1. ¿Tiʼ kyaj tqʼamaʼn Jesús toj Mateo 28:18 a 20?

TEJ tjaw anqʼin Jesús, kubʼ tyekʼin tibʼ kywitz t-xnaqʼtzbʼen atz Galilea. Attoq jun tiʼ nim toklen tuʼn t-xi tqʼamaʼn kye. ¿Tiʼtzun? Jaku jaw quʼjin toj Mateo 28:18 a 20 (uʼjinktza).

2. ¿Alkyeqe xjel qo xnaqʼtzal kyiʼj?

² Kykyaqilx tmajen Jehová toj ambʼil jaʼlo, nim toklen tuʼn t-xi kynimen kawbʼil kyaj tqʼamaʼn Jesús tuʼn kyonin kyiʼj xjal tuʼn kyok te t-xnaqʼtzbʼen. Tuʼntzunju, qo xnaqʼtzan kyiʼj oxe xjel at kyoklen tukʼil aqʼuntl kyaj tqʼamaʼn Jesús. Tnejel, aj t-xi qyekʼin qe tkawbʼil Dios kye qeju in che ok te t-xnaqʼtzbʼen Jesús, ¿alkye juntl tiʼ kbʼantel quʼn? Tkabʼin, ¿tzeʼn jaku che onin kykyaqil erman kyiʼj xjal in che xnaqʼtzan tiʼj Tyol Dios tuʼn kychʼiy toj kyokslabʼil? Ex toxin, ¿tzeʼn jaku qo onin kyiʼj erman o che chewix toj kyokslabʼil tuʼn kyonin juntl maj tuʼn kyok xjal te t-xnaqʼtzbʼen Jesús?

3. ¿Tiʼ juntl tiʼ kyaj tqʼamaʼn Jesús tuʼn tbʼant quʼn?

³ Kyaj tqʼamaʼn Jesús qa il tiʼj tuʼn t-xi qyekʼin kye xjal aju kyaj tqʼamaʼn. Pero nya oʼkx kyaj tqʼamaʼn Jesús jlu qe: «Kyqʼonxe xnaqʼtzbʼil kye tiʼj tkyaqilju ma txi nmaʼne kyeye». Sino tqʼama jlu: «Kyqʼonxe xnaqʼtzbʼil kye tuʼn tjapun kyuʼn tkyaqilju ma txi nmaʼne kyeye». Qa qaj tuʼn tbʼant jlu quʼn, nya oʼkx kxel qyekʼin kye qeju in che xnaqʼtzan qukʼil  tiʼ tuʼn tbʼant kyuʼn, sino ax ikx tzeʼn tuʼn tbʼant kyuʼn. ¿Tiquʼn?

4. Qʼamantza tukʼil jun techel tzeʼn jaku qo onin tiʼj jun xjal tuʼn t-xi tnimen aju kyaj tqʼamaʼn Jesús.

⁴ ¿Tzeʼn jaku qo onin tiʼj jun xjal tuʼn t-xi tnimen aju kyaj tqʼamaʼn Jesús? Qo xnaqʼtzan tiʼj jun techel. Aj t-xi tyekʼin jun xjal te juntl tzeʼn tuʼn tbʼant tmanejarin, ¿tiʼ in bʼant tuʼn tuʼn t-xi tyekʼin te xjal tuʼn t-xi tnimen qe ley aj tmanejarin? Bʼalo tnejel in najbʼen jun uʼj tuʼn tuʼn t-xi tyekʼin te. Pero qa taj tuʼn t-xi tnimen xjal qe ley, il tiʼj tuʼn tbʼant juntl tiʼ tuʼn. Il tiʼj tuʼn t-xiʼ tukʼil xjal aj tex manejaril tuʼntzun t-xi tchikʼbʼaʼn te tzeʼn jaku kubʼ tqʼoʼn toj xnaqʼtzbʼil aju otoq tzʼel tnikʼ tiʼj. ¿Tiʼ xnaqʼtzbʼil in nel qiʼn tiʼj jlu?

5. a) Ik tzeʼn in tzaj tqʼamaʼn Juan 14:15 ex 1 Juan 2:3, ¿tiʼ il tiʼj tuʼn t-xi qyekʼin te xjal in xnaqʼtzan tiʼj Tyol Dios? b) Qʼamantza junjun techel tzeʼn jaku bʼant quʼn.

