1. ¿Tiʼ kʼonil qiʼj aj tkubʼ qximen qa qjunalx atoʼ moqa aj ttzaj bʼaj qkʼuʼj kyuʼn nya bʼaʼn? (Salmo 118:5 a 7).

¿OPE kubʼ qnaʼn jun maj qa qjunalx atoʼ ex mintiʼ jun at qukʼil tuʼn tonin qiʼj tuʼn qex twitz nya bʼaʼn? Nya oʼkx qiʼj in bʼaj jlu. Ax ikx bʼaj jlu kyiʼj junjun tmajen Jehová toj ambʼil ojtxe (1 Rey. 19:14). Aj tbʼaj jlu qiʼj, bʼaʼn tuʼn ttzaj qnaʼn aju in tzaj ttziyen Jehová qe: «Mlay kyaj nkoline, ex mlay kyaj nqʼoʼne». Tuʼntzunju, tuʼn tkyaqil qkʼuʼj jaku txi qqʼamaʼn jlu: «Ate Qman onil weye; mlay chin xobʼe» (Heb. 13:5, 6). Nqayin tiʼj abʼqʼi 61, xi ttzʼibʼin apóstol Pablo qe yol lu kye okslal in che anqʼintoq toj tnam Judea. Kyuʼn yol tqʼama, axju kubʼ tnaʼn ik tzeʼn in tzaj tqʼamaʼn Salmo 118:5 a 7 (kjawil uʼjit).

2. ¿Tiʼ qo xnaqʼtzal tiʼj toj xnaqʼtzbʼil lu ex tiquʼn?

² Ik tzeʼn kubʼ tnaʼn salmista, ax ikx te Pablo ojtzqiʼntoq tuʼn qa kʼonil Jehová tiʼj. Jun techel, bʼalo atxtoq kabʼe abʼqʼi tuʼn tkubʼ ttzʼibʼin uʼj kye okslal aj Hebreo, tzaj jun kyqʼiqʼ jbʼal tej in bʼettoq t-xiʼ apóstol Pablo toj bark (Hech. 27:4, 15, 20). Otoqxi tzʼonin Jehová tiʼj Pablo toj junxichaq tten ex onin tiʼj toj ambʼil aju. Toj xnaqʼtzbʼil lu, kʼelel qnikʼ tiʼj oxe tten onin Jehová tiʼj. Kʼelel qnikʼ tiʼj tzeʼn onin Jehová tiʼj tej tajbʼen Jesús tuʼn, qe anjel, qe xjal at kyoklen ex qe erman. Aj qximen tiʼjju ikʼ toj tanqʼibʼil Pablo, in chʼiy qʼuqbʼil qkʼuʼj tiʼj ttziybʼil Jehová qa ax ikx tzul ttzaqʼweʼn qoʼ aj txi qqanin onbʼil te.

3. ¿Tiʼlo kubʼ t-xjelin Pablo ex tiquʼn?

³ Bʼalo nqayin tiʼj abʼqʼi 56, etz qʼiʼn Pablo kyuʼn nim xjal tiʼjxi tja Dios toj tnam Jerusalén ex kyajtoq tuʼn tkubʼ kybʼyoʼn. Toj juntl qʼij, chʼixmi kubʼ bʼyoʼn kyuʼn aj qʼoj tej t-xi qʼiʼn kywitz jwes (Hech. 21:30-32; 22:30; 23:6-10). Toj ambʼil aju, bʼalo kubʼ t-xjelin Pablo jlu: «¿Jteʼ ambʼil kukx kʼikʼex nya bʼaʼn lu wuʼne?». In nel qnikʼ tiʼj qa tajtoq onbʼil.

4. ¿Tzeʼn onin Jehová tiʼj Pablo tej tajbʼen Jesús tuʼn?

