1. ¿Tiʼ txokbʼil in tzaj tqʼoʼn Jehová qiʼj? (Ax ikx qʼonka twitza kyiʼj foto).

 ¿ALQUKʼIL jaku qo jyon onbʼil qa qaj qʼuqbʼil qkʼuʼj ex tuʼn ttzaj yekʼin qbʼe? Chikʼlixix taʼ tzaqʼwebʼil tiʼj xjel lu. Ojtzqiʼn quʼn qa jaku qo naʼn Dios te Jehová. Axpe ikx, in tzaj tqʼoʼn txokbʼil qiʼj tuʼn tbʼant jlu quʼn. Ex ojtzqiʼn quʼn qa taj tuʼn qyolin tukʼil tuʼnju in tzaj tqʼamaʼn jlu qe: «Miʼn che qʼajene tuʼn kynaʼne Dios» (1 Tes. 5:17). Jaku qo naʼn Dios te tuʼn tkyaqil qkʼuʼj ex jaku txi qqanin onbʼil te toj alkyexku ambʼil (Prov. 3:5, 6). Tuʼnju tbʼanel tmod Jehová qukʼil, in tzaj tqʼoʼn ambʼil qe tuʼn qnaʼn Dios toj alkyexku ambʼil ex nimku maj.

2. ¿Tiʼ kʼelel qnikʼ tiʼj toj xnaqʼtzbʼil lu?

² In xi qqʼoʼn nimxix chjonte te Jehová tuʼnju in tzaj tqʼoʼn ambʼil qe tuʼn qnaʼn Dios te. Pero atlo maj kwest tuʼn tbʼant jlu quʼn tuʼnju ateʼ nim tiʼchaq tuʼn t-xi qbʼinchaʼn. Tuʼn jlu, jakulo kubʼ qximen qa il tiʼj tuʼn kyok qnaʼj Dios te mas tbʼanel. ¿Tiʼ jaku tzʼonin qiʼj? Jaku tzʼonin Biblia qiʼj. Toj xnaqʼtzbʼil lu, qo yolil tiʼj techel kyaj tqʼoʼn Jesús qwitz ex kʼelel qnikʼ tiʼj tzeʼn jaku tzʼel qpaʼn ambʼil tuʼn qnaʼn Dios. Ax ikx, kʼelel qnikʼ tiʼj qa jaku che ok qnaʼj Dios te mas tbʼanel qa ma che bʼant jweʼ tiʼchaq quʼn.

3. ¿Tiʼ ojtzqiʼntoq tuʼn Jesús?

³ Ojtzqiʼntoq tuʼn Jesús qa nim toklen naʼj Dios toj twitz Jehová. Tej naʼmxtoq tul tzalu twitz Txʼotxʼ, ok tqʼoʼn twitz tiʼj tzeʼn tzaj ttzaqʼweʼn Jehová kynaʼj Dios  tmajen. Jun techel, ok tkeʼyin Jesús tzeʼn tzaj ttzaqʼweʼn tnaʼj Dios Ana, David, Elías ex junjuntl (1 Sam. 1:10, 11, 20; 1 Rey. 19:4-6; Sal. 32:5). Tuʼn jlu, in nel qnikʼ tiʼj tiquʼn xi tqʼamaʼn Jesús kye t-xnaqʼtzbʼen tuʼn kukx kynaʼn Dios tuʼn tkyaqil kykʼuʼj (Mat. 7:7-11).

4. ¿Tiʼ tbʼanel techel kyaj tqʼoʼn Jesús qwitz?

⁴ Kubʼ tqʼoʼn Jesús jun tbʼanel techel kywitz t-xnaqʼtzbʼen. Toj tkyaqil tajbʼebʼil te Jehová, kukx el tpaʼn ambʼil tuʼn tnaʼn Dios maske attoq nim tiʼchaq tuʼn tbʼant tuʼn moqa ateʼtoq xjal tukʼil (Mar. 6:31, 45, 46). Jaw weʼ te prim tuʼntzun tten tjunalx ex tuʼn tyolin tukʼil Tman (Mar. 1:35). Jun maj, naʼn Dios enter qonikʼen tej naʼmxtoq t-xi tbʼinchaʼn jun tiʼ nim toklen (Luc. 6:12, 13). Ex toj qonikʼen tej naʼmxtoq tkyim, kukx naʼn Dios. Bʼant jlu tuʼn jun ex juntl maj tuʼnju ojtzqiʼntoq tuʼn qa chʼixtoq tpon ambʼil mas kwest toj tajbʼebʼil te Jehová (Mat. 26:39, 42, 44).