⁵ Aj t-xi qqʼoʼn xnaqʼtzbʼil tiʼj Xjan Uʼj te jun xjal, in xi qyekʼin te tiʼ taj Dios tuʼn tbʼant quʼn. Pero nya oʼkx jlu kbʼantel quʼn. Il tiʼj tuʼn qonin tiʼj xjal tzeʼn jaku kubʼ tbʼinchaʼn aju in nel tnikʼ tiʼj (kjawil uʼjit Juan 14:15; 1 Juan 2:3). Tukʼilju in bʼant quʼn, jaku txi qyekʼin te tzeʼn jaku txi tbʼiʼn nabʼil ateʼ toj Tyol Dios aj tten toj tja xnaqʼtzbʼil, toj aqʼuntl ex aj tel tpaʼn ambʼil tuʼn ttzalaj jun rat. Ax ikx jaku txi qqʼamaʼn te tzeʼn onin qiʼj tej t-xi qbʼiʼn jun nabʼil toj Tyol Dios. Ex aj qnaʼn Dios tukʼil xjal, qqaninx te Jehová tuʼn tonin xewbʼaj xjan tiʼj tuʼn t-xi tyekʼin tbʼe (Juan 16:13).

6. ¿Tiʼ mas kbʼantel quʼn tuʼn t-xi qyekʼin kye txqantl tuʼn t-xi kynimen aju tqʼama Jesús?

⁶ ¿Tiʼ mas kbʼantel quʼn tuʼn t-xi qyekʼin kye txqantl tuʼn t-xi kynimen aju tqʼama Jesús? Il tiʼj tuʼn qonin kyiʼj qeju in che xnaqʼtzan tuʼn tkubʼ kyximen tuʼn kyonin kyiʼj mas xjal tuʼn kyok te t-xnaqʼtzbʼen Jesús. Ateʼ junjun in tzaj salin kyiʼj aj kyximen tiʼj tuʼn kyex pakbʼal. Tuʼntzunju, il tiʼj tuʼn tten qpasens kyiʼj aj t-xi qyekʼin axix tok kye tuʼntzun tchʼiy qʼuqbʼil kykʼuʼj, iktzun tten kbʼel kyximen tuʼn kyex pakbʼal. ¿Tiʼ jaku bʼant quʼn tuʼn qonin kyiʼj tuʼn tkubʼ kyximen tuʼn kyyolin tiʼj tbʼanel tqanil?

7. ¿Tzeʼn jaku qo onin tiʼj xjal in xnaqʼtzan tuʼn tkubʼ t-ximen tuʼn tpakbʼan tiʼj tbʼanel tqanil?

⁷ Bʼalo jaku chex qqanin xjel ik tzeʼn jlu teju in xnaqʼtzan: «¿Tzeʼn o tzʼonin tiʼja atxix tej tok tbʼiʼna tbʼanel tqanil tiʼj Tkawbʼil Dios? ¿In kubʼpe t-ximana qa il tiʼj tuʼn tok kybʼiʼn junjuntl xjal? ¿Tzeʼn jaku tzʼonina kyiʼj?» (Prov. 3:27; Mat. 9:37, 38). Qyekʼinx qe tratado ateʼ toj onbʼil tuʼn qqʼon xnaqʼtzbʼil te ex qqaninx te alkye jun jaku tzʼonin kyiʼj toj tja, kyiʼj tamiw moqa kyiʼj tukʼil toj aqʼuntl. Qqʼonx qe tratado te, ex aj tjaw tjyoʼn jun, bʼaʼn tuʼn tkubʼ qxnaqʼtzaʼn tukʼil tzeʼn jaku txi tqʼoʼn kye xjal. Noqtzun tuʼnj, ax ikx qo onil tiʼj aj tok te pakbʼal ex kukx qo tel tukʼil (Ecl. 4:9, 10; Luc. 6:40).

8. ¿Tiquʼn nim toklen tuʼn tchʼiy tkʼujlabʼil xjal tiʼj Dios ex kyiʼj txqantl? (Qʼonka twitza tiʼj recuadro, « ¿Tzeʼn jaku qo onin tiʼj xjal in xnaqʼtzan tuʼn tchʼiy tkʼujlabʼil tiʼj Dios?»).

