1. ¿Alkye tbʼanel xnaqʼtzbʼil xi tyekʼin Jehová te Abrahán?

 MINTIʼ ikʼ tnaʼl tuʼn Abrahán tej t-xi tqʼamaʼn jun t-anjel Jehová te qa kbʼel t-xiten tnam Sodoma ex Gomorra. Maske ten nim qʼuqbʼil tkʼuʼj Abrahán, xi tqanin jlu te Jehová: «¿Che najelpe qe xjal tzʼaqlxix tuʼna junx kyukʼil qe bʼinchal mya bʼaʼn? [ . . . ] Aya jwes kyibʼaj kykyaqil xjal twitz txʼotxʼ, ¿mlaype tbʼinchaya aju tzʼaqlxix?». Ten tpasens Jehová tiʼj Abrahán ex xi tyekʼin te qa mlayx kubʼ tnajsaʼn qe xjal tzʼaqli (Gén. 18:​23-33). In kubʼ qnaʼn nimxix tzalajbʼil aj tel qnikʼ tiʼj jlu.

2. ¿Tiquʼn in nok qeʼ qkʼuʼj tiʼj qa tzʼaqli tkyaqilju in xi tbʼinchaʼn Jehová ex qa in kubʼ tyekʼin qʼaqʼbʼil tkʼuʼj aj kyok xjal toj juicio tuʼn?

² ¿Tiquʼn in nok qeʼ qkʼuʼj tiʼj qa tzʼaqli tkyaqilju in xi tbʼinchaʼn Jehová ex qa in kubʼ tyekʼin qʼaqʼbʼil tkʼuʼj aj kyok xjal toj juicio tuʼn? Tuʼnju ojtzqiʼn quʼn qa in nel tnikʼ tiʼj kyanmi xjal (1 Sam. 16:7). Ex ojtzqiʼn tanmi moqa t-ximbʼetz teyle junjun xjal tuʼn (1 Rey. 8:39; 1 Crón. 28:9). Tbʼanelxix xnaqʼtzbʼil ma tzʼel qnikʼ tiʼj. At nimxix tnabʼil Jehová ex atlo maj mlay tzʼel qnikʼ tiʼj alkye tten in xi tbʼinchaʼn kyiʼj tiʼchaq. Tuʼntzunju tqʼama apóstol Pablo: «Mlay tzʼel qnikʼ tiʼj t-ximbʼetz» (Rom. 11:33).

3, 4. ¿Tiʼ jaku kubʼ qxjelin ex tiʼ kʼelel qnikʼ tiʼj toj xnaqʼtzbʼil lu? (Juan 5:​28, 29).

³ Maske in nel qnikʼ tiʼj qa in xi tbʼinchaʼn Jehová tkyaqil tzʼaqli, jakulo che ten junjun qxjel ik tzeʼn te Abrahán. Jakulo kubʼ qxjelin jlu: «¿Che kjawilpe anqʼin junjun xjal e kubʼ tnajsaʼn Jehová ik tzeʼn qeju xjal te Sodoma ex Gomorra? ¿Ateʼpe junjun che kjawil anqʼin kyxol ‹qeju mya tzʼaqlxix›?» (Hech. 24:15).

 ⁴ Qo yolin tiʼjju o tzʼel qnikʼ tiʼj aj kyjaw anqʼin kyimni. Kʼitzqeku el qnikʼ tiʼj jun akʼaj xnaqʼtzbʼil kyiʼj qeju «ok che jawil anqʼin tuʼn tten kychwinqlal» ex kyiʼj qeju «che kjawil anqʼin tuʼn kyok toj juicio» (kjawil uʼjit Juan 5:​28, 29, TNM). a Tuʼn jlu, o tzʼel tnikʼ majen in bʼant taqʼun tiʼj qa il tiʼj tuʼn kybʼant junjuntl chʼixpubʼil tiʼjju nimen quʼn ex atzun jlu kʼelel qnikʼ tiʼj toj xnaqʼtzbʼil lu ex toj juntl. Tnejel qo yolil tiʼjju mintiʼ ojtzqiʼn quʼn tiʼj alkye tten in che ok xjal toj juicio tuʼn Jehová ex yajxitl qo yolil tiʼjju ojtzqiʼn quʼn.

