1. ¿Tiʼ il tiʼj tuʼn tkubʼ qximen qkyaqilx?

 TOJ ambʼil jaʼlo, il tiʼj tuʼn tkubʼ qximen qkyaqilx qa qo onil tiʼj Tkawbʼil Jehová moqa qo okel lepeʼ tiʼj Satanás aju aj qʼoj tiʼj Dios. Il tiʼj tuʼn tjaw qskʼoʼn alqiʼj qo onil. Nim toklen tuʼn tbʼant jlu quʼn tuʼntzun ttzaj qʼoʼn qchwinqlal te jumajx (Mat. 25:31-33, 46). Aj t-xi tzyet «nimxix yajbʼil», kʼokel qʼoʼn techel kyiʼj tmajen Jehová tuʼntzun kykyaj anqʼin (Apoc. 7:14; Ezeq. 9:4, 6). Atzun qe xjal tok techel txkup kyiʼj, che kbʼel najsaʼn te jumajx (Apoc. 14:9-11).

2. a) ¿Tiʼ in tzaj tqʼamaʼn Hebreos 10:35 a 39 tuʼn tbʼant quʼn? b) ¿Tzeʼn in nonin uʼj te Apocalipsis qiʼj?

² (Kjawil uʼjit Hebreos 10:35-39). Qa ya o kubʼ t-ximen teya tuʼn tonina tiʼj Tkawbʼil Jehová, tbʼanel aju o bʼant tuʼna. Ex taja tuʼn tonina kyiʼj txqantl tuʼn tbʼant jlu kyuʼn. Tuʼntzunju, jaku tzʼonin uʼj te Apocalipsis tiʼja tuʼn tbʼant jlu tuʼna. Nya oʼkx in tzaj tqʼamaʼn uʼj lu tiʼ kbʼajel kyiʼj aj qʼoj tiʼj Dios. Sino ax ikx in tzaj tqʼamaʼn alkyeqe kʼiwlabʼil tzul kykʼamoʼn qeju in che onin tiʼj Tkawbʼil Jehová. Tbʼanel qa ma qo xnaqʼtzan kyiʼj xnaqʼtzbʼil lu tuʼnju jaku che onin qiʼj tuʼn kukx qajbʼen te Jehová. Ax ikx jaku tzʼonin qiʼj tuʼn qonin kyiʼj txqantl tuʼn tel kynikʼ tiʼjju mas bʼaʼn ex tuʼn kyajbʼen te Jehová.

3. ¿Alkyeqe xjel kxel qqʼoʼn tzaqʼwebʼil kyiʼj toj xnaqʼtzbʼil lu?

³ Toj xnaqʼtzbʼil lu, kxel qqʼoʼn tzaqʼwebʼil kyiʼj kabʼe xjel lu. Tnejel, ¿tiʼ kbʼajel kyiʼj qeju in che onin tiʼj Tkawbʼil Dios? Ex tkabʼin, ¿tiʼ kbʼajel kyiʼj qeju in che onin tiʼj txkup kyaq tiʼj aju in tzaj qʼamaʼn toj uʼj te Apocalipsis?

4. ¿Alkye kʼloj xjal ok tqʼoʼn Juan twitz tiʼj junx tukʼil Jesús toj kyaʼj?

⁴ Toj jun witzikʼ, ok tqʼoʼn apóstol Juan twitz tiʼj kabʼe kʼloj xjal in che onin tiʼj Tkawbʼil Jehová. Tzaj qʼoʼn kychwinqlal xjal lu te jumajx ex tzaj kykʼamoʼn nimxix kʼiwlabʼil. Aju tnejel kʼloj xjal, 144,000 kybʼaj (Apoc. 7:4). In che anqʼin xjal lu twitz Txʼotxʼ ex che xeʼl toj kyaʼj tuʼntzun kykawin junx tukʼil Jesús tibʼaj Txʼotxʼ (Apoc. 5:9, 10; 14:3, 4). Ok tkeʼyin Juan qa waʼl qe junx twi witz Sion (Apoc. 14:1).

5. ¿Tiʼ kbʼajel toj chʼintl ambʼil kyiʼj skʼoʼn maj ateʼ tzalu twitz Txʼotxʼ?

