1, 2. a) ¿Tiquʼn nim toklen tuʼn tok qeʼ kykʼuʼj qeju tzma o che kubʼ mojeʼ tiʼj Jehová? (Salmo 37:3, 4). b) ¿Tiʼ kʼelel qnikʼ tiʼj toj xnaqʼtzbʼil lu?

¿TZMAPE in kubʼ mojeʼya moqa chʼix tkubʼ mojeʼya? Qa ikju, jaku txi qqʼamaʼn qa taja tuʼn ttzalaja tukʼil xjal kʼujlaʼnxix tuʼna. Ax tok, in che tzaj junjun nya bʼaʼn toj mejebʼleʼn. Pero qa tzma in che kubʼ mojeʼ kabʼe xjal, il tiʼj tuʼn kyximen tiʼj tiʼ kbʼantel kyuʼn. Aju alkye tten kyxel kybʼinchaʼne qe tiʼchaq, jaku tzʼonin kyiʼje tuʼn kukx kytzalaje toj nim abʼqʼi. Qa ma tzʼok qeʼ kykʼuʼje tiʼj Jehová, kyjawil kyjyoʼne aju mas tbʼanel, kchʼiyil kʼujlabʼil kyxole ex mas che tzalajele. Qatzun mintiʼ ma che ok lepeʼye kyiʼj consej in tzaj tqʼoʼn Jehová, tzul nya bʼaʼn kyiʼje ex mlay che tzalaje (kjawil uʼjit Salmo 37:3, 4).

² Mas in yolin xnaqʼtzbʼil lu kyiʼj qeju tzma o che kubʼ mojeʼ, pero qo xnaqʼtzan kyiʼj junjun tiʼchaq jaku che ok weʼ mejebʼleʼn twitz. Qo yolin tiʼj techel kyaj kyqʼoʼn junjun tmajen Jehová te ambʼil ojtxe ex kʼelel qnikʼ tiʼj tzeʼn jaku tzʼel qkanoʼn kyiʼj. Ax ikx, kʼelel qnikʼ tiʼj techel in kubʼ kyqʼoʼn junjun mejebʼleʼn toj ambʼil jaʼlo.

3, 4. ¿Alkyeqe nya bʼaʼn jaku che ok weʼ qeju tzma in che kubʼ mojeʼ twitz?

³ Kyoj junjun lugar, jaku txi kyqʼamaʼn xjal kye qeju tzma o che kubʼ mojeʼ tuʼn tten kyanqʼibʼil ik tzeʼn kye txqantl xjal. Jun techel, jaku txi kyqʼamaʼn mambʼaj moqa junjuntl kyfamiliar tuʼn tul naj kykʼwal. Moqa jaku txi kyqʼamaʼn kyamiw kye tuʼn ttzaj kylaqʼoʼn jun kyja ex tuʼn tten tbʼanel tiʼchaq kye.

 ⁴ Qa mintiʼ ma tzʼok kyxqʼuqin kyibʼ mejebʼleʼn, jaku tzʼokx kyqʼon kyibʼ tjaqʼ kʼas maske nya il tiʼj. Tuʼn tchjet kykʼas, il-lo tiʼj tuʼn kyaqʼunan nim or. Tuʼn jlu, ya mlay ten ambʼil kyiʼj tuʼn kyxnaqʼtzan kyjunalx tiʼj Xjan Uʼj, tuʼn kykʼulin junx te Jehová ex tuʼn kypakbʼan. Axpe ikx, bʼalo mlay che ten kyoj kykyaqil chmabʼil noq tuʼn kyaqʼunan mas or ex tuʼn tkanet kypwaq, moqa noq tuʼn miʼn tel qʼiʼn kyaqʼun. Qa ma bʼaj jlu kyiʼj, jaku txi kynajsaʼn tbʼanel ambʼil tuʼn kyajbʼen mas te Jehová.

5. ¿Tiʼ xnaqʼtzbʼil jaku tzʼel tiʼna tiʼjju bʼaj tiʼj Klaus ex Marisa?

