XNAQʼTZBʼIL 21
¿Tzeʼn in tzaj ttzaqʼweʼn Jehová qnaʼj Dios?
«Bʼaʼn quʼn in qkʼmoʼn aju ma txi qqanin te» (1 JUAN 5:15).
BʼITZ 41 Bʼintza nnaʼj Diose Mambʼaj Jehová
AJU KʼELEL QNIKʼ TIʼJ a
1, 2. ¿Tiʼ jaku kubʼ qxjelin?
¿OPE kubʼ t-xjelina qa ax tok in tzaj ttzaqʼweʼn Jehová tnaʼj Diosa? Qa ikju, nya tjunalxa o kubʼ t-xjelina jlu. Ateʼ nim erman in tzaj kyqʼamaʼn qa o kubʼ kyxjelin jlu ex mas aj kyikʼ toj jun nya bʼaʼn. Qa in qo ok weʼ twitz jun nya bʼaʼn, bʼalo kwest jaku tzʼela toj qwitz tuʼn tel qnikʼ tiʼj qa in qo tzaj ttzaqʼweʼn Jehová.
2 Toj xnaqʼtzbʼil lu, qo yolil tiʼj tiquʼn jaku tzʼok qeʼ qkʼuʼj tiʼj qa in tzaj ttzaqʼweʼn Jehová kynaʼj Dios tmajen (1 Juan 5:15). Ax ikx, kʼelel qnikʼ tiʼj tiquʼn jaku kubʼ qximen qa mintiʼ in tzaj ttzaqʼweʼn Jehová qnaʼj Dios ex alkye tten in che tzaj ttzaqʼweʼn.
MLAYLO QO TZAJ TTZAQʼWEʼN JEHOVÁ IK TZEʼN QAJ
3. ¿Tiquʼn taj Jehová tuʼn qnaʼn Dios te?
3 In tzaj tqʼamaʼn Biblia qa kʼujlaʼn qoʼ tuʼn Jehová ex qa nim qoklen toj twitz (Ageo 2:7; 1 Juan 4:10). Tuʼntzunju, in tzaj tqʼoʼn txokbʼil qiʼj tuʼn qnaʼn Dios te ex tuʼn t-xi qqanin onbʼil te (1 Ped. 5:6, 7). Taj tuʼn tonin qiʼj tuʼn qten nqayin ttxlaj ex tuʼn tikʼx alkyexku problem quʼn.
Tzaj ttzaqʼweʼn Jehová qe tnaʼj Dios David tej t-xqʼuqin tiʼj kyiʼj aj qʼoj. (Qʼonka twitza tiʼj párrafo 4).
4. ¿Tiquʼn jaku txi qqʼamaʼn qa in tzaj ttzaqʼweʼn Jehová kynaʼj Dios tmajen? (Ax ikx qʼonka twitza kyiʼj dibujo).
4 In kanet nim txʼolbʼabʼil quʼn toj Biblia ex in tzaj kyyekʼin qa tzaj ttzaqʼweʼn Jehová kynaʼj Dios qe tmajen. Jakulo qo ximen tiʼj rey David. Nim maj e ok tzoqpaj aj qʼoj tiʼj, tuʼntzunju, nim maj xi tqanin onbʼil te Jehová. Toj jun maj, xi tqanin jlu: «Nman, bʼintza nnaʼj Diose; qʼontz twiʼya tiʼj nkubʼsbʼile. Chin ttzaqʼwentza porke tzʼaqlxix teya ex tkyaqilju in tzaj ttziyana in japun tuʼna» (Sal. 143:1). Tzaj tbʼiʼn Jehová tnaʼj Dios David ex kolin tiʼj (1 Sam. 19:10, 18-20; 2 Sam. 5:17-25). Tuʼntzunju, tqʼama David jlu tuʼn tkyaqil tanmi: «Niqayin taʼ Qman kyiʼj qeju in che kubʼsan twitz». Ex ax jlu jaku tzʼok qeʼ qkʼuʼj tiʼj (Sal. 145:18).
Atzunte Pablo, tzaj tzaqʼweʼn tnaʼj Dios tuʼn Jehová tej ttzaj tqʼoʼn tipumal tuʼn tikʼx tuʼn. (Qʼonka twitza tiʼj párrafo 5).