⁴ ¿Tiʼ onbʼil xi qʼoʼn te Pablo? Toj qonikʼen tej otoq tzyet, kubʼ tyekʼin tibʼ Jesús twitz ex xi tqʼamaʼn jlu te: «Qeʼ tkʼuʼja Pablo, ik tzaʼn ma tzʼoka te testiw wiʼje tuj Jerusalén, kyjaʼxtzun ilxix tiʼj tuʼn toka te testiw wiʼje tuj tnam Roma» (Hech. 23:11). Atzun jlu tajtoq Pablo tuʼn tok tbʼiʼn. Xi tqʼamaʼn Jesús te qa tbʼanel tej tyolin tiʼj toj tnam Jerusalén. Ax ikx, xi ttziyen te qa mintiʼ jun tiʼ kbʼajel tiʼj ex qa kpol toj tnam Roma, tuʼnju ax ikx kyolil tiʼj. Tej tok tbʼiʼn Pablo jlu, kubʼlo tnaʼn qa xqʼuqin taʼ ik tzeʼn in kubʼ tnaʼn jun tal neʼ toj tqʼabʼ tman.

5. ¿Tzeʼn onin Jehová tiʼj Pablo tej tajbʼen jun anjel tuʼn? (Qʼonka twitza tiʼj tilbʼilal tok tiʼj t-xkʼomil).

⁵ ¿Alkye junjuntl nya bʼaʼn ok weʼ Pablo twitz? Otoq tzikʼ kabʼe abʼqʼi ttzajlen nya bʼaʼn tiʼj Pablo toj tnam Jerusalén, xiʼ toj jun bark tuʼntzun tpon toj tnam Italia. Toj ambʼil aju, noq minabʼen tzaj jun kyqʼiqʼ jbʼal toj mar ex kubʼ kyximen xjal qa che kymel ex qa kxel mulqʼaj bark toj aʼ. Pero mintiʼ tzaj xobʼ Pablo. ¿Tiquʼn? Xi tqʼamaʼn jlu kye xjal ateʼ toj bark: «Tuj qonikʼan may ma ten jun anjel wukʼile, saj samaʼn tuʼn Dios aju Dios atine tuj tkwent ex in chin ajbʼene te, ex saj tmaʼn anjel weye kyjaʼ: Miʼn xobʼa Pablo, porke ilxix tiʼj tuʼn tpona twitz tat gobierni, ex ma tzaj xtalina tuʼn Dios tuʼn miʼn kynaj kykyaqil qeju ateʼ tukʼila tuj barc». Ajbʼen jun anjel tuʼn Jehová tuʼn t-xi tqʼamaʼn juntl maj qe yol otoq tqʼama Jesús te Pablo. Ex atzun jlu bʼaj, pon Pablo toj tnam Roma (Hech. 27:20-25; 28:16).

6. ¿Alkyeqe yol kyaj tqʼamaʼn Jesús in qeʼ qkʼuʼj kyuʼn ex tiquʼn?

⁶ ¿Tiʼ onbʼil in tzaj qʼoʼn qe toj ambʼil jaʼlo? Ax ikx, in nonin Jesús qiʼj ik tzeʼn onin tiʼj Pablo. Jun techel, kyaj ttziyen Jesús jlu kye kykyaqil t-xnaqʼtzbʼen: «Lu qine chin tele kyukʼile tkyaqil qʼij akutzun in japun bʼaj mankbʼil tqʼijlalil»  (Mat. 28:20). ¿Tiquʼn in tzaj qʼuqbʼaʼn qkʼuʼj kyuʼn yol lu? Tuʼnju qkyaqilx in qo ikʼ toj ambʼil kwest. Jun techel, qa ma kyim jun toj qja, jaku kubʼ qnaʼn bʼis toj nim abʼqʼi ex nya oʼkx junjun qʼij. Ateʼ junjuntl kwest tuʼn kyanqʼin tuʼnju ma che tijen. Atzun junjuntl, in kubʼ kynaʼn nim bʼis tuʼn depresión. Maske ikju, in ten qipumal tuʼn tikʼx quʼn tuʼnju at Jesús tkyaqil qʼij qukʼil, axpe ikx kyoj ambʼil mas kwest toj qanqʼibʼil (Mat. 11:28-30).

