1. ¿Alkyeqe xjel jaku qo ximen kyiʼj?

¿IN TZAJPE xobʼa aj t-ximana tiʼjju kbʼajel toj ambʼil tzul, ik tzeʼn aj tkubʼ najsaʼn okslabʼil nya ax tok, aj tok tzoqpaj Gog ex Magog tiʼj ttnam Jehová ex aj tul Armagedón? ¿Atpe maj in kubʼ t-ximana qa kukx ktela tzʼaqli twitz Jehová aj kybʼaj tiʼchaq lu? Qa ikju, jaku che onin tyol Jesús tiʼja jatumel ma jatz tbʼi xnaqʼtzbʼil lu. Tqʼama Jesús jlu kye t-xnaqʼtzbʼen: «Miʼn bʼaj kykʼuʼje; qeʼk kykʼuʼje tiʼj Dios» (Juan 14:1). Qa kyuw taʼ qʼuqbʼil qkʼuʼj, jaku tzʼok qeʼ qkʼuʼj tiʼj qa qo elex kywitz nya bʼaʼn che ul.

2. ¿Tzeʼn jaku bʼaj qchʼiysaʼn qʼuqbʼil qkʼuʼj ex tiʼ kʼelel qnikʼ tiʼj toj xnaqʼtzbʼil lu?

² Jun tiʼ jaku tzʼonin qiʼj tuʼn tchʼiy qʼuqbʼil qkʼuʼj ex tuʼn qex kywitz nya bʼaʼn toj ambʼil tzul, aju qa ma qo ximen tiʼj tiʼ qmod in kubʼ qyekʼin aj in qo ok weʼ kywitz nya bʼaʼn toj ambʼil jaʼlo. Qa ma bʼant jlu quʼn, kʼelel qnikʼ tiʼj tzeʼn taʼ qʼuqbʼil qkʼuʼj. Aj qex twitz jun nya bʼaʼn, in nonin qiʼj tuʼn tchʼiy qʼuqbʼil qkʼuʼj. Ex kʼonil jlu qiʼj tuʼn kyikʼx nya bʼaʼn quʼn toj ambʼil tzul. Toj xnaqʼtzbʼil lu, qo yolil kyiʼj kyaje tiʼ in tzaj tyekʼin qa iltoq tiʼj tuʼn tten mas qʼuqbʼil kykʼuʼj t-xnaqʼtzbʼen Jesús. Ax ikx, kʼelel qnikʼ tiʼj tzeʼn jaku qo ex kywitz nya bʼaʼn toj ambʼil jaʼlo ex tzeʼn jaku tzʼonin jlu qiʼj toj ambʼil tzul.

3. Ik tzeʼn in tzaj tqʼamaʼn Mateo 6:30 ex 33, ¿tiʼ tqʼama Jesús tiʼj qʼuqbʼil qkʼuʼj?

³ Toj tumel aj tkubʼ t-ximen jun chmilbʼaj tuʼn t-xi tqʼoʼn kywa, kyxbʼalun ex jun lugar jatumel tuʼn kyanqʼin toj tja. Pero kwest jlu toj ambʼil jaʼlo. Ateʼ junjun erman o tzʼel qʼiʼn kyaqʼun ex mintiʼ in kanet juntl kyuʼn maske in nok tilil  kyuʼn tuʼn tkanet. Atzun junjuntl, mintiʼ o tzaj kykʼamoʼn jun aqʼuntl nya bʼaʼn in nela toj twitz Jehová. Qa a jlu in bʼaj qiʼj, nim toklen tuʼn tok qeʼ qkʼuʼj tiʼj qa tzul tqʼoʼn Jehová aju at tajbʼen qe. Atzun jlu xi tqʼamaʼn Jesús kye t-xnaqʼtzbʼen tej tex tqʼoʼn tchikʼbʼabʼil twiʼ jun witz (kjawil uʼjit Mateo 6:30, 33). Qa ma tzʼok qeʼ qkʼuʼj tiʼj qa mlay qo kyaj kolin tuʼn Jehová, kʼonil qiʼj tuʼn tok qqʼoʼn qwiʼ tiʼj qajbʼebʼil te. Ex aj tel qnikʼ tiʼj tzeʼn in tzaj tqʼoʼn Jehová aju at tajbʼen qe, kʼonil qiʼj tuʼn qok laqʼeʼ mas ttxlaj ex mas kchʼiyil qʼuqbʼil qkʼuʼj.

