1, 2. ¿Tiʼ iltoq tiʼj tuʼn tkubʼ kyximen judiy in che anqʼintoq toj tnam Babilonia? (Esdras 1:2-4).

 OTOQ tzʼetz tqʼamaʼn rey tqanil qa jakutoq che etz judiy otoq che ten junlo 70 abʼqʼi toj tnam Babilonia ex jakutoq che meltzʼaj toj tnam Israel (kjawil uʼjit Esdras 1:2-4). Oʼkx Jehová jakutoq bʼant jlu tuʼn. ¿Tiquʼn in xi qqʼamaʼn jlu? Tuʼnju mintiʼtoq in netz kytzaqpiʼn xjal te Babilonia qe xjal in chex kyiʼn pres (Is. 14:4, 17). Noqtzun tuʼnj, kubʼ tiʼj tnam Babilonia ex tzaj tqʼamaʼn akʼaj gobierno qa jakutoq che meltzʼaj judiy toj kytnam. Tuʼntzunju, kykyaqil judiy ex mas qe wibʼaj toj ja, iltoq tiʼj tuʼn tkubʼ kyximen qa che eletz toj tnam moqa ax tuʼn kykyaj ten. Pero ateʼ junjun kwest ela toj kywitz. Qo xnaqʼtzan tiʼj tiquʼn.

² Ateʼ junjun judiy otoq che tijen ex kwestlo ela toj kywitz tuʼn kyviajarin. Ax ikx, nim kye otoq che ul itzʼj toj tnam Babilonia ex oʼkxtoq lugar aju ojtzqiʼn kyuʼn. Ex kubʼ kyximen qa ttxʼotxʼ kyxeʼchel aju tnam Israel. Nya oʼkxju, axlo ikx otoq che ok junjun te qʼinun toj tnam Babilonia. Tuʼntzunju, kwest ela toj kywitz tuʼn tkyaj kytzaqpiʼn tbʼanel kyja ex kynegocio tuʼn kyxiʼ toj jun lugar mintiʼ ojtzqiʼn kyuʼn.

3. ¿Tiʼ kʼiwlabʼil tzaj kykʼamoʼn judiy e meltzʼaj juntl maj toj tnam Israel?

³ Aqeju judiy kukx in che ajbʼentoq te Jehová, kubʼ kyximen qa mas nimtoq kyoklen kʼiwlabʼil tuʼn tzaj kykʼamoʼn aj kymeltzʼaj toj tnam Israel kywitz qe tiʼchaq tuʼn t-xi kynajsaʼn. Jun kyxol qe kʼiwlabʼil lu, at toklen tukʼil kykʼulbʼil te Jehová. Toj tnam Babilonia, e ten mas te 50 templo kye nya ax tok dios, pero mintiʼtoq jun templo te Jehová. Ax ikx, mintiʼ xi kyqʼoʼn israelita chojbʼil ik  tzeʼn tzaj tqʼamaʼn Tley Moisés tuʼnju mintiʼ e ten altar nix qe pal. Ex mas nim kybʼet qeju e kʼulin kywitz nya ax tok dios kywitz qeju e nimen te Jehová. Tuʼntzunju, kubʼ kyximen judiy in che nimen te Jehová tuʼn kymeltzʼaj toj kytxʼotxʼ ex tuʼn tten kʼulbʼil axix tok juntl maj.

4. ¿Tiʼ xi ttziyen Jehová kye judiy?

⁴ Kxeltoq tiʼn junlo kyaje xjaw tuʼn kyviajarin judiy tuʼn kypon toj tnam Israel ex nya fácil kʼelel jlu te kye. Pero xi ttziyen Jehová kye qa kʼeleltoq tiʼn alkyexku tiʼ jaku tzʼok te jun tolsabʼil toj kybʼe. Ajbʼen profeta Isaías tuʼn Jehová tuʼn tkubʼ ttzʼibʼin jlu: «Kybʼinchame jun tbʼe Qman tuj lugar tzqij txʼotxʼ, kyjaqome jun bʼe jiqun tiʼj te Qdios tuj lugar mintiʼ kynajbʼil xjal tuj. [...] Aju txʼotxʼ nim tqan xaq tuj ex nim witz tuj, kyparejin bʼaje tuʼn tkyaj ten chqʼajlaj» (Is. 40:3, 4). Ximana tiʼj, mas fácil tuʼn kyxiʼ toj jun bʼe jikun ex chqʼajlaj twitzju tuʼn kyjax ex tuʼn kykuʼtz tiʼj witz. Ex mas jun rat jakutoq che bʼet ex mlaytoq che sikt.

