1, 2. ¿Tiquʼn mas jaku tzʼok qqʼoʼn kyoklen junjun nabʼil tkuʼx toj Tyol Dios?

 MA PON qʼij tuʼn tkubʼ ikʼset mejebʼleʼn. Bʼinchaʼn tten qʼa ex txin ex in nok kyqʼoʼn kywiʼ kyiʼj nabʼil in netz tqʼoʼn erman toj chikʼbʼabʼil. Ya ojtzqiʼn qe nabʼil lu kyuʼn. Pero mas in nok kyqʼoʼn toklen toj qʼij aju tuʼnju kbʼel kyqʼoʼn toj xnaqʼtzbʼil toj kymejebʼleʼn.

² Chʼixme ax jlu in bʼaj aj tjaw kychʼiysaʼn mambʼaj kykʼwal. Bʼalo o tzʼok tbʼiʼn jun mejebʼleʼn nim chikʼbʼabʼil tiʼjju tzeʼn tuʼn kyjaw chʼiyset kʼwal. Pero mas in nok kyqʼoʼn kyoklen nabʼil lu aj kyul kykʼwal. ¡In tzaj qʼoʼn jun tbʼanel kyoklen! Aj tchʼexpaj jun tiʼ toj qanqʼibʼil, maslo in nok qqʼoʼn kyoklen junjun nabʼil ojtzqiʼn quʼn. Tuʼntzunju, in nok tilil kyuʼn tmajen Jehová tuʼn kyuʼjin «tkyaqil qʼij» tiʼj Xjan Uʼj ex tuʼn kyximen tiʼj ik tzeʼn bʼant kyuʼn aj kawil te Israel (Deut. 17:19).

3. ¿Tiʼ kʼelel qnikʼ tiʼj toj xnaqʼtzbʼil lu?

³ O tzaj qʼoʼn jun tbʼanel oklenj kye mambʼaj, jaku che onin kyiʼj kykʼwal tuʼn tel kynikʼ tiʼj Jehová. Noqtzun tuʼnj, nya oʼkx tuʼn t-xi kyqʼoʼn mambʼaj xnaqʼtzbʼil tiʼj Tyol Dios kye kykʼwal, sino il tiʼj tuʼn kyonin kyiʼj tuʼn tok kykʼujlaʼn Jehová. ¿Tzeʼn jaku bʼant jlu kyuʼn? Toj xnaqʼtzbʼil lu, kʼelel qnikʼ kyiʼj kyaje nabʼil jaku che onin kyiʼj (2 Tim. 3:16). Ax ikx, kʼelel qnikʼ tiʼj tzeʼn o che  onin nabʼil tkuʼx toj Tyol Dios kyiʼj junjun mambʼaj.

4. ¿Alkye nabʼil jaku tzʼonin kyiʼj mambʼaj tuʼn kyonin kyiʼj kykʼwal tuʼn tok kykʼujlaʼn Jehová? (Santiago 1:5).

⁴ Tnejel, che jyone onbʼil tukʼil Jehová. Nim toklen tuʼn tten tnabʼila tuʼntzun tonina kyiʼj tkʼwala tuʼn tok kykʼujlaʼn Jehová. Tuʼntzunju, qaninxa onbʼil te (kjawil uʼjit Santiago 1:5). Oʼkx Jehová jaku tzaj qʼonte tbʼanel qconsej. In xi qqʼamaʼn jlu tuʼnju oʼkx te at nim tnabʼil twitz tkyaqil tbʼinchbʼen (Sal. 36:9). Ax ikx, in che onin qe tbʼanel tconsej qiʼj (Is. 48:17).

5. a) ¿Alkyeqe onbʼil o tzaj tqʼoʼn ttnam Jehová kye mambʼaj? b) ¿Tiʼ xnaqʼtzbʼil jaku tzʼel tiʼna kyiʼj erman Amorim tej tjaw kychʼiysaʼn kykʼwal?