7. Ik tzeʼn in tzaj tqʼamaʼn Apocalipsis 14:6, ¿tzeʼn in nonin Jehová qiʼj?

⁷ In tzaj tqʼamaʼn Tyol Dios qa in che ajbʼen anjel tuʼn Jehová tuʼn tonin qiʼj (Heb. 1:7, 14). Jun techel, in che onin anjel qiʼj aj qpakbʼan tiʼj Tkawbʼil Dios «kye kykyaqil nasyon, ex kye kykyaqil kyiyjil xjal, ex kye kykyaqil kʼloj xjal junxilchaq kyyol, ex kye kykyaqil tnam» (Mat. 24:13, 14; kjawil uʼjit Apocalipsis 14:6).

8. ¿Tzeʼn onin Jehová tiʼj Pablo tej tajbʼen jun nejenel kye soldad tuʼn?

⁸ ¿Tiʼ onbʼil xi qʼoʼn te Pablo? Ik tzeʼn ma tzʼel qnikʼ tiʼj, xi ttziyen Jesús te Pablo toj abʼqʼi 56 qa kpoltoq toj tnam Roma. Pero kubʼ kyximen junjun aj Judiy te tnam Jerusalén tuʼn tkubʼ kybʼyoʼn Pablo. Tej tok tbʼiʼn nejenel kye soldad Claudio Lisias te tnam Roma aju otoq kubʼ kyximen xjal lu, onin tiʼj. Xi samaʼn Pablo tuʼn atz Cesarea, aju attoq 105 kilómetros tiʼj tnam Jerusalén ex ok xqʼuqin Pablo kyuʼn nim soldad. Tej tpon, xi tqʼamaʼn gobernador Félix «tuʼn t-xqʼuqinjtz Pablo tuj palacio te Herodes». Iktzun tten, klet Pablo toj kyqʼabʼ aj qʼoj (Hech. 23:12-35).

9. ¿Tzeʼn onin gobernador Festo tiʼj Pablo?

⁹ Toj abʼqʼi 58, naʼmxtoq tetz Pablo toj pres atz Cesarea. Otoq tzʼok Festo te gobernador te t-xel Félix. E kubʼsan aj Judiy twitz Festo tuʼn t-xi qʼiʼn Pablo toj tnam Jerusalén tuʼntzun tok toj xjel, pero mintiʼ xi tqʼoʼn ambʼil. Bʼalo el tnikʼ gobernador tiʼj qa kyajtoq aj Judiy «tuʼn tkubʼ [bʼyoʼn] Pablo kyuʼn tuj bʼe» (Hech. 24:27–25:5).

10. ¿Tiʼ bʼant tuʼn Festo tej t-xi tqanin Pablo tuʼn tok toj xjel tuʼn aj kawil?

¹⁰ Tej tikʼ chʼintl ambʼil, ok Pablo toj xjel atz Cesarea. Tuʼnju nya tajtoq Festo tuʼn ttzaj kyqʼoj xjal judiy tiʼj, xi tqʼanin jlu te Pablo: «¿Tajpeya tuʼn tjaxa tuj Jerusalén ex matzun tuʼn toka tuj xjel wuʼne tiʼj tkyaqil jlu?». Ojtzqiʼntoq tuʼn Pablo qa ma txiʼ Jerusalén, jakutoq kubʼ bʼyoʼn. Ax ikx el tnikʼ tiʼj tiʼtoq kbʼantel tuʼn tuʼntzun miʼn tkubʼ bʼyoʼn, tuʼn tpon Roma ex tuʼn kukx tpakbʼan. Tuʼntzunju, xi tqʼamaʼn jlu: «Twitz tkawbʼil gobierni atine, jatum tuʼn woke tuj xjel». Tej otoq txi tqanin Festo kye tukʼil tiʼ kyximbʼetz tiʼj, xi ttzaqʼweʼn jlu: «Ma tmaya tuʼn t-xiʼya twitz tat gobierni tuʼn toka tuj xjel. Kxeʼltzuna twitz tat gobierni». Tej tkubʼ t-ximen Festo tuʼn t-xi tsamaʼn Pablo atz Roma, onin tuʼn miʼn tok bʼinchaʼn nya bʼaʼn tiʼj Pablo (Hech. 25:6-12).