4, 5. ¿Tiʼ o tzʼonin tiʼj jun familia tuʼn miʼn ttzaj bʼajxix tkʼuʼj tiʼjju at tajbʼen kye?

⁴ Qo yolin tiʼjju bʼaj tiʼj familia Castro te tnam Venezuela. O tzʼok kyqʼoʼn kywitz tiʼj tzeʼn o tzʼonin Jehová kyiʼj tuʼn miʼn ttzaj bʼajxix kykʼuʼj kyiʼj tiʼchaq at tajbʼen kye. Attoq jun piẍ kytxʼotxʼ ex in che aqʼunantoq tiʼj tuʼn tkambʼet twiʼ kywa. Pero el qʼiʼn kytxʼotxʼ kyuʼn mara ex i ex lajoʼn kyuʼn. Tqʼama Miguel jlu, aju chmilbʼaj: «Jaʼlo, in qo aqʼunane toj jun piẍ txʼotxʼ o tzaj majen qeye ex atzun jlu in nonin qiʼje tuʼn tkanet twiʼ qwaye. Aj in chin jaw weye junjun qʼij, in xi nqanine te Jehová tuʼn ttzaj tqʼoʼn aju at tajbʼen qeye toj qʼij aju». Kwest kyanqʼibʼil familia Castro, pero in nok qeʼ kykʼuʼj tiʼj qa kʼonil Jehová kyiʼj tuʼn tkanet twiʼ kywa. Tuʼntzunju, kukx in che ten kyoj chmabʼil ex kukx in che pakbʼan. In kubʼ kyqʼoʼn Tkawbʼil Jehová tnejel toj kyanqʼibʼil ex in xqʼuqin kyiʼj.

⁵ Toj ambʼil lu, o tzʼok tqʼoʼn Miguel twitz tiʼj tukʼil t-xuʼjil tzeʼn in xqʼuqin Jehová kyiʼj. At maj, o che ajbʼen erman tuʼn Jehová tuʼn t-xi tqʼoʼn junjun tiʼchaq at tajbʼen kye moqa tuʼn kyonin tiʼj Miguel tuʼn tkanet jun taqʼun. Atzun junjuntl maj, o tzʼajbʼen onbʼil in tzaj tqʼoʼn ninja qʼil twitz aqʼuntl tuʼn Jehová tuʼn tonin kyiʼj. Mintiʼ o che kyaj kolin tuʼn Jehová ex tuʼn jlu o chʼiy qʼuqbʼil kykʼuʼj. Tej otoqxi che yolin ermano Miguel tiʼj tzeʼn onin Jehová kyiʼj toj jun ambʼil, tqʼama Yoselin jlu: «In chʼiy qʼuqbʼil nkʼuʼje aj tok nkeʼyine tzeʼn in nonin Jehová qiʼje. In nok Jehová ik tzeʼn jun wamiwe aju kukx jaku chin yoline tukʼil». Ex tqʼamatl jlu: «Aqeju nya bʼaʼn in qo ok weʼye twitz toj ambʼil jaʼlo, in che onin qiʼje tuʼn kyikʼx nya bʼaʼn quʼne toj ambʼil tzul».