⁵ In najbʼen Xjan Uʼj tuʼn Jehová ex ttnam tuʼntzun tonin kyiʼj mambʼaj tuʼn kychʼiy kykʼwal toj kyokslabʼil (Mat. 24:45). Jun techel, jaku che kanet tbʼanel consej kyuʼn toj kʼloj xnaqʼtzbʼil «Ayuda para las familias», aju etz toj uʼj ¡Weʼktza! etz toj kastiy ex jaʼlo tkubʼ toj jw.org. Ax ikx, jaku che kanet video kyuʼn aju in tzaj kyyekʼin tzeʼn jaku txi kybʼiʼn junjun consej tuʼntzun kyonin kyiʼj kykʼwal (Prov. 2:4-6). *

6. ¿Tiʼ t-ximbʼetz jun mejebʼleʼn at tiʼj onbʼil in tzaj tqʼoʼn ttnam Jehová kye?

⁶ Ateʼ nim mambʼaj o txi kyqʼoʼn chjonte te Jehová tuʼnju in tzaj tqʼoʼn ttnam onbʼil kye. In tzaj tqʼamaʼn jun mambʼaj jlu aju Joseph tbʼi: «Kwest tuʼn qonine kyiʼj oxe qkʼwale tuʼn tok kykʼujlaʼn Jehová. Kukx in xi qqanine onbʼil te Jehová tukʼil nxuʼjile. Chʼixme tkyaqil maj, o tzʼetz jun video moqa jun xnaqʼtzbʼil toj ambʼil atxix tajbʼen qeye. Kukx o qo jyone onbʼil tukʼil Jehová». O tzʼel tnikʼ Joseph tiʼj tukʼil t-xuʼjil qa o che onin xnaqʼtzbʼil ex qe video kyiʼj kykʼwal tuʼn kyok te tamiw Jehová.

7. ¿Tiquʼn nim toklen tuʼn tkubʼ kyqʼoʼn mambʼaj jun tbʼanel techel kywitz kykʼwal? (Romanos 2:21).

⁷ Tkabʼin, che pakbʼane tukʼil kybʼinchbʼene. Tok kywitz kʼwal tiʼj tkyaqil  ex in nel kykanoʼn tiʼjju in bʼant kyuʼn kyman. Ni jun mambʼaj in nok te tzʼaqli (Rom. 3:23). Pero qa at kynabʼil mambʼaj, in nok tilil kyuʼn tuʼn tkubʼ kyqʼoʼn jun tbʼanel techel kywitz kykʼwal (kjawil uʼjit Romanos 2:21). Tej tyolin jun mambʼaj kyiʼj kʼwal, tqʼama jlu: «In nel kykanoʼn kʼwal tkyaqilju in nok kykeʼyin». Ex tqʼamatl jlu: «Qa in nok kykeʼyin qa mintiʼ in kubʼ qbʼinchaʼn aju in xi qqʼamaʼn kye, tzul kyqʼamaʼn qe». Tuʼntzunju, qa qaj tuʼn tok kykʼujlaʼn qkʼwal Jehová, nim toklen tuʼn tchʼiy qkʼujlabʼil tiʼj ex tuʼn tkubʼ qyekʼin kywitz.

8, 9. ¿Tiʼ xnaqʼtzbʼil jaku tzʼel qiʼn tiʼjju tqʼama Andrew ex Emma?

⁸ Jaku bʼant nim tiʼchaq kyuʼn mambʼaj tuʼntzun t-xi kyxnaqʼtzaʼn kykʼwal tuʼn tok kykʼujlaʼn Jehová. Qbʼinx aju tqʼama Andrew, jun kuʼxun te 17 abʼqʼi ex o bautisarin: «O tzaj kyyekʼin nmane weye qa nim toklen tuʼn qnaʼn Dios. Tkyaqil qonikʼen, naʼn nmane Dios wukʼile maske otoq chin naʼne Dios. Kukx tzaj kyqʼamaʼn qmane jlu qeye: ‹Jaku che naʼne Dios te Jehová noq jteʼxku maj›. Tuʼntzunju, nim toklen naʼj Dios toj nwitze. In chin tzalaje aj nnaʼne Dios ex in nok nqʼoʼne Jehová ik tzeʼn jun mambʼaj». Aqeye mambʼaj, bʼaʼn tuʼn ttzaj kynaʼne qa jaku tzʼonin kyiʼj kykʼwale qa ma tzʼok kykʼujlaʼne Jehová.

