1. ¿Tiʼ in tzaj tqʼamaʼn Biblia tiʼj kʼujlabʼil axix tok?

 IN TZAJ tqʼamaʼn Biblia qe yol lu tiʼj kʼujlabʼil axix tok: «Aju kʼujlalil ik tten ik tzaʼn tqan qʼaqʼ nim tipun. Aju kʼujlalil mlay yupj kyuʼn mar mi kyuʼn nima» (Cant. 8:6, 7). b ¡Tbʼanelxix qe yol lu! Ex in tzaj kyyekʼin qa jaku ten kʼujlabʼil te jumajx toj jun mejebʼleʼn ex qa mlayx kubʼ tiʼj.

2. ¿Tiʼ jaku bʼant tuʼn jun mejebʼleʼn tuʼn miʼn tnaj kykʼujlabʼil?

² Nim toklen tuʼn tok tilil tuʼn chmilbʼaj ex xuʼjilbʼaj tuʼn miʼn tnaj kʼujlabʼil kyxol. Qo ximen tiʼj tqan qʼaqʼ. Tuʼn miʼn tkubʼ yupj, il tiʼj tuʼn tokx qqʼoʼn siʼ toj. Qa mintiʼ ma bʼant jlu quʼn, jaku kubʼ yupj. Ax jlu jaku bʼaj tiʼj kʼujlabʼil at kyxol mejebʼleʼn, il tiʼj tuʼn tok tilil kyuʼn tuʼn miʼn tkubʼ naj. Noqtzun tuʼnj, jaku kubʼ naj kʼujlabʼil kyxol aj kyok weʼ kywitz junjun nya bʼaʼn ik tzeʼn qa mintiʼ kypwaq, tuʼn jun yabʼil moqa aj tjaw kychʼiysaʼn kykʼwal. Qa o kubʼ mojeʼ teya, ¿tiʼ jaku bʼant tuʼna tuʼn miʼn tnaj kʼujlabʼil kyxole? Toj xnaqʼtzbʼil lu, kʼelel qnikʼ kyiʼj oxe tiʼ jaku tzʼonin tiʼja tuʼn kukx tten tmejebʼleʼna kyuw ex toj tzalajbʼil. c

3. ¿Tiquʼn nim toklen tuʼn tten jun tbʼanel kyamiwbʼil mejebʼleʼn tukʼil Jehová tuʼntzun kukx tten kʼujlabʼil kyxol? (Eclesiastés 4:12; ax ikx qʼonka twitza kyiʼj foto).

³ Tuʼn miʼn tkubʼ yupj «tqan qʼaqʼ nim tipun» moqa aju kʼujlabʼil, nim toklen tuʼn tok tilil tuʼn chmilbʼaj ex xuʼjilbʼaj tuʼn tten jun tbʼanel kyamiwbʼil tukʼil Jehová. ¿Tiquʼn in xi  qqʼamaʼn jlu? Tuʼnju qa ma tzʼok kyqʼoʼn toklen kyamiwbʼil tukʼil, kʼonil jlu kyiʼj tuʼn t-xi kybʼiʼn qe tkawbʼil tuʼn tkyaqil kykʼuʼj. Qa ma bʼant jlu kyuʼn, kukx ktel kʼujlabʼil kyxol ex jaku che ex twitz alkyexku nya bʼaʼn (kjawil uʼjit Eclesiastés 4:12). Ex qa at jun tbʼanel kyamiwbʼil tukʼil Jehová, kʼokel tilil kyuʼn tuʼn tel kykanoʼn tiʼj ex kyiʼj tbʼanel tmod. Jun techel, kbʼel kyyekʼin tbʼanel kymod, kypasens ex kbʼel kynajsaʼn kyil txqantl (Efes. 4:32–5:1). Tuʼn jlu, kukx jaku ten kʼujlabʼil kyxol mejebʼleʼn. Ma tzikʼ mas te 25 abʼqʼi tkubʼlen mojeʼ jun ermana Lena tbʼi ex tqʼama jlu: «¡Mas nya kwest tuʼn tok qkʼujlaʼn ex tuʼn tok qqʼoʼn toklen jun xjal at jun tbʼanel tamiwbʼil tukʼil Jehová!».