6. Qa mintiʼ tpwaqa, ¿tiʼ jaku bʼant tuʼna tuʼn tchʼiy qʼuqbʼil tkʼuʼja?

⁶ ¿Mintiʼpe teya tpwaq toj ambʼil jaʼlo? Qa ikju, kwest ambʼil lu. Maske ikju, jaku tzʼajbʼen ambʼil lu tuʼna tuʼn tchʼiy qʼuqbʼil tkʼuʼja. Naʼna Dios te Jehová, uʼjinktza qe tyol Jesús tkuʼx toj Mateo 6:25 a 34 ex ximana kyiʼj. Ximana tiʼj tzeʼn o tzʼonin Jehová kyiʼj erman toj ambʼil jaʼlo aj in nok kyqʼoʼn kywiʼ tiʼj kyajbʼebʼil te (1 Cor. 15:58). Kʼonil jlu tiʼja tuʼn tok qeʼ tkʼuʼja tiʼj qa kxqʼuqil Jehová tiʼja ik tzeʼn o bʼant  tuʼn kyiʼj junjuntl erman. Ojtzqiʼn tuʼn tiʼ at tajbʼen teya ex ojtzqiʼn tuʼn tzeʼn tzul tqʼoʼn teya. Aj tok tkeʼyina jlu, kchʼiyel qʼuqbʼil tkʼuʼja ex ktel tipumala tuʼn texa kywitz nya bʼaʼn kʼokel weʼya kywitz toj ambʼil tzul (Hab. 3:17, 18).

7. Ik tzeʼn in tzaj tqʼamaʼn Mateo 8:23 a 26, ¿tzeʼn ok qʼuqbʼil kykʼuʼj t-xnaqʼtzbʼen Jesús toj malbʼil tej ttzaj jun kyqʼiqʼ jbʼal?

⁷ Jun maj, tej in bʼettoq Jesús toj bark kyukʼil t-xnaqʼtzbʼen, noq minabʼen tzaj jun kyqʼiqʼ jbʼal. Ajbʼen ambʼil lu tuʼn Jesús tuʼn tonin kyiʼj tuʼn tel kynikʼ tiʼj qa iltoq tiʼj tuʼn tchʼiy qʼuqbʼil kykʼuʼj (kjawil uʼjit Mateo 8:23-26). Tzaj nim kyqʼiqʼ jbʼal ex chʼixme xi mulqʼaj bark toj aʼ, atzunte Jesús in jtantoq. E tzaj xobʼ t-xnaqʼtzbʼen ex i ex kʼasulte tuʼntzun miʼn kykyim. Xi tqʼamaʼn Jesús jlu kye tukʼil kʼujlabʼil: «¿Tiquʼn in che xobʼe aqeye xinaq chʼin kyokslabʼle?». Iltoq tiʼj tuʼn tel kynikʼ t-xnaqʼtzbʼen Jesús tiʼj qa jakutoq kolin Jehová tiʼj Tkʼwal ex kyiʼj qeju ateʼ tukʼil. ¿Tiʼ xnaqʼtzbʼil jaku tzʼel qiʼn tiʼj jlu? In tzaj tyekʼin qa jaku qo ex twitz alkyexku nya bʼaʼn qa kyuw taʼ qʼuqbʼil qkʼuʼj.

8, 9. ¿Tzeʼn ok qʼuqbʼil tkʼuʼj Anel toj malbʼil ex tiʼ onin tiʼj?

⁸ Atzun jaʼlo, qo yolin tiʼj tzeʼn chʼiy qʼuqbʼil tkʼuʼj Anel, jun ermana te Puerto Rico tej tikʼ toj jun nya bʼaʼn. ¿Tiʼ nya bʼaʼn ok weʼ twitz? Tzaj huracán María toj tnam Puerto Rico toj abʼqʼi 2017 ex tuʼn jlu naj tja ex naj taqʼun. Tqʼama Anel jlu: «Nim in tzaj xobʼe tej tbʼaj jlu wiʼje. Pero ok qeʼ nkʼuʼje tiʼj Jehová tej nnaʼne Dios ex mintiʼ xi nqʼoʼne ambʼil tuʼn nkubʼ numje tej ttzaj bʼaj nkʼuʼje».

⁹ Ax ikx tqʼama Anel qa onin tiʼj tej t-xi tbʼiʼn aju tzaj tqʼamaʼn ttnam Jehová te tej tikʼ toj nya bʼaʼn. Tqʼama jlu: «Mintiʼ tzaj bʼaj nkʼuʼje tej t-xi nbʼiʼne aju tzaj tqʼamaʼn ttnam Jehová. Ok nkeʼyine tzeʼn xqʼuqin Jehová wiʼje tej ttzaj kyqʼuqbʼaʼn erman nkʼuʼje ex tej ttzaj kyqʼoʼn junjun tiʼchaq weye». Ex tqʼamatl jlu: «Tzaj tqʼoʼn Jehová mas tiʼchaq weye twitzju kubʼ nximane ex chʼiy qʼuqbʼil nkʼuʼje tuʼn jlu».