⁹ Atzun jaʼlo, qo yolin tiʼjju tqʼama Emma. Tej tkyaj kolin ttxuʼ tuʼn tman, kyaj tqʼoʼn tman nim kʼas kyibʼaj toj tja. Naʼnx jlu tuʼn Emma: «Nim maj, mintiʼ kanin tpwaq ntxuʼye. Pero tkyaqil maj tzaj tqʼamaʼn qeye qa in xqʼuqin Jehová kyiʼj tmajen ex qa in tzaj tqʼoʼn aju at tajbʼen kye. Tuʼn tbʼinchbʼen, el nnikʼe tiʼj qa qʼuqli tkʼuʼj tiʼj jlu. Pakbʼan ntxuʼye tukʼil tbʼinchbʼen». ¿Tiʼ xnaqʼtzbʼil jaku tzʼel qiʼn tiʼj? In tzaj tyekʼin qe qa jaku kubʼ kyqʼoʼn mambʼaj tbʼanel techel kywitz kykʼwal maske in che ok weʼ twitz nya bʼaʼn (Gál. 6:9).

10. ¿Toj alkye ambʼil jakutoq che yolin aj Israel tiʼj Jehová kyukʼil kykʼwal? (Deuteronomio 6:6, 7).

¹⁰ Toxin, kyxnaqʼtzanx kyibʼe tuʼn kyyoline kyukʼil kykʼwale. Xi tqʼamaʼn Jehová kye aj Israel tuʼn kyyolin tiʼj kyukʼil kykʼwal tkyaqil qʼij (kjawil uʼjit Deuteronomio 6:6, 7). Akux in nex qʼij, jakutoq che yolin tiʼj Jehová kyukʼil kykʼwal tuʼntzun tok kykʼujlaʼn. Jun techel, jakutoq che yolin mambʼaj kyukʼil kykʼwal tiʼj Jehová tej kyonin kyiʼj tuʼn tok awal moqa tuʼn tjaw chmet. Ax ikx kye tal txin, jakutoq che yolin kyukʼil kytxuʼ tej kyonin kyiʼj tuʼn tbʼant junjun aqʼuntl toj ja. Toj ambʼil lu, jakutoq che yolin tiʼj tkʼujlabʼil Jehová ex tzeʼn in xqʼuqin kyiʼj.

11. ¿Toj alkye ambʼil jaku che yolin mambʼaj kyukʼil kykʼwal?

¹¹ O chʼexpaj qanqʼibʼil toj ambʼil jaʼlo. Kyoj junjun tnam, mintiʼ in ten ambʼil kyiʼj mambʼaj tuʼn kyten junx kyukʼil kykʼwal tuʼnju in che aqʼunan moqa tuʼnju in cheʼx kʼwal toj escuela. Tuʼntzunju, il tiʼj tuʼn tok tilil kyuʼn mambʼaj tuʼn kyten kyukʼil kykʼwal ex tuʼn kyyolin kyukʼil (Efes. 5:15, 16; Filip. 1:10). Jaku che yolin kyukʼil kykʼwal aj kykʼulin junx te Jehová tkyaqil seman. Tqʼama jun kuʼxun jlu, aju Alexander tbʼi: «In nel tpaʼn nmane ambʼil tuʼntzun  qkʼuline te Jehová tkyaqil seman ex mintiʼ jun tiʼ in nel qʼinte ambʼil qeye. Aj qbʼaj xnaqʼtzane, in qo kyaj tene yolil».

12. ¿Tiʼ bʼaʼn tuʼn ttzaj tnaʼn jun mambʼaj aj tok tkʼulbʼil te Jehová kyukʼil toj tja?

¹² ¿Tiʼ jaku bʼant tuʼn jun mambʼaj tuʼntzun kytzalaj toj tja aj kykʼulin te Jehová? Jun techel, jaku che xnaqʼtzan junx tiʼj akʼaj libro Tzalaja tiʼj tanqʼibʼila. Qa ma che xnaqʼtzan junx tiʼj libro lu, jaku tzaj tqʼoʼn ambʼil kye tuʼn kyyolin. Ex tuʼnju kyaj mambʼaj tuʼn t-xi kyqʼamaʼn kykʼwal kye tiʼ in kubʼ kyximen ex tiʼ in kubʼ kynaʼn, mintiʼ tuʼn kyok ten ilil kyiʼj aj kykʼulin te Jehová. Qa ma txi kyqʼamaʼn kykʼwale jun tiʼ mintiʼ in tzaj tqʼamaʼn Tyol Dios, miʼn tzaj kyqʼoje. Sino kyqʼonxe chjonte kye tuʼnju in tzaj kyqʼamaʼn aju in kubʼ kyximen ex kyqʼamanxe kye tuʼn kukx tbʼant jlu kyuʼn. Qa ma txi kyqʼamaʼn kykʼwale kyeye tiʼ in kubʼ kynaʼn, mas nya kwest jaku che onine kyiʼj.