5. ¿Tzeʼn jaku tzʼel qkanoʼn tiʼj Jesús?

⁵ Aju techel kyaj tqʼoʼn Jesús qwitz, in tzaj tyekʼin qe qa nim toklen tuʼn tel qpaʼn ambʼil tuʼn qnaʼn Dios maske at nim tiʼchaq tuʼn t-xi qbʼinchaʼn. Ik tzeʼn bʼant tuʼn Jesús, il-lo tiʼj tuʼn tkubʼ qximen toj alkye ambʼil qo naʼl Dios. Bʼalo il tiʼj tuʼn qjaw weʼ mas prim moqa tuʼn qxiʼ jtal mas yaj. Aj tbʼant jlu quʼn, in kubʼ qyekʼin te Jehová qa in nok qqʼoʼn toklen naʼj Dios. Tzaj tnaʼn jun ermana Lynne tbʼi qa xi tqʼoʼn nim chjonte te Jehová tej tok tbʼiʼn qa jakutoq yolin tukʼil toj naʼj Dios. Tqʼama jlu: «Tej tel nnikʼe tiʼj qa jaku chin tzaj bʼiʼne tuʼn Jehová toj alkyexku ambʼil, ok nqʼoʼne te jun tbʼanel wamiwe ex kubʼ nximane tuʼn kyok nnaʼj Diose te mas tbʼanel». Axlo qximbʼetz at ik tzeʼn te ermana lu. Atzun jaʼlo, qo yolin kyiʼj jweʼ tiʼchaq nim kyoklen jaku txi qqʼamaʼn kyoj qnaʼj Dios.

6. Ik tzeʼn in tzaj tqʼamaʼn Apocalipsis 4:10 ex 11, ¿tiʼ bʼaʼn tuʼn tbʼant quʼn?

⁶ Qnimsanktz Jehová. Toj jun witzikʼ, ok tkeʼyin apóstol Juan qa in che kʼulin 24 tij xjal moqa ansyan twitz Jehová toj kyaʼj. In jawtoq kynimsaʼn tbʼi  ex in kyqʼamaʼntoq jlu: «Bʼaʼn tuʼn tjaw nimset tbʼiya, ex tuʼn tnimanjtza, ex tuʼn tkʼmonteya ipumalj» (kjawil uʼjit Apocalipsis 4:10, 11). At nim tiquʼn tuʼn tjaw kynimsaʼn anjel Jehová ex tuʼn kykʼulun te. In che anqʼin tukʼil toj kyaʼj ex o tzʼok kyojtzqiʼn. Ax ikx, in nel kynikʼ tiʼj tmod kyuʼn tiʼchaq in che bʼant tuʼn ex in jaw kynimsaʼn tuʼn tkyaqil kyanmi aj tok kykeʼyin tbʼinchbʼen (Job 38:4-7).

7. ¿Tzeʼn jaku jaw qnimsaʼn Jehová kyoj qnaʼj Dios?

⁷ Ax ikx qe, nim toklen tuʼn tjaw qnimsaʼn Jehová aj qnaʼn Dios te. In bʼant jlu quʼn aj t-xi qqʼamaʼn te alkyeqe tbʼanel tmod in che ela toj qwitz ex tiquʼn in nok qqʼoʼn toklen. Aj quʼjin ex aj qxnaqʼtzan tiʼj Biblia, bʼaʼn tuʼn qximen kyiʼj tmod Jehová tbʼanel in che ela toj qwitz (Job 37:23; Rom. 11:33). Yajxitl, bʼaʼn tuʼn t-xi qqʼamaʼn te aju in kubʼ qnaʼn aj qximen kyiʼj tmod. Ax ikx, jaku jaw qnimsaʼn aj tonin qiʼj moqa aj tonin kyiʼj erman. Kukx in ximen Jehová qiʼj ex in qo ok t-xqʼuqin (1 Sam. 1:27; 2:1, 2).