⁸ Bʼaʼn tuʼn ttzaj qnaʼn qa kyaj tqʼamaʼn Jesús tuʼn t-xi qxnaqʼtzan kye txqantl tuʼn t-xi kynimen tkyaqilju kyaj tqʼamaʼn. Kyxol qe jlu, ateʼqe kabʼe mandamyent mas nim kyoklen, aju tuʼn tok qkʼujlaʼn Dios ex qe xjal (Mat. 22:37-39). Qa ma txi qyekʼin jlu kye qeju in che xnaqʼtzan tiʼj Tyol Dios, jaku qo onin kyiʼj tuʼn kypakbʼan. Bʼaʼn tuʼn ttzaj qnaʼn qa ateʼ junjun  xjal in che xnaqʼtzan tiʼj Tyol Dios, in che tzaj xobʼ aj tkubʼ kyximen tuʼn kyex pakbʼal. Noqtzun tuʼnj, jaku tzʼok qeʼ qkʼuʼj tiʼj qa kʼonil Jehová kyiʼj tuʼn tel xobʼil kyiʼj (Sal. 18:1-3; Prov. 29:25). At jun recuadro toj xnaqʼtzbʼil lu jatumel in tzaj tchikʼbʼaʼn tzeʼn tuʼn qonin tiʼj xjal tuʼn tok tkʼujlaʼn Dios. Noqtzun tuʼnj, kykyaqil erman jaku che onin tiʼj jun xjal tuʼn tchʼiy tkʼujlabʼil. Qo xnaqʼtzan tiʼj tzeʼn jaku bʼant quʼn.

9. ¿Alkye tten in bʼant tmanejarin jun xjal?

⁹ Qo yolin juntl maj tiʼjju techel tiʼj xjal in xnaqʼtzan tuʼn tbʼant tmanejarin. Akux in manejarin, nya oʼkx in nel tnikʼ tiʼjju in xi qʼamaʼn te, sino ax ikx in nel tkanoʼn kyiʼj junjuntl at mas kyojtzqibʼil. Jun techel, jakulo txi tqʼamaʼn xjal in qʼon xnaqʼtzbʼil te tuʼn tok tqʼoʼn twitz tiʼj tzeʼn in xi tqʼoʼn jun xjal ambʼil te juntl kar tuʼn tkubʼ nej twitz. Moqa jaku txi tqʼamaʼn te tzeʼn in kubʼ tiʼn juntl xjal tluz tkar tuʼntzun miʼn tnaj twitz juntl tuʼn. Kyuʼn techel lu, in nel tnikʼ xjal in xnaqʼtzan kyiʼj nim tiʼchaq.

10. ¿Tiʼ kʼonil tiʼj xjal in xnaqʼtzan tuʼn tchʼiy toj tokslabʼil?

¹⁰ Chʼixmi ax jlu in bʼaj tiʼj jun xjal in xnaqʼtzan tiʼj Tyol Dios, nya oʼkx jaku tzʼel tkanoʼn tiʼjju in qʼon xnaqʼtzbʼil te, sino ax ikx jaku tzʼel tkanoʼn kyiʼj junjuntl tmajen Jehová. Tuʼntzunju, nim toklen tuʼn tpon xjal kyoj chmabʼil tuʼntzun tchʼiy toj tokslabʼil. Aju kʼokel tbʼiʼn kyoj chmabʼil, kʼonil tiʼj tuʼn tchʼiy mas tojtzqibʼil, qʼuqbʼil tkʼuʼj ex tkʼujlabʼil tiʼj Dios (Hech. 15:30-32). Nya oʼkxju, ax ikx jaku tzʼonin erman in qʼon xnaqʼtzbʼil te tuʼn tok tojtzqiʼn junjuntl erman o che ikʼ kyoj tiʼchaq ik tzeʼn te. ¿Alkyeqe erman in kubʼ kyyekʼin kykʼujlabʼil kyiʼj txqantl ex jaku tzʼel tkanoʼn xjal in xnaqʼtzan kyiʼj? Qo xnaqʼtzan kyiʼj junjun ambʼil jatumel jaku bʼaj.