⁵ At nim yekʼbʼil tiʼj qa mlay qo tzalaj qa oʼkx ma tzʼok bʼaj qwiʼ kyiʼj tiʼchaq te twitz txʼotxʼ. Atzun jlu el tnikʼ Klaus ex Marisa tiʼj. * Tej kykubʼ mojeʼ, kykabʼil e aqʼunan tkyaqil ambʼil tuʼntzun tten jun tbʼanel kyanqʼibʼil. Pero mintiʼ e tzalaj tuʼn jlu. In tzaj tqʼamaʼn Klaus jlu: «Attoq nim qpwaqe, pero mintiʼ jun tiʼ in bʼanttoq quʼne toj qajbʼebʼile te Jehová. Tuʼn jlu, mas kwest ok qanqʼibʼile ex mas o sikte». Bʼalo ax ikx kyeye o tzʼel kynikʼe tiʼj qa mintiʼ in che tzalaje tuʼnju oʼkx tok kywiʼye kyiʼj tiʼchaq te twitz txʼotxʼ. Pero miʼn tzaj bʼaj kykʼuʼje. Jaku tzʼonin techel in kubʼ kyqʼoʼn txqantl kyiʼje. Tnejel, qo xnaqʼtzan tiʼj tiʼ jaku tzʼel kykanoʼn chmilbʼaj tiʼj aj kawil Jehosafat.

6. Ik tzeʼn in tzaj tqʼamaʼn Proverbios 3:5 ex 6, ¿tiʼ bʼant tuʼn Jehosafat tej tok weʼ twitz jun nya bʼaʼn?

⁶ Aqeye chmilbʼaj, ¿atpe maj in kubʼ kyximane qa in che sikte tuʼn tkyaqilju in bʼant kyuʼne? Qa ikju, jaku tzʼonin techel kyaj tqʼoʼn Jehosafat kyiʼje. Tuʼnju ok qʼoʼn toklen te aj kawil, iltoq tiʼj tuʼn kyok t-xqʼuqin kykyaqil xjal at toj tkwent. Tuʼn tjapun toklen, xi tbʼinchaʼn aju jakutoq bʼant tuʼn tuʼn t-xqʼuqin kyiʼj xjal. Jaw tbʼinchaʼn qe muro tiʼj tnam Judá ex bʼaj tchmoʼn 1 millón tukʼil 160 mil soldad (2 Crón. 17:12-19). Tej tikʼ ambʼil, ok weʼ twitz jun nya bʼaʼn. Kyajtoq xjal te Ammón, Moab ex te Seír tuʼn kyok tzoqpaj kyiʼj toj tja Jehosafat ex kyiʼj xjal (2 Crón. 20:1, 2). ¿Tiʼ bʼant tuʼn Jehosafat? Xi tqanin onbʼil ex tipumal te Jehová ik tzeʼn in tzaj tqʼamaʼn Proverbios 3:5 ex 6 (uʼjinktza). In kanet tbʼanel tnaʼj Dios quʼn toj 2 Crónicas 20:5 a 12. Kyoj versículo lu, in nel qnikʼ tiʼj qa ok qeʼ tkʼuʼj tiʼj Jehová. ¿Tzeʼn tzaj ttzaqʼweʼn Jehová tnaʼj Dios?

7. ¿Tzeʼn tzaj ttzaqʼweʼn Jehová tnaʼj Dios Jehosafat?

⁷ Ajbʼen levita Jahaziel tuʼn Jehová tuʼn ttzaj ttzaqʼweʼn tnaʼj Dios Jehosafat. Tqʼama jlu: «Noq oʼkx bʼix txi kytxolbʼan kyibʼe, ex bʼix che kubʼ txuleʼye, ex  ok kyilaʼye tzaʼn tten che kletele tuʼn Qman» (2 Crón. 20:13-17). Jakutoq kubʼ kyximen xjal qa mintiʼtoq ttxolil jlu. Pero atztoq tzajni tqanil lu tukʼil Jehová ex nya tukʼil jun xjal. Xi tnimen Jehosafat qe yol lu tuʼnju qʼuqlitoq tkʼuʼj tiʼj Jehová. Tej tetz Jehosafat kyukʼil xjal jyol kye aj qʼoj, mintiʼ kubʼ tqʼoʼn qe tbʼanel soldad kywitz, sino e kubʼ nej qe xjal mintiʼ ky-espada qʼiʼn ex in che bʼitzintoq. Kubʼ kyiʼj aj qʼoj kyuʼn ik tzeʼn otoq tzaj ttziyen Jehová te Jehosafat (2 Crón. 20:18-23).

8. ¿Tiʼ xnaqʼtzbʼil jaku tzʼel kyiʼn chmilbʼaj tiʼj techel kyaj tqʼoʼn Jehosafat?