4. ¿Tiquʼn jaw tjyoʼn Jehová José ex María tuʼn kyok te tman Jesús?

⁴ Qo xnaqʼtzan tiʼj jun techel in yolin Biblia tiʼj. Kyxol kykyaqil tyajil David, jaw tjyoʼn Jehová José ex María tuʼn kyok te tman Jesús. ¿Tiquʼn? Tuʼnju otoq che ok te tamiw ex ojtzqiʼntoq tuʼn qa kukx kʼokel qʼoʼn toklen kyuʼn toj kymejebʼleʼn. ¿Tiʼ xnaqʼtzbʼil jaku tzʼel kyiʼn qeju o che kubʼ mojeʼ tiʼj José ex María?

5. ¿Tzeʼn jaku tzʼel kykanoʼn chmilbʼaj techel kyaj tqʼoʼn José?

⁵ Ok José te jun tbʼanel chmilbʼaj tuʼnju kukx ok tilil tuʼn tuʼn tok lepeʼ tiʼjju tzaj tqʼamaʼn Jehová te. Xi tqʼamaʼn Jehová te oxe maj tiʼ tuʼn t-xi tbʼinchaʼn kyukʼil toj tja. Ex jun rat xi tbʼiʼn José tyol maske nya fácil (Mat. 1:20, 24; 2:13-15, 19-21). Tuʼnju nimen José te Jehová, onin tiʼj tuʼn tok t-xqʼuqin María. Tuʼn jlu, maslo ok tkʼujlaʼn María tchmil ex ok tqʼoʼn mas toklen. Aqeye chmilbʼaj, ¿tiʼ jaku bʼant kyuʼne tuʼn tel kykanoʼne tiʼj José? Jaku t-xi kyjyoʼne qe consej toj Biblia tuʼntzun tonin kyiʼje tuʼn kyxqʼuqine kyiʼj toj kyjaye. d Aj tkubʼ kyqʼoʼne toj xnaqʼtzbʼil maske il tiʼj tuʼn tbʼant junjun chʼixpubʼil kyuʼne, in kubʼ kyyekʼine qa kʼujlaʼn kyxuʼjile kyuʼne. Ex tuʼn jlu jaku ten kymejebʼleʼn mas kyuw. Tqʼama jun ermana te Vanuatu jlu, aju o tzikʼ mas te 20 abʼqʼi tkubʼlen mojeʼ: «Aj tok nkeʼyine qa in jyon nchmile onbʼil tukʼil Jehová ex in nok lepeʼ tiʼj, mas in nok nqʼoʼne toklen. In kubʼ nnaʼne bʼaʼn ex in nok qeʼ nkʼuʼje tiʼjju in kubʼ t-ximen».

6. ¿Tiʼ xnaqʼtzbʼil jaku tzʼel kyiʼn xuʼjilbʼaj tiʼj techel kyaj tqʼoʼn José ex María?

