1. ¿Tiʼ in bʼaj qiʼj qkyaqilx?

 ¿OPE kubʼ t-ximen teya tuʼn tbʼant jun tiʼ tuʼna toj ttnam Jehová, pero kwest tuʼn tjapun twiʼ? b Qa ikju, nya tjunalxa in bʼaj jlu tiʼja. Jun techel, tajtoq Philip tuʼn tel tpaʼn mas ambʼil tuʼn tnaʼn Dios ex tuʼn kyok te mas tbʼanel, pero kwesttoq tuʼn tkanet ambʼil tuʼn tuʼn tyolin tukʼil Jehová. Atzunte Erika ok tilil tuʼn tuʼn tpon naj kyoj chmabʼil te pakbʼabʼil. Maske ikju, chʼixmi tkyaqil maj yaj in pontoq. Ex nim maj ok tilil tuʼn Tomáš tuʼn tjaw tuʼjin tkyaqil Biblia, pero tqʼama jlu: «Mintiʼtoq in chin tzalaje aj wuʼjine tiʼj Biblia. Ok tilil wuʼne oxe maj, pero ax in kyaj weʼye tiʼj libro te Levítico».

2. ¿Tiquʼn mintiʼ tuʼn ttzaj qbʼis qa naʼmx tjapun twi jun qximbʼetz?

² Qa in ximen teya tuʼn tjapun twi jun t-ximbʼetza ex mintiʼ in japun twiʼ, miʼn tzaj tbʼisa. Il tiʼj tuʼn tel qpaʼn ambʼil ex qipumal tuʼn tjapun twi jun qmeta maske nya nim toklen toj qwitz. Tuʼnju kukx in nok tilil tuʼna, in kubʼ tyekʼina qa in nok tqʼoʼna toklen tamiwbʼila tukʼil Jehová ex qa taja tuʼn t-xi tqʼoʼna aju mas tbʼanel te. Tok twitz Jehová tiʼj jlu ex mlay tzaj tqanin aju mlay bʼant tuʼna (Sal. 103:14; Miq. 6:8). Tuʼntzunju, qʼonka tilil tuʼn tel tnikʼa tiʼj qa jaku bʼant tuʼna aju in kubʼ t-ximana ex qa jaku japun twiʼ. Qa jaku bʼant tuʼna aju in kubʼ t-ximana, ¿tiʼ jaku bʼant tuʼna tuʼn tjapun twiʼ? Qo xnaqʼtzan kyiʼj junjun nabʼil.

3. Qa qaj tuʼn tbʼant jun tiʼ quʼn, ¿tiquʼn nim toklen tuʼn tten qgan tiʼj?

³ Tuʼn tjapun twi qximbʼetz, nim toklen tuʼn tten qgan tiʼj. ¿Tiquʼn? Tuʼnju qa qaj tuʼn tbʼant jun tiʼ quʼn, kʼokel tilil quʼn tuʼn t-xi qbʼinchaʼn. Qa qgan jun tiʼ, in nok jlu ik tzeʼn kyqʼiqʼ  in nonin tiʼj jun bark tuʼn tbʼet. Qa kukx at kyqʼiqʼ, in nonin tiʼj bark tuʼn tpon toj lugar jatumel ximen maj. Ex qa at nim kyqʼiqʼ, maslo lwey jaku pon. Chʼixmi axju jaku bʼaj qiʼj, qa mas qaj tuʼn tbʼant jun tiʼ quʼn toj qajbʼebʼil te Jehová, kʼonil qiʼj tuʼn tjapun twi qximbʼetz. Tqʼama jun ermano te Salvador jlu, aju David tbʼi: «Qa tgana jun tiʼ, mas in nok tilil tuʼna ex in nonin jlu tiʼja tuʼn tjapun twi t-ximbʼetza». Qa ikju, ¿tiʼ jaku tzʼonin tiʼja tuʼn tten tgana tuʼn tjapun twi t-ximbʼetza?