AJU MINTIʼ OJTZQIʼN QUʼN

5. ¿Tiʼ o tzaj kyqʼamaʼn quʼj kyiʼj xjal e kubʼ najsaʼn tuʼn Jehová toj tnam Sodoma ex Gomorra?

⁵ Toj ambʼil ojtxe, o tzaj kyqʼamaʼn quʼj qa mlay che jaw anqʼin xjal e kubʼ najsaʼn tuʼn Jehová ik tzeʼn qeju xjal te Sodoma ex Gomorra. ¿Tiquʼn? Tuʼnju kubʼ t-ximen Jehová qa nya tzʼaqli qeʼ. Pero tej otoq xnaqʼtzan majen in bʼant taqʼun tiʼj jlu ex otoq naʼn Dios, o tzʼel tnikʼ tiʼj qa mintiʼ tuʼn t-xi qqʼamaʼn qa atzun jlu kbʼajel. ¿Tiquʼn? Qo xnaqʼtzan tiʼj.

6. ¿Toj alkye junjun ambʼil e kubʼ tnajsaʼn Jehová qe xjal kubʼ t-ximen qa nya tzʼaqli qe ex tiʼ mintiʼ in tzaj tqʼamaʼn Biblia?

⁶ Ateʼ nim txʼolbʼabʼil toj Biblia in tzaj tyekʼin tzeʼn e kubʼ tnajsaʼn Jehová qe xjal nya tzʼaqlixix. Jun techel, e kubʼ tnajsaʼn Jehová kykyaqil xjal toj Diluvio, pero xi tqʼoʼn ambʼil te Noé ex qe toj tja tuʼn kykyaj anqʼin. Tej tikʼ ambʼil, e ajbʼen xjal te Israel tuʼn Jehová tuʼn tkubʼ kynajsaʼn wuq tnam e ten toj Txʼotxʼ Tziyen maj. Ex toj juntl maj xi tqʼoʼn ambʼil te jun anjel tuʼn tkubʼ tbʼyoʼn 185,000 soldad te Asiria toj jun qonikʼen (Gén. 7:23; Deut. 7:​1-3; Is. 37:​36, 37). Mintiʼ in tzaj tqʼamaʼn Biblia qa kubʼ t-ximen Jehová qa mlay che jaw anqʼin xjal e kyim kyoj ambʼil lu ex qa e kubʼ tnajsaʼn te jumajx. Qo xnaqʼtzan mas tiʼj jlu.

7. ¿Alkyeqe tqanil mintiʼ ojtzqiʼn quʼn kyiʼj xjal e kyim toj Diluvio ex kyiʼj xjal te Canaán? (Qʼonka twitza tiʼj dibujo ).

⁷ Mintiʼ ojtzqiʼn quʼn alkye t-ximbʼetz Jehová tiʼj teyele junjun xjal kyim kyoj ambʼil ma qo yolin tiʼj. Ex mintiʼ ojtzqiʼn quʼn qa ten ambʼil kyiʼj tuʼn tel kynikʼ tiʼj Jehová ex tuʼn tajtz tiʼj kyanmi. Tej naʼmxtoq ttzaj Diluvio, in tzaj tqʼamaʼn Biblia qa «xi tpakbʼaʼn Noé kye xjal tuʼn kybʼinchante aju tzʼaqlxix» (2 Ped. 2:5). Pero mintiʼ in tzaj tqʼamaʼn qa pakbʼan te teyele junjun xjal twitz tkyaqil Txʼotxʼ akux in bʼinchan tiʼj ark. Ex mintiʼ ojtzqiʼn quʼn qa xi qʼoʼn ambʼil kye xjal te Canaán tuʼn tel kynikʼ tiʼj Jehová ex tuʼn tbʼant chʼixpubʼil kyuʼn.

