1, 2. ¿Tiquʼn bʼaʼn tuʼn tok qqʼoʼn qwiʼ tiʼjju in tzaj tqʼamaʼn uʼj te Apocalipsis?

 ¿OPE tzʼok tena keʼyil qe tfoto jun xjal? Bʼalo ok tkeʼyina nim foto ex ni jun xjal ojtzqiʼn tuʼna. Noqtzun tuʼnj, in jaw labʼina tiʼj jun foto. ¿Tiquʼn? Tuʼnju ax ikx teya in netza toj foto. In nel tpaʼna ambʼil tuʼn tok tkeʼyina ex in tzaj tnaʼna alkye qʼij ex jatumel el qʼiʼn foto. Ax ikx, in nok tilil tuʼna tuʼn tel tnikʼa tiʼj alkye junjuntl in che etz yekʼin toj foto. Junxitl in nela foto lu toj twitza ex in nok tqʼoʼna toklen.

² In nok uʼj te Apocalipsis ik tzeʼn foto lu. ¿Tiquʼn? Tnejel, tuʼnju kyaj tzʼibʼin te qe. Aj t-xi tzyet uʼj te Apocalipsis in tzaj tqʼamaʼn jlu: «Aju tzʼibʼan tuj uʼj lu, atzunju tzaj tchikʼbʼaʼn Jesucrist. Tkyaqil jlu tzaj tmaʼn Dios te tuʼn t-xi tchikʼbʼaʼn kye tmajen tkyaqilju at tuʼn tul naj» (Apoc. 1:1). Tuʼn jlu, in nel qnikʼ tiʼj qa nya kye kykyaqil xjal kyaj tzʼibʼin uʼj lu, sino oʼkx kye tmajen Dios. Tuʼntzunju, mintiʼ in qo jaw labʼin aj qonin tuʼn kyjapun kywi profecía tkuʼx toj. Ex in nok jlu ik tzeʼn in qo etz toj foto.

3, 4. Ik tzeʼn in tzaj tqʼamaʼn uʼj te Apocalipsis, ¿toj alkye ambʼil kjapunel kywi profecía ex tzeʼn jaku che onin qiʼj?

³ Tkabʼin, bʼaʼn tuʼn tok qqʼoʼn qwiʼ kyiʼj profecía te Apocalipsis tuʼnju nim toklen alkye ambʼil in japun kywiʼ. Yolin apóstol Juan tiʼj ambʼil tej tqʼama jlu: «Tuj tqʼij Qajaw kubʼ ten tipumal Xewbʼaj Xjan wibʼaje» (Apoc. 1:10). Kubʼ ttzʼibʼin Juan qe yol lu nqayin tiʼj abʼqʼi 96 tiʼj ambʼil qʼiʼn quʼn jaʼlo. Toj ambʼil aju, atxtoq nim  abʼqʼi tuʼn tul «tqʼij Qajaw» (Mat. 25:14, 19; Luc. 19:12). Pero in tzaj kyyekʼin junjuntl profecía qa xi tzyet ambʼil lu toj abʼqʼi 1914, tej t-xi tzyet tuʼn tkawin Jesús toj kyaʼj. Toj ambʼil aju, xi tzyet tuʼn tjapun kywi profecía tkuʼx toj Apocalipsis, aqeju at kyoklen kyukʼil tmajen Dios. Tuʼntzunju, in qo anqʼin toj «tqʼij Qajaw».

⁴ Tuʼnju in qo anqʼin toj jun tbʼanel ambʼil, nim toklen tuʼn tok qqʼoʼn qwiʼ tiʼj consej tkuʼx toj Apocalipsis 1:3: «At tzalajbʼil kye xjal in che schʼin kyiʼj qe yol tuj tuʼjil lu, ex at tzalajbʼil kye qeju in che bʼin tiʼj tyol Dios ex in japun kyuʼn aju tzʼibʼan tuj; porke aju tqʼijlalil in laqeʼx ttzaj». Tuʼntzunju, nim toklen tuʼn quʼjin «kyiʼj qe yol tuj tuʼjil lu» ex tuʼn t-xi qnimen. ¿Alkyetzun qe yol il tiʼj tuʼn t-xi qnimen?