⁸ Aqeye chmilbʼaj, ¿tiʼ xnaqʼtzbʼil jaku tzʼel kyiʼne tiʼj Jehosafat? Aqeye nejni kywitz toj kyjaye tuʼn t-xi kyqʼoʼne aju at tajbʼen kye ex tuʼn jlu in nok tilil kyuʼne tuʼn kyonine kyiʼj ex tuʼn kyok xqʼuqit. Tuʼntzunju, aj in tzaj jun nya bʼaʼn, jakulo kubʼ kyximane qa jaku che exe twitz kyjunalxe. Pero miʼn tzʼok qeʼ kykʼuʼje tiʼj kyexe kyipumal, sino bʼaʼn tuʼn kynaʼne Dios te Jehová ex kyqaninxe kyipumale te. Ax ikx, bʼaʼn tuʼn kynaʼne Dios tukʼil kyxuʼjile. Che jyone onbʼil tukʼil Jehová aj kyxnaqʼtzane tiʼj Tyol ex kyiʼj uʼj in che etz tuʼn ttnam, ex kybʼinxe aju consej in kanet kyuʼne. Bʼalo nya bʼaʼn jaku tzʼela toj kywitz junjun xjal qa ma txi kybʼinchaʼne qe tiʼchaq ik tzeʼn in tzaj tqʼamaʼn Tyol Dios, axpe ikx, jaku tzaj kyqʼamaʼn qa mintiʼ kynabʼile aj tbʼant jlu kyuʼne. Bʼalo jaku tzaj kyqʼamaʼn qa oʼkx jaku che ok kyxqʼuqine toj kyjaye qa at kypwaqe ex qe tiʼchaq kyeye. Pero bʼaʼn tuʼn ttzaj kynaʼne techel kyaj tqʼoʼn Jehosafat, ok qeʼ tkʼuʼj tiʼj Jehová ex kubʼ tyekʼin jlu tukʼil tbʼinchbʼen. Mintiʼ kyaj tkolin Jehová Jehosafat ex ax jlu kbʼantel tuʼn kyukʼile (Sal. 37:28; Heb. 13:5). ¿Tiʼ mas jaku bʼant kyuʼn mejebʼleʼn tuʼn kytzalaj?

9. ¿Tiʼ ok tqʼoʼn profeta Isaías twiʼ tiʼj tukʼil t-xuʼjil?

⁹ Ok tqʼoʼn Isaías ex t-xuʼjil kywiʼ tiʼj kyajbʼebʼil te Jehová. Ok Isaías te profeta ex bʼalo chʼixme axju oklenj bʼant tuʼn t-xuʼjil tuʼnju in tzaj tqʼamaʼn Xjan Uʼj qa ok te jun xuʼj «pakbʼal tyol Dios» (Is. 8:1-4). Mas ok tqʼoʼn mejebʼleʼn lu toklen kykʼulbʼil te Jehová. Tuʼntzunju, jaku txi qqʼamaʼn qa kyaj tqʼoʼn Isaías ex t-xuʼjil jun tbʼanel techel kywitz mejebʼleʼn te ambʼil jaʼlo.

10. Qa ma che xnaqʼtzan mejebʼleʼn kyiʼj profecía toj Tyol Dios, ¿tzeʼn jaku tzʼonin jlu kyiʼj tuʼn kyajbʼen mas te Jehová?

¹⁰ ¿Tzeʼn jaku tzʼel kykanoʼn mejebʼleʼn tiʼj Isaías tukʼil t-xuʼjil? Jaku tzʼel kykanoʼn kyiʼj aj tok kyqʼoʼn kywiʼ tiʼj kyajbʼebʼil te Jehová. Tuʼn tchʼiy qʼuqbʼil kykʼuʼj, jaku che xnaqʼtzan junx kyiʼj profecía tkuʼx toj Biblia ex jaku tzʼok kyqʼoʼn kywitz tiʼj tzeʼn in japun kywiʼ (Tito 1:2). * Jaku che ximen tiʼj tzeʼn jaku che onin tuʼn tjapun twi jun profecía, ik tzeʼn aju tqʼama Jesús toj Mateo 24:14 jatumel in tzaj tqʼamaʼn jlu: «Aju tqanil bʼaʼn lu tiʼj tkawbʼil Dios kxel pakbʼet tuj tkyaqil twitz txʼotxʼ [...]; maxitzun tzul mankbʼil tqʼijlalil». Qa mas ma tzʼok qeʼ tkʼuʼj jun mejebʼleʼn tiʼj qa in  che japun kywi profecía, mas kʼokel tilil kyuʼn tuʼn kyajbʼen te Jehová.