5. ¿Tiʼ tbʼi bʼe ajbʼen te techel tzajni toj tnam Babilonia tuʼn tpon toj tnam Israel?

⁵ Chʼixmi kykyaqil bʼe in nok qʼoʼn jun kybʼi moqa in nok qʼoʼn jun número kyiʼj. ¿Yajtzun bʼe yolin Isaías tiʼj? Ax ikx tok jun tbʼi. In tzaj tqʼamaʼn Biblia jlu: «Kbʼantel jun ninbʼe ma chixin ex kʼokel tbʼi: Aju bʼe Xjan. Qeju mya txʼjomaj tuj kyanmi [...] mlay che bʼet tuj» (Is. 35:8). ¿Tiʼ kyxilen yol lu kye israelita ex tiʼ kyxilen te qe?

6. ¿Tiquʼn ok qʼoʼn bʼe te xjan?

⁶ «Aju bʼe Xjan», jun tbʼanel bʼibʼaj te jun bʼe. ¿Tiquʼn ok qʼoʼn bʼe lu te xjan? Tuʼnju mlaytoq txi qʼoʼn ambʼil te jun xjal tuʼn tbʼinchaʼn il toj tnam Israel. Toj juntl yol, mlaytoq yaẍin jun xjal judiy, mlaytoq kʼulin kywitz tilbʼilal moqa alkyexku junjuntl matij il. Kykyaqil qeju e meltzʼaj, e ok te «jun nasyon paʼnmaj tuʼn Qman Dios» (Deut. 7:6). ¿Ape t-xilen jlu qa tbʼaneltoq kybʼinchbʼen kykyaqil qeju i etz toj tnam Babilonia? Miʼn. Iltoq tiʼj tuʼn kybʼant junjun chʼixpubʼil kyuʼn tuʼntzun ttzalaj Jehová kyiʼj.

7. ¿Alkyeqe chʼixpubʼil iltoq tiʼj tuʼn kybʼant kyuʼn junjun judiy? Qʼamantza jun techel.

⁷ Ik tzeʼn ma qo yolin tiʼj, chʼixmi kykyaqil judiy e ul itzʼj toj tnam Babilonia. Tuʼntzunju, nim kye otoq che ok lepeʼ tiʼj kyximbʼetz ex kymod xjal te Babilonia. Tej tikʼ ambʼil tmeltzʼaj tnejel grupo judiy toj tnam Israel, ok tbʼiʼn Esdras qa ateʼ junjun otoq che kubʼ mojeʼ kyukʼil xuʼj te juntl tnam (Éx. 34:15, 16; Esd. 9:1, 2). Ax ikx, jaw labʼin gobernador Nehemías tej tok tkeʼyin qa ya mintiʼ in che yolin kykʼwal judiy toj yol hebreo (Deut. 6:6, 7; Neh. 13:23, 24). Qa ikju, ¿tzeʼn jakutoq tzʼok kykʼujlaʼn Jehová ex tzeʼn jakutoq che kʼulin te qa mintiʼtoq in nel kynikʼ tiʼj Biblia? (Esd. 10:3, 44). Tuʼntzunju, iltoq tiʼj tuʼn kybʼant chʼixpubʼil kyuʼn. Mas nya kwest jakutoq bʼant jlu kyuʼn qa ma che anqʼin toj tnam Israel, jatumel chebʼe chebʼe ten juntl maj kʼulbʼil axix tok (Neh. 8:8, 9).

8. ¿Atpe toklen «bʼe Xjan» qukʼil toj ambʼil jaʼlo? (Qʼonka twitza tiʼj tilbʼilal tok tiʼj revista).