5. ¿Tzeʼn in tzaj tyekʼin uʼj te Apocalipsis qa nim toklen tuʼn tel qnikʼ tiʼj qa in xi tkʼamoʼn Jehová qkʼulbʼil?

⁵ Aj t-xi tzyet uʼj te Apocalipsis, in nel qnikʼ tiʼj qa ojtzqiʼn tuʼn Jesús aju in bʼaj kyoj kʼloj okslal (Apoc. 1:12-16, 20; 2:1). Atzun jlu in nel qnikʼ tiʼj aj tjaw quʼjin qe tqanil xi samaʼn kye wuq kʼloj okslal te Asia Menor. Kyoj tqanil lu, xi tqʼamaʼn Jesús kye okslal te tnejel syent abʼqʼi tiʼxix tuʼn tbʼant kyuʼn tuʼntzun t-xi tkʼamoʼn Jehová kykʼulbʼil. Ex jaku che onin consej lu kyiʼj tmajen Jehová toj ambʼil jaʼlo. ¿Tiʼ in tzaj tyekʼin jlu qe? In tzaj tyekʼin qe qa ojtzqiʼn tuʼn Jesús tzeʼn taʼ qamiwbʼil tukʼil Jehová. In tzaj tyekʼin qbʼe, in xqʼuqin qiʼj ex tok twitz tiʼj tkyaqil. Ojtzqiʼn tuʼn tiʼ il tiʼj tuʼn t-xi qbʼinchaʼn tuʼntzun ttzalaj Jehová qiʼj. Kyoj qe taqikʼ che ul, qo xnaqʼtzal kyiʼj junjun consej tqʼama Jesús ex il tiʼj tuʼn t-xi qbʼiʼn toj ambʼil jaʼlo.

6. a) Ik tzeʼn in tzaj tqʼamaʼn Apocalipsis 2:3 ex 4, ¿tiʼ otoq bʼaj kyiʼj okslal te Éfeso? b) ¿Tiʼ xnaqʼtzbʼil jaku tzʼel qiʼn tiʼj?

⁶ (Kjawil uʼjit Apocalipsis 2:3, 4). Qqʼonk tilil tuʼn miʼn tnaj qkʼujlabʼil tiʼj Jehová. In tzaj tyekʼin tqanil xi tqʼamaʼn Jesús kye okslal te Éfeso qa kukxtoq in nikʼx kyuʼn ex qa naʼmxtoq kykubʼ numj tok kyokslabʼil maske otoq che ok weʼ twitz nya bʼaʼn. Noqtzun tuʼnj, otoq chewix kykʼujlabʼil. Iltoq tiʼj tuʼn tten juntl maj kykʼujlabʼil qa kyajtoq tuʼn t-xi tkʼamoʼn Jehová kykʼulbʼil. Ax jlu in bʼaj toj ambʼil jaʼlo. Nim toklen tuʼn tikʼx quʼn, pero il tiʼj tuʼn tbʼant quʼn tukʼil tzalajbʼil. Nya oʼkx in nok tqʼoʼn Jehová twitz tiʼjju in bʼant quʼn, sino ax ikx tiquʼn in bʼant quʼn. Nim toklen toj twitz Jehová tiquʼn in che bʼant junjun tiʼchaq quʼn. Taj tuʼn qkʼulin te tuʼnju kʼujlaʼn quʼn ex tuʼnju qaj tuʼn t-xi qqʼoʼn chjonte te (Prov. 16:2; Mar. 12:29, 30).

7. a) Ik tzeʼn in tzaj tqʼamaʼn Apocalipsis 3:1 a 3, ¿tiʼ otoq bʼaj kyiʼj okslal te Sardis? b) ¿Tiʼ il tiʼj tuʼn kukx tbʼant quʼn?

