1. ¿Alkye ambʼil in tzaj tqʼoʼn Jehová qe?

IN TZAJ tqʼoʼn Jehová ambʼil qe tuʼn tkubʼ qximen tiʼ kbʼantel quʼn toj qchwinqlal. In qo tzaj t-xnaqʼtzaʼn tuʼn tjaw qjyoʼn aju mas bʼaʼn ex in nonin qiʼj tuʼn tel tbʼanel aju in kubʼ qximen qa bʼaʼn in nela toj twitz (Sal. 119:173). Qa in chex qnimen qe tbʼanel nabʼil in tzaj tqʼoʼn Tyol Dios qe, in nonin qiʼj tuʼn tjaw qjyoʼn aju mas bʼaʼn (Heb. 5:14).

2. Aj tkubʼ qximen tiʼ kbʼantel quʼn, ¿alkye mas kwest jaku tzʼela toj qwitz?

² Axpe ikx qa o jaw qjyoʼn aju mas bʼaʼn, bʼalo kwest jaku tzʼela toj qwitz tuʼn tjapun twi qximbʼetz. Qo ximen kyiʼj junjun techel. In kubʼ t-ximen jun kuʼxun tuʼn tjaw tuʼjin tkyaqil Tyol Dios. In bʼant tuʼn toj junjun seman, noqtzun tuʼnj, yajxitl in kyaj ttzaqpiʼn. Atzunte jun ermana in kubʼ t-ximen tuʼn tok te precursora, pero in kubʼ tchʼixpuʼn jun ex juntl maj aju ambʼil tuʼn t-xi tzyet tuʼn. Ex in kubʼ t-ximen jun kʼloj ansyan tuʼn kyxiʼ visitaril kye mas erman, pero aj tikʼ nim xjaw naʼmx kyxiʼ visitaril jun erman. Junxitl qe tiʼchaq lu, pero at jun tiʼ ax ma bʼaj kyiʼj: ma kubʼ kyximen tuʼn tbʼant jun tiʼ kyuʼn, pero mintiʼ xjapun twi kyximbʼetz. Chʼixme ax jlu bʼaj kyiʼj okslal te Corinto toj tnejel syent abʼqʼi. Qo ximen tiʼj tiʼ xnaqʼtzbʼil jaku tzʼel qiʼn kyiʼj.

3. ¿Tiʼ kubʼ kyximen aj Corinto tuʼn tbʼant kyuʼn, pero tiʼ bʼaj?

³ Nqayin tiʼj abʼqʼi 55, kubʼ kyximen okslal te Corinto tuʼn tbʼant jun tiʼ nim toklen kyuʼn. Ok kybʼiʼn qa ateʼtoq erman te Jerusalén ex te Judea toj mebʼayil, ex qa otoq kubʼ kyximen junjun kʼloj okslal tuʼn t-xi kysamaʼn onbʼil kye. Tuʼnju kyajtoq aj Corinto tuʼn kybʼinchan xtalbʼil, kubʼ kyximen tuʼn t-xi kysamaʼn jun oyaj ex xi kyqanin te apóstol Pablo  tzeʼn tuʼn tbʼant kyuʼn. Xi tqʼamaʼn Pablo kye tiʼ jakutoq bʼant kyuʼn ex xi tqʼamaʼn te Tito tuʼn tonin kyiʼj tuʼn tjaw chmet onbʼil (1 Cor. 16:1; 2 Cor. 8:6). Noqtzun tuʼnj, tej tikʼ junjuntl xjaw ok tbʼiʼn Pablo qa naʼmxtoq t-xi kysamaʼn jun tiʼ. Bʼalo bʼaj jlu tuʼnju naʼmxtoq tjaw chmet kyoyaj tej t-xi kysamaʼn junjuntl kʼloj okslal kyoyaj (2 Cor. 9:4, 5).

