1. ¿Tiquʼn qkyaqilx qaj tuʼn ttzaj qʼoʼn qnabʼil tuʼn Dios? (Proverbios 4:7).

 ¿OPE kubʼ t-ximana tuʼn tbʼant jun tiʼ nim toklen tuʼna? Qa ikju, xilo tqanina tnabʼila te Jehová tuʼnju el tnikʼa tiʼj qa taja onbʼil (Sant. 1:5). Kubʼ ttzʼibʼin rey Salomón jlu: «Aju tuʼn tbʼant tuʼna tnejel twitz tkyaqil, jyoma aju nabʼl» (kjawil uʼjit Proverbios 4:7). Mintiʼ yolin Salomón tiʼj alkyexku nabʼil, sino atz yolin tiʼj nabʼil tzajni tukʼil Jehová (Prov. 2:6). ¿Jakupe che onin tnabʼil Jehová qiʼj tuʼn qex kywitz nya bʼaʼn toj ambʼil jaʼlo? Jaku. Atzun jlu kʼelel qnikʼ tiʼj toj xnaqʼtzbʼil lu.

2. ¿Tiʼ jaku bʼant quʼn tuʼn tten qnabʼil?

² Jun tumel tuʼn tten qnabʼil, aju qa ma qo xnaqʼtzan ex qa ma txi qbʼiʼn qe xnaqʼtzbʼil kyaj kyqʼoʼn kabʼe xjal ten nim kynabʼil. Tnejel, qo yolil tiʼj Salomón. In tzaj tqʼamaʼn Biblia qa «tzaj tqʼoʼn Dios nimxix tnabʼl Salomón tukʼix tojtzqibʼl» (1 Rey. 4:29). Ex tkabʼin, qo yolil tiʼj Jesús, aju xjal mas nim tnabʼil o tzʼanqʼin tzalu twitz Txʼotxʼ (Mat. 12:42). Tej tyolin Tyol Dios tiʼj Jesús, kyaj qʼamaʼn profecía jlu tiʼj: «Kukx ktel T-xew Qman tukʼil tiyjil David ex kxel tqʼoʼn tojtzqibʼl tuʼn tel tnikʼ tiʼj tkyaqil; kxel tqʼoʼn tnabʼl» (Is. 11:2).

3. ¿Tiʼ kʼelel qnikʼ tiʼj toj xnaqʼtzbʼil lu?

³ Tuʼnju a Jehová tzaj qʼonte tnabʼil Salomón ex Jesús, kyaj kyqʼamaʼn junjun tbʼanel consej jaku che onin qiʼj toj ambʼil jaʼlo. Toj xnaqʼtzbʼil lu, qo xnaqʼtzal kyiʼj oxe consej. Kʼelel qnikʼ tiʼj qa nim toklen tuʼn tten qximbʼetz  toj tumel tiʼj pwaq, tiʼj aqʼuntl ex qiʼjx.

4. ¿Tzeʼntoq tanqʼibʼil Salomón ex Jesús?

⁴ Ten nim tqʼinumabʼil Salomón ex ten nim tiʼchaq te (1 Rey. 10:7, 14, 15). Atzunte Jesús mintiʼ ten nim tiʼchaq te ex mintiʼ ten jun tja (Mat. 8:20). Maske ikju, ten t-ximbʼetz Salomón ex Jesús toj tumel kyiʼj tiʼchaq tuʼnju atz tzaj kynabʼil tukʼil Jehová.

5. ¿Tiʼ t-ximbʼetz Salomón ten tiʼj pwaq?

⁵ El tnikʼ Salomón tiʼj qa «in kolin» pwaq qiʼj (Ecl. 7:12). In najbʼen pwaq tuʼn tkanet qe tiʼchaq at tajbʼen qe ex tuʼn ttzaj qlaqʼoʼn junjun tiʼchaq qgan. Maske attoq nim tqʼinumabʼil Salomón, el tnikʼ tiʼj qa ateʼ junjuntl tiʼchaq mas nim kyoklen. Jun techel, kubʼ ttzʼibʼin jlu: «Mas bʼaʼn qa in yolinjtz bʼaʼn tiʼj jun xjal twitzju tuʼn tten tqʼinumabʼl» (Prov. 22:1). Ax ikx, el tnikʼ tiʼj qa mintiʼ in che tzalaj xjal qa oʼkx tok kywiʼ tiʼj qʼinumabʼil (Ecl. 5:10, 12). Ex kyaj tqʼamaʼn qa mintiʼ tuʼn tok qeʼ qkʼuʼj tiʼj qʼinumabʼil tuʼnju noq minabʼen jaku kubʼ naj (Prov. 23:4, 5).