13. ¿Toj alkye juntl ambʼil jaku che onin mambʼaj kyiʼj kykʼwal tuʼn kyok laqʼeʼ ttxlaj Jehová?

¹³ Aqeye mambʼaj, bʼaʼn tuʼn t-xi kyjyoʼne jun ambʼil aj tex qʼij tuʼn kyonine kyiʼj kykʼwale tuʼn kyok laqʼeʼ ttxlaj Jehová. Nya a t-xilen jlu qa tkyaqil maj che kbʼel qeʼye xnaqʼtzal tiʼj Tyol Dios kyukʼil kykʼwale tuʼntzun kyyoline tiʼj Jehová. Tqʼama jun txubʼaj jlu, aju Lisa tbʼi: «E ajbʼen tbʼinchbʼen Jehová quʼne tuʼntzun qyoline tiʼj kyukʼil qkʼwale. Jun techel, tej kyjaw tzeʼn tiʼjju in bʼant tuʼn qtxʼyane, xi qqʼamaʼne kye qa in tzalaj Jehová ex qa nim toklen qchwinqlal toj twitz ik tzeʼn qe».

14. ¿Tiquʼn nim toklen tuʼn kyonin mambʼaj kyiʼj kykʼwal tuʼn kyten tbʼanel kyamiw? (Proverbios 13:20).

¹⁴ Tkyajin, che onine kyiʼj kykʼwale tuʼn kyten tbʼanel kyamiw. In tzaj tqʼamaʼn Tyol Dios qa jaku che onin qamiw qiʼj tuʼn tkubʼ qbʼinchaʼn aju bʼaʼn moqa aju nya bʼaʼn (kjawil uʼjit Proverbios 13:20). Aqeye mambʼaj, ¿ojtzqiʼnpe kyuʼne alkyeqe kyamiw kykʼwale ateʼ? ¿Ope  che tene kyukʼil ex ojtzqiʼnpe kywitz kyuʼne? ¿Tiʼ jaku bʼant kyuʼne tuʼn tok kyamiwen kyibʼ kykʼwale kyukʼil qeju kʼujlaʼn Jehová kyuʼn? (1 Cor. 15:33). Aj tkubʼ t-ximana tuʼn tbʼant jun tiʼ tuʼna kyukʼil toj tjaya, jaku txi tqʼoʼna txokbʼil kyiʼj erman at jun tbʼanel kyamiwbʼil tukʼil Jehová (Sal. 119:63).

15. ¿Tiʼ jaku bʼant kyuʼn mambʼaj tuʼn kyonin kyiʼj kykʼwal tuʼn kyten tbʼanel kyamiw?

¹⁵ Qo yolin tiʼj jun techel. In tzaj tqʼamaʼn jun mambʼaj Tony tbʼi tiʼ o bʼant tuʼn tukʼil t-xuʼjil tuʼn kyonin kyiʼj kykʼwal tuʼn kyten tbʼanel kyamiw. Tqʼama jlu: «Atxix ojtxe, in xi qqʼoʼne txokbʼil kyiʼj erman te junxichaq kyabʼqʼi ex kykostumbr. In qo wane junx ex in qo tzalaje aj tok qkʼulbʼile te Jehová. In kubʼ qximane qa atzun jun tumel tuʼn tok qojtzqiʼne qe erman kʼujlaʼn Jehová kyuʼn ex in che tzalaj aj kyajbʼen te. Axpe ikx, o che kyaj ten ansyan in che bʼet kyojele Ja te Chmabʼil qjaye ex qe misionero ex junjuntl erman. O tzʼel qnikʼe tiʼj qa o tzʼonin kyiʼj qkʼwale tuʼn kyok laqʼeʼ ttxlaj Jehová aj tok kybʼiʼn tiʼ in bʼant kyuʼn erman lu tuʼn kyajbʼen te Jehová tukʼil tzalajbʼil». Aqeye mambʼaj, tzʼok tilil kyuʼne tuʼn kyonine kyiʼj kykʼwale tuʼn kyten tbʼanel kyamiw.