5. ¿Tzajpe ttzaqʼweʼn Jehová kynaʼj Dios tmajen ik tzeʼn kubʼ kyximen? Qʼamantza jun techel. (Ax ikx qʼonka twitza kyiʼj dibujo).
5 Mlaylo tzaj ttzaqʼweʼn Jehová qnaʼj Dios ik tzeʼn in kubʼ qximen. Atzun jlu bʼaj tiʼj apóstol Pablo. Attoq «jun chʼiʼx» toj t-xmilal, toj juntl yol, jun nya bʼaʼn ex xi tqanin oxe maj te Jehová tuʼn tel tiʼn. ¿Tzajpe ttzaqʼweʼn Jehová tnaʼj Dios? Tzaj ttzaqʼweʼn, pero nya ik tzeʼn otoq kubʼ t-ximen Pablo. Mintiʼ el tiʼn Jehová nya bʼaʼn ok weʼ twitz, pero xi tqʼoʼn tipumal tuʼn kukx tajbʼen te (2 Cor. 12:7-10).
6. ¿Tiquʼn at maj jaku kubʼ qximen qa mintiʼ in tzaj ttzaqʼweʼn Jehová qnaʼj Dios?
6 Ax ikx qe, mlaylo qo tzaj tzaqʼweʼn ik tzeʼn in kubʼ qximen. Pero jaku tzʼok qeʼ qkʼuʼj tiʼj qa ojtzqiʼn tuʼn Jehová alkye mas bʼaʼn te qe. Axpe ikx, «at tipumal tuʼn ttzaj tqʼoʼn txqantl twitzju in xi qqanin ex twitzju in qo ximan tiʼj» (Efes. 3:20). Tuʼntzunju, jakulo qo tzaj ttzaqʼweʼn toj jun ambʼil moqa toj jun tten mintiʼ ximen quʼn.
7. ¿Tiquʼn at maj il tiʼj tuʼn tkubʼ qchʼexpuʼn aju in xi qqanin te Jehová? Qʼamantza jun techel.
7 Il-lo tiʼj tuʼn tkubʼ qchʼexpun aju in xi qqanin te Jehová aj tel mas qnikʼ tiʼjju tajbʼil. Qo yolin tiʼjju bʼaj tiʼj ermano Martin Poetzinger. Tej tikʼ chʼin ambʼil tkubʼlen mojeʼ, xi samaʼn toj jun campo de concentración nazi. Tnejel, xi tqanin te Jehová tuʼn tetz tzaqpiʼn tuʼn tten tukʼil t-xuʼjil ex tuʼn tpakbʼan juntl maj. Ikʼ kabʼe seman ex el tnikʼ tiʼj qa mlaytoq tzʼonin Jehová tiʼj tuʼn tetz tzaqpiʼn. Tuʼntzunju, xi tqanin ermano Poetzinger jlu te Jehová: «Najsama, tzʼonina wiʼje tuʼn tel nnikʼe tiʼjju tajbʼila tuʼn tbʼant wuʼne». Ex ok ten ximel tiʼj tkyaqilju nya bʼaʼn in bʼajtoq kyiʼj txqantl erman toj campo de concentración. Nim kye in tzaj bʼajtoq kykʼuʼj tiʼj kyxuʼjil ex kyiʼj kykʼwal. Tej tok tbʼiʼn ermano jlu, xi tqʼamaʼn te Jehová: «Chjonte tuʼnju akʼaj woklene. Tzʼonina wiʼje tuʼn t-xi nqʼuqbʼaʼne kykʼuʼj erman». Atzun jlu bʼant tuʼn tej tten bʼeljaj abʼqʼi toj campo de concentración.
8. ¿Tiʼ bʼaʼn tuʼn ttzaj qnaʼn aj qnaʼn Dios?