⁶ Ok María te tamiw Jehová. Ex mintiʼ bʼant jlu tuʼn noq tuʼnju atzun jlu bʼant tuʼn José, sino tuʼnju otoq tzʼel tnikʼ tiʼj Tyol Dios. Nya oʼkxju, ax ikx el tpaʼn ambʼil tuʼn t-ximen tiʼj (Luc. 2:19, 51). Ex tuʼnju ten jun tbʼanel tamiwbʼil María tukʼil Jehová, ok te jun tbʼanel xuʼjilbʼaj. Toj ambʼil jaʼlo, ateʼ nim ermana in nok tilil  kyuʼn tuʼn tel kykanoʼn techel kyaj tqʼoʼn María. Qqʼonk qwitz tiʼj techel Émiko. In tzaj tqʼamaʼn jlu: «Tej naʼmxtoq nkubʼ mojeʼye, ojtzqiʼntoq wuʼne tiʼ tuʼn t-xi nbʼinchaʼne tuʼn tchʼiy wamiwbʼile tukʼil Jehová. Pero tej nkubʼ mojeʼye, a nchmile kubʼ bʼinchante naʼj Dios ex a kubʼ ximante tiʼ tuʼn tbʼant quʼne tuʼn tchʼiy qamiwbʼile tukʼil Jehová. Tej tikʼ ambʼil, el nnikʼe tiʼj qa attoq jun tbʼanel wamiwbʼile tukʼil Jehová noq tuʼnju onin nchmile wiʼje. Tuʼntzunju, iltoq tiʼj tuʼn tok tilil wuʼne tuʼn tchʼiy weye wamiwbʼile tukʼil Jehová. Jaʼlo, in nel npaʼne ambʼil tuʼn nnaʼne Dios njunalxe, tuʼn tjaw wuʼjine Tyol Dios ex tuʼn nximane tiʼj» (Gál. 6:5). Aqeye xuʼjilbʼaj, qa kukx ma tzʼok tilil kyuʼne tuʼn tchʼiy kyamiwbʼile tukʼil Jehová, mas che okel kʼujlaʼne tuʼn kychmile ex mas che tzalajel kyiʼje (Prov. 31:30).

7. ¿Tiʼ jaku tzʼonin kyiʼj mejebʼleʼn tuʼn kykʼulin junx te Jehová?

⁷ Ax ikx aqʼunan José ex María junx tuʼntzun tten jun tbʼanel kyamiwbʼil tukʼil Jehová. Ojtzqintoq kyuʼn qa nim toklen tuʼn kykʼulin te Jehová junx kyukʼil toj kyja (Luc. 2:22-24, 41; 4:16). Atlo maj kwest ela jlu toj kywitz ex mas tej tchʼiy kybʼet. Pero ok tilil kyuʼn. ¡Kyaj kyqʼoʼn jun tbʼanel techel kywitz mejebʼleʼn! Qa ateʼ kykʼwale, kwestlo jaku tzʼela toj kywitze tuʼn kyxiʼye kyoj chmabʼil ex tuʼn tel kypaʼne ambʼil tuʼn kykʼuline te Jehová tkyaqil seman. Ax ikx, maslo kwest jaku tzʼela toj kywitze tuʼn tel kypaʼne ambʼil tuʼn kyxnaqʼtzane junx ex tuʼn kynaʼne Dios. Pero miʼn tzikʼ tnaʼl kyuʼne qa mas kchʼiyel kyamiwbʼile tukʼil Jehová ex qa mas ktel kʼujlabʼil kyxole qa ma che kʼulune junx te. Tuʼntzunju, bʼaʼn tuʼn tkubʼ kyqʼoʼne tnejel kyajbʼebʼile te Jehová.

8. ¿Tiʼ jaku bʼant kyuʼn mejebʼleʼn tuʼn kukx kytzalaj tiʼj kykʼulbʼil te Jehová maske in che ok weʼ kywitz nya bʼaʼn?

⁸ ¿Tiʼ jaku bʼant kyuʼne qa in che ok weʼye kywitz nya bʼaʼn toj kymejebʼleʼne? Bʼalo kwest jaku tzʼela toj kywitze tuʼn kykʼuline te Jehová. Qa a jlu in bʼaj kyiʼje, tbʼanel qa ma txi kyjyoʼne jun xnaqʼtzbʼil chʼin tqan ex tbʼanel in nela toj kywitze. Atzun jlu jaku bʼant kyuʼne tnejel tuʼntzun kukx tchʼiy kʼujlabʼil kyxole ex tuʼn kukx tbʼant junjuntl tiʼchaq kyuʼne toj kyajbʼebʼile te Jehová.

9. ¿Tiquʼn nim toklen tuʼn tel tpaʼn chmilbʼaj ex xuʼjilbʼaj ambʼil tuʼn kyten junx?