⁸ Jakulo kubʼ kyximen junjun jlu: «Tbʼanel aju bʼaj kyiʼj judiy. Pero, ¿atpe toklen qukʼil toj ambʼil jaʼlo?». At, ex jaku txi qqʼamaʼn qa in qo bʼet toj «bʼe Xjan». In tzaj tqʼoʼn bʼe lu ambʼil qe tuʼn kukx qajbʼen te Jehová toj ambʼil jaʼlo ex tuʼn  qtzalaj kyiʼj kʼiwlabʼil tzul tiʼn Tkawbʼil Dios toj ambʼil tzul. Tuʼntzunju, in nok tilil kyuʼn skʼoʼn maj ex qe txqantl ẍneʼl tuʼn kukx kyten toj bʼe lu (Juan 10:16). b Atxix toj 1919, o che etz nim millón xinaq, xuʼj ex kʼwal toj Nintz tnam Babilonia moqa kyoj okslabʼil nya axix tok. Ex o txi tzyet tuʼn kybʼet toj «bʼe Xjan». Axlo ikx teya, ata kyxol. Ma tzikʼ junlo 100 abʼqʼi tjaqet bʼe lu, pero ma tzikʼ nim syent abʼqʼi t-xilen tzyet tuʼn tbʼinchet.

9. Ik tzeʼn in tzaj qʼamaʼn toj Isaías 57:14, ¿alkye tten bʼaj bʼinchaʼn «bʼe Xjan»?

⁹ Xi tqʼamaʼn Jehová kye judiy i etz toj Babilonia qa kʼelel tiʼn alkyexku tiʼ jaku tzʼok te tolsabʼil toj kybʼe ex atzun jlu bʼant tuʼn (kjawil uʼjit Isaías 57:14). ¿Axpe jlu bʼant tuʼn tiʼj «bʼe Xjan» at toj ambʼil jaʼlo? Axju. Tej atxtoq nim syent abʼqʼi tuʼn tjapun 1919, e ajbʼen junjun xinaq tuʼn Jehová tuʼn tbʼaj kybʼinchaʼn bʼe (mojbʼankuya tukʼil Isaías 40:3). Jaku txi qqʼamaʼn qa bʼant junjun aqʼuntl kyuʼn tuʼntzun kyonin kyiʼj xjal at jun tbʼanel kyanmi. Iktzun tten e onin kyiʼj tuʼn tkyaj kytzaqpiʼn okslabʼil nya ax tok ex tuʼn kykʼulin te Jehová junx tukʼil ttnam. Qo yolin kyiʼj junjun aqʼuntl e bʼant tuʼntzun tbʼaj bʼinchaʼn bʼe.

10, 11. ¿Tiʼ tbʼanel tzaj tej tetz imprimirit Biblia ex tej tkubʼ traducirit? (Ax ikx qʼonka twitza kyiʼj dibujo).

¹⁰ Tej kyetz imprimirit uʼj. Nqayin tiʼj abʼqʼi 1450, in che kubʼtoq bʼinchaʼn copia tiʼj Biblia tuʼn qʼabʼaj. Xi tiʼn nim ambʼil tuʼn tbʼant aqʼuntl lu, tuʼntzunju nyatoq nim copia at tiʼj Biblia ex nimtoq twiʼ. Pero tej kyten máquina tuʼn kyetz imprimirit uʼj, mas fácil etz nim copia tiʼj Biblia ex tuʼn kyxi sipet kye xjal.

¹¹ Tej kykubʼ traducirit. Toj nim syent abʼqʼi, oʼkx ten Biblia toj yol latín ex oʼkx qe xjal at nim kyxnaqʼtzbʼil el kynikʼ tiʼj. Pero tuʼnju jakutoq bʼant tuʼn kyetz imprimirit uʼj, ok tilil kyuʼn junjun xjal e nimen te Dios tuʼn tkubʼ kytraducirin Biblia kyoj txqantl yol. Iktzun tten, jakutoq tzʼok kymojbʼaʼn qeju in che uʼjin tiʼj Tyol Dios aju in nok kybʼiʼn toj iglesia tukʼilju in tzaj t-xnaqʼtzaʼn Biblia.