⁷ (Kjawil uʼjit Apocalipsis 3:1-3). Kukx qxqʼuqink qibʼ. Junxitl nya bʼaʼn e ok weʼ okslal te Sardis twitz. Otoq tzʼok tilil kyuʼn tuʼn kyajbʼen te Jehová, pero tej tikʼ ambʼil ya mintiʼ ok tilil kyuʼn. Tuʼntzunju, xi tqʼamaʼn Jesús kye tuʼn tel kywatl. Jaku tzʼel qiʼn jun xnaqʼtzbʼil tiʼjju xi tqʼamaʼn Jesús kye. Ojtzqiʼn quʼn qa mintiʼ in nikʼ tnaʼl tuʼn Jehová tkyaqilju in bʼant quʼn tiʼj (Heb. 6:10). Pero  nya a t-xilen jlu qa bʼaʼn tuʼn qkubʼ qeʼ ex qa nya il tiʼj tuʼn tok tilil quʼn. Bʼalo mlay bʼant ax aqʼuntl quʼn ik tzeʼn tnejel, pero kukx qo aqʼunan «tuj taqʼun Qajaw» ex kukx qo xqʼuqin tzmaxi aj tul xitbʼil (1 Cor. 15:58; Mat. 24:13; Mar. 13:33).

8. ¿Tiʼ xnaqʼtzbʼil jaku tzʼel qiʼn tiʼjju xi tqʼamaʼn Jesús kye okslal te Laodicea? (Apocalipsis 3:15-17).

⁸ (Kjawil uʼjit Apocalipsis 3:15-17). Qo ajbʼen te Jehová tuʼn tkyaqil qkʼuʼj ex tukʼil tzalajbʼil. Ax ikx tqʼama Jesús jun nya bʼaʼn bʼant kyuʼn okslal te Laodicea. Otoq che chewix toj kyokslabʼil. Ex tqʼama Jesús jlu kyiʼj: «Puro tuj bʼis ateʼye, ex mintiʼ jun bʼaʼn at kyeye». Tuʼntzunju, iltoq tiʼj tuʼn tchʼiy juntl maj kykʼujlabʼil tiʼj Jehová (Apoc. 3:19). ¿Tiʼ xnaqʼtzbʼil jaku tzʼel qiʼn tiʼj? Qa ya mintiʼ in qo tzalaj toj qajbʼebʼil te Jehová, bʼaʼn tuʼn tok tilil quʼn tuʼn tchʼiy qkʼujlabʼil tiʼj tkyaqilju in tzaj tqʼoʼn qe (Apoc. 3:18). Miʼn tzʼok qqʼoʼn qwiʼ kyiʼj tiʼchaq te twitz txʼotxʼ. Aju mas nim toklen toj qwitz aju qajbʼebʼil te Jehová.

9. Aj qximen tiʼjju xi tqʼamaʼn Jesús kye okslal te Pérgamo ex Tiatira, ¿tiʼ nya bʼaʼn il tiʼj tuʼn tel qikʼun?

⁹ Bʼaʼn tuʼn tel qikʼun kyxnaqʼtzbʼil apóstata. Xi tkawin Jesús junjun okslal te Pérgamo tuʼnju mintiʼtoq in che onin tuʼn tten mujbʼabʼil toj kʼloj okslal (Apoc. 2:14-16). Pero xi tqʼamaʼn tbʼanel yol kye okslal te Tiatira tuʼnju otoq tzʼel kyikʼun «t-xnaqʼtzbʼil Satanás». Ex xi tqʼamaʼn kye tuʼn miʼn tel kypan kyibʼ tiʼj axix tok (Apoc. 2:24-26). Iltoq tiʼj tuʼn tajtz tiʼj kyanmi okslal otoq che chewix toj kyokslabʼil ex otoq txi kynimen qe xnaqʼtzbʼil nya axix tok. Ax ikx qe, il tiʼj tuʼn tel qikʼun qe xnaqʼtzbʼil in nel tikʼun Jehová. Jakulo kubʼ kyyekʼin apóstata qa in che nimen te Dios, «pero mintiʼ kyaj tiʼj tipumal tuʼn kyklet» (2 Tim. 3:5). Qa naqʼli qoʼ tuʼn qxnaqʼtzan tiʼj Tyol Dios, jun rat kʼelel qnikʼ kyiʼj xnaqʼtzbʼil nya ax tok ex kʼonil qiʼj tuʼn kyel qikʼun (2 Tim. 3:14-17; Jud. 3, 4).