4. ¿Tiʼ jaku txi qqanin te Jehová? (Filipenses 2:13; ax ikx qʼonka twitza tiʼj dibujo).

⁴ Qaninxa te Jehová tuʼn tonin tiʼja tuʼn tok tilil tuʼna. Jaku tzʼajbʼen xewbʼaj xjan tuʼn Jehová tuʼn tonin tiʼja tuʼn tok tilil tuʼna tuʼn tjapun twi t-ximbʼetza ex tuʼn ttzalaja tiʼj (kjawil uʼjit Filipenses 2:13). At maj, in kubʼ qximen tuʼn tbʼant jun tiʼ quʼn ex in xi qbʼinchaʼn tuʼnju ojtzqiʼn quʼn qa il tiʼj tuʼn tbʼant. Nya jun il jlu, pero qa nya qgan tuʼn tbʼant jun tiʼ quʼn, mlay tzʼok tilil quʼn. Atzun jlu bʼaj tiʼj Norina, jun ermana te Uganda. Kubʼ t-ximen tuʼn t-xi tqʼoʼn xnaqʼtzbʼil te jun xjal tiʼj Biblia, pero nyatoq taj tuʼn tbʼant tuʼn tuʼnju kubʼ t-ximen qa mintiʼxix in bʼant tqʼon xnaqʼtzbʼil. ¿Tiʼ onin tiʼj Norina? Tqʼama jlu: «Tkyaqil qʼij xi nqanine onbʼil te Jehová tuʼn tten ngane tuʼn nqʼone xnaqʼtzbʼil tiʼj Tyol. Ax ikx ok tilil wuʼne tuʼn tbʼant-xix nqʼone xnaqʼtzbʼil. Tej tikʼ junjuntl xjaw, el nnikʼe tiʼj qa mas ngane tuʼn nqʼone xnaqʼtzbʼil. Tojx abʼqʼi aju, xi tzyet tuʼn nqʼone xnaqʼtzbʼil kye kabʼe xjal».

5. ¿Tiʼ jaku qo ximen tiʼj tuʼntzun tok tilil quʼn?

⁵ Ximana tiʼjju o bʼant tuʼn Jehová tiʼja (Sal. 143:5). Ximen apóstol Pablo tiʼj qʼaqʼbʼil tkʼuʼj Jehová kubʼ tyekʼin tiʼj ex onin jlu tiʼj tuʼn tajbʼen te tuʼn tkyaqil tkʼuʼj (1 Cor. 15:9, 10; 1 Tim. 1:12-14). Axju jaku bʼant tuʼna, qa mas ma ximana tiʼjju o bʼant tuʼn Jehová tiʼja, mas kʼokel tilil tuʼna tuʼn tjapun twi t-ximbʼetza (Sal. 116:12). Bʼinxa tiʼ onin tiʼj jun ermana te Honduras tuʼn tok te precursora regular. Tqʼama ermana jlu: «In ximane tiʼj jniʼ tkʼujlabʼil Jehová at wiʼje. In tzaj tiʼne toj ttnam ex in xqʼuqin wiʼje. Tej nximane tiʼj jlu, mas ok nkʼujlaʼne ex mas ten ngane tuʼn woke te precursora».

6. ¿Tiʼ juntl tiʼ jaku tzʼonin qiʼj tuʼn tten qgan tuʼn tbʼant jun tiʼ quʼn?

