1, 2. a) Ik tzeʼn in tzaj tqʼamaʼn Efesios 6:16, ¿tiquʼn nim toklen tuʼn tten qʼuqbʼil qkʼuʼj? b) ¿Alkyeqe xjel qo xnaqʼtzal kyiʼj?

¿ATPE jun matij maqbʼil tiʼj qʼuqbʼil qkʼuʼj? (Kjawil uʼjit Efesios 6:16). Qʼuqli qkʼuʼj tiʼj qa matij. Ik tzeʼn in xqʼuqin jun matij maqbʼil tiʼj t-xmilal jun xjal, ax ikx in qo ok t-xqʼuqin qʼuqbʼil qkʼuʼj kyiʼj nya bʼaʼn, ik tzeʼn tiʼj yaẍbʼil, bʼiybʼel moqa tiʼj alkyexku juntl nya bʼaʼn in nel tikʼun Jehová.

² Tuʼnju in qo anqʼin kyoj «mankbʼil tqʼijlalil», kukx kʼokel qʼuqbʼil qkʼuʼj toj nim joybʼil (2 Tim. 3:1). Tuʼntzunju, ¿tzeʼn jaku tzʼel qnikʼ tiʼj qa kyuw taʼ maqbʼil tiʼj qʼuqbʼil qkʼuʼj? Ex ¿tiʼ jaku bʼant quʼn tuʼn tok qtzyuʼn tuʼn tkyaqil qipumal? Qo xnaqʼtzan kyiʼj tzaqʼwebʼil kyiʼj xjel lu.

3. ¿Alkye tten ok kyxqʼuqin soldad kymaqbʼil ex tiquʼn bʼant jlu kyuʼn?

³ In noktoq kyqʼoʼn soldad tzʼuʼm kyiʼj maqbʼil toj ambʼil ojtxe. Ax ikx ok kyqʼoʼn grasa tiʼj tuʼntzun tten tzʼuʼm mas ambʼil ex tuʼn miʼn tok kom tiʼj kʼuxbʼil moqa óxido. Tej tel tnikʼ jun soldad tiʼj qa nyaxix bʼaʼn taʼ tmaqbʼil, ok tilil tuʼn tuʼn tbʼaj tbʼinchaʼn, iktzun tten ya bʼantni tten tuʼn t-xiʼ qʼojil juntl maj. ¿Tiʼ toklen jlu tukʼil qʼuqbʼil qkʼuʼj?

4. a) ¿Tiquʼn bʼaʼn tuʼn tok qqʼoʼn qwiʼ tiʼj tzeʼn taʼ maqbʼil tiʼj qʼuqbʼil qkʼuʼj? b) ¿Alkye tten jaku bʼant quʼn?

⁴ Ik tzeʼn bʼant kyuʼn soldad toj ambʼil ojtxe, nim toklen tuʼn kukx tel qnikʼ tiʼj qa bʼaʼn taʼ qʼuqbʼil qkʼuʼj ex tuʼn tbʼaj qkyuwsaʼn. Mlayx bʼant jlu tuʼn juntl te qxel. Iktzun tten ya  bʼantni qten toj alkyexku ambʼil, tuʼnju in qo qʼojin kyukʼil nya bʼaʼn anjel (Efes. 6:10-12). ¿Tzeʼn jaku tzʼel qnikʼ tiʼj qa ya bʼantni qten aj qok weʼ kywitz joybʼil? Tnejel, qqaninx onbʼil te Jehová. Yajxitl, bʼaʼn tuʼn tajbʼen Xjan Uʼj quʼn tuʼn tonin qiʼj tuʼn tel qnikʼ tiʼj qa ax qximbʼetz at qiʼjx ik tzeʼn te (Heb. 4:12). In tzaj tqʼamaʼn Tyol Dios jlu: «Qeʼk tkʼuʼja tiʼj Qman tuʼn tkyaqil tanmiya ex mya tuʼn tok qeʼ tkʼuʼja tiʼj texa tnabʼla» (Prov. 3:5, 6). Akux in qo ximen tiʼj jlu, bʼaʼn tuʼn qximen kyiʼj junjun tiʼchaq o che bʼant quʼn kʼitzqeku. Jun techel, qa o qo ikʼ toj jun ambʼil jatumel mintiʼxix ten qpwaq, ¿tzajpe qnaʼn qe yol in tzaj ttziyen Jehová qe toj Hebreos 13:5? Atz in tzaj tqʼamaʼn jlu: «Mlay kyaj nkoline, ex mlay kyaj nqʼoʼne». ¿Okpe qeʼ qkʼuʼj tiʼj qa tzul tonin Jehová qoʼ kyuʼn yol lu? Qa ikju, jaku txi qqʼamaʼn qa bʼaʼn taʼ maqbʼil tiʼj qʼuqbʼil qkʼuʼj.