10. ¿Tiʼ juntl xnaqʼtzbʼil jaku tzʼel qiʼn tiʼjju xi tqʼamaʼn Jesús kye okslal te Pérgamo ex Tiatira?

¹⁰ Miʼn txi qqʼoʼn ambʼil te yaẍbʼil ex miʼn kubʼ qbʼinchaʼn. Ax ikx bʼant juntl nya bʼaʼn kyuʼn okslal te Pérgamo ex Tiatira. Ateʼ junjun xi kyqʼoʼn ambʼil te yaẍbʼil, tuʼntzunju i ex kawin tuʼn Jesús  (Apoc. 2:14, 20). A jlu in tzaj tyekʼin qe qa mlay txi tqʼoʼn Jehová ambʼil kye tmajen tuʼn kyyaẍin maske ma tzikʼ nim ambʼil in che ajbʼen te moqa o txi qʼoʼn nim kyoklen (1 Sam. 15:22; 1 Ped. 2:16). Maske in che tzalaj xjal tiʼj nya bʼaʼn, taj Jehová tuʼn tok kyqʼoʼn tmajen toklen qe tkawbʼil (Efes. 6:11-13).

11. ¿Tiʼ ma tzʼel qnikʼ tiʼj? (Ax ikx qʼonka twitza tiʼj recuadro « Qe xnaqʼtzbʼil in tzaj tqʼoʼn qe»).

¹¹ Toj chʼin yol, ¿tzeʼn jaku txi qqʼamaʼn aju ma tzʼel qnikʼ tiʼj? Ma tzʼel qnikʼ tiʼj qa nim toklen tuʼn qximen tiʼj qa in xi tkʼamoʼn Jehová qkʼulbʼil. Qa at jun tiʼ nya toj tumel in bʼant quʼn, qqʼonk tilil tuʼn kybʼant chʼixpubʼil quʼn (Apoc. 2:5, 16; 3:3, 16). Pero ax ikx xi tqʼamaʼn Jesús junjuntl tqanil kye okslal toj ambʼil ojtxe. ¿Alkyeqe? Qo xnaqʼtzan kyiʼj.

12. ¿Tiʼ xnaqʼtzbʼil jaku tzʼel qiʼn tiʼj tqanil xi qʼamaʼn kye okslal te Esmirna ex Filadelfia? (Apocalipsis 2:10).

¹² Atzun jaʼlo, qo xnaqʼtzan kyiʼj tqanil xi qʼamaʼn kye okslal te Esmirna ex Filadelfia. Xi tqʼamaʼn Jesús kye okslal tuʼn miʼn kytzaj xobʼ aj kyel ikʼun tuʼnju che tzajel kʼiwlaʼn tuʼn Jehová qa ma che ten tzʼaqli twitz (kjawil uʼjit Apocalipsis 2:10; 3:10). ¿Tiʼ xnaqʼtzbʼil jaku tzʼel qiʼn kyiʼj tqanil lu? Qa kpol ambʼil jatumel qo elel ikʼun ex bʼaʼn tuʼn tbʼaj qbʼinchaʼn qten tuʼn tikʼx quʼn (Mat. 24:9, 13; 2 Cor. 12:10). ¿Tiquʼn nim toklen tuʼn ttzaj qnaʼn jlu?

13, 14. ¿Tiʼ o tzaj kyiʼj tmajen Jehová tuʼnju in japun kywi profecía tkuʼx toj Apocalipsis capítulo 12?

¹³ In tzaj tqʼamaʼn uʼj te Apocalipsis qa che elel ikʼun tmajen Dios toj «tqʼij Qajaw» ex ya in qo anqʼin toj ambʼil lu. In tzaj tqʼamaʼn capítulo 12 qa «ok jun qʼoj maʼxix tuj kyaʼj» tej t-xi tzyet tuʼn tkawin Tkawbʼil Dios. Qʼojin Miguel kyukʼil t-anjel tukʼil Tajaw il ex qe demonio (Apoc. 12:7, 8). Kambʼan Jesús ex qe t-anjel toj qʼoj lu, tuʼntzunju, kutz xoʼn Tajaw il ex qe demonio twitz Txʼotxʼ ex in nok kybʼinchaʼn nim nya bʼaʼn kyiʼj xjal (Apoc. 12:9, 12). ¿Tiʼ o tzaj kyiʼj tmajen Jehová tuʼn jlu?