11. ¿Alkyeqe tbʼanel tyol Isaías ximenlo Pablo tiʼj?

¹¹ Akux in nayontoq Pablo tuʼn t-xiʼ Italia, bʼalo ximen tiʼjju xi tqʼamaʼn Isaías kye aj qʼoj tiʼj Jehová. Tqʼama jlu: «Che ximane tiʼj aju kyaje tuʼn tbʼant, ex kbʼajel naj kyximbʼetze; kyximan kubʼe  alkye kyaje, ex mlayx japun, tuʼnju at Dios qukʼile» (Is. 8:10). Tej tel tnikʼ Pablo tiʼj qa at Jehová tukʼil, onin tiʼj tuʼn tten tipumal tuʼn kyikʼx junjuntl nya bʼaʼn tuʼn.

12. a) ¿Tzeʼn tmod Julio kubʼ tyekʼin tukʼil Pablo? b) ¿Tiʼlo ok tqʼoʼn Pablo twitz tiʼj toj ambʼil aju?

¹² Xiʼ Pablo atz Italia. Tuʼnju presintoq taʼ, ok xqʼuqin tuʼn Julio, jun kyxol qe nejenel kye soldad te Roma. Jakutoq kubʼ tyekʼin xjal lu tbʼanel tmod tiʼj Pablo moqa jakutoq tzʼok tbʼinchaʼn nya bʼaʼn tiʼj. ¿Tiʼtzun bʼant tuʼn? Toj juntl qʼij, tej tweʼ bark, kubʼ tyekʼin Julio tbʼanel tmod tiʼj Pablo tuʼnju «xi tqʼoʼn ambʼil te [...] tuʼn t-xiʼ keʼyil kye qe tamiw». Tej tikʼ chʼintl ambʼil, pon Julio onil Pablo tuʼn miʼn tkyim. ¿Tiquʼn? Tuʼnju toj ambʼil aju, kyajtoq soldad tuʼn tkubʼ kybʼyoʼn kykyaqil xjal pres junx i eʼx tukʼil Pablo. Mintiʼ xi tqʼoʼn Julio ambʼil te jlu tuʼnju «tajbʼiltoq tuʼn tklet Pablo». Oklo tkeʼyin Pablo tzeʼn onin Jehová tiʼj tej tkubʼ tyekʼin Julio tbʼanel tmod tiʼj (Hech. 27:1-3, 42-44).

13. ¿Tzeʼn jaku che ajbʼen xjal at kyoklen tuʼn Jehová?

¹³ ¿Tiʼ onbʼil in tzaj qʼoʼn qe toj ambʼil jaʼlo? Qa at toklen tukʼilju tajbʼil Jehová, jaku tzʼajbʼen xewbʼaj xjan tuʼn tuʼntzun t-xi kybʼinchaʼn xjal at kyoklen aju in kubʼ t-ximen tuʼn tbʼant. Kubʼ ttzʼibʼin aj kawil Salomón jlu: «Ik tten t-ximbʼetz rey tuj tqʼabʼ Qman ik tzaʼn jun aʼ in bʼet, in xi tiʼn Qman noq jatum taj tuʼn t-xi tiʼn» (Prov. 21:1). ¿Tiʼ kyxilen yol lu? Jaku kubʼ kybʼinchaʼn xjal jun tbʼe aʼ noq jaxku tumel kyaj tuʼn tpon. Chʼixmi axju in bʼant tuʼn Jehová, jaku tzʼajbʼen xewbʼaj xjan tuʼn tuʼn tchʼexpaj kyximbʼetz aj kawil tuʼn tjapun twi t-ximbʼetz. Toj ambʼil aju, in kubʼ kyximen xjal tuʼn tbʼant junjun tiʼ kyuʼn, aju in nonin kyiʼj tmajen Jehová (mojbʼankuya tukʼil Esdras 7:21, 25, 26).