8 Bʼaʼn tuʼn ttzaj qnaʼn qa kjapunel twi t-ximbʼetz Jehová toj ambʼil mas tbʼanel. Tuʼn tjapun twi t-ximbʼetz Jehová, te jumajx kʼelel tiʼn qe tiʼchaq in tzaj qbʼis tuʼn ik tzeʼn qe xitbʼil tuʼnx twitz txʼotxʼ, qe yabʼil ex kamik. Ex kʼajbʼel Tkawbʼil tuʼn tuʼn tbʼant jlu tuʼn (Dan. 2:44; Apoc. 21:3, 4). Noqtzun tuʼnj, o tzaj tqʼoʼn ambʼil tuʼn tkawin Satanás kyibʼaj xjal (Juan 12:31; Apoc. 12:9). b Noqwit in xi tbʼinchaʼn Jehová kyiʼj nya bʼaʼn toj ambʼil jaʼlo, jakulo kubʼ kyximen xjal qa toj tumel in kawin Satanás. Tuʼntzunju, il tiʼj tuʼn tkubʼ qyoʼn tuʼn tjapun kywi junjun ttziybʼil Jehová, pero nya a t-xilen jlu qa mlay tzʼonin qiʼj. Qo xnaqʼtzan kyiʼj junjun tiʼchaq in bʼant tuʼn Jehová tuʼn tonin qiʼj.
¿TZEʼN IN TZAJ TTZAQʼWEʼN JEHOVÁ QNAʼJ DIOS?
9. ¿Tzeʼn in nonin Jehová qiʼj aj tkubʼ qximen tiʼ kbʼantel quʼn? Qʼamantza jun techel.
9 In tzaj tqʼoʼn qnabʼil. In tzaj ttziyen Jehová tuʼn ttzaj tqʼoʼn qnabʼil tuʼntzun tjaw qjyoʼn aju mas tbʼanel. Ex mas aj tjaw qjyoʼn junjun tiʼ nim toklen toj qanqʼibʼil ik tzeʼn qa qo kbʼel mojeʼ moqa miʼn (Sant. 1:5). Qo yolin tiʼjju bʼaj tiʼj María, jun ermana naʼmx tkubʼ mojeʼ. c In najbʼentoq tukʼil tzalajbʼil te precursora regular tej tok tojtzqiʼn jun ermano. Tqʼama jlu: «Tej tikʼ ambʼil, ok qamiwen qibʼe ex kubʼ qnaʼne kʼujlabʼil qxole. El nnikʼe tiʼj qa iltoq tiʼj tuʼn tkubʼ nximane tiʼ tuʼn tbʼant wuʼne. Tuʼntzunju, toj nim ambʼil in nnaʼne Dios tiʼj jlu te Jehová. Wajtoqe tuʼn tonin wiʼje, pero aʼyine tuʼn tkubʼ ximente tiʼ tuʼn tbʼant wuʼne». Kubʼ tnaʼn María qa tzaj ttzaqʼweʼn Jehová qe tnaʼj Dios ex qa tzaj tqʼoʼn tnabʼil. ¿Alkye tumel tzaj tzaqʼweʼn tuʼn Jehová? Xi tjyoʼn ermana tqanil kyoj quʼj ex kanet nim xnaqʼtzbʼil tuʼn jatumel kanet tzaqʼwebʼil kyiʼj t-xjel. Ex tuʼnju testigo de Jehová ttxuʼ, xi tqʼoʼn tbʼanel consej te ex onin jlu tiʼj tuʼn tel tnikʼ tiʼjju in kubʼ tnaʼn. Tuʼn jlu, jaw tjyoʼn María aju mas tbʼanel.
¿Tzeʼn in tzaj tqʼoʼn Jehová qipumal tuʼn tikʼx quʼn? (Qʼonka twitza tiʼj párrafo 10).
10. Ik tzeʼn in tzaj tqʼamaʼn Filipenses 4:13, ¿tzeʼn in nonin Jehová kyiʼj tmajen? Qʼamantza jun techel. (Ax ikx qʼonka twitza tiʼj foto).