¹⁴ Ax ikx in tzaj tqʼamaʼn uʼj te Apocalipsis qe tiʼ tmod Satanás kubʼ tyekʼin. Tuʼnju ya mintiʼ in tzaj qʼoʼn ambʼil te Satanás tuʼn tokx toj kyaʼj, in nok tbʼinchaʼn nya bʼaʼn kyiʼj skʼoʼn maj ateʼ tzalu twitz Txʼotxʼ, aqeju «kukx in xi kychikʼbʼaʼn ax tok tiʼj Jesucrist» (Apoc. 12:17; 2 Cor. 5:20; Efes. 6:19, 20). ¿Tzeʼn o japun twi profecía lu?

15. ¿Alkyeqe «kabʼe testiw» in yolin capítulo 11 te Apocalipsis tiʼj ex tiʼ bʼaj kyiʼj?

¹⁵ Ok tilil tuʼn Satanás tuʼn kyok  tzoqpaj aj qʼoj kyiʼj skʼoʼn maj e kubʼ nej twitz pakbʼabʼil. Kyxol qe jlu, e ten nim erman in bʼanttoq nim aqʼuntl kyuʼn. Aʼyetzun erman lu in che ok te «kabʼe testiw» in che kubʼ bʼyoʼn, aju in yolin uʼj te Apocalipsis tiʼj (Apoc. 11:3, 7-11). * Toj abʼqʼi 1918, xi qʼamaʼn nya ax tok yol kyiʼj wajxaq erman e kubʼ nej twitz aqʼuntl ex tzaj qʼamaʼn qa tuʼn kyokx qʼoʼn nim ambʼil toj cárcel. Jakutoq kubʼ kyximen xjal qa ya mlaytoq che pakbʼan.

16. ¿Tiʼ bʼaj toj abʼqʼi 1919 ex tiʼ o bʼant tuʼn Satanás?

¹⁶ In tzaj tqʼamaʼn profecía tkuʼx toj capítulo 11 te Apocalipsis qa aj tikʼ chʼin ambʼil kykubʼlen bʼyoʼn «kabʼe testiw», che kjawel anqʼin juntl maj. Japun kywi yol lu tej naʼmxtoq tikʼ jun abʼqʼi kyokx qʼoʼn erman toj cárcel. Toj marzo te 1919, i etz tzaqpiʼn erman lu toj cárcel ex tzaj qʼamaʼn qa mintiʼ kyil. Jun rat naj xi tzyet tuʼn kypakbʼan erman juntl maj. Pero mintiʼ sikt Satanás. Atxix toj ambʼil aju o txi tjyoʼn tumel tzeʼn tuʼn kyel ikʼun tmajen Jehová ex o tzʼok jlu ik tzeʼn «jun nima» (Apoc. 12:15). Tuʼntzunju, il tiʼj tuʼn tikʼx quʼn ex tuʼn tten qʼuqbʼil qkʼuʼj (Apoc. 13:10).

17. ¿Alkye onbʼil o tzaj qʼoʼn kye tmajen Dios maske in che el ikʼun tuʼn Satanás?

¹⁷ In tzaj tqʼamaʼntl capítulo 12 te Apocalipsis qa noq minabʼen tzul kykʼamoʼn tmajen Dios onbʼil tuʼnju in tzaj tqʼamaʼn qa «xi tkʼaʼn txʼotxʼ aʼ», toj juntl yol, ya mintiʼxix ten ikʼbʼil (Apoc. 12:16). Ex atzun jlu o bʼaj. At maj o che onin junjun xjal kyiʼj tmajen Dios ik tzeʼn qe jwes ex qe ley. O che kambʼan tmajen Jehová kyiʼj nim juicio ex o tzʼonin jlu kyiʼj tuʼn ttzaj qʼoʼn tzaqpibʼil kye. ¿Tzeʼn o tzʼajbʼen ambʼil lu kyuʼn? O tzʼok tilil kyuʼn tuʼn tajbʼen ambʼil lu kyuʼn tuʼn t-xi kybʼinchaʼn aqʼuntl o tzaj tqʼamaʼn Jehová kye (1 Cor. 16:9). ¿Alkyetzun aqʼuntl lu?