14. Aj qximen tiʼjju in tzaj tqʼamaʼn Hechos 12:5, ¿alqiʼj jaku qo naʼn Dios?

¹⁴ ¿Tiʼtzun qe kbʼantel quʼn? Jaku qo naʼn Dios «kyiʼj qe gobierni ex kyiʼj kykyaqil qeju at kyoklen tuj kawbʼil» aj tkubʼ kyximen tuʼn tbʼant jun tiʼ kyuʼn ex at toklen tukʼil qajbʼebʼil te Jehová (1 Tim. 2:1, 2; Neh. 1:11). Ax ikx, in qo naʼn Dios kyiʼj qerman ateʼ toj cárcel ik tzeʼn bʼant kyuʼn okslal toj tnejel syent abʼqʼi (kjawil uʼjit Hechos 12:5; Heb.  13:3). Axpe ikx, jaku txi qqanin te Jehová tuʼn tkubʼ kyyekʼin polisiy tbʼanel kymod kyiʼj erman aj kyxqʼuqin kyiʼj ik tzeʼn bʼant tuʼn Julio tiʼj Pablo (Hech. 27:3).

15, 16. ¿Tzeʼn ajbʼen Aristarco ex Lucas tuʼn Jehová tuʼn tonin tiʼj Pablo?

¹⁵ ¿Tiʼ onbʼil xi qʼoʼn te Pablo? Tej in bʼettoq t-xiʼ Pablo toj tnam Roma, e ajbʼen okslal tuʼn Jehová tuʼn tonin tiʼj. Qo xnaqʼtzan kyiʼj junjun techel.

¹⁶ Tuʼnju kyamiw kyibʼ Pablo tukʼil Aristarco ex Lucas, kubʼ kyximen tuʼn kyxiʼ tukʼil atz Roma. * Bʼant jlu kyuʼn maske jakutoq che kubʼ bʼyoʼn junx tukʼil Pablo. Mintiʼ in tzaj tqʼamaʼn Tyol Dios qa ax ikx kye xi qʼamaʼn kye qa oktoq che pol Roma. Tzmaxi ok kybʼiʼn qa mlay che kyim tejxi ttzaj kyqʼiqʼ jbʼal toj mar. Tuʼntzunju, tej tjax Aristarco ex Lucas toj bark atz Cesarea, jaku txi qqʼamaʼn qa xi tqʼoʼn Pablo chjonte te Jehová tuʼnju in che ajbʼentoq okslal lu tuʼn tuʼn tonin tiʼj (Hech. 27:1, 2, 20-25).

17. ¿Tzeʼn onin Jehová tiʼj Pablo tej kyajbʼen okslal tuʼn?

¹⁷ Akux in bʼettoq t-xiʼ Pablo toj tbʼe, nim maj e onin okslal tiʼj. Jun techel, tej kypon toj tnam Sidón, xi tqʼoʼn Julio ambʼil te «tuʼn t-xiʼ keʼyil kye qe tamiw ex tuʼn toninjtz chʼin kyuʼn». Yajxitl, tej kypon Pablo ex qe tukʼil toj tnam Puteoli, e kanet junjun okslal kyuʼn ex xi kyqʼamaʼn kye tuʼn kykyaj ten wuq qʼij kyukʼil. Toj ambʼil lu, jaku txi qqʼamaʼn qa nim e tzalaj okslal tiʼj tbʼanel tiʼchaq xi tqʼamaʼn Pablo kye (mojbʼankuya tukʼil Hechos 15:2, 3). Tej tbʼaj ambʼil tuʼn tten Pablo ex qe tukʼil kyja okslal, e ikʼ bʼet juntl maj (Hech. 27:3; 28:13, 14).