⁶ Ximana tiʼjju tbʼanel jaku tzaj aj tjapun twi t-ximbʼetza. Qo yolin juntl maj tiʼjju bʼaj tiʼj Erika, aju ma qo yolin tiʼj toj párrafo 1. ¿Tiʼ onin tiʼj tuʼn tpon naj kyoj chmabʼil te pakbʼabʼil? Tqʼama jlu: «El nnikʼe tiʼj qa in xi nnajsaʼne nim tbʼanel tiʼchaq tuʼnju yaj in chin pone toj pakbʼabʼil. Pero aj npone lwey, at ambʼil wiʼje tuʼn nqʼolbʼene kye erman ex tuʼn nyoline kyukʼil. Ex jakutoq che ok nbʼiʼne qe tbʼanel nabʼil in che etz qʼamaʼn naʼmxtoq qex pakbʼal ex jaku che onin qiʼj tuʼntzun qtzalaj». Tej t-ximen Erika tiʼj tkyaqil jlu, japun twi t-ximbʼetz.  Yajtzun teya, ¿alkyeqe kʼiwlabʼil jaku che tzaj tkʼamoʼna qa ma tzʼok tilil tuʼna? Qa taja tuʼn tjaw tuʼjina Biblia moqa taja tuʼn kyok tnaʼj Diosa te mas tbʼanel, ximana tiʼj tzeʼn kʼonil jlu tiʼj tamiwbʼila tukʼil Jehová (Sal. 145:18, 19). Qatzun taja tuʼn tok jun tmoda te mas tbʼanel, ximana tiʼj tzeʼn kʼonil jlu tiʼja tuʼn tten tbʼanel tamiwbʼila kyukʼil txqantl (Col. 3:14). ¿Tiʼ mas jaku bʼant tuʼna? Bʼaʼn tuʼn tkubʼ ttzʼibʼina tiquʼn taja tuʼn tbʼant jun tiʼ tuʼna ex bʼaʼn ttzaj tnaʼna jlu junjun maj. Tqʼama Tomáš jlu, aju ma qo yolin tiʼj: «Aj tel nnikʼe tiʼj qa at nim tiquʼn tuʼn tjapun twi nximbʼetze, mas in nok tilil wuʼne».

7. ¿Tiʼ bʼant tuʼn Julio ex t-xuʼjil tuʼn kyajbʼen mas te Jehová?

⁷ Mojbʼank tibʼa kyukʼil xjal jaku che onin tiʼja (Prov. 13:20). Kyajtoq Julio tukʼil t-xuʼjil tuʼn kyxiʼ ajbʼel toj juntl lugar. Tqʼama tiʼ onin kyiʼj. «Xi qjyoʼne qe qamiwe jakutoq che onin qiʼje ex o yoline kyukʼil tiʼjju qajtoqe tuʼn tbʼant quʼne. Tuʼnju nim kye otoq japun twi kyximbʼetz, jakutoq tzaj kyqʼoʼn tbʼanel consej qeye. Ax ikx, tzaj kyqanin tzeʼn atoʼye tiʼjju in kubʼtoq qximane ex qa iltoq tiʼj, in tzajtoq kyqʼuqbʼaʼn qkʼuʼje tuʼn kukx tok tilil quʼne».

8. ¿Tiʼ jaku bʼaj noqwit oʼkx jaku tzʼok tilil quʼn qa qgan tuʼn t-xi qbʼinchaʼn jun tiʼ? (Ax ikx qʼonka twitza tiʼj dibujo).

⁸ At maj, nya qgan tuʼn t-xi qbʼinchaʼn jun tiʼ ex qkyaqilx in bʼaj jlu qiʼj. ¿Ape t-xilen jlu qa nya il tiʼj tuʼn tok tilil quʼn tuʼn tjapun twi qximbʼetz? Miʼn. Qo yolin juntl maj tiʼ techel bark ex kyqʼiqʼ. In nonin kyqʼiqʼ tiʼj bark tuʼn kukx tbʼet tuʼntzun tpon toj lugar jatumel kyaj tuʼn tpon, pero at maj mintiʼxix tipumal kyqʼiqʼ, axpe ikx, at maj mintiʼ kyqʼiqʼ. Aj tbʼaj jlu, ¿ape t-xilen qa ya mlay bʼet bark? Nya ikju. Ateʼ junjun bark at jun kymotor, atzun junjuntl, at qe kyremo ex jaku che ajbʼen jlu tuʼn xjal in manejarin kyiʼj. Chʼixmi axju in bʼaj qiʼj, at qʼij mas qgan tuʼn tbʼant jun tiʼ quʼn ex at qʼij mintiʼ, ex nya qaj tuʼn tok tilil quʼn. Tuʼntzunju, noqwit oʼkx in nonin qgan tuʼn tjapun twiʼ qximbʼetz, mlayxlo japun twiʼ quʼn. In kanet tumel tuʼn xjal in manejarin tiʼj bark tuʼn kukx tbʼet qa mintiʼ kyqʼiqʼ. Ax ikx qe, kukx jaku tzʼok tilil quʼn tuʼn tjapun twi qximbʼetz maske at maj nya qgan tuʼn tbʼant quʼn. Nyalo fácil tuʼn tbʼant quʼn, pero tbʼanel qa ma tzʼok tilil quʼn. Qo xnaqʼtzan tiʼj tiʼ jaku tzʼonin qiʼj toj ambʼil lu, pero tnejel kxel qqʼoʼn tzaqʼwebʼil tiʼj jun xjel jaku qo ximen tiʼj.