4. Ik tzeʼn in tzaj tyekʼin 2 Corintios 8:7, 10 ex 11, ¿tiʼ xi tqʼamaʼn Pablo kye aj Corinto tuʼn tbʼant kyuʼn?

⁴ Otoq kubʼ kyximen aj Corinto tuʼn tbʼant jun tbʼanel tiʼ kyuʼn, ex xi tqʼamaʼn Pablo tbʼanel yol kye tuʼnju attoq qʼuqbʼil kykʼuʼj ex kyajtoq tuʼn kyonin. Noqtzun tuʼnj, ax ikx xi tqʼamaʼn kye qa nim toklen tuʼn tjapun bʼaj twi kyximbʼetz (kjawil uʼjit 2 Corintios 8:7, 10, 11). Aju bʼaj kyiʼj, in tzaj tyekʼin qe qa maske kukx in qo ajbʼen te Jehová, atlo maj nim toklen tuʼn tok tilil quʼn tuʼn tjapun bʼaj twi qximbʼetz.

5. ¿Alkyeqe xjel kxel qtzaqʼweʼn?

⁵ Atlo maj kwest tuʼn tjapun twitz qximbʼetz ik tzeʼn bʼaj kyiʼj aj Corinto. ¿Tiquʼn? Tuʼnju aj il qoʼ ex in kyaj qqʼoʼn qe tiʼchaq te yajxitl. Ax ikx jaku chʼexpaj jun tiʼ toj qanqʼibʼil ex tuʼn jlu jaku tzʼel tiʼn ambʼil qe tuʼn tjapun twi qximbʼetz (Ecl. 9:12; Rom. 7:18). Toj xnaqʼtzbʼil lu, kxel qqʼoʼn tzaqʼwebʼil kyiʼj xjel lu: ¿Tzeʼn jaku jaw qjyoʼn aju mas tbʼanel? ¿Tiʼ kbʼantel quʼn qa il tiʼj tuʼn tkubʼ qchʼexpuʼn jun tiʼ otoq kubʼ qximen? Ex, ¿tiʼ kʼonil qiʼj tuʼn tjapun aju otoq kubʼ qximen?

6. ¿Toj alkye ambʼil jaku kubʼ qchʼexpuʼn jun tiʼ otoq kubʼ qximen?

⁶ At junjun tiʼchaq in kubʼ qximen tuʼn tbʼant quʼn ex mlayx kubʼ qchʼexpuʼn. Jun techel, in kubʼ qximen tuʼn kukx qajbʼen te Jehová ex tuʼn qten tzʼaqli twitz qxuʼjil moqa qchmil (Mat. 16:24; 19:6). Noqtzun tuʼnj, atlo maj kbʼel qchʼexpuʼn junjun tiʼchaq aj tchʼexpaj jun tiʼ toj qanqʼibʼil. ¿Tiʼ kʼonil qiʼj tuʼn tjaw qjyoʼn aju mas bʼaʼn?

7. ¿Tiʼ jaku txi qqanin te Dios ex tiquʼn?

⁷ Qqaninx qnabʼil te Dios. Ajbʼen Santiago tuʼn Jehová tuʼn tkubʼ ttzʼibʼin jlu: «Qa at jun kyxole atx taj tnabʼl, qaninx tnabʼl te Dios, [...] porke ate Dios nimxix in tzaj tqʼoʼn kye kykyaqil» (Sant. 1:5). Tuʼnju qkyaqilx atx taj qnabʼil kyiʼj junjun tiʼchaq, bʼaʼn tuʼn tok qeʼ qkʼuʼj tiʼj Jehová aj tkubʼ qximen tuʼn tbʼant jun tiʼ quʼn ex aj qximen tiʼj qa kbʼel qchʼixpuʼn jun tiʼ otoq kubʼ qximen. Iktzun tten kʼonil Jehová qiʼj tuʼn tjaw qjyoʼn aju mas bʼaʼn.

8. ¿Tiʼ kbʼantel quʼn naʼmxtoq tkubʼ qximen tuʼn tbʼant jun tiʼ quʼn?