⁵ Atxix toj kyqʼijlalil apóstol, o che jaw skʼoʼn nim xjal tuʼntzun kyten kyxol qeju 144,000 (Luc. 12:32; Rom. 8:17). Pero tzaj qʼamaʼn te Juan qa noq chʼin kybʼaj ktel tzalu twitz Txʼotxʼ kyoj bʼajsbʼil tqʼijlalil. Naʼmxtoq txi tzyet nimxix kʼixbʼisabʼil, kʼokel qʼoʼn sey «kyiʼj chʼintl tiyjil xuʼj» moqa kyiʼj skʼoʼn maj. Toj juntl yol, ktzalajel Jehová kyiʼj (Apoc. 7:2, 3; 12:17). Otoqxi txi tzyet nimxix yajbʼil, che xel qʼiʼn skʼoʼn maj ateʼ tzalu twitz Txʼotxʼ tuʼntzun kyten junx kyukʼil qeju otoq cheʼx toj kyaʼj. Ex che kawil junx tukʼil Jesús toj Tkawbʼil Dios (Mat. 24:31; Apoc. 5:9, 10).

6, 7. a) ¿Alkye juntl kʼloj xjal ok tkeʼyin Juan ex tiʼ ojtzqiʼn quʼn kyiʼj? b) ¿Tiquʼn nim toklen tuʼn tok kyqʼoʼn skʼoʼn maj ex qeju «nimxix kyajlal xjal» kywiʼ tiʼjju in tzaj tqʼamaʼn capítulo 7 te Apocalipsis?

⁶ Otoqxi tzʼok tkeʼyin Juan kʼloj xjal kxeʼl anqʼil toj kyaʼj, ax ikx ok tkeʼyin «nimxix kyajlal xjal». Mlay bʼant kyajlet xjal lu ik tzeʼn qeju 144,000 (Apoc. 7:9, 10). ¿Tiʼ ojtzqiʼn quʼn kyiʼj? Tzaj qʼamaʼn jlu te apóstol Juan: «Atzun qe jlu ma che etz tuj nimxix yajbʼil, ex ma tzʼel kytxʼjoʼn tiʼj kyxbʼalun, ex ma saqix tiʼj kyxbʼalun tuʼn tchkʼel Tal Ẍneʼl» (Apoc. 7:14). Aj tkubʼaj nimxix yajbʼil, che tzalajel «nimxix kyajlal xjal» lu tiʼj kyanqʼibʼil tzalu twitz Txʼotxʼ ex tzul kykʼamoʼn nimxix kʼiwlabʼil (Sal. 37:9-11, 27-29; Prov. 2:21, 22; Apoc. 7:16, 17).

⁷ Qa atz qo anqʼil toj kyaʼj moqa tzalu twitz Txʼotxʼ, qkyaqilx bʼaʼn tuʼn tkubʼ qximen qa in qo etz toj foto in yolin uʼj te Apocalipsis capítulo 7 tiʼj. ¡Tbʼanelxix kʼokel ambʼil lu kye qeju kabʼe kʼloj tmajen Dios! Kbʼel qnaʼn nimxix tzalajbʼil tuʼnju in qo onin tiʼj Tkawbʼil Dios. ¿Tiʼ mas in tzaj tqʼamaʼn uʼj te Apocalipsis tiʼj nimxix yajbʼil? (Mat. 24:21).

8. ¿Tzeʼn kxel tzyet nimxix yajbʼil ex tiʼ kymod xjal kbʼel kyyekʼin?

⁸ Ik tzeʼn el qnikʼ tiʼj toj xnaqʼtzbʼil ma kyaj, toj chʼintl ambʼil che okel tzoqpaj aj kawil tiʼj Nintz tnam Babilonia, toj juntl yol kyiʼj kykyaqil okslabʼil nya ax tok (Apoc. 17:16, 17). Aj tbʼaj jlu, kxel tzyet nimxix yajbʼil. ¿Kʼokelpe tilil kyuʼn kykyaqil xjal tuʼn kykʼulin te Jehová? Mlay. In tzaj tqʼamaʼn Apocalipsis capítulo 6 qa aqeju mintiʼ in che ajbʼen te Jehová toj ambʼil aju, che jyol onbʼil kyukʼil aj kawil ex kyoj kʼaẍjel, aqeju in che ok qʼoʼn ik tzeʼn qe matij witz. Tuʼnju mlay che onin tiʼj Tkawbʼil Dios, che okel tqʼoʼn Jehová te tajqʼoj (Luc. 11:23; Apoc. 6:15-17).

9. ¿Tiquʼn kʼokel bʼaj kywitz xjal kyiʼj tmajen Jehová toj nimxix yajbʼil ex tiʼ kbʼajel kyiʼj?

