TOJ ambʼil ojtxe, in nok tkeʼyin mayordom alkye aqʼuntl tuʼn t-xi bʼinchet toj tja moqa toj ttxʼotxʼ juntl xjal.

Tej tten José, aju tkʼwaʼl Jacob, te majen toj tnam Egipto ok qʼoʼn te mayordom tuʼn tpatrón. Ax ikx kyaj tqʼoʼn tpatrón tkyaqilju attoq te toj tkwent José (Gén. 39:2-6). Yajxitl, tej tok José te jun aj kawil nim toklen toj tnam Egipto, ax ikx ten jun tmayordom keʼyilte aqʼuntl toj tja (Gén. 44:4).

Toj tqʼijlalil Jesús, aʼyeju xjal at nim kytxʼotxʼ e anqʼin toj tnam. Tuʼntzunju in che jaw jyontoq mayordom tuʼn kykyaj ten keʼyilte aqʼuntl in bʼant kyuʼn txqantl majen.

¿Tiʼ iltoq tiʼj tuʼn tbʼant tuʼn jun mayordom? Tqʼama Columela, jun aj tzʼibʼil te tnejel syent abʼqʼi te Roma qa aju majen in nok qʼoʼn te mayordom, iltoq tiʼj «tuʼn tel nikʼbʼaj tiʼj qa attoq tojtzqibʼil kyiʼj qe tiʼchaq». Ax ikx «iltoq tiʼj tuʼn tok tqʼoʼn twitz tiʼj qa toj tumel in che aqʼunan txqantl majen, pero mintiʼ tuʼn tok te nya bʼaʼn xjal». Ex tqʼamatl Columela jlu: «Nimtoq toklen tuʼn miʼn tkubʼ t-ximen mayordom qa ya ojtzqiʼn tkyaqil tuʼn ex tuʼn tok tilil tuʼn tuʼn tel tnikʼ kyiʼj akʼaj tiʼchaq».

In najbʼen techel tiʼj jun mayordom tuʼn Tyol Dios tuʼn ttzaj tchikʼbʼaʼn junjun aqʼuntl in bʼant toj kʼloj okslal. Jun techel, xi tqʼamaʼn apóstol Pedro kye okslal tuʼn tajbʼen kyojtzqibʼil xi tqʼoʼn Dios «tuʼn kyok te jun bʼaʼn mayordom tiʼj ju kyoklen [...] ma kykʼam tuʼn Dios» (1 Ped. 4:10).

Ax ikx ajbʼen techel tiʼj jun mayordom tuʼn Jesús tej t-xi tchikʼbʼaʼn txʼolbʼabʼil in kanet quʼn toj Lucas 16:1 a 8. Ax ikx toj yol kyaj qʼamaʼn tiʼj Jesús aj tul ik tzeʼn aj Kawil, xi ttziyen kye t-xnaqʼtzbʼen qa kjawiltoq tskʼoʼn jun majen in bʼant taqʼun ex at tnabʼil moqa jun «mayordom in japunxix taqʼun». Aju aqʼuntl mas nim toklen tuʼn tbʼant tuʼn mayordom lu, aju tuʼn t-xi tqʼoʼn xnaqʼtzbʼil kye okslal kyoj bʼajsbʼil tqʼijlalil (Mat. 24:45-47; Luc. 12:42). In xi qqʼoʼn nim chjonte kyiʼj uʼj in bʼaj tbʼinchaʼn mayordom tuʼn tchʼiy qʼuqbʼil qkʼuʼj ex in xi tsipen twitz tkyaqil Txʼotxʼ.