1, 2. ¿Tiquʼn nim toklen tuʼn tkubʼ qyekʼin qkʼujlabʼil tzʼaqli qxolx?

AT NIM tiquʼn tuʼn tkubʼ qyekʼin qkʼujlabʼil tzʼaqli qxolx. In che kanet junjun quʼn kyoj taqikʼ Tyol Dios lu: «Miʼn kyaj tkolina aju kʼujlalil ex ju yol axix tok [...]; qa ma tbʼinchaya ikju, ktzalajel Dios tiʼja ax ikx qe xjal». «Aju xjal bʼaʼn qʼaqʼan tkʼuʼj [moqa at tkʼujlabʼil] tiʼj juntl in tzaj tiʼn bʼaʼn tibʼajx». Ex «aju xjal nnoʼk tilil tuʼn tuʼn tbʼet tuj tumel ex tuʼn tten tkʼujlalil in knet chwinqlal tuʼn» (Prov. 3:3, 4; 11:17, 21:21).

² Kyoj texto lu, in tzaj tyekʼin oxe tiquʼn tuʼn tkubʼ qyekʼin qkʼujlabʼil tzʼaqli. Tnejel, mas tbʼanel in qo ela toj twitz Jehová. Tkabʼin, in nonin qiʼjx. Jun techel, jaku che ten qamiw te jumajx. Ex toxin, che tzajel qkʼamoʼn kʼiwlabʼil toj ambʼil tzul, kyxol jlu, tzul qʼoʼn qchwinqlal te jumajx. Tuʼn jlu, in nel qnikʼ tiʼj qa nim toklen tuʼn t-xi qbʼiʼn consej jlu: «Aju qajbʼil tiʼj jun xjal, oʼkx tuʼn tten tkʼujlalil» (Prov. 19:22).

3. ¿Alkyeqe xjel kxel qqʼoʼn tzaqʼwebʼil kyiʼj toj xnaqʼtzbʼil lu?

³ Toj xnaqʼtzbʼil lu, kxel qqʼoʼn tzaqʼwebʼil kyiʼj kyaje xjel. Tnejel, ¿alqiʼj kbʼel qyekʼin qkʼujlabʼil tzʼaqli? Tkabʼin, ¿tiʼ in tzaj tyekʼin uʼj te Rut qe tiʼj kʼujlabʼil tzʼaqli? Toxin, ¿tzeʼn jaku kubʼ qyekʼin kʼujlabʼil lu toj ambʼil jaʼlo? Ex tkyajin, ¿tiʼ tbʼanel tzul qe qa ma bʼant jlu quʼn?

4. ¿Tzeʼn in nel qkanoʼn tiʼj tkʼujlabʼil Jehová tzʼaqli? (Marcos 10:29, 30).

⁴ Ik tzeʼn el qnikʼ tiʼj toj xnaqʼtzbʼil ma kyaj, oʼkx in  kubʼ tyekʼin Jehová tkʼujlabʼil tzʼaqli kyiʼj qeju in che ajbʼen te (Dan. 9:4). Tuʼntzunju, qaj tuʼn t-xi qbʼinchaʼn aju in tzaj tqʼamaʼn Efesios 5:1: «Kykanoʼmile tiʼj Dios, porke tkʼwaʼl Dios qeye, kʼujlaʼnxix qeye tuʼn». Ikju, nim toklen tuʼn kyok qkʼujlaʼn erman te jumajx (kjawil uʼjit Marcos 10:29, 30).

5, 6. ¿Tiquʼn junxitl kʼujlabʼil in kubʼ kyyekʼin xjal kyiʼj txqantl twitzju kʼujlabʼil tzʼaqli?

⁵ Qa mas ma tzʼel qnikʼ tiʼj tiʼ aju kʼujlabʼil tzʼaqli, mas kbʼel qyekʼin kyiʼj erman. Tuʼntzunju, qo xnaqʼtzan tiʼj jun techel tuʼn tel qnikʼ tiʼj tiʼ t-xilen tuʼn tten qkʼujlabʼil tzʼaqli ex tiʼ t-xilen tuʼn tten qkʼujlabʼil.

⁶ Tuʼn tel qnikʼ tiʼj tzeʼn in kubʼ kyyekʼin xjal kykʼujlabʼil kyiʼj txqantl, qo yolin tiʼjju bʼaj tiʼj jun kʼloj xjal chʼixmi e kux mulqʼaj toj mar, kyxol jlu ten apóstol Pablo. Xi tiqan mar kye toj isla te Malta. Tej tbʼaj jlu, kubʼ kyyekʼin xjal te Malta tbʼanel kymod kyiʼj maske mintiʼ ojtzqiʼn kywitz kyuʼn ex nyatoq il tiʼj tuʼn tbʼant kyuʼn. Pero kubʼ kyyekʼin kykʼujlabʼil kyiʼj (Hech. 28:2, 7). Tbʼanel tej tkubʼ kyyekʼin kykʼujlabʼil, noqtzun tuʼnj, nyatoq ximen kyuʼn. Tuʼn jlu, kubʼ kyyekʼin qa at kykʼujlabʼil, pero nya aju kʼujlabʼil tzʼaqli.

7, 8. a) ¿Tiʼ in nonin tiʼj jun xjal tuʼn tkubʼ tyekʼin tkʼujlabʼil tzʼaqli? b) ¿Tiquʼn qo xnaqʼtzal kyiʼj junjun txol yol tkuʼx toj uʼj te Rut?

⁷ Junxitl aju kʼujlabʼil in kubʼ kyyekʼin xjal kyiʼj junjuntl twitzju kʼujlabʼil tzʼaqli. ¿Tiquʼntzun kubʼ kyyekʼin tmajen Dios te ambʼil ojtxe kykʼujlabʼil tzʼaqli? Mintiʼ e ok obligarin tuʼn tkubʼ kyyekʼin, sino kubʼ kyyekʼin tuʼn tkyaqil kykʼuʼj. Qo xnaqʼtzan tiʼjju bʼaj tiʼj David. Tzaj anqʼin toj tanmi tuʼn tkubʼ tyekʼin tkʼujlabʼil tiʼj Jonatán, aju tamiw maske tajtoq tman Jonatán tuʼn tkubʼ tbʼyoʼn David. Tej tikʼ ambʼil, kukx kubʼ tyekʼin David tkʼujlabʼil tzʼaqli tiʼj Mefibóset, aju tkʼwal Jonatán (1 Sam. 20:9, 14, 15; 2 Sam. 4:4; 8:15; 9:1, 6, 7).

⁸ Jaku tzʼel mas qnikʼ tiʼj kʼujlabʼil tzʼaqli aj qxnaqʼtzan kyiʼj junjun txol yol tkuʼx toj uʼj te Rut. ¿Tiʼ xnaqʼtzbʼil jaku tzʼel qiʼn tiʼj kʼujlabʼil tzʼaqli kubʼ kyyekʼin xjal in yolin uʼj te Rut tiʼj? ¿Tzeʼn jaku kubʼ qyekʼin kʼujlabʼil lu kyiʼj erman jatumel in nok qchmon qibʼ? *

9. ¿Tiquʼn kubʼ t-ximen Noemí qa otoq tzaj tqʼoj Dios tiʼj?

⁹ In yolin uʼj te Rut tiʼjju bʼaj tiʼj Noemí. Ax ikx, in yolin tiʼjju bʼaj tiʼj Rut, aju tlibʼ Noemí ex tiʼj Boaz, aju kʼujlaʼntoq Dios tuʼn ex kyfamiliar kyibʼ tukʼil tchmil Noemí. Tuʼnju tzaj weʼyaj toj tnam Israel, xiʼ Noemí tukʼil tchmil ex qe kabʼe kykʼwal anqʼil toj tnam Moab. Toj tnam aju kyim tchmil Noemí. E kubʼ mojeʼ kabʼe tal, pero ax ikx kye e kyim (Rut 1:3-5; 2:1). Tej tbʼaj tkyaqil jlu tiʼj Noemí, tzaj nim tbʼis. Tuʼn jlu, kubʼ t-ximen qa otoq tzaj tqʼoj Dios tiʼj. Qbʼinx tiʼ tqʼama tiʼj Dios. Tqʼama jlu: «Ate Qman ma tzaj samante nim yajbʼil weye, [...] ate Dios, aju at tipumal tuʼn tbʼant tkyaqil tuʼn, ma tzaj tqʼoʼn jun yajbʼil maʼxix wibʼaje». Ax ikx, tqʼamatl jlu: «Ma tzaj yajbʼil ex nim mya bʼaʼn wiʼje tuʼn Qman aju at tipumal tuʼn tbʼant tkyaqil tuʼn» (Rut 1:13, 20, 21).

10. ¿Tiʼ bʼant tuʼn Jehová tej tqʼama Noemí qe yol nya toj tumel?

¹⁰ ¿Tiʼ bʼant tuʼn Jehová tej tqʼama  Noemí qe yol nya toj tumel? Mintiʼ kyaj tkolin, sino el tnikʼ tiʼj tej tok tkeʼyin qa in nikʼ toj bʼis. Ojtzqiʼn tuʼn Jehová qa «in tzpet tnabʼl xjal at tnabʼl» aj tikʼ toj nya bʼaʼn (Ecl. 7:7). Maske ikju, tajtoq Noemí onbʼil tuʼn tel tnikʼ tiʼj qa kukx at Jehová tukʼil. ¿Tiʼ bʼant tuʼn Jehová tuʼn tonin tiʼj? (1 Sam. 2:8). Ajbʼen Rut tuʼn tuʼn tkubʼ tyekʼin tkʼujlabʼil tzʼaqli tiʼj. Tukʼil tbʼanel tmod, onin tiʼj tlibʼ tuʼn tten t-ximbʼetz toj tumel ex tuʼn kukx tten tamiwbʼil tukʼil Jehová. ¿Tiʼ xnaqʼtzbʼil jaku tzʼel qiʼn tiʼjju bʼant tuʼn Rut?

11. ¿Tiquʼn in che onin nim erman kyiʼj qeju in che bʼisun?

¹¹In nonin qkʼujlabʼil tzʼaqli qiʼj tuʼn qonin kyiʼj qeju in che bʼisun. Ik tzeʼn bʼant tuʼn Rut tiʼj Noemí, ax ikx jaʼlo ateʼ nim erman in che onin kyiʼj qeju in che bʼisun. Kʼujlaʼn qe erman kyuʼn ex in nok tilil kyuʼn tuʼn kyonin kyiʼj (Prov. 12:25, 24:10). Tuʼn jlu, in che ok lepeʼ tiʼj consej tqʼama apóstol Pablo. Tqʼama jlu: «Tuʼn t-xi kyqʼuqbʼaʼne kykʼuʼj qeju chʼin kykʼuʼj; ex che onine kyiʼj qeju mintiʼ kyipun, ex tenx kypasense kyiʼj kykyaqil» (1 Tes. 5:14).

12. ¿Tiʼ jaku bʼant quʼn tuʼn qonin tiʼj jun erman in bʼisun?

¹² Chʼixme tkyaqil maj, mas in nonin tiʼj jun erman in bʼisun aj tok qqʼoʼn qwiʼ tiʼj tyol ex aj t-xi qqʼamaʼn te qa kʼujlaʼn quʼn. In nok tqʼoʼn Jehová twitz tiʼjju in bʼant quʼn aj qonin tiʼj jun t-ẍneʼl (Sal. 41:1). In tzaj tqʼamaʼn Proverbios 19:17 jlu: «Aju xjal in xi tqʼoʼn tkotz jun xjal mebʼa, mer ik tzaʼn tchʼex Qman in xi tqʼoʼn, ex tuʼnx Qman kʼajel tqʼoʼn t-xel te».

13. ¿Tiquʼn junxitl aju bʼant tuʼn Rut twitzju bʼant tuʼn Orpá, ex tzeʼn kubʼ tyekʼin tkʼujlabʼil tzʼaqli? (Qʼonka twitza tiʼj tilbʼilal tok tiʼj t-xkʼomil).

¹³ Tuʼn tel qnikʼ tiʼj tiʼ aju kʼujlabʼil tzʼaqli, qo xnaqʼtzan tiʼjju bʼaj tiʼj Noemí tej otoqxi kyim tchmil ex qe kabʼe tal. Tej tok tbʼiʼn Noemí «qa otoq tzaj qʼaqʼan tkʼuʼj Qman kyiʼj aj Israel, ex ya mintiʼtoq weʼyaj tuj txʼotxʼ Judá», kubʼ t-ximen tuʼn tmeltzʼaj toj ttnam (Rut 1:6). Ax ikx kye tlibʼ e ok lepeʼ tiʼj. Akux in bʼet kyxiʼ, oxe maj xi tqʼamaʼn Noemí kye tuʼn kymeltzʼaj toj tnam Moab. ¿Tiʼtzun bʼaj? In tzaj tqʼamaʼn txʼolbʼabʼil jlu: «Bʼajtzun tqʼolbʼen tibʼ Orfa tukʼil tlibʼ ex el ttzʼubʼan twitz; atzunte Rut ax kyaj ten tukʼil tlibʼ» (Rut 1:7-14). Xi tbʼiʼn Orpá aju xi tqʼamaʼn Noemí te ex meltzʼaj toj tnam Moab. Atzunte Rut nimxix onin tiʼj tlibʼ. Jakutoq meltzʼaj tja, pero mintiʼ bʼant jlu tuʼn tuʼnju kubʼ tyekʼin tkʼujlabʼil tzʼaqli tiʼj Noemí ex tajtoq tuʼn tonin tiʼj (Rut 1:16, 17). Kubʼ t-ximen tuʼn tkyaj ten tukʼil, mintiʼ ok obligarin tuʼn tbʼant  jlu tuʼn, sino xi tbʼinchaʼn tuʼn tkyaqil tkʼuʼj. ¿Tiʼ xnaqʼtzbʼil in nel qiʼn tiʼj txʼolbʼabʼil lu?

14. a) ¿Tiʼ o kubʼ kyximen nim erman tuʼn tbʼant kyuʼn? b) Ik tzeʼn in tzaj tqʼamaʼn Hebreos 13:16, ¿alkyeqe oyaj tbʼanel in che ela toj twitz Jehová?

¹⁴In xi qbʼinchaʼn junjuntl tiʼchaq tuʼn qkʼujlabʼil tzʼaqli. Ik tzeʼn bʼaj toj ambʼil ojtxe, ax ikx toj ambʼil jaʼlo ateʼ nim erman in kubʼ kyyekʼin kykʼujlabʼil tzʼaqli kyiʼj txqantl, axpe ikx kyiʼj qeju mintiʼ ojtzqiʼn kywitz kyuʼn. Jun techel, aj tok kybʼiʼn qa otoq tzaj jun xitbʼil tuʼnx twitz txʼotxʼ, jun rat in xi kyqanin tzeʼn jaku che onin. Moqa aj tok kybʼiʼn qa mintiʼ tpwaq jun erman, in nok tilil kyuʼn tuʼn kyonin tiʼj. In nel kykanoʼn tiʼj techel kubʼ kyqʼoʼn okslal te Macedonia, «xi kyqʼoʼn chʼintl» tibʼajju jakutoq bʼant kyuʼn (2 Cor. 8:3). Ax jlu in bʼant kyuʼn erman toj ambʼil jaʼlo, in xi kyqʼoʼn chʼintl tibʼajju jaku bʼant kyuʼn. In bʼant junxichaq tiʼ kyuʼn tuʼn kyonin kyiʼj txqantl. Jaku txi qqʼamaʼn qa in tzalaj Jehová tuʼnju in kubʼ kyyekʼin kykʼujlabʼil tzʼaqli (kjawil uʼjit Hebreos 13:16).

15, 16. ¿Tzeʼn kubʼ tyekʼin Rut qa mintiʼ sikt?

¹⁵ Jaku tzʼel qiʼn nim tbʼanel xnaqʼtzbʼil tiʼjju bʼaj tiʼj Rut ex tiʼj Noemí. Qo xnaqʼtzan kyiʼj junjun.

¹⁶Miʼn qo sikt. Tej t-xi tqʼamaʼn Rut te Noemí tuʼn t-xiʼ tukʼil toj Judá, tqʼama Noemí qa mas bʼaʼn tuʼn tmeltzʼaj. Noqtzun tuʼnj, mintiʼ sikt Rut. ¿Tiʼ tzaj tuʼn jlu? «Tejtzun tel tnikʼ Noemí tiʼj qa axix tok otoq kubʼ t-ximan Rut tuʼn tok lpeʼ tiʼj, ya mintiʼ qʼajt» (Rut 1:15-18).

17. ¿Tiʼ kʼonil qiʼj tuʼn kukx tkubʼ qyekʼin qkʼujlabʼil tzʼaqli?

¹⁷Aju xnaqʼtzbʼil jaku tzʼel qiʼn tiʼj. Nim toklen tuʼn tten qpasens aj qonin kyiʼj qeju in che bʼisun, pero mintiʼ tuʼn qsikt. Jun techel, bʼalo jaku txi qqʼamaʼn te jun erman tuʼn qonin tiʼj, pero nya taj. Maske ikju, kukx qo tel tukʼil tuʼnju qaj tuʼn tkubʼ qyekʼin qkʼujlabʼil tzʼaqli (Gál. 6:2). Ax ikx, bʼaʼn tuʼn qximen tiʼj qa kxel tkʼamoʼn erman onbʼil aj tbʼet ambʼil.

18. ¿Tiquʼn jaku txi qqʼamaʼn qa tzaj tbʼis Rut?

¹⁸Miʼn kubʼ qximen jun tiʼ nya toj tumel. Tej tpon Rut ex Noemí toj tnam Belén, yolin Noemí kyukʼil junjun xjal ojtzqiʼntoq kywitz tuʼn ex xi tqʼamaʼn jlu kye: «Tej wexe tzalu, nimku xi wiʼne, ex tej ma chin ul meltzʼaje, mintiʼ chʼin qʼiʼn wuʼne, tuʼnju iklo tajbʼil Qman» (Rut 1:21). ¿Jakupe kubʼ qximen tiʼ kubʼ tnaʼn Rut tej tok tbʼiʼn qe tyol tlibʼ? Otoq tzʼok tilil tuʼn tuʼn tonin tiʼj, otoq tzʼoqʼ tukʼil, otoq txi tqʼuqbʼaʼn tkʼuʼj ex otoq bʼet tukʼil toj nimku qʼij. Maske ikju, tqʼama Noemí jlu: «Mintiʼ chʼin qʼiʼn wuʼne, tuʼnju iklo tajbʼil Qman». Maske attoq Rut tukʼil, bʼalo mintiʼ ok tqʼoʼn toklen onbʼil xi tqʼoʼn te. Jaku txi qqʼamaʼn qa tzaj tbʼis Rut tuʼn jlu, pero kukx ten tukʼil Noemí.

19. ¿Tiʼ jaku tzʼonin qiʼj tuʼn kukx qten tukʼil jun erman in bʼisun?

¹⁹Aju xnaqʼtzbʼil jaku tzʼel qiʼn tiʼj. Bʼalo jaku tzaj tqʼamaʼn jun erman jun tyol nya toj tumel maske otoq tzʼok tilil quʼn tuʼn qonin tiʼj. Pero miʼn kubʼ qximen jun tiʼ nya toj tumel tiʼj. Kukx qo tel tukʼil ex bʼaʼn tuʼn t-xi qqanin te Jehová tuʼn tonin qiʼj tuʼn tkanet tumel quʼn tuʼn t-xi qqʼuqbʼaʼn tkʼuʼj (Prov. 17:17).

20. ¿Tiʼ onin tiʼj Rut tuʼn tten tipumal tuʼn kukx tok tilil tuʼn?

 ²⁰Qqʼuqbʼanx kykʼuʼj qeju kyaj onbʼil. Otoq kubʼ tyekʼin Rut tkʼujlabʼil tzʼaqli tiʼj Noemí, pero ax ikx te tajtoq qʼuqbʼil tkʼuʼj. Tuʼntzunju, ajbʼen Boaz tuʼn Jehová tuʼn t-xi tqʼamaʼn qe tbʼanel yol lu te: «Awt Qman qʼonte t-xel teya. Aju Qman aju Qdios aj Israel qoʼ, awttzun qʼonte jun oyaj teya tiʼj tkyaqilju bʼaʼn ma tbʼinchaya, tuʼnju ma tzʼok qeʼ tkʼuʼja tiʼj tuʼn tkleta». Kuʼpin qe yol lu toj tanmi Rut. Xi ttzaqʼweʼn jlu te Boaz: «Ma qʼuqbʼanjtz nkʼuʼje tuʼn tyola, ex ma yolina wukʼile tukʼil tkʼujlalila» (Rut 2:12, 13). Kyuʼn tbʼanel tyol Boaz, ten tipumal Rut tuʼn kukx tok tilil tuʼn.

21. Ik tzeʼn in tzaj tqʼamaʼn Isaías 32:1 ex 2, ¿tiʼ kbʼantel kyuʼn ansyan tuʼnju at kykʼujlabʼil?

²¹Aju xnaqʼtzbʼil jaku tzʼel qiʼn tiʼj. Aqeju in kubʼ kyyekʼin kykʼujlabʼil tzʼaqli, ax ikx kyaj tuʼn t-xi qʼuqbʼet kykʼuʼj. Xi tqʼamaʼn Boaz tbʼanel yol te Rut tuʼnju otoq kubʼ tyekʼin tbʼanel tmod tiʼj Noemí. Ax jlu in bʼant kyuʼn ansyan toj ambʼil jaʼlo, in xi kyqʼamaʼn tbʼanel yol kye erman in che onin kyiʼj txqantl. Aj t-xi qʼamet tbʼanel yol kye, in nonin kyiʼj tuʼn tten kyipumal tuʼn kukx tok tilil kyuʼn (kjawil uʼjit Isaías 32:1, 2).

22, 23. ¿Alkye chʼixpubʼil bʼant tuʼn Noemí ex tiʼ onin tiʼj tuʼn tbʼant tuʼn? (Salmo 136:23, 26).

²² Tej tikʼ ambʼil, ok tilil tuʼn Boaz tuʼn tten aju at tajbʼen te Rut ex Noemí (Rut 2:14-18). ¿Tiʼ kubʼ tnaʼn Noemí tej tkubʼ tyekʼin Boaz tbʼanel tmod kyiʼj? Tqʼama jlu: «Awt Qman kyʼiwlante xinaq lu. Ate Dios ma tbʼincha xtalbʼil qe ik tzaʼn o tbʼincha ojtxi kye qtzan qchmil» (Rut 2:20a). Otoq chʼexpaj tmod Noemí. Tnejel, tqʼama jlu:  «Ate Qman ma tzaj samante nim yajbʼil weye». Pero yajxitl, tqʼama qa otoq kubʼ tyekʼin Jehová t-xtalbʼil moqa tkʼujlabʼil tzʼaqli kyiʼj. ¿Tiʼ onin tiʼj tuʼn tchʼexpaj t-ximbʼetz?

²³ Pon ambʼil tuʼn tel tnikʼ Noemí tiʼj qa in nonintoq Jehová tiʼj. Ajbʼen Rut tuʼn Jehová tuʼn tonin tiʼj Noemí toj bʼe tej tmeltzʼaj toj tnam Judá (Rut 1:16). Ax ikx, el tnikʼ Noemí tiʼj qa onin Jehová kyiʼj tej tkubʼ tyekʼin Boaz tbʼanel tmod kyiʼj. Attoq toklen Boaz tuʼn tkwentin kyiʼj (Rut 2:19, 20b). * Kubʼlo t-ximen Noemí jlu: «Atzun jaʼlo, in nel nnikʼe tiʼj qa mintiʼ o chin kyaj koline tuʼn Jehová. Kukx o ten wukʼile toj tkyaqil ambʼil» (kjawil uʼjit Salmo 136:23, 26). Jaku txi qqʼamaʼn qa xi tqʼoʼn chjonte te Rut ex te Boaz tuʼnju mintiʼ e sikt ex kukx e onin tiʼj. Kyoxil kubʼ kynaʼn nim tzalajbʼil tej ttzalaj Noemí juntl maj ex tej tex twitz nya bʼaʼn.

24. ¿Tiquʼn qaj tuʼn tkubʼ qyekʼin qkʼujlabʼil tzʼaqli kyiʼj erman?

²⁴ ¿Tiʼ xnaqʼtzbʼil ma tzʼel qnikʼ tiʼj toj uʼj te Rut tiʼj kʼujlabʼil tzʼaqli? Qa at qkʼujlabʼil tzʼaqli, kʼonil qiʼj tuʼn kukx qonin kyiʼj erman in che bʼisun ex tuʼn miʼn qsikt tuʼn tbʼant jlu quʼn. Ax ikx, in nonin qiʼj tuʼn kybʼant junjun tiʼchaq quʼn tuʼn qonin kyiʼj. Ex in xi kyqʼamaʼn ansyan tbʼanel yol kye qeju in kubʼ kyyekʼin kykʼujlabʼil tzʼaqli kyiʼj txqantl. In kubʼ qnaʼn nim tzalajbʼil aj in ten kyipumal erman juntl maj tuʼn kyajbʼen te Jehová (Hech. 20:35). Pero bʼaʼn tuʼn ttzaj qnaʼn tiquʼn in kubʼ qyekʼin qkʼujlabʼil tzʼaqli kyiʼj txqantl. In kubʼ qyekʼin jlu tuʼnju qaj tuʼn tel qkanoʼn tiʼj Jehová, aju Dios at nim tkʼujlabʼil tzʼaqli qiʼj ex qaj tuʼn ttzalaj (Éx. 34:6; Sal. 33:22).