⁸ Qo jyon tiʼj tqanil. Bʼaʼn tuʼn quʼjin tiʼj Tyol Dios, kyiʼj uʼj in che etz tuʼn ttnam Jehová ex bʼaʼn tuʼn qyolin tukʼil jun xjal in nok qeʼ qkʼuʼj tiʼj (Prov. 20:18). Nim toklen tuʼn tbʼant jlu quʼn aj tkubʼ qximen tuʼn tkubʼ qchʼexpun qaqʼun, tuʼn qxiʼ anqʼil toj juntl lugar moqa aj tkubʼ qximen tiʼ qo xnaqʼtzal tiʼj tuʼntzun tten aju at tajbʼen qe tuʼn kukx qajbʼen te Jehová.

9. ¿Tiquʼn tbʼanel tuʼn qximen tiʼj tiquʼn qaj tuʼn tbʼant jun tiʼ quʼn?

⁹ Qo ximen tiʼj tiquʼn kbʼantel quʼn. In nok tkeʼyin Jehová tiʼ tkuʼx toj qanmi, tuʼntzunju nim toklen toj twitz tiquʼn qaj tuʼn tbʼant jun tiʼ quʼn (1 Sam. 16:7). Aj qximen qiʼjx, jaku tzʼel qnikʼ tiʼj tiʼ tkuʼx toj qanmi. Pero bʼaʼn tuʼn tel qnikʼ tiʼj tiquʼn qaj tuʼn tbʼant jun tiʼ quʼn. Qa ax tok aju tkuʼx toj qanmi, kxel qbʼinchaʼn qe tiʼchaq toj tumel. Qa nya tuʼn tkyaqil qanmi  qaj tuʼn tbʼant jun tiʼ quʼn, kwest kʼelel toj qwitz tuʼn tjapun twi qximbʼetz aj qok weʼ twitz jun nya bʼaʼn. Jun techel, in kubʼ t-ximen jun kuʼxun tuʼn tok te precursor, pero aj tikʼ ambʼil mintiʼ in japun tajlal t-or ex ya mintiʼ in tzalaj toj pakbʼabʼil. Kubʼlo t-ximen tuʼn tok te precursor tuʼnju tajtoq tuʼn ttzalaj Jehová tuʼn. Noqtzun tuʼnj, bʼalo bʼant jlu tuʼn noq tuʼn kytzalaj ttat tiʼj moqa jun tamiw.

10. ¿Tiʼ jaku tzʼonin qiʼj tuʼn kybʼant chʼixpubʼil quʼn?

¹⁰ Qo ximen tiʼj juntl techel. In kubʼ t-ximen jun xjal in xnaqʼtzan tiʼj Tyol Dios tuʼn ya miʼn tsichʼen. Tnejel, in nok tilil tuʼn ex mintiʼ in sichʼin toj jun moqa kabʼe seman, noqtzun tuʼnj, in kubʼ tzʼaq juntl maj. Pero aj tikʼ ambʼil, ya mintiʼ in sichʼin. Ma kubʼ tiʼj jlu tuʼn tuʼnju kʼujlaʼn Jehová tuʼn ex taj tuʼn ttzalaj tiʼj (Col. 1:10; 3:23).

11. ¿Tiquʼn bʼaʼn tuʼn tel qnikʼ tiʼj tiʼxix qaj tuʼn tbʼant quʼn?

¹¹ Qqʼonk qwiʼ tiʼjju qaj tuʼn tbʼant quʼn. Kʼonil jlu qiʼj tuʼn tjapun bʼaj aju in kubʼ qximen. Jun techel, qa ma kubʼ qximen tuʼn tjaw quʼjin Tyol Dios tkyaqil qʼij pero mintiʼ jun qprograma, bʼalo mlayx bʼant quʼn. * Juntl techel, in kubʼ kyximen ansyan te jun kʼloj okslal tuʼn kyxiʼ visitaril kye mas erman, pero aj tbʼet ambʼil naʼmx tbʼant kyuʼn. Jun tiʼ jaku tzʼonin kyiʼj tuʼn tbʼant jlu kyuʼn, aju qa ma che ximen kyiʼj xjel ik tzeʼn jlu: «¿Ope kubʼ qximen alkyeqe erman tuʼn qonin kyiʼj? ¿Ope kubʼ qximen toj alkye ambʼil tuʼn qxiʼ visitaril kye?».