6. ¿Tiʼ t-ximbʼetz Jesús ten kyiʼj tiʼchaq? (Mateo 6:31-33).

⁶ Ten t-ximbʼetz Jesús toj tumel kyiʼj tiʼchaq. Tzalaj tej twan ex tej tkʼan (Luc. 19:2, 6, 7). Toj jun maj, ok tqʼoʼn aʼ te tbʼanel vin ex atzun tnejel milagr bʼant tuʼn (Juan 2:10, 11). Ex tej tkyim, toktoq jun tbʼanel t-xbʼalun (Juan 19:23, 24). Noqtzun tuʼnj, nya a jlu ok tqʼoʼn mas toklen. Kyaj tqʼamaʼn jlu kye t-xnaqʼtzbʼen: «Mi jun xjal jaku bʼant tuʼn tajbʼen te kabʼe patrón [...]. Mlayx bʼant tuʼn kyajbʼene te Dios ex te qʼinumabʼl» (Mat. 6:24). Kyaj tqʼamaʼn Jesús qa ktzajel tqʼoʼn Jehová aju at tajbʼen qe qa ma kubʼ qqʼoʼn Tkawbʼil tnejel toj qanqʼibʼil (kjawil uʼjit Mateo 6:31-33).

7. ¿Tiʼ kʼiwlabʼil o tzaj tkʼamoʼn jun ermano tuʼnju o ten t-ximbʼetz toj tumel tiʼj pwaq?

 ⁷ O tzʼonin qe tbʼanel consej o tzaj tqʼoʼn Jehová tiʼj pwaq kyiʼj nim erman. Qo yolil tiʼjju bʼaj tiʼj jun ermano Daniel tbʼi, aju naʼmx tkubʼ mojeʼ. Tqʼama jlu: «Tej tzmatoq kuʼxun qine, kubʼ nximane tuʼn tkubʼ nqʼoʼne Tkawbʼil Jehová tnejel toj wanqʼibʼile». Tuʼnju o tzʼok tilil tuʼn Daniel tuʼn tanqʼin tukʼil nya nim tiʼchaq, o ten ambʼil tiʼj tuʼn tonin kyiʼj erman aj ttzaj jun xitbʼil ex tuʼn tajbʼen toj Betel. Tqʼamatl jlu: «Mintiʼ o tzaj nbʼise tiʼjju jaw njyoʼne. Jakutoq kanet nim npwaqe noqwit kubʼ nximane tuʼn woke te qʼinun. Noqwit bʼant jlu wuʼne, mintiʼwtlo o che kanet tbʼanel wamiwe ateʼ jaʼlo. In chin tzalaje tuʼnju in kubʼ nqʼoʼne Tkawbʼil Dios tnejel toj wanqʼibʼile ex mlay kubʼ nnaʼne tzalajbʼil lu tuʼn pwaq. Mlay tzʼok nmojbʼaʼne qe kʼiwlabʼil o tzaj tqʼoʼn Jehová weye tukʼil pwaq». Tuʼn jlu, in nel qnikʼ tiʼj qa ktzajel qkʼamoʼn nim kʼiwlabʼil qa ma kubʼ qqʼoʼn qajbʼebʼil te Jehová tnejel toj qanqʼibʼil.

8. ¿Tiquʼn ojtzqiʼn quʼn qa ten t-ximbʼetz Salomón toj tumel tiʼj aqʼuntl? (Eclesiastés 5:18, 19).