8. ¿Alkye junjun tiʼchaq jaku txi qqʼoʼn chjonte tiʼj te Jehová? (1 Tesalonicenses 5:18).

⁸ Qqʼonx chjonte te Jehová. Jaku txi qqʼoʼn chjonte te Jehová kyiʼj nimku tiʼchaq kyoj qnaʼj Dios (kjawil uʼjit 1 Tesalonicenses 5:18). Qqʼonx chjonte te tiʼj tkyaqil tbʼanel tiʼchaq at qe tuʼnju atz tukʼil in che tzaj tkyaqil tbʼanel oyaj (Sant. 1:17). Jun techel, jaku txi qqʼoʼn chjonte te tiʼj tbʼanel lugar o kubʼ tbʼinchaʼn tuʼn qanqʼin twitz, kyiʼj tbʼinchbʼen, tiʼj qchwinqlal, kyiʼj toj qja, kyiʼj qamiw ex tiʼj qʼuqbʼil qkʼuʼj o tzaj tqʼoʼn. Ex in xi qqʼoʼn nimxix chjonte te tuʼnju o tzaj tqʼoʼn ambʼil qe tuʼn qok te tamiw.

9. ¿Tiquʼn at maj kwest tuʼn qqʼon chjonte?

⁹ ¿Tiquʼn in xi tqʼoʼn teya chjonte te Jehová? Atlo maj kwest tuʼn tel qnikʼ tiʼj tzaqʼwebʼil tiʼj xjel lu tuʼnju mintiʼ in che qʼon xjal chjonte. Mas in nok kyqʼoʼn kywiʼ tiʼjju kyex kyajbʼil twitzju tuʼn t-xi kyqʼoʼn chjonte tiʼjju at kye. Qa ma ten qximbʼetz ik tzeʼn kye, jaku che ok qnaʼj Dios ik tzeʼn jun lista kyiʼj tiʼchaq qaj tuʼn tten qe. Tuʼn miʼn tbʼaj jlu qiʼj, tbʼanel tuʼn kukx t-xi qqʼoʼn chjonte te Jehová tiʼj tkyaqilju in tzaj tqʼoʼn qe (Luc. 6:45).

10. Tuʼnju bʼaʼn qʼon jun erman chjonte, ¿tzeʼn onin jlu tiʼj? (Ax ikx qʼonka twitza tiʼj foto).

¹⁰ Mas nya kwest kʼelel toj qwitz tuʼn tikʼx jun nya bʼaʼn quʼn qa bʼaʼn qo qʼon chjonte. Qo xnaqʼtzan tiʼjju bʼaj tiʼj jun ermana Kyung-sook tbʼi, aju etz qʼamaʼn t-experiencia toj uʼj Aju Xqʼuqil te 1 te enero te 2015. Xi qʼamaʼn te ermana qa attoq cáncer tiʼj tpulmón ex qa otoq t-xiʼ toj il. Tqʼama ermana jlu: «Tzaj nimxix nbʼise tej tok nbʼiʼne qa yabʼ qine, kubʼ nximane qa otoq txi naj tkyaqilju at weye. Ex tzaj nim nxobʼile». ¿Tiʼ onin tiʼj  ermana tuʼn kukx tok tilil tuʼn? Tzaj tqʼamaʼn qa in jaxtoq twi tja naʼmxtoq t-xiʼ jtal ex in xitoq tqʼoʼn chjonte te Jehová tukʼil tqʼajqʼajel twiʼ kyiʼj jweʼ tbʼanel tiʼchaq otoq che ikʼ tiʼj toj qʼij aju. Tej tbʼant jlu tuʼn, chewix tanmi ex onin tiʼj tuʼn t-xi tqʼamaʼn te Jehová qa kʼujlaʼntoq tuʼn. El tnikʼ ermana tiʼj qa in xqʼuqin Jehová kyiʼj tmajen ex ok tqʼoʼn twitz tiʼj qa mas nim kʼiwlabʼil in che tzaj qkʼamoʼn kywitz nya bʼaʼn in qo ok weʼ twitz. Ik tzeʼn te ermana Kyung-sook, at nim tiquʼn tuʼn t-xi qqʼoʼn chjonte te Jehová maske in qo ok weʼ twitz nya bʼaʼn. Aj t-xi qqʼoʼn chjonte te Jehová, in nonin qiʼj tuʼn tikʼx quʼn ex tuʼn tkubʼ qnaʼn bʼaʼn.