8. ¿Tiʼ mintiʼ ojtzqiʼn quʼn kyiʼj xjal te Sodoma ex Gomorra?

⁸ Atzun jaʼlo qo yolin kyiʼj xjal e kubʼ tnajsaʼn Jehová toj tnam Sodoma ex Gomorra. Ojtzqiʼn quʼn qa ten jun xjal tzʼaqli kyxol aju Lot tbʼi. Pero mintiʼ ojtzqiʼn quʼn qa pakbʼan Lot kye kykyaqil xjal. Ax ikx, mintiʼ ojtzqiʼn quʼn qa el kynikʼ tiʼj alkye bʼaʼn ex alkye nya bʼaʼn. Tuʼn kybʼinchbʼen jakulo txi qqʼamaʼn qa mintiʼ el kynikʼ tiʼj. In tzaj tqʼamaʼn Biblia qa «tzaʼnx qe kuʼxun ax ikx qe tij xjal» kyajtoq tuʼn kyok ten kyiʼj xjal e pon visitarilte Lot (Gén. 19:4; 2 Ped. 2:7). Tuʼnju in kubʼ tyekʼin Jehová nim qʼaqʼbʼil tkʼuʼj, mlay bʼant tuʼn t-xi qqʼamaʼn qa o kubʼ t-ximen tuʼn miʼn kyjaw anqʼin xjal lu. In tzaj tqʼamaʼn Biblia qa xi tqʼamaʼn Jehová te Abrahán qa mintiʼtoq laj xjal tzʼaqli toj tnam te Sodoma ex Gomorra (Gén. 18:32). Tuʼntzunju, jaku txi  qqʼamaʼn qa nya tzʼaqliqetoq kykyaqil xjal ex toj tumel tej kykubʼ tnajsaʼn Jehová. ¿Pero jakupe txi qqʼamaʼn qa ni jun kyxol xjal lu kjawil anqʼin kyxol qeju xjal mya tzʼaqlixix? Mintiʼ ojtzqiʼn quʼn.

9. ¿Tiʼ mintiʼ ojtzqiʼn quʼn tiʼj Salomón?

⁹ Ax ikx in yolin Biblia kyiʼj xjal e ten tzʼaqli twitz Jehová, pero yajxitl e ok te nya tzʼaqli ik tzeʼn rey Salomón. Otoq tzʼel tnikʼ Salomón tiʼj Jehová ex ojtzqiʼntoq tuʼn tzeʼn tuʼn tkʼulin te ex tzaj kʼiwlaʼn tuʼn. Pero tej tikʼ ambʼil, ok ten kʼulul kywitz nya ax tok dios. Tzaj tqʼoj Jehová tuʼnju bʼant jlu tuʼn Salomón ex tzaj nya bʼaʼn kyiʼj xjal te Israel toj nimku ambʼil. Ax tok, in tzaj tqʼamaʼn Biblia qa tej tkyim «kuʼx maquʼn tuj tnam tok tbʼi Ttanmi David aju qtzan tman» (1 Rey. 11:​5-9, 43; 2 Rey. 23:13). Pero aj ttzaj tqʼamaʼn Biblia qe yol lu tiʼj, ¿ape t-xilen qa kjawil anqʼin Salomón? Mintiʼ ojtzqiʼn quʼn. Jakulo tzaj kyqʼamaʼn junjun qa kjawil anqʼin tuʼnju in tzaj tqʼamaʼn Romanos 6:7 jlu: «Porke aju o kyim, tzoqpiʼmajtl tjaqʼ tipumal il». Pero mintiʼ in tzaj tyekʼin texto lu qa che jawil anqʼin kykyaqil qeju o che kyim ex mintiʼ in tzaj tyekʼin qa aj kyjaw anqʼin xjal, in nok te jun chojbʼil kye noq tuʼnju in che kyim. Sino aj tjaw anqʼin jun xjal, in nok te jun oyaj tuʼn Jehová te xjal noq tuʼnju kʼujlaʼn tuʼn. Ex in xi tqʼoʼn oyaj lu te xjal taj tuʼn tajbʼen te te jumajx (Job 14:​13, 14; Juan 6:44). ¿Ktelpe Salomón kyxol xjal lu? Oʼkx Jehová ojtzqilte. Pero qʼuqli qkʼuʼj tiʼj qa kxel tbʼinchaʼn aju tzʼaqli.