12. ¿Tiʼtzulo jaku bʼant quʼn ex tiquʼn?

¹² Tzʼelx qnikʼ tiʼjju mlay bʼant quʼn. Ni jun qe at ambʼil tiʼj, nix qe tiʼchaq ex qipumal tuʼn tbʼant tkyaqil quʼn. Tuʼntzunju, bʼaʼn tuʼn tel qnikʼ tiʼj qa mlayx bʼant tkyaqil quʼn. Bʼalo at maj il tiʼj tuʼn tkubʼ qchʼexpuʼn junjun tiʼ otoq kubʼ qximen tuʼnju mlay bʼant quʼn (Ecl. 3:6). Noqtzun tuʼnj, qa ma qo ximen juntl maj tiʼj jun tiʼ ex in bʼant junjun chʼixpubʼil quʼn, ex in nel qnikʼ tiʼj qa jaku bʼant quʼn, ¿tiʼ kʼonil qiʼj tuʼn tjapun twi qximbʼetz? Qo xnaqʼtzan tiʼj jweʼ tumel.

13. ¿Jatumel jaku tzaj qipumal tuʼn tjapun twi qximbʼetz?

¹³ Qqaninx qipumal te Dios. Jaku tzaj tqʼoʼn Jehová qipumal tuʼn tjapun twi qximbʼetz (Filip. 2:13). Tuʼntzunju, qqaninx xewbʼaj xjan te tuʼn ttzaj tqʼoʼn qipumal. Kukx qo naʼn Dios, maske in kubʼ qximen qa yaj in qo tzaj tzaqʼweʼn. Tqʼama Jesús jlu: «Kyqaninxe, ex ktzajel tqʼoʼn Dios [xewbʼaj xjan] kyeye» (Luc. 11:9, 13).

14. ¿Tzeʼn jaku tzʼonin nabʼil tkuʼx toj Proverbios 21:5 qiʼj tuʼn tjapun twi qximbʼetz?

¹⁴ Qtzʼibʼinku tzeʼn kbʼantel quʼn (kjawil uʼjit Proverbios 21:5). Tuʼn tbʼant jun aqʼuntl quʼn, nim toklen tuʼn tkubʼ qtzʼibʼin tzeʼn kbʼantel quʼn ex tuʼn qok lepeʼ tiʼj. Axju in bʼaj aj tkubʼ qximen jun tiʼ, bʼaʼn tuʼn tkubʼ qtzʼibʼin toj jun uʼj alkyeqe tiʼchaq kxel qbʼinchaʼn tuʼntzun tjapun twi qximbʼetz. Mas nya kwest jaku tzʼel qnikʼ tiʼj jniʼ in bʼant quʼn aj tkubʼ qpaʼn junjun aqʼuntl. Xi tqʼamaʼn Pablo kye okslal te Corinto qa bʼaʼn tuʼn tel kypaʼn chʼin pwaq «toj tnejil qʼij te junjun seman» twitzju tuʼn tjaw kychmoʼn tzmaxi aj tpon kyukʼil (1 Cor. 16:2, Akʼaj Tuʼjil Tyol qMan). Ax ikx mlay qo sikt qa ma kubʼ qpaʼn junjun aqʼuntl.