12, 13. Qʼamantza jun techel tiʼj alkye tten el nikʼbʼaj kyiʼj junjun xnaqʼtzbʼil nya ax tok nqayin tiʼj 1835.

¹² Qe onbʼil tuʼn qxnaqʼtzan tiʼj Biblia. E xnaqʼtzan nim xjal tiʼj Biblia ex el kynikʼ kyiʼj nim xnaqʼtzbʼil tej tjaw kyuʼjin. Xi kyqʼamaʼn kye txqantl aju el kynikʼ tiʼj ex tuʼn jlu tzaj kyqʼoj nejenel kye okslabʼil. Jun techel, nqayin tiʼj abʼqʼi 1835 e ten junjun xinaq at jun tbʼanel kyanmi ex xi kysipen junjun tratado ex folleto. Kyoj uʼj lu, xi kyqʼamaʼn qe xnaqʼtzbʼil nya ax tok in xitoq kyyekʼin iglesia kye xjal.

¹³ Nqayin tiʼj abʼqʼi 1835, anqʼin jun xjal Henry Grew tbʼi ex nimen te Dios. Kubʼ tbʼinchaʼn xjal lu jun folleto ex yolin tiʼjju in bʼaj qiʼj aj qkyim. Junxitl xnaqʼtzbʼil tzaj tyekʼin kywitz txqantl iglesia. Tzaj tyekʼin tukʼil Biblia qa jun oyaj inmortalidad tuʼn Dios ex qa mintiʼ in nul itzʼj jun xjal tukʼil jlu. Toj 1837, tej in viajarin jun okslal toj jun tren aju George Storrs tbʼi, kanet jun folleto tuʼn. Tej tjaw tuʼjin, el tnikʼ tiʼj qa otoq kanet jun axix tok xnaqʼtzbʼil tuʼn ex yolin tiʼj jlu kyukʼil txqantl. Ex toj 1842, ex tqʼoʼn jun kʼloj chikʼbʼabʼil tok tbʼi: «¿Son inmortales los inicuos?». Aju kubʼ  ttzʼibʼin George Storrs, onin tiʼj jun kuʼxun Charles Taze Russell tbʼi.

14. ¿Alkye tten onin tiʼj ermano Russell ex qe tukʼil aju bʼant kyuʼn txqantl? (Ax ikx qʼonka twitza tiʼj dibujo).

¹⁴ ¿Tzeʼn onin tiʼj ermano Russell ex qe tukʼil aju bʼant kyuʼn txqantl tiʼj «bʼe Xjan»? Toj ambʼil aju, ya ateʼtoq diccionario, qe uʼj in tzaj kychikʼbʼaʼn Tyol Dios ex junxichaq traducción tiʼj Biblia. Jakutoq che ajbʼen onbʼil lu kyuʼn aj kyxnaqʼtzan. Ex onin kyiʼj aju el tnikʼ Henry Grew tiʼj, George Storrs ex junjuntl. Ax ikx, bʼant jun tbʼanel aqʼuntl tuʼn ermano Russell ex qe tukʼil tiʼj «bʼe Xjan». ¿Tiquʼn in xi qqʼamaʼn jlu? Tuʼnju e onin tuʼn kyetz nim libro ex tratado in che yolin kyiʼj xnaqʼtzbʼil tkuʼx toj Biblia.

15. ¿Alkye junjun tiʼchaq nim kyoklen bʼaj toj 1919?