5. Aj qximen tiʼj tzeʼn taʼ qʼuqbʼil qkʼuʼj, ¿tiʼ jaku tzʼel qnikʼ tiʼj?

⁵ Aj tel qnikʼ tiʼj tzeʼn taʼ qʼuqbʼil qkʼuʼj, jaku qo jaw labʼin tiʼj. Bʼalo jaku tzʼel toj qʼanchaʼl qa ateʼ junjun tiʼchaq jun rat in qo kubʼ kyuʼn ex mintiʼtoq ojtzqiʼn jlu quʼn. Jun techel, jakulo tzʼel qnikʼ tiʼj qa chʼix tchewix qʼuqbʼil qkʼuʼj tuʼnju in tzaj bʼajxix qkʼuʼj kyiʼj junjun tiʼchaq, kyuʼn nya ax tok yol moqa tuʼn bʼis. Qa ikju, ¿tiʼ jaku bʼant quʼn tuʼntzun miʼn tnaj qʼuqbʼil qkʼuʼj?

6. ¿Alkyeqe tiʼchaq toj tumel jaku tzaj bʼaj qkʼuʼj kyiʼj?

⁶ At maj toj tumel aj ttzaj bʼaj qkʼuʼj kyiʼj junjun tiʼchaq, ik tzeʼn tuʼn ttzalaj Jehová ex Jesús quʼn (1 Cor. 7:32). Qatzun o kubʼ qbʼinchaʼn jun matij il, in qo ximen tiʼj tzeʼn jaku ten juntl maj qamiwbʼil tukʼil Jehová (Sal. 38:18). Ax ikx, toj tumel aj ttzaj bʼaj kykʼuʼj qeju o che kubʼ mojeʼ tuʼnju in che ximen tiʼj tzeʼn tuʼn ttzalaj kyukʼil, ex qkyaqilx in qo ximen tiʼj tzeʼn ateʼqe toj qja ex qe erman (1 Cor. 7:33; 2 Cor. 11:28).

7. a) ¿Alkye tten jaku tzaj nya bʼaʼn tiʼj qʼuqbʼil qkʼuʼj aj ttzaj bʼajxix qkʼuʼj? b) Aj qximen tiʼjju in tzaj tqʼamaʼn Proverbios 29:25, ¿tiquʼn mintiʼ tuʼn qtzaj xobʼ kywitz xjal?