AJU OJTZQIʼN QUʼN

10. ¿Tiʼ in kubʼ tnaʼn Jehová aj tkubʼ tnajsaʼn qe xjal nya bʼaʼn? (Ezequiel 33:11; ax ikx qʼonka twitza tiʼj tilbʼilal).

¹⁰ (Kjawil uʼjit Ezequiel 33:11). In tzaj tqʼamaʼn Jehová qe tiʼ in kubʼ tnaʼn aj tkubʼ tnajsaʼn jun xjal. Kubʼ ttzʼibʼin apóstol Pedro junjun yol chʼixme ik tzeʼn tqʼama profeta Ezequiel. Tqʼama jlu: «Porke miʼn tajbʼil Qajaw tuʼn tnaj jun xjal» (2 Ped. 3:9). Kyuʼn yol lu in chewix qanmi. Ojtzqiʼn quʼn qa mlay kubʼ tnajsaʼn Jehová jun xjal te jumajx qa mintiʼ jun tiquʼn tuʼn tbʼant jlu tuʼn. At nim qʼaqʼbʼil tkʼuʼj Jehová ex in kubʼ tyekʼin qa jaku bʼant.

11. ¿Alkyeqe xjal mlay che jaw anqʼin ex tzeʼn ojtzqiʼn jlu quʼn?

¹¹ ¿Alkyeqe xjal ojtzqiʼn quʼn qa mlay che jaw anqʼin juntl maj? Oʼkx in yolin Biblia kyiʼj junjun. b Jun techel, tqʼama Jesús qa mlay jaw anqʼin Judas Iscariote (Mar. 14:21; ax ikx qʼonka twitza tiʼj Juan 17:12 ex tiʼj nota de estudio). Ojtzqiʼntoq tuʼn Judas qa tiʼj Jehová ex tiʼj Tkʼwal ok tbʼinchaʼn nya bʼaʼn (qʼonka twitza tiʼj Marcos 3:29 ex kyiʼj nota de estudio). Ax ikx tqʼama Jesús qa mlay che jaw anqʼin junjun nejenel kye okslabʼil tuʼnju ok kybʼinchaʼn nya bʼaʼn tiʼj (Mat. 23:​33, TNM; ax ikx qʼonka twitza tiʼj Juan 19:11 ex tiʼj nota de estudio jatumel in tqʼamaʼn «del hombre»). Ex tqʼama apóstol Pablo qa mlay che jaw anqʼin apóstata qa mintiʼ ma tzʼajtz tiʼj kyanmi (Heb. 6:​4-8; 10:29).

12. ¿Tiʼ ojtzqiʼn quʼn tiʼj qʼaqʼbʼil tkʼuʼj Jehová? Qʼamantza junjun techel.