9. ¿Bʼaʼnpe tuʼn tok tilil quʼn tuʼn tjapun twi qximbʼetz maske nya qgan tuʼn t-xi qbʼinchaʼn?

⁹ Taj Jehová tuʼn qajbʼen te tukʼil tzalajbʼil ex tuʼn tkyaqil qanmi (Sal. 100:2; 2 Cor. 9:7). Qa ikju, ¿tiquʼn kʼokel tilil quʼn tuʼn tjapun twi jun qximbʼetz qa nya qaj tuʼn t-xi qbʼinchaʼn tuʼn tkyaqil qkʼuʼj? Qo ximen tiʼjju bʼaj tiʼj Pablo. Tqʼama jlu: «Ex nnoʼk  nkʼixbʼisaʼne nximlale ex nnoʼk nqʼoʼne te nmajene» (1 Cor. 9:25-27). Ok tilil tuʼn apóstol Pablo tuʼn t-xi tbʼinchaʼn aju tajtoq Jehová tuʼn tbʼant tuʼn, axpe ikx qa nyaxix tgantoq tuʼn tbʼant tuʼn. ¿Tzalajpe Jehová tiʼjju bʼant tuʼn Pablo? Tzalaj ex tzaj tkʼiwlaʼn Pablo tuʼnju ok tilil tuʼn (2 Tim. 4:7, 8).

10. ¿Tiʼ tbʼanel in tzaj aj tok tilil quʼn tuʼn tjapun twi qximbʼetz maske at maj nya qgan tuʼn t-xi qbʼinchaʼn?

¹⁰ In tzalaj Jehová aj tok tqʼoʼn twitz tiʼj qa in nok tilil quʼn tuʼn tjapun twi qximbʼetz, axpe ikx qa nyaxix qgan tuʼn t-xi qbʼinchaʼn. ¿Tiquʼn? Tuʼnju in nel tnikʼ tiʼj qa kʼujlaʼn quʼn maske nya tkyaqil maj qgan aqʼuntl in kubʼ qximen tuʼn tbʼant quʼn toj ttnam. Tzaj kʼiwlaʼn Pablo tuʼn Jehová, ax ikx qe jaku qo tzaj tkʼiwlaʼn qa ma tzʼok tilil quʼn (Sal. 126:5). Aj tel qnikʼ tiʼj qa in qo tzaj tkʼiwlaʼn Jehová tuʼnju otoq tzʼok tilil quʼn, kʼonil jlu qiʼj tuʼn tten mas qgan tuʼn t-xi qbʼinchaʼn aqʼuntl toj ttnam. Tqʼama jun ermana te tnam Polonia jlu, aju Lucyna tbʼi: «At maj nya waje tuʼn nxiʼye pakbʼal, mas qa otoq chin sikte. Pero in chin tzalaje aj nmeltzʼaje ja ex mlay chjet jlu wuʼne tuʼnju jun oyaj». Atzun jaʼlo, qo xnaqʼtzan tiʼj tiʼ jaku bʼant quʼn aj tkubʼ qximen qa nya qaj tuʼn tok tilil quʼn.