11. ¿Alkyeqe techel jaku tzʼok tkeʼyin jun xjal in xnaqʼtzan ex tzeʼn jaku tzʼonin tiʼj?

¹¹ In xnaqʼtzan jun xuʼj tiʼj Tyol Dios ex tjunalx in chʼiysante qe tal, ex in nok tqʼoʼn twitz tiʼj jun ermana ax tanqʼibʼil at ik tzeʼn te. In nonin jlu tiʼj tuʼnju in nok tilil tuʼn ermana tuʼn kypon tiʼn tal kyoj chmabʼil. Atzun juntl xjal in xnaqʼtzan, in nok tilil tuʼn tuʼn tkyaj ttzaqpiʼn sichʼ ex in nok tojtzqiʼn jun ermano o tzikʼ jlu tiʼj. In xi tqʼamaʼn ermano te xjal qa kyaj ttzaqpiʼn sichʼ noq tuʼnju at tkʼujlabʼil tiʼj Jehová (2 Cor. 7:1; 4:7). Otoqxi bʼaj tqʼamaʼn ermano tkyaqilju bʼaj tiʼj te xjal, in xi tqʼamaʼn te qa ax ikx te jaku kubʼ tiʼj tuʼn. Nim in nonin jlu tiʼj xjal. Te mankbʼil, in nok tkeʼyin jun txin in xnaqʼtzan tiʼj Tyol Dios jun ermana in tzalaj tuʼnju testigo de Jehová ex ax tabʼqʼi ik tzeʼn te. Tuʼn jlu taj txin tuʼn tok tbʼiʼn tiquʼn in tzalaj ermana.

12. ¿Tiquʼn in xi qqʼamaʼn qa qkyaqilx jaku qo onin tiʼj jun xjal in xnaqʼtzan tuʼn tchʼiy toj tokslabʼil?

¹² Aj kyok tojtzqiʼn xjal nim erman kukx in che ajbʼen te Jehová, jaku tzʼel tnikʼ tiʼj tiʼ t-xilen tuʼn t-xi qnimen kawbʼil kyaj tqʼamaʼn Jesús tiʼj tuʼn tok qkʼujlaʼn Dios ex qe xjal (Juan 13:35; 1 Tim. 4:12). Ex ik tzeʼn ma qo yolin tiʼj, aj tok tqʼoʼn twitz kyiʼj erman in che ok weʼ twitz nya bʼaʼn ik tzeʼn te, jaku tzʼonin jlu tiʼj. Iktzun tten kʼelel tnikʼ tiʼj qa jaku che bʼant chʼixpubʼil tuʼn tuʼn tok te t-xnaqʼtzbʼen Jesús (Deut. 30:11). Ik tzeʼn ma tzʼel qnikʼ tiʼj, kykyaqilx erman jaku che onin tuʼntzun tchʼiy xjal in xnaqʼtzan toj tokslabʼil (Mat. 5:16). Teyele junjun bʼaʼn tuʼn tkubʼ t-xjelin jlu: «¿Tiʼ in bʼant wuʼne tuʼn wonine kyiʼj xjal in che ul kyoj chmabʼil?».

13, 14. ¿Alkye tmod Jesús kubʼ tyekʼin kyukʼil t-apóstol tej ttzaj bʼaj kykʼuʼj?

¹³ Qaj tuʼn qonin kyiʼj erman o che chewix toj kyokslabʼil tuʼntzun kyonin juntl maj tuʼn kyok xjal te t-xnaqʼtzbʼen Jesús. Tuʼn tel qnikʼ tiʼj tzeʼn jaku bʼant quʼn, bʼaʼn tuʼn ttzaj qnaʼn tiʼ tmod Jesús kubʼ tyekʼin kyiʼj t-apóstol tej ttzaj bʼaj kykʼuʼj.