⁷ Pero qa ma tzaj bʼajxix qkʼuʼj, jaku tzaj tiʼn nya bʼaʼn tiʼj qʼuqbʼil qkʼuʼj. Jun kyxol qe jlu, aju qa kukx ma qo ximen tuʼn tten qxbʼalun ex qwa (Mat. 6:31, 32). Tuʼn jlu jaku qo ximen oʼkx tuʼn kykanet qe tiʼchaq te twitz txʼotxʼ quʼn, axpe ikx jaku tzʼok qkʼujlaʼn pwaq. Qa ma bʼaj jlu qiʼj, jaku chewix qʼuqbʼil qkʼuʼj ex tzul tiʼn nya bʼaʼn tiʼj qamiwbʼil tukʼil Jehová (Mar. 4:19; 1 Tim. 6:10). Ax ikx, jaku tzaj bʼaj qkʼuʼj tiʼj tzeʼn jaku che tzalaj txqantl quʼn. Tuʼn jlu, mas jaku qo tzaj xobʼ aj kyxmayin txqantl qiʼj moqa aj qel ikʼun kyuʼn twitzju tuʼn qnimen te Jehová. ¿Alkye tten jaku tzʼok qxqʼuqin qibʼ tiʼj jlu? Bʼaʼn tuʼn t-xi qqanin te Jehová tuʼn ttzaj tqʼoʼn mas qʼuqbʼil qkʼuʼj ex tuʼn tten qipumal (kjawil uʼjit Proverbios 29:25; Luc. 17:5).

8. ¿Tiʼ kbʼantel quʼn qa at jun ma tzʼok ten qʼamalte nya ax tok yol tiʼj Jehová ex kyiʼj erman?

⁸ Atz tzajni nya ax tok yol tukʼil Satanás ex in che ajbʼen xjal ateʼ tjaqʼ tkawbʼil tuʼn tuʼntzun ttzaj kyqʼamaʼn nya ax tok yol tiʼj Jehová ex kyiʼj erman (Juan 8:44). Jun techel, in xi kyqʼamaʼn apóstata nya ax tok yol ex nya ax tok tqanil tiʼj ttnam Jehová toj Internet, toj televisión moqa toj alkyexku juntl tten. At kyoklen nya ax tok yol lu kyukʼil «plech in kʼant in tzaj t-xoʼn tajaw il» qiʼj (Efes. 6:16). ¿Tiʼ kbʼantel quʼn qa at jun ma tzʼok ten  yolil kyiʼj nya ax tok yol lu? Il tiʼj tuʼn tel qikʼun. ¿Tiquʼn? Tuʼnju qʼuqli qkʼuʼj tiʼj Jehová ex kyiʼj erman. Tuʼntzunju, mintiʼ in qo yolin kyukʼil apóstata tiʼj jun xnaqʼtzbʼil moqa tiʼj alkyexku juntl tiʼ, axpe ikx qa noq tuʼn tel qnikʼ tiʼj kyximbʼetz.

9. ¿Tiʼ jaku tzaj qiʼj tuʼn bʼis?

⁹ Ax ikx jaku chewix qʼuqbʼil qkʼuʼj tuʼn bʼis. At maj, in tzaj qbʼis kyuʼn junjun nya bʼaʼn. Qa ma kubʼ qximen qa mintiʼ in tzaj qbʼis tuʼn jun tiʼ, tuʼn jlu jaku qo ok ik tzeʼn jun xjal mintiʼ tnabʼil. Noqtzun tuʼnj, aju mintiʼ tuʼn tbʼant quʼn, aju tuʼn kukx qximen kyiʼj toj tkyaqil ambʼil. ¿Tiquʼn? Tuʼnju kʼelel kyiʼn ambʼil qe tuʼn qximen tiʼj tbʼanel qʼuqbʼil qkʼuʼj in tzaj tqʼoʼn Jehová (Apoc. 21:3, 4). Jaku qo sikt qa in qo bʼisun ex tuʼn jlu jaku kyaj qtzaqpiʼn tuʼn qajbʼen te Jehová (Prov. 24:10). Pero mintiʼ tuʼn tbʼaj jlu qiʼj.

10. ¿Tiʼ xnaqʼtzbʼil in nel qiʼn kyiʼj yol xi ttzʼibʼin jun ermana?