10. ¿Tiʼ jaku bʼant tuʼna qa in nok weʼya twitz jun nya bʼaʼn?

¹⁰ ¿In nokpe tilil tuʼna tuʼn texa twitz jun nya bʼaʼn in nikʼ toj tanqʼibʼila? Bʼalo in tzaj nya bʼaʼn tiʼja tuʼn jun xitbʼil tuʼnx twitz txʼotxʼ moqa tuʼn tpaj jun yabʼil tok tiʼja ex mintiʼ bʼiʼn tuʼna tiʼ tuʼn tbʼant tuʼna. Jakulo tzaj bʼaj tkʼuʼja tuʼn jlu, pero miʼn txi tqʼoʼna ambʼil tuʼn tnaj qʼuqbʼil tkʼuʼja tiʼj Jehová. Qʼamanxa te tkyaqilju in kubʼ tnaʼna ex ximana tiʼj tzeʼn o tzʼonin tiʼja toj ambʼil ojtxe tuʼntzun tchʼiy qʼuqbʼil tkʼuʼja (Sal. 77:11, 12). Qa ma bʼant jlu tuʼna, jaku tzʼok qeʼ tkʼuʼja tiʼj qa mlayx kyaj kolina tuʼn Jehová toj ambʼil jaʼlo ex toj ambʼil tzul.

11. ¿Tiquʼn nim toklen tuʼn qnimen kye qeju qʼil twitz aqʼuntl?

 ¹¹ Juntl tiʼ jaku tzʼonin tiʼja tuʼn texa twitz nya bʼaʼn, aju qa ma txi tbʼiʼna aju in tzaj tqʼamaʼn ttnam Jehová ik tzeʼn bʼant tuʼn Anel. Qeʼk tkʼuʼja kyiʼj erman o txi qʼoʼn kyoklen tuʼn Jehová ex Jesús. Atlo maj jaku kubʼ qximen qa nya toj tumel qe tqanil in tzaj qʼoʼn qe kyuʼn erman. Pero bʼaʼn tuʼn ttzaj qnaʼn qa in che tzaj tkʼiwlaʼn Jehová qeju bʼaʼn che nimen. In tzaj tyekʼin Tyol ex aju o bʼaj kyiʼj tmajen qa jaku qo klet qa bʼaʼn qo nimen (Éx. 14:1-4; 2 Crón. 20:17). Ximana tiʼj jlu ex kʼonil tiʼja tuʼn t-xi tbʼiʼna qe tqanil in tzaj tqʼoʼn ttnam Jehová toj ambʼil jaʼlo ex toj ambʼil tzul (Heb. 13:17). Qa ma bʼant jlu tuʼna, mlay tzaj xobʼa aj tul kanin nimxix yajbʼil (Prov. 3:25).