⁹ Kukx jaku ten kʼujlabʼil kyxol mejebʼleʼn qa ma tzʼel kypaʼn ambʼil tuʼn kyten junx. Kʼonil jlu kyiʼj tuʼn tok kyqʼoʼn kywiʼ tiʼjju in kubʼ t-ximen ex in kubʼ tnaʼn juntl (Gén. 2:24). Ma tzikʼ mas te 15 abʼqʼi tkubʼlen mojeʼ Lilia ex Ruslán ex qbʼinx tiʼjju el kynikʼ tiʼj tej kykubʼ mojeʼ. Tzaj tchikʼbʼaʼn Lilia jlu: «El qnikʼe tiʼj qa mlaytoq qo tene nim ambʼil junx ik tzeʼn otoq kubʼ qximane. Mintiʼtoq ambʼil qiʼje tuʼnju at nim qaqʼune, qe tiʼchaq tuʼn kyxi bʼinchet ja... ex yajxitl e ul qkʼwale. El qnikʼe tiʼj qa jakutoq naj kʼujlabʼil qxole qa mintiʼ ma tzʼel qpaʼne ambʼil tuʼn qtene junx».

10. ¿Alkye tten jaku kubʼ kyqʼoʼn mejebʼleʼn toj xnaqʼtzbʼil aju in tzaj tqʼamaʼn Efesios 5:15 ex 16?

¹⁰ Il tiʼj tuʼn tbʼaj kynukʼuʼn mejebʼleʼn kyaqʼun ex tuʼn tel kypaʼn ambʼil tuʼn kyten junx (kjawil uʼjit Efesios 5:15, 16). In tzaj tqʼamaʼn jun ermano te Nigeria jlu, aju Uzondu tbʼi: «Aj tbʼaj nbʼinchaʼne jun orario, ax ikx in kux ntzʼibʼine ambʼil tuʼn ntene junx tukʼil nxuʼjile. Nimxix  toklen toj nwitze» (Filip. 1:10). Jaʼlo, qo yolin tiʼj Anastasia aju t-xuʼjil jun superintendente te circuito te Moldavia. In tzaj tchikʼbʼaʼn alkye tten in najbʼen ambʼil tuʼn toj tumel. Tqʼama jlu: «In xi nbʼinchaʼne waqʼune akux in xi tbʼinchaʼn nchmile qe tiʼchaq il tiʼj tuʼn tbʼant tuʼn. Iktzun tten jaku ten ambʼil qiʼje tuʼn qtene junx». ¿Yajtzun qa at nim tiʼchaq tuʼn tbʼant kyuʼne ex kwest tuʼn tel kypaʼne ambʼil tuʼn kytene junx?

11. ¿Alkyeqe tiʼchaq bʼant tuʼn Áquila ex Priscila junx?

¹¹ Jaku tzʼel kykanoʼn mejebʼleʼn tiʼj techel kyaj tqʼoʼn Áquila ex Priscila. Ok kʼujlaʼn mejebʼleʼn lu kyuʼn erman toj tnejel syent abʼqʼi (Rom. 16:3, 4). Mintiʼ in tzaj tqʼoʼn Biblia nim tqanil tiʼj kymejebʼleʼn, pero in tzaj tqʼamaʼn qa e aqʼunan junx, e pakbʼan junx ex qa e onin kyiʼj txqantl (Hech. 18:2, 3, 24-26). Nya oʼkxju, aj tyolin Biblia tiʼj Áquila ex Priscila, in tzaj tqʼamaʼn qa kukx e ten junx.

12. ¿Tiʼ jaku bʼant kyuʼn mejebʼleʼn tuʼn kyten mas ambʼil junx? (Ax ikx qʼonka twitza kyiʼj foto).