11. ¿Tiquʼn iltoq tiʼj tuʼn tten kyipumal t-xnaqʼtzbʼen Jesús?

¹¹ Qqaninx te Jehová tuʼn ttzaj tqʼoʼn qipumal tuʼn qpakbʼan. Tej chʼixtoq tmeltzʼaj Jesús toj kyaʼj, xi tqʼamaʼn jlu kye t-xnaqʼtzbʼen: «Che okele testiw wiʼje tuj tnam Jerusalén, tuj tkyaqil txʼotxʼ Judea, tuj txʼotxʼ Samaria, ex tuj tkyaqil twitz txʼotxʼ» (Hech. 1:8; Luc. 24:46-48). Tej tikʼ chʼin ambʼil, tzyet Pedro ex Juan kyuʼn nejenel kye judiy ex pon qʼiʼn twitz Sanedrín. Xi qʼamaʼn kye tuʼn tkyaj kytzaqpiʼn tuʼn kypakbʼan ex e ok xobʼtzaʼn (Hech. 4:18, 21). ¿Tiʼ bʼant tuʼn Pedro ex Juan tej tbʼaj jlu kyiʼj?

12. Ik tzeʼn in tzaj tqʼamaʼn Hechos 4:29 ex 31, ¿tiʼ bʼant kyuʼn t-xnaqʼtzbʼen Jesús?

¹² Tej kyok xobʼtzaʼn Pedro ex Juan, xi kytzaqʼweʼn jlu: «Kyximankuye qa bʼaʼn tuj twitz Dios tuʼn t-xi qnimane kyyole ex mya ate Dios tuʼn t-xi qnimane; ex mlay bʼant tuʼn t-xi qkoline tuʼn t-xi qmaʼne aju ma qile ex ma qbʼiye» (Hech. 4:19, 20). Tej kyetz tzaqpiʼn kyuʼn nejenel kye judiy, ok kychmon kyibʼ kyukʼil txqantl t-xnaqʼtzbʼen Jesús. E naʼn Dios te Jehová tuʼn ttzaj tqʼoʼn kyipumal tuʼntzun t-xi kybʼinchaʼn aju tajbʼil. Xi kyqʼamaʼn jlu: «Qʼontza qipumale tuʼn t-xi qmaʼne tyola kye xjal, ex tuʼn miʼn qxobʼe». Ex tzaj tzaqʼweʼn kynaʼj Dios tuʼn Jehová (kjawil uʼjit Hechos 4:29, 31).

13. ¿Tiʼ xnaqʼtzbʼil jaku tzʼel qiʼn tiʼj Jin-hyuk?

¹³ Qa ma tzaj kyqʼamaʼn xjal qe tuʼn tkyaj qtzaqpiʼn tuʼn qpakbʼan, bʼaʼn tuʼn tel qkanoʼn kyiʼj t-xnaqʼtzbʼen Jesús ex tuʼn kukx tok tilil quʼn. Atzun jlu bʼant tuʼn jun ermano Jin-hyuk tbʼi tej tokx qʼoʼn pres tuʼnju mintiʼ okx tqʼon tibʼ kyxol soldad. Tej tten toj cárcel, xi qʼoʼn ambʼil te tuʼn t-xqʼuqin kyiʼj junjuntl pres otoq che el paʼn kyiʼj txqantl. Pero oʼkx xi qʼoʼn ambʼil te tuʼn tyolin kyukʼil qa at jun tiʼ at tajbʼen kye. Ax ikx, xi qʼamaʼn te tuʼn miʼn tyolin kyukʼil tiʼj Biblia. Pero xi tqanin tipumal ex tnabʼil te Jehová tuʼntzun tajbʼen alkyexku ambʼil tuʼn tuʼn tyolin tiʼjju nimen tuʼn (Hech. 5:29). Tqʼama jlu: «Tzaj ttzaqʼweʼn Jehová nnaʼj Diose, tzaj tqʼoʼn wipumale ex nnabʼile. Xi tzyet tuʼn t-xi nqʼoʼne xnaqʼtzbʼil kye nimku pres ttziyele junjun celda maske noq jweʼ minut. Te qonikʼen, e kubʼ ntzʼibʼine qe carta tuʼntzun t-xi nqʼoʼne kye pres toj juntl qʼij». Ik tzeʼn te Jin-hyuk, qʼuqli qkʼuʼj tiʼj qa kʼonil Jehová qiʼj tuʼn kukx qpakbʼan ex jaku txi qqanin qipumal ex qnabʼil te.