¹² Ik tzeʼn ma qo xnaqʼtzan tiʼj, at nim qʼaqʼbʼil tkʼuʼj Jehová ex nya taj «tuʼn tnaj jun xjal». ¿Tzeʼn kubʼ tyekʼin Jehová qʼaqʼbʼil tkʼuʼj kyiʼj junjun xjal kubʼ kybʼinchaʼn jun matij il? Kubʼ tbʼinchaʼn rey David junjun matij il ik tzeʼn yaẍbʼil ex bʼiybʼel. Pero tzaj qʼaqʼin tkʼuʼj Jehová tiʼj ex kubʼ tnajsaʼn til tuʼnju ajtz tiʼj tanmi (2 Sam. 12:​1-13). Ax ikx kubʼ tbʼinchaʼn rey Manasés nim  nya bʼaʼn. Pero tzaj qʼaqʼin tkʼuʼj Jehová tiʼj ex kubʼ tnajsaʼn til tuʼnju ajtz tiʼj tanmi (2 Crón. 33:​9-16). In tzaj kyyekʼin techel lu qa in kubʼ tyekʼin Jehová qʼaqʼbʼil tkʼuʼj qa in nok tkeʼyin qa jaku bʼant jlu tuʼn. Kjawil anqʼin juntl maj David ex Manasés tuʼn Jehová tuʼnju el kynikʼ tiʼj qa kubʼ kybʼinchaʼn jun matij il ex ajtz tiʼj kyanmi.

13. a) ¿Tiquʼn tzaj qʼaqʼin tkʼuʼj Jehová kyiʼj xjal te Nínive? b) ¿Tiʼ tqʼama Jesús kyiʼj xjal te Nínive?

¹³ Ax ikx ojtzqiʼn quʼn qa tzaj qʼaqʼin tkʼuʼj Jehová kyiʼj xjal te Nínive. Xi tqʼamaʼn Jehová jlu te Jonás: «Ma pon tqanil wukʼile tiʼj kybʼinchbʼen mya bʼaʼn». Pero tzaj qʼaqʼin tkʼuʼj Jehová kyiʼj ex kubʼ tnajsaʼn kyil tuʼnju ajtz tiʼj kyanmi. Mas nim qʼaqʼbʼil tkʼuʼj Jehová kubʼ tyekʼin ik tzeʼn te Jonás. Ex tej ttzaj tqʼoj Jonás, xi tnaʼn Jehová te qa mintiʼtoq ojtzqiʼn kyuʼn xjal alkye bʼaʼn ex alkye nya bʼaʼn (Jon. 1:​1, 2; 3:10; 4:​9-11). Tej tikʼ ambʼil yolin Jesús kyiʼj xjal te Nínive tuʼn ttzaj tyekʼin tzeʼn in kubʼ tyekʼin Jehová qʼaqʼbʼil tkʼuʼj ex tzeʼn in xi tbʼinchaʼn aju tzʼaqli. Ex tqʼama Jesús jlu: «Tuj tqʼijlalil jwisi, [ . . . ] che jawil weʼ qe xjal aj Nínive» (Mat. 12:41).

14. ¿Tiʼ kbʼajel kyiʼj xjal te Nínive aj kyjaw anqʼin «tuʼn kyok toj juicio»?

¹⁴ Tej tqʼama Jesús qa «tuj tqʼijlalil jwisi, [ . . . ] che jawil weʼ qe xjal aj Nínive», atztoq in yolin tiʼj ambʼil aj kyjaw anqʼin kyimni «tuʼn kyok toj juicio» (Juan 5:​29, TNM). Kbʼajel jlu aj Tkawin Jesús toj Mil Abʼqʼi, jatumel «che jawil anqʼin qe kyimni, tzaʼnx qeju tzʼaqlxix, ax ikx qeju mya tzʼaqlxix» (Hech. 24:15). In xi qqʼamaʼn qa che jawil anqʼin qeju mya tzʼaqlixix «tuʼn kyok toj juicio» tuʼnju kʼokel tkeʼyin Jehová ex Jesús qa in xi kynimen ex qa in xi kybʼinchaʼn aju in nel kynikʼ tiʼj. Jun techel, qa nya taj jun xjal te Nínive tuʼn tkʼulin te Jehová, kbʼel najsaʼn te jumajx (Is. 65:20). Pero kykyaqil qeju kbʼel kyximen tuʼn kyajbʼen te Jehová ex tuʼn kyten tzʼaqli twitz, kxel qʼoʼn ambʼil kye tuʼn kyanqʼin te jumajx (Dan. 12:2).