¹⁰ Qo ximen tiʼjju in bʼant tuʼn jun ermana te Estados Unidos tuʼntzun tten qʼuqbʼil tkʼuʼj kyuw akux in xqʼuqin tiʼj tchmil tuʼnju yabʼ taʼ. Xi ttzʼibʼin jun uʼj toj kytxuylal ninja qʼil twitz aqʼuntl jatumel tqʼama jlu: «At maj nim in qo sikte ex in tzaj qbʼise tuʼnju in bʼaj qiʼje. Pero kyuw taʼ qʼuqbʼil qkʼuʼje. In xi nqʼoʼne chjonte te Jehová tiʼj tkyaqilju in tzaj tqʼoʼn qe tuʼn tchʼiy qʼuqbʼil qkʼuʼj ex tuʼn kukx qtzalaj. Nimxix kyoklen nabʼil lu te qeye. In che onin qiʼje tuʼn kukx qexe kywitz nya bʼaʼn ex tuʼn kyikʼx joybʼil in kubʼ tqʼoʼn Satanás qwitze». In tzaj kyyekʼin tyol ermana lu qa jaku kubʼ tiʼj bʼis quʼn. ¿Alkye tten? Aj tkubʼ qximen qa jun joybʼil tuʼn Satanás qe nya bʼaʼn in che tzaj qiʼj ex aj tok qeʼ qkʼuʼj tiʼj qa tzul tqʼuqbʼaʼn Jehová qkʼuʼj, ex aj tok qqʼoʼn toklen tkyaqil xnaqʼtzbʼil in tzaj tqʼoʼn qe.

11. ¿Alkyeqe xjel bʼaʼn tuʼn qximen tiʼj tuʼntzun tel qnikʼ tiʼj qa bʼaʼn taʼ qʼuqbʼil qkʼuʼj?

¹¹ ¿Ilpe tiʼj tuʼn tbʼaj qkyuwsaʼn chʼintl maqbʼil tiʼj qʼuqbʼil qkʼuʼj? Qo ximen tiʼjju bʼant quʼn kyoj xjaw o che ikʼ: «¿Ope tzʼok tilil wuʼne tuʼn miʼn ttzaj bʼajxix nkʼuʼje? ¿Ope tzʼok tilil wuʼne tuʼn miʼn tok nbʼiʼne qe nya ax tok yol in tzaj kyqʼamaʼn  apóstata ex tuʼn miʼn nyoline kyukʼil? Ex ¿ope tzikʼx bʼis wuʼne?». Qa tbʼanel tzaqʼwebʼil ma txi qqʼoʼn kyiʼj xjel lu, jaku txi qqʼamaʼn qa bʼaʼn taʼ qʼuqbʼil qkʼuʼj. Noqtzun tuʼnj, il tiʼj tuʼn tok qxqʼuqin qibʼ tuʼnju at junjuntl tiʼchaq in najbʼen tuʼn Satanás. Qo xnaqʼtzan tiʼj jun kyxol qe jlu.

12. ¿Tiʼ jaku tzaj qiʼj qa ma qo jyon kyiʼj nim tiʼchaq?

¹² Jaku txi qqʼoʼn qwiʼ kyiʼj junjuntl tiʼ qa in qo ximen tuʼn kyten nim tiʼchaq qe, ex tuʼn jlu mlay tzʼok qxqʼuqin qʼuqbʼil qkʼuʼj. Tqʼama apóstol Pablo jlu: «Mi jun soldad jaku bʼaj t-sakun tibʼ tuʼn t-xi tjyoʼn juntl taqʼun, porke atzun taj tuʼn ttzalaj [...] aju o qʼmante te tuʼn tok te soldad» (2 Tim. 2:4). Nya oʼkxju, ax ikx mintiʼ xi qʼoʼn ambʼil kye soldad te tnam Roma tuʼn tten jun kykʼaẍjel. ¿Tiʼ jakutoq bʼaj qa mintiʼ in xi tbʼiʼn jun soldad kawbʼil lu?

13. ¿Tiquʼn mintiʼ xi qʼoʼn ambʼil kye soldad tuʼn tten kykʼaʼẍ?