11. ¿Tzeʼn in nonin Jehová qiʼj tuʼn qjakʼunte mas qibʼ?

¹¹ Qaninxa onbʼil te Jehová tuʼn tbʼant tjakʼun tibʼa. Qa in bʼant tjakʼun tibʼ jun xjal, ax ikx in nok t-xqʼuqin t-ximbʼetz ex aju in bʼant tuʼn. Nya oʼkx in qjakʼun qibʼ tuʼn miʼn tkubʼ qbʼinchaʼn jun nya bʼaʼn. Sino ax ikx in nonin qiʼj tuʼn t-xi qbʼinchaʼn aju bʼaʼn, mas qa kwest in nela toj qwitz moqa nya qaj tuʼn tbʼant quʼn. Ax ikx, bʼaʼn tuʼn ttzaj qnaʼn qa aj qjakʼunte qibʼ, atzun jun kyxol mod in tqʼon xewbʼaj xjan. Tuʼntzunju, qa ma txi qqanin te Jehová tuʼn ttzaj tqʼoʼn xewbʼaj xjan qe, kʼonil qiʼj tuʼn qjakʼunte qibʼ (Luc. 11:13; Gál. 5:22, 23). Ok tilil tuʼn David aju ma qo yolin tiʼj toj párrafo 3 tuʼn kukx t-xnaqʼtzan tjunalx. In kubʼ t-ximen qa nim onin naʼj Dios tiʼj. Tqʼama jlu: «Xi nqanine te Jehová tuʼn tbʼant njakʼun wibʼe ex onin wiʼje. Kubʼ nbʼinchaʼne jun programa tiʼj ambʼil tuʼn nxnaqʼtzane njunalxe ex kukx in chin ok lepeʼye tiʼj».

12. ¿Tzeʼn in qo tzaj tonin Eclesiastés 11:4 tuʼn kyjapun kywi qximbʼetz?

¹² Miʼn yona tiʼj jun ambʼil mas tbʼanel. Toj ambʼil jaʼlo, kwest tuʼn tkanet jun tbʼanel ambʼil quʼn. Qa ma qo ayon tiʼj, mlayxlo bʼant jun tiʼ quʼn tuʼn tjapun twi qximbʼetz (kjawil uʼjit Eclesiastés 11:4). Tqʼama jun ermano Dayniel tbʼi: «Mlayx qo ayon tiʼj jun ambʼil jatumel tbʼanel jaku tzʼela tkyaqil. Pero qa ma txi tzyet tuʼn qaqʼunan tiʼj jun qmeta, in nonin jlu qiʼj tuʼn kykanet tbʼanel ambʼil quʼn». Ax ikx tqʼama ermano Paul te Uganda tiquʼn mintiʼ tuʼn qjyon tiʼj jun tbʼanel ambʼil tuʼn tjapun twi jun qximbʼetz. Tqʼama jlu: «Aj t-xi tzyet tuʼn taqʼunana tiʼj jun meta toj ttnam Jehová maske nya fácil tuʼn tbʼant, in xi tqʼoʼna ambʼil te Jehová tuʼn ttzaj tkʼiwlaʼn taqʼuna» (Mal. 3:10).

13. ¿Tiʼ tbʼanel jaku tzaj qa ma txi qbʼinchaʼn chʼin tnejel ex yajxitl jaku txi qbʼinchaʼn mas?