¹² ¿Alkye tten jaku tzʼel kykanoʼn mejebʼleʼn tiʼj techel kyaj tqʼoʼn Áquila ex Priscila? Che ximane tiʼj tkyaqil tiʼchaq il tiʼj tuʼn tbʼant tuʼn teyele junjun kyeye. ¿Jakupe bʼant junjun tiʼchaq kyuʼne junx? Jun techel, pakbʼan Áquila ex Priscila junx. ¿Axpe jlu in bʼant kyuʼne? Ax ikx, e aqʼunan junx. ¿Yajtzun kyeye? Bʼalo nya junx kyaqʼune at, pero ¿jakupe txi kybʼinchaʼne junx qe aqʼuntl toj ja? (Ecl. 4:9). Qa ma bʼaj kyonine kyibʼe, che aqʼunale junx ex ktel ambʼil kyiʼje tuʼn kyyoline. Ma tzikʼ mas te 50 abʼqʼi tkubʼlen mojeʼ Robert ex Linda. In tzaj tqʼamaʼn Robert jlu: «Nya nim ambʼil at qiʼje tuʼn qtene junx. Pero in kubʼ nnaʼne tzalajbʼil aj tbʼaj ntxʼajoʼne qe laq, atzunte nxuʼjile in nel tsuʼn aʼ kyiʼj moqa aj waqʼunane toj jardín ex in pon onil weye. Aj tkubʼ qbʼinchaʼne qe tiʼchaq junx, in nonin qiʼje tuʼn kukx tchʼiy qkʼujlabʼile».

13. ¿Tiʼ il tiʼj tuʼn tbʼant tuʼn chmilbʼaj ex xuʼjilbʼaj qa kyaj tuʼn tchʼiy kʼujlabʼil kyxolx?

¹³ Aj tten chmilbʼaj junx tukʼil t-xuʼjil atz ja, nya a t-xilen jlu qa kʼonil kyiʼj tuʼn tchʼiy kʼujlabʼil kyxol. Tqʼama jun ermana o kubʼ mojeʼ te Brasil jlu: «Tuʼnju at nim tiʼchaq tuʼn t-xi qbʼinchaʼn, jakulo kubʼ qximen qa junx atoʼ aj qten jun rat ja. Pero o tzʼel nnikʼe tiʼj qa nya oʼkx tuʼn ntene ja tukʼil nchmile. Sino il tiʼj tuʼn tel npaʼne ambʼil tuʼn nyoline tukʼil ex tuʼn tok nqʼoʼne nwiʼye tiʼj». Qbʼinx aju in bʼant tuʼn Bruno tukʼil Tays tuʼn t-ximen jun tiʼj juntl. Tqʼama Bruno jlu: «In xi qkʼuʼne qe celular tuʼn qtzalaje aj qtene junx».

14. ¿Tiʼ jaku bʼant kyuʼn mejebʼleʼn qa nya kygan tuʼn kyten junx?

¹⁴ ¿Yajtzun qa nya kygane tuʼn t-xi  kybʼinchaʼne qe tiʼchaq junx? Bʼalo junxitl qe tiʼchaq kygane tuʼn t-xi kybʼinchaʼne moqa in kubʼ kynaʼne qa in tzaj kyqʼoje aj t-xi kybʼinchaʼne qe tiʼchaq junx. Qa a jlu in bʼaj kyiʼje, ¿tiʼ jaku bʼant kyuʼne? Qo ximen juntl maj tiʼj qʼaqʼ ma qo yolin tiʼj. Aj tjaw kʼant, oʼkx jun tqan qʼaqʼ in kʼant. Tuʼn tkʼant mas, chebʼe chebʼe kʼokex qʼet mas siʼ toj. Ax jlu jaku bʼant kyuʼne, tzʼok tilil kyuʼne tuʼn kytene jun rat junx tkyaqil qʼij. Kyjyome tumel tuʼn tel kynikʼe tiʼj alkye jun tiʼ kygane tuʼn t-xi kybʼinchaʼne junx ex jaku che tzalaje tiʼj (Sant. 3:18). Qa ma bʼant jlu kyuʼne, kʼonil kyiʼje tuʼn tchʼiy mas kʼujlabʼil kyxole.

15. ¿Tiquʼn il tiʼj tuʼn kyrespetarin mejebʼleʼn kyxolx?