⁹ Toj ambʼil te nimxix yajbʼil, kʼokel  bʼaj kywitz xjal kyiʼj tmajen Jehová. ¿Tiquʼn? Tuʼnju oʼkx kye kukx che ajbʼel te Jehová ex mlay che onin tiʼj txkup (Apoc. 13:14-17). Aj tok kykeʼyin aj qʼoj jlu, tzul nimxix kyqʼoj. Tuʼntzunju, kʼokel tzoqpaj jun kʼloj tnam kyiʼj tmajen Jehová in che anqʼin twitz tkyaqil Txʼotxʼ. In nok tqʼoʼn Tyol Dios tbʼi kʼloj tnam lu te Gog ex Magog (Ezeq. 38:14-16).

10. Ik tzeʼn in tzaj tqʼamaʼn Apocalipsis 19:19 a 21, ¿tiʼ kbʼantel tuʼn Jehová aj kyok tzoqpaj aj qʼoj kyiʼj tmajen?

¹⁰ ¿Tiʼ kbʼantel tuʼn Jehová aj kyok tzoqpaj aj qʼoj kyiʼj tmajen? In tzaj tqʼamaʼn jlu qe: «Ktzajel nimxix nqʼoje ex ntxʼuʼjile» (Ezeq. 38:18, 21-23). In tzaj tchikʼbʼaʼn Apocalipsis capítulo 19 tiʼ kbʼajel yajxitl. Tzul tsamaʼn Jehová Tkʼwal tuʼn tkolin kyiʼj tmajen ex kbʼel tnajsaʼn qe aj qʼoj tiʼj. Pero nya tjunalx Jesús kqʼojil, ax ikx che onil «qe soldad ateʼ tuj kyaʼj» tiʼj, toj juntl yol, aqeju anjel ex qeju 144,000 (Apoc. 17:14; 19:11-15). ¿Tiʼtzun kbʼajel toj qʼoj lu? Che kbʼel najsaʼn kykyaqil xjal ex qe kʼloj xjal mintiʼ in che onin tiʼj Jehová (kjawil uʼjit Apocalipsis 19:19-21).

11. ¿Toj alkye ambʼil kbʼel kynaʼn tmajen Jehová nimxix tzalajbʼil ik tzeʼn in tzaj tqʼamaʼn uʼj te Apocalipsis?

¹¹ ¿Tiʼ kbʼel kynaʼn tmajen Jehová otoq che kyaj anqʼin aj kykubʼ najsaʼn aj qʼoj tiʼj Dios? ¡Kbʼel kynaʼn nimxix tzalajbʼil! Che tzalajel qeju in che anqʼin toj kyaʼj aj tkubʼ najsaʼn Nintz tnam Babilonia, pero mas che tzalajel tiʼj juntl tiʼ (Apoc. 19:1-3). In tzaj tqʼamaʼn uʼj te Apocalipsis qa kbʼel kynaʼn nimxix tzalajbʼil aj tkubʼ mojeʼ «Tal Ẍneʼl» (Apoc. 19:6-9).

12. ¿Toj alkye ambʼil kbʼel mojeʼ Tal Ẍneʼl? (Apocalipsis 21:1, 2).

¹² ¿Toj alkye ambʼil kbʼel mojeʼ Tal Ẍneʼl? Maske ya ateʼtoq 144,000 toj kyaʼj aj t-xi tzyet Armagedón, nya toj ambʼil lu kbʼel ikʼsaʼn mejebʼleʼn (kjawil uʼjit Apocalipsis 21:1, 2). Kbʼel ikʼsaʼn tzmaxi aj tbʼaj Armagedón ex aj kykubʼ najsaʼn kykyaqil aj qʼoj tiʼj Jehová (Sal. 45:3, 4, 13-17).

13. ¿Tiʼ t-xilen tmejebʼleʼn Tal Ẍneʼl kye qeju at kyoklen tiʼj?

¹³ ¿Tiʼ t-xilen tmejebʼleʼn Tal Ẍneʼl kye qeju at kyoklen tiʼj? Aj tkubʼ ikʼset jun mejebʼleʼn, in kubʼ mojeʼ jun xinaq tukʼil jun xuʼj. Toj mejebʼleʼn lu, in kubʼ mojeʼ Jesús tukʼil ttxin, toj juntl yol, aqeju 144,000. Aj tbʼaj jlu, kxel tzyet Tkawbʼil Jesús kyukʼil qeju 144,000 toj kyaʼj tuʼntzun kykawin kyibʼaj xjal tzalu twitz Txʼotxʼ toj mil abʼqʼi (Apoc. 20:6).

