzbʼil jaku tzʼel qiʼn tiʼj. Nim toklen tuʼn qten tzʼaqli twitz Dios ex twitz Tkawbʼil (Juan 18:36). Tuʼn tbʼant jlu quʼn, nim toklen tuʼn miʼn tokx qqʼon qibʼ toj política. Pero atlo maj kwest jaku tzʼela toj qwitz tuʼnju kyaj aj kawil tuʼn qonin kyiʼj tukʼil qyol ex qbʼinchbʼen. Aqeju in kubʼ kykʼuʼj kyuʼn aj kawil, in nok qʼoʼn techel txkup kyiʼj (Apoc. 13:16, 17). Qa ma bʼaj jlu qiʼj, mlay tzalaj Jehová qiʼj ex mlayx tzaj tqʼoʼn ambʼil qe tuʼn qanqʼin te jumajx (Apoc. 14:9, 10; 20:4). Tuʼntzunju, nim toklen tuʼn miʼn qonin kyiʼj aj kawil maske in nok tilil kyuʼn tuʼn qonin kyiʼj.

14. ¿Tiquʼn bʼiʼx naj tnabʼil apóstol Juan? (Apocalipsis 17:3-5).

¹⁴ Ax ikx tqʼama apóstol Juan jlu tej tok tkeʼyin juntl tiʼ: «Bʼiʼx naj nnabʼle». ¿Tiʼtzun ok tkeʼyin? Ok tkeʼyin jun xuʼj qʼuqli kyibʼaj jun kyxol qe txkup (Apoc. 17:1, 2, 6). Tzaj yekʼin te qa «jawni twitz [xuʼj] kyukʼil xinaq» ex qa ok qʼoʼn tbʼi te «Nintz tnam Babilonia». Ex in yaẍin xuʼj lu kyukʼil «qe rey twitz txʼotxʼ» (kjawil uʼjit Apocalipsis 17:3-5).

15, 16. ¿Alkye in nok te Nintz tnam Babilonia ex tiquʼn ojtzqiʼn quʼn?

¹⁵ ¿Alkye in nok te «Nintz tnam Babilonia»? Mintiʼ in kubʼ techlaʼn xuʼj lu qe aj kawil tuʼnju in tzaj tqʼamaʼn uʼj te Apocalipsis qa in yaẍin kyukʼil nejenel kye gobierni (Apoc. 18:9). Tuʼnju qʼuqli tibʼaj txkup, in tzaj tyekʼin qa taj tuʼn tten tipumal kyibʼaj aj kawil. Ex mintiʼ in yolin kyiʼj kʼaẍjel ateʼ tjaqʼ tkawbʼil Satanás. ¿Tiquʼn? Tuʼnju yajxitl in yolin uʼj te Apocalipsis kyiʼj kʼaẍjel ex in nok qʼoʼn kybʼi te, «qe comersyant twitz txʼotxʼ» (Apoc. 18:11, 15, 16).

¹⁶ Aj tyolin Tyol Dios tiʼj jun xuʼj jawni twitz tukʼil jun xinaq moqa tiʼj jun prostituta, atz in yolin kyiʼj xjal in tzaj kyqʼamaʼn qa in che ajbʼen te Dios, pero in che kʼulin kywitz nya ax tok dios moqa in kubʼ kybʼinchaʼn qe tiʼchaq te twitz txʼotxʼ (Ezeq. 16:2, 35, 36; Sant. 4:4). Ajtzun tyolin tiʼj jun xjal tzʼaqli twitz Dios, in tzaj tqʼamaʼn qa in nok ik tzeʼn jun xuʼj naʼmx tkubʼ kuẍe kyukʼil xinaq moqa virgen (2 Cor. 11:2; Apoc. 14:4). In che kʼulintoq xjal kywitz nya ax tok dios toj ojtxe tnam Babilonia. Tuʼntzunju, jaku txi qqʼamaʼn qa in kubʼ techlaʼn Nintz tnam Babilonia kykyaqil tten kʼulbʼil nya ax tok. Toj juntl yol, aqeju okslabʼil nya ax tok (Apoc. 17:5, 18; qʼonka twitza tiʼj xnaqʼtzbʼil «¿Qué es Babilonia la Grande?» toj jw.org).

17. ¿Tiʼ kbʼajel tiʼj Nintz tnam Babilonia?