¹⁵ Nim toklen tuʼn kyrespetarin mejebʼleʼn kyxolx. In nok jlu ik tzeʼn kyqʼiqʼ in nonin tuʼn miʼn tkubʼ yupj qʼaqʼ. Qa mintiʼ kyqʼiqʼ, jun rat jaku kubʼ yupj. Ax jlu jaku bʼaj toj mejebʼleʼn qa mintiʼ ma che respetarin kyxolx, jun rat jaku naj kykʼujlabʼil. Pero qa ma che respetarin, kʼonil jlu kyiʼj tuʼn miʼn tnaj kykʼujlabʼil. Noqtzun tuʼnj, bʼaʼn tuʼn ttzaj tnaʼna qa nya aya kbʼel naʼnte qa in respetarina te tukʼila, sino a tukʼila kbʼel naʼnte qa in respetarina te. Ok tzikʼ mas te 25 abʼqʼi tkubʼlen mojeʼ ermana Penny tukʼil Aret. Tqʼama Aret jlu: «Tuʼnju in qo respetarine qxolxe, at kʼujlabʼil toj qjaye. In xi qqʼamaʼne tkyaqilju in kubʼ qximane ex in kubʼ qnaʼne tuʼnju ojtzqiʼn quʼne qa kʼokel tqʼoʼn juntl toklen juntl». ¿Tiʼ jaku bʼant tuʼna tuʼn tkubʼ tnaʼn tchmila moqa t-xuʼjila qa in respetarina te? Qo xnaqʼtzan tiʼjju bʼant tuʼn Abrahán ex Sara.

16. ¿Tiʼ xnaqʼtzbʼil jaku tzʼel kyiʼn chmilbʼaj tiʼj techel kyaj tqʼoʼn Abrahán? (1 Pedro 3:7; ax ikx qʼonka twitza kyiʼj foto).

¹⁶ Ok tqʼoʼn Abrahán toklen Sara. Xi tbʼiʼn tyol ex ximen tiʼjju kubʼ tnaʼn. Toj jun ambʼil, otoq tzaj tbʼis Sara ex tzaj tqʼoj tiʼj Abrahán, axpe ikx ok tqʼoʼn tpaj tiʼjju otoq bʼaj. Pero mintiʼ tzaj tqʼoj Abrahán tiʼj Sara ex mintiʼ xi tqʼamaʼn jun tyol nya toj tumel te. Ax ikx, ojtzqiʼntoq tuʼn qa in nok tqʼoʼn Sara toklen ex qa in nonin tiʼj aj tkubʼ t-ximen jun tiʼ. Tuʼntzunju, xi tbʼiʼn tyol ex xi tbʼinchaʼn tiʼj nya bʼaʼn (Gén. 16:5, 6). ¿Tiʼ xnaqʼtzbʼil jaku tzʼel qiʼn tiʼj jlu? O txi qʼoʼn toklen chmilbʼaj tuʼn tkubʼ t-ximen tiʼ tuʼn tbʼant tuʼn kyukʼil toj tja (1 Cor. 11:3). Pero tuʼnju kʼujlaʼn t-xuʼjil tuʼn, kʼokel tqʼoʼn toklen t-ximbʼetz ex mas qa at toklen tukʼil (1 Cor. 13:4, 5). Ax ikx, atlo maj in kubʼ tnaʼn t-xuʼjil siktleʼn ex taj tuʼn tyolin. Kyoj ambʼil lu, ¿in nokpe tqʼoʼna toklen t-xuʼjila ex in nokpe tbʼiʼna tyol? (kjawil uʼjit 1 Pedro 3:7). Qʼiʼn chʼixme 30 abʼqʼi tkubʼlen mojeʼ Angela tukʼil Dimitri. Tqʼama Angela tiʼ in bʼant tuʼn  tchmil tuʼn tkubʼ tnaʼn qa in respetarin te. Tqʼama jlu: «Kukx in nok tqʼoʼn nchmile twiʼ tiʼjju in xi nqʼamaʼne te ik tzeʼn qa nya bʼaʼn ma tzʼex nqʼije moqa oʼkx waje tuʼn nyoline. In kubʼ tyekʼin tpasens wiʼje, axpe ikx qa otoq tzaj nqʼoje moqa nbʼise».