¹⁴ Tej chʼixtoq tkubʼ bʼyoʼn Jesús, kyaj kolin kyuʼn t-apóstol ex i el oq tiʼj (Mar. 14:50; Juan 16:32). ¿Tiʼ tmod kubʼ tyekʼin kyukʼil tej ttzaj bʼaj kykʼuʼj? Qqʼonk qwiʼ tiʼjju bʼant tuʼn tej tikʼ chʼin ambʼil tjawlen anqʼin. Xi tqʼamaʼn kye junjun xuʼj tuʼn t-xi kyqʼamaʼn kye t-apóstol qa otoq jaw anqʼin. Tqʼama jlu: «Miʼn che xobʼe; kyxiʼye, kyqʼonxe tqanil kye wermaniye» (Mat. 28:10a). Mintiʼ el tikʼun Jesús qe t-apóstol maske otoq kyaj kolin kyuʼn, sino kukx ok tqʼoʼn kybʼi te «wermaniye». El tkanoʼn Jesús tiʼj Jehová tej tkubʼ tyekʼin qʼaqʼbʼil tkʼuʼj ex tej tkubʼ tnajsaʼn kyil txqantl (2 Rey. 13:23).

15. ¿Tiʼ in qnaʼn kyiʼj qeju ya mintiʼ in che pakbʼan?

¹⁵ Ax ikx qe, in qo ximen kyiʼj qeju ya mintiʼ in che pakbʼan. Kukx in che ok qqʼoʼn te qerman ex in che ok qkʼujlaʼn. Mintiʼ in nikʼ tnaʼl quʼn tkyaqilju aqʼuntl bʼant kyuʼn tiʼj Jehová toj ambʼil ojtxe, ateʼ junjun kyoj nim abʼqʼi (Heb. 6:10). In qo bʼisun kyiʼj (Luc. 15:4-7). ¿Tzeʼn jaku tzʼel qkanoʼn tiʼj Jesús ex tuʼn tkubʼ qyekʼin qa in qo ximen kyiʼj?

16. ¿Alkye jun tten jaku kubʼ qyekʼin kye erman o che chewix toj kyokslabʼil qa in qo ximen kyiʼj?

¹⁶ Qqʼonx txokbʼil kyiʼj tuʼn kypon kyoj chmabʼil. Jun tiʼ bʼant tuʼn Jesús tej ttzaj bʼaj kykʼuʼj apóstol, xi tqʼoʼn txokbʼil kyiʼj tuʼn tok kychmon kyibʼ (Mat. 28:10b; 1 Cor. 15:6). Ax ikx toj ambʼil jaʼlo, jaku txi qqʼoʼn txokbʼil kyiʼj erman o che chewix toj kyokslabʼil tuʼn kypon kyoj chmabʼil. Pero il-lo tiʼj tuʼn t-xi qqʼamaʼn kye jun ex juntl maj tuʼntzun kypon. Jaku txi qqʼamaʼn qa kubʼ tnaʼn Jesús nim tzalajbʼil tej t-xi kykʼamoʼn t-xnaqʼtzbʼen txokbʼil xi tqʼoʼn kyiʼj, ax tzalajbʼil lu jaku kubʼ qnaʼn (Mat. 28:16; mojbʼankuya tukʼil Lucas 15:6).

17. ¿Tiʼ kbʼantel quʼn qa ma pon jun erman o chewix toj tokslabʼil toj chmabʼil?

¹⁷ Qqʼonx jun bʼaʼn kyulen. Tej tpon Jesús kyukʼil t-xnaqʼtzbʼen, xi laqʼeʼ kytxlaj ex yolin kyukʼil tuʼntzun tkubʼ kynaʼn bʼaʼn (Mat. 28:18). Yajtzun qe, ¿tiʼ kbʼantel quʼn aj tok qkeʼyin qa ma pon jun erman o chewix toj tokslabʼil toj chmabʼil? Bʼaʼn tuʼn qxi laqʼeʼ ttxlaj ex qqʼamanx te, ¡bʼaʼn tulena! Tnejel, jakulo tzaj bʼaj qkʼuʼj tuʼnju mintiʼ ojtzqiʼn quʼn tiʼ jaku txi qqʼamaʼn, pero maslo bʼaʼn qa ma txi qqʼamaʼn qa in qo tzalaj tuʼnju ma pon ex iktzun tten mlay kubʼ tnaʼn nya bʼaʼn.

18. ¿Tzeʼn jaku txi qqʼuqbʼaʼn kykʼuʼj erman o che chewix toj kyokslabʼil?