10 In tzaj tqʼoʼn qipumal tuʼn tikʼx quʼn. Ik tzeʼn bʼant tuʼn Jehová tukʼil apóstol Pablo, ktzajel tqʼoʼn qipumal tuʼn kyikʼx nya bʼaʼn quʼn (kjawil uʼjit Filipenses 4:13). Qo xnaqʼtzan tiʼj alkye tten onin tiʼj jun ermano Benjamin tbʼi. Atxix tej kuʼxun, anqʼin nim ambʼil kyukʼil toj tja toj jun lugar jatumel e pon xjal klol kyibʼ atz África. Tqʼama jlu: «Nim maj in nnaʼne Dios te Jehová ex xi nqanine te tuʼn ttzaj tqʼoʼn wipumale tuʼn t-xi nbʼinchaʼne aju bʼaʼn. Tzaj ttzaqʼweʼn nnaʼj Diose tej tchewix wanmiye tuʼn, tej ttzaj tqʼoʼn wipumale tuʼn kukx npakbʼane ex tej ttzaj tqʼoʼn qe uʼj e onin wiʼje tuʼn ntene kyuw toj wokslabʼile». Ex tqʼamatl jlu: «Tej tjaw wuʼjine aju ikʼ toj kyanqʼibʼil junjuntl testigo de Jehová ex tej tok nqʼoʼne nwitze tiʼj tzeʼn onin Jehová kyiʼj tuʼn kukx tikʼx kyuʼn, onin wiʼje tuʼn miʼn nkubʼ numje toj wokslabʼile ex tuʼn kukx ntene tzʼaqli twitz».
¿Ope tzʼok tqʼoʼn twitza tiʼj alkye tten in che ajbʼen erman tuʼn Jehová tuʼn tonin tiʼja? (Qʼonka twitza tiʼj párrafo 11 ex 12). d
11, 12. ¿Tzeʼn jaku che ajbʼen erman tuʼn Jehová tuʼn ttzaj ttzaqʼweʼn qnaʼj Dios? (Ax ikx qʼonka twitza tiʼj foto).
11 In che ajbʼen erman tuʼn. Toj qonikʼen tej naʼmxtoq tkyim Jesús, kubʼsan twitz Jehová. Xi tqanin te tuʼn miʼn tkubʼ bʼyoʼn kyuʼn xjal tej tkubʼ kyximen qa yolin nya bʼaʼn tiʼj. Junxitl tzaqʼwebʼil tzaj tqʼoʼn Jehová te Jesús tuʼnju tzaj tsamaʼn jun anjel tuʼn t-xi tqʼuqbʼaʼn tkʼuʼj (Luc. 22:42, 43). Ax ikx qe, jakulo tzʼonin Jehová qiʼj aj ttzaj llamarin jun erman qiʼj moqa aj tpon visitaril qe. Tuʼntzunju, qkyaqilx jaku txi qjyoʼn ambʼil tuʼn t-xi qqʼamaʼn jun «yol bʼaʼnxix» kye erman (Prov. 12:25).
12 Qo yolin tiʼjju bʼaj tiʼj jun ermana Míriam tbʼi. Tej tikʼ junjun seman tkyimlen tchmil, kyaj ten tjunalx tja, tzaj bʼaj tkʼuʼj ex tzaj nim tbʼis. Nimxix oqʼ ermana ex tajtoq tuʼn tyolin. Tqʼama jlu: «Mintiʼtoq wipumale tuʼn t-xi nllamarine jun erman, tuʼntzunju in nnaʼne Dios te Jehová. Akux in chin naʼne Dios, jaw qʼajt teléfono. Tzaj llamarin jun ansyan wiʼje, jun tbʼanel wamiwe». Xi qʼuqbʼaʼn tkʼuʼj Míriam tuʼn ansyan ex t-xuʼjil. Ex qʼuqli tkʼuʼj ermana tiʼj qa ajbʼen ermano lu tuʼn Jehová tuʼn t-xi tllamarin te.
¿Alkye tten jaku che ajbʼen xjal tuʼn Jehová tuʼn kyonin qiʼj? (Qʼonka twitza tiʼj párrafo 13 ex 14).
13. ¿Tzeʼn in che ajbʼen xjal tuʼn Jehová tuʼn ttzaj ttzaqʼweʼn qnaʼj Dios? Qʼamantza jun techel.