17. ¿Tiʼ xnaqʼtzbʼil jaku tzʼel kyiʼn xuʼjilbʼaj tiʼj techel kyaj tqʼoʼn Sara? (1 Pedro 3:5, 6).

¹⁷ Kubʼ tyekʼin Sara qa ok tqʼoʼn toklen Abrahán tuʼnju onin tiʼjju kubʼ t-ximen (Gén. 12:5). Toj jun ambʼil, mintiʼtoq ximen tuʼn Abrahán tuʼn kypon junjun xjal tukʼil, pero kubʼ t-ximen tuʼn t-xi tqʼoʼn kywa. Tuʼntzunju, xi tqʼamaʼn te Sara tuʼn tkubʼ tbʼinchaʼn junjun pan maske attoq nim tiʼchaq tuʼn t-xi tbʼinchaʼn (Gén. 18:6). Jun rat xi tbʼiʼn Sara tyol Abrahán ex onin tiʼj tkyaqilju kubʼ t-ximen. Aqeye xuʼjilbʼaj, jaku tzʼel kykanoʼne tiʼj techel kyaj tqʼoʼn Sara ex tuʼn kyonine tiʼjju in kubʼ kyximen kychmile. Qa ma bʼant jlu kyuʼne, mas kyuw ktel kymebʼleʼne (kjawil uʼjit 1 Pedro 3:5, 6). Tqʼama Dimitri jlu, aju ma qo yolin tiʼj toj párrafo ma kyaj tiʼ in bʼant tuʼn t-xuʼjil tuʼn tkubʼ tyekʼin qa in respetarin te: «Aj tkubʼ nximane tuʼn t-xi nbʼinchaʼne jun tiʼ, qʼuqli nkʼuʼje tiʼj qa kʼonil nxuʼjile wiʼje, axpe ikx qa nya junx qximbʼetze tukʼil. Qa nya bʼaʼn ma tzʼela, mintiʼ in nok tqʼoʼn te npaje. ¡In xi nqʼoʼne nimxix chjonte te Angela tuʼnju in bʼant jlu tuʼn!». ¡Mas nya kwest tuʼn tok qkʼujlaʼn jun xjal qa in nok tqʼoʼn qoklen!

18. ¿Tiʼ jaku bʼaj qa ma tzʼok tilil kyuʼne tuʼn kukx tten kʼujlabʼil kyxole?

¹⁸ Taj Satanás tuʼn tkubʼ naj kʼujlabʼil kyxol mejebʼleʼn. Ojtzqiʼn tuʼn qa jaku tzʼel tpan tibʼ chmilbʼaj ex xuʼjilbʼaj tiʼj Jehová qa ma naj kʼujlabʼil kyxol. Pero mintiʼ jun tiʼ jaku naj kʼujlabʼil axix tok tuʼn. Tuʼntzunju, bʼaʼn tuʼn tkubʼ kyyekʼine kʼujlabʼil kyxole ik tzeʼn in yolin uʼj te El Cantar de los Cantares tiʼj. Ex bʼaʼn tuʼn tkubʼ kyqʼoʼne Jehová tnejel toj kymejebʼleʼne, tuʼn tel kypaʼne ambʼil tuʼn kytene junx ex tuʼn kyrespetarine kyxolxe aj kyximane tiʼjju in kubʼ tnaʼn juntl ex tiʼjju at tajbʼen te. Qa ma bʼant jlu kyuʼne, kjawil kynimsaʼne Jehová tuʼn kymejebʼleʼne tuʼnju atz in tzaj kʼujlabʼil axix tok tukʼil. Ex kʼokel kʼujlabʼil kyxole ik tzeʼn jun qʼaqʼ in nok xqʼuqin tuʼnju kukx jaku ten te jumajx.