11. ¿Tiʼ bʼant tuʼn Priscila ex Áquila, ex tiquʼn?

¹¹ Aqeju mejebʼleʼn kuʼxun, jaku tzʼel kykanoʼn tiʼj Priscila ex Áquila, jun mejebʼleʼn in nanqʼintoq toj tnam Roma. Ok kybʼiʼn tbʼanel tqanil tiʼj Jesús ex e okslan. Jaku txi qqʼamaʼn qa in che tzalajtoq tiʼj kyanqʼibʼil. Pero noq minabʼen chʼexpaj tkyaqil tej ttzaj tqʼamaʼn emperador Claudio tuʼn kyetz oq aj Judiy toj tnam Roma. Qo ximen tiʼj tiʼ kubʼ tnaʼn Áquila ex Priscila. Kyaj kytzaqpiʼn tkyaqilju attoq kye ex xi kyjyoʼn juntl lugar jatumel tuʼn kyanqʼin ex jatumel jaku che aqʼunan tuʼn kyjaw bʼinchet ja xbʼalun. Tej tbʼaj jlu kyiʼj, mintiʼ kyaj kykolin kyajbʼebʼil te Jehová, sino kukx ok kyqʼoʼn kywiʼ tiʼj Tkawbʼil Dios. Tej kypon toj tnam Corinto, ok tilil kyuʼn tuʼn kyonin kyiʼj okslal ex e onin tiʼj apóstol Pablo tuʼn t-xi qʼuqbʼet kykʼuʼj erman. Tej tbʼet ambʼil, i eʼx ajbʼel toj juntl lugar jatumel kyaj okslal onbʼil toj pakbʼabʼil (Hech. 18:18-21; Rom. 16:3-5). Jaku txi qqʼamaʼn qa ten nim kyaqʼun ex e tzalaj tiʼj kyanqʼibʼil.

12. ¿Tiquʼn bʼaʼn tuʼn tkubʼ kyximen mejebʼleʼn tuʼn tbʼant junjun tiʼchaq kyuʼn toj kyajbʼebʼil te Jehová?

¹² Jaku tzʼel kykanoʼn mejebʼleʼn techel kyaj tqʼoʼn Priscila ex Áquila aj tkubʼ kyqʼoʼn tnejel Tkawbʼil Dios toj kyanqʼibʼil. Akux in yolin jun ermano tukʼil jun ermana, atzun ambʼil mas tbʼanel jaku che yolin tiʼj tiʼ kyaj tuʼn tbʼant kyuʼn. Aj tkubʼ t-ximen jun mejebʼleʼn tuʼn tbʼant jun tiʼ tuʼn toj kyajbʼebʼil te Jehová ex qa ma japun kyuʼn, mas kʼokel kyqʼoʼn kywitz tiʼj onbʼil in tzaj tqʼoʼn xewbʼaj xjan (Ecl. 4:9, 12). Qo yolin tiʼjju bʼant tuʼn Russell ex Elizabeth. Tqʼama Russell jlu: «Tej tzmatoq in nok qojtzqin qibʼe, o yoline tiʼj tiʼ qajtoqe tuʼn tbʼant quʼne toj qajbʼebʼile te Jehová». Atzunte Elizabeth tqʼama jlu: «O yoline tiʼj jlu tuʼntzun miʼn tel kyiʼn junjuntl tiʼchaq ambʼil qeye tuʼn tjapun twi  qximbʼetze». Tuʼn jlu, bʼant tuʼn kyxiʼ ajbʼel toj tnam Micronesia tuʼntzun kyonin kyiʼj erman toj pakbʼabʼil.

13. Ik tzeʼn in tzaj tqʼamaʼn Salmo 28:7, ¿tiʼ kbʼajel qa ma tzʼok qeʼ qkʼuʼj tiʼj Jehová?

¹³ Ik tzeʼn bʼant tuʼn Russell ex Elizabeth, ateʼ nim mejebʼleʼn in kubʼ kyximen tuʼn kyanqʼin kyukʼil nya nim tiʼchaq tuʼntzun tten ambʼil kyiʼj tuʼn kypakbʼan ex tuʼn kyqʼon xnaqʼtzbʼil. Qa ma kubʼ kyximen mejebʼleʼn tuʼn tbʼant mas tiʼchaq kyuʼn toj kyajbʼebʼil te Jehová ex qa ma tzʼok tilil kyuʼn tuʼn tjapun twi kyximbʼetz, ktzajel kykʼamoʼn nim kʼiwlabʼil. Kʼokel kyqʼoʼn kywitz tiʼj tzeʼn kxqʼuqil Jehová kyiʼj, mas kʼokel qeʼ kykʼuʼj tiʼj ex che tzalajel (kjawil uʼjit Salmo 28:7).