15. a) ¿Tiquʼn mintiʼ tuʼn t-xi qqʼamaʼn qa ni jun xjal te Sodoma ex Gomorra kjawil anqʼin? b) ¿Tiʼ kyxilen yol tkuʼx toj Judas versículo 7? (Qʼonka twitza tiʼj recuadro « ¿Tiʼ tajtoq Judas tuʼn ttzaj tqʼamaʼn?»).

¹⁵ Xi tqʼamaʼn Jesús kye xjal ok kybʼinchaʼn nya bʼaʼn tiʼj ex mintiʼ xi kynimen t-xnaqʼtzbʼil qa mastoq nim kykastiw kbʼel  qʼoʼn kywitz xjal te Sodoma ex Gomorra (Mat. 10:​14, 15; 11:​23, 24; Luc. 10:12). ¿Tiʼ tajtoq Jesús tuʼn ttzaj tqʼamaʼn kyukʼil yol lu? Jakulo kubʼ qximen qa oʼkx yolin tiʼj jun techel tuʼn ttzaj tyekʼin jun xnaqʼtzbʼil qe, pero parece que atztoq in yolin kyiʼj xjal te Sodoma ex Gomorra ik tzeʼn tej tyolin kyiʼj xjal te Nínive. Ex jaku txi qqʼamaʼn qa ax «tqʼijlalil jwisi» yolin Jesús tiʼj tej tyolin kyiʼj xjal te Somoda ex Gomorra ex kyiʼj xjal te Nínive. Kubʼ kybʼinchaʼn xjal te Sodoma ex Gomorra nim nya bʼaʼn ik tzeʼn kye xjal te Nínive. Pero ajtz tiʼj kyanmi xjal te Nínive. Ex bʼaʼn tuʼn ttzaj qnaʼn qa tqʼama Jesús qa aqeju xjal «kubʼ kybʼinchaʼn nya bʼaʼn, che kjawil anqʼin tuʼn kyok toj juicio» (Juan 5:​29, TNM). Tuʼn jlu, jakulo t-xi qqʼamaʼn qa che jawil anqʼin junjun xjal te Sodoma ex Gomorra, ex qa ok qo onil kyiʼj tuʼn tel kynikʼ tiʼj Jehová ex Jesús.

16. ¿Tiʼ in nok tqʼoʼn Jehová twitz tiʼj naʼmxtoq tjaw anqʼin jun xjal tuʼn? (Jeremías 17:10).

¹⁶ (Kjawil uʼjit Jeremías 17:10). In tzaj kyyekʼin yol tkuʼx toj versículo lu aju ojtzqiʼn quʼn. In nok tkeʼyin Jehová aju at toj «kyanmi xjal» ex in bʼaj t-xpichʼun tuj kyximbʼetz». Aj tkubʼ t-ximen Jehová alkyeqe che jawil anqʼin, kxel tqʼoʼn «chojbʼil teyle junjun ik tzaʼnx tbʼinchbʼen». Kbʼel tqʼoʼn kysentens xjal, pero kbʼel tyekʼin qʼaqʼbʼil tkʼuʼj qa jaku bʼant. Tuʼntzunju, mlay txi qqʼamaʼn qa mlay jaw anqʼin jun xjal qa mintiʼ in tzaj tqʼamaʼn Tyol Dios.

KXEL TBʼINCHAʼN «JWES KYIBʼAJ KYKYAQIL XJAL» AJU TZʼAQLI

17. ¿Tiʼ kbʼajel kyiʼj xjal o che kyim?