¹³ Qo ximen tiʼj techel lu: in che xnaqʼtzan jun kʼloj soldad tiʼj tzeʼn tuʼn tajbʼen spad kyuʼn toj jun prim, noqtzun tuʼnj, at jun soldad mintiʼ ma pon tuʼnju at toj tnam ex in jaqon tiʼj jun tkʼaẍjel. Te qale, in nok kyqʼoʼn soldad kywitz tiʼj tzeʼn taʼ tkyaqilju in najbʼen kyuʼn toj qʼoj ex in bʼaj kyjaquʼn ttziʼ moqa twitz teʼ kyspad. Atzunte soldad mintiʼ ma pon, in nok ten bʼinchal wabʼj tuʼn t-xi tkʼayin te juntl qʼij. Pero te juntl prim, noq minabʼen in che ok tzoqpaj aj qʼoj kyiʼj. ¿Alkye soldad kbʼantel tbʼanel taqʼun ex ktzalajel nejenel tiʼj? Ex ¿alqukʼil qaj tuʼn qten? ¿Qajpe tuʼn qten tukʼil jun soldad otoq bʼaj t-xnaqʼtzan tibʼ tiʼj qʼoj moqa tukʼilju otoq tzʼok tqʼoʼn twiʼ tiʼj tkʼaʼẍ?

14. Tuʼnju tsoldad Cristo qoʼ, ¿alkye mas nim toklen toj qwitz?

¹⁴ Ik tzeʼn jun tbʼanel soldad, ax ikx qe in nok tilil quʼn tuʼn tok qqʼoʼn qwiʼ tiʼjju mas nim toklen te qe. Oʼkx qaj tuʼn kytzalaj qnejenel qiʼj: a Jehová ex Jesús. Mas nim toklen jlu te qe twitz alkyexku juntl tiʼ in tzaj tsuqin Satanás qe. In nok tilil quʼn tuʼn tten ambʼil qiʼj ex qipumal  tuʼntzun qajbʼen te Jehová ex tuʼn tok qxqʼuqin maqbʼil tiʼj qʼuqbʼil qkʼuʼj, ex tkyaqilju in najbʼen quʼn toj qokslabʼil.

15. ¿Tiʼ nabʼil tzaj tqʼoʼn apóstol Pablo qe ex tiquʼn?

¹⁵ Nim toklen tuʼn kukx tok qxqʼuqin qibʼ. ¿Tiquʼn? Tqʼama apóstol Pablo qa aqeju «kyaj tuʼn kyok [te] qʼinun» che elel «txalpuj tiʼj kyokslabʼl» (1 Tim. 6:9, 10). Aju yol «che elel txalpuj», in tzaj tyekʼin qa jaku tzʼok qqʼoʼn qwiʼ kyiʼj junjuntl tiʼchaq qa in nok tilil quʼn tuʼn tten nim tiʼchaq qe ex nya il tiʼj. Jaku txi qqʼoʼn ambʼil tuʼn kyten nya bʼaʼn achbʼil toj qanmi. Tuʼntzunju, miʼn txi qqʼoʼn ambʼil tuʼn tpon qkʼuʼj kyiʼj achbʼil lu. Bʼaʼn tuʼn ttzaj qnaʼn qa in najbʼen jlu tuʼn Satanás tuʼn tok tbʼinchaʼn nya bʼaʼn tiʼj qʼuqbʼil qkʼuʼj.