14, 15. ¿Alqukʼil in nok tmojbʼaʼn Apocalipsis capítulo 21 qeju 144,000? (Qʼonka twitza tiʼj tilbʼilal tok tiʼj t-xkʼomil).

¹⁴ Toj capítulo 21 te Apocalipsis, in che ok mojbʼaʼn 144,000 xjal tukʼil jun tnam «akʼaj Jerusalén» tbʼi (Apoc. 21:2, 9). «At kabʼlaj t-simyentil [tnam lu], ex tzʼibʼan tbʼi junjun apostol tiʼj junjun simyent, atzun kybʼi qe kabʼlaj apostol te Tal Ẍneʼl». Tej tok tkeʼyin Juan jlu, jawlo labʼin tiʼj. ¿Tiquʼn? Tuʼnju ok tkeʼyin qa ax ikx tzʼibʼin tbʼi tiʼj jun kyxol simyent lu. ¡Jun tbʼanelxix toklen! (Apoc. 21:10-14; Efes. 2:20).

 ¹⁵ Ni jun tnam ik keʼyin ik tzeʼn Akʼaj Jerusalén. Aju calle mas nim toklen bʼinchaʼn maj tuʼn qʼan pwaq. Atzun qeju 12 tpwertil, bʼinchaʼn maj qe tuʼn 12 perla. Ax ikx, kyok tbʼanelxix abʼj tiʼj muro ex qe tsimyentil. Ex junx ateʼqe tmedida kyoj kyaje lad (Apoc. 21:15-21). Pero ok tkeʼyin Juan qa at jun tiʼ mintiʼ. In tzaj tqʼamaʼn jlu: «Ex mintiʼ tja Dios o wile tuj tnam porke ate Dios aju Qman aju at tipumal tuʼn tbʼant tkyaqil tuʼn, atzun tja Diosju at tuj tnam, tukʼix ju Tal Ẍneʼl. Ex mya il tiʼj tuʼn t-spikʼbʼanjtz tuj tnam tuʼn tqan qʼij ex tuʼn tqan xjaw; porke tuʼnx t-spikʼumal Dios in spikʼbʼanjtz tuj. Ex ate Tal Ẍneʼl qʼolte spikʼun tuj» (Apoc. 21:22, 23). Kykyaqil qeju at kyoklen tiʼj Akʼaj Jerusalén, che tel tukʼil Jehová (Heb. 7:27; Apoc. 22:3, 4). Tuʼntzunju, in tzaj qʼamaʼn qa in nok Jehová ex Jesús te tja Dios toj tnam.

16. ¿Alkyeqe kʼiwlabʼil tzul kykʼamoʼn xjal aj Tkawin Jesús toj Mil Abʼqʼi?

¹⁶ In che tzalaj okslal skʼoʼn maj aj kyximen tiʼj tnam lu. Pero nya oʼkx kye tuʼn kyximen tiʼj, sino ax ikx qeju che anqʼil te jumajx tzalu twitz Txʼotxʼ. Aj Tkawin Jesús toj Mil Abʼqʼi, tzul tqʼoʼn Akʼaj Jerusalén nim kʼiwlabʼil kyibʼaj qeju che anqʼil tzalu twitz Txʼotxʼ. Ok tkeʼyin Juan qa in che ok kʼiwlabʼil lu ik tzeʼn «aʼ te chwinqlal». Ax ikx, ok tkeʼyin qa ateʼ «tzeʼ te chwinqlal» ttziʼ aʼ lu ex «atzun kyxaq tzeʼ in ajbʼen te qʼanbʼil kye nasyon» (Apoc. 22:1, 2). Kykyaqil qeju xjal che anqʼil toj ambʼil lu, che tzalajel kyiʼj kʼiwlabʼil lu. Qa kukx ma che nimen, chebʼe chebʼe che okel te tzʼaqli. Ya mlay ten yabʼil, kʼixkʼoj nix bʼis (Apoc. 21:3-5).

17. ¿Alkyeqe che tzalajel kyiʼj tbʼanel kʼiwlabʼil aj Tkawin Jesús toj Mil Abʼqʼi? (Apocalipsis 20:11-13).