13 Jaku che ajbʼen xjal tuʼn maske mintiʼ in che ajbʼen te (Prov. 21:1). At maj in tzaj ttzaqʼweʼn Jehová kynaʼj Dios tmajen aj kyajbʼen xjal tuʼn. Jun techel, ajbʼen rey Artajerjes tuʼn Jehová tuʼn t-xi tqʼoʼn ambʼil te Nehemías tuʼn tmeltzʼaj toj tnam Jerusalén ex tuʼn tonin tuʼn tjaw bʼinchet juntl maj (Neh. 2:3-6). Ex toj ambʼil jaʼlo, ax ikx jaku che ajbʼen xjal tuʼn Jehová tuʼn kyonin qiʼj.
14. ¿Tzeʼn in nonin tiʼja aju bʼaj tiʼj Soo Hing? (Ax ikx qʼonka twitza tiʼj foto).
14 Kubʼ tnaʼn ermana Soo Hing qa ajbʼen jun doctor tuʼn Jehová tuʼn tonin tiʼj. Tzaj nim yabʼil tiʼj t-ximbʼetz tal ermana ex tzaj jun aksident tiʼj. Tuʼntzunju, kyaj ttzaqpiʼn ermana taqʼun tukʼil tchmil tuʼntzun kyxqʼuqin tiʼj kykʼwal. Tuʼn jlu, ya mintiʼ ten kypwaq. Tuʼnju e ok weʼ twitz nim nya bʼaʼn, tqʼama ermana qa mlayxtoq tzikʼx tuʼn ex qa mintiʼtoq tipun. Xi tqʼamaʼn te Jehová tiʼ kubʼ tnaʼn ex xi tqanin onbʼil te. Tzaj qʼaqʼin tkʼuʼj doctor kyiʼj ex tuʼn jlu tzaj qʼoʼn onbʼil kye tuʼn gobierno ex kanet jun lugar mas barat jatumel tuʼn kyanqʼin. Yajxitl, tqʼama ermana jlu: «Ok qqʼoʼne qwitze tiʼj tzeʼn onin Jehová qiʼje. Qʼuqli qkʼuʼje tiʼj qa in tzaj tbʼiʼn qnaʼj Dios» (Sal. 65:2).
IL TIʼJ TUʼN TTEN QʼUQBʼIL QKʼUʼJ TUʼN TOK QKEʼYIN TTZAQʼWEBʼIL JEHOVÁ EX TUʼN TTZAJ QKʼAMOʼN
15. ¿Tiʼ onin tiʼj jun ermana tuʼn tel tnikʼ tiʼj qa in tzaj ttzaqʼweʼn Jehová qe tnaʼj Dios?
15 Chʼixme tkyaqil maj, mintiʼ in bʼant jun milagro tuʼn Jehová tuʼn ttzaj ttzaqʼweʼn qnaʼj Dios. Pero in tzaj tqʼoʼn aju at tajbʼen qe tuʼn kukx qten tzʼaqli twitz. Tuʼntzunju, tbʼanel tuʼn tel qnikʼ tiʼj tzeʼn in qo tzaj ttzaqʼweʼn. Qo ximen tiʼj jun ermana Yoko tbʼi. Kubʼ t-ximen ermana lu qa mintiʼ in tzaj tzaqʼweʼn tnaʼj Dios. Pero xi tzyet tuʼn tkubʼ ttzʼibʼin tkyaqilju xi tqanin te Jehová. Tej tikʼ ambʼil, ok tkeʼyin aju kubʼ ttzʼibʼin ex el tnikʼ tiʼj qa otoq tzaj ttzaqʼweʼn Jehová chʼixmi tkyaqilju otoq txi tqanin te, axpe ikx junjun tiʼchaq mintiʼtoq naʼn tuʼn. In tzaj tyekʼin jlu qe qa tbʼanel qa ma qo ximen tiʼj alkye tten in tzaj ttzaqʼweʼn Jehová qnaʼj Dios (Sal. 66:19, 20).
16. ¿Tzeʼn in nonin qʼuqbʼil qkʼuʼj qiʼj aj qnaʼn Dios? (Hebreos 11:6).
16 Nya oʼkx tuʼn tten qʼuqbʼil qkʼuʼj aj qnaʼn Dios te Jehová, sino ax ikx aj t-xi qkʼamoʼn alkyexku tzaqʼwebʼil (kjawil uʼjit Hebreos 11:6). Qo yolin tiʼjju bʼaj tiʼj Mike ex Chrissy, jun mejebʼleʼn tajtoq tuʼn t-xiʼ ajbʼel toj Betel. Tqʼama Mike jlu: «Xi qsamaʼne nim maj solicitud ex o naʼne Dios nim maj tiʼj jlu, pero mintiʼ tzaj qʼoʼn txokbʼil qiʼje». Kukx ok qeʼ tkʼuʼj Mike ex Chrissy tiʼj qa ojtzqiʼntoq tuʼn Jehová jatumel mas jaku che ajbʼen ex kukx ok tilil kyuʼn. E ok te precursor regular jatumel kyaj erman onbʼil ex e onin kyiʼj junjun aqʼuntl toj construcción. Atzun jaʼlo, in che ajbʼen te superintendente te circuito. Tqʼamatl Mike jlu: «Mintiʼ tzaj ttzaqʼweʼn Jehová qnaʼj Diose ik tzeʼn kubʼ qximane, pero mas tbʼanel tzaqʼwebʼil o tzaj tqʼoʼn twitzju qaje».
17, 18. Ik tzeʼn in tzaj tqʼamaʼn Salmo 86:6 ex 7, ¿tiʼ jaku tzʼok qeʼ qkʼuʼj tiʼj?
17 (Kjawil uʼjit Salmo 86:6, 7). Qʼuqlitoq tkʼuʼj David tiʼj qa in nok tbʼiʼn Jehová tnaʼj Dios ex qa in tzaj ttzaqʼweʼn. Ax jlu jaku tzʼok qeʼ qkʼuʼj tiʼj. In tzaj kyyekʼin techel ma qo xnaqʼtzan tiʼj qa jaku tzaj tqʼoʼn Jehová qnabʼil ex qipumal tuʼn kukx tikʼx quʼn. Ax ikx, ma tzʼel qnikʼ tiʼj qa jaku che ajbʼen erman ex qe xjal tuʼn Jehová tuʼn kyonin qiʼj.
18 Atlo maj mlay tzaj ttzaqʼweʼn Jehová qnaʼj Dios ik tzeʼn otoq kubʼ qximen, pero qʼuqli qkʼuʼj tiʼj qa ktzajel ttzaqʼweʼn. Ktzajel tqʼoʼn aju at tajbʼen qe toj ambʼil mas tbʼanel. Tuʼntzunju, kukx qo naʼn Dios te Jehová ex qeʼk qkʼuʼj tiʼj qa kxqʼuqil qiʼj jaʼlo, ex qa tzul tqʼoʼn tkyaqilju in pon qkʼuʼj tiʼj toj akʼaj twitz Txʼotxʼ (Sal. 145:16).
BʼITZ 46 Chjonte teya Jehová
a In tzaj ttziyen Jehová qa ktzajel ttzaqʼweʼn qnaʼj Dios qa at toklen tukʼilju tajbʼil. Aj qikʼ kyoj ambʼil kwest, jaku tzʼok qeʼ qkʼuʼj tiʼj qa kʼonil qiʼj tuʼn kukx qajbʼen te. Toj xnaqʼtzbʼil lu, kʼelel qnikʼ tiʼj tzeʼn in tzaj ttzaqʼweʼn Jehová qnaʼj Dios.
b Toj uʼj Aju Xqʼuqil te junio te 2017, etz xnaqʼtzbʼil «Miʼn tzikʼ tnaʼl quʼn aju toklen Jehová tuʼn tkawin». In tzaj tqʼamaʼn xnaqʼtzbʼil lu tiquʼn o tzaj tqʼoʼn Jehová ambʼil tuʼn tkawin Satanás twitz txʼotxʼ.
c Ma che kubʼ chʼixpet junjun bʼibʼaj.
d TQANIL TIʼJ TILBʼILAL: In pon jun txubʼaj tukʼil tal klol tibʼ toj juntl lugar. In che okx kʼamoʼn kyuʼn erman tuʼn tkyaqil kykʼuʼj ex in xi kyqʼoʼn onbʼil kye.