18. ¿Alqiʼj xi tqʼoʼn Pablo chjonte te Jehová, ex tiquʼn qeʼ tkʼuʼj tuʼn jlu?

¹⁸ Tej in bʼettoq t-xiʼ Pablo tuʼn tpon Roma, otoq tzikʼ oxe abʼqʼi tkubʼlen ttzʼibʼin  uʼj kye okslal te tnam aju. Tzajlo tnaʼn jlu: «Ma bʼet-xi abʼqʼi in wajbʼeʼne tuʼn nxiʼye kyukʼile» (Rom. 15:23). Pero mintiʼtoq ximen tuʼn qa presintoq aj tpon. Jaku txi qqʼamaʼn qa nim onin tiʼj tej tok tkeʼyin qa in che ayon okslal te Roma tiʼj. «Tej tlonte Pablo kywitz erman, xi tqʼoʼn chjonte te Dios ex o qeʼxix tkʼuʼj» (Hech. 28:15). ¿Tiquʼn xi tqʼoʼn Pablo chjonte te Jehová tej kyyon erman tiʼj? Tuʼnju el tnikʼ tiʼj juntl maj qa in che ajbʼentoq okslal tuʼn Jehová tuʼn tonin tiʼj.

19. Ik tzeʼn in tzaj tqʼamaʼn 1 Pedro 4:10, ¿tzeʼn jaku qo ajbʼen tuʼn Jehová tuʼn tonin kyiʼj qeju in che bʼisun?

¹⁹ ¿Tiʼtzun qe kbʼantel quʼn? ¿Atpe jun erman ojtzqiʼn quʼn ex in bʼisun tuʼn tpaj jun yabʼil, tuʼn tpaj jun nya bʼaʼn moqa tuʼnju o kyim jun toj tja? Qa ma tzʼok qbʼiʼn qa at jun erman in bʼisun, qqaninx te Jehová tuʼn tonin qiʼj tuʼn t-xi qqʼamaʼn jun tbʼanel yol te moqa tuʼn tkanet jun tumel quʼn tzeʼn tuʼn qonin tiʼj. Bʼalo jaku chewix tkʼuʼj kyuʼn tbʼanel qyol (kjawil uʼjit 1 Pedro 4:10). * Qa ma qo onin tiʼj, jakulo tzʼok qeʼ tkʼuʼj juntl maj tiʼj ttziybʼil Jehová jlu: «Mlay kyaj nkoline, ex mlay kyaj nqʼoʼne». ¿Mlaypelo qo tzalaj qa ma tzʼok qbʼiʼn jlu?

20. ¿Tiquʼn jaku txi qqʼamaʼn jlu tuʼn tkyaqil qkʼuʼj: «Ate Qman onil weye»?

²⁰ Ax ikx qe, in qo ikʼ kyoj ambʼil kwest ik tzeʼn ikʼ Pablo ex qe tamiw toj. Pero mintiʼ in qo tzaj xobʼ tuʼnju ojtzqiʼn quʼn qa at Jehová qukʼil tuʼntzun tonin qiʼj. Tuʼn tbʼant jlu tuʼn, jaku tzʼajbʼen Jesús ex qe anjel tuʼn. Ax ikx, qa at toklen jun tiʼ tukʼil t-ximbʼetz Jehová, jaku che ajbʼen xjal at kyoklen tuʼn tuʼntzun tonin qiʼj. Ex ik tzeʼn ojtzqiʼn quʼn, jaku tzʼajbʼen xewbʼaj xjan tuʼn Jehová tuʼn ttzaj anqʼin toj kyanmi erman tuʼn kyonin qiʼj. Tuʼntzunju, ax ikx qe jaku txi qqʼamaʼn jlu tuʼn tkyaqil qkʼuʼj ik tzeʼn te Pablo: «Ate Qman onil weye; mlay chin xobʼe. Mintiʼ jun mya bʼaʼn jaku kybʼincha xjal wiʼje» (Heb. 13:6).