¹⁷ ¿Alkyeqe che tzalajel kyiʼj tbʼanel kʼiwlabʼil lu? Tnejel, aqeju che kyjel anqʼin aj tbʼaj qʼoj Armagedón ex qe kʼwal che ul itzʼj toj akʼaj twitz Txʼotxʼ. Pero ateʼ junjuntl xjal che tzalajel tiʼj. In tzaj tqʼamaʼn Apocalipsis capítulo 20 qa che jawil anqʼin kyimni (kjawil uʼjit Apocalipsis 20:11-13). ¿Alkyetzun qeju che kjawil anqʼin? Che kjawil anqʼin xjal tzʼaqli, toj juntl yol, kykyaqil tmajen Jehová  e kyim toj ambʼil ojtxe. Ax ikx, che kjawil anqʼin xjal nya tzʼaqli, toj juntl yol, kykyaqil qeju mintiʼ el kynikʼ tiʼj Jehová (Hech. 24:15; Juan 5:28, 29). ¿Ape t-xilen jlu qa che kjawil anqʼin kykyaqil xjal aj Tkawin Jesús toj Mil Abʼqʼi? Miʼn. Aqeju el kynikʼ tiʼj Jehová ex mintiʼ e ajbʼen te, mlay che jaw anqʼin. Xi qʼoʼn ambʼil kye tuʼn tkubʼ kyyekʼin qa kyaj tuʼn kyanqʼin toj Paraíso, pero mintiʼ ajbʼen ambʼil lu kyuʼn toj tumel (Mat. 25:46; 2 Tes. 1:9; Apoc. 17:8; 20:15).

18. ¿Tzeʼn kyanqʼibʼil xjal ktel aj tkubʼaj mil abʼqʼi?

¹⁸ Aj tkubʼaj mil abʼqʼi, ya otoq che ok xjal te tzʼaqli. Ya otoq che etz tjaqʼ il ex tjaqʼ kamik kyaj tqʼoʼn Adán kyibʼaj (Rom. 5:12). Ya mlay tzaj naʼn nya bʼaʼn otoq tzaj tuʼn Adán. Jaku txi qqʼamaʼn qa ktel axix tok kychwinqlal xjal aj tkubʼaj mil abʼqʼi tuʼnju che okel te tzʼaqli (Apoc. 20:5).

19. ¿Tiquʼn il tiʼj tuʼn tok mankbʼil joybʼil?

¹⁹ Ojtzqiʼn quʼn qa kukx ten Jesús tzʼaqli twitz Jehová maske ok tilil tuʼn Satanás tuʼn tel txalpaj. ¿Axpe jlu kbʼantel kyuʼn xjal aj kyok te tzʼaqli ex aj kyok toj joybʼil tuʼn Satanás? Teyele junjun kxel tqʼoʼn tzaqʼwebʼil tiʼj xjel lu aj tetz tzaqpiʼn Satanás toj jul aj tkubʼaj mil abʼqʼi (Apoc. 20:7). Kykyaqil qeju che tel tzʼaqli twitz Jehová toj mankbʼil joybʼil, tzul qʼoʼn kychwinqlal te jumajx ex che tzalajel tiʼj axix tok tzaqpibʼil (Rom. 8:21). Atzun qeju mlay che bʼin te Jehová, che kbʼel najsaʼn te jumajx ik tzeʼn kbʼajel tiʼj Satanás ex kyiʼj demonio (Apoc. 20:8-10).

20. ¿Tiʼ teya in kubʼ tnaʼn tiʼjju xnaqʼtzbʼil tkuʼx toj uʼj te Apocalipsis?

²⁰ ¿Tiʼ teya in kubʼ tnaʼn tiʼjju xnaqʼtzbʼil tkuʼx toj uʼj te Apocalipsis? ¿In jawpe tzalaja aj t-ximana tiʼj qa ata toj foto ex aj tok tkeʼyina aj tjapun kywiʼ profecía? ¿In kubʼpe t-ximana tuʼn t-xi tqʼoʼna txokbʼil kyiʼj txqantl xjal tuʼn kyonin tiʼj kʼulbʼil axix tok? (Apoc. 22:17). In kubʼ qnaʼn nimxix tzalajbʼil tuʼnju ma tzʼel qnikʼ tiʼjju kbʼajel toj ambʼil tzul ex qaj tuʼn t-xi qqʼamaʼn jlu ik tzeʼn te apóstol Juan: «Bʼant-xwit ikju. Tzaja Qajaw Jesús» (Apoc. 22:20).