18. ¿Alkye aqʼuntl mas nim toklen tuʼn tbʼant quʼn toj bʼajsbʼil tqʼijlalil?

¹⁸ Tqʼama Jesús qa che pakbʼal t-xnaqʼtzbʼen tiʼj «tqanil bʼaʼn» tiʼj Tkawbʼil Dios twitz tkyaqil Txʼotxʼ tzmaxi aj tul xitbʼil (Mat. 24:14). Tuʼn tbʼant aqʼuntl lu kyuʼn, in nonin jun anjel  kyiʼj moqa jun kʼloj anjel. In tzaj tqʼamaʼn uʼj te Apocalipsis qa qʼiʼn «tqanil kolbʼil tuʼn [anjel], aju kolbʼil te jumajx, tuʼn t-xi tpakbʼaʼn kye xjal najl twitz txʼotxʼ, kye kykyaqil nasyon, ex kye kykyaqil kyiyjil xjal, ex kye kykyaqil kʼloj xjal junxilchaq kyyol, ex kye kykyaqil tnam» (Apoc. 14:6).

19. ¿Alkye juntl tqanil il tiʼj tuʼn t-xi kyqʼamaʼn qeju kʼujlaʼn Jehová kyuʼn?

¹⁹ Pero nya oʼkx in che pakbʼan tmajen Dios tiʼj tbʼanel tqanil. Ax ikx, nim toklen tuʼn kyonin kyiʼj anjel in yolin capítulo 8 a 10 te Apocalipsis tiʼj. In tzaj kyqʼamaʼn anjel lu junjun nya bʼaʼn tqanil kyiʼj qeju in nel kyikʼun Tkawbʼil Dios. Tuʼntzunju, o tzʼok tilil kyuʼn testigo de Jehová tuʼn kypakbʼan tiʼj jun tqanil in nok ik tzeʼn «saqbʼaqun tukʼix qʼaqʼ». In tzaj kyyekʼin tqanil lu tiʼ kbʼajel tiʼj Tkawbʼil Satanás (Apoc. 8:7, 13). Nim toklen tuʼn tel kynikʼ xjal tiʼj qa ya chʼix tul xitbʼil. Qa ma txi qqʼamaʼn kye, jaku tzʼonin kyiʼj tuʼn tel kynikʼ tiʼj alkyeqe chʼixpubʼil tuʼn tbʼant kyuʼn tuʼntzun kykyaj anqʼin (Sof. 2:2, 3). Tuʼnju nya tbʼanel in nela tqanil lu toj kywitz kykyaqil xjal, nim toklen tuʼn tten qipumal. Ex aj tul nimxix yajbʼil, mas kyuw tqanil kxel qqʼamaʼn kye xjal (Apoc. 16:21).

20. ¿Tiʼ qo xnaqʼtzal tiʼj kyoj juntl kabʼe xnaqʼtzbʼil?

²⁰ Nim toklen tuʼn t-xi qbʼiʼn qe yol «tuj tuʼjil lu» tuʼnju «ax ikx qe in qo etz toj foto», toj juntl yol in qo onin tuʼn kyjapun kywi yol tkuʼx toj uʼj te Apocalipsis (Apoc. 1:3). Pero, ¿tiʼ jaku tzʼonin qiʼj tuʼn tikʼx ikʼbʼil quʼn ex tuʼn kukx qpakbʼan? At kabʼe tiʼ jaku tzʼonin qiʼj. Tnejel, aj qximen tiʼjju in tzaj tqʼamaʼn uʼj te Apocalipsis kyiʼj aj qʼoj tiʼj Dios. Ex tkabʼin, aj qximen kyiʼj kʼiwlabʼil che tzajel qkʼamoʼn qa kukx ma qo ten tzʼaqli twitz Jehová. Qo xnaqʼtzal tiʼj jlu kyoj juntl kabʼe xnaqʼtzbʼil.