12. Ik tzeʼn in tzaj tqʼamaʼn Lucas 18:1 a 8, ¿tiʼ toklen qʼuqbʼil qkʼuʼj at tukʼilju tuʼn kyikʼx nya bʼaʼn quʼn?

¹² Ojtzqiʼntoq tuʼn Jesús qa kʼokel qʼuqbʼil kykʼuʼj t-xnaqʼtzbʼen toj malbʼil aj tok bʼinchaʼn nya bʼaʼn kyiʼj. Tuʼn tonin kyiʼj tuʼn tikʼx kyuʼn, xi tqʼamaʼn jun txʼolbʼabʼil kye aju in kanet quʼn toj uʼj te Lucas. Yolin tiʼj jun xuʼj viud ok ten kubʼsal twitz jun jwes nya tzʼaqli tuʼn tonin tiʼj. Ok qeʼ tkʼuʼj tiʼj qa kʼoniltoq jwes tiʼj qa kukx ma kubʼsan twitz. Ex atzun jlu bʼaj. ¿Tiʼ xnaqʼtzbʼil in nel qiʼn tiʼj jlu? Tzʼaqli te Jehová, tuʼntzunju tqʼama Jesús jlu: «¿Yajtzunlo te Dios, mlaypelo tzaj tbʼiʼn kyyol qeju skʼoʼmaj tuʼn, aqeju in che kubʼsan twitz qʼijtl ex qonikʼan?» (kjawil uʼjit Lucas 18:1-8). Tqʼamatl Jesús jlu: «Oktzun wule juntl maj, aqine skʼoʼmaj qine tuʼn Dios tuʼn ntene kyukʼil xjal, ¿atxpelo kyokslabʼl xjal twitz txʼotxʼ?». Aj tok bʼinchaʼn nya bʼaʼn qiʼj, nim toklen tuʼn tten qpasens ex tuʼn kukx txi qqanin onbʼil te Jehová tuʼntzun tkubʼ qyekʼin qa at qʼuqbʼil qkʼuʼj ik tzeʼn te xuʼj viud. Qa ma ten qʼuqbʼil qkʼuʼj ik tzeʼn jlu, jaku tzʼok qeʼ qkʼuʼj tiʼj qa kpol ambʼil tuʼn tonin Jehová qiʼj. Ax ikx, bʼaʼn tuʼn tok qeʼ qkʼuʼj tiʼj qa in nonin naʼj Dios qiʼj. Ex at maj, jaku tzaj tzaqʼweʼn qnaʼj Dios toj jun tten mintiʼ ximen quʼn.

13. ¿Tzeʼn onin naʼj Dios tiʼj jun familia tej tok bʼinchaʼn nya bʼaʼn kyiʼj?

¹³ Qo yolin tiʼjju bʼaj tiʼj jun ermana Vero tbʼi ex in nanqʼin toj República Democrática del Congo. Nya testigo de Jehová tchmil ermana lu ex at jun tal te junlo 15 abʼqʼi. Tej kyok tzoqpaj soldad kyiʼj xjal jatumel in che anqʼin, kyoxil i ex oq. Akux in bʼet kyxiʼ, e kanet junjun soldad toj kybʼe ex xi kyqʼamaʼn kye qa mlaytoq chex kytzaqpiʼn ex qa jakutoq che kubʼ bʼyoʼn. Ok ten Vero oqʼel, atzunte tal onin tiʼj tuʼn tchewix tkʼuʼj tej tok ten naʼl Dios ex ajbʼen nim maj tbʼi Jehová tuʼn. Tej tbʼaj naʼn Dios, xi tqanin nejenel  kye soldad jlu te: «Tal txin, ¿alkye xi xnaqʼtzante teya tuʼn tnaʼna Dios?». Xi ttzaqʼweʼn txin jlu: «A ntxuʼye ex in xi nbʼinchaʼne ik tzeʼn in tzaj tqʼamaʼn Mateo 6:9 a 13». Tqʼamatl nejenel jlu te: «Miʼn bʼaj tkʼuʼja, awt Jehová aju Tdiosa xqʼuqin kyiʼje toj bʼe».

14. ¿Tzeʼn jaku tzʼok qʼuqbʼil qkʼuʼj toj malbʼil ex tiʼ kʼonil qiʼj tuʼn tikʼx quʼn?

¹⁴ Aj tok qbʼiʼn qa in bʼaj jlu kyiʼj erman, in nonin qiʼj tuʼn tok qqʼoʼn toklen naʼj Dios. ¿Yajtzun qa nya jun rat in tzaj tzaqʼweʼn qnaʼj Dios moqa nya toj jun tten aju jaku qo jaw labʼin tiʼj? Bʼaʼn tuʼn t-xi qbʼinchaʼn aju bʼant tuʼn xuʼj viud yolin Jesús tiʼj. Kukx qo naʼn Dios ex qeʼk qkʼuʼj tiʼj qa mlay qo kyaj tkolin Jehová ex qa tzul ttzaqʼweʼn qnaʼj Dios toj ambʼil mas bʼaʼn toj twitz. Kukx qqaninx te Jehová tuʼn tonin xewbʼaj xjan qiʼj (Filip. 4:13). Bʼaʼn tuʼn ttzaj tnaʼna qa tzul tqʼoʼn Jehová nim kʼiwlabʼil teya toj ambʼil tzul ex kʼonil jlu tiʼja tuʼn kyikʼ tnaʼl nya bʼaʼn tuʼna. Aj kyikʼx nya bʼaʼn tuʼna tuʼn tonbʼil Jehová, ktel tipumala tuʼn texa kywitz nya bʼaʼn toj ambʼil tzul (1 Ped. 1:6, 7).