14. ¿Tzeʼn kubʼ tyekʼin apóstol Pedro tukʼil t-xuʼjil qa ok qeʼ kykʼuʼj kyiʼj yol tkuʼx toj Mateo 6:25, 31 a 34?

¹⁴ Ax ikx, kyaj tqʼoʼn apóstol Pedro ex t-xuʼjil jun tbʼanel techel kywitz mejebʼleʼn. Tej tikʼ qaq xjaw moqa jun abʼqʼi toklen tojtzqiʼn Pedro Jesús, xi tqʼoʼn txokbʼil tiʼj tuʼn tok lepeʼ tiʼj toj tkyaqil ambʼil. Pero in naqʼunantoq Pedro tuʼn kytzyet pescad tuʼn kykʼaʼchit toj tja, tuʼntzunju ximen tiʼj tiʼ tuʼn tbʼant tuʼn (Luc. 5:1-11). Kubʼ t-ximen tuʼn tok lepeʼ tiʼj Jesús tuʼn tpakbʼan tukʼil. ¡Tbʼanel aju jaw tjyoʼn! Ax ikx, jaku txi qqʼamaʼn qa onin t-xuʼjil tiʼj. ¿Tiquʼn? Tuʼnju in tzaj tqʼamaʼn Tyol Dios qa tej otoqxi jaw anqʼin Jesús, bʼet t-xuʼjil Pedro tukʼil toj jun ambʼil (1 Cor. 9:5). Tuʼnju onin t-xuʼjil apóstol Pedro tiʼj tuʼn tkubʼ kyqʼoʼn jun tbʼanel techel kywitz txqantl, bʼant tuʼn t-xi tqʼoʼn apóstol Pedro consej kye chmilbʼaj ex kye xuʼjilbʼaj (1 Ped. 3:1-7). Tuʼn jlu in nel qnikʼ tiʼj qa ok qeʼ tkʼuʼj apóstol Pedro tukʼil t-xuʼjil tiʼj qa tzul tqʼoʼn Jehová aju at tajbʼen kye qa ma kubʼ kyqʼoʼn tnejel Tkawbʼil toj kyanqʼibʼil (kjawil uʼjit Mateo 6:25, 31-34).

15. ¿Tiʼ xnaqʼtzbʼil jaku tzʼel tiʼna tiʼjju bʼant tuʼn Tiago ex Esther?

¹⁵ ¿Yajtzun qa ma tzikʼ nim abʼqʼi kykubʼlen mojeʼye? ¿Tiʼ jaku bʼant kyuʼne tuʼn kukx kyajbʼene mas te Jehová? Jun tumel, jaku tzʼok kykeʼyine tiʼ o bʼant kyuʼn junjuntl mejebʼleʼn. Jun techel, jaku jaw kyuʼjine kʼloj xnaqʼtzbʼil tok tbʼi, «Tuʼn tkyaqil kykʼuʼj i eʼx ajbʼel». Atzun jlu bʼant tuʼn Tiago ex Esther, jun mejebʼleʼn te tnam Brasil. E onin xnaqʼtzbʼil lu kyiʼj tuʼn kyxiʼ ajbʼel jatumel kyaj erman onbʼil. Tqʼama Tiago jlu: «Tej tjaw quʼjine tzeʼn in nonin Jehová kyiʼj tmajen toj ambʼil jaʼlo, kubʼ qximane tuʼn qajbʼene mas ambʼil te Jehová tuʼntzun tok qkeʼyine tzeʼn jaku tzʼonin qiʼje ex tzeʼn jaku tzaj tyekʼin qbʼeye». Tej tbʼet ambʼil, xiʼ mejebʼleʼn ajbʼel toj tnam Paraguay ex atxix toj 2014 in che ajbʼen toj yol portugués. In tzaj tqʼamaʼn Esther jlu: «Jun texto qgane qkabʼile, a Efesios 3:20. O tzʼok qkeʼyine nim maj tzeʼn in japun kywi yol lu toj qajbʼebʼile te Jehová». Toj uʼj xi ttzʼibʼin apóstol Pablo kye aj Éfeso, tqʼama qa in tzaj tqʼoʼn Jehová mas tiʼchaq qe twitzju in xi qqanin. Ex kukx in che japun kywi yol lu.

16. Qa tzma kuʼxun qe mejebʼleʼn, ¿alqe jaku txi kyqanin junjun consej tuʼntzun tkubʼ kyximen tiʼ kbʼantel kyuʼn?

¹⁶ Qa tzma kuʼxun qeye ex o che kubʼ  mojeʼye, jaku tzʼel kyiʼne tbʼanel xnaqʼtzbʼil kyiʼj qeju o tzʼok qeʼ kykʼuʼj tiʼj Jehová. Ateʼ junjun mejebʼleʼn o che ajbʼen te Jehová toj tkyaqil ambʼil kyoj nim abʼqʼi. Jaku txi kyqanine junjun consej kye tuʼn tel kynikʼe tiʼj tiʼ mas jaku bʼant kyuʼne. Atzun juntl tumel tuʼn tkubʼ kyyekʼine qa in nok qeʼ kykʼuʼje tiʼj Jehová (Prov. 22:17, 19). Ax ikx, jaku che onin ansyan kyiʼje tuʼn tkubʼ kyximane tuʼn tbʼant mas tiʼchaq kyuʼne toj kyajbʼebʼile te Jehová ex tuʼn tjapun twi kyximbʼetze.

17. ¿Tiʼ bʼaj tiʼj Klaus ex Marisa, ex tiʼ xnaqʼtzbʼil in nel qiʼn kyiʼj?

¹⁷ Aj tkubʼ qximen tuʼn qajbʼen mas ambʼil te Jehová, at maj junxitl in bʼaj twitzju in kubʼ qximen. Qo yolin juntl maj tiʼjju bʼant tuʼn Klaus ex Marisa. Tej tikʼ oxe abʼqʼi kykubʼlen mojeʼ, kyaj kyqʼoʼn kyja ex xi kyqʼamaʼn tuʼn kyxiʼ onil tuʼn tjaw bʼinchet ninja te Finlandia. Noqtzun tuʼnj, ok kybʼiʼn qa mlaytoq che kyaj ten mas te qaq xjaw ex tzaj kybʼis tuʼn jlu. Pero tej tikʼ chʼin ambʼil, tzaj qʼoʼn txokbʼil kyiʼj tuʼn tbʼant kyyolin toj yol árabe. Atzun jaʼlo in che tzalaj tuʼnju in che ajbʼen toj yol árabe toj juntl tnam. Aj in tzaj kynaʼn aju o bʼaj, tqʼama Marisa jlu: «In tzaj xobʼa tuʼn tetza jatumel in nanqʼina ex tuʼn tok qeʼ tkʼuʼja tiʼj Jehová. Pero o tzʼel nnikʼe tiʼj qa kukx in nonin Jehová qiʼj toj jun tten mintiʼ ximen quʼn. Tuʼnju o tzikʼ qiʼje, mas o chʼiy qʼuqbʼil nkʼuʼje tiʼj Jehová». Tuʼn jlu in nel qnikʼ tiʼj qa kukx che tzajel tkʼiwlaʼn Jehová qeju in nok qeʼ kykʼuʼj tiʼj tuʼn tkyaqil kyanmi.

18. ¿Tiʼ jaku bʼant kyuʼn mejebʼleʼn tuʼn kukx tok qeʼ kykʼuʼj tiʼj Jehová?

¹⁸ Jun oyaj mejebʼleʼn tuʼn Jehová ex taj tuʼn kytzalaj xjal tiʼj (Prov. 5:18; Mat. 19:5, 6). Qa o che kubʼ mojeʼye ex tzma kuʼxun qeye, bʼaʼn tuʼn kyximane tiʼj tiʼ in bʼant kyuʼne toj kyanqʼibʼile. ¿In kubʼpe kyyekʼine te Jehová qa in xi kyqʼoʼne chjonte te tiʼj tkyaqilju o tzaj tqʼoʼn kyeye? Che naʼne Dios, kyjyonxe toj Biblia qe nabʼil jaku che onin kyiʼje ex kybʼinxe aju in tzaj tqʼamaʼn Jehová kyeye. Qa ma tzʼok kyqʼoʼn kywiʼye tiʼj kyajbʼebʼile te Jehová, jaku tzʼok qeʼ kykʼuʼje tiʼj qa che tzalajele toj kymejebʼleʼne.