16. Aj tjaw quʼjin txʼolbʼabʼil tkuʼx toj Marcos 10:17 a 22, ¿alkyeqe xjel bʼaʼn tuʼn qximen kyiʼj?

¹⁶ ¿Yajtzun qa at nim qpwaq tuʼn kylaqʼet nim tiʼchaq qe? ¿In kubʼpe qbʼinchaʼn jun nya bʼaʼn qa ma tzaj qlaqʼoʼn junjun tiʼchaq ex nya il tiʼj tuʼn kytzaj qiʼn? Mintiʼ. Pero bʼaʼn tuʼn qximen kyiʼj xjel lu: Maske at qpwaq tuʼn kylaqʼet tiʼchaq quʼn, ¿atpe ambʼil qiʼj ex qipumal tuʼn kyajbʼen quʼn ex tuʼn kyok qxqʼuqin? ¿In che okpe qkʼujlaʼn qe tiʼchaq at qe? Ex ¿qape noq kyuʼn tiʼchaq lu mintiʼ in qo ajbʼen mas te Jehová ik tzeʼn te kuʼxun mintiʼ xi tkʼamoʼn  txokbʼil xi tqʼoʼn Jesús te? (Kjawil uʼjit Marcos 10:17-22). Mas tbʼanel qa in qo anqʼin kyukʼil nya nim tiʼchaq ex tuʼn tajbʼen ambʼil quʼn ex qipumal tuʼn tbʼant tajbʼil Jehová.

17. ¿Tiʼ mintiʼ tuʼn tikʼ tnaʼl quʼn?

¹⁷ Miʼn tzikʼ tnaʼl quʼn qa atoʼ toj jun qʼoj ex qa nim toklen tuʼn tbʼaj qbʼinchaʼn qten tkyaqil qʼij (Apoc. 12:17). Mlay bʼant tuʼn t-xi kyiʼn erman maqbʼil tiʼj qʼuqbʼil qkʼuʼj te qxel, sino aqoʼ qo xel qʼinte tuʼn tkyaqil qipumal.

18. ¿Tiquʼn ok kytzyuʼn soldad kymaqbʼil tuʼn tkyaqil kyipumal toj ambʼil ojtxe?

¹⁸ Toj ambʼil ojtxe, ok qʼoʼn kyoklen soldad qa mintiʼ e tzaj xobʼ toj qʼoj. Pero chʼixbʼajiltoq te jun soldad qa ma meltzʼaj ex mintiʼ tmaqbʼil qʼiʼn. Kubʼ ttzʼibʼin Tácito jlu, jun xjal in xnaqʼtzan tiʼjju ikʼ ojtxe: «Qa ma kyaj tkolin aju tmaqbʼil, atzun mas chʼixbʼajil te te». Atzun jun tiquʼn ok tilil tuʼn jun soldad tuʼn tok ttzyuʼn tmaqbʼil tuʼn tkyaqil tipumal.

19. ¿Tiʼ kbʼantel quʼn tuʼntzun tok qtzyuʼn maqbʼil tiʼj qʼuqbʼil qkʼuʼj tuʼn tkyaqil qipumal?

¹⁹ Qa qaj tuʼn tok qtzyuʼn maqbʼil tiʼj qʼuqbʼil qkʼuʼj tuʼn tkyaqil qipumal, il tiʼj tuʼn qxiʼ kyoj kykyaqil chmabʼil ex tuʼn qyolin kyukʼil xjal tiʼj Jehová, ex tiʼj Tkawbʼil (Heb. 10:23-25). Ax ikx nim toklen tuʼn quʼjin tiʼj Tyol Dios tkyaqil qʼij ex tuʼn t-xi qqanin te Jehová tuʼn tonin qiʼj tuʼntzun tkubʼ qbʼinchaʼn aju in tzaj tyekʼin qe ex tuʼn t-xi qbʼiʼn qe tconsej tiʼj tkyaqilju kbʼantel quʼn (2 Tim. 3:16, 17). Iktzun tten mlay tzʼok tbʼinchaʼn Satanás jun nya bʼaʼn qiʼj te jumajx (Is. 54:17). Qa ma tzʼok maqbʼil tiʼj qʼuqbʼil qkʼuʼj te matij, jaku xqʼuqin qiʼj. Iktzun tten mlay qo kubʼ numj ex qo ajbʼel junx kyukʼil erman te Jehová. Ex nya oʼkx che kbʼel kyiʼj nya bʼaʼn quʼn tkyaqil qʼij, sino ax ikx ktel qoklen tuʼn qten ttxlaj Jesús aj tkambʼan tiʼj Satanás ex kyiʼj qeju in che ok lepeʼ tiʼj (Apoc. 17:14; 20:10).