15. Ik tzeʼn in tzaj tqʼamaʼn Mateo 17:19 ex 20, ¿tiquʼn mintiʼ bʼant tuʼn tetz kyiʼn t-xnaqʼtzbʼen Jesús demonio toj t-xmilal jun xjal?

¹⁵ Xi tqʼamaʼn Jesús kye t-xnaqʼtzbʼen qa kʼonil qʼuqbʼil kykʼuʼj kyiʼj tuʼn kyex twitz nya bʼaʼn (kjawil uʼjit Mateo 17:19, 20). Otoq tzʼetz kyiʼn t-xnaqʼtzbʼen Jesús demonio toj kyxmilal junjun xjal, pero jun maj mintiʼ bʼant jlu kyuʼn. ¿Tiʼtzun bʼaj? Xi tqʼamaʼn Jesús kye qa iltoq tiʼj tuʼn tten mas qʼuqbʼil kykʼuʼj. Ax ikx xi tqʼamaʼn kye qa jakutoq che ex twitz alkyexku nya bʼaʼn qa ma ten nim qʼuqbʼil kykʼuʼj. Ax jlu jaku bʼaj qiʼj toj ambʼil jaʼlo, jaku qo ex twitz alkyexku nya bʼaʼn.

16. ¿Tzeʼn o tzʼonin qʼuqbʼil tkʼuʼj Geydi tiʼj tuʼn tex twitz jun nya bʼaʼn?

¹⁶ Atzun jaʼlo qo yolin tiʼjju bʼaj tiʼj Geydi, jun ermana in nanqʼin atz Guatemala. Kubʼ bʼyoʼn tchmil, aju Edi tbʼi akux in che meltzʼaj kyja tej tkubʼaj chmabʼil. In tzaj tqʼamaʼn ermana tzeʼn onin qʼuqbʼil tkʼuʼj tiʼj tuʼn tex twitz nya bʼaʼn. Tqʼama jlu: «In kyaj nqʼoʼne qe nbʼise toj tqʼabʼ Jehová aj nnaʼne Dios te ex tuʼn jlu in chewix wanmiye. Ex in nok nqʼoʼn nwitze tiʼj tzeʼn in xqʼuqin wiʼje aj kyajbʼen toj njaye tuʼn ex qe erman. Ax ikx, in nonin wiʼje aj tok nqʼoʼn nwiʼye tiʼj wajbʼebʼile te Jehová ex tuʼn miʼn ttzaj bʼaj nkʼuʼje tiʼjju kʼajbʼel weye. Aju o tzikʼ toj wanqʼibʼile, in tzaj tyekʼin weye qa jaku tzikʼx alkyexku nya bʼaʼn wuʼne toj ambʼil tzul tuʼn tonbʼil Jehová, Jesús ex ttnam».

17. ¿Tiʼ jaku bʼant quʼn aj qok weʼ twitz jun nya bʼaʼn?