16. ¿Tiʼ bʼaʼn tuʼn ttzaj kynaʼn mambʼaj qa ma kyaj tkolin jun kykʼwal tuʼn tajbʼen te Jehová?

¹⁶ ¿Yajtzun qa ma tzaj tqʼamaʼn jun kykʼwale kyeye qa nya taj tuʼn tajbʼen te Jehová maske otoq tzʼok tilil kyuʼne tuʼn t-xi kyqʼoʼne xnaqʼtzbʼil te? Miʼn kubʼ kyximane qa nya tbʼanel aqʼuntl otoq bʼant kyuʼne. O tzaj tqʼoʼn Jehová ambʼil qe qkyaqilx tuʼn tkubʼ qximen qa qo ajbʼel te moqa miʼn. Qa ma kubʼ t-ximen jun kykʼwale tuʼn tel tpan tibʼ tiʼj Jehová, miʼn kubʼ kyximane qa mlayx meltzʼaj. Bʼaʼn tuʼn ttzaj kynaʼne txʼolbʼabʼil tiʼj kʼwal el tzpet (Luc. 15:11-19, 22-24). El tpan tibʼ kʼwal lu tiʼj tbʼanel bʼe, pero meltzʼaj tej tbʼet ambʼil. Noqtzun tuʼnj, jaku kubʼ t-ximana jlu:  «Noq jun txʼolbʼabʼil jlu. Mintiʼ in bʼaj jlu toj qanqʼibʼil». Qo yolil tiʼjju bʼaj tiʼj Elie tuʼntzun tel qnikʼ tiʼj qa ax tok in bʼaj jlu.

17. ¿Tzeʼn in nonin tiʼja aju bʼaj tiʼj Elie?

¹⁷ Tej tyolin Elie kyiʼj tman, tqʼama jlu: «Ok tilil kyuʼn tuʼn kyonin wiʼje tuʼn tok nkʼujlaʼne Jehová ex Tyol. Pero tej wokxe toj nkuxumale, ya mintiʼ in nimane te Jehová». Ok ten Elie bʼinchal nya bʼaʼn ex el tikʼun tkyaqil onbʼil xi qʼoʼn te kyuʼn tman. Kyaj tkolin tja ex ya mintiʼ ok tqʼoʼn kyoklen qe tkawbʼil Jehová. Maske ikju, at maj yolin tiʼj Tyol Dios tukʼil jun tamiw. Tqʼama Elie jlu: «Tej nyoline tiʼj Jehová tukʼil wamiwe, mastoq in chin ximane tiʼj. Chebʼe chebʼe chʼiy juntl maj axix tok toj wanmiye, aju otoq tzaj kyyekʼin nmane weye». Tej tbʼet ambʼil, meltzʼaj Elie toj ttnam Jehová. * Jaku txi qqʼamaʼn qa kubʼ kynaʼn tman Elie nim tzalajbʼil tuʼnju xi kyyekʼin axix tok te tej tzmatoq kʼwalx (2 Tim. 3:14, 15).

18. ¿Tiʼ t-ximbʼetza at kyiʼj mambʼaj in nok tilil kyuʼn tuʼn kyonin kyiʼj kykʼwal tuʼn tok kykʼujlaʼn Jehová?

¹⁸ Aqeye mambʼaj, o tzaj tqʼoʼn Jehová jun kyoklene tuʼn kyonine kyiʼj akʼaj tmajen (Sal. 78:4-6). Kwest aqʼuntl in bʼant kyuʼne, tuʼntzunju, in xi qqʼoʼne chjonte kyeye tuʼnju in nok tilil kyuʼne tuʼn t-xi kyyekʼine axix tok kye kykʼwale. Kukx tzʼok tilil kyuʼne tuʼn kyonine kyiʼj kykʼwale tuʼn tok kykʼujlaʼn Jehová ex tuʼn t-xi kyniman qe tkawbʼil (Efes. 6:4). Qa ma bʼant jlu kyuʼne, jaku tzʼok qeʼ kykʼuʼje tiʼj qa ktzalajel tanmi Jehová kyuʼne.