¹⁷ O che kyim nim millón xjal tuʼnju ok lepeʼ Adán ex Eva tiʼj Satanás ex mintiʼ e nimen te Jehová. Ex o tzaj qbʼis tuʼn «mankbʼil aj qʼoj», aju kamik (1 Cor. 15:26). ¿Tiʼ kbʼajel kyiʼj kykyaqil xjal o che kyim? Ok che jawil anqʼin 144,000 okslal skʼoʼn maj tuʼn kyxiʼ toj kyaʼj ex ya mlay che kyim (Apoc. 14:1). Ax ikx, che jawil anqʼin nim tmajen Jehová kyxol «qeju tzʼaqlxix» ex che anqʼil te jumajx aj Tkawin Jesús toj Mil Abʼqʼi qa kukx ma che ten tzʼaqli aj tok bʼajsbʼil prueba (Dan. 12:13; Heb. 12:1). Ax ikx, toj Mil Abʼqʼi che jawil anqʼin «qeju mya tzʼaqlxix» ex kxel qʼoʼn ambʼil kye tuʼn  tkubʼ kychʼexpuʼn kymod ex tuʼn kyajbʼen te Jehová. Kyxol qe jlu, che tel xjal mintiʼ el kynikʼ tiʼj Jehová ex bʼalo che tel junjun «kubʼ kybʼinchaʼn nya bʼaʼn» (Luc. 23:​42, 43). Noqtzun tuʼnj, o kubʼ t-ximen Jehová tuʼn miʼn kyjaw anqʼin junjun xjal tuʼnju kubʼ kybʼinchaʼn nim nya bʼaʼn ex mintiʼ e nimen te (Luc. 12:​4, 5, TNM).

18, 19. a) ¿Tiquʼn jaku tzʼok qeʼ qkʼuʼj tiʼjju kbʼantel tuʼn Jehová kyiʼj qeju o che kyim? (Isaías 55:​8, 9). b) ¿Tiʼ qo yolil tiʼj toj juntl xnaqʼtzbʼil?

¹⁸ Jaku tzʼok qeʼ qkʼuʼj tiʼj qa kukx in xi tbʼinchaʼn Jehová aju tzʼaqli aj kykubʼ tjuzgarin qe xjal. Ex ik tzeʼn el tnikʼ Abrahán tiʼj, tzʼaqli te «jwes kyibʼaj kykyaqil xjal», at qʼaqʼbʼil tkʼuʼj ex at nim tnabʼil. O txi tqʼoʼn Jehová toklen Jesús tuʼn tkubʼ tjuzgarin qe xjal ex o txi tyekʼin te tzeʼn tuʼn tbʼant tuʼn (Juan 5:22). In nel tnikʼ Jehová ex Jesús tiʼjju tkuʼx toj kyanmi xjal (Mat. 9:4). Tuʼntzunju, jaku tzʼok qeʼ qkʼuʼj tiʼj qa kukx kxel kybʼinchaʼn aju tzʼaqli.

¹⁹ Qeʼk qkʼuʼj tiʼj Jehová ex tiʼjju in bʼant tuʼn. Kukx in xi tbʼinchaʼn aju tzʼaqli aj tjuzgarin, atzun qe miʼn (kjawil uʼjit Isaías 55:​8, 9). Tuʼntzunju, in nok qeʼ qkʼuʼj tiʼj qa kxel tbʼinchaʼn Jehová ex Jesús aju tzʼaqli toj tkyaqilju in bʼant kyuʼn. Ex jaku tzʼok qeʼ qkʼuʼj tiʼj qa kbʼel tyekʼin Jesús qʼaqʼbʼil tkʼuʼj ex kxel tbʼinchaʼn aju tzʼaqli ik tzeʼn te Tman (Is. 11:​3, 4). Toj juntl xnaqʼtzbʼil, qo yolil kyiʼj tqanil ojtzqiʼn quʼn ex kyiʼj qeju mintiʼ ojtzqiʼn quʼn tiʼj alkye tten che kbʼel tjuzgarin Jehová ex Jesús qe xjal toj nimxix yajbʼil.