⁸ Tqʼama Salomón qa «jun oyaj tuʼn Dios» aj qtzalaj tiʼj qaqʼun (kjawil uʼjit Eclesiastés 5:18, 19). Ax ikx, kubʼ ttzʼibʼin jlu: «Aju xjal in aqʼnan, at tkambʼabʼl [te] tiʼj jlu» (Prov. 14:23). Nya oʼkx yolin Salomón, sino ojtzqiʼntoq tuʼn tzeʼn aqʼuntl. Jaw tbʼinchaʼn qe ja, kux tawaʼn qe tqan uva, e ten tbʼanel tjardín ex bʼant junjuntl aqʼuntl tuʼn (1 Rey. 9:19; Ecl. 2:4-6). Tuʼn jlu, in nel qnikʼ tiʼj qa nim aqʼunan Salomón. Jaku txi qqʼamaʼn qa tzalaj Salomón tuʼn jlu, pero el tnikʼ tiʼj qa nya oʼkx tuʼn jlu jaku tzalaj. Ax ikx, bʼant nim tiʼchaq tuʼn tiʼj Jehová. Jun techel, kubʼ nej twitz aqʼuntl tej tjaw bʼinchet tja Dios, aju xi tiʼn wuq abʼqʼi tuʼn tbʼant (1 Rey. 6:38; 9:1). Maske otoq bʼant nim tiʼchaq tuʼn Salomón, el tnikʼ tiʼj qa mas nim toklen qajbʼebʼil te Jehová. Tuʼntzunju, kubʼ ttzʼibʼin jlu: «Aju yol kxel nmaʼne te bʼajsbʼil atzun jlu: Nimana te Dios ex japunx qe tmandamyent tuʼna» (Ecl. 12:13).

9. ¿Tiʼ bʼant tuʼn Jesús tuʼn tten t-ximbʼetz toj tumel tiʼj aqʼuntl?

⁹ Ax ikx te Jesús ok tilil tuʼn tuʼn taqʼunan. Tej tzmatoq kuʼxun, aqʼunan te carpintero (Mar. 6:3). Kubʼlo kynaʼn tman Jesús nim tzalajbʼil tuʼnju onin kyiʼj tuʼn tkanet qe tiʼchaq at tajbʼen kye. Tuʼnju tzʼaqli te Jesús, bʼant tbʼanel aqʼuntl tuʼn ex nimlo xjal e jyon tiʼj. Nimxixlo tzalaj Jesús tej taqʼunan. Pero mintiʼ xi tqʼoʼn ambʼil te aqʼuntl tuʼn tel tiʼn ambʼil tiʼj tuʼn tajbʼen te Jehová (Juan 7:15). Tej tajbʼen te Jehová toj tkyaqil ambʼil, tqʼama jlu: «Miʼn che aqʼnane tiʼj ju wabʼj in bʼaj, oʼkx che aqʼnane tiʼj ju wabʼj mlay bʼaj ex in tqʼoʼn kychwinqlale te jumajx» (Juan 6:27). Ex toj tchikʼbʼabʼil ex tqʼoʼn twi jun witz, tqʼama jlu: «Kychmome kyqʼinumabʼle tuj kyaʼj» (Mat. 6:20).

10. Qa tbʼanel qo aqʼunan, ¿tiʼ joybʼil jaku qo ok weʼ twitz?

¹⁰ In nonin qnabʼil in tzaj tqʼoʼn Jehová tuʼn tten qximbʼetz toj tumel tiʼj aqʼuntl. In tzaj tqʼamaʼn Jehová kye tmajen tuʼn kyaqʼunan ex tuʼn tbʼant «jun aqʼuntl tuj tumelxix» kyuʼn (Efes. 4:28). Chʼixme tkyaqil maj, in nok kyqʼoʼn patrón kywitz tiʼj qa mintiʼ in qo  elqʼan ex qa aqʼunal xjal qoʼ, ex tuʼn jlu jaku tzaj kyqʼamaʼn qe qa in che tzalaj tiʼj qaqʼun. Tuʼnju qaj tuʼn tten tbʼanel t-ximbʼetz qpatrón kyiʼj testigo de Jehová, jakulo kubʼ qximen tuʼn qaqʼunan mas or. Pero qa ma bʼant jlu quʼn, jaku tzikʼ tnaʼl quʼn aju mas nim toklen ik tzeʼn tuʼn qten kyukʼil toj qja ex tuʼn qajbʼen te Jehová. Qa ma bʼaj jlu qiʼj, il-lo tiʼj tuʼn tten juntl maj qximbʼetz toj tumel tiʼj aqʼuntl.

11. ¿Tiʼ el tnikʼ William tiʼj tej tok tkeʼyin aju in bʼant tuʼn jun ansyan?