15. Aj tkubʼ qtzʼibʼin tiʼ kbʼantel quʼn tuʼn tjapun twi qximbʼetz, ¿tiʼ mas jaku bʼant quʼn?

 ¹⁵ Qa ma kubʼ qtzʼibʼin tiʼ kbʼantel quʼn tuʼn tjapun twi qximbʼetz, kʼonil jlu qiʼj tuʼn tbʼant aju otoq kubʼ qximen (1 Cor. 14:40). Jun techel, in xi qʼamaʼn kye kʼloj ansyan tuʼn tjaw kyjyoʼn jun ansyan tuʼn tkubʼ ttzʼibʼin tkyaqilju in kubʼ kyximen, ik tzeʼn alkye kxel bʼinchante ex toj alkye ambʼil tuʼn tbʼant. Aʼyeju ansyan in che ok lepeʼ tiʼj nabʼil lu, kʼonil kyiʼj tuʼn tjapun twi kyximbʼetz (1 Cor. 9:26). Ax jlu jaku bʼant quʼn. Jun techel, jaku kubʼ qtzʼibʼin tkyaqilju qaqʼun naʼmx tbʼant toj jun qʼij ex bʼaʼn tuʼn tkubʼ qtzʼibʼin toj ttxolil. Nya oʼkx kʼonil jlu qiʼj tuʼn tjapun bʼaj twi qximbʼetz, sino kbʼantel mas qaqʼun toj chʼin ambʼil.

16. Ik tzeʼn in tzaj tqʼamaʼn Romanos 12:11, ¿tiʼ nim toklen tuʼn tbʼant quʼn tuʼn tjapun twi qximbʼetz?

¹⁶ Qqʼonk tilil. Tuʼn qok lepeʼ tiʼjju in kubʼ qtzʼibʼin ex tuʼn tkubʼaj quʼn, il tiʼj tuʼn tok tilil quʼn (kjawil uʼjit Romanos 12:11). Xi tqʼamaʼn Pablo te Timoteo tuʼn kukx tok tilil tuʼn tok te jun tbʼanel aj xnaqʼtzal ex tuʼn miʼn tkyaj ttzaqpiʼn tuʼn tbʼant tuʼn. Jaku tzʼonin nabʼil lu qiʼj aj tbʼant alkyexku tiʼ quʼn toj qajbʼebʼil te Jehová (1 Tim. 4:13, 16).

17. ¿Tzeʼn in nonin Efesios 5:15 ex 16 qiʼj tuʼn tjapun twi qximbʼetz?

¹⁷ Tzʼajbʼenx ambʼil quʼn toj tumel (kjawil uʼjit Efesios 5:15, 16). Qo ximen tiʼj toj alkye ambʼil kbʼel qbʼinchaʼn jun tiʼ ex miʼn kubʼ qchʼexpuʼn. Miʼn kubʼ qximen tuʼn tpon jun tbʼanel ambʼil tuʼnju mlayxlo pon (Ecl. 11:4). Miʼn tzʼok qqʼoʼn qwiʼ kyiʼj junjun tiʼchaq nya nim toklen aju jaku tzʼel kyiʼn ambʼil qiʼj ex qipumal tuʼn tkubʼ qbʼinchaʼn aju mas nim toklen (Filip. 1:10). Ax ikx bʼaʼn tuʼn t-xi qqʼamaʼn kye txqantl qa qaj tuʼn tok qqʼoʼn qwiʼ tiʼjju kbʼantel quʼn. Ex bʼaʼn tuʼn tkubʼ qyupin qyolbʼil tuʼntzun miʼn tok qkeʼyin qe correo nix qe redes sociales. *

18, 19. ¿Tiʼ kʼonil qiʼj tuʼn tjapun twi qximbʼetz maske in qo ok weʼ twitz nya bʼaʼn?

¹⁸ Qqʼonk qwiʼ tiʼjju tbʼanel jaku tzaj. Aj tjapun twi qximbʼetz, jaku tzʼok qmojbʼaʼn jlu ik tzeʼn aj qxiʼ toj jun qbʼe. Qa qaj tuʼn qpon jatumel ximen quʼn, kʼokel tilil quʼn tuʼn qpon. ¿Yajtzun qa jupuʼn bʼe? Kxel qjyoʼn juntl bʼe tuʼntzun qpon. Ax ikx qe, qa ma tzʼok qqʼoʼn qwiʼ tiʼjju tbʼanel jaku tzaj qa ma japun twi qximbʼetz, kʼokel tilil quʼn maske qo okel weʼ twitz nya bʼaʼn (Gál. 6:9).

¹⁹ At maj kwest tuʼn tjaw qjyoʼn aju mas bʼaʼn ex tuʼn tjapun quʼn. Pero jaku tzʼonin Jehová qiʼj tuʼn tten qnabʼil ex qipumal tuʼn tjapun twi qximbʼetz.