¹⁵ Toj 1919, ya mintiʼ ten ttnam Jehová tjaqʼ tipumal Nintz tnam Babilonia. Toj abʼqʼi aju, xi tzyet tuʼn taqʼunan «majen in bʼant taqʼun [...] ex at tnabʼl». Tbʼanel ok jlu tuʼnju onin kyiʼj xjal at jun tbʼanel kyanmi tuʼn t-xi tzyet tuʼn kybʼet toj «bʼe Xjan» (Mat. 24:45-47). Onin aqʼuntl bʼant kyuʼn txqantl kyiʼj qeju xi tzyet tuʼn kybʼet toj bʼe tuʼn tok kyojtzqiʼnxix Jehová ex qe t-ximbʼetz (Prov. 4:18). Ax ikx e bʼant chʼixpubʼil kyuʼn tuʼntzun ttzalaj Jehová kyiʼj. Pero mintiʼ ayon Jehová tuʼn kybʼant tkyaqil chʼixpubʼil kyuʼn toj jun ambʼil. Sino chebʼe chebʼe o tzʼonin tiʼj ttnam tuʼn tok te saq. (Qʼonka twitza tiʼj recuadro « Chebʼe chebʼe in nonin Jehová tiʼj ttnam tuʼn tok te saq»). Kbʼel qnaʼn nim tzalajbʼil aj tpon ambʼil jatumel ktzalajel Jehová tiʼj tkyaqilju kbʼantel quʼn (Col. 1:10).

16. ¿Alkyeqe aqʼuntl o bʼant toj «bʼe Xjan» atxix toj 1919? (Isaías 48:17; 60:17).

¹⁶ Tuʼn tten jun tbʼanel bʼe, il tiʼj tuʼn tbʼaj bʼinchet chʼintl. Atxix toj 1919, o che  bʼant junjun aqʼuntl tuʼn tok «bʼe Xjan» te mas tbʼanel tuʼntzun tonin kyiʼj mas xjal tuʼn kyetz toj Nintz tnam Babilonia. Tuʼntzunju, ok tilil tuʼn majen in bʼant taqʼun ex at tnabʼl tuʼn taqʼunan. Toj 1921, etz libro El Arpa de Dios ex kubʼ ximet tuʼn tonin kyiʼj nim xjal tuʼn tok kyojtzqiʼn axix tok xnaqʼtzbʼil tkuʼx toj Biblia. Xi sipet chʼixme qaq millón libro lu toj 36 yol ex nim xjal ok kyojtzqiʼn axix tok tuʼn uʼj lu. Ex o tzʼetz libro Tzalaja tiʼj tanqʼibʼila, aju in nonin qiʼj tuʼn t-xi qʼet xnaqʼtzbʼil. Kyoj qe mankbʼil qʼij, kukx o tzʼajbʼen ttnam Jehová tuʼn tuʼn ttzaj tqʼoʼn xnaqʼtzbʼil qe tuʼn kukx qbʼet toj «bʼe Xjan» (kjawil uʼjit Isaías 48:17; 60:17).

17, 18. ¿Jatumel in qox tiʼn «bʼe Xjan»?

¹⁷ Jaku txi qqʼamaʼn qa aj t-xi tzyet tuʼn t-xnaqʼtzan jun xjal tiʼj Tyol Dios, in xi qʼoʼn ambʼil te tuʼn tbʼet toj «bʼe Xjan». Ateʼ junjun noq chʼin bʼe in xi kybʼetin tuʼnju in kubʼ kyximen tuʼn tkyaj kytzaqpiʼn. Atzun junjuntl, o kubʼ kyximen tuʼn kukx tok tilil kyuʼn tzmaxi aj kypon toj lugar ximen kyuʼn. Pero, ¿jatumel kyaj tuʼn kypon?

¹⁸ Qa kukx ma che bʼet skʼoʼn maj toj «bʼe Xjan», che tel «tukʼil Dios tuj kyaʼj» (Apoc. 2:7). Atzun qeju che anqʼil tzalu twitz Txʼotxʼ, che okel te tzʼaqli aj tkubʼaj Tkawbʼil Jesús toj mil abʼqʼi. Qa in bʼeta toj «bʼe Xjan», miʼn tzʼaj tkeʼyina tiʼjxi, sino kukx tzʼok tilil tuʼna ajxi tpona toj akʼaj twitz Txʼotxʼ. Tuʼntzunju, in xi qqʼamaʼne kyeye kykyaqile: «Kuchiwt bʼaʼn tzʼela tkyaqil toj kyviaje».