¹¹ Qo yolin tiʼjju bʼaj tiʼj jun kuʼxun William tbʼi. El tnikʼ tiʼj tzeʼn tuʼn tten t-ximbʼetz toj tumel tiʼj aqʼuntl. Toj jun ambʼil, aqʼunan tukʼil jun ansyan jatumel ok tchmon tibʼ. Tej tyolin tiʼj ansyan tqʼama jlu: «In kubʼ tqʼoʼn ermano jun tbʼanel techel tuʼnju in ten t-ximbʼetz toj tumel tiʼj aqʼuntl. In nok tilil tuʼn tuʼn taqʼunan ex in che tzalaj xjal tiʼj taqʼun. Pero aj tkubʼaj qʼij, ya mintiʼ in ximen tiʼj aqʼuntl ex in nok tqʼoʼn twiʼ kyiʼj toj tja ex tiʼj tokslabʼil. Atzun jun kyxol qe xjal mas in che tzalaj ojtzqiʼn kywitz wuʼne». *

12. ¿Tzeʼn kubʼ tyekʼin Salomón qa ten t-ximbʼetz toj tumel tiʼjx ex tzeʼn el tzpet?

¹² Tej tajbʼen Salomón te Jehová, ten t-ximbʼetz toj tumel tiʼjx. Toj jun ambʼil, tej tzmatoq kuʼxun ex tzmatoq in xi tzyet tkawin, el tnikʼ tiʼj qa mlaytoq bʼant jun aqʼuntl tuʼn ex xi tqanin onbʼil te Jehová (1 Rey. 3:7-9). Ax ikx, el tnikʼ tiʼj qa jakutoq jaw tnimsan tibʼ. Kubʼ ttzʼibʼin jlu: «Tuʼnju in jaw tniman tibʼ xjal in tzaj xitbʼil tiʼj; ex tuʼnju jawni twitz in kubʼ tzʼaq» (Prov. 16:18). Noqtzun tuʼnj, ikʼ tnaʼl qe tyol tuʼn. Tej tikʼ junjun abʼqʼi in kawin, jaw tnimsan tibʼ ex mintiʼ xi tnimen qe tkawbʼil  Jehová. Jun techel, xi tqʼoʼn Jehová ley jlu kye aj kawil te Israel: «Miʼn tzaj tiʼn nim t-xuʼjil tuʼntzun miʼn tel tzpet kyuʼn» (Deut. 17:17). Mintiʼ xi tnimen Salomón ley lu tuʼnju ten 700 t-xuʼjil ex 300 tkabʼ t-xuʼjil, ex nim kye in che kʼulintoq kywitz dios nya ax tok (1 Rey. 11:1-3). Mintiʼ ojtzqiʼn quʼn qa kubʼ t-ximen Salomón qa mlaytoq tzaj nya bʼaʼn tiʼj. Maske ikju, tzaj nya bʼaʼn tiʼj tuʼnju el tpan tibʼ tiʼj Jehová (1 Rey. 11:9-13).

13. ¿Tiʼ xnaqʼtzbʼil jaku tzʼel qiʼn tiʼj Jesús tuʼnju kubʼ tin tibʼ?

¹³ Mintiʼ jaw tnimsan tibʼ Jesús ex ten t-ximbʼetz toj tumel tiʼjx. Tej naʼmxtoq tul tzalu twitz Txʼotxʼ, e bʼant nim tiʼchaq tbʼanel tuʼn toj tajbʼebʼil te Jehová. In tzaj tqʼamaʼn Colosenses 1:16 jlu: «Noq tuʼn Crist o tbʼincha Dios tkyaqil, tkyaqilju at tuj kyaʼj ex tkyaqilju at twitz txʼotxʼ». Tej tbautisarin Jesús, bʼalo tzaj tnaʼn junjun tiʼchaq bʼant tuʼn tej tten toj kyaʼj (Mat. 3:16; Juan 17:5). Pero mintiʼ jaw tnimsan tibʼ tej ttzaj tnaʼn qe tiʼchaq lu. Axpe ikx, mintiʼ kubʼ tyekʼin qa mas nimtoq toklen kywitz txqantl. Xi tqʼamaʼn jlu kye t-xnaqʼtzbʼen: «Mintiʼ ma chin ule tuʼn kyajbʼen txqantl weye, noq oʼkx tuʼn wajbʼene kye mastl ex tuʼn t-xi nqʼon wibʼe tuʼn nkyime tuʼn kykolpet nimku xjal» (Mat. 20:28). Ex tqʼama qa mlaytoq bʼant jun tiʼ tuʼn tuʼn tex tipumal (Juan 5:19). Kubʼ tyekʼin Jesús qa kubʼ tin tibʼ ex qaj tuʼn tel qkanoʼn tbʼanel techel kyaj tqʼoʼn.