14. ¿Tiʼ jaku tzʼonin tiʼja tuʼn kyikʼx nya bʼaʼn tuʼna? (Salmo 37:3, 5).

¹⁴ Qqaninx qipumal te Jehová tuʼn kyikʼx nya bʼaʼn quʼn. Nim qe in qo bʼisun tuʼnju o kyim jun xjal kʼujlaʼn quʼn, in qo ok weʼ twitz ikʼbʼil, o tzaj jun yabʼil  qiʼj moqa tuʼnju in qo ok weʼ twitz alkyexku juntl problem. Ex mas in che tzaj nya bʼaʼn qiʼj tuʼn pandemia ex tuʼn qʼoj. Tuʼntzunju, bʼaʼn tuʼn t-xi tqʼamaʼna tkyaqilju tkuʼx toj tanmiya te Jehová. Qʼamanxa te tiʼ in kubʼ tnaʼna ik tzeʼn in bʼant tuʼna aj tyolina tukʼil jun tamiwa. Jaku tzʼok qeʼ tkʼuʼja tiʼj qa kʼonil Jehová tiʼja (kjawil uʼjit Salmo 37:3, 5).

15. ¿Tzeʼn in nonin naʼj Dios qiʼj tuʼn kyikʼx nya bʼaʼn quʼn? Qʼamantza jun techel.

¹⁵ Qa kukx ma qo naʼn Dios, jaku tzʼonin qiʼj tuʼn tikʼx quʼn aj qok weʼ kywitz nya bʼaʼn (Rom. 12:12). Ojtzqiʼn tuʼn Jehová tiʼ in che ok weʼ tmajen twitz ex «ok t-xi kyqanin onbʼil te in che tzaj tbʼiʼn» (Sal. 145:18, 19). Atzun jlu el tnikʼ jun precursora te 29 abʼqʼi tiʼj, aju Kristie tbʼi. Noq minabʼen tzaj jun yabʼil kyuw tiʼj ex tuʼn jlu tzaj depresión tiʼj. Tej tikʼ ambʼil, tzaj jun yabʼil tiʼj ttxuʼ aju jakutoq kyim tuʼn. Tqʼama Kristie jlu: «In kubʼsane twitz Jehová tuʼn ttzaj tqʼoʼn wipumale tuʼn tikʼx wuʼne junjun qʼij. Ok tilil wuʼne tuʼn t-xi nbʼinchaʼne junjun tiʼchaq toj wajbʼebʼile te Jehová ik tzeʼn tuʼn nxiʼye kyoj chmabʼil ex tuʼn nxnaqʼtzane njunalxe». Tqʼamatl jlu: «Onin naʼj Dios wiʼje tuʼn kyikʼx ambʼil kwest wuʼne. Chewix wanmiye tej tel nnikʼe tiʼj qa kukxtoq at Jehová ntxlaje. Maske kukx in nok weʼye kywitz nya bʼaʼn, tzaj ttzaqʼweʼn Jehová nnaʼj Diose tej tonin wiʼje tuʼn tkubʼ nnaʼne bʼaʼn». Tuʼntzunju, miʼn che ikʼ tnaʼl yol lu quʼn: «At tipumal Qajaw tuʼn kyklet qe xjal nimal Dios ok kyok tuj joybʼil kyiʼj» (2 Ped. 2:9).

16. ¿Tiquʼn il tiʼj tuʼn tonin Jehová qiʼj tuʼn miʼn tkubʼ qiʼj tuʼn nya bʼaʼn?