¹⁷ ¿Ope kyim jun teya toj tja? Jaku bʼaj tchʼiysaʼna qʼuqbʼil tkʼuʼja aj tjaw tuʼjina qe txʼolbʼabʼil in yolin kyiʼj xjal e jaw anqʼin  juntl maj. ¿In kubʼpe tnaʼna nim bʼis tuʼnju o tzʼex lajoʼn jun toj tjaya toj ttnam Jehová? Bʼaʼn tuʼn t-xnaqʼtzana tiʼj qa in qo tzaj tkawin Jehová tuʼnju kʼujlaʼn qoʼ tuʼn. Noq alkyexku nya bʼaʼn in nok weʼya twitz, bʼaʼn tuʼn tajbʼen ambʼil lu tuʼna tuʼn tchʼiy qʼuqbʼil tkʼuʼja. Qʼamanxa tkyaqilju tkuʼx toj tanmiya te Jehová ex miʼn tzʼel tpan tibʼa kyiʼj erman (Prov. 18:1). Ax ikx, bʼinchama junjun tiʼchaq jaku tzʼonin tiʼja tuʼn tchʼiy qʼuqbʼil tkʼuʼja maske at maj jaku tzaj tbʼisa ex jaku tzʼetz taʼl twitza tuʼn (Sal. 126:5, 6). Miʼn kyaj ttzaqpiʼna tuʼn ttena toj chmabʼil, kukx pakbʼana, kukx uʼjina tiʼj Tyol Dios ex kukx ximana kyiʼj tbʼanel kʼiwlabʼil in tzaj ttziyen Jehová. Aj tok tqʼoʼn twitza tiʼj tzeʼn in nonin Jehová tiʼja, mas kchʼiyel qʼuqbʼil tkʼuʼja.

18. Qa ma tzʼel tnikʼa tiʼj qa naʼmx tchʼiy qʼuqbʼil tkʼuʼja, ¿tiʼ jaku bʼant tuʼna?

¹⁸ Aj t-ximana kyiʼj nya bʼaʼn o tzʼok weʼya twitz, miʼn tzaj bʼaj tkʼuʼja qa in nel tnikʼa tiʼj qa naʼmx tchʼiy qʼuqbʼil tkʼuʼja. Sino bʼaʼn tuʼn tajbʼen ambʼil lu tuʼna tuʼn tbʼaj tchʼiysaʼna qʼuqbʼil tkʼuʼja. Ex qaninxa te Jehová aju xi kyqanin t-xnaqʼtzbʼen Jesús tej kyqʼama jlu: «Qʼontza mastl qokslabʼle» (Luc. 17:5). Ax ikx, bʼaʼn tuʼn tel tpaʼna ambʼil tuʼn t-ximana kyiʼj techel ma qo yolin kyiʼj toj xnaqʼtzbʼil lu. Ik tzeʼn bʼant tuʼn Miguel ex Yurai, aju t-xuʼjil, naʼntza tzeʼn o tzʼonin Jehová tiʼja. Ax ikx, naʼna Dios tuʼn tkyaqil tkʼuʼja aj tok weʼya twitz ambʼil mas kwest ik tzeʼn bʼant tuʼn tal Vero ex ik tzeʼn bʼant tuʼn Anel. Ex kʼamonxa onbʼil tzul tqʼoʼn Jehová teya aj kyajbʼen toj tjaya ex qe erman tuʼn ik tzeʼn bʼant tuʼn Geydi. Qa ma txi tqʼoʼna ambʼil te Jehová tuʼn tonin tiʼja tuʼn texa kywitz nya bʼaʼn toj ambʼil jaʼlo, ax ikx kʼokel qeʼ tkʼuʼja tiʼj qa kʼonil tiʼja tuʼn texa twitz alkyexku nya bʼaʼn toj ambʼil tzul.

19. ¿Tiʼ ok qeʼ tkʼuʼj Jesús tiʼj ex tiʼ jaku tzʼok qeʼ teya tkʼuʼj tiʼj?

¹⁹ El tnikʼ Jesús tiʼj qa iltoq tiʼj tuʼn tchʼiy qʼuqbʼil kykʼuʼj t-xnaqʼtzbʼen, pero ok qeʼ tkʼuʼj tiʼj qa kʼonil Jehová kyiʼj tuʼn kyex twitz nya bʼaʼn (Juan 14:1; 16:33). Ax ikx, ok qeʼ tkʼuʼj tiʼj qa che kjel anqʼin nim kyajlal xjal toj nimxix yajbʼil noq tuʼnju at qʼuqbʼil kykʼuʼj (Apoc. 7:9, 14). ¿Ktelpe teya kyxol xjal lu? Noq tuʼn t-xtalbʼil Jehová, jaku tena kyxol xjal lu qa ma tzʼajbʼen ambʼil tuʼna jaʼlo tuʼn tchʼiy qʼuqbʼil tkʼuʼja (Heb. 10:39).