14. ¿Tzeʼn in che onin tyol Jesús qiʼj tuʼn tten qximbʼetz toj tumel qiʼjx?

¹⁴ Xi tqʼamaʼn Jesús kye t-xnaqʼtzbʼen qa il tiʼj tuʼn tten kyximbʼetz toj tumel kyiʼjx. Jun maj, xi tqʼamaʼn jlu kye: «Tkyaqil ttzmal kywiʼye ajlaʼmaj» (Mat. 10:30). In tzaj qʼuqbʼaʼn qkʼuʼj kyuʼn yol lu ex mas qa in ten qximbʼetz nya toj tumel qiʼjx. In tzaj kynaʼn yol lu qe qa in ximen Jehová qiʼj ex qa nim qoklen toj twitz. Qa in kubʼ t-ximen Jehová qa  jaku qo ajbʼen te ex jaku ten qchwinqlal te jumajx, mintiʼ tuʼn tkubʼ qximen qa nya ax tok jlu.

15. a) Ik tzeʼn tqʼama jun uʼj Xqʼuqil, ¿tiʼ qximbʼetz il tiʼj tuʼn tten qiʼjx? b) Ik tzeʼn in nok qkeʼyin kyoj foto toj t-xaq 24, ¿alkyeqe kʼiwlabʼil mintiʼ in nok qqʼoʼn qwitz tiʼj qa oʼkx in qo ximen qiʼjx?

¹⁵ Ma tzikʼ junlo 15 abʼqʼi etz qʼamaʼn toj jun uʼj Xqʼuqil qa nim toklen tuʼn tten qximbʼetz toj tumel qiʼjx. Tqʼama jlu: «Nya qaj tuʼn tok qqʼoʼn nim qoklen tuʼnju jaku jaw qnimsan qibʼ. Pero ax ikx nya qaj tuʼn tel qiʼn qoklen tuʼnju jaku kubʼ qximen qa mintiʼ qajbʼen. Tuʼntzunju, nim toklen tuʼn tten qximbʼetz toj tumel qiʼjx. Ex tuʼn tbʼant jlu quʼn, nim toklen tuʼn tel qnikʼ kyiʼj tiʼchaq tbʼanel in che bʼant quʼn ex kyiʼj qeju kwest in che ela toj qwitz. Tqʼama jun ermana jlu: ‹Mintiʼ in chin oke te xjal mas nya bʼaʼn twitz tkyaqil Txʼotxʼ, pero ax ikx mintiʼ in chin oke te xjal mas tbʼanel. Ateʼ tbʼanel nmode ex ateʼ nya bʼaʼn nmode ik tzeʼn kye kykyaqil xjal›». * ¿In nelpe qnikʼ tiʼj qa nim toklen tuʼn tten qximbʼetz toj tumel qiʼjx?

16. ¿Tiquʼn in tzaj tqʼoʼn Jehová tbʼanel nabʼil qe?

¹⁶ In tzaj tqʼoʼn Jehová tbʼanel consej qe toj Tyol tuʼnju kʼujlaʼn qoʼ tuʼn ex taj tuʼn qtzalaj (Is. 48:17, 18). Aju mas tbʼanel jaku bʼant quʼn, aju tuʼn tkubʼ qqʼoʼn qajbʼebʼil te Jehová tnejel toj qanqʼibʼil ex kbʼel qnaʼn nimxix tzalajbʼil qa ma bʼant jlu quʼn. Kʼonil jlu qiʼj tuʼn miʼn qok weʼ twitz nya bʼaʼn in che ok weʼ xjal twitz tuʼnju oʼkx in che ximen tiʼj pwaq, tiʼj aqʼuntl moqa kyiʼjx. Tuʼntzunju, tbʼanel tuʼn tten qnabʼil ex tuʼn ttzalaj tanmi Jehová quʼn (Prov. 23:15).