XNAQʼTZBʼIL 20
BʼITZ 67 Pakbʼanxa Tyol Dios
Kukx qo pakbʼan tukʼil kʼujlabʼil
«Ilxix tiʼj tuʼn t-xi pakbʼet tqanil kolbʼil kye xjal kyuj kykyaqil nasyon» (MAR. 13:10).
¿TIʼ KʼELEL QNIKʼ TIʼJ?
¿Tzeʼn in nonin kʼujlabʼil tuʼn qpakbʼan tukʼil tzalajbʼil ex tuʼn tkyaqil qanmi?
1. ¿Tiʼ tzaj qʼamaʼn toj chmabʼil anual te abʼqʼi 2023?
TBʼANELXIX ok reunión anual te abʼqʼi 2023. a Toj chmabʼil lu, tzaj qʼamaʼn junjun akʼaj tqanil kyiʼj junjun xnaqʼtzbʼil ex junjun tqanil at toklen tukʼil pakbʼabʼil. Jun techel, tzaj qʼamaʼn qa bʼalo ateʼ junjun xjal ktzajel qʼoʼn ambʼil kye tuʼn kyajbʼen te Jehová ik tzeʼn toj ambʼil tej otoqxi kubʼ xitj Nintz tnam Babilonia. Ax ikx tzaj qʼamaʼn qa toj noviembre te 2023, ya mintiʼ tuʼn t-xi qsamaʼn tkyaqil tajlal aqʼuntl in bʼant quʼn tok pakbʼabʼil. ¿Ape t-xilen jlu qa ya nya nim toklen pakbʼabʼil jaʼlo? Miʼn.
2. ¿Tiquʼn mas nim toklen pakbʼabʼil aj tikʼ junjun qʼij? (Marcos 13:10).
2 Mas nim toklen pakbʼabʼil junjun qʼij. ¿Tiquʼn? Tuʼnju chʼinx tkubʼaj ambʼil. Qo ximen tiʼjju tqʼama Jesús tiʼj pakbʼabʼil toj mankbʼil tqʼijlalil toj Marcos 13:10 (uʼjinktza). Ex toj ax txʼolbʼabʼil lu yolin Jesús tiʼj toj Mateo, tqʼama qa kxel pakbʼet tbʼanel tqanil twitz Txʼotxʼ naʼmx tul «mankbʼil tqʼijlalil» (Mat. 24:14). A kyxilen yol lu tuʼn tkubʼ najsaʼn te jumajx tkyaqilju at tjaqʼ tkawbʼil Satanás. Ya ximen tuʼn Jehová «alkye qʼij ex alkye or» che kbʼajel qe tiʼchaq o tqʼama (Mat. 24:36; 25:13; Hech. 1:7). Ex aj tikʼ junjun qʼij, mas nqayin atoʼ tiʼj ambʼil lu (Rom. 13:11). Kukx qo pakbʼal naʼmxtoq tul ambʼil lu.
3. ¿Tiquʼn in qo pakbʼan?
3 Qkyaqilx bʼaʼn tuʼn qximen tiʼj xjel lu: ¿Tiquʼn in qo pakbʼan tiʼj tbʼanel tqanil? Tuʼn kʼujlabʼil. Aj qpakbʼan, in kubʼ qyekʼin qa kʼujlaʼn tbʼanel tqanil quʼn, qe xjal ex aju mas nim toklen, kʼujlaʼn Jehová quʼn ex aju tbʼi. Qo xnaqʼtzan tiʼj teyele junjun lu.
IN QO PAKBʼAN TUʼNJU KʼUJLAʼN TBʼANEL TQANIL QUʼN
4. ¿Tiʼ in bʼant quʼn aj tok qbʼiʼn jun tbʼanel tqanil?
4 Ximana tiʼj mankbʼil maj tzaj qʼoʼn jun tbʼanel tqanil teya. Bʼalo tzaj qʼamaʼn teya qa o tzul itzʼj tneʼẍ jun tfamiliara moqa tzaj qʼoʼn jun aqʼuntl teya aju in jyona tiʼj. ¿Tiʼ kubʼ tnaʼna tej tok tbʼiʼna jlu? Kubʼlo tnaʼna nim tzalajbʼil ex tajtoqa tuʼn t-xi tqʼamaʼna kye toj tjaya ex tamiwa. Ax ikx, axlo jlu kubʼ tnaʼna tej tok tbʼiʼna qe tbʼanel tqanil tiʼj Tkawbʼil Dios.