¹³ Bʼinchama chʼin tnejel ex yajxitl, jaku txi tbʼinchaʼna mas. At maj nya qgan tuʼn t-xi qbʼinchaʼn jun tiʼ tuʼnju in kubʼ qximen qa il tiʼj tuʼn tbʼant nim quʼn. Qa ikju, ¿jakupe kubʼ tpaʼna junjun tiʼchaq tuʼntzun kyok te chʼin? Jun techel, qa taja tuʼn tok jun tmoda te tbʼanel, jaku kubʼ tyekʼin kyukʼil junjun tiʼchaq nya nim kyoklen. Qatzun taja tuʼn tjaw tuʼjina tkyaqil Biblia, ¿jakupe tzʼel tpaʼna chʼin ambʼil tuʼntzun tuʼjina kyiʼj junjun capítulo tuʼn miʼn tsikta? Kwest ela toj twitz Tomáš aju ma qo yolin  tiʼj tuʼn tjaw tuʼjin tkyaqil Biblia toj jun abʼqʼi. Tqʼama jlu: «El nnikʼe tiʼj qa mlaytoq bʼant tuʼn tjaw wuʼjine tkyaqil Biblia toj jun abʼqʼi. Tuʼntzunju, kubʼ nximane tuʼn t-xi tzyet juntl maj wuʼne, pero toj ambʼil lu, kubʼ nximane jteʼ capítulo jaku jaw wuʼjine jun qʼij ex atzun jlu in nok lepeʼye tiʼj. Nyatoq nim capítulo tuʼn tjaw wuʼjine ex iltoq tiʼj tuʼn nximane tiʼjju el nnikʼe tiʼj. Tej tbʼant jlu wuʼne, mas in tzalaje tej wuʼjine tiʼj Biblia». Tuʼnju kubʼ tnaʼn Tomáš tzalajbʼil tej tuʼjin tiʼj Biblia, el tpaʼn mas ambʼil tuʼn tuʼjin tiʼj ex onin jlu tiʼj tuʼn tjaw tuʼjin tkyaqil. c

14. ¿Alkyeqe nya bʼaʼn jaku qo ok weʼ twitz?

¹⁴ Bʼisbʼajil tuʼnju jaku qo ok weʼ kywitz nya bʼaʼn maske qaj tuʼn tok tilil quʼn. Jun techel, qa «noq minabʼen in tzaj mya bʼaʼn», jaku tzʼel tiʼn jlu ambʼil qiʼj ex mlay tzʼonin tuʼn tjapun twi qximbʼetz (Ecl. 9:12). Ax ikx, jaku qo ikʼ twitz jun problem ex jaku tzʼel tiʼn qipumal (Prov. 24:10). Nya oʼkxju, ax ikx jaku qo el txalpaj tuʼnju aj il qoʼ ex tuʼn jlu mlay tzʼok tilil quʼn tuʼn tjapun twi qximbʼetz (Rom. 7:23). Ex mlaylo tzʼok tilil quʼn qa in kubʼ qnaʼn nim siktleʼn (Mat. 26:43). ¿Tiʼ jaku tzʼonin qiʼj tuʼn kukx tok tilil quʼn moqa tuʼn qex twitz jun ambʼil kwest?

15. ¿Tiquʼn kukx in nok tilil quʼn maske in qo ok weʼ kywitz problem? (Salmo 145:14).

¹⁵ Bʼaʼn tuʼn ttzaj tnaʼna qa nya tuʼnju otoq kyaj weʼya mlayx japun twi t-ximbʼetza. Ik tzeʼn in tzaj tyekʼin Biblia, jakulo qo ok weʼ twitz nim problem. Noqtzun tuʼnj, ax ikx in tzaj tqʼamaʼn qa jaku qo ex twitz alkyexku nya bʼaʼn tuʼn tonbʼil Jehová ex jaku che japun twi qximbʼetz (kjawil uʼjit Salmo 145:14). Tqʼama Philip jlu, aju ma qo yolin tiʼj toj tnejel párrafo: «Toj nwitze, nya nim toklen jteʼ maj in qo jaw tzʼaq, sino jteʼ maj  in qo jaw weʼ ex kukx in nok tilil quʼn». Qo yolin juntl maj tiʼjju bʼaj tiʼj David. Tqʼama jlu: «Aj kyok tiʼchaq te kwest moqa mintiʼxix ngane tuʼn tbʼant jun tiʼ wuʼne, mintiʼ in che ok nqʼoʼne te jun matij nya bʼaʼn. Sino in che ok nqʼoʼne te jun ambʼil jatumel jaku kubʼ nyekʼine nkʼujlabʼile tiʼj Jehová». Ikju, qa kukx ma tzʼok tilil quʼn maske in qo ok weʼ kywitz problem, in kubʼ qyekʼin qa kʼujlaʼn Jehová quʼn ex qa qaj tuʼn ttzalaj. Ximana tiʼj jniʼ tzalajbʼil in kubʼ tnaʼn Jehová aj tok tkeʼyin qa kukx in nok tilil tuʼna tuʼn tjapun twi t-ximbʼetza.