¹⁸ Qqʼuqbʼanx kykʼuʼj. Bʼalo otoq tzaj bʼaj kykʼuʼj t-xnaqʼtzbʼen Jesús tej kyximen tiʼj qa iltoq tiʼj tuʼn kypakbʼan twitz tkyaqil Txʼotxʼ. Xi tqʼuqbʼaʼn Jesús kykʼuʼj tej t-xi tqʼamaʼn jlu kye: «Lu qine chin tele kyukʼile tkyaqil qʼij» (Mat. 28:20). Ex onin jlu kyiʼj tuʼnju tej tikʼ chʼintl ambʼil, «mintiʼ xi kykolin tuʼn t-xi kyqʼoʼn xnaqʼtzbʼil [...] ex tuʼn t-xi kypakbʼaʼn tqanil bʼaʼn» (Hech. 5:42). Ax ikx kye erman o che chewix toj kyokslabʼil, kyaj qʼuqbʼil qkʼuʼj. Bʼalo jaku tzaj bʼaj kykʼuʼj aj kyximen tiʼj qa il tiʼj tuʼn kyxiʼ pakbʼal juntl maj. Jaku chewix kykʼuʼj aj t-xi qqʼamaʼn kye qa nya kyjunalx  che pakbʼal ex jaku txi qqʼamaʼn qa jaku qo ex kyukʼil. Jaku tzʼok qeʼ qkʼuʼj tiʼj qa tzul kyqʼoʼn chjonte tiʼj onbʼil kxel qqʼoʼn kye. Qa kukx ma che ok qqʼoʼn te qerman, jaku qo tzalaj qkyaqilx aj tok qkeʼyin qa otoq che meltzʼaj.

19. ¿Tiʼ qaj tuʼn tbʼant quʼn ex tiquʼn?

¹⁹ ¿Jtoj kyaj qtzaqpiʼn aqʼuntl tuʼn qonin kyiʼj xjal tuʼn kyok te t-xnaqʼtzbʼen Jesús? Tzmaxi aj tul xitbʼil tiʼj tkyaqil nya bʼaʼn (Mat. 28:20). ¿Okpe kjapunel kawbʼil quʼn aju kyaj tqʼamaʼn Jesús? ¡Qaj tuʼn tjapun quʼn! Tuʼn tkyaqil qkʼuʼj in nel qpaʼn ambʼil, qipumal ex qe tiʼchaq at qe tuʼn qjyon kyiʼj «kykyaqil qeju skʼoʼmaj tuʼn tten kychwinqlal te jumajx» (Hech. 13:48). Iktzun tten in nel qkanoʼn tiʼj Jesús tej tqʼama jlu: «We nwa, atzunju tuʼn nbʼinchanteye aju tajbʼil ju tzaj samante weye, ex tuʼn tbʼaj bʼant taqʼun wuʼne» (Juan 4:34; 17:4). Ax ikx qaj tuʼn tbʼant quʼn tkyaqil aqʼuntl kyaj tqʼamaʼn Jesús qe (Juan 20:21). Ex qaj tuʼn kukx qaqʼunan junx kyukʼil kykyaqil qerman, ax ikx qeju o che chewix toj kyokslabʼil tzmaxi aj tul xitbʼil (Mat. 24:13).

20. Ik tzeʼn in tzaj tqʼamaʼn 2 Corintios 4:7, ¿tiquʼn jaku bʼant quʼn aju aqʼuntl kyaj tqʼamaʼn Jesús?

²⁰ Bʼaʼn tuʼn ttzaj qnaʼn qa kwest aqʼuntl kyaj tqʼamaʼn Jesús tuʼn tbʼant quʼn. Pero nya qjunalx atoʼ tuʼnju kyaj ttziyen qa ktel qukʼil. In xi qbʼiʼn kawbʼil tuʼn qonin kyiʼj xjal tuʼn kyok te t-xnaqʼtzbʼen Jesús tuʼnju in qo aqʼunan junx tukʼil Jehová ex Jesucristo (1 Cor. 3:9; 2 Cor. 2:17). Tuʼntzunju, jaku bʼant aqʼuntl quʼn. Jun oklenj te qe ex in kubʼ qnaʼn tzalajbʼil aj tbʼant aqʼuntl lu quʼn, ex aj qonin kyiʼj txqantl tuʼn tbʼant axju kyuʼn (kjawil uʼjit 2 Corintios 4:7).