¹⁷ ¿Tiʼ kbʼajel tiʼj Nintz tnam Babilonia? In tzaj tqʼamaʼn Apocalipsis 17:16 ex 17 jlu: «Ex qeju laj tcach txkup ma tila kʼelel kyikʼun aju xuʼj jawni twitz kyukʼil xinaq, knajel xuʼj kyuʼn, kyjel kyqʼoʼn mintiʼ t-xbʼalun tok, kxel kychyoʼn tchibʼjal, ex kbʼel kypatun tuʼn qʼaqʼ. Porke ma tma Dios tuj kyanmi tuʼn kybʼinchante ju tajbʼil». Tuʼn jlu, in nel qnikʼ tiʼj qa kbʼelex tqʼoʼn Jehová toj kyanmi tnam tuʼn tajbʼen txkup kyaq tiʼj kyuʼn moqa Naciones Unidas tuʼntzun tjapun twi t-ximbʼetz. ¿Tiʼtzun kbʼantel tuʼn? Kqʼojil kyiʼj okslabʼil nya ax tok ex che kbʼel tnajsaʼn te jumajx (Apoc. 18:21-24).

18. ¿Tiʼ il tiʼj tuʼn tbʼant quʼn tuʼn miʼn qonin tiʼj Nintz tnam Babilonia?

 ¹⁸ Qe xnaqʼtzbʼil jaku tzʼel qiʼn tiʼj. Nim toklen tuʼn qkʼulin te Jehová ik tzeʼn taj, toj jun tten «saqxix ex mintiʼ tpaltil» (Sant. 1:27). Miʼn tzʼok qqʼoʼn qwiʼ kyiʼj xnaqʼtzbʼil in tzaj tqʼoʼn Nintz tnam Babilonia, qe tkostumbr, qe nya bʼaʼn in bʼant tuʼn ex aju kyaqʼun chman. Ex kukx qqʼamanx jlu kye xjal: «Kyetze tuj tnam lu». Qa ma bʼant jlu kyuʼn, mintiʼ kyoklen tiʼj il in bʼant tuʼn Nintz tnam Babilonia (Apoc. 18:4).

19. ¿Alkye in nok te «jil maʼxix, dragón tbʼi, kyaq tiʼj»?

¹⁹ Ax ikx in yolin uʼj te Apocalipsis tiʼj «jun jil maʼxix, dragón tbʼi, kyaq tiʼj» (Apoc. 12:3). In qʼojin dragón lu tukʼil Jesús ex qe t-anjel (Apoc. 12:7-9). Ax ikx, in nok tzoqpaj tiʼj ttnam Dios ex in xi tqʼoʼn kyipumal txkup (Apoc. 12:17; 13:4). ¿Alkyetzun in nok te dragón? «Aju ojtxi lobʼaj, aju tok tbʼi tajaw il ex Satanás» (Apoc. 12:9; 20:2). Atzun in kubʼ nej kywitz txqantl aj qʼoj tiʼj Dios.

20. ¿Tiʼ kbʼajel tiʼj dragón?

²⁰ ¿Tiʼ kbʼajel tiʼj dragón? In tzaj tqʼamaʼn Apocalipsis 20:1 a 3 qa kbʼelex xoʼn Satanás toj jun jul tuʼn jun anjel ex kʼokel jlu ik tzeʼn otoq tzʼokx qʼoʼn toj cárcel. Kʼokex jupuʼn Satanás toj mil abʼqʼi tuʼntzun ya «miʼn t-sbʼun mastl kyiʼj qe nasyon» ajxi tkubʼaj ambʼil lu. Te bʼajsbʼil, kbʼelex xoʼn Satanás kyukʼil demonio «tuj najabʼ in kʼant tuʼn qʼaqʼ ex tuʼn azufre». A t-xilen jlu qa kbʼel najsaʼn te jumajx (Apoc. 20:10). ¡Tbʼanel kʼokel twitz Txʼotxʼ aj tkubʼ najsaʼn Satanás kyukʼil demonio!

21. ¿Tiquʼn in kubʼ qnaʼn tzalajbʼil aj tjaw quʼjin aju in tzaj tqʼamaʼn uʼj te Apocalipsis?

²¹ In kubʼ qnaʼn nimxix tzalajbʼil aj tel qnikʼ kyiʼj techel in yolin uʼj te Apocalipsis tiʼj. Ma tzʼel qnikʼ tiʼj alkyeqe aj qʼoj tiʼj Jehová ex tiʼ kbʼajel kyiʼj. Tuʼntzunju, «at tzalajbʼil kye xjal in che schʼin kyiʼj qe yol tuj tuʼjil lu, ex at tzalajbʼil kye qeju in che bʼin tiʼj» (Apoc. 1:3). ¿Yajtzun kye xjal che tel tzʼaqli twitz Dios? ¿Tiʼ kʼiwlabʼil tzul kykʼamoʼn aj kykubʼ najsaʼn qe aj qʼoj tiʼj Jehová? Kʼelel qnikʼ tiʼj jlu toj juntl xnaqʼtzbʼil.