16. ¿Tiʼ xnaqʼtzbʼil jaku tzʼel qiʼn kyiʼj nya bʼaʼn in qo ok weʼ twitz?

¹⁶ Qʼiʼmela jun xnaqʼtzbʼil kyiʼj nya bʼaʼn in nok weʼya twitz. Ximana tiʼjju in bʼaj ex bʼaʼn tuʼn tkubʼ t-xjelina jlu: «¿Tiʼ chʼixpubʼil jaku bʼant wuʼne tuʼntzun miʼn tel tiʼn jun nya bʼaʼn ambʼil wiʼje tuʼn tjapun twi nximbʼetze?» (Prov. 27:12). Ex qa naʼmx tjapun twi t-ximbʼetza maske in nok tilil tuʼna, bʼalo il tiʼj tuʼn tkubʼ tchʼexpuʼna aju taja tuʼn tbʼant tuʼna. Tuʼn tel tnikʼa tiʼj jlu, ximana tiʼj qa jaku bʼant tuʼna aju o kubʼ t-ximana tuʼn t-xi tbʼinchaʼna. d Mlay kubʼ t-ximen Jehová qa mintiʼ tajbʼena noq tuʼnju mintiʼ otoq japun twi t-ximbʼetza qa mlay bʼant tuʼna (2 Cor. 8:12).

17. ¿Tiquʼn bʼaʼn tuʼn ttzaj qnaʼn aju ya o bʼant quʼn?

¹⁷ Ximana tiʼjju ya o bʼant tuʼna. In tzaj tqʼamaʼn Biblia jlu: «Porke ate Dios tzʼaqlxix, mlay tzikʼ tnaʼl tuʼn aju kyaqʼunbʼene» (Heb. 6:10). Ax ikx teya, miʼn tzikʼ tnaʼl taqʼunbʼena tuʼna. Ximana kyiʼj junjun tiʼchaq ya o che bʼant tuʼna ik tzeʼn tej toka te tamiw Jehová, tej texa pakbʼal ex tej tbautisarina. Tej kyjapun twi t-ximbʼetza toj tajbʼebʼila te Jehová toj ambʼil ojtxe, in tzaj tyekʼin jlu qa kukx jaku tzʼok tilil tuʼna ex qa jaku japun twi t-ximbʼetza toj ambʼil jaʼlo (Filip. 3:16).

18. ¿Tiʼ jaku txi tbʼinchaʼna akux in nok tilil tuʼna tuʼn tjapun twi t-ximbʼetza? (Ax ikx qʼonka twitza tiʼj dibujo).

¹⁸ Jaku che japun teya twi t-ximbʼetz tuʼn tonbʼil Jehová ik tzeʼn te xjal in manejarin tiʼj bark, in tzalaj aj tpon jatumel in kubʼ t-ximen. Ateʼ nim xjal in che tzalaj aj in che manejarin tiʼj bark akux in bʼet kyxiʼ. Ax ikx teya, jaku tzalaja akux in japun twi t-ximbʼetza aj tok tkeʼyina qa in nonin Jehová tiʼja ex qa in tzaj tkʼiwlaʼn teya akux in nok tilil tuʼna (2 Cor. 4:7). Qa kukx ma tzʼok tilil tuʼna, tzul tkʼamoʼna kʼiwlabʼil mas tbʼanel aj tbʼet ambʼil (Gál. 6:9).