5. ¿Tiʼ kubʼ tnaʼna tej t-xnaqʼtzana tiʼj Tyol Dios? (Ax ikx qʼonka twitza kyiʼj foto).
5 Ximana tiʼjju kubʼ tnaʼna tej t-xnaqʼtzana tiʼj Biblia. El tnikʼa tiʼj qa kʼujlaʼna tuʼn Jehová, qa taj tuʼn ttena kyukʼil qeju in che kʼulin te, qa o tzaj ttziyen tuʼn tel tiʼn kʼixkʼoj ex bʼis. Ax ikx, qa che kjawil anqʼin qe toj tjaya tuʼn toj akʼaj twitz Txʼotxʼ (Mar. 10:29, 30; Juan 5:28, 29; Rom. 8:38, 39; Apoc. 21:3, 4). E ponlo kykyaqil qe xnaqʼtzbʼil lu toj tanmiya (Luc. 24:32). Ok tkʼujlaʼna qe xnaqʼtzbʼil el tnikʼa tiʼj ex tajtoqa tuʼn tyolina tiʼj kyukʼil txqantl (mojbʼankuya tukʼil Jeremías 20:9).
Tej tel qnikʼ tiʼj axix tok, qajtoq tuʼn qyolin tiʼj kyukʼil txqantl. (Qʼonka twitza tiʼj párrafo 5).
6. ¿Tiʼ in tzaj tyekʼin teya aju bʼaj tiʼj Ernest ex Rose?
6 Qo yolin tiʼjju bʼaj tiʼj jun ermano Ernest tbʼi. b Tqʼama ermano qa kyim tman tej qʼiʼntoq 10 abʼqʼi tuʼn. Tqʼamatl jlu: «Kubʼ nxjeline: ‹¿Atz o txiʼ nmane toj kyaʼj moqa o naj te jumajx?›. In tzajtoq nqʼoje kyiʼj kʼwal itzʼ kyman». Chʼixmi tkyaqil qʼij xiʼ ermano toj cementerio, in kubʼtoq xmejeʼ twitz tpanteón tman ex in xitoq tqʼamaʼn jlu toj naʼj Dios: «Najsama Dios, waje tuʼn tok wojtzqiʼne jatumel taʼ nmane». Tej qʼiʼntoq 27 abʼqʼi tuʼn, xi qanin te qa tajtoq tuʼn t-xnaqʼtzan tiʼj Tyol Dios ex jun rat xi tkʼamoʼn. Jaw labʼin tiʼj tej tel tnikʼ tiʼj qa mintiʼ naʼn kyuʼn kyimni, qa ik tten ik tzeʼn aj qikʼ jtan ex qa in tzaj ttziyen Tyol Dios qa che kjawil anqʼin kyimni (Ecl. 9:5, 10; Hech. 24:15). Tej tbʼaj jlu, kanet tzaqʼwebʼil tuʼn kyiʼj t-xjel tajtoq tuʼn tel tnikʼ tiʼj. Kubʼ tnaʼn nimxix tzalajbʼil kyiʼj axix tok xnaqʼtzbʼil in neltoq tnikʼ tiʼj toj Biblia. Ax ikx, xi tzyet t-xnaqʼtzan t-xuʼjil tukʼil, aju Rose tbʼi, ex tgantoq aju in neltoq tnikʼ tiʼj. Tej tikʼ ambʼil, kykabʼil e bautisarin toj 1978. Tukʼil tzalajbʼil e yolin tiʼjju el kynikʼ tiʼj kyukʼil toj kyja, qe kyamiw ex qe xjal kyajtoq tuʼn tok kybʼin. Tuʼn jlu, o tzʼonin Ernest ex Rose kyiʼj mas te 70 xjal tuʼn tok kyojtzqiʼn Jehová ex tuʼn kybautisarin.
7. ¿Tiʼ kbʼajel qa kʼujlaʼn qe xnaqʼtzbʼil tiʼj Biblia quʼn? (Lucas 6:45).
7 Qa kʼujlaʼn qe xnaqʼtzbʼil tiʼj Biblia quʼn, qo yolin tiʼj kyukʼil txqantl (kjawil uʼjit Lucas 6:45). In kubʼ qnaʼn ik tzeʼn kye apóstol toj tnejel syent abʼqʼi tej kyqʼama jlu: «Mlay bʼant tuʼn t-xi qkoline tuʼn t-xi qmaʼne aju ma qile ex ma qbʼiye» (Hech. 4:20). O tzʼok qkʼujlaʼnxix axix tok ex qaj tuʼn qyolin tiʼj kyukʼil nim xjal.
IN QO PAKBʼAN TUʼNJU KʼUJLAʼN QE XJAL QUʼN
8. ¿Tiʼ in nonin qiʼj tuʼn t-xi qqʼamaʼn tbʼanel tqanil kye xjal? (Qʼonka twitza tiʼj recuadro « Qyekʼinx qkʼujlabʼil aj qqʼon xnaqʼtzbʼil», ax ikx qʼonka twitza tiʼj foto.
8 Ik tzeʼn te Jehová ex Jesús, kʼujlaʼn qe xjal quʼn (Prov. 8:31; Juan 3:16). In tzaj qʼaqʼin qkʼuʼj kyiʼj qeju «mintiʼ Dios» kyukʼil (Efes. 2:12). Tuʼn tkyaqil nya bʼaʼn in tzaj kyiʼj, in kubʼ kynaʼn qa ateʼ toj jun xoch. Atzun qe at jun las qukʼil tuʼn qonin kyiʼj tuʼn kyjatz toj xoch. ¿Alqiʼj in qo yolin? Atz kyiʼj tbʼanel tqanil tiʼj Tkawbʼil Dios. Kʼonil qkʼujlabʼil ex qʼaqʼbʼil qkʼuʼj tuʼn tok tilil quʼn tuʼn qyolin tiʼj tbʼanel tqanil kyukʼil. Jun tbʼanel oyaj lu kye tuʼnju in tzaj tqʼoʼn jun qʼuqbʼil kykʼuʼj, jaku tzʼonin kyiʼj tuʼn kytzalaj jaʼlo ex tuʼn «kytzyunte ju chwinqlal axix tok» moqa aju chwinqlal te jumajx (1 Tim. 6:19).
In nonin qkʼujlabʼil ex qʼaqʼbʼil qkʼuʼj tuʼn qonin kyiʼj xjal tuʼn tok kybʼiʼn tbʼanel tqanil. (Qʼonka twitza tiʼj párrafo 8).
9. ¿Tiʼ in xi qqʼamaʼn kye xjal ex tiquʼn? (Ezequiel 33:7, 8).
9 Ax ikx in nonin kʼujlabʼil qiʼj tuʼn t-xi qqʼamaʼn kye xjal qa chʼinx tkubʼ najsaʼn tkyaqil nya bʼaʼn twitz Txʼotxʼ (kjawil uʼjit Ezequiel 33:7, 8). In tzaj qbʼis at tok qqʼoʼn qwitz tiʼj qa mintiʼ in nok kyqʼoʼn xjal ex qe toj qja nya Testigo toklen xitbʼil. In tzaj tqʼamaʼn Mateo 24:21 qa «tzul jun kʼixbʼisabʼl maʼxix, bʼajx tzaj jun maj ikju atxix tej tbʼant twitz txʼotxʼ, ex mlay tzaj juntl maj ik tzaʼn jlu». Qaj tuʼn tel kynikʼ tiʼjju kbʼajel toj ambʼil aju. Tnejel, kbʼel najsaʼn tkyaqil okslabʼil nya ax tok ex tibʼajxi jlu, kbʼel xiten tkyaqil nya bʼaʼn at twitz Txʼotxʼ toj Armagedón (Apoc. 16:14, 16; 17:16, 17; 19:11, 19, 20). Tuʼntzunju, qaj tuʼn t-xi qqanin te Jehová tuʼn kyklet noq jteʼxku xjal ex tuʼn kyoktz toj ttnam. Pero, ¿tiʼ kbʼajel kyiʼj qeju mintiʼ in xi kybʼiʼn pakbʼabʼil, ik tzeʼn junjun toj qja?
10. ¿Tiquʼn nim toklen tuʼn kukx qpakbʼan kye xjal?
10 Ik tzeʼn el qnikʼ tiʼj toj xnaqʼtzbʼil o kyaj, bʼalo jaku tzaj tqʼoʼn Jehová ambʼil tuʼn kyklet xjal otoq tzʼajtz tiʼj kyanmi aj tok kykeʼyin xitbʼil te Nintz tnam Babilonia. Tuʼn jlu, in nel qnikʼ tiʼj qa nim toklen tuʼn kukx qpakbʼan kye xjal. Bʼaʼn tuʼn ttzaj qnaʼn qa aju kxel qqʼamaʼn kye xjal jaʼlo, jaku tzaj kynaʼn toj ambʼil tzul (mojbʼankuya tukʼil Ezequiel 33:33). Bʼalo jaku tzaj kynaʼn aju otoq txi qqʼamaʼn kye ex jaku kubʼ kyximen tuʼn kyajbʼen te Jehová junx qukʼil akux at ambʼil. Ik tzeʼn bʼaj tiʼj xjal xqʼuqil pres toj tnam Filipos, oʼkx ajtz tiʼj tanmi tej ttzaj jun matij terremoto. Ax ikx, bʼalo ateʼ xjal mintiʼ in xi kykʼamoʼn tbʼanel tqanil jaʼlo, pero jaku txi kykʼamoʼn aj ttzaj xitbʼil tiʼj Nintz tnam Babilonia tuʼnju aj ttzaj xitbʼil lu, ik kʼokel ik tzeʼn jun terremoto (Hech. 16:25-34).
IN QO PAKBʼAN TUʼNJU KʼUJLAʼN JEHOVÁ QUʼN EX TBʼI
11. ¿Tzeʼn in jaw qnimsaʼn Jehová ex in xi qqʼoʼn ipumalj te? (Apocalipsis 4:11, ax ikx qʼonka twitza kyiʼj foto).
11 ¿Alkye jun tiquʼn mas nim toklen in qo pakbʼan? Tuʼnju kʼujlaʼn Jehová quʼn ex tbʼi. Ex in jaw qnimsaʼn aj qpakbʼan. Ojtzqiʼn quʼn qa nim toklen tuʼn tjaw nimset Jehová, tuʼn tnimanjtz ex tuʼn tkʼamonte ipumalj (kjawil uʼjit Apocalipsis 4:11). ¿Tzeʼn in jaw qnimsaʼn Jehová? In bʼant quʼn aj t-xi qqʼamaʼn qe yekʼbʼil kye xjal tiʼjju qa a Jehová kubʼ bʼinchante tkyaqil ex a tzaj qʼonte qchwinqlal. Yajtzun ipumalj, ¿tzeʼn in xi qqʼoʼn te? In bʼant quʼn aj tajbʼen ambʼil, qjwers ex qe tiʼchaq quʼn tuʼn tok tilil quʼn tuʼn qonin tiʼj pakbʼabʼil (Mat. 6:33; Luc. 13:24; Col. 3:23). Toj juntl yol, qgan tuʼn qyolin tiʼj Jehová tuʼnju kʼujlaʼn quʼn. Pero ax ikx qaj tuʼn qyolin tiʼj tbʼi ex tiʼ t-xilen. ¿Tiquʼn?
In xi qqʼoʼn ipumalj te Jehová aj tajbʼen ambʼil quʼn, qjwers ex qe tiʼchaq qe tuʼn tok tilil quʼn tuʼn qonin tiʼj pakbʼabʼil. (Qʼonka twitza tiʼj párrafo 11).
12. ¿Tzeʼn in qo onin tuʼn tok tbʼi Jehová te xjan aj qpakbʼan?
12 Qaj tuʼn qonin tuʼn tok tbʼi Jehová te xjan tuʼnju kʼujlaʼn quʼn (Mat. 6:9). Toj juntl yol, qaj tuʼn qonin tuʼn tbʼaj saqin tbʼi kyiʼj nya ax tok yol o tqʼama Satanás tiʼj (Gén. 3:1-5; Job 2:4; Juan 8:44). Tuʼntzunju, qaj tuʼn qkolin tiʼj tbʼi Jehová toj pakbʼabʼil ex tuʼn t-xi qqʼamaʼn axix tok tiʼj kye qeju kyaj tuʼn tok kybʼiʼn. Qaj tuʼn tok kyojtzqiʼn xjal qa aju tmod mas nim toklen aju kʼujlabʼil, qa jun tzʼaqli aj kawil, qa toj chʼintl ambʼil kbʼel tnajsaʼn Tkawbʼil tkyaqil yajbʼil ex ktzajel tiʼn mujbʼabʼil ex tzalajbʼil kye xjal (Sal. 37:10, 11, 29; 1 Juan 4:8). Aj tbʼant jlu quʼn, in qo onin tuʼn tok tbʼi Jehová te xjan. Pero ax ikx, in japun twi qoklen te ttestiw. ¿Tiquʼn in xi qqʼamaʼn jlu?
13. ¿Tiquʼn in qo tzalaj tuʼnju testigo de Jehová qbʼi? (Isaías 43:10-12).
13 O tzaj tqʼoʼn Jehová qoklen tuʼn qok te ttestiw (kjawil uʼjit Isaías 43: 10-12). Ma tzikʼ junjun abʼqʼi tzaj tqʼamaʼn Kʼloj Xjal Qʼil Twitz Aqʼuntl jlu toj jun carta: «Mintiʼ jun tiʼ mas tbʼanel ik tzeʼn tuʼn qok te testigo de Jehová». c Qo ximen tiʼj jun techel. Atoʼ toj jun juicio tuʼnju tqʼama jun xjal qa o kubʼ qbʼinchaʼn jun nya bʼaʼn. Tuʼn jlu, qaj tuʼn tok jun xjal te testiw qiʼj. Tuʼntzunju, kjawil qjyoʼn jun xjal ojtzqiʼnxix quʼn, jaku tzʼok qeʼ qkʼuʼj tiʼj ex bʼaʼn che yolin xjal tiʼj tuʼntzun tok qʼoʼn toklen tyol. Atzun qe, o tzaj tqʼoʼn Jehová qoklen tuʼn t-xi qqʼamaʼn qa oʼkx te axix tok Dios tuʼnju ojtzqiʼn qoʼ tuʼn ex in nok qeʼ tkʼuʼj qiʼj. Jun tbʼanel oklenj qe ex jun oyaj tuʼnju Ttestiw qoʼ ex in najbʼen tkyaqil ambʼil quʼn tuʼn qyolin tiʼj tbʼi ex tuʼn t-xi qyekʼin kye txqantl qa nya ax tok qe yol in tzaj qʼamaʼn tiʼj. Iktzun tten in japun qoklen te testigo de Jehová (Sal. 83:18, TNM; Rom. 10:13-15).
KUKX QO PAKBʼAL AJXI TUL XITBʼIL
14. ¿Alkye tbʼanel ambʼil in qo ayon tiʼj?
14 In qo ayon kyiʼj tbʼanel ambʼil. Kuchiwt tuʼn tonbʼil Jehová kukx che kanetel xjal jaku txi kykʼamoʼn axix tok naʼmxtoq txi tzyet nimxix yajbʼil. Pero ax ikx in qo tzalaj aj tel qnikʼ tiʼj qa ateʼlo xjal che eletz tjaqʼ tkawbʼil Satanás ex kjawil kynimsaʼn Jehová junx qukʼil toj ambʼil te nimxix yajbʼil (Hech. 13:48).
15, 16. ¿Tiʼ kukx kbʼantel quʼn ex jtoj kjapunel bʼaj twiʼ?
15 At jun qaqʼun kukx kbʼantel. O tzaj qʼoʼn qoklen tuʼn qonin tiʼj jun tbʼanel aqʼuntl, aju tuʼn qyolin kyiʼj tbʼanel tqanil tiʼj Tkawbʼil Dios twitz tkyaqil Txʼotxʼ. Ex toj ax ambʼil lu, kukx kxel qqʼamaʼn kye xjal qa chʼix tul xitbʼil tiʼj tkyaqil nya bʼaʼn. Ajtzun tpon ambʼil te juicio, kʼelel kynikʼ tiʼj qa atz tzajni tukʼil Jehová aju tqanil in qo pakbʼan tiʼj (Ezeq. 38:23).
16 ¿Tiʼtzun qaj tuʼn tbʼant quʼn? Kukx kʼokel tilil quʼn tuʼn qpakbʼan tukʼil tzalajbʼil tuʼnju kʼujlaʼn qe tbʼanel tqanil quʼn, qe xjal ex aju mas nim toklen, kʼujlaʼn Jehová quʼn ex tbʼi. Tzmaxi kbʼel bʼaj aqʼuntl lu quʼn aj ttzaj tqʼamaʼn Jehová jlu: «¡Ma japun bʼaj aqʼuntl tiʼj pakbʼabʼil!».
BʼITZ 54 Atzun bʼe jlu
a Ok reunión anual toj 7 te octubre te 2023 toj Salón de Asambleas kye testigo de Jehová te Newburgh, atz Nueva York, Estados Unidos. Yajxitl, etz programa lu toj kabʼe plaj toj JW Broadcasting®. Aju tnejel plaj, etz toj noviembre te 2023 ex aju tkabʼin toj enero te 2024.
b Qʼonka twitza tiʼj xnaqʼtzbʼil «Chʼexpaj kyanqʼibʼil tuʼn Tyol Dios: Etz nwitze kyiʼj tbʼanel tzaqʼwebʼil in tzaj tqʼoʼn Tyol Dios», aju etz toj revista Xqʼuqil te 1 te febrero te 2015.
c Qʼonka twitza tiʼj Anuario de los testigos de Jehová 2007, página 3.