¹⁶ Qqaninx te Jehová tuʼn ttzaj tqʼoʼn qipumal tuʼn miʼn tkubʼ qiʼj tuʼn jun nya bʼaʼn. Tuʼnju nya tzʼaqli qoʼ, il tiʼj tuʼn tok tilil quʼn tuʼn miʼn tkubʼ qiʼj tuʼn nya bʼaʼn. Ex in xi tbʼinchaʼn Satanás noq alkyexku  tiʼ tuʼn tkubʼ qiʼj tuʼn. Jun techel, taj tuʼn tok qqʼoʼn qwitz tiʼj yaẍbʼil. Qa ma bʼant jlu quʼn, jaku che ten nya bʼaʼn qximbʼetz ex ya mlay tzalaj Jehová qiʼj, axpe ikx jaku kubʼ qbʼinchaʼn jun matij il (Mar. 7:21-23; Sant. 1:14, 15).

17. Tuʼn tkubʼ tiʼj jun nya bʼaʼn quʼn, ¿alkye juntl tiʼ il tiʼj tuʼn tbʼant quʼn otoqxi qo naʼn Dios? (Ax ikx qʼonka twitza kyiʼj foto).

¹⁷ Mlayx kubʼ tiʼj jun nya bʼaʼn quʼn qjunalx, sino il tiʼj tuʼn tonin Jehová qiʼj. Xi tqʼamaʼn Jesús jlu toj naʼj Dios xi tyekʼin kye t-xnaqʼtzbʼen: «Miʼn taqʼa ambʼil tuʼn qoke tuj joybʼil qiʼje, noq oʼkx qo tkloma teju mya bʼaʼn» (Mat. 6:13). Taj Jehová tuʼn tonin qiʼj, pero il tiʼj tuʼn t-xi qqanin te. ¿Alkye juntl tiʼ il tiʼj tuʼn tbʼant quʼn otoqxi qo naʼn Dios? Nim toklen tuʼn tok qxqʼuqin qibʼ tuʼn miʼn tjaw quʼjin ex tuʼn miʼn tok qbʼiʼn qe tiʼchaq tbʼanel in che ela toj kywitz xjal ateʼ tjaqʼ tkawbʼil Satanás (Sal. 97:10). Tuʼn tok qxqʼuqin qximbʼetz, tbʼanel qa ma qo xnaqʼtzan tiʼj Biblia, tuʼn qxiʼ kyoj chmabʼil ex tuʼn qpakbʼan. Ex in tzaj tqʼamaʼn Jehová qe qa mlay qo ok weʼ twitz jun nya bʼaʼn aju mlayx tzikʼx quʼn (1 Cor. 10:12, 13).

18. ¿Tiʼ il tiʼj tuʼn tbʼant quʼn qkyaqilx?

¹⁸ Nim toklen tuʼn qnaʼn Dios tuʼntzun qten tzʼaqli twitz Jehová kyoj ambʼil kwest. Taj Jehová tuʼn qyolin «tukʼil tuj naʼj Dios tuʼn tkyaqil» qkʼuʼj (Sal. 62:8). Tuʼntzunju, bʼaʼn tuʼn tel tpaʼna ambʼil tuʼn tnaʼna Dios tkyaqil qʼij ex tuʼn tkyaqil tanmiya. Ex qʼonka tilil tuʼn tjaw tnimsaʼna ex tuʼn t-xi tqʼoʼna chjonte te tiʼj tkyaqilju in bʼant tuʼn. Qaninxa te tuʼn ttzaj tqʼoʼn tipumala tuʼn tpakbʼana, tuʼn texa kywitz problem ex tuʼn miʼn tkubʼ tiʼja kyuʼn nya bʼaʼn. Miʼn txi tqʼoʼna ambʼil te alkyexku tiʼ tuʼn tel tiʼn ambʼil tiʼja tuʼn tnaʼna Dios te Jehová. Pero, ¿tzeʼn in tzaj ttzaqʼweʼn Jehová qe qnaʼj Dios? Toj juntl xnaqʼtzbʼil, kʼelel